ԵԴ1/2663/01/25

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
Երևան քաղաքի առաջին ատյանի
ընդհանուր իրավասության
քրեական դատարանը (այսուհետ՝ նաև Դատարան)
նախագահող դատավոր Ա.Ասատրյան
դատական նիստի քարտուղար Ս.Սիմոնյան
մասնակցությամբ`
հանրային մեղադրող Վ.Հարությունյանի
պաշտպան Ա.Հակոբյանի
մեղադրյալ Ռ.Գևորգյանի

2025 թվականի սեպտեմբերի 9-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի` Ռուզաննա Ստեփանի Գևորգյանի (ծնված՝ 1978 թվականի հունվարի 5-ին, ազգությամբ հայ, ՀՀ քաղաքացի, հաշվառված է Երևան քաղաքի, Մալաթիա-Սեբաստիա համայնքի, Հաղթանակ 11-րդ փողոցի, 31-րդ տուն հասցեում)՝ ՀՀ քրեական օրենսգրքի 457-րդ հոդվածի 1-ին մասով՝ 5 դրվագով, 469-րդ հոդվածի 1-ին մասով՝ 4 դրվագով և 44-469-րդ հոդվածի 1-ին մասով
Պ Ա Ր Զ Ե Ց
1. Գործի դատավարական նախապատմությունը.
2025 թվականի հուլիսի 16-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 58217325 քրեական գործն ըստ մեղադրանքի Ռուզաննա Ստեփանի Գևորգյանի՝ ՀՀ քրեական օրենսգրքի 457-րդ հոդվածի 1-ին մասով՝ 5 դրվագով, 469-րդ հոդվածի 1-ին մասով՝ 4 դրվագով և 44-469-րդ հոդվածի 1-ին մասով:
Քրեական գործին շնորհվել է թիվ ԵԴ1/2663/01/25 համարը:
2025 թվականի հուլիսի 17-ին որոշում է կայացվել Ռուզաննա Գևորգյանի վերաբերյալ թիվ ԵԴ1/2663/01/25 քրեական գործով՝ վարույթ ստանձնելու և նախնական դատալսումներ նշանակելու մասին:
Նախնական դատալսումների ընթացքում Դատարանը, անդրադառնալով ՀՀ քրեական դատավարության օրենսգրքի 316-րդ հոդվածով նախատեսված հարցին, որոշում է կայացրել մեղադրյալի նկատմամբ մինչդատական վարույթի ընթացքում ընտրված խափանման միջոցը` բացակայելու արգելքը, անփոփոխ թողնելու մասին:
2. Մեղադրանքի փաստական նկարագրությունը.
Ռուզաննա Գևորգյանին ՀՀ քրեական օրենսգրքի 457-րդ հոդվածի 1-ին մասով՝ 5 դրվագով, 469-րդ հոդվածի 1-ին մասով՝ 4 դրվագով և 44-469-րդ հոդվածի 1-ին մասով մեղադրանք է ներկայացվել այն բանի համար, որ նա «ձեռք է բերել պետական մարմնի կողմից տրվող, իրավունք վերապահող կեղծ փաստաթուղթ, այն է՝ իր լուսանկարով, սակայն բովանդակությամբ կեղծ՝ Ռոզա Վալերիի Մամեդովա (ծնվ. 05.01.1978թ., ազգությամբ ադրբեջանցի) անհատականացնող տվյալներով լրացված Ֆրանսիայի Հանրապետության թիվ 21ZV15775 ճամփորդական անձնագիրը և դրա օգտագործմամբ, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, 2023-2025 թվականների ընթացքում 4 անգամ ապօրինի՝ առանց սահմանված փաստաթղթերի և պատշաճ թույլտվության հատել է ՀՀ պետական սահմանը, ինչպես նաև՝ նույն կեղծ փաստաթղթի օգտագործմամբ ապօրինի՝ առանց սահմանված փաստաթղթերի և պատշաճ թույլտվության փորձել է հատել ՀՀ պետական սահմանը և մուտք գործել ՀՀ:
Այսպես.
2023 թվականի հունիսի 24-ին, Ռուզաննա Գևորգյանը, ժամանելով Հայաստանի Հանրապետություն, «Զվարթնոց» հսկիչ-անցագրային կետում օգտագործել է պետական մարմնի կողմից տրվող, իրավունք վերապահող կեղծ փաստաթուղթ, այն է՝ իր լուսանկարով, սակայն Ռոզա Վալերիի Մամեդովա (ծնվ. 05.01.1978թ., ազգությամբ ադրբեջանցի) անհատականացնող տվյալներով լրացված Ֆրանսիայի Հանրապետության ճամփորդական թիվ 21ZV15775 կեղծ անձնագիրը, և ապօրինի` առանց սահմանված փաստաթղթերի ու պատշաճ թույլտվության, հատելով ՀՀ պետական սահմանը մուտք է գործել ՀՀ:
Բացի այդ, 2023 թվականի հուլիսի 15-ին Ռուզաննա Գևորգյանը ՀՀ-ից մեկնելիս, «Զվարթնոց» հսկիչ-անցագրային կետում օգտագործել է պետական մարմնի կողմից տրվող, իրավունք վերապահող կեղծ փաստաթուղթ, այն է՝ իր լուսանկարով, սակայն Ռոզա Վալերիի Մամեդովա (ծնվ. 05.01.1978թ., ազգությամբ ադրբեջանցի) անհատականացնող տվյալներով լրացված Ֆրանսիայի Հանրապետության ճամփորդական թիվ 21ZV15775 կեղծ անձնագիրը, և ապօրինի՝ առանց սահմանված փաստաթղթերի ու պատշաճ թույլտվության, հատելով ՀՀ պետական սահմանը՝ մեկնել է ՀՀ-ից:
Բացի այդ, 2025 թվականի հունվարի 25-ին, ժամանելով Հայաստանի Հանրապետություն, «Զվարթնոց» հսկիչ-անցագրային կետում օգտագործել է պետական մարմնի կողմից տրվող, իրավունք վերապահող կեղծ փաստաթուղթ, այն է՝ իր լուսանկարով, սակայն Ռոզա Վալերիի Մամեդովա (ծնվ. 05.01.1978թ., ազգությամբ ադրբեջանցի) անհատականացնող տվյալներով լրացված Ֆրանսիայի Հանրապետության ճամփորդական թիվ 21ZV15775 կեղծ անձնագիրը, և ապօրինի` առանց սահմանված փաստաթղթերի ու պատշաճ թույլտվության, հատելով ՀՀ պետական սահմանը մուտք է գործել ՀՀ:
Բացի այդ, 2025 թվականի փետրվարի 8-ին Ռուզաննա Գևորգյանը ՀՀ-ից մեկնելիս, «Զվարթնոց» հսկիչ-անցագրային կետում օգտագործել է պետական մարմնի կողմից տրվող, իրավունք վերապահող կեղծ փաստաթուղթ, այն է՝ իր լուսանկարով, սակայն Ռոզա Վալերիի Մամեդովա (ծնվ. 05.01.1978թ., ազգությամբ ադրբեջանցի) անհատականացնող տվյալներով լրացված Ֆրանսիայի Հանրապետության ճամփորդական թիվ 21ZV15775 կեղծ անձնագիրը, և ապօրինի՝ առանց սահմանված փաստաթղթերի ու պատշաճ թույլտվության, հատելով ՀՀ պետական սահմանը՝ մեկնել է ՀՀ-ից:
Բացի այդ, 2025 թվականի հունիսի 15-ին, Ռուզաննա Գևորգյանը Ֆրանկֆուրտ-Երևան թիվ 1560 չվերթով Հայաստանի Հանրապետություն ժամանելիս, «Զվարթնոց» հսկիչ- անցագրային կետում օգտագործել է պետական մարմնի կողմից տրվող, իրավունք վերապահող կեղծ փաստաթուղթ, այն է՝ իր լուսանկարով, սակայն Ռոզա Վալերիի Մամեդովա (ծնվ. 05.01.1978թ., ազգությամբ ադրբեջանցի) անհատականացնող տվյալներով լրացված Ֆրանսիայի Հանրապետության ճամփորդական թիվ 21ZV15775 կեղծ անձնագիրը, և ապօրինի՝ առանց սահմանված փաստաթղթերի ու պատշաճ թույլտվության, փորձել է հատել ՀՀ պետական սահմանը և մուտք գործել Հայաստանի Հանրապետություն, սակայն նրա դիտավորության մեջ ընդգրկված` ՀՀ պետական սահմանն ապօրինի հատելու հանցագործությունն իր կամքից անկախ հանգամանքներով չի իրագործվել, քանի որ բռնվել է սահմանապահ ծառայողների կողմից»։
3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում մեղադրյալ Ռուզաննա Գևորգյանը ներկայացրեց արագացված վարույթ կիրառելու մասին միջնորդություն՝ հայտնելով, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Պաշտպան Ա.Հակոբյանը միացավ մեղադրյալի միջնորդությանը:
Հանրային մեղադրող Վ.Հարությունյանը չառարկեց արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1 հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1 հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
- Լրացուցիչ դատալսումների ընթացքում հետազոտվել են ՀՀ քրեական դատավարության օրենսգրքի 345-րդ հոդվածով նախատեսված հարցերի քննարկմանը համար անհրաժեշտ ապացույցները (տես դատական նիստի արձանագրությունը):
4. Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
- Ռուզաննա Գևորգյանը նախկինում դատապարտված չի եղել, բնութագրվում է դրականորեն,
- Ռուզաննա Գևորգյանի խնամքին է առողջական խնդիր ունեցող և կենսաթոշակառու ծնողը,
- ներկայացված մեղադրանքում Ռուզաննա Գևորգյանն իրեն լիովին մեղավոր է ճանաչել, զղջացել է կատարածի համար, տվել է խոստովանական ցուցմունք,
- մեղսագրվող հանցանքն ավարտվելու օրվան նախորդող 12 ամիսների ընթացքում Ռուզաննա Գևորգյանի ստացած եկամտի վերաբերյալ տվյալներ առկա չեն։
5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Ռուզաննա Գևորգյանին վերագրվող փաստական հանգամանքները (արարքները), այդ արարքների քրեական հակաիրավականությունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ, ինչպես նաև գտնում է, որ մեղադրյալի արարքների նկատմամբ պետք է կիրառվի ՀՀ քրեական օրենսգրքի 457-րդ հոդվածի 1-ին մասը՝ 5 դրվագով, 469-րդ հոդվածի 1-ին մասը՝ 4 դրվագով և 44-469-րդ հոդվածի 1-ին մասը։
Դատարանի կողմից հաստատված փաստական հանգամանքների հիման վրա Դատարանը գտնում է, որ Ռուզաննա Գևորգյանի անձը բնութագրող հանգամանք է նախկինում դատապարտված չլինելը, դրականորեն բնութագրվելը:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Ռուզաննա Գևորգյանի պատասխանատվությունն ու պատիժը մեղմացնող հանգամանք պետք է դիտել՝ ներկայացված մեղադրանքում իրեն լիովին մեղավոր ճանաչելը, կատարածի համար զղջալը, խոստովանական ցուցմունք տալը, խնամքին՝ առողջական խնդիր ունեցող և կենսաթոշակառու ծնողի առկայությունը։
Վերը նշվածը՝ պատասխանատվությունը և պատիժը մեղմացնող հանգամանքները Ռուզաննա Գևորգյանի կատարած բոլոր հանցանքներով առկա են:
Դատարանը, ղեկավարվելով ՀՀ քրեական օրենսգրքի 71-րդ հոդվածի 1-ին մասով, գտնում է, որ Ռուզաննա Գևորգյանի պատասխանատվությունն ու պատիժը ծանրացնող հանգամանք առկա չէ:
Դատարանը գտնում է, որ կատարած հանցանքների համար մեղադրյալ Ռուզաննա Գևորգյանը ենթակա է պատժի։
Դատարանը, հաշվի առնելով Ռուզաննա Գևորգյանի կատարած հանցանքների հանգամանքները, նրա անձը բնութագրող, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքի բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 457-րդ հոդվածի 1-ին մասի և 469-րդ հոդվածի 1-ին մասի սանկցիաներով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ հիմնական պատիժ պետք է նշանակել տուգանքի ձևով:
Դատարանը գտնում է նաև, որ Ռուզաննա Գևորգյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Հիմք ընդունելով ՀՀ քրեական օրենսգրքի 3-րդ հոդվածի 1-ին մասի 6-րդ կետը, նույն օրենսգրքի 59-րդ հոդվածի 3-րդ մասը և հաշվի առնելով, որ մեղսագրվող հանցանքն ավարտվելու օրվան նախորդող 12 ամիսների ընթացքում Ռուզաննա Գևորգյանի ստացած եկամտի վերաբերյալ տվյալներ առկա չեն՝ Դատարանը գտնում է, որ տուգանքի չափը պետք է հաշվարկվի հանցանքները կատարելու պահին` 2023 և 2025 թվականներին, նվազագույն աշխատավարձի, այն է՝ 75.000 (յոթանասունհինգ հազար) ՀՀ դրամի չափով (տե՛ս «Նվազագույն ամսական աշխատավարձի մասին» ՀՀ օրենքը)։
Այսպիսով, Դատարանը գտնում է, որ Ռուզաննա Գևորգյանի նկատմամբ ՀՀ քրեական օրենսգրքի 457-րդ հոդվածի 1-ին մասով՝ 5 դրվագով՝ յուրաքանչյուր դրվագով պատիժ պետք է նշանակել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամ գումարի չափով, ՀՀ քրեական օրենսգրքի 469-րդ հոդվածի 1-ին մասով՝ 4 դրվագով՝ յուրաքանչյուր դրվագով պատիժ պետք է նշանակել տուգանք՝ նվազագույն աշխատավարձի տասնապատիկի՝ 750.000 (յոթ հարյուր հիսուն հազար) ՀՀ դրամ գումարի չափով, ՀՀ քրեական օրենսգրքի 44-469-րդ հոդվածի 1-ին մասով պատիժ պետք է նշանակել տուգանք՝ նվազագույն աշխատավարձի տասնապատիկի՝ 750.000 (յոթ հարյուր հիսուն հազար) ՀՀ դրամ գումարի չափով:
Միաժամանակ Դատարանը գտնում է, որ ՀՀ քրեական օրենսգրքի 74-րդ հոդվածով սահմանված կարգով, հանցանքների համակցությամբ՝ Ռուզաննա Գևորգյանի նկատմամբ վերջնական պատիժ պետք է նշանակել տուգանք՝ 3.750.000 (երեք միլիոն յոթ հարյուր հիսուն հազար) ՀՀ դրամ գումարի չափով: Ընդ որում՝ Ռուզաննա Գևորգյանի նկատմամբ պատիժ նշանակելիս կիրառելի է ՀՀ քրեական օրենսգրքի 74-րդ հոդվածի 1-ին մասի 3-րդ նախադասությամբ սահմանված կանոնը:
Դատարանը գտնում է նաև, որ Ռուզաննա Գևորգյանի՝ սույն քրեական գործով փաստացի անազատության մեջ գտնվելու 1-օրյա ժամկետի հաշվառմամբ՝ որպես պատիժ պետք է թողնել տուգանք՝ 3.725.000 (երեք միլիոն յոթ հարյուր քսանհինգ հազար) ՀՀ դրամ գումարի չափով:
Հիմք ընդունելով ՀՀ քրեական օրենսգրքի 59-րդ հոդվածի 8-րդ մասը և հաշվի առնելով մեղադրյալ Ռուզաննա Գևորգյանն ի վիճակի չէ անհապաղ և ամբողջությամբ վճարելու 3.725.000 (երեք միլիոն յոթ հարյուր քսանհինգ հազար) ՀՀ դրամի չափով նշանակված տուգանքը (դատաքննության ընթացքում հայտնել է, որ ի վիճակի չի լինի անհապաղ և ամբողջությամբ վճարելու տուգանքը)՝ Դատարանը գտնում է, որ նրան պետք է թույլատրել նշանակված տուգանքը վճարել մաս առ մաս՝ 1 (մեկ) տարվա ընթացքում՝ առաջին ամիսը նվազագույնը 425.000 (չորս հարյուր քսանհինգ հազար) ՀՀ դրամ, իսկ մնացած ամիսները՝ յուրաքանչյուր ամիս նվազագույնը 300.000 (երեք հարյուր հազար) ՀՀ դրամ վճարելու պայմանով:
Դատարանը գտնում է, որ մեղադրյալ Ռուզաննա Գևորգյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն:
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-13-րդ հարցերին անդրադառնալու անհրաժեշտությունը սույն քրեական գործով բացակայում է։
Դատարանը, քննարկելով իրեղեն ապացույցի տնօրինման հարցը, գտնում է, որ ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության ՀԿԳ քննիչ Ռ.Հակոբյանի 2025 թվականի հուլիսի 3-ի որոշմամբ իրեղեն ապացույց ճանաչված՝ MAMEDOVA ROZA VALEROVNA կենսագրական տվյալներով անձի՝ թիվ 21ZV15775 ճամփորդական անձնագիրը՝ պետք է պահել վարույթի նյութերի հետ՝ դրանք պահելու ամբողջ ընթացքում:
Դատարանը գտնում է, որ Ռուզաննա Գևորգյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ` մինչև դատավճռի օրինական ուժի մեջ մտնելը, քանի որ մեղադրական դատավճիռ կայացնելու և տուգանքի ձևով պատիժ նշանակելու պայմաններում առկա է ողջամիտ ենթադրություն առ այն, որ մեղադրյալը, օգտագործելով անձը հաստատող փաստաթուղթ, կարող է հեռանալ Հայաստանի Հանրապետությունից՝ այդպիսով դիմելով փախուստի կամ չկատարելով իր վրա դրված պարտականությունները, իսկ բացակայելու արգելքի կիրառումը բավարար է մեղադրյալի փախուստը կանխելու և նրա վրա դրված պարտականությունների կատարումն ապահովելու համար։
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Ռուզաննա Գևորգյանից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4 հոդվածի 3-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 276-րդ, 347-349-րդ, 464.4 և 464.5 հոդվածներով՝ Դատարանը
Վ Ճ Ռ Ե Ց
Ռուզաննա Ստեփանի Գևորգյանին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով՝ 5 դրվագով, 469-րդ հոդվածի 1-ին մասով՝ 4 դրվագով և 44-469-րդ հոդվածի 1-ին մասով:
ՀՀ քրեական օրենսգրքի 457-րդ հոդվածի 1-ին մասով՝ 5 դրվագով՝ յուրաքանչյուր դրվագով Ռուզաննա Ստեփանի Գևորգյանի նկատմամբ պատիժ նշանակել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամ գումարի չափով:
ՀՀ քրեական օրենսգրքի 469-րդ հոդվածի 1-ին մասով՝ 4 դրվագով յուրաքանչյուր դրվագով Ռուզաննա Ստեփանի Գևորգյանի նկատմամբ պատիժ նշանակել տուգանք՝ նվազագույն աշխատավարձի տասնապատիկի՝ 750.000 (յոթ հարյուր հիսուն հազար) ՀՀ դրամ գումարի չափով:
ՀՀ քրեական օրենսգրքի 44-469-րդ հոդվածի 1-ին մասով՝ Ռուզաննա Ստեփանի Գևորգյանի նկատմամբ պատիժ նշանակել տուգանք՝ նվազագույն աշխատավարձի տասնապատիկի՝ 750.000 (յոթ հարյուր հիսուն հազար) ՀՀ դրամ գումարի չափով:
ՀՀ քրեական օրենսգրքի 74-րդ հոդվածի կարգով, հանցանքների համակցությամբ` Ռուզաննա Ստեփանի Գևորգյանի նկատմամբ վերջնական պատիժ նշանակել տուգանք՝ 3.750.000 (երեք միլիոն յոթ հարյուր հիսուն հազար) ՀՀ դրամ գումարի չափով:
Ռուզաննա Ստեփանի Գևորգյանի՝ սույն քրեական գործով փաստացի անազատության մեջ գտնվելու 1-օրյա ժամկետի հաշվառմամբ՝ որպես պատիժ թողնել տուգանք՝ 3.725.000 (երեք միլիոն յոթ հարյուր քսանհինգ հազար) ՀՀ դրամ գումարի չափով:
ՀՀ քրեական օրենսգրքի 59-րդ հոդվածի 8-րդ մասի կարգով՝ թույլատրել Ռուզաննա Ստեփանի Գևորգյանին սույն դատավճռով նշանակված 3.725.000 (երեք միլիոն յոթ հարյուր քսանհինգ հազար) ՀՀ դրամ գումարի չափով տուգանքը վճարել մաս առ մաս՝ 1 (մեկ) տարվա ընթացքում՝ առաջին ամիսը նվազագույնը 425.000 (չորս հարյուր քսանհինգ հազար) ՀՀ դրամ, իսկ մնացած ամիսները՝ յուրաքանչյուր ամիս նվազագույնը 300.000 (երեք հարյուր հազար) ՀՀ դրամ վճարելու պայմանով:
Ռուզաննա Ստեփանի Գևորգյանի նկատմամբ ընտրված խափանման միջոցը` բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո քրեական գործով իրեղեն ապացույցը տնօրինել՝ դատավճռի պատճառաբանական մասում նշված կարգով:
Վարութային ծախսերի հարցը համարել լուծված:
Դատավճիռը կարող է բողոքարկվել վերաքննիչ քրեական դատարան ստանալու օրվանից հետո՝ մեկամսյա ժամկետում, բացառությամբ ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով:


ԴԱՏԱՎՈՐ ԱՐԱՄԱՅԻՍ ԱՍԱՏՐՅԱՆ