ԵԴ1/2452/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«08» սեպտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Նազիկ Աթոյանի,
Ագնետա Հակոբյանի,

մասնակցությամբ՝
հանրային մեղադրող՝ Վազգեն Եդիգարյանի,
մեղադրյալ՝ Վաչագան Խաչատրյանի,

դռնբաց դատական նիստում քննելով քրեական գործն ըստ մեղադրանքի՝
Վաչագան Վաղարշակի Խաչատրյանի՝
(ծնված՝ 08.02.1961թ. ք.Երևան, ազգությամբ հայ, ՀՀ քաղաքացի, ամուսնացած, չի աշխատում, միջնակարգ կրթությամբ, նախկինում չդատապարտված, հաշվառված և բնակվող՝ ք. Երևան, Ջրաշեն, 1-ին փողոց, 49-րդ տուն հասցեում, որպես խափանման միջոց է կիրառվել բացակայելու արգելքը) ՀՀ քրեական օրենսգրքի 344-րդ հոդվածի 1-ին մասով,

ՊԱՐԶԵՑ

1. Քրեական գործի դատավարական նախապատմությունը.
2025 թվականի հունվարի 10-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության հատկանիշներով նախաձեռնվել է թիվ 60108425 քրեական վարույթը:
2025 թվականի հունիսի 20-ին ՀՀ դատախազության Երևան քաղաքի Էրեբունի և Նուբարաշեն վարչական շրջանների դատախազության դատախազ Վ.Եդիգարյանի որոշմամբ՝ թիվ 60108425 քրեական վարույթով Վաչագան Վաղարշակի Խաչատրյանի նկատմամբ ՀՀ քրեական օրենսգրքի 344-րդ հոդվածի 1-ին մասով հարուցվել է հանրային քրեական հետապնդում:
2025 թվականի հուլիսի 08-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/2452/01/25 քրեական գործն ըստ մեղադրանքի՝ Վաչագան Վաղարշակի Խաչատրյանի՝ ՀՀ քրեական օրենսգրքի 344-րդ հոդվածի 1-ին մասով:
Նույն օրը քրեական գործը էլեկտրոնային եղանակով մակագրվել և 2025 թվականի հուլիսի 09-ին հանձնվել է դատավոր Տաթևիկ Մուրադյանին:
2025 թվականի հուլիսի 11-ին Դատարանի կողմից որոշում է կայացվել թիվ ԵԴ1/2452/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի օգոստոսի 18-ին Դատարանը թիվ ԵԴ1/2452/01/25 քրեական գործով կայացրել է մեղադրական վերդիկտ՝ Վաչագան Վաղարշակի Խաչատրյանին մեղավոր ճանաչելով ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարման մեջ:
2. Մեղադրանքի փաստական նկարագրությունը.
Վաչագան Վաղարշակի Խաչատրյանին մեղադրանք է ներկայացվել ՀՀ քրեական օրենսգրքի 344-րդ հոդվածի 1-ին մասով այն բանի համար, որ «նա, զրկված լինելով տրանսպորտային միջոց վարելու իրավունքից, վարել է տրանսպորտային միջոց։
Այսպես.
Վաչագան Վաղարշակի Խաչատրյանը, թիվ 8180416495 որոշմամբ 02.11.2024թ.-ից մինչև 02.11.2025թ. զրկված լինելով տրանսպորտային միջոց վարելու իրավունքից և պատշաճ տեղեկացված լինելով սույն որոշման մասին, 2024 թվականի դեկտեմբերի 18-ին՝ ժամը 16:45-ի սահմաններում, Երևան քաղաքի Էրեբունու փողոցում վարել է «ՕՊԵԼ» մակնիշի 22 PP 050 հաշվառման համարանիշի ավտոմեքենան, ինչի վերաբերյալ ՀՀ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180417722 արձանագրությունը»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Մեղադրյալ Վաչագան Վաղարշակի Խաչատրյանը, օգտվելով իր սահմանադրական իրավունքից, հրաժարվեց ցուցմունք տալ։
(դատական նիստի արձանագրություն)
- ՀՀ ՆԳՆ ոստիկանության պարեկային ծառայության Երևան քաղաքի գնդից Վաչագան Վաղարշակի Հարությունյանի վերաբերյալ ստացված փաստաթղթերը 16.06.2025 թվականին զննության ենթարկելու մասին արձանագրությունը, համաձայն որի՝ 02.11.2024 թվականին ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 2-րդ վաշտի պարեկ Սերգե Ռուբենյանի կողմից կայացվել է թիվ 8180416495 որոշումը, համաձայն որի՝ Վաչագան Վաղարշակի Խաչատրյանը մեկ տարի ժամկետով զրկվել է տրանսպորտային միջոցներ վարելու իրավունքից: «Որոշման պատճենը և կատարման կարգի մասին քաղվածն ստացա» հատվածում է առկա է ստորագրություն, և նշված է հետևյալ թվային գրառումը՝ 02.11.2024։
18.12.2024 թվականին՝ ժամը 07:15-ին, Երևան քաղաքի Ամերիկյան փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի կրտսեր պարեկ Հովհաննես Մկրտչյանի /կրծքանշան թիվ 08466/ կողմից կազմվել է վարչական իրավախախտման վերաբերյալ արձանագրություն, համաձայն որի՝ Վաչագան Վաղարշակի Խաչատրյանը 18.12.2024 թվականին` ժամը 06:45-ին, զրկված լինելով տրանսպորտային միջոցներ վարելու իրավունքից, Երևան քաղաքի Էրեբունու փողոցում վարել է «Օպել» մակնիշի 22 PP 050 հաշվառման համարանիշի տրանսպորտային միջոցը: Արձանագրության՝ վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն, իսկ արձանագրությանը ծանոթացա, իմ իրավունքների պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն: Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված է 202.1 թիվը:
ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից արտատպված վարորդական իրավունքի վկայականից զրկված լինելու վերաբերյալ քաղվածքի համաձայն՝ վարորդական իրավունքի վկայականից զրկված է: Զրկման սկիզբն է՝ 02.11.2024թ. ավարտը՝ 02.11.2025թ.:
(գ.թ. 4-5, 8, 13-14, դատական նիստի արձանագրություն)
- Նախաքննության մարմնի կողմից 2025 թվականի հունիսի 16-ին կազմված՝ ՀՀ ՆԳՆ ոստիկանության պարեկային ծառայության Երևան քաղաքի գնդից Վաչագան Վաղարշակի Խաչատրյանի վերաբերյալ ստացված ՀՀ ՆԳՆ ոստիկանության պարեկային ծառայության 2-րդ գումարտակի 2-րդ վաշտի պարեկ Սերգե Ռուբենյանի կողմից 02.11.2024 թվականին կայացված թիվ 8180416495 որոշումը, ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի կրտսեր պարեկ Հովհաննես Մկրտչյանի կողմից 18.12.2024 թվականին կազմված վարչական իրավախախտման վերաբերյալ արձանագրությունը, ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից արտատպված վարորդական իրավունքի վկայականից զրկված լինելու վերաբերյալ քաղվածքը արտավարութային փաստաթուղթ ճանաչելու վերաբերյալ որոշումը:
(գ.թ. 15-16, դատական նիստի արձանագրություն)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Վաչագան Վաղարշակի Խաչատրյանը նախկինում դատապարտված չի եղել:
 Միասնական էլեկտրոնային տեղեկատվական համակարգում կատարված հարցման պատասխանի համաձայն՝ ՊԵԿ տվյալների շտեմարանում Վաղինակ Խաչատրյանի կողմից հանցանքը կատարելուն նախորդող տասներկու ամիսների ընթացքում ստացած եկամուտների վերաբերյալ տվյալները բացակայում են:
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Վաչագան Վաղարշակի Խաչատրյանը, թիվ 8180416495 որոշմամբ 02.11.2024թ.-ից մինչև 02.11.2025թ. զրկված լինելով տրանսպորտային միջոց վարելու իրավունքից և պատշաճ տեղեկացված լինելով սույն որոշման մասին, 2024 թվականի դեկտեմբերի 18-ին՝ ժամը 16:45-ի սահմաններում, Երևան քաղաքի Էրեբունու փողոցում վարել է «ՕՊԵԼ» մակնիշի 22 PP 050 հաշվառման համարանիշի ավտոմեքենան, ինչի վերաբերյալ ՀՀ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180417722 արձանագրությունը:
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Վաչագան Վաղարշակի Խաչատրյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Վաչագան Վաղարշակի Խաչատրյանը նախկինում դատապարտված չի եղել, մեղսագրվող հանցանքը ավարտվելու օրվան նախորդող 12 ամիսների ընթացքում վերջինիս ստացած ընդհանուր եկամուտների վերաբերյալ տվյալները բացակայում են:
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Վաչագան Վաղարշակի Խաչատրյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Վաչագան Վաղարշակի Խաչատրյանը կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 344-րդ հոդվածի 1-ին մասը:
Դատարանը, հաստատված համարելով հանցագործության և դրա կատարման մեջ Վաչագան Վաղարշակի Խաչատրյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
Դատարանն արձանագրում է, որ Վաղինակ Խաչատրյանի պատասխանատվությունն ու պատիժը մեղմացնող և ծանրացնող հանգամանքներ առկա չեն:
Որպես մեղադրյալի անձը բնութագրող հանգամանք՝ Դատարանը հաշվի է առնում տարիքը, այդ թվում՝ նախկում դատապարտված չլինելը։
Դատարանը, հաշվի առնելով Վաչագան Վաղարշակի Խաչատրյանի կատարած հանցանքի հանգամանքները, նրա անձը բնութագրող տվյալները, պատասխանատվությունը և պատիժը մեղմացնող և ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 1-ին մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործության կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ ՀՀ քրեական օրենսգրքի 344-րդ հոդվածի 1-ին մասով հիմնական պատիժ պետք է նշանակել տուգանքի ձևով, ընդ որում տուգանքի չափ սահմանելով՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
Դատարանը միաժամանակ գտնում է, որ կատարած հանցանքի համար Վաչագան Վաղարշակի Խաչատրյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Միաժամանակ հաշվի առնելով վերջինիս գույքային դրության վերաբերյալ գործում առկա տվյալները և մեղադրյալի հայտարարությունը՝ Դատարանը գտնում է, որ Վաչագան Վաղարշակի Խաչատրյանի նկատմամբ նշանակվող տուգանքի վճարումը պետք է տարաժամկետել և նրան թույլատրել որպես պատիժ նշանակված ՝ 375.000 (երեք հարյուր յոթանասունհինգ հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա մյուս հարցերին, արձանագրում է, որ գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական վարույթով առկա չեն նաև վարութային ծախսեր:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ և 352-353-րդ հոդվածներով` Դատարանը

ՎՃՌԵՑ

Վաչագան Վաղարշակի Խաչատրյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
Վաչագան Վաղարշակի Խաչատրյանին թույլատրել որպես պատիժ նշանակված՝ 375.000 (երեք հարյուր յոթանասունհինգ հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Վաչագան Վաղարշակի Խաչատրյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել։
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ