ԵԴ1/2410/01/25
Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
Երևան քաղաքի առաջին ատյանի
ընդհանուր իրավասության
քրեական դատարանը (այսուհետ՝ նաև Դատարան)
նախագահող դատավոր Ա.Ասատրյան
դատական նիստի քարտուղար Ս.Սիմոնյան
մասնակցությամբ`
հանրային մեղադրող Ռ․Բախշյանի
պաշտպան Հ․Ջհանգիրյանի
մեղադրյալ Ա․Քիշմիրյանի

2026 թվականի ապրիլի 9-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի` Արա Լևոնի Քիշմիրյանի (ծնված՝ 1986 թվականի մարտի 3-ին, ազգությամբ հայ, ՀՀ քաղաքացի, հաշվառված է Երևան քաղաքի, Քանաքեռ-Զեյթուն բնակավայրի, Մկրտիչ Սարգսյան փողոցի, 38-րդ շենքի, 5-րդ բնակարան հասցեում, բնակվում է Երևան քաղաքի, Մանանդյան փողոցի, ½ շենքի, 4-րդ բնակարան հասցեում)՝ ՀՀ քրեական օրենսգրքի 344-րդ հոդվածի 2-րդ մասով՝
Պ Ա Ր Զ Ե Ց
1. Գործի դատավարական նախապատմությունը.
2025 թվականի հուլիսի 7-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 60164325 քրեական գործն ըստ մեղադրանքի Արա Լևոնի Քիշմիրյանի՝ ՀՀ քրեական օրենսգրքի 344-րդ հոդվածի 2-րդ մասով:
Քրեական գործին շնորհվել է թիվ ԵԴ1/2410/01/25 համարը:
2025 թվականի հուլիսի 9-ին որոշում է կայացվել Արա Քիշմիրյանի վերաբերյալ թիվ ԵԴ1/2410/01/25 քրեական գործով՝ վարույթ ստանձնելու և նախնական դատալսումներ նշանակելու մասին:
Նախնական դատալսումների ընթացքում Դատարանը, անդրադառնալով ՀՀ քրեական դատավարության օրենսգրքի 316-րդ հոդվածով նախատեսված հարցին, որոշում է կայացրել մեղադրյալի նկատմամբ որպես խափանման միջոց բացակայելու արգելքը, կիրառելու մասին:
2. Մեղադրանքի փաստական նկարագրությունը.
Արա Քիշմիրյանին ՀՀ քրեական օրենսգրքի 344-րդ հոդվածի 2-րդ մասով մեղադրանք է ներկայացվել այն բանի համար, որ նա «տրանսպորտային միջոցներ վարելու իրավունք չունենալով հարբած (ոչ սթափ) վիճակում վարել է տրանսպորտային միջոց:
Այսպես․
Արա Քիշմիրյանը, չունենալով տրանսպորտային միջոց վարելու իրավունք, ոչ սթափ վիճակում՝ 1 լիտր արտաշնչած օդի մեջ մաքուր ալկոհոլի պարունակությունը՝ 0.601մգ/լ, 2025 թվականի հունվարի 26-ին՝ ժամը 00:40-ի սահմաններում, Երևան քաղաքի Թամանցիների փողոցում վարել է «Նիսսան» մակնիշի, 36 PP 740 հաշվառման համարանիշի տրանսպորտային միջոցը, որը հայտնաբերվել է ՀՀ ոստիկանության պարեկային ծառայության պարեկի կողմից և կազմվել է վարչական իրավախախտման վերաբերյալ արձանագրություն»։
3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում մեղադրյալ Արա Քիշմիրյանը ներկայացրեց արագացված վարույթ կիրառելու մասին միջնորդություն՝ հայտնելով, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Պաշտպան Հ․Ջհանգիրյանը միացավ մեղադրյալի միջնորդությանը:
Հանրային մեղադրող Ռ․Բախշյանը չառարկեց արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1 հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1 հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
- ՀՀ պետական եկամուտների կոմիտեի հարկ վճարողների սպասարկման վարչության պետի՝ 2025 թվականի հուլիսի 24-ի գրությունը, ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանի ձև 8 և ձև 9 տեղեկանքները, Արա Քիշմիրյանի վերաբերյալ ՔԿԱԳ տվյալների շտեմարանում առկա տեղեկատվությունը, ՀՀ ԱՆ պրոբացիայի ծառայության Երևանի քաղաքային մարմնի պետի պարտականությունները կատարողի՝ 2025 թվականի հուլիսի 24-ի գրությունը:
4. Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
- Արա Քիշմիրյանը սույն քրեական գործով իրեն մեղսագրվող արարքի կատարման պահին ունեցել է դատվածություն, որն առաջացել է դիտավորյալ հանցագործություն կատարելու համար՝ ազատությունից զրկելու հետ կապված պատիժ նշանակելու հետևանքով (տե՛ս դատվածության և հետախուզման առկայության ձև 8 և ձև 9 հարցման պատճեները, թիվ 11127622 քրեական գործը)։ Մասնավորապես՝ Երևան քաղաքի առաջին ատյանի ընդհանուր իրավասության քրեական դատարանի՝ 2023 թվականի հունվարի 4-ի դատավճռով Արա Քիշմիրյանը մեղավոր է ճանաչվել 2003 թվականի ապրիլի 18-ի ՀՀ քրեական օրենսգրքի 243.1-րդ հոդվածի 2-րդ մասով և դատապարտվել է ազատազրկման 8 (ութ) ամիս ժամկետով: Արա Քիշմիրյանը պատժի կրումից ազատվել է 2024 թվականի սեպտեմբերի 29-ին։
- ներկայացված մեղադրանքում Արա Քիշմիրյանն իրեն լիովին մեղավոր է ճանաչել,
- Արա Քիշմիրյանի խնամքին է անչափահաս երեխան,
- մեղսագրվող հանցանքն ավարտվելու օրվան նախորդող 12 ամիսների ընթացքում Արա Քիշմիրյանի ստացած եկամտի վերաբերյալ տվյալներ առկա չեն:
5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Արա Քիշմիրյանին վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, ինչպես նաև գտնում է, որ մեղադրյալի արարքի նկատմամբ պետք է կիրառվի ՀՀ քրեական օրենսգրքի 344-րդ հոդվածի 2-րդ մասը։
Դատարանը, ղեկավարվելով ՀՀ քրեական օրենսգրքի 70-րդ հոդվածի 1-ին մասի 4-րդ կետով, գտնում է, որ Արա Քիշմիրյանի պատասխանատվությունն ու պատիժը մեղմացնող հանգամանք է պատիժ նշանակելու պահին վերջինի խնամքի տակ անչափահաս երեխայի առկայությունը:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Արա Քիշմիրյանի պատասխանատվությունն ու պատիժը մեղմացնող հանգամանք պետք է դիտել նաև՝ ներկայացված մեղադրանքում իրեն լիովին մեղավոր ճանաչելը։
Դատարանը միաժամանակ արձանագրում է, որ Արա Քիշմիրյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Ինչ վերաբերում է ՀՀ քրեական օրենսգրքի 71-րդ հոդվածի 1-ին մասի 1-ին կետով նախատեսված ծանրացնող հանգամանքին (հանցանքը դատվածություն ունեցող անձի կողմից կատարելը), ապա այն չի կարող հաշվի առնվել որպես ծանրացնող հանգամանք, քանի որ ներքոհիշյալ հիմնավորումներով Արա Քիշմիրյանի մոտ առկա է հանցագործությունների ռեցիդիվ, որի դեպքում նրա նկատմամբ պատիժ պետք է նշանակվի ՀՀ քրեական օրենսգրքի 76-րդ հոդվածով սահմանված կանոններով (տե՛ս ՀՀ քրեական օրենսգրքի 71-րդ հոդվածի 4-րդ մասը)։
Հիմք ընդունելով ՀՀ քրեական օրենսգրքի 54-րդ հոդվածը՝ Դատարանը գտնում է, որ տվյալ դեպքում առկա է հանցագործությունների ռեցիդիվ, քանի որ սույն դատավճռով հաստատված դիտավորյալ հանցանքը կատարելու ժամանակ՝ 2025 թվականի հունվարի 26-ին, Արա Քիշմիրյանը դատվածություն է ունեցել դիտավորյալ հանցագործության կատարման համար (Երևան քաղաքի առաջին ատյանի ընդհանուր իրավասության դատարանի՝ 2023 թվականի հունվարի 4-ի դատավճռով Արա Քիշմիրյանը մեղավոր է ճանաչվել 2003 թվականի ապրիլի 18-ի ՀՀ քրեական օրենսգրքի 243.1-րդ հոդվածի 2-րդ մասով և դատապարտվել ազատազրկման 8 (ութ) ամիս ժամկետով: Արա Քիշմիրյանը պատժի կրումից ազատվել է 2024 թվականի սեպտեմբերի 29-ին)։
Դատարանը գտնում է, որ կատարած հանցանքի համար մեղադրյալ Արա Քիշմիրյանը ենթակա է պատժի։
Պատիժ նշանակելու հարցի համատեքստում Դատարանը հարկ է համարում արձանագրել, որ Արա Քիշմիրյանի նկատմամբ պատիժ պետք է նշանակվի ՀՀ քրեական օրենսգրքի 76-րդ հոդվածի՝ հանցագործությունների ռեցիդիվի դեպքում պատիժ նշանակելու վերաբերելի կանոնների կիրառմամբ։
Հաշվի առնելով Արա Քիշմիրյանի կատարած հանցանքի հանգամանքները, նրա պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքի բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, Դատարանը գտնում է, որ ՀՀ քրեական օրենսգրքի 76-րդ հոդվածի վերաբերելի կանոնների կիրառմամբ և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նրա նկատմամբ հիմնական պատիժ պետք է նշանակել ազատազրկում՝ ազատազրկում՝ 1 (մեկ) տարի 4 (չորս) ամիս ժամկետով:
Դատարանը գտնում է, որ մեղադրյալ Արա Քիշմիրյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն:
Դատարանի գնահատմամբ՝ նախորդիվ արձանագրված ամբողջի համատեքստում՝ առանց ազատազրկման ձևով նշանակված պատիժը փաստացի կրելու, սույն գործով հնարավոր չէ հասնել պատժի նպատակների իրացվելիությանը:
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
Դատարանը գտնում է, որ Արա Քիշմիրյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ` մինչև դատավճռի օրինական ուժի մեջ մտնելը։
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Արա Քիշմիրյանից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4 հոդվածի 3-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 276-րդ, 347-349-րդ, 464.4 և 464.5 հոդվածներով՝ Դատարանը
Վ Ճ Ռ Ե Ց
Արա Լևոնի Քիշմիրյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով և նրա նկատմամբ պատիժ նշանակել ազատազրկում՝ 1 (մեկ) տարի 4 (չորս) ամիս ժամկետով:
Ազատազրկման ձևով նշանակված պատժի կրման սկիզբը հաշվել՝ Արա Լևոնի Քիշմիրյանին փաստացի արգելանքի վերցնելու օրվանից:
Արա Լևոնի Քիշմիրյանի նկատմամբ ընտրված խափանման միջոցը` բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Վարութային ծախսերի հարցը համարել լուծված:
Դատավճիռը կարող է բողոքարկվել վերաքննիչ քրեական դատարան ստանալու օրվանից հետո՝ մեկամսյա ժամկետում, բացառությամբ ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով:


ԴԱՏԱՎՈՐ ԱՐԱՄԱՅԻՍ ԱՍԱՏՐՅԱՆ