ԵԴ1/2379/01/25
Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
Երևան քաղաքի առաջին ատյանի
ընդհանուր իրավասության
քրեական դատարանը (այսուհետ՝ նաև Դատարան)
նախագահող դատավոր Ա.Ասատրյան
դատական նիստի քարտուղար Ս.Սիմոնյան
մասնակցությամբ`
հանրային մեղադրող Է.Պողոսյանի
տուժողներ Լ.Եղոյանի, Ս.Սարուխանյանի
պաշտպան Կ.Խաչատրյանի
մեղադրյալ Ս.Հարությունյանի

2026 թվականի փետրվարի 20-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի` Ստեփան Հարությունի Հարությունյանի (ծնված՝ 1990 թվականի հունիսի 19-ին, ազգությամբ հայ, ՀՀ քաղաքացի, հաշվառված և բնակվում է Երևան քաղաքի, Շենգավիթ բնակավայրի, Արարատյան փողոցի, 58/2 տուն հասցեում)՝ ՀՀ քրեական օրենսգրքի 171-րդ հոդվածի 2-րդ մասի 6-րդ կետով և 167-րդ հոդվածի 2-րդ մասի 9-րդ կետով
Պ Ա Ր Զ Ե Ց
Գործի դատավարական նախապատմությունը.
1. 2025 թվականի հուլիսի 7-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 11-0003-24 քրեական գործն ըստ մեղադրանքի Ստեփան Հարությունի Հարությունյանի՝ ՀՀ քրեական օրենսգրքի 171-րդ հոդվածի 2-րդ մասի 6-րդ կետով և 167-րդ հոդվածի 2-րդ մասի 9-րդ կետով:
Քրեական գործին շնորհվել է թիվ ԵԴ1/2379/01/25 համարը:
2025 թվականի հուլիսի 9-ին որոշում է կայացվել Ստեփան Հարությունյանի վերաբերյալ թիվ ԵԴ1/2379/01/25 քրեական գործով՝ վարույթ ստանձնելու և նախնական դատալսումներ նշանակելու մասին:
Նախնական դատալսումների ընթացքում Դատարանը, անդրադառնալով ՀՀ քրեական դատավարության օրենսգրքի 316-րդ հոդվածով նախատեսված հարցին, որոշում է կայացրել մեղադրյալի նկատմամբ մինչդատական վարույթի ընթացքում ընտրված խափանման միջոցը բացակայելու արգելքը անփոփոխ թողնելու մասին:
Համաձայնեցման վարույթ կիրառելու վերաբերյալ միջնորդություն.
2. Մինչև հիմնական դատալսումներ սկսելը Ստեփան Հարությունյանը ներկայացրեց համաձայնեցման վարույթ կիրառելու վերաբերյալ միջնորդություն, հայտնելով, որ համաձայն է իրեն մեղսագրվող արարքներին, միջնորդությունը ներկայացրել է կամավոր, խորհրդակցել է պաշտպանի հետ, գիտակցում է միջնորդության բնույթը և հետևանքները:
Հանրային մեղադրող Է.Պողոսյանը, տուժողներ Լ․Եղոյանը և Ս.Սարուխանյանը չառարկեցին համաձայնեցման վարույթ կիրառելու դեմ:
Դատարանը, համոզվելով, որ առկա չեն ՀՀ քրեական դատավարության օրենսգրքի 458-րդ հոդվածով նախատեսված համաձայնեցման վարույթի կիրառումը բացառող հանգամանքները, բավարարել է համաձայնեցման վարույթ կիրառելու մասին միջնորդությունը:
Բանակցությունների արդյունքում կողմերը եկել են համաձայնության, և կազմվել է համաձայնության մասին արձանագրություն հետևյալ բովանդակությամբ.
«մասնակցությամբ՝ Շենգավիթ վարչական շրջանի դատախազի տեղակալ, առաջին դասի խորհրդական Էդգար Պողոսյանի, մեղադրյալ Ստեփան Հարությունի Հարությունյանի (ծնված՝ 19.07.1990 թ., ազգությամբ հայ, ՀՀ քաղաքացի, նախկինում դատված, դատվածությունը մարված, ամուսնացած), պաշտպան Կ. Խաչատրյանի.
նշվում են մեղադրողի անունը, ազգանունը, զբաղեցրած պաշտոնը, ամբաստանյալի անունը, ազգանունը, հայրանունը, ծննդյան թիվը, ամիսը, օրը և ծննդավայրը, բնակության հասցեն, քաղաքացիությունը, կրթությունը, մայրենի լեզուն, աշխատանքի կամ ուսման վայրը, ամբաստանյալի մոտ դատվածության առկայությունը, ինչպես նաև այլ վերաբերելի տեղեկություններ, պաշտպանի անունը և ազգանունը.
2025 թվականի հունիսի 12-ին հսկող դատախազի որոշմամբ Ստեփան Հարությունի Հարությունյանի նկատմամբ հանրային քրեական հետապնդում է հարուցվել քրեական օրենքով նախատեսված, պատժի սպառնալիքով արգելված, մեղավորությամբ կատարված այն արարքի համար, որ նա 2024 թվականի հունվարի 1-ին՝ ժամը 23:30-ի սահմաններում, ալկոհոլի ազդեցության տակ դիտավորությամբ ձեռքերով, ոտքերով, ինչպես նաև ապակյա վազայի միջոցով հարվածներ է հասցրել իր մերձավոր ազգական կնոջը՝ Սոնա Սարուխանյանին՝ վերջինիս առողջությանը պատճառելով թեթև վնաս՝ առողջության կարճատև քայքայումոով, ինչպես նաև նույն եղանակով հարվածներ է հասցրել իր մերձավոր ազգական՝ ամուսնու ծնողին՝ Լիաննա Եղոյանին՝ վերջինիս առողջությանը պատճառով միջին ծանրության վնաս՝ առողջության տևական քայքայումով:
Այսպես՝
Ստեփան Հարությունի Հարությունյանը, 2024 թվականի հունվարի 1-ին՝ ժամը 23։45-ի սահմաններում, լինելով ալկոհոլի ազդեցության տակ, իր, ինչպես նաև իր կնոջ՝ Սոնա Արայի Սարուխանյանի բնակության՝ Երևան քաղաքի Արարատյան փողոցի 58/2 հասցեում ավտոմեքենայի բանալին տրամադրելու իր պահանջը մերժելու համար, ձեռքերով, ոտքերով, ինչպես նաև վազայի միջոցով բազմաթիվ հարվածներ է հասցրել իր մերձավոր ազգական կնոջը՝ Սոնա Արայի Սարուխանյանին՝ վերջինիս առողջությանը պատճառելով ձախ աչքի վերին կոպի, աջից այտոսկրի աղեղի, ձախից վերին շրթունքի լորձաթաղանթի, ձախից ստորին շրթունքի լորձաթաղանթի, աջից բազկի ստորին երրորդի թիկնային մակերեսի, ձախից անցումով բազկի ստորին երրորդի հետին-ներսային մակերեսի շրջանի վրա՝ ձախից բազկի ստորին երրորդի թիկնային մակերեսի, ձախից կրծքավանդակի առաջային մակերեսի՝ միջին անրակային գծով երրորդ միջկողային տարածության մակարդակի, աջից ազդրի ստորին երրորդի դրսային մակերեսի, աջից ծնկահոդի դրսային մակերեսի, աջ դաստակի թիկնային մակերեսի՝ երկրորդ նախադաստակայինի ոսկրի պրոեկցիավորման շրջանների արյունազեղումների, աջից անցումով վերհոնքային շրջանի վրա՝ աջից ճակատային, աջից ճակատային թմբկության, ձախ դաստակի երրորդ մատի մոտակա միջֆալանգային հոդի թիկնային մակերեսի շրջանների ճանկռվածքների, ձախից ստորին շրթունքի կարմիր եզիրի, ձախից անրակային, ձախ դաստակի չորրորդ մատի հեռավոր միջֆալանգային հոդի թիկնային մակերեսի, աջ դաստակի թիկնային մակերեսի, աջ դաստակի երրորդ, չորրորդ մատերի մոտակա միջֆալանգային հոդերի թիկնային մակերեսների շրջանների քերծվածքների, ձախից գլխի գագաթ-ծոծրակային շրջանի ենթամաշկային արյունահավաքի, դեմքի շրջանի փափուկ հյուսվածքների սալջարդի և ձախ դաստակի չորրորդ մատի շրջանի սալջարդի ձևով առողջության կարճատև քայքայումով՝ առողջությանը թեթև վնաս, ինչպես նաև նույն ժամանակահատվածում ձեռքերով, ոստքերով և վազայի միջոցով հարվածներ է հասցրել իր մերձավոր ազգական՝ ամուսնու ծնողին՝ Լիաննա Վրեժի Եղոյանին՝ վերջինս առողջությանը պատճառելով՝ ձախ աչքի ստորին կոպի, աջից անցումով բազկի վերին երրորդի հետին ներսային մակերեսի շրջանի վրա` աջից բազկի միջին երրորդի ներսային մակերեսի, ձախից բազկի միջին երրորդի դրսային մակերեսի շրջանների արյունազեղումների, աջ դաստակի ափային մակերեսի՝ ափային մեծ թմբկության, ձախ դաստակի թիկնային մակերեսի երրորդ նախադաստակային ոսկրի մարմնի շրջանների ճանկռվածքների, ձախից ստորին շրթունքի կարմիր երիզի, ձախից նախաբազուկ-դաստակային հոդի թիկնային մակերեսի, աջ դաստակի թիկնային մակերեսի՝ հինգերորդ նախադաստակային ոսկրի մարմնի շրջանների քերծվածքների, ձախից վերին ծնոտի երկրորդ կտրիչի պսակային հատվածի դեֆեկտի առաջացումով կոտրվածքի, վերին ծնոտի ձախից երկրորդ ատամի երկրորդ աստիճանի շարժունակության՝ հոդախախտի, ձախ դաստակի առաջին մատի միջֆալանգային հոդի ափային մակերեսի, ձախ դաստակի ափային մակերեսի երկրորդ միջմատային մաշկային թաղանթի շրջանների վերնամաշկի մակերեսային կտրվածքների, ձախից անցումով վերին շրթունքի կարմիր երիզի ու լորձաթաղանթի շրջանների վրա՝ ձախից վերին շրթունքի շրջանի սալջարդ վերքի, ձախ դաստակի հինգերորդ մատի շրջանի սալջարդ վերքի վերին շրթունքի փափուկ հյուսվածքների սալջարդի և հինգերորդ մատի եղունգային ֆալանգի մոտակա էպիֆիզի եզրային, պոկումային կոտրվածքի ձևով առողջության տևական քայքայումով առողջությանը միջին ծանրության վնաս:
Այսինքն՝ Ստեփան Հարությունի Հարությունյանը կատարել է հանցանք՝ նախատեսված ՀՀ քրեական օրենսգրքի 171-րդ հոդվածի 2-րդ մասի 6-րդ կետով և ՀՀ քրեական օրենսգրքի 167-րդ հոդվածի 2-րդ մասի 9-րդ կետով:
նշվում է ամբաստանյալին ներկայացված մեղադրանքի փաստական նկարագրությունը և արարքի իրավական գնահատականը:
Մեղադրյալ Ստեփան Հարությունի Հարությունյանի նկատմամբ որպես խափանման միջոց է կիրառված բացակայելու արգելքը:
նշվում է ամբաստանյալի նկատմամբ կիրառված խափանման միջոցը և դրա կիրառման ժամկետը
Հիմք ընդունելով ՀՀ քրեական դատավարության օրենսգրքի 460-րդ հոդվածի 4-րդ մասի 9-րդ կետը և ղեկավարվելով ՀՀ քրեական օրենսգրքի 69-րդ, 74-րդ, 77-րդ, 78-րդ և 84-րդ հոդվածներով՝ կողմերը համաձայնվում են մեղադրյալին մեղսագրվող արարքի համար հետևյալ պատժատեսակի և պատժաչափի վերաբերյալ՝
Մեղադրյալ Ստեփան Հարությունի Հարությունյանի նկատմամբ ՀՀ քրեական օրենսգրքի 171-րդ հոդվածի 2-րդ մասի 6-րդ կետով նշանակել պատիժ կարճաժամկետ ազատազրկման ձևով՝ 1 ամիս ժամկետով, 167-րդ հոդվածի 2-րդ մասի 9-րդ կետով նշանակել պատիժ ազատազրկման ձևով 2 տարի 6 ամիս ժամկետով, պատիժները լրիվ գումարելու կանոններով ղեկավարվելով՝ վերջնական պատիժ նշանակել ազատազրկման ձևով՝ 2 տարի 7 ամիս ժամկետով:
Նկատի ունենալով, որ մեղադրյալ Ս. Հարությունյանը հանցանք է կատարել առաջին անգամ, որոնք ոչ մեծ և միջին ծանրության հանցանքներ են, վերջինս ընդունել է իր մեղավորությունը և անկեղծորեն զղջացել է իր կատարած հանցանքի համար, խնամքին ունի 2 անչափահաս երեխաներ, հաշտվել է տուժող կողմի հետ՝ ՀՀ քրեական օրենսգրքի 84-րդ հոդվածի կիրառմամբ կողմերը համաձայնության են եկել նշանակված 2 տարի 7 ամիս ժամկետով ազատազրկման ձևով պատիժը պայմանականորեն չկիրառել՝ սահմանելով փորձաշրջան 2 տարի 7 ամիս ժամկետով՝ սահմանելով՝ բնակության վայրը փոխելու դեպքում դատապարտյալի վարքագծի նկատմամբ վերահսկողություն իրականացնող իրավասու մարմնին սեղմ ժամկետում իր նոր բնակության վայրի հասցեն հայտնելու պարտականություն:
նշվում է համաձայնեցված պատիժը (պատժատեսակը և պատժաչափը), ներառյալ այն կրելու նպատակահարմարության հարցը, ընդ որում՝ առանձին նշվում են յուրաքանչյուր հանցագործության համար համաձայնեցված պատժի տեսակը և չափը, ինչպես նաև վերջնական պատժի տեսակը և չափը
[ստորագրություն] Էդգար Պողոսյան,
[ստորագրություն] Ստեփան Հարությունյան,
[ստորագրություն] Կարինե Խաչատրյան»:
Հաշվի առնելով, որ համաձայնության մասին ներկայացված արձանագրությունը համապատասխանում է ՀՀ քրեական դատավարության օրենսգրքով նախատեսված վերաբերելի պահանջներին, բացակայում են ՀՀ քրեական դատավարության օրենսգրքի 461-րդ հոդվածի 2-րդ մասով նախատեսված հիմքերը՝ Դատարանը որոշել է ընդունել համաձայնության մասին արձանագրությունը և համաձայնեցման վարույթով անցկացնել լրացուցիչ դատալսումներ:
Համաձայնեցման վարույթով լրացուցիչ դատալսումներ.
3. Մեղադրյալ Ս.Հարությունյանը հայտնեց, որ իրեն պարզ է կնքված համաձայնության բովանդակությունը, և նա համաձայն է դրա հետ, համաձայնությամբ արտահայտել է իր իրական կամքը, գիտակցում է կնքված համաձայնության հետևանքները, պնդում է կնքված համաձայնությունը:
Հանրային մեղադրող Է.Պողոսյանը և պաշտպան Կ.Խաչատրյանը հայտնեցին, որ պնդում են կնքված համաձայնությունը:
Դատարանի իրավական վերլուծությունը.
4. Իրեն մեղսագրվող արարքները մեղադրյալ Ստեփան Հարությունյանի կողմից ընդունելու և համաձայնեցման վարույթ կիրառելու պայմաններում Դատարանը, գործով ձեռքբերված ապացույցների ընդհանուր կարգով սահմանված հետազոտություն չկատարելով, արձանագրում է, որ մեղադրյալ Ստեփան Հարությունյանը կատարել է իրեն մեղսագրված հանցանքները, արարքները ճիշտ է որակված և համապատասխանում է ՀՀ քրեական օրենսգրքի 171-րդ հոդվածի 2-րդ մասի 6-րդ կետով և 167-րդ հոդվածի 2-րդ մասի 9-րդ կետով նախատեսված հանցագործությունների հատկանիշներին:
Ղեկավարվելով ՀՀ քրեական դատավարության օրենսգրքի 463-րդ հոդվածով, Դատարանը գտնում է, որ մեղադրյալի նկատմամբ նշանակվելիք պատժատեսակի և պատժաչափի, այդ թվում նաև՝ այն կրելու նպատակահարմարության հարցը պետք է լուծել ըստ համաձայնության մասին արձանագրության (տես սույն դատավճռի 2-րդ կետը)։ Միաժամանակ Դատարանը գտնում է, որ Ստեփան Հարությունյանի՝ սույն քրեական գործով փաստացի անազատության մեջ գտնվելու 1-օրյա ժամկետի հաշվառմամբ՝ որպես պատիժ պետք է թողնել ազատազրկում՝ 2 (երկու) տարի 6 (վեց) ամիս 29 (քսանինը) օր ժամկետով:
Դատարանը գտնում է, որ Ստեփան Հարությունյանի նկատմամբ կիրառված խափանման միջոցը` բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը:
Դատարանը գտնում է, որ վարութային ծախսերի հարցը պետք է համարել լուծված, քանի որ համաձայնեցման վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Ստեփան Հարությունյանից ենթակա չեն բռնագանձման՝ համաձայն ՀՀ քրեական դատավարության օրենսգրքի 463-րդ հոդվածի 5-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 347-350-րդ, 458-464-րդ հոդվածներով, Դատարանը
Վ Ճ Ռ Ե Ց
Ստեփան Հարությունի Հարությունյանին մեղավոր ճանաչել ՀՀ քրեական օրենսգրքի 171-րդ հոդվածի 2-րդ մասի 6-րդ կետով և 167-րդ հոդվածի 2-րդ մասի 9-րդ կետով:
ՀՀ քրեական օրենսգրքի 171-րդ հոդվածի 2-րդ մասի 6-րդ կետով Ստեփան Հարությունի Հարությունյանի նկատմամբ պատիժ նշանակել կարճաժամկետ ազատազրկում՝ 1 (մեկ) ամիս ժամկետով:
ՀՀ քրեական օրենսգրքի 167-րդ հոդվածի 2-րդ մասի 9-րդ կետով Ստեփան Հարությունի Հարությունյանի նկատմամբ պատիժ նշանակել ազատազրկում՝ 2 (երկու) տարի 6 (վեց) ամիս ժամկետով:
ՀՀ քրեական օրենսգրքի 74-րդ հոդվածի կարգով, հանցանքների համակցությամբ` պատիժները լրիվ գումարելու միջոցով Ստեփան Հարությունի Հարությունյանի նկատմամբ վերջնական պատիժ նշանակել ազատազրկում՝ 2 (երկու) տարի 7 (յոթ) ամիս ժամկետով:
Ստեփան Հարությունի Հարությունյանի՝ սույն քրեական գործով փաստացի անազատության մեջ գտնվելու 1-օրյա ժամկետի հաշվառմամբ՝ որպես պատիժ թողնել ազատազրկում՝ 2 (երկու) տարի 6 (վեց) ամիս 29 (քսանինը) օր ժամկետով:
ՀՀ քրեական օրենսգրքի 84-րդ հոդվածի կիրառմամբ՝ Ստեփան Հարությունի Հարությունյանի նկատմամբ ազատազրկման ձևով նշանակված պատիժը պայմանականորեն չկիրառել՝ սահմանելով փորձաշրջան՝ 2 (երկու) տարի 7 (յոթ) ամիս ժամկետով:
Փորձաշրջանի ընթացքում Ստեփան Հարությունի Հարությունյանի վրա դնել պարտականություն՝ բնակության վայրը փոխելու դեպքում վարքագծի նկատմամբ վերահսկողություն իրականացնող մարմնին սեղմ ժամկետում հայտնել իր նոր բնակության վայրի հասցեն:
Ստեփան Հարությունի Հարությունյանի նկատմամբ ընտրված խափանման միջոցը` բացակայելու արգելքը թողնել անփոփոխ՝ մինչև դատավճռի օրինական ուժի մեջ մտնելը:
Դատավճիռը կարող է բողոքարկվել վերաքննիչ քրեական դատարան ստանալու օրվանից հետո՝ մեկամսյա ժամկետում, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերով:


ԴԱՏԱՎՈՐ ԱՐԱՄԱՅԻՍ ԱՍԱՏՐՅԱՆ