ԵԴ1/2334/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«09» սեպտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրող՝ Ռոբերտ Մկրտչյանի,
մեղադրյալ՝ Արամ Առաքելյանի,

դռնբաց դատական նիստում քննելով քրեական գործն ըստ մեղադրանքի՝
Արամ Ռաֆիկի Առաքելյանի՝
(ծնված՝ 16.01.1986թ., ազգությամբ հայ, ՀՀ քաղաքացի, խնամքին երկու անչափահաս երեխաներ, չի աշխատում, դատվածություն չունեցող, հաշվառված՝ ք. Երևան, Կոմիտասի պողոտա, 55-րդ շենք, 1-ին բնակարան հասցեում, բնակվող՝ ք.Երևան, Դավիթ Հովհաննեսի 19-րդ փողոց, 21-րդ շենք, 18-րդ բնակարան հասցեում, որպես խափանման միջոց է կիրառվել բացակայելու արգելքը) ՀՀ քրեական օրենսգրքի 344-րդ հոդվածի 2-րդ մասով,

ՊԱՐԶԵՑ

1. Քրեական գործի դատավարական նախապատմությունը.
2024 թվականի մայիսի 31-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության հատկանիշներով նախաձեռնվել է թիվ 60-2185-24 քրեական վարույթը:
2024 թվականի սեպտեմբերի 23-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Ելենա Կարապետյանի որոշմամբ՝ թիվ 60-2185-24 քրեական վարույթով Արամ Ռաֆիկի Առաքելյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում:
2024 թվականի հոկտեմբերի 02-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Ելենա Կարապետյանի որոշմամբ՝ թիվ 60-2185-24 քրեական վարույթով Արամ Ռաֆիկի Առաքելյանի նկատմամբ հարուցված հանրային քրեական հետապնդման ժամկետը կասեցվել է:
2025 թվականի մայիսի 06-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Ելենա Կարապետյանի որոշմամբ՝ թիվ 60-2185-24 քրեական վարույթով Արամ Ռաֆիկի Առաքելյանի նկատմամբ հարուցված հանրային քրեական հետապնդման ժամկետը վերսկսվել է:
2025 թվականի հուլիսի 04-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/2334/01/25 քրեական գործն ըստ մեղադրանքի՝ Արամ Ռաֆիկի Առաքելյանի՝ ՀՀ քրեական օրենսգրքի 344-րդ հոդվածի 2-րդ մասով:
Նույն օրը քրեական գործը էլեկտրոնային եղանակով մակագրվել և 2025 թվականի հուլիսի 07-ին հանձնվել է դատավոր Տաթևիկ Մուրադյանին:
2025 թվականի հուլիսի 09-ին Դատարանի կողմից որոշում է կայացվել թիվ ԵԴ1/2334/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի օգոստոսի 22-ին Դատարանը թիվ ԵԴ1/2334/01/25 քրեական գործով կայացրել է մեղադրական վերդիկտ՝ Արամ Ռաֆիկի Առաքելյանին մեղավոր ճանաչելով ՀՀ քրեական օրենսգրքի 344-րդ հոդվածի 2-րդ մասով նախատեսված արարքի կատարման մեջ:
2. Մեղադրանքի փաստական նկարագրությունը.
Արամ Ռաֆիկի Առաքելյանին մեղադրանք է ներկայացվել ՀՀ քրեական օրենսգրքի 344-րդ հոդվածի 2-րդ մասով այն բանի համար, որ «նա, տրանսպորտային միջոց վարելու իրավունք չունենալով, 2024 թվականի ապրիլի 20-ին՝ ժամը 04:08-ի սահմաններում, Երևան քաղաքի Պ. Սևակի փողոցում գտնվելով ոչ սթափ վիճակում (մեկ լիտր արտաշնչած օդի մեջ մաքուր ալկոհոլի պարունակությունը 0.494 միլիգրամ) վարել է «Բիդ» մակնիշի 924 CZ 61 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության 4-րդ գումարտակի 1-ին վաշտի պարեկի կողմից կազմվել է թիվ 8180404185 արձանագրությունը։»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Մեղադրյալ Արամ Ռաֆիկի Առաքելյանը, օգտվելով իր սահմանադրական իրավունքից, հրաժարվեց ցուցմունք տալ։ Հրապարակվեց վերջինիս նախաքննական ցուցմունքը, համաձայն որի՝ վերջինս ընդունել է մեղավորությունը և զղջացել կատարվածի համար:
(դատական նիստի արձանագրություն, գ.թ. 57-59)
- Վարչական իրավախախտման վերաբերյալ թիվ 8180404185 թիվ որոշումը և կից արձանագրությունը, համաձայն որի՝ 2024 թվականի ապրիլի 20-ին՝ ժամը 04:17-ին ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի պարեկ Լևոն Բաղդասարյանը կազմել է նշված արձանագրությունը այն մասին, որ Արամ Ռաֆիկի Առաքելյանը /ծնված՝ 16.01.1986թ./ «ԲԻԴ» մակնիշի 924 CZ 61 հաշվառման համարանիշի տրանսպորտային միջոցը ոչ սթափ վիճակում վարել է Երևան քաղաքի Պարույր Սևակի փողոցում՝ չունենալով տրանսպորտային միջոց վարելու իրավունք: Վերջինիս սթափությունը չափվել է Alcovisor-Jupiter X/RP տեսակի, 91100955 համարի սարքի միջոցով, զննման համար՝ 01823: Արամ Առաքելյանը հրաժարվել է ստորագրել արձանագրությունը։
(գ.թ. 3, դատական նիստի արձանագրություն)
- «Ճանապարհային ոստիկանության էլեկտրոնային ռեգիստրի» քաղվածքները, համաձայն որի՝ Արամ Ռաֆիկի Առաքելյանը /ծնված 16.01.1986թ./ չունի և չի ունեցել տրանսպորտային միջոց վարելու իրավունք /վարորդական վկայական/:
(գ.թ. 5, դատական նիստի արձանագրություն)
- ՀՀ էկոնոմիկայի նախարարության ստուգաչափման թիվ 110932 վկայականը, համաձայն որի՝ Alcovisor-Jupiter X/RP ապրանքանիշի, «ալկոմետր» տեսակի 91100955 գործարանային համարի սարքի վերաբերյալ տրված ստուգաչափման վկայականը ուժի մեջ է 14.11.2023 թվականից մինչև 14.11.2024թ.:
(գ.թ. 6, դատական նիստի արձանագրություն)
- Սթափության ստուգաչափման կտրոնը /զննման համար՝ 01823/, համաձայն որի՝ 2024 թվականի ապրիլի 20-ին՝ ժամը 04:11-ին, 11481 կրծքանշանով ոստիկանության ծառայողի /Բաղդասարյան/ կողմից չափվել է 924 CZ 61 հաշվառման համարանիշի տրանսպորտային միջոցի վարորդ Արամ Առաքելյանի սթափությունը, և արդյունքում պարզվել է, որ վերջինիս արտաշնչած օդի պարունակությունում ալկոհոլի ծավալը կազմել է 0.494 մգ/լ: Արամ Առաքելյանը հրաժարվել է ստորագրել կտրոնը:
(գ.թ. 7, դատական նիստի արձանագրություն)
- Նախաքննության մարմնի կողմից 20.09.2024թ. կայացված արտավարութային փաստաթուղթ ճանաչելու մասին որոշումը, համաձայն որի՝ 20.04.2024 թվականին կազմված թիվ 8180404185 արձանագրությունը, ստուգաչափման թիվ 110932 վկայականի, «Ճանապարհային ոստիկանության էլեկտրոնային ռեգիստրի» քաղվածքների և սթափության կտրոնի պատճենները ճանաչվել են արտավարութային փաստաթղթեր։
(գ.թ. 17-18, դատական նիստի արձանագրություն)
- 2024 թվականի սեպտեմբերի 20-ին նախաքննության մարմնի կողմից կազմված՝ վերը նշված փաստաթղթերը զննելու վերաբերյալ արձանագրությունը:
(գ.թ. 15-16, դատական նիստի արձանագրություն)
- 19.06.2024 թվականին կազմված զննության արձանագրությունը, որի արդյունքների համաձայն՝ թիվ 8180404185 արձանագրությամբ, որով ՀՀ ՆԳՆ ոստիկանության պարեկային ծառայության ԵՔԳ 4-րդ գումարտակի 1-ին վաշտի պարեկ, ոստիկանության լեյտենանտ Լ.Մ.Բաղդասարյանը 20.04.2025 թվականին՝ ժամը 04:17-ին, կազմել է թիվ 8180404185 վարչական իրավախախտման վերաբերյալ արձանագրությունն այն մասին, որ Արամ Ռաֆիկի Առաքելյանը Երևան քաղաքի Պ.Սևակ փողոցում նույն օրը՝ ժամը 04:08-ին, ՏՄ վարելու իրավունք չունենալով, վարել է ՏՄ, սթափությունը ստուգվել է ALCOVISOR Jupiter X/RP սարքի միջոցով, սարքի համարն է 91100955, իսկ զննման համարը՝ 01823: Արձանագրության ներքևում նշված է, որ վարորդը հրաժարվել է ստորագրելուց:
30.05.2025թ. ՀՀ ՆԳՆ ոստիկանության պարեկային ծառայության ԵՔԳ գնդից ստացվել են նյութեր այն մասին, որ ՎՎԻ բաժնի ավագ տեսուչ Ե.Մ.Վարդանյանը 2024 թվականի մայիսի 8-ին ՀՀ ոստիկանության պարեկային ծառայության Երևան քաղաքի գնդի հրամանատարին զեկուցագիր է ներկայացրել այն մասին, որ ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի պարեկ Լևոն Բաղդասարյանը 2024 թվականի ապրիլի 20-ժամը՝ 04:17-ին, կազմել է վարչական իրավախախտման վերաբերյալ նշված արձանագրությունն այն մասին, որ Արամ Ռաֆիկի Առաքելյանը /ծնված՝ 16.01.1986թ./ «ԲԻԴ» մակնիշի 924 CZ 61 հաշվառման համարանիշի տրանսպորտային միջոցը ոչ սթափ վիճակում վարել է Երևան քաղաքի Պարույր Սևակի փողոցում՝ չունենալով տրանսպորտային միջոց վարելու իրավունք:
(գ.թ. 90, դատական նիստի արձանագրություն)
- Նախաքննության մարմնի կողմից 19.06.2025թ. կայացված արտավարութային փաստաթուղթ ճանաչելու մասին որոշումը, համաձայն որի՝ ՎՎԻ բաժնի ավագ տեսուչ Ե.Մ.Վարդանյանի կողմից 2024 թվականի մայիսի 8-ին ՀՀ ոստիկանության պարեկային ծառայության Երևան քաղաքի գնդի հրամանատարին ուղարկված զեկուցագիրը ճանաչվել է արտավարութային փաստաթուղթ։
(գ.թ. 91, դատական նիստի արձանագրություն)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Արամ Ռաֆիկի Առաքելյանը Երևան քաղաքի առաջին ատյանի ընդհանուր իրավասության քրեական դատարանի՝ 2024 թվականի հունիսի 04-ի դատավճռով մեղավոր է ճանաչվել ՀՀ քրեական օրենսգրքի 171-րդ հոդվածի 2-րդ մասի 6-րդ կետով նախատեսված հանցանքի կատարման մեջ, և նրա նկատմամբ պատիժ է նշանակվել հանրային աշխատանքներ՝ 80 ժամ տևողությամբ: 07.10.2024 թվականին պատիժը փաստացի կատարվել է:
 Միասնական էլեկտրոնային տեղեկատվական համակարգում կատարված հարցման պատասխանի համաձայն՝ ՊԵԿ տվյալների շտեմարանում Արամ Առաքելյանի կողմից հանցանքը կատարելուն նախորդող տասներկու ամիսների ընթացքում ստացած եկամուտների վերաբերյալ տվյալները բացակայում են:
 Արամ Ռաֆիկի Առաքելյանի երեխայի ծննդյան պետական վկայականի պատճենը, համաձայն որի՝ Արամ Ռաֆիկի Առաքելյանի խնամքին է գտնվում 19.02.2020 թվականին ծնված Տիգրան Արամի Առաքելյանը:
 Արամ Ռաֆիկի Առաքելյանի երեխայի ծննդյան պետական վկայականի պատճենը, համաձայն որի՝ Արամ Ռաֆիկի Առաքելյանի խնամքին է գտնվում 14.11.2021 թվականին ծնված Եվա Արամի Առաքելյանը:
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Արամ Ռաֆիկի Առաքելյանը, տրանսպորտային միջոց վարելու իրավունք չունենալով, 2024 թվականի ապրիլի 20-ին՝ ժամը 04:08-ի սահմաններում, Երևան քաղաքի Պ. Սևակի փողոցում գտնվելով ոչ սթափ վիճակում (մեկ լիտր արտաշնչած օդի մեջ մաքուր ալկոհոլի պարունակությունը 0.494 միլիգրամ) վարել է «Բիդ» մակնիշի 924 CZ 61 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության 4-րդ գումարտակի 1-ին վաշտի պարեկի կողմից կազմվել է թիվ 8180404185 արձանագրությունը:
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Արամ Ռաֆիկի Առաքելյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Արամ Ռաֆիկի Առաքելյանը դատվածություն չունի, մեղսագրվող հանցանքը ավարտվելու օրվան նախորդող 12 ամիսների ընթացքում վերջինիս ստացած ընդհանուր եկամուտների վերաբերյալ տվյալները բացակայում են, Արամ Ռաֆիկի Առաքելյանի խնամքին են գտնվում երկու անչափահաս երեխաներ:
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Արամ Ռաֆիկի Առաքելյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Արամ Ռաֆիկի Առաքելյանը կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը, հաստատված համարելով հանցագործության և դրա կատարման մեջ Արամ Ռաֆիկի Առաքելյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Արամ Ռաֆիկի Առաքելյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը, ինչպես նաև խնամքին երկու անչափահաս երեխաների առկայությունը։
Դատարանը միաժամանակ արձանագրում է, որ Արամ Առաքելյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Որպես Արամ Առաքելյանի անձը բնութագրող հանգամանք Դատարանը հաշվի է առնում նախկինում դատապարտվելը, որի դատվածությունը մարվել է։
Դատարանը, հաշվի առնելով Արամ Ռաֆիկի Առաքելյանի կատարած հանցանքի հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 2-րդ մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործության կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ ՀՀ քրեական օրենսգրքի 344-րդ հոդվածի 2-րդ մասով հիմնական պատիժ պետք է նշանակել տուգանքի ձևով, ընդ որում տուգանքի չափ սահմանելով՝ հանցանքը կատարելու պահին նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամ գումարի չափով։
Դատարանը միաժամանակ գտնում է, որ կատարած հանցանքի համար Արամ Ռաֆիկի Առաքելյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Միաժամանակ հաշվի առնելով վերջինիս գույքային դրության վերաբերյալ գործում առկա տվյալները և մեղադրյալի հայտարարությունը՝ Դատարանը գտնում է, որ Արամ Ռաֆիկի Առաքելյանի նկատմամբ նշանակվող տուգանքի վճարումը պետք է տարաժամկետել և նրան թույլատրել որպես պատիժ նշանակված՝ 450.000 (չորս հարյուր հիսուն հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա մյուս հարցերին, արձանագրում է, որ գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական վարույթով առկա չեն նաև վարութային ծախսեր:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ և 352-353-րդ հոդվածներով` Դատարանը

ՎՃՌԵՑ

Արամ Ռաֆիկի Առաքելյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության կատարման մեջ և նրա նկատմամբ պատիժ նշանակել տուգանք՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով:
Արամ Ռաֆիկի Առաքելյանին թույլատրել որպես պատիժ նշանակված՝ 450.000 (չորս հարյուր հիսուն հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Արամ Ռաֆիկի Առաքելյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել։
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ