ԵԴ1/2341/01/25

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ
ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

2025թ․ սեպտեմբերի <<19>> ք․Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

Նախագահող դատավոր Ա.Հովհաննիսյան
դատական նիստերի քարտուղար Մ․Հովհաննիսյան
հանրային մեղադրող Ն.Բարեկյան
պաշտպան Է.Աղաջանյան

դռնբաց դատական նիստում քննեց քրեական վարույթն ըստ մեղադրանքի՝ Մեսրոպ Արթուրի Սահակյանի՝ ծնված 2003 թվականի նոյեմբերի 28-ին, ազգությամբ հայ, ՀՀ քաղաքացի, հանդիսանում է պայմանագրային զինծառայող, նախկինում չդատապարտված, չամուսնացած, հաշվառված և բնակվող՝ Երևան քաղաքի Վիլնյուսի փողոցի 71-րդ շենքի 25-րդ բնակարանում: Հանրային քրեական հետապնդում է հարուցվել ՀՀ քրեական օրենսգրքի 457-րդ հոդվածի 1-ին մասով․ որպես խափանման միջոց է կիրառվել բացակայելու արգելքը:
Վարութային նախապատմությունը․
2025 թվականի մարտի 30-ին Վ.Գրիգորյանը հանցագործության մասին գրավոր հաղորդում է ներկայացրել ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժին:
2025 թվականի մարտի 30-ին Մեսրոպ Արթուրի Սահակյանը ձերբակալվել է:
2025 թվականի մարտի 30-ի ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի քննիչ Մ.Հարությունյանի արձանագրությամբ ՀՀ քրեական օրենսգրքի 457-րդ հոդվածի 1-ին մասի հատկանիշներով նախաձեռնվել է 09130425 քրեական վարույթը:
2025 թվականի մարտի 30-ի ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի քննիչ Մ.Հարությունյանի որոշմամբ Մեսրոպ Արթուրի Սահակյանն ազատ է արձակվել:
2025 թվականի մայիսի 15-ի ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի քննիչ Մ.Հարությունյանի որոշմամբ <<Месроп Артурович Саакян>> անվամբ լրացված 9628437446 համարի վարորդական իրավունքի վկայականն իրեղեն ապացույց է ճանաչվել:
2025 թվականի մայիսի 26-ի ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Ն.Բարեկյանի որոշմամբ Մեսրոպ Արթուրի Սահակյանի նկատմամբ հանրային քրեական հետապնդում է հարուցվել այն բանի համար, որ Մեսրոպ Սահակյանը, 2025 թվականի մարտի 30-ին Երևան քաղաքի Ռուբինյանց փողոցի թիվ 5/9 հասցեի դիմաց, վարչական պատասխանատվության չենթարկվելու նպատակով, օգտագործել է քննությամբ դեռևս չպարզված ժամանակ և հանգամանքներում կեղծված, պետական մարմնի կողմից տրվող և իրավունք վերապահող կեղծ փաստաթուղթ:
Այսպես. Մեսրոպ Սահակյանը, 2025 թվականի մարտի 30-ին Երևան քաղաքի Ռուբինյանց փողոցի թիվ 5/9 հասցեի դիմաց ՀՀ ՆԳՆ ոստիկանության պարեկային ծառայության աշխատակիցների կողմից՝ իր կողմից շահագործվող <<Լադա>> մակնիշի 88 UB 868 պետհամարանիշի տրանսպորտային միջոցը չամրակապված վարելու համար կանգնեցվելուց հետո, վարչական պատասխանատվության չենթարկվելու և տրանսպորտային միջոց վարելու իրավունք ունենալը հավաստելու նպատակով, պարեկային ծառայության աշխատակիցներին է ներկայացրել քննությամբ դեռևս չպարզված ժամանակ և հանգամանքներում կեղծված, պետական մարմնի կողմից տրվող և իրավունք վերապահող <<CAAKЯH МЕСРОП АРТУРОВИЧ>> անվամբ ռուսատառ գրառմամբ և <<96 28 437446>> համարի փաստաթուղթ հանդիսացող կեղծ վարորդական իրավունքի վկայական, որը նույն օրը հայտնաբերվել և վերցվել է ՀՀ ՆԳՆ գլխավոր վարչության համայնքային ոստիկանության ոստիկանության Քանաքեռ-Զեյթունի բաժնում՝ Մեսրոպ Սահակյանի անձնական խուզարկությամբ:
Այսպիսով, Մեսրոպ Արթուրի Սահակյանին մեղսագրվում է ՀՀ քրեական օրենսգրքի 457-րդ հոդվածի 1-ին մասով նախատեսված հանցանքի կատարում:
2025 թվականի մայիսի 27-ի ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի քննիչ Մ.Հարությունյանի որոշմամբ Մեսրոպ Արթուրի Սահակյանի նկատմամբ որպես խափանման միջոց է կիրառվել բացակայելու արգելքը:
2025 թվականի մայիսի 29-ի ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի քննիչ Մ.Հարությունյանի որոշմամբ թիվ 09130425 քրեական վարույթից անջատվել և առանձին վարույթում է առանձնացվել Մեսրոպ Սահակյանին կեղծ վարորդական իրավունքի վկայական իրացնելու և այն պատրաստելու վերաբերյալ մասը և անջատված վարույթին շնորհվել է 09143925 համարը:
2025 թվականի հուլիսի 4-ին թիվ 09130425 քրեական գործը մեղադրական եզրակացությամբ ուղարկվել է Երևան քաղաքի առաջին ատյանի ընդհանուր իրավասության քրեական դատարան։
Արագացված դատական քննություն.
Նախնական դատալսումների ընթացքում պաշտպան Է.Աղաջանյանը միջնորդեց դատաքննությունն անցկացնել արագացված վարույթի կարգով՝ նկատի ունենալով, որ սույն վարույթի շրջանակում Մեսրոպ Սահակյանն իր մեղքն ընդունել է։
Հանրային մեղադրող Ն.Բարեկյանը հրապարակեց մեղադրանքի փաստական հիմքն ու արարքին տրվող իրավական գնահատականը՝ միաժամանակ նշելով, որ չի առարկում արագացված կարգով վարույթի կիրառման դեմ:
Մեղադրյալ Մեսրոպ Սահակյանը հայտնեց, որ իրեն պարզ է առաջադրված մեղադրանքը, դրա հետ համաձայն է: Պնդում է ներկայացված միջնորդությունը, այն ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով վարույթի անցկացնելու հետևանքները:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-ին հոդվածի 1-ին մասով նախատեսված հիմքը և բացակայում են սույն օրենսգրքի 464.1-ին հոդվածի 2-րդ մասով նախատեսված` արագացված վարույթի կիրառումը բացառող հանգամանքները, որոշում է կայացրել արագացված վարույթ կիրառելու միջնորդությունը բավարարելու մասին։
Հետևաբար, Դատարանը գտնում է, որ Մեսրոպ Արթուրի Սահակյանը կատարել է արարք՝ նախատեսված ՀՀ քրեական օրենսգրքի 457-րդ հոդվածի 1-ին մասով:
Դատարանի իրավական վերլուծությունները.
Դատարանը, ուսումնասիրելով Մեսրոպ Արթուրի Սահակյանի պատասխանատվությունը և պատիժը մեղմացնող ու ծանրացնող հանգամանքները, վերասոցիալականացման և իրավահպատակ վարքագծի ձևավորման համար նշանակություն ունեցող տվյալները, եկավ հետևյալ եզրահանգման.
Մեսրոպ Արթուրի Սահակյանի անձը դրականորեն բնութագրող հանգամանք է նախկինում արատավորված՝ դատապարտված չլինելը:
Դատարանը Մեսրոպ Արթուրի Սահակյանի քրեական պատասխանատվություն ու պատիժը մեղմացնող հանգամանք է դիտում մեղքն ընդունելը և կատարածի համար զղջալը:
Միաժամանակ, պետք է արձանագրել, որ Մեսրոպ Արթուրի Սահակյանի պատասխանատվությունն ու պատիժը ծանրացնող հանգամանքներ առկա չեն:
Կատարված արարքի համար մեղադրյալ Մեսրոպ Արթուրի Սահակյանը ենթակա է քրեական պատասխանատվության և պատժի։
ՀՀ վճռաբեկ դատարանը 2010 թվականի օգոստոսի 27-ի թիվ ՍԴ/0293/01/09 որոշմամբ դիրքորոշում է հայտնել, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձը բնութագրող տվյալները և, քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ է և բավարար է այդ անձին ուղղելու և նրա կողմից նոր հանցանքի կատարումը կանխելու համար: Պատժի տեսակի և չափի որոշման ժամանակ դատարանը պետք է հաշվի առնի կատարված հանցագործության՝ հանրության համար վտանգավորության աստիճանն ու բնույթը, հանցավորի անձը բնութագրող տվյալները, այդ թվում՝ նրա պատասխանատվությունը մեղմացնող և (կամ) ծանրացնող հանգամանքները:
Դատարանը, հաշվի առնելով Մեսրոպ Արթուրի Սահակյանի կատարած արարքի բնույթը և հանրային վտանգավորության աստիճանը, մասնավորապես՝ այն, որ վերջինի կատարած հանցանքը հանդիսանում է ոչ մեծ ծանրության հանցագործություն, այդ թվում՝ նրա գործողությունների վտանգավորության աստիճանը, անձը դրականորեն բնութագրող, պատասխանատվությունն ու պատիժը մեղմացնող հանգամանքների առկայությունը, ծանրացնող հանգամանքների բացակայությունը, ինչպես նաև այն, որ մեղադրյալի կատարած արարքի համար քրեական օրենսգրքի համապատասխան հոդվածի սանկցիայով նախատեսված է պատիժ նաև տուգանքի ձևով, իսկ ՀՀ քրեական օրենսգրքի 69-րդ հոդվածի 3-րդ մասի կարգավորմամբ՝ ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները, գտնում է՝ Մեսրոպ Արթուրի Սահակյանի նկատմամբ ՀՀ քրեական օրենսգրքի 457-րդ հոդվածի 1-ին մասով պատիժ պետք է նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
Անդրադառնալով դատապարտված մեղադրյալի նկատմամբ կիրառված խափանման միջոցի հարցին՝ Դատարանը գտնում է, որ Մեսրոպ Արթուրի Սահակյանի նկատմամբ ընտրված բացակայելու արգելքը, պետք է թողնել անփոփոխ մինչև դատավճռի օրինական ուժի մեջ մտնելը:
Իրեղեն ապացույց ճանաչված <<Месроп Артурович Саакян>> անվամբ լրացված 9628437446 համարի վարորդական իրավունքի վկայականը, դատավճիռն օրինական ուժի մեջ մտնելուց հետո, պետք է կցել ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում քննվող թիվ 09143925 քրեական վարույթին:
ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը արագացված վարույթ կիրառելու դեպքում, համաձայն նույն օրենսգրքի 464.4-րդ հոդվածի 3-րդ մասի՝ դատապարտված մեղադրյալից ենթակա չեն բռնագանձման, ուստի Դատարանը գտնում է, որ դատավճիռն օրինական ուժի մեջ մտնելուց հետո Գոռ Ռոմանի Խնուսյանի կողմից ՀՀ դատախազության 900008037195 դեպոզիտ հաշվին որպես վարութային ծախս վճարված 72.000 ՀՀ դրամ գումարը պետք է վերադարձնել վերջինին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 276-րդ, 342-րդ, 347-349-րդ, 353-րդ, 364-րդ, 464.1-464.5-րդ հոդվածներով՝ Դատարանը

Վ Ճ Ռ Ե Ց

Մեսրոպ Արթուրի Սահակյանին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով և պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
Մեսրոպ Արթուրի Սահակյանի նկատմամբ կիրառված խափանման միջոց՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
Իրեղեն ապացույց ճանաչված <<Месроп Артурович Саакян>> անվամբ լրացված 9628437446 համարի վարորդական իրավունքի վկայականը, դատավճիռն օրինական ուժի մեջ մտնելուց հետո, կցել ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում քննվող թիվ 09143925 քրեական վարույթին:
Վարութային ծախսերի հարցը համարել լուծված։
Դատավճիռն օրինական ուժի մեջ մտնելուց հետո Գոռ Ռոմանի Խնուսյանի կողմից ՀՀ դատախազության 900008037195 դեպոզիտ հաշվին որպես վարութային ծախս վճարված 72.000 ՀՀ դրամ գումարը վերադարձնել վերջինին:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով):


ԴԱՏԱՎՈՐ Ա.ՀՈՎՀԱՆՆԻՍՅԱՆ