ԵԴ1/2348/01/25








Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ս.ԳԶՈԳՅԱՆԻ
քարտուղարությամբ Լ.ՉՈԲԱՆՅԱՆԻ
մասնակցությամբ
հանրային մեղադրող Ն․ԱԲՐԱՀԱՄՅԱՆԻ
պաշտպաններ Վ․ՄԱՆՈՒԿՅԱՆԻ
Կ․ԳԱԲՈՅԱՆԻ
Հ․ԹՈՐՈՍՅԱՆԻ
մեղադրյալներ Ա․ԲԱԴԱԼՅԱՆԻ
Ս․ԽԱՉԱՏՐՅԱՆԻ

2026 թվականի մարտի 26-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Արմինե Գրիշայի Բադալյանի՝ ծնված 1973 թվականի հոկտեմբերի 2-ին, Երևան քաղաքում, հայ, ՀՀ քաղաքացի, միջնակարգ կրթությամբ, նախկինում չդատապարտված, այրի, հաշվառված և բնակվում է ք․Երևան, Մաշտոցի պողոտա 19 շենք 4 բնակարան հասցեում, մեղադրանք է առաջադրվել ՀՀ քրեական օրենսգրքի 195-րդ հոդվածի 2-րդ մասի 6-րդ կետով, որպես խափանման միջոց է կիրառվել բացակայելու արգելքը,
Սվետլանա Գառնիկի Խաչատրյանի՝ ծնված 1946 թվականի սեպտեմբերի 14-ին, Նորաշեն գյուղում, հայ, ՀՀ քաղաքացի, միջնակարգ կրթությամբ, նախկինում չդատապարտված, այրի, հաշվառված է ք․Երևան, Մաշտոցի պողոտա 19 շենք 4 բնակարան հասցեում, փաստացի բնակվում է՝ ք․Երևան, Գարեգին Նշդեհ 13 շենք, 30-րդ բնակարան հասցեում, մեղադրանք է առաջադրվել ՀՀ քրեական օրենսգրքի 195-րդ հոդվածի 2-րդ մասի 6-րդ կետով, որպես խափանման միջոց է կիրառվել բացակայելու արգելքը,


ՊԱՐԶԵՑ

1.Գործի դատավարական նախապատմությունը
2024 թվականի մայիսի 25-ին ՀՀ քրեական օրենսգրքի 195-րդ հոդվածի 2-րդ մասի 6-րդ կետի հատկանիշներով նախաձեռնվել է թիվ 08-0517-24 քրեական վարույթը:
2024 թվականի մայիսի 25-ին Սվետլանա Գառնիկի Խաչատրյանը և Արմինե Գրիշայի Բադալյանը ձերբակալվել են և նույն օրն ազատ են արձակվել։
2025 թվականի մայիսի 30-ին վարույթ նախաձեռնելու որոշման մեջ շտկում կատարելու վերաբերյալ արձանագրություն է կազմվել 2 դրվագ ՀՀ քրեական օրենսգրքի 195-րդ հոդվածի 2-րդ մասի 6-րդ կետի հատկանիշներով նախաձեռնվել է թիվ 08-0517-24 քրեական վարույթը:
Նախաքննության մարմնի 2025 թվականի հունիսի 2-ի որոշմամբ Սվետլանա Գառնիկի Խաչատրյանի որոշմամբ նկատմամբ ՀՀ քրեական օրենսգրքի 195-րդ հոդվածի 2-րդ մասի 6-րդ կետով հարուցվել է հանրային քրեական հետապնդում այն արարքի համար, որ «նա 2024 թվականի մայիսի 23-ին՝ ժամը 12:00-ի սահմաններում, Երևան քաղաքի Մաշտոցի պողոտա 19-րդ շենքի 4-րդ բնակարանում դիտավորյալ ֆիզիկական ներգործություն է գործադրել մերձավոր ազգական՝ դստեր Արմինե Գրիշայի Բադալյանի նկատմամբ։
Այսպես.
2024 թվականի մայիսի 23-ին՝ ժամը 12:00-ի սահմաններում, Երևան քաղաքի Մաշտոցի պողոտա 19-րդ շենքի 4-րդ բնակարանում, կենցաղային հարցերի շուրջ վիճաբանություն է առաջացել Սվետլանա Խաչատրյանի և վերջինիս դստեր՝ Արմինե Բադալյանի միջև, որի ընթացքում Սվետլանա Խաչատրյանը ֆիզիկական ներգործություն գործադրելու դիտավորությամբ, ձեռքերով, ոտքերով, բաժակով և գդալով հարվածներ է հասցրել մերձավոր ազգական հանդիսացող իր դստերը՝ Արմինե Բադալյանին՝ վերջինիս պատճառելով ձախ նախաբազկի միջին ստորին երրորդականների առաջային մակերեսի, աջ սրունքի ստորին երրորդականի առաջային մակերեսի և ձախ սրունքի ստորին երրորդականի հետին մակերեսի արյունազեղումների ձևով մարմնական վնասվածքները»։
Նախաքննության մարմնի 2025 թվականի հունիսի 2-ի որոշմամբ Արմինե Գրիշայի Բադալյանի նկատմամբ ՀՀ քրեական օրենսգրքի 195-րդ հոդվածի 2-րդ մասի 6-րդ կետով հարուցվել է հանրային քրեական հետապնդում այն արարքի համար, որ «նա 2024 թվականի մայիսի 22-ին՝ ժամը 10:00-ի սահմաններում, Երևան քաղաքի Մաշտոցի պողոտա 19-րդ շենքի 4-րդ բնակարանում դիտավորյալ ֆիզիկական ներգործություն է գործադրել մերձավոր ազգական Սվետլանա Գառնիկի Խաչատրյանի նկատմամբ:
Այսպես.
2024 թվականի մայիսի 22-ին՝ ժամը 10:00-ի սահմաններում, Երևան քաղաքի Մաշտոցի պողոտա 19-րդ շենքի 4-րդ բնակարանում, կենցաղային հարցերի շուրջ վիճաբանություն է առաջացել Սվետլանա Խաչատրյանի և վերջինիս դստեր՝ Արմինե Բադալյանի միջև, որի ընթացքում Արմինե Բադալյանը ֆիզիկական ներգործություն գործադրելու դիտավորությամբ ոտքերով և ձեռքերով հարվածներ է հասցրել մերձավոր ազգական հանդիսացող իր մորը՝ Սվետլանա Խաչատրյանին՝ վերջինիս պատճառելով աջ սրունքի ներսային կոճի շրջանի արյունազեղման ձևով մարմնական վնասվածք»:
2025 թվականի հունիսի 2-ի որոշումներով Սվետլանա Գառնիկի Խաչատրյանի և Արմինե Գրիշայի Բադալյանի նկատմամբ որպես խափանման միջոց է ընտրվել բացակայելու արգելքը:
2025 թվականի հուլիսի 4-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության դատարանում, գործին շնորհվել է ԵԴ1/2348/01/25 համարը:
2025 թվականի հուլիսի 8-ին Դատարանի դատավոր Ս.Գզոգյանը որոշում է կայացրել վարույթը ստանձնելու և նախնական դատալսումներ նշանակելու մասին։
2026 թվականի մարտի 26-ին Դատարանը մեղադրյալներ Արմինե Գրիշայի Բադալյանի և Սվետլանա Գառնիկի Խաչատրյանի նկատմամբ կայացրել է մեղադրական վերդիկտ։



2.Դատարանում հետազոտված և գնահատված ապացույցներ
Մեղադրյալ Սվետլանա Գառնիկի Խաչատրյանն առաջադրված մեղադրանքում իրեն մեղավոր չի ճանաչել, հիմնական դատալսումների ընթացքում, օգտվելով իր իրավունքներից, հրաժարվել է ցուցմունք տալ (տե՛ս դատական նիստի արձանագրությունը):
Մինչդատական վարույթի ընթացքում Սվետլանա Գառնիկի Խաչատրյանը ցուցմունք է տվել այն մասին, որ իր դուստրը Արմինե Գրիշայի Բադալյանը բնակվել է վարձակալությամբ, սակայն մոտ 2 տարի է ինչ բնակարանների վարձավճարների թանկացմամբ պայմանավորված բնակվում են միասին: Նշեց, որ իրենց հարաբերությունները լարվել են քանի, որ իր դուստրը Ա.Բադալյանը չի ցանկանում որ իրենց բնակության հասցե այցելեն իր մյուս քույրերը։ 2024 թվականի մայիսի 22-ին կրկին իրենց բնակության հասցեում կենցաղային հարցերի շուրջ ծագած վիճաբանության ժամանակ դուստրը ոտքերով հարվածներ է հասցրել իր ոտքերին, այնուհետ ձեռքերով հարվածներ հասցրել մարմնի տարբեր մասերին, որի արդյունքում զգացել է ցավ: 2024 թվականի մայիսի 24-ին գնացել էր Երևան քաղաքից դուրս, իսկ արդեն հաջորդ օրը, երբ տուն է վերադարձել, բացել է մուտքի դուռը ներս մտել, որ ճաշասենյակի միջով անցներ իր սենյակ և փոխեր իր հագուստը, տեսել է, որ ճաշասենյակի դուռը գտնվում է փակ վիճակում, զանգահարել է իր դստերը՝ Ա.Բադալյանին, իսկ վերջինս հայտնել է, որ նա տեղյակ չի եղել, որ ինքը տանից կբացակայի և փակել է ճաշասենյակի դուռը, քանի որ ինքն էլ տանը չի գտնվելու և չմտնեն տուն ու գողություն չկատարեն, ներկա պահին գտնվում է քաղաքից դուրս և շուտով կգա, սակայն ինքը հրաժարվել է սպասելուց և ահազանգել է ոստիկանություն և հայտնել, որ իր դուստրը փակել է ճաշասենյակի դուռը և ինքը չի կարողանում մուտք գործել այնտեղ և 2024 թվականի մայիսի 22-ին իրեն ծեծի է ենթարկել: Նշեց նաև, որ երբ ինքը գտնվել է ոստիկանության բաժանմունքում զանգահարել է Ա.Բադալյանը և հայտնել, որ ինքը գտնվում է Սայաթ-Նովա փողոցում կարող են մոտենալ և վերցնել բանալին: Նշեց, որ նախկինում երբրևէ ճաշասենյակի դուռը չի փակվել, քանի որ ինքը գտնվել է տանը: Վերջինս հայտնել է որ չի ընդունում իրեն առաջադրված մեղադրանքը, ինքը իր դստերը չի հարվածել միայն պաշտպանվել է հրելով նրան և բռնելով ձեռքերը (տե´ս դատական նիստի արձանագրություն, քրեական գործ, 21-23-րդ, 154-156-րդ թերթեր)։
Մեղադրյալ Արմինե Գրիշայի Բադալյանն առաջադրված մեղադրանքում իրեն մեղավոր չի ճանաչել, հիմնական դատալսումների ընթացքում, օգտվելով իր իրավունքներից, հրաժարվել է ցուցմունք տալ (տե՛ս դատական նիստի արձանագրությունը):
Մինչդատական վարույթի ընթացքում Արմինե Գրիշայի Բադալյանը ցուցմունք է տվել այն մասին, որ մոտ 2 տարի է ինչ բնակվում է իր մայրիկի Սվետլանա Խաչատրյանի հետ։ Նշեց, որ իր հարաբերությունները լարվել են քանի որ, իր քույրերը դեմ են եղել իր այնտեղ բնալկվելուն, իսկ իր մայրը ժամանակի ընթացքում սկսել է իրեն վիրավորել և մյուս քույրերին պաշպանել: 2024 թվականի մայիսի 23-ին կրկին իրենց բնակության հասցեում կենցաղային հարցերի շուրջ ծագած վիճաբանության ժամանակ մայրը՝ սկսել է իրեն ոտքերով ձեռքերով, բաժակով, գթալներով հարվածել իր մարմնի տարբեր մասերին, որի արդյունքով զգացել է ցավ, սակայն ինքը իր մայրիկին չի հարվածել, միջադեպը տևել է մոտ 2 րոպե, իրենք գտնվել են տանը երկուսով և որևէ մեկը իրենց չի միջամտել կամ դիտողություն չի արել, իսկ մայրիկի ոտքի վնասվածքը հետևանք է այն բանի, որ ինքը քայլելու ընթացքում հարվածել է բազմոցի եզրին, քանի որ օրվա ընթացքում հարվածում է բազմաթիվ անգամ բազմոցի եզրին: 2024 թվականի մայիսի 24-ին առավոտյան, երբ գնացել է աշխատանքի իր մայրիկը գտնվել է տանը, սակայն երբ ուշ երեկոյան տուն է վերադարձել, տեսել է, որ իր մայրը տանը չի, իսկ հաջորդ օրը, երբ մայրը տանը չի եղել, իսկ ինքը չպետք է գնար աշխատանքի, մուտքի դռան փականը փակելու հետ մեկտեղ փակել է նաև հյուրասենյակի դուռը անվտանգությամբ պայմանավորված: 2024 թվականի մայիսի 25-ին՝ ժամը 12:30-ի սահմաններում, երբ զանգահարել է իր մայրը Ս.Խաչատրյանը և հայտնել, որ գտնվում է տանը և ինչ նպատակով է փակել հյուրասենյակի դուռը, որից հետո Արմինե Գրիշայի Բադալյանը հայտնել, որ ինքը անվտանգությունից ելնելով է փակել հյորսենյակի դուռը, քանի որ Ս.Խաչատրյանը տանը չի գտնվել և իսկ Արմինե Գրիշայի Բադալյանը ասել, որ ինքը գտնվում է աշխատանքի վայրում մայրը գնա այնտեղ վերցնի, եթե ոչ, ապա ինքը աշխատանքի ավարտից հետո կգնա տուն և կբացի: Նշեց, որ նախկինում երբրևէ ճաշասենյակի դուռը չի փակվել, նշված օրը փակել է, քանի որ իր մայրը տանը չի գտնվել, այդ իսկ պատճառով անվտանգությունից ելենելով փակել է այն և չի հրաժարվել բացել կամ փոխանցել հյուրասենյակի բանալին։ Վերջինս հայտնել է, որ չի ընդունում իրեն առաջադրված մեղադրանքը (տե´ս դատական նիստի արձանագրություն, քրեական գործ, 27-32-րդ, 147-147ա-րդ թերթեր)։
Հիմնական դատալսումների ընթացքում հետազոտվել են հետևյալ գրավոր ապացույցները.
Մեղադրյալ Սվետլանա Գառնիկի Խաչատրյանի կողմից հանցագործության մասին բանավոր հաղորդում տալու վերաբերյալ արձանագրությունը, որի համաձայն՝ 2024 թվականի մայիսի 22–ին ժամը 10։00–ի սահմաններում, Երևան քաղաքի Մաշտոցի պողոտա 19 շենքի 4–րդ բնկարանում իր դուստր Արմինե Գրիշայի Բադալյանը վեճի է բռնվել իր հետ, որի ժամանակ քացով հարվածել է իր ոտքերին, ձեռքերին, որի արդյունքում ստացել է ոտքի արյունազեղում (տե´ս դատական նիստի արձանագրություն, քրեական գործ, 7-րդ թերթ):
Մեղադրյալ Արմինե Գրիշայի Բադալյանի կողմից հանցագործության մասին բանավոր հաղորդում տալու վերաբերյալ արձանագրությունը, որի համաձայն՝ 2024 թվականի մայիսի 23-ին՝ժամը 12:00-ի սահմաններում, Երևան քաղաքի Մաշտոցի պողոտա 19 շենք 4-րդ բնակարան հասցեում մայրը՝ Սվետլանա Գառնիկի Խաչատրյանը վիճաբանել է իր հետ, որի ժամանակ վերջինս ձեռքերով, ոտքերով, ինչպես նաև գդալով հարվածներ է հասցրել մարմնի տարբեր մասերին պատճառելով վնասվածքներ (տե´ս դատական նիստի արձանագրություն, քրեական գործ, 14-րդ թերթ):
Սվետլանա Գառնիկի Խաչատրյանին ձերբակալելու վերաբերյալ արձանագրությունը, որի համաձայն՝ 2024 թվականի մայիսի 25–ին` Ժամը 17:00-ին Երևան քաղաքի Սիմոն Վրացյան 90 հասցեում ձերբակալել են Սվետլանա Խաչատրյանին՝ ֆիզիկական ներգործություն կատարելու ամիջականորեն ծագած հիմնավոր կասկածի առկայության հիմքով (տե´ս դատական նիստի արձանագրություն, քրեական գործ, 9-րդ թերթ):
Արմինե Գրիշայի Բադալյանին ձերբակալելու վերաբերյալ արձանագրությունը, որի համաձայն՝ 2024 թվականի մայիսի 25–ին՝ ժամը 17։00–ին, Երևան քաղաքի Սիմոն Վրացյան 90 հասցեում ձերբակալել են Արմինե Բադալյանին՝ ֆիզիկական ներգործություն կատարելու ամիջականորեն ծագած մինավոր կասկածի առկայության հիմքով (տե´ս դատական նիստի արձանագրություն, քրեական գործ, 16-րդ թերթ):
Դեպքի վայրի զննության մասին արձանագրությունը, որի համաձայն՝ դեպքի վայր է հանդիսանում Երևան քաղաքի Մաշտոցի պողոտա 19 շենքի 9 բնակարանը, իսկ զննության մասնակիցներ Արմինե Գրիշայի Բադալյանը և Սվետլանա Գառնիկի Խաչատրյանը մատնացույց են արել այն վայրը, որտեղ մեկը մյուսին ծեծի է ենթարկել (տե´ս դատական նիստի արձանագրություն, քրեական գործ, 46-48-րդ 48Ա թերթեր):
Դատաբժշկական փորձաքննության թիվ 0798 եզրակացությունը, որի համաձայն՝ Սվետլանա Գառնիկի Խաչատրյանի մարմնական վնասվածքը աջ սրունքի ներսային կոճի շրջանի արյունազեղման ձևով, հետևանք է բութ, կոշտ առարկայի ներգործության, հնարավոր է նշված ժամկետին և հանգամանքներում, որը առողջության թեթև վնասի հատկանիշներ չեն պարունակում (տե´ս դատական նիստի արձանագրություն, քրեական գործ, 33-34-րդ թերթեր):
Դատաբժշկական փորձաքննության թիվ 0786 եզրակացությունը, որի համաձայն՝ Արմինե Գրիշայի Բադալյանի մարմնական վնասվածքները ձախ նախաբազկի միջին ստորին երրորդականների առաջային մակերեսին, աջ սրունքի ստորին երրորդականի առաջային մակերեսի և ձախ սրունքի ստորին երրորդականի հետին մակերեսին արյունազեղումների ձևով, հետևանք է բութ, կոշտ առարկայի ներգործության, հնարավոր է նշված ժամկետին հանգամանքներում, որը առողջության թեթև վնասի հատկանիշներ չեն պարունակում (տե´ս դատական նիստի արձանագրություն, քրեական գործ, 34-38-րդ թերթեր):
Ա․Բադալյանի դատավածության վերաբերյալ տեղեկանքը, որի համաձայն՝ Ա․Բադալյանը նախկինում դատապարտված չի եղել (տե´ս դատական նիստի արձանագրություն, քրեական գործ, 13-րդ թերթ):
Ս․Խաչատրյանի դատավածության վերաբերյալ տեղեկանքը, որի համաձայն՝ Ս․Խաչատրյանը նախկինում դատապարտված չի եղել (տե´ս դատական նիստի արձանագրություն, քրեական գործ, 5-րդ թերթ):


3.Դատարանի իրավական վերլուծությունները
ՀՀ քրեական օրենսգրքի 195-րդ հոդվածի համաձայն՝ «1. Հարվածներ հասցնելը կամ բռնի այլ գործողություններ կատարելը, եթե չեն առաջացել սույն օրենսգրքի 171-րդ հոդվածով նախատեսված հետևանքները`
(…)
2. Սույն հոդվածի 1-ին մասով նախատեսված արարքը, որը կատարվել է`
(…)
6) մերձավոր ազգականի կողմից,
(…)
պատժվում է հանրային աշխատանքներով` հարյուրից երկու հարյուր ժամ տևողությամբ, կամ ազատության սահմանափակմամբ` առավելագույնը երկու տարի ժամկետով, կամ կարճաժամկետ ազատազրկմամբ՝ առավելագույնը երկու ամիս ժամկետով»:
Նույն օրենսգրքի 3-րդ հոդվածի 1-ին մասի 18-րդ կետի համաձայն՝ «Սույն օրենսգրքում օգտագործվում են հետևյալ հասկացությունները. մերձավոր ազգական` անկախ համատեղ բնակության հանգամանքից՝ ամուսինը, նախկին ամուսինը, ծնողը, այդ թվում՝ խորթ ծնողը, որդեգրող ծնողը, խնամատար ծնողը, երեխան (այդ թվում՝ որդեգրված, խորթ, հոգեզավակ), եղբայրը, քույրը (այդ թվում՝ խորթ), պապը, տատը, թոռը, որդեգրող ծնողի կամ խնամատար ծնողի ամուսինը կամ նախկին ամուսինը, ամուսնու կամ նախկին ամուսնու ծնողը, ինչպես նաև ամուսնու կամ նախկին ամուսնու ծնողի համար՝ փեսան կամ հարսը: Ամուսին կամ նախկին ամուսին է համարվում նաև փաստական ամուսնական հարաբերությունների մեջ գտնվող կամ գտնված անձը»։
Դատարանը, վերլուծելով մեղադրյալ Ա․Բադալյանին առաջադրված մեղադրանքի հիմքում դրված և հիմնական դատալսումների ընթացքում հետազոտված վերոգրյալ ապացույցները՝ դրանք գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր կասկածները նրա օգտին մեկնաբանելով, հաստատված է համարում, որ Արմինե Գրիշայի Բադալյանը, 2024 թվականի մայիսի 22-ին՝ ժամը 10:00-ի սահմաններում, Երևան քաղաքի Մաշտոցի պողոտա 19-րդ շենքի 4-րդ բնակարանում, կենցաղային հարցերի շուրջ վիճաբանություն է առաջացել Սվետլանա Խաչատրյանի և վերջինիս դստեր՝ Արմինե Բադալյանի միջև, որի ընթացքում Արմինե Բադալյանը ֆիզիկական ներգործություն գործադրելու դիտավորությամբ ոտքերով և ձեռքերով հարվածներ է հասցրել մերձավոր ազգական հանդիսացող իր մորը՝ Սվետլանա Խաչատրյանին՝ վերջինիս պատճառելով աջ սրունքի ներսային կոճի շրջանի արյունազեղման ձևով մարմնական վնասվածք։
Մեղադրյալ Արմինե Բադալյանին մեղսագրվող արարքը հիմնավորվում է մեղադրյալ Սվետլանա Խաչատրյանի ցուցմունքներով, Արմինե Բադալյանի ցուցմունքներով, դատաբժկական փորձաքննության եզրակացությամբ։
Այսպիսով, Դատարանը գտնում է, որ սույն գործով ձեռք բերված հավաստի ապացույցների համակցությունը բավարար է հիմնավոր կասկածից վեր ապացուցողական չափանիշին համապատասխան հաստատված համարելու մեղադրյալ Ա․Բադալյանին կողմից մերձավոր ազգական հանդիսացող մոր հարվածներ հասցնելը, այդ արարքն ապացուցված է, ճիշտ է որակված և համապատասխանում են ՀՀ քրեական օրենսգրքի 195-րդ հոդվածի 2-րդ մասի 6-րդ կետի հատկանիշներին:
Դատարանը, վերլուծելով մեղադրյալ Սվետլանա Գառնիկի Խաչատրյանին առաջադրված մեղադրանքի հիմքում դրված և հիմնական դատալսումների ընթացքում հետազոտված վերոգրյալ ապացույցները՝ դրանք գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր կասկածները նրա օգտին մեկնաբանելով, հաստատված է համարում, որ նա 2024 թվականի մայիսի 23-ին՝ ժամը 12:00-ի սահմաններում, Երևան քաղաքի Մաշտոցի պողոտա 19-րդ շենքի 4-րդ բնակարանում, կենցաղային հարցերի շուրջ վիճաբանություն է առաջացել Սվետլանա Խաչատրյանի և վերջինիս դստեր՝ Արմինե Բադալյանի միջև, որի ընթացքում Սվետլանա Խաչատրյանը ֆիզիկական ներգործություն գործադրելու դիտավորությամբ, ձեռքերով, ոտքերով, բաժակով և գդալով հարվածներ է հասցրել մերձավոր ազգական հանդիսացող իր դստերը՝ Արմինե Բադալյանին՝ վերջինիս պատճառելով ձախ նախաբազկի միջին ստորին երրորդականների առաջային մակերեսի, աջ սրունքի ստորին երրորդականի առաջային մակերեսի և ձախ սրունքի ստորին երրորդականի հետին մակերեսի արյունազեղումների ձևով մարմնական վնասվածքները։
Մեղադրյալ Սվետլանա Խաչատրյանին մեղսագրվող արարքը հիմնավորվում է մեղադրյալ Սվետլանա Խաչատրյանի ցուցմունքներով, մեղադրյալ Արմինե Բադալյանի ցուցմունքներով, դատաբժկական փորձաքննության եզրակացությամբ։
Այսպիսով, Դատարանը գտնում է, որ սույն գործով ձեռք բերված հավաստի ապացույցների համակցությունը բավարար է հիմնավոր կասկածից վեր ապացուցողական չափանիշին համապատասխան հաստատված համարելու մեղադրյալ Ս․Խաչատրյանի կողմից մերձավոր ազգական հանդիսացող դստերը հարվածներ հասցնելը, այդ արարքն ապացուցված է, ճիշտ է որակված և համապատասխանում են ՀՀ քրեական օրենսգրքի 195-րդ հոդվածի 2-րդ մասի 6-րդ կետի հատկանիշներին:
Անդրադառնալով մեղադրյալիների նկատմամբ նշանակվելիք պատժի հարցին՝ Դատարանն արձանագրում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի մի շարք դրույթներով:
ՀՀ քրեական օրենսգրքի 7-րդ հոդվածի 1-ին մասի համաձայն՝ «1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը»:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»։
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ։ (․․․)»։
ՀՀ վճռաբեկ դատարանի ձևավորած կայուն նախադեպային իրավունքի համաձայն՝ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և այն կատարող անձը կոնկրետ են: Հետևաբար կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, այն կատարող անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից (տե՛ս ՀՀ վճռաբեկ դատարանի՝ թիվ ԵՇԴ/0029/01/08, ԱՎԴ2/0059/01/08, ԵԱՔԴ/0078/01/09, ԵԿԴ/0042/01/11 որոշումները)։
Այսպես` Դատարանը մեղադրյալ Ա․ Բադալյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հանրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Ա․Բադալյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, դատարանը, որպես Ա․ Բադալյանի անձը բնութագրող տվյալ հաշվի է առնում այն, որ նա նախկինում դատապարտված չի եղել։
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալ Արմինե Բադալյանի պատասխանատվությունն ու պատիժը մեղմացնող հանգամանք հաշվի է առնում այն, որ ունի առողջական խնդիրներ՝ ողնաշարի գոտկասրբանային հատվածի ստենոզ, ճողվածքներ։
Դատարանը, արձանագրում է, որ մեղադրյալ Ա․Բադալյանի պատասխանատվությունն ու պատիժը ծանրացնող հանգամանքներ առկա չեն:
Դատարանը գտնում է, որ կատարած արարքի համար մեղադրյալ Ա․Բադալյանը ենթակա է պատժի:
Դատարանը, հաշվի առնելով վերոնշյալ` մեղադրյալ Ա․Բադալյանի արարքի հանրության համար վտանգավորության աստիճանն ու բնույթը, նրա անձը բնութագրող հանգամանքները, պատասխանատվությունն ու պատիժը մեղմացնող հանգամանքր, ինչպես նաև ծանրացնող հանգամանքների բացակայությունը, գտնում է, որ մեղադրյալ Ա․Բադալյանն իր կատարած` ՀՀ քրեական օրենսգրքի 195-րդ հոդվածի 2-րդ մասի 6-րդ կետով նախատեսված հանցագործության համար ենթակա է պատժի ազատության սահմանափակման ձևով՝ 6 (վեց) ամիս ժամկետով՝ արգելելով նրան պատժի կրման ընթացքում՝ առանց նրա նկատմամբ վերահսկողություն իրականացնող իրավասու մարմնի համաձայնության փոխել բնակության վայրը:
Այսպես` Դատարանը մեղադրյալ Սվետլանա Խաչատրյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հանրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Ս․Խաչատրյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, դատարանը, որպես Ս․Խաչատրյանի անձը բնութագրող տվյալ հաշվի է առնում այն, որ նա նախկինում դատապարտված չի եղել,
Դատարանը, ղեկավարվելով ՀՀ քրեական օրենսգրքի 70-րդ հոդվածի 1-ին մասի 3-րդ կետով, որպես մեղադրյալ Ս․Խաչատրյանի պատասխանատվությունն ու պատիժը մեղմացնող հանգամանք հաշվի է առնում այն, որ հանցանք կատարելու և պատիժ նշանակելու պահին լրացել է նրա 65 տարին։
Դատարանը, արձանագրում է, որ մեղադրյալ Ս․Խաչատրյանի պատասխանատվությունն ու պատիժը ծանրացնող հանգամանքներ առկա չեն:
Դատարանը գտնում է, որ կատարած արարքի համար մեղադրյալ Ս․Խաչատրյանի ենթակա է պատժի:
Դատարանը, հաշվի առնելով վերոնշյալ` մեղադրյալ Ս․Խաչատրյանի արարքի հանրության համար վտանգավորության աստիճանն ու բնույթը, նրա անձը բնութագրող հանգամանքները, պատասխանատվությունն ու պատիժը մեղմացնող հանգամանքր, ինչպես նաև ծանրացնող հանգամանքների բացակայությունը, գտնում է, որ մեղադրյալ Ս․Խաչատրյանն իր կատարած` ՀՀ քրեական օրենսգրքի 195-րդ հոդվածի 2-րդ մասի 6-րդ կետով նախատեսված հանցագործության համար ենթակա է պատժի ազատության սահմանափակման ձևով՝ 6 (վեց) ամիս ժամկետով՝ արգելելով նրան պատժի կրման ընթացքում՝ առանց նրա նկատմամբ վերահսկողություն իրականացնող իրավասու մարմնի համաձայնության փոխել բնակության վայրը:
Դատարանն արձանագրում է, որ արտավարութային փաստաթուղթ ճանաչված նյութերը պետք է թողնել կցված քրեական գործին՝ դատավճիռն օրինական ուժի մեջ մտնելուց հետո։
Քննարկելով մեղադրյալների նկատմամբ ընտրված խափանման միջոցի հարցը՝ Դատարանը գտնում է, որ վերջիններիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 342-349-րդ հոդվածներով` Դատարանը

Վ Ճ Ռ Ե Ց

Մեղադրյալ Արմինե Գրիշայի Բադալյանին մեղավոր ճանաչել ՀՀ քրեական օրենսգրքի 195-րդ հոդվածի 2-րդ մասի 6-րդ կետով նախատեսված արարքի կատարման մեջ, և նրա նկատմամբ պատիժ նշանակել ազատության սահմանափակում՝ 6 (վեց) ամիս ժամկետով։
Արգելել մեղադրյալին առանց նրա նկատմամբ վերահսկողություն իրականացնող իրավասու մարմնի համաձայնության փոխել բնակության վայրը: Մեղադրյալի նկատմամբ հսկողություն դնել ՀՀ ԱՆ պրոբացիայի ծառայության վրա:
Մեղադրյալ Սվետլանա Գառնիկի Խաչատրյանին մեղավոր ճանաչել ՀՀ քրեական օրենսգրքի 195-րդ հոդվածի 2-րդ մասի 6-րդ կետով նախատեսված արարքի կատարման մեջ, և նրա նկատմամբ պատիժ նշանակել ազատության սահմանափակում՝ 6 (վեց) ամիս ժամկետով։
Արգելել մեղադրյալին առանց նրա նկատմամբ վերահսկողություն իրականացնող իրավասու մարմնի համաձայնության փոխել բնակության վայրը: Մեղադրյալի նկատմամբ հսկողություն դնել ՀՀ ԱՆ պրոբացիայի ծառայության վրա:
Մեղադրյալների նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել:
Արտավարութային փաստաթուղթ ճանաչված և քրեական գործին կցված փաստաթղթերը թողնել կցված քրեական գործին՝ դատավճիռն օրինական ուժի մեջ մտնելուց հետո։
Դատավճիռը կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ՝ Ս.ԳԶՈԳՅԱՆ