ԵԴ1/2353/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«18» մարտի 2026թ. ք.Երևան

Երևան քաղաքի առաջին ատյանի ընդհանուր իրավասության
քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,
Նազիկ Աթոյանի,
մասնակցությամբ՝
հանրային մեղադրող Սարգիս Պապոյանի,

պաշտպաններ Աշոտ Ապրեսյանի,
Լևոն Կարապետյանի,
մեղադրյալներ Գոռ Թադևոսյանի,
Էդգար Գրիգորյանի,

դռնբաց դատական նիստում քննելով քրեական գործն ըստ մեղադրանքի՝

Գոռ Գևորիկի Թադևոսյանի՝
(ծնված՝ առկա է անձնական տվյալ , ազ¬¬¬¬գությամբ հայ, ՀՀ քա¬¬¬¬ղա¬քացի, ամուսնացած, խնամքին երեք անչափահաս երեխաներ, բարձրագույն կրթությամբ, աշխատել է ՀՀ քննչական կոմիտեում՝ որպես ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության հինգերորդ վարչության պետի պաշտոնակատար, չդատված, հաշվառված՝ առկա է անձնական տվյալ հասցեում) ՀՀ քրեական օրենսգրքի 46-254-րդ հոդվածի 3-րդ մասի 4-րդ կետով,

Էդգար Գարիկի Գրիգորյանի՝
(ծնված՝ առկա է անձնական տվյալ քաղաքում, ազգությամբ հայ, ՀՀ քաղաքացի, ամուսնացած, խնամքին երկու անչափահաս երեխաներ, բարձրագույն կրթությամբ, դատվածություն չունեցող, հառկա է անձնական տվյալրդ կետով,

ՊԱՐԶԵՑ

1. Քրեական գործի դատավարական նախապատմությունը.
2025 թվականի մայիսի 21-ին ՀՀ հակակոռուպցիոն կոմիտեի արդարադատության շահերի դեմ ուղղված, ինչպես նաև իրավապահ մարմինների ծառայողներին վերագրվող հանցագործությունների քննության վարչությունում ՀՀ քրեական օրենսգրքի 254-րդ հոդվածի 3-րդ մասի 2-րդ և 4-րդ կետերով և ՀՀ քրեական օրենսգրքի 446-րդ հոդվածի 2-րդ մասով նախաձեռնվել է թիվ 62246225 քրեական վարույթը:
2025 թվականի մայիսի 23-ին ՀՀ հակակոռուպցիոն կոմիտեի արդարադատության շահերի դեմ ուղղված, ինչպես նաև իրավապահ մարմինների ծառայողներին վերագրվող հանցագործությունների քննության վարչությունում ՀՀ քրեական օրենսգրքի 46-254-րդ հոդվածի 3-րդ մասի 4-րդ կետով նախաձեռնվել է թիվ 62248325 քրեական վարույթը:
Նախաքննության մարմնի 2025 թվականի մայիսի 23-ի որոշմամբ թիվ 62246225 և թիվ 62248325 քրեական վարույթները միացվել են, և նախաքննությունը շարունակվել է թիվ 62246225 քրեական վարույթի համարի ներքո:
2025 թվականի մայիսի 23-ին ՀՀ գլխավոր դատախազության ՀՀ հակակոռուպցիոն կոմիտեում մինչդատական վարույթի օրինականության նկատմամբ հսկողության վարչության պետի տեղակալ Մ. Անտոնյանի որոշմամբ՝ թիվ 62246225 քրեական վարույթով Գոռ Գևորիկի Թադևոսյանի նկատմամբ ՀՀ քրեական օրենսգրքի 46-254-րդ հոդվածի 3-րդ մասի 4-րդ կետով հարուցվել է հանրային քրեական հետապնդում:
2025 թվականի մայիսի 25-ին ՀՀ գլխավոր դատախազության ՀՀ հակակոռուպցիոն կոմիտեում մինչդատական վարույթի օրինականության նկատմամբ հսկողության վարչության պետի տեղակալ Մ. Անտոնյանի որոշմամբ՝ թիվ 62246225 քրեական վարույթով Էդգար Գարիկի Գրիգորյանի նկատմամբ ՀՀ քրեական օրենսգրքի 254-րդ հոդվածի 3-րդ մասի 4-րդ կետով հարուցվել է հանրային քրեական հետապնդում:
2025 թվականի մայիսի 24-ին Երևան քաղաքի առաջին ատյանի ընդհանուր իրավասության քրեական դատարանի որոշմամբ Գոռ Գևորիկի Թադևոսյանի նկատմամբ որպես խափանման միջոց է կիրառվել կալանքը՝ 2 (երկու) ամիս ժամկետով:
2025 թվականի մայիսի 26-ին Երևան քաղաքի առաջին ատյանի ընդհանուր իրավասության քրեական դատարանի որոշմամբ Էդգար Գարիկի Գրիգորյանի նկատմամբ որպես խափանման միջոց է կիրառվել կալանքը՝ 2 (երկու) ամիս ժամկետով:
Նախաքննության մարմնի 2025 թվականի հունիսի 30-ի որոշմամբ թիվ 62246225 քրեական վարույթից անջատվել է մեղադրյալներ Գոռ Գևորիկի Թադևոսյանի և Էդգար Գարիկի Գրիգորյանի վերաբերյալ մասը, որին շնորհվել է թիվ 62262025 քրեական վարույթի համարը:
2025 թվականի հուլիսի 04-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/2353/01/25 քրեական գործն ըստ մեղադրանքի՝ Էդգար Գարիկի Գրիգորյանի՝ ՀՀ քրեական օրենսգրքի 254-րդ հոդվածի 3-րդ մասի 4-րդ կետով և Գոռ Գևորիկի Թադևոսյանի՝ ՀՀ քրեական օրենսգրքի 46-254-րդ հոդվածի 3-րդ մասի 4-րդ կետով:
Նույն օրը քրեական գործն էլեկտրոնային եղանակով մակագրվել և 2025 թվականի հուլիսի 07-ին հանձնվել է դատավոր Տաթևիկ Մուրադյանին:
Դատարանը 2025 թվականի հուլիսի 09-ին որոշում է կայացրել թիվ ԵԴ1/2353/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի հուլիսի 22-ին թիվ ԵԴ1/2353/01/25 քրեական գործով նախնական դատալսումների ընթացքում Դատարանը որոշել է Գոռ Գևորիկի Թադևոսյանի նկատմամբ որպես խափանման միջոց կիրառված կալանքը փոխել և նրա նկատմամբ որպես այլընտրանքային խափանման միջոց կիրառել տնային կալանքը՝ 3 (երեք) ամիս ժամկետով՝ համակցված 5․000․000 (հինգ միլիոն) ՀՀ դրամի չափով և անշարժ գույքի ձևով գրավի ու բացակայելու արգելքի հետ։
2025 թվականի հուլիսի 22-ին թիվ ԵԴ1/2353/01/25 քրեական գործով նախնական դատալսումների ընթացքում Դատարանը որոշել է Էդգար Գարիկի Գրիգորյանի նկատմամբ որպես խափանման միջոց ընտրված կալանքի ժամկետը երկարաձգել 3 (երեք) ամիս ժամկետով՝ մինչև 2025 թվականի հոկտեմբերի 25-ը:
2025 թվականի հոկտեմբերի 21-ին Դատարանը որոշել է Գոռ Գևորիկի Թադևոսյանի նկատմամբ որպես այլընտրանքային խափանման միջոց ընտրված տնային կալանքի ժամկետը, այդ թվում՝ կիրառված սահմանափակումները երկարաձգել 3 (երեք) ամիս ժամկետով՝ մինչև 2026 թվականի հունվարի 23-ը:
2025 թվականի հոկտեմբերի 21-ին Դատարանը որոշել է Էդգար Գարիկի Գրիգորյանի նկատմամբ որպես խափանման միջոց ընտրված կալանքի ժամկետը երկարաձգել 3 (երեք) ամիս ժամկետով՝ մինչև 2026 թվականի հունվարի 25-ը:
2026 թվականի հունվարի 20-ին Դատարանը որոշել է Գոռ Գևորիկի Թադևոսյանի նկատմամբ որպես այլընտրանքային խափանման միջոց ընտրված տնային կալանքի ժամկետը, այդ թվում՝ կիրառված սահմանափակումները երկարաձգել 3 (երեք) ամիս ժամկետով՝ մինչև 2026 թվականի ապրիլի 23-ը:
2026 թվականի հունվարի 20-ին Դատարանը որոշել է Էդգար Գարիկի Գրիգորյանի նկատմամբ որպես խափանման միջոց ընտրված կալանքի ժամկետը երկարաձգել 3 (երեք) ամիս ժամկետով՝ մինչև 2026 թվականի ապրիլի 25-ը:
2026 թվականի փետրվարի 11-ին Դատարանը թիվ ԵԴ1/2353/01/25 քրեական գործով կայացրել է մեղադրական վերդիկտ՝ Գոռ Գևորիկի Թադևոսյանին մեղավոր ճանաչելով ՀՀ քրեական օրենսգրքի 46-254-րդ հոդվածի 3-րդ մասի 4-րդ կետով, իսկ Էդգար Գարիկի Գրիգորյանին՝ ՀՀ քրեական օրենսգրքի 254-րդ հոդվածի 3-րդ մասի 4-րդ կետով նախատեսված արարքների կատարման մեջ:
2. Մեղադրանքի փաստական նկարագրությունը.
Գոռ Գևորիկի Թադևոսյանին մեղադրանք է ներկայացվել ՀՀ քրեական օրենսգրքի 46-254-րդ հոդվածի 3-րդ մասի 4-րդ կետով այն բանի համար, որ «նա հանդիսանալով ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության հինգերորդ վարչության պետի պաշտոնակատարը, ի պաշտոնե տեղյակ է եղել իր ղեկավարած վարչության քննիչ Սուրեն Հակոբյանի աշխատասենյակի չհրկիզվող պահարանում առանձնապես խոշոր չափերով՝ 590.000 ԱՄՆ դոլար գումարի առկայության մասին:
Էդգար Գրիգորյանը, իր ծանոթ՝ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության հինգերորդ վարչության պետի պաշտոնակատար Գոռ Թադևոսյանից տեղեկանալով վերջինիս ղեկավարած վարչության քննիչ Սուրեն Հակոբյանի թիվ 617 աշխատասենյակի չհրկիզվող պահարանում պահվող 590․000 ԱՄՆ դոլար գումարի առկայության մասին, նախնական համաձայնության է եկել Գոռ Թադևոսյանի հետ այդ գումարը գաղտնի հափշտակելու, ապա միմյանց միջև հավասարապես բաժանելու շուրջ։ Այնուհետև, իրենց հանցավոր դիտավորությունն իրագործելու նպատակով, Գոռ Թադևոսյանը Էդգար Գրիգորյանին է տվել քննիչ Սուրեն Հակոբյանի աշխատասենյակի մուտքի դռան և չհրկիզվող պահարանի բանալիները, ինչպես նաև վարչության շենք մուտք գործելու անցաքարտ, ով պատրաստել է դրանց կրկնօրինակները, և նշված անցաքարտի կրկնօրինակն օգտագործելով, 2025 թվականի մայիսի 20-ին՝ 16:40-ի սահմաններում, ապօրինի մուտք է գործել Երևան քաղաքի Դեղատան փողոցի 3 հասցեում գտնվող ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության շենքը, որտեղ գտնվելու ընթացքում՝ գիշերային ժամի, բացել է վեցերորդ հարկում գտնվող՝ քննիչ Սուրեն Հակոբյանի թիվ 617 աշխատասենյակի դուռը, այնուհետև՝ չհրկիզվող պահարանը, որտեղից գաղտնի հափշտակել է այնտեղ պահվող՝ թիվ 83-0237-24 քրեական վարույթով առգրավված և իրեղեն ապացույց հանդիսացող՝ առանձնապես խոշոր չափերով՝ 227.185.400 ՀՀ դրամին համարժեք՝ 590.000 ԱՄՆ դոլար գումարը և 2025 թվականի մայիսի 21-ին՝ ժամը 08։20-ի սահմաններում, գումարը պայուսակներում դուրս եկել վարչական շենքից: Այնուհետև, հանդիպելով ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության քննիչներից մեկին, վերջինիս հարցին ի պատասխան, Էդգար Գևորգյանը կատարած հանցանքն անխոչընդոտ ավարտին հասցնելու և բացահայտումից խուսափելու նպատակով, հայտնել է, որ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության պետերից Գոռ Թադևոսյանն իր ընկերն է, որից հետո, քննիչը նշված հանգամանքը պարզելու նպատակով զանգահարել է Գոռ Թադևոսյանին: Գոռ Թադևոսյանը խմբի կողմից նախնական համաձայնությամբ առանձնապես խոշոր չափերով գումարի գաղտնի հափշտակությունն ավարտին հասցնելու նպատակով քննիչին հայտնել է, որ տվյալ անձն իր ընկերոջ եղբայր Արթուրն է, որից հետո Էդգար Գևորգյանը անխոչընդոտ հեռացել է դեպքի վայրից և Գոռ Թադևոսյանի հետ նախնական համաձայնությամբ հափշտակել 590.000 ԱՄՆ դոլար գումարը:»։
Էդգար Գարիկի Գրիգորյանին մեղադրանք է ներկայացվել ՀՀ քրեական օրենսգրքի 254-րդ հոդվածի 3-րդ մասի 4-րդ կետով այն բանի համար, որ «նա իր ծանոթ՝ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության հինգերորդ վարչության պետի պաշտոնակատար Գոռ Թադևոսյանից տեղեկանալով վերջինիս ղեկավարած վարչության քննիչ Սուրեն Հակոբյանի թիվ 617 աշխատասենյակի չհրկիզվող պահարանում պահվող 590․000 ԱՄՆ դոլար գումարի առկայության մասին, նախնական համաձայնության է եկել Գոռ Թադևոսյանի հետ այդ գումարը գաղտնի հափշտակելու, ապա միմյանց միջև հավասարապես բաժանելու շուրջ։ Այնուհետև, իրենց հանցավոր դիտավորությունն իրագործելու նպատակով, Գոռ Թադևոսյանը Էդգար Գրիգորյանին է տվել քննիչ Սուրեն Հակոբյանի աշխատասենյակի մուտքի դռան և չհրկիզվող պահարանի բանալիները, ինչպես նաև նույն վարչության քննիչ Արկադի Աղաջանյանի վարչության շենք մուտք գործելու անցաքարտ, ով պատրաստել է դրանց կրկնօրինակները, և նշված անցաքարտի կրկնօրինակն օգտագործելով, 2025 թվականի մայիսի 20-ին՝ 16:40-ի սահմաններում, ապօրինի մուտք է գործել Երևան քաղաքի Դեղատան փողոցի 3 հասցեում գտնվող ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության շենքը, որտեղ գտնվելու ընթացքում՝ գիշերային ժամի, բացել է վեցերորդ հարկում գտնվող՝ քննիչ Սուրեն Հակոբյանի թիվ 617 աշխատասենյակի դուռը, այնուհետև՝ չհրկիզվող պահարանը, որտեղից գաղտնի հափշտակել է այնտեղ պահվող՝ թիվ 83-0237-24 քրեական վարույթով առգրավված և իրեղեն ապացույց հանդիսացող՝ առանձնապես խոշոր չափերով՝ 227.185.400 ՀՀ դրամին համարժեք՝ 590.000 ԱՄՆ դոլար գումարը և 2025 թվականի մայիսի 21-ին՝ ժամը 08։20-ի սահմաններում, գումարը պայուսակներում դուրս եկել վարչական շենքից: Այնուհետև, հանդիպելով ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության քննիչ Սահակ Պետրոսյանին, վերջինի հարցին ի պատասխան՝ Էդգար Գրիգորյանը կատարած հանցանքն անխոչընդոտ ավարտին հասցնելու և բացահայտումից խուսափելու նպատակով, հայտնել է, որ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության պետերից Գոռ Թադևոսյանն իր ընկերն է, որից հետո, քննիչը նշված հանգամանքը պարզելու նպատակով զանգահարել է Գոռ Թադևոսյանին: Գոռ Թադևոսյանը խմբի կողմից նախնական համաձայնությամբ առանձնապես խոշոր չափերով գումարի գաղտնի հափշտակությունն ավարտին հասցնելու նպատակով քննիչին հայտնել է, որ տվյալ անձն իր ընկերոջ եղբայր Արթուրն է, այդ ընթացում Սահակ Պետրոսյանը Էդգար Գրիգորյանից վերցրել ՝ անցաքարտի կրկնօրինակը, որից հետո վերջինս անխոչընդոտ հեռացել է դեպքի վայրից և Գոռ Թադևոսյանի հետ նախնական համաձայնությամբ հափշտակել 590.000 ԱՄՆ դոլար գումարը:»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Դատաքննության ընթացքում մեղադրյալ Գոռ Թադևոսյանը ցուցմունք տվեց այն մասին, որ Էդգարին ճանաչում է իր սանիկի բնակության հասցեից: Նրա հետ հաճախակի հանդիպումներ է ունեցել: Հանդիպումներից մեկի ժամանակ Էդգարին ասել է իրենց վարչությունում պահվող գումարի մասին: Հանդիպումներից մեկի ժամանակ Էդգարը հայտնել է, որ կարող է այդ գումարը հափշտակել և այն կարող են բաժանել երկու մասի: Սկզբում ինքը չի համաձայնվել: Հետագա հանդիպումների ժամանակ Էդգարը դարձյալ առաջարկել է և ստացել իր համաձայնությունը: Բանալիները և իր անցաքարտը տվել է Էդգարին: Դրանից հետո արդեն Էդգարը կատարել է այդ արարքը, սակայն ինքը չի տեսել գումարը, չի իմացել, թե այն ուր է տարել, ինչ է արել: Ինքը դեպքից անմիջապես հետո ձերբակալվել է: Հետո տեղեկացել է, որ Էդգարը գումարը վերադարձրել է, սակայն դա որոշ չափով պակաս է եղել: Տեղեկություն չունի, թե գումարն ինչպիսի հանգամանքներում է պակասել, սակայն հստակ գիտի, որ այդ ամբողջ գումարը պահված է եղել չհրկիզվող պահարանում: Նշեց, որ ինքն այդ պակաս գումարը վերականգնել է: Հայտնեց, որ կատարվածի համար զղջում է: Իր տասներկու տարիների աշխատանքային գործունեության ընթացքում երբևէ կարգապահական պատասխանատվության չի ենթարկվել, միայն խրախուսվել է: Մեղադրյալի աթոռին հայտնվելն իր համար արդեն իսկ մեծագույն պատիժ է: Նշեց, որ այս պահին հստակ չի հիշում, թե արդյոք գումարի ծագման հանգամանքները հայտնել է Էդգարին, թե՝ ոչ, սակայն կարծում է, որ երևի հայտնած կլինի: Գումարի մասին Էդգարին հայտնել է պարզապես զրույցի ընթացքում՝ որևէ նպատակ չհետապնդելով: Բազմաթիվ անգամներ գրություններ են հասցեագրվել Կենտրոնական բանկ՝ գումարն այնտեղ տեղափոխելու համար, սակայն մերժում են ստացել: Նշեց, որ չի կարող ասել, թե ինչու է նման քայլի գնացել: Ֆինանսական լուրջ խնդիրներ չի ունեցել:
(դատական նիստի արձանագրություն)
- Դատաքննության ընթացքում մեղադրյալ Էդգար Գրիգորյանը ցուցմունք տվեց այն մասին, որ հաստատում է Գոռ Թադևոսյանի ցուցմունքը: Ընդունում է, որ գողություն է կատարել և զղջում է կատարվածի համար: Վնասը կամավոր վերականգնել է: Ինքն է հայտնել, թե գողացված գումարը որտեղ է գտնվում: Իր կողմից չհայտնելու դեպքում նրանք չէին կարող իմանալ, թե այն որտեղ է: Գումարի մասին ինքն իմացել է Գոռ Թադևոսյանից: Վերջինը ասել է, որ դա պետությունից թալանված գումար է, պետությունն էլ չի վերցնում: Ինքն էլ հարցրել է, թե այդ դեպքում ինչու այն չեն տալիս կարիքավոր մարդկանց: Ինքն առաջարկել է Գոռին, որ գնա և գումարը վերցնի: Գոռը մերժել է, սակայն հետո համաձայնության են եկել: Պայմանավորվել են, բանալին վերցրել է և կրկնօրինակել: Հայտնեց, որ ինքը զոհված հրամանատարի տղա է, և շուրջ երեսուն տարի է, ինչ հերթի մեջ են և սպասում են, որ պետությունից բնակարան ստանան, սակայն չեն ստանում: Ինքը մտածել է, որ այդ գումարն իրենից և իր նման մարդկանցից են թալանել: Նշեց, որ առաջինը Գոռ Թադևոսյանին են բռնել, հետո՝ իրեն: Ինքն իմացել է, որ Գոռին բռնել են: Իրեն բռնել են Գոռին բռնելուց երեք օր հետո: Այդ երեք օրերի ընթացքում ինքը չի թաքնվել, չի փորձել լքել Հայաստանը, չի փորձել գումարը թաքցնել: Անգամ հեռախոսը չի անջատել: Ինքը պատրաստ է եղել, որ իրեն պետք է ձերբակալեն: Ինքը միտումնավոր որոշակի գումար պահել է իր ավտոմեքենայում, որ բռնվելու դեպքում ասի, որ այդքանն է իր մոտ, որպեսզի գոնե արարքը որոշակիորեն հասներ իր նպատակին, ինչ-որ բան կարողանար «հետ գցել»: Այդպես էլ եղել է: Ձերբակալվելիս ասել է, որ Գոռը ճիշտ է ասում, ինքն է եղել, բայց ինքը տարել է 190 000 դոլար, մնացած 400 000-ից տեղյակ չէ: Բայց հետո ինքնակամ մնացածի տեղը ևս ասել է: Նշեց, որ ինքը հափշտակված գումարից մի քանի հարյուր դոլար է ծախսել՝ ստուգելու համար՝ դրանք իրական են, թե՝ ոչ: Չի կարող ասել, թե ինչու է ավելի շատ գումար պակասել, քան ինքը ծախսել է: Հայտնեց, որ մայիսի 20-ին երեկոյան ժամի մուտք է գործել քննչականի շենք, սպասել է նստարանների մոտ և ձևացրել է, որ հեռախոսով է խոսում: Այնքան է սպասել, մինչև բոլորն աշխատանքից գնացել են և ինքը մնացել է մենակ: Գոռն իրեն կոնկրետ ասել էր, թե որ աշխատասենյակում է գտնվում գումարը: Դռները բացել է Գոռի տված բանալիով: Չհրկիզվող պահարանը սենյակի ձախ մասում՝ դեմքով դեպի պատը: Չհրկիզվող պահարանի դուռը բացել է բանալիով: Իր մոտ ունեցել է նաև սուր գործիք: Շենքից դուրս է եկել առավոտյան ժամը 9-ի սահմաններում: Իրեն տեսել է աշխատողներից մեկը, հարցրել է, թե ով է: Ասել է, որ այդտեղ ծանոթներ ունի, այդտեղ չի աշխատում: Հայտնեց, որ գումարը հափշտակելուց հետո այն չի հաշվել: Գոռ Թադևոսյանն իրեն ասել էր գումարի չափը՝ 590 000 դոլար:
(դատական նիստի արձանագրություն)
- Թվային խուզարկություն կատարելու մասին 2025 թվականի մայիսի 24-ին կազմված արձանագրությունը, համաձայն որի՝ դատարանի որոշմամբ խուզարկվել է 2025 թվականի մայիսի 21-ին ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունից առգրաված «Canavis» ապրանքանիշի «CA-A702A-4H» մոդելի տեսագրիչը, որով պարզվել է, որ հայտնաբերված տեսագրություններից՝ 21․05․2025 պանակում «CH3_21-05-2025_050000_21-05-2025_060000_ID02372» տեսագրությունը 1 ժամ տևողությամբ ֆայլ է, որի վերևի աջ անկյունային տվյալներով այն տեսագրվել է 2025 թվականի մայիսի 21–ի ժամը 05։00։00–ից մինչև 06։00։00–ն։ Ներքևի ձախ անկյունում առկա է «cam 03» գրառումը։ Տեսագրությունում պատկերված է միջանցք, տեսախցիկի աջ կողմում առկա են դռներ, դիմային հատվածում՝ միջանցքի մուտքի դուռ։ Տեսագրության ժամը 05․27․04–ին միջանցքի դիմային հատվածի ընդհանուր դռնից միջանցք է մտնում սև վերնազգեստով, սպիտակ վերնաշապիկով արական սեռի անձ, որին գլխին առկա է գլխարկ։ Միջանցք մտնելուց հետո անձը շրջվում է ձախ, մի քանի վայրկյան նայում է պատին, ենթադրաբար կարդում է պատի վրայի ցուցանակը, ապա քայլելով գալիս է տեսանկարահանող սարքի կողմ և ժամը 05․27․41–ին դուրս է գալիս տեսախցիկի տեսադաշտից։ Այնուհետև ժամը 05․28․00–ին նույն անձը վերադառնում է տեսախցիկի տեսադաշտ և քայլելով մոտենում է միջանցքի մուտքի դռնից անմիջապես ձախ հատված՝ առաջին աշխատասենյակի մուտքի դռանը և անխոչընդոտ մտնում է ներս։ Ժամը 05։29։21–ն դուրս է գալիս աշխատասենյակից, նորից դեպքի տեսախցիկի կողմը, ժամը 05։29։41–ին դուրս է գալիս տեսախցիկի տեսադաշտից, որից հետո ժամը 05։47։06–ին հայտնվում է տեսախցիկի տեսադաշտում։ Նշված պահին անձի ձեռքերին նկատվում են ձեռնոցներ, իսկ աջ ձեռքին առկա է թղթե տոպրակին նմանվող տոպրակ, որում առկա է պարունակություն։ Տոպրակի բարձրությունը տեսագրության մեջ պատկերված է բռնակից հետո մինչև անձի ծնկի հատվածը։ Նշված անձը ժամը 05։47։28–ին մոտենում է միջանցքի մուտքի դռնից դեպի ձախ աշխատասենյակի դռան մոտ, մուտք գործում, որից հետո ժամը 05։47։36–ին դուրս է գալիս, ապա քայլելով միջանցքից ժամը 05։47։52–ին բացելով միջանցքի ընդհանուր դուռը հեռանում է։
Թվային խուզարկության արդյունքում հայտնաբերված «CH19_21-05-2025_074830_21-05-2025_083347_ID03863» տեսագրության ուսումնասիրությամբ պարզվեց, որ այն պատկերված է Դեղատան 3 հասցեում գտնվող վարչական շենքի մուտքի սրահը, անցագրային մասը, այդ թվում՝ վերելակների հատվածը։ Տեսագրության ժամը 08։20։23–ին վերելակին է մոտեցել համազգեստով արական սեռի անձ և նույն պահին տեսագրության ձախ կողմում պատկերված վերելակի դուռը բացվել և այնտեղից դուրս է եկել վեցերորդ հարկի միջանցքում ֆիքսված արական սեռի նույն անձը, ում ձախ ձեռքին առկա է թափանցիկ շիշ, կիսով չափ դեղնավուն հեղուկով լցված։ Այդ անձի ձախ ձեռքին առկա է կաշվենման և թղթե երկու տոպրակներ։ Այդ անձը մոտենում է անցակետին, համապատասխան հատվածին մոտեցնում է հավանաբար անցաքարտ և նույն պահին գետնին է գցում ինչ-որ առկա, որքանով տեսանելի է՝ ակնոց, ապա այն վերցնելով գետնից, երկրորդ անգամ անցաքարտը մոտեցնում է և բացելով անցակետը քայլում է դեպի շենքի մուտքի դուռը և աջ կողմի փեղկը բացելով դուրս է գալիս շենքից և քայլում մուտքից դեպի աջ։ Նույն ժամանակ միջանցքում հանդիպած համազգեստով անձը նկատելի է, որ զրուցում է պատուհանից ներս գտնվող անձի հետ, ապա ժամը 08։21։26–ին ձեռքի իրերը թողնելով անձի մոտ ժամը 08։21։36–ի դուրս է գալիս շենքից և թեքում դեպի աջ։
«CH8_21-05-2025_074824_21-05-2025_083335_ID03851» տեսագրության ուսումնասիրությամբ պարզվեց, որ ենթադրաբար հանցանք կատարած անձը ժամը 08։20։56–ին դուրս է եկել Դեղատան 3 հասցեում գտնվող վարչական շենքից, ձեռքի շիշը դրել թևի տակ և ուղղելով ձեռքի առարկաները, ժամը 08։21։15–ին քայլելով հեռանում է դեպի Վ․Սարգսյան փողոցի ուղղությամբ։ Ժամը 08։21։36–ին համազգեստով անձը դուրս է գալիս շենքից և արագ քայլելով գնում է ենթադրաբար հանցանք կատարած անձի ուղղությամբ:
(հատոր 3, գ.թ. 43-49, դատական նիստի արձանագրություն)
- Զննում կատարելու մասին 2025 թվականի հունիսի 2-ին կազմված արձանագրությունը, համաձայն որի՝ զննվել է ՀՀ քննչական կոմիտեից 2025 թվականի հունիսի 2-ի թիվ 10/10/189030-25 գրությամբ ստացված ՀՀ ՔԿ տնտեսական հանցագործությունների և մաքսանենգությունների քննության գլխավոր վարչության 6-րդ հարկի տեսագրությունների սկավառակը, որով պարզվել է, որ «Camera_01_Tntesakan_Tntesakan_20250521030000_20250521055959_11163211»գրառմամբ տեսագրությունում առկա է 21․05․2025 թվականի 05։13։14 վայրկյանին քրեական գործով մեղադրյալ Էդգար Գրիգորյանը մուտք է գործում 6-րդ հարկ և ուշադիր նայում է ձախ կողմում գտնող դռանը և 05։13։22-ին դուրս է գալիս տեսախցիկի դաշտից։ 05։14։29 կրկին հայտնվում է տեսախցիկի դաշտում և 05։14։29 մուտք գործում իրենից աջ գտնվող աշխատասենյակ։05։15։27 կրկին դուրս է գալիս աշխատասենյակից դեպի միջանցք և 05։15։29 դուրս գալիս տեսախցիկի դաշտից։ 05։33։36-ին կրկին երևում է տեսախցիկում, որ մուտք է գործում նույն աշխատասենյակ ձեռքին սպիտակ պայուսակով գողոնը, և 05։33։45-ին դուրս է գալիս նույն աշխատասենյակից և ձեռքին ուն սպիտակավուն պայուսակով գողոնը դուրս գալիս միջանցք և միջանցքի դռնով 05։34։00-ին լքում 6-րդ հարկը։
(հատոր 6, գ.թ. 18-19, դատական նիստի արձանագրություն)
- Զննում կատարելու մասին 2025 թվականի հունիսի 9-ին կազմված արձանագրությունը, համաձայն որի՝ զննվել է Գոռ Թադևոսյանի կողմից շահագործված 055-02-22-25, բջջային հեռախոսահամարով 2024 թվականի դեկտեմբերի 1-ից մինչև 2025 թվականի մայիսի 21-ը ներառյալ ժամանակահատվածի մուտքային և ելքային զանգերի հաղորդակցության (հաղորդագրությունները) հեռախոսային հեռախոսահամարների բաժանորդների անհատական տվյալների, հեռախոսային հաղորդակցությունն սկսելու պահին և դրա ընթացքում հաղորդակցվողների գտնվելու վայրի և նրանց տեղաշարժը վերաբերյալ տեղեկությունները:
Զննությամբ պարզվել է, որ Գոռ Թադևոսյանի կողմից օգտագործված 055-02-22-25 բջջային հեռախոսահամարից 13․04․2025թ․ ժամը 23։10-ին ելքային զանգ է կատարվել Էդգար Գրիգորյանի կողմից օգտագործվող 093-03-93-88 բջջային հեռախոսահամարին և 8 վայրկյան հեռախոսազրույց ունեցել։
Բացի այդ, Գոռ Թադևոսյանի կողմից օգտագործված 055-02-22-25 բջջային հեռախոսահամարից 27․04․2025թ․ ժամը 16։14-ին ելքային զանգ է կատարվել Էդգար Գրիգորյանի կողմից օգտագործվող 093-03-93-88 բջջային հեռախոսահամարին և 51 վայրկյան տևողությամբ հեռախոսազրույց ունեցել։
(հատոր 63, գ.թ. 170-171, դատական նիստի արձանագրություն)
- Զննում կատարելու մասին 2025 թվականի հունիսի 27-ին կազմված արձանագրությունը, համաձայն որի՝ զննվել է 2025 թվականի մայիսի 22-ին Կոտայքի մարզի Աբովյան քաղաքի Հանրապետության շենք 1/61/1 հասցեում գտնվող տարադրամի փոխանակում իրականացնող «Գեղամ Արքա» ՍՊԸ-ից առգրավված «8 CHH264» տեսակի կրիչից լազերային սկավառակներ ներբեռնած տեսագրությունները, որով պարզվել է, որ CH02_2025MAY21083000 գրառմամբ տեսագրությունում առկա է, որ 21․05․2025 թվականի 09։45։00 վայրկյանին քրեական գործով մեղադրյալ Էդգար Գրիգորյանը մոտենում է տարադրամի պատուհանին, բժշկական դիմակով և 100 ԱՄՆ դոլար փոխանակում, որից հետո հեռանում տարածքից։
(հատոր 6, գ.թ. 269-270, դատական նիստի արձանագրություն)
- Թվային խուզարկություն կատարելու մասին 2025 թվականի հունիսի 29-ին կազմված արձանագրությունը, համաձայն որի՝ թվային խուզարկության է ենթարկվել մեղադրյալ Էդգար Գրիգորյանից անձնական խուզարկությամբ վերցված «Iphone 13pro max» ապրանքանիշի 352206209004123 գործարանային համարի բջջային հեռախոսը, որով պարզվել է, որ Էդգար Գրիգորյանի կողմից օգտագործված բջջային 093-03-93-88 բջջային հեռախոսահամարին 13․04․2025 թվականին՝ ժամը 23։10-ին մուտքային զանգ է կատարվել Գոռ Թադևոսյանին պատկանող 055-02-22-25 բջջային հեռախոսահամարից, խոսակցությունը տևել է 8 վայրկյան:
Բացի այդ, Գրիգորյանի կողմից օգտագործված բջջային 093-03-93-88 բջջային հեռախոսահամարին 27․04․2025 թվականին՝ ժամը 16։14-ին մուտքային զանգ է կատարվել Գոռ Թադևոսյանին պատկանող 055-02-22-25 բջջային հեռախոսահամարից, խոսակցությունը տևել է 51 վայրկյան։
Բացի այդ, Գոռ Թադևոսյանի 055-02-22-25 բջջային հեռախոսահամարը «Telegram», հավելվածում գրանցված է «Gor Narek 2 Hamar» և նրանց միջև տեղի է ունեցել հեռախոսազանգեր՝ 15․05․2025 թվականին՝ ժամը 22։45-ին և 22։11-ին, 16․05․2025 թվականին՝ ժամը 18։26-ին, 20:18-ին, 21։27-ին, 22․03-ին, 22։04-ին, 22։08-ին, և 22։16-ին 19․05․2025թ-ին ժամը 22։09-ին և 21։40-ին, որոնք լուսանկարահանվեցին և կցվեցին քրեական վարույթին։
(հատոր 6, գ.թ. 289-300, դատական նիստի արձանագրություն)
- Զննում կատարելու մասին 2025 թվականի հունիսի 28-ին կազմված արձանագրությունը, համաձայն որի՝ զննվել է ՀՀ ՊԵԿ ներքին անվտանգության վարչությունից առգրավված «Excel» ֆայլով ներբեռնված լազերային սկավառակը, որում ներբեռնված է ք․Երևան, Դեղատան 3 հասցեում գտնվող ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության վարչական շենքի անցակետերի շարժը ամրագրող տեղեկատվությունը, որով պարզվել է, որ մեղադրյալ Էդգար Գրիգորյանը Արկադի Աղաջանյանի անցաքարտով ք․Երևան, Դեղատան 3 հասցեում գտնվող ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության վարչական շենք է մուտք գործել 20.05.2025 16:42:45, և շենքից դուրս է եկել 21.05.2025 08:21:07-ին։
(հատոր 6, գ.թ. 273-274, դատական նիստի արձանագրություն)
- Թվային խուզարկություն կատարելու մասին 2025 թվականի հունիսի 28-ին կազմված արձանագրությունը, համաձայն որի՝ թվային խուզարկության է ենթարկվել Գոռ Թադևոսյանից առգրավված «Iphone 11» ապրանքանիշի բջջային հեռախոսը, որով պարզվել է, որ «Կոնտակտներ» հեռախոսահամարներ բաժնում մեղադրյալ Էդգար Գրիգորյանի 093-03-93-88 հեռախոսահամարը գրանցված է «Edo Narek» անվամբ։ Նշված բջջային հեռախոսահամարին Գոռ Թադևոսյանը իր 055-02-22-25 բջջային հեռախոսահամարից զանգեր է կատարել 13․04․2025թ-ին՝ ժամը 23։10-ին, 18․04․2025թ-ին՝ ժամը 13։59-ին, 23․04․2025 թ-ին՝ ժամը 13։02-ին և 27․04․2025 թ-ին ժամը 16։14-ին։
(հատոր 6, գ.թ. 275-288, դատական նիստի արձանագրություն)
- Առարկաներ վերցնելու մասին 2025 թվականի մայիսի 24-ին կազմված արձանագրությունը, համաձայն որի՝ քրեական վարույթով Անահիտ Արտակի Գասպարյանից վերցվել է վերջինիս կողմից կամովին ներկայացրած գումարը, համաձայն որի «Wildberries» գրառմամբ պոլիէթիլենային տոպրակից հանել է թվով 3 հատ սև գույնի կապոցներ, որոնցից երկուսը փաթաթված են եղել թափանցիկ կպչուն ժապավենով։
Կապոցները բացվել են, դրանցից առկա են եղել համապատասխանաբար 8, 10 և 10 հատ 100 ԱՄՆ դոլար անվանական արժեքով թղթադրամների կապոցներ՝ ընդհանուր 28 հատ, կապված բարակ ռետինե լարերով։ Դրանցում առկա գումարը հաշվել են օպերատիվ աշխատակիցները, առանց կապոցների ամբողջականությունը խախտելու, կատարվել է պայմանական համարակալում նշվել է յուրաքանչյուր կապոցի վերևի և ներքևի մասերում դրված թղթադրամների համարանիշները։
Անահիտ Գասպարյանի կողմից կամովին ներկայացվել է 279.800 ԱՄՆ դոլար գումար, որը վերցվել և փաթեթավորվել է մեկ փաթեթում։
(հատոր 3, գ.թ. 66-67, դատական նիստի արձանագրություն)
- Ավտոմեքենայում խուզարկություն կատարելու մասին 2025 թվականի մայիսի 24-ին կազմված արձանագրությունը, համաձայն որի՝ խուզարկություն է կատարվել Էդգար Գրիգորյանի կողմից շահագործվող «Chrysler 300» մակնիշի 90AM101 համարանիշի ավտոմեքենայում, որտեղից հայտնաբերվել է 189.900 ԱՄՆ դոլար գումարը։
(հատոր 3, գ.թ. 115-123, դատական նիստի արձանագրություն)
- Դատահետքաբանական թիվ 1019-25 եզրակացությունը, համաձայն որի՝
1. Թիվ 62246225 քրեական վարույթով փորձաքննության ներկայացված աշխատասենյակի դռան փականի գլանաձև մեխանիզմի արտաքին մակերեսների ինչպես անզեն աչքով, այնպես էլ խոշորացնող սարքերով հետազոտությամբ վերջինիս մակերեսների վնասվածքներ չհայտնաբերվեցին:
Գլանաձև մեխանիզմի հետ փորձաքննության ներկայացված թվով երեք բանալիները հեշտությամբ, առանց խոչընդոտի մտնում են գլանաձև մեխանիզմի բանալու համար նախատեսված անցքի մեջ, փոխներգործում են գլանաձև մեխանիզմի աշխատարար դետալներ հետ, աշխատացնում' բացում և փակում են գլանաձև մեխանիզմը: Վերջինս գտնվում է սարքին վիճակում:
Աշխատասենյակի դռան փականի գլանաձև մեխանիզմի գլանի մեջ տեղակայված բույթերի գլխիկային հատվածների վրա առկա են գծային դասավորվածության, թույլ արտահայտված քերծվածքների տեսքերով հետքեր, որոնք կարող էին առաջանալ ինչպես փորձաքննության ներկայացված բանալիների, այնպես էլ գլանաձև մեխանիզմին պատկանող բանալիների չափերին ու կառուցվածքին համապատասխանող հարմարեցված բանալու կամ կրկնօրինակ բանալու ներգործության արդյունքում, ինչի հետևանքով էլ, ամենայն հավանականությամբ, բացվել է փականը:
2. Չհրկիզվող պահարանի արտաքին մակերեսների ինչպես անզեն աչքով, այնպես էլ խոշորացնող սարքերով հետազոտությամբ վնասվածքներ չհայտնաբերվեցին:
Չհրկիզվող պահարանի գլանաձև մեխանիզմների արտաքին մակերեսներին, մասնավորապես, բանալու անցքի մուտքի վրա և շրջակայքում առկա են ներհրվածքների և քերծվածքների տեսքերով հետքեր և վնասվածքներ, որոնք մեխանիկական բնույթի են և կարող էին առաջանալ օտար պինդ առարկայի կամ գործիքի' հնարավոր է նաև ներկայացված առարկայի ներգործությունների արդյունքում:
Փորձաքննության ներկայացված չհրկիզվող պահարանի փականների գլանաձև մեխանիզմների բոլթերի վրա առկա են մեխանիկական բնույթի քերծվածքների և տաշվածքների հետքեր, որոնք կարող էին առաջանալ օտար, պինդ առարկայի կամ գործիքի, հնարավոր է փորձաքննության ներկայացված մետաղյա առարկայի ներգործությունների արդյունքում:
Չհրկիզվող պահարանի փականների գլանաձև մեխանիզմները կարող էին աշխատեցվել ինչպես փորձաքննության ներկայացված բանալիների, այնպես էլ գլանաձև մեխանիզմներին պատկանող բանալիների չափերին ու կառուցվածքին համապատասխանող հարմարեցված բանալու կամ կրկնօրինակ բանալու ներգործության արդյունքում:
3. Չհրկիզվող պահարանի փականների աշխատեցնելու մեխանիզմը պարզելու նպատակով, փականները աշխատեցվեցին իրենց բանալիներով, ինչի արդյունքում պարզվեց, որ փականներն աշխատեցվում են միմյանցից անկախ' մի փականի փակ լինելու դեպքում չհրկիզվող պահարանի դուռը գտնվում է փակ վիճակում: Բանալիներից «VN4898» գրառմամբ բանալին աշխատացնում է նույն գրառմամբ գլանաձև մեխանիզմը, իսկ «VN4203» գրառմամբ բանալին աշխատացնում է նույն գրառմամբ գլանաձև մեխանիզմը:
Հարկ է նշել, որ բռնակի կողմի փականը փակված վիճակում դռան բռնակի միջոցով աշխատացնելով դուռը բացվում է, ինչից կարելի է եզրակացնել, որ տվյալ կողմի փականի սարքինությունը թերի է' բանալու միջոցով փականը փակվում է, սակայն բռնակի միջոցով դուռը բացվում է՝ առանց գլանաձև մեխանիզմը բացելու:
4. Փորձաքննության ներկայացված կոտրված 2 առարկաները նախկինում կազմել են մեկ ամբողջություն, այն հանդիսանում է ատաղծագործական փետուրանման գայլիկոն՝ նախատեսված փայտ ծակելու համար:
5. «Արդյոք հնարավոր էր բացել չհրկիզվող պահարանի փականն (ները) այդ մետաղական դետալով, թե՝ ոչ, այն (դրանք) բացվել է այդ մետաղական դետալով, թե' ոչ» հարցերին հնարավոր կլիներ .պատասխանել մետաղյա դետալի ամբողջական լինելու դեպքում' դրանով փորձարարություն կատարելու արդյունքում:
(հատոր 3, գ.թ. 41-47, դատական նիստի արձանագրություն)
- 2025 թվականի հունիսի 30-ի որոշմամբ որպես արտավարութային փաստաթուղթ ճանաչված ներքոհիշյալ փաստաթղթերը`
1) 2025 թվականի մայիսի 21-ին ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության վարչությունից առգրավված «Canavis» ապրանքանիշի «CA-A702A-4H» մոդելի տեսագրիչից տեսանյութերը ներբեռնած լազերային սկավառակով,
2) Գոռ Թադևոսյանից առգրավված «Iphone 11» համարի բջջային հեռախոսը՝ մեկ կնքված փաթեթում, որը պահվում է քրեական վարույթի հետ, այդ հեռախոսում կատարված թվային խուզարկությամբ հայտնաբերված թվային տվյալներով, թղթային տարբերակով հավելվածների տեսքով՝ կցված քրեական վարույթի նյութերին,
3) Էդգար Գրիգորյանի անձական խուզարկությամբ վերցված «Iphone 13pro max» ապրանքանիշի 352206209004123 գործարանային համարի բջջային հեռախոսը՝ մեկ կնքված փաթեթում, որը պահվում է քրեական վարույթի հետ, այդ հեռախոսներում կատարված թվային խուզարկությամբ հայտնաբերված թվային տվյալներով, թղթային տարբերակով հավելվածների տեսքով կցված քրեական վարույթի նյութերին,
4) «Յուքոմ Արմենիա» ՓԲԸ-ից 2025 թվականի հունիսի 4-ին թիվ 3710-25/ՀԿ գրությամբ տեղեկատվական տվյալներ պարունակող լազերային սկավառակով,
5) 2025 թվականի մայիսի 22-ին ՀՀ ՊԵԿ ներքին անվտանգության վարչությունից առգրավված Երևան, Դեղատան 3 հասցեում գտնվող ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության վարչական շենքի անցակետերի շարժը ամրագրող տեղեկատվությունը պարունակող լազերային սկավառակով,
6) ՀՀ քննչական կոմիտեից 2025 թվականի հունիսի 2-ի թիվ 10/10/189030-25 գրությամբ ստացված ՀՀ ՔԿ տնտեսական հանցագործությունների և մաքսանենգությունների քննության գլխավոր վարչության 6-րդ հարկի տեսագրությունները պարունակող լազերային սկավառակով,
2025 թվականի մայիսի 22-ին Կոտայքի մարզի Աբովյան քաղաքի Հանրապետության շենք 1/61/1 հասցեում գտնվող տարադրամի փոխանակում իրականացնող «Գեղամ Արքա» ՍՊԸ-ից առգրաված «8 CHH264» տեսակի կրիչում առկա տեսագրությունները պարունակող լազերային սկավառակներով։
(հատոր 6, գ.թ. 325-333, դատական նիստի արձանագրություն)
- Վկա Անահիտ Գասպարյանը դատաքննության ընթացքում ցուցմունք տվեց այն մասին, որ 2025 թվականի մայիսի 21-ին կամ 22-ին գիշերն իրեն զանգել է ընկերուհին՝ Ալեքսանդրա Լևանդրովսկայան։ Ինքը մտածել է, որ վատ բան է տեղի ունեցել, քանի որ նա իրեն ընդհանրապես գիշերները չի զանգում: Ալեքսանդրան իր աղջկա հետ եկել է շքամուտք, և փոխանցել է պոլիէթիլենային տոպրակ։ Հարցրել է նրան, թե ինչ է տոպրակում, արդյոք վտանգավոր բան կա, Ալեքսանդրան բացասական պատասխան է տվել և ասել, որ տոպրակում գումար է, վաղը կգա կվերցնի և կասի թե ինչ է եղել։ Իրենց շփումը տևել է տասը վայրկյան։ Տոպրակի պարունակությունը չի տեսել, քանի որ այն փակ է եղել։ Քննչականում գումարն իր դիմաց հաշվել են, եթե չի սխալվում մոտ 300.000-ի կարգի գումար է եղել:
Քննչական կոմիտեի տնտեսական հանցագործությունների և մաքսանենգությունների քննության գլխավոր վարչության հինգերորդ վարչությունից 590.000 ԱՄՆ դոլար գումար հափշտակելու մասին տեղեկացել է մամուլում եղած հրապարակումներից։ Էդգարի հետ չի խոսել այդ դեպքի մասին, իսկ Սաշան տեղյակ չի եղել:
(դատական նիստի արձանագրություն)
- Վկա Քրիստինե Արամյանը դատաքննության ընթացքում ցուցմունք տվեց այն մասին, որ 2025թ. ապրիլի 21-ին նշանակվել է ՀՀ ՔԿ տնտեսական հանցագործությունների և մաքսանենգությունների քննության գլխավոր վարչության 5-րդ վարչության քննիչի պաշտոնում, այդ օրվա դրությամբ իր անմիջական ղեկավարը եղել է Գոռ Թադևոսյանը։ Իր ներկայիս աշխատասենյակը գտնվում է Երևան քաղաքի Դեղատուն 3 հասցեում գտնվող շենքի 6-րդ հարկի 617 աշխատասենյակում։ Նույն աշխատասենյակում է աշխատում նաև իր գործընկեր Սուրեն Հակոբյանը։ 21.04.2025թ․ ՀՀ ՔԿ տնտեսական հանցագործությունների և մաքսանենգությունների քննության գլխավոր վարչության 5-րդ վարչության քննիչի պաշտոնում նշանակվելու օրը, Սուրեն Հակոբյանը գնացել է արձակուրդ։ Սուրենի արձակուրդից վերադառնալուց հետո Գոռ Թադևոսյանը Սուրեն Հակոբյանին է վերադարձրել իրենց աշխատասենյակում տեղադրված մետաղյա չհրկիզվող պահարանի բանալին։ Գումարի չափի մասին ինքը իմացել է մոտավոր՝ Սուրենի և Գոռի խոսակցություններից, իսկ գումարի հստակ չափն ինքը իմացել է 21.05.2025թ․ քննչական գործողությունների ընթացքում։ Սուրենն ու Գոռը շրջել են իրենց աշխատասենյակում տեղադրված փոքր սեյֆը, որում պահվում էր միայն նշված գումարը, որից հետո Սուրենը հանելով սեյֆում առկա սպիտակ գույնի թղթե տոպրակը, համոզվել էր, որ առգրավված ամբողջ գումարը տեղում է ու կրկին տեղադրել է սեյֆի մեջ։ Դրանից հետո Սուրենն ու Գոռը սեյֆի դիմային մասը կրկին շրջել են դեպի պատի կողմը։ Քանի որ իրենց աշխատասենյակը շատ փոքր է, ինքն այդ սեյֆի վերևի հատվածն օգտագործել է սուրճի պարագաներ պահելու համար։ 20.05.2025թ. ինքն աշխատասենյակից դուրս է եկել վերջինը՝ ժամը մոտ 21։00-ի սահմաններում, և իր մոտ գտնվող բանալիով փակել աշխատասենյակի դուռը։ Մինչև 21.05.2025թ. ինքը որևէ տարօրինակ բան չի նկատել նշված սեյֆի վրա տեղադրված սուրճի պարագաների դասավորվածության հետ կապված։ 21.05.2025թ. առավոտյան ժամը 08։58-ին ներկայացել է աշխատանքի, բացել աշխատասենյակի դուռը և սովորականի պես իր համար սուրճ պատրաստել և իր աշխատասենյակի դիմացի հատվածում գտնվող քարտուղարության աղջիկների հետ սուրճ խմել, այնուհետև անցել իր աշխատանքային պարտականությունների կատարմանը։ 21.05.2025թ. ժամը 13։00-ին Գոռ Թադևոսյանի հետ գնացել է ընդմիջման և վերադարձել աշխատանքի։ Նկատել է, որ գործավարության աշխատակիցները մի փոքր այլայլված են: Բացելով աշխատասենյակի դուռը՝ նկատել է, որ Սուրեն Հակոբյանի սեյֆը, որում տեղադրված էր մոտ կես միլիոն ԱՄՆ դոլար գումարը, շրջված էր, իսկ սեյֆի դուռը բաց էր։ Անմիջապես գնացել է վարչության պետի պաշտոնակատար Գոռ Թադևոսյանի աշխատասենյակ, որտեղ գտնվող Գոռ Թադևոսյանից և Սուրեն Հակոբյանից տեղեկացել, որ նշված գումարը հափշտակվել է։ Սկզբում մտածել է, թե կատակում են, սակայն հետո հասկացել է, որ լուրջ են: Այդ օրը խոսակցություններ էին եղել, որ իրենց գործընկերներից մեկը՝ Սահակը, վերելակից իջնելիս ինչ-որ անձի է տեսել, կանգնեցրել և հարցրել է, թե ով է, հետո չիպն է գցել և այլն: Նման միջադեպ է եղել: Նշեց, որ ինքը տեղեկություն չի ունեցել իր գործընկեր Սուրենի կողմից բանալիները կորցնելու վերաբերյալ: Իմացել էր, որ Արկադի Աղաջանյանն է բանալի կորցրել: Նշեց, որ դեպքի օրը լրացել է իր՝ այդ վարչությունում աշխատելու մեկ ամիսը:
Գոռ Թադևոսյանին բնութագրեց դրականորեն: Հայտնեց, որ նրանից որևէ բացասական բան չի նկատել:
դատական նիստի արձանագրություն)
- Վկա Արկադի Աղաջանյանը դատաքննության ընթացքում ցուցմունք տվեց այն մասին, որ 2023 թվականի հունվարի 04-ից զբաղեցրել է ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության 5-րդ վարչության քննիչի պաշտոնը, մինչ այդ աշխատել է ՀՀ ՊԵԿ քննչական վարչության թիվ 5 բաժնում՝ զբաղեցնելով քննիչի պաշտոնը։
Գոռ Թադևոսյանին ճանաչել է 5-րդ վարչության պետի տեղակալի պաշտոնին նշանակվելուց հետո։
Նույն շենքի 5-րդ և 6-րդ հարկերում կողմնակի անձանց մուտքը սահմանափակված է մուտքի համար նախատեսված էլեկտրոնային քարտերով /չիպ/, այսինքն տվյալ հարկեր մուտք գործելու համար անհրաժեշտ է նույն ծածկագրով հագեցված էլեկտրոնային քարտ, ինչը կողմնակի անձն ունենալ չի կարող։
ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունում աշխատանքի ընդունվելուց հետո, յուրաքանչյուր քննիչի տրամադրվել է մեկ էլեկտրոնային քարտ չիպ, որը նախատեսվել է շենքում միջհարկային դռները և առաջին հարկում տեղադրված հսկիչ անցագրային կետի արգելափակոցն անխոչընդոտ բացելու, ինչպես նաև աշխատանքի ներկայանալու և շենքից դուրս գալու հստակ ժամանակն ամրագրելու համար։
Իր նախաձեռնությամբ ձեռք է բերել չափերով անհամեմատ ավելի փոքր սև պլաստիկե պատվածքով կրիչ՝ չիպ, և ամրացրել է աշխատասենյակի դռան փականի բանալիների օղակին։
Նշել է, որ նույն վարչության քննիչ Սուրեն Հակոբյանի վարույթում քննվող քրեական վարույթով առգրավված և նրան հատկացված չհրկիզվող պահարանում խոշոր չափերով գումարի գոյության մասին տեղեկացել է տեղի ունեցած քննարկումների ժամանակ։
Նշեց, որ արձակուրդ մեկնելու ժամանակ իր բանալիները և վերոնշյալ չիպը հանձնել է իր ղեկավարին՝ Գոռ Թադևոսյանին:
Նշել է, որ եղել է ժամանակահատված, երբ աշխատասենյակի բանալին կորել է, սակայն հետո այն կրկին գտել է:
Գոռ Թադևոսյանին բնութագրում է դրականորեն:
(դատական նիստի արձանագրություն)
- Դատաքննության ընթացքում վկա Սուրեն Հակոբյանը ցուցմունք տվեց այն մասին, որ 2024 թվականի մայիսի 06-ին «Էքսպերտ 1» ՍՊ ընկերության գործունեության՝ քաղաք Երևան, Հրաչյա Քոչար փողոց 10/4 և 11/4 հասցեներում իրականացված խուզարկության արդյունքում հայտնաբերվել և առգրավվել է 590․000 ԱՄՆ դոլար գումար, որը նույն օրը տեղափոխվել է աշխատանքի վայր և պահվել իր պատասխանատու պահպանությանը հանձնված չհրկիզվող մետաղական պահարանում։
Իրեն ամրակցված չհրկիզվող պահարանում 590․000 ԱՄՆ դոլար գումարի պահման մասին տեղյակ են եղել թիվ 5-րդ վարչության գրեթե բոլոր աշխատակիցները, ինչը նրանց մի մասին հայտնի է դարձել աշխատանքային խորհրդակցությունների ընթացքում, իսկ մյուսներին քննչական խմբում ընդգրկված լինելու հանգամանքով պայմանավորված։
Հաշվի առնելով փողերի լվացման հանցակազմի հատկանիշների վերաբերյալ եղած կասկածները և նախաքննության նախնական՝ ապացույցների հավաքման փուլում գտնվելը, 5-րդ վարչության պետ Արտյոմ Խաչատրյանի հետ ունեցած քննարկման ընթացքում վերջինս որոշել է սկզբնական ժամանակահատվածում վերցված գումարն իրեղեն ապացույց չճանաչել և ՀՀ կենտրոնական բանկի դեպոզիտարիա չհանձնել։
Այդ հանգամանքից ելնելով էլ որոշվել է գումարը պահել իր պատասխանատու պահպանության տակ գտնվող չհրկիզվող պահարանում, որն ունեցել է երկու ներքին փական՝ մեկական բանալիներով, որոնք մշտապես գտնվել են իր մոտ և որևէ դեպքում այլ անձի կամ անձանց չեն փոխանցվել։
2024 թվականի մայիսի 06-ից մինչև նույն թվականի հուլիսն ընկած ժամանակահատվածում՝ չճշտված օրը և ժամին, ընդմիջումից վերադարձել է աշխատասենյակ և ինչ-որ պահի այնտեղից դուրս գալու ընթացքում հայտնաբերել է, որ բանալիների խուրձը, որտեղ եղել են իր բնակարանի երկու բանալիները, չհրկիզվող հիշյալ մետաղական պահարանի երկու բանալիները, աշխատասենյակի բանալին, ինչպես նաև իր բնակելի շենք մուտք գործելու համար նախատեսված էլեկտրոնային քարտը՝ անհետացել, կորել են։
Մոտավորապես մեկ ժամ իր և այլ աշխատասենյակներում փնտրելուց և չգտնելուց հետո այդ մասին հայտնել է իր անմիջական ղեկավար Արտյոմ Խաչատրյանին, իսկ վերջինս էլ վերադասության կարգով գլխավոր վարչության պետ Արսեն Սիմոնյանին՝ հաշվի առնելով պահարանում գտնվող գումարի չափը, որից հետո կայացած քննարկումների ընթացքում որպես տարբերակ իր կողմից առաջարկվել է հրավիրել չհրկիզվող պահարանի ներքին փական բացող հմտություններ ունեցող մասնագետի և Արտյոմ Խաչատրյանի համաձայնությունը ստանալուց հետո, անձամբ ճշտելով մասնագետ մասնագետի հեռախոսահամարը՝ անձամբ զանգահարել ու կայացած խոսակցության ընթացքում վերջինիս պահանջով լուսանկարել է տվյալ չհրկիզվող մետաղական պահարանի փականների հատվածը և ուղարկել է նրան։
Նույն օրը որոշ ժամանակ անց մասնագետը զանգահարել ու ասել է, որ կարող է բացել և որպես տարբերակ առաջարկել է փոխարինել ներքին փականները, բացել և բանալի պատրաստել՝ 30․000 ՀՀ դրամ և միայն բացելու համար՝ 15․000 ՀՀ դրամ։
Մասնագետի առաջարկած տարբերակներից ընդունելի է համարել 30․000 ՀՀ դրամ արժողությամբ ծառայությունը՝ բացել և բանալի պատրաստել, որից հետո նրան պարզաբանել է վարչական շենքի հասցեն՝ ստույգ գտնվելու վայրը, որից քիչ անց աշխատասենյակ գնացած մասնագետը հավանաբար հարմարեցված բանալիներով կամ այլ գործիքով բացել է պահարանի դուռը և պարզվել է, որ գումարի պարունակությամբ փաթեթը գտնվում է պահարանում։
Դրանից շուրջ երկու երեք օր անց մասնագետը եկել և նոր փականը տեղադրել է իր սեյֆի վրա, քարտուղարությունից տեղափոխված վերոհիշյալ սեյֆը վերադարձվել է քարտուղարություն, իսկ իրեն ամրակցվածը՝ տեղափոխվել է Արտյոմ Խաչատրյանի աշխատասենյակ, որտեղ էլ հիշյալ գումարը շարունակվել է պահվել մինչև 2024 թվականի նոյեմբերի վերջ կամ դեկտեմբերի սկիզբն ընկած ժամանակահատվածը՝ այսինքն՝ մինչև Արտյոմ Խաչատրյանի զբաղեցրած պաշտոնից ազատվելը, որին նախորդած ամբողջ ժամանակահատվածում պատրաստված և իրեն տրված թվով 2 բանալիները մշտապես գտնվել են Խաչատրյանի մոտ։
Աշխատանքից ազատվելու հանգամանքով պայմանավորված՝ իրեն ամրակցված չհրկիզվող պահարանն առգրավված գումարի հետ միասին Արտյոմ Խաչատրյանի աշխատասենյակից տեղափոխվել է իր աշխատասենյակ, իսկ բանալիները հանձնվել են իրեն։
2025 թվականի ապրիլի 16-ին թիվ 83-0237-24 քրեական վարույթով առգրավված 590․000 ԱՄՆ դոլար գումարն իրեղեն ապացույց ճանաչելու մասին որոշում է կայացվել, որի մեկ օրինակը նույն օրն ուղեկցական գրությամբ ուղարկվել է ՀՀ կենտրոնական բանկ՝ իրեղեն ապացույց ճանաչված գումարի հետագա պահպանությունն ապահովվելու խնդրանքով, որի պատասխանը դեռևս չստացված՝ օգտվել է հերթական հասանելիք արձակուրդից։
Արձակուրդ մեկնելու բերումով, աշխատասենյակի և իրեն հատկացված չհրկիզվող պահարանի երկու բանալիները հանձնել է իր անմիջական ղեկավար, 5-րդ վարչության պետի պաշտոնակատար Գոռ Թադևոսյանին։
Արձակուրդ մեկնելուց առաջ բանալիները Գոռ Թադևոսյանին հանձնելուց գումարի առկայությունը պահարանում ստուգել են, թե՝ ոչ, չի հիշում, սակայն վերադառնալուց հետո՝ մայիսի 2-ին, Թադևոսյանի մասնակցությամբ և Քրիստինե Արամյանի ներկայությամբ ստուգել են պահարանի պարունակությունը և պարզել, որ հիշյալ գումարն ամբողջությամբ տեղում է, իսկ փաթեթը՝ անվնաս։
Մայիսի 02-ից մինչև 04-ը ներառյալ հաճախել է աշխատանքի վայր, իսկ մայիսի 05-ից մինչև 11-ը ներառյալ թեև գտնվել է Հայաստանում, բայց աշխատանքի չի հաճախել՝ արձակուրդում գտնվելու պատճառով, որի ողջ ընթացքում չհրկիզվող պահարանի բանալիները գտնվել են իր մոտ։
Արձակուրդից վերադառնալուց հետո ստացել են ներքին հանձնարարական՝ քննիչներին հատկացված չհրկիզվող պահարաններում գտնվող կանխիկ գումարի ու արժեքավոր իրերի մասին տեղեկանքներ ներկայացնելու վերաբերյալ։
Նշել է, որ հաշվի առնելով այն հանգամանքը, որ սեյֆում բացի նշված գումարից ոչինչ չի եղել, դրա բանալիներն առանձին պահել է իր փաստացի բնակության վայրում՝ բնակարանի իր կողմից օգտագործվող ննջասենյակի պահարանում՝ նախորդ իրավիճակից խուսափելու նպատակով։ Մինչև գույքագրման վերաբերյալ տեղեկանք կազմելը՝ մայիսի 12-ից 16-ն ընկած ժամանակահատվածում, առանց փականքները բացելու՝ դրանց արտաքին բռնակը վերև ձգելով ստուգել և համոզվել է, որ պահարանի դուռը գտնվում է փակ և անվնաս վիճակում։
2025 թվականի մայիս 21-ին՝ ժամը 14։30-ի սահմաններում, քննիչ Հայկ Քյասինյանի հետ գտնվել է իր աշխատասենյակում, որտեղ գնացած Գոռ Թադևոսյանը Հայկին խնդրել է դուրս գալ աշխատասենյակից, իսկ իրեն ասել ստուգել չհրկիզվող պահարանը։
Նշել է, որ մինչ այդ սեյֆը դիմացի փականների մասով մոտիկացված է եղել պատին, ինչը մշտապես այդպես է դրել, իսկ Թադևոսյանի վերոհիշյալ պահանջով ստուգելու ընթացքում պարզել է, որ սեյֆի դուռը բաց է, իսկ մի քիչ ավելի առաջ քաշելուց հետո փականներից մեկի վրա մետաղյա հարմարեցված միջոց՝ երկաթի կտոր է նկատել։
Համոզվելով, որ գումարը հափշտակվել է՝ գլխավոր վարչության պետ Վաղինակ Մարտիրոսյանի հանձնարարությամբ դուրս են եկել աշխատասենյակից, ամրակնքել դուռը և կատարվածի մասին հաղորդում են ներկայացրել։
(դատական նիստի արձանագրություն)
- Դատաքննության ընթացքում վկա Սահակ Պետրոսյանը ցուցմունք տվեց այն մասին, որ 2023 թվականի հունվարի 04-ից զբաղեցնում է ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության 2-րդ վարչության ավագ քննիչի պաշտոնը: Գլխավոր վարչությունը տեղակայված է Դեղատան 3 հասցեի վարչական շենքի 5-րդ հարկում, իսկ 2-րդ վարչությունը նույն շենքի տարբեր հարկերում, աշխատանքային գործունեությունը իրականացնում է 5-րդ հարկի թիվ 516 աշխատասենյակում: Հայտնեց, որ դեպքի օրը առավոտյան ժամը 08:15-ի սահմաններում ներկայացել է աշխատանքի և վարչական շենք մուտք գործելու ընթացքում իրեն ամրակցված էլեկտրոնային քարտով մուտքագրվելուց հետո անցել է շենքի առաջին հարկում տեղադրված արգելափակոցով և մոտեցել ու սեղմել է երկու վերելակների կոճակները, որոնք իր կարծիքով իջել են հինգերորդ կամ 6-րդ հարկից: Սկզբում առաջին հարկ է հասել իր կանգնած դիրքից դեպի ձախ գտնվող վերելակը, որի դռների բացվելուց հետո զիջել է ճանապարհը այնտեղից դուրս եկող իրենց ակնհայտորեն ավելի ցածրահասակ արական սեռի անծանոթին, ով կրել է բժշկական դիմակ, արևային ակնոցներ և մուգ գույնի գլխարկ, հագին եղել է կոստյում կամ պիջակ, սպիտակ վերնաշապիկ, մուգ գույնի տաբատ և կոշիկներ: Անծանոթը հավանաբար ճաղատ է եղել, սակայն գլխի ինչ-որ հատվածներում ունեցել շեկ կամ ալեհեր կարճ կտրված մազեր, որոնք նկատելի են եղել պարանոցի հատվածից: Իր հիշելով ձախ ձեռքում գտնվել է մեկ հատ պլաստիկ շիշ, կիսով չափ թեյի գույն ունեցող հեղուկով լցված, իսկ աջ ձեռքում բաց գույնի ստվարաթղթե տոպրակ և փոքր պայուսակ: Տեսնելով, որ անծանոթը դիմակով է, նույն վերելակ մտնել չի ցանկացել՝ հնարավոր վարակից խուսափելու հանգամանքով պայմանավորված: Մեկ կամ երկու վայրկյան անց բացվել են իր կանգնած դիրքից աջ մասում գտնվող վերելակի դռները, որտեղ մտնելու ընթացքում տեսել է, որ հիշյալ անծանոթը, մոտենալով անցակետի արգելափակոցին, ձեռքին եղած միկրոչիպը մոտեցրել է անցակետի վահանակին և փորձել է անցնել այն, ինչի ընթացքում նրա ակնոցը կամ դրա ապակին ընկել է գետնին, որի պատճառով էլ այդ անձը սկսել է ակնհայտ անհանգիստ շարժումներ կատարել: Նկարագրվածին ականատես լինելով՝ մինչև վերելակի դռների փակվելը ժեստերի լեզվով անցակետում ծառայություն իրականացնող աշխատակցից հարցրել է, թե ով է այդ անձը, ինչին ի պատասխան աշխատակիցը կրկին ժեստով հասկացրել է, որ տեղյակ չէ: Այդ անձի դուրս գալու ընթացքում, միաժամանակ դուրս գալով վերելակից՝ մոտեցել է անցակետին, իր ձեռքին եղած տոպրակը թողնելով անցակետի աշխատակցի մոտ՝ դուրս է եկել վարչական շենքից և քայլել է Վազգեն Սարգսյան փողոցի ուղղությամբ գնացող նույն անձի հետևից: Արդեն Վազգեն Սարգսյան փողոցում՝ ՀՀ Կենտրոնական բանկի դիմաց, կարողացել է հասնել նկարագրված անձին և հարցրել է, թե վարչական շենքում տեղակայված ՀՀ պետական եկամուտների կոմիտեի կամ քննչական կոմիտեի աշխատակից հանդիսանում, թե՝ ոչ, ինչին ի պատասխան նա հայտնել է, որ եկել է 3-րդ հարկ՝ Արման Ղազարյանի մոտ: Երկրորդ հարցին, թե այդ դեպքում որտեղից իրեն շենք մուտք գործելու համար նախատեսված էլեկտրոնային չիպը, պատասխանել է, որ այս պահին Արմանն է տվել՝ դուրս գալու համար: Դրանից հետո, պահանջել է ներկայացնել անձը հաստատող կամ նույնականացնող որևէ փաստաթուղթ, անձը նշել է, որ անձնագիրը գտնվում է նրա ավտոմեքենայի մեջ՝ ցույց տալով դեպի Հանրապետության հրապարակ: Ինքն ասել է, որ այդ դեպքում պետք է քայլեն դեպքի ավտոմեքենան, որպեսզի ներկայացնի փաստաթուղթը ու քայլել են դեպի Հանրապետության հրապարակ, որի ընթացքում նա հարցրել է, ինչ խնդիր կա, որին ինքը պատասխանել է, որ խնդիրը կայանում է նրանում, որ անծանոթ է և անցակետով անարգել անցնելու քարտ ունի: Քայլելու ընթացքում հաջորդիվ հարցրել է, թե ինչու է մեքենան այդքան հեռու կանգնեցրել և ստացել է պատասխան, որ իրենց շենքի մոտ կանգնելու տեղ չի լինում, ինչից հետո հարցրել է, թե երբ եք շենք եկել, ինչին նա պատասխանել է ասելով կես ժամ առաջ: Զարմացել ու հարցրել, թե ինչպես է հնարավոր, որ եկել է կես ժամ առաջ և ավտոմեքենան կայանելու տեղ չի գտել, որի ընթացքում քայլելով հասել են մինչև նախկինում «ՀայՓոստ» ՓԲԸ-ի մասնաշենքի մոտ: Քայլելու ընթացքում հաջորդիվ հարցերին պատասխանելով՝ անծանոթն ասել է, որ ցանկանում է ճիշտն ասել, մի քիչ տղայական պահ է, այդ անցակետի չիպն իրեն Տաթևն է տվել ժամանակին, ուզեցել է իմանա աշխատանքի այցելել է, թե՝ չէ: Լսելով այդ մասին, ինքն ավելացրել է, որ այդ դեպքում կարող էր զանգահարել իր նշած Արմանին և ճշտել՝ Տաթևը աշխատանքի եկել է, թե ոչ, ինչին նա պատասխանել է՝ ասելով, որ նա Արմանի հետ տենց ծանոթ չէ, ուզում է հասկանալ, թե Արմանի ու Տաթևի մեջ ինչ որ բան կա, թե՝ ոչ: Այդքանը լսելուց հետո, պահանջել ու նրանից վերցրել է անցակետի չիպը, առաջարկելով քայլել դեպի ավտոմեքենան: Ընթացքում նշել է, որ ինքը նախարարության աշխատակից է՝ ձեռքը մեկնելով դեպի ՀՀ կառավարության շենքը ու անմիջապես շեղել է խոսակցության ընթացքը, մասնավորապես հնչեցրել է հռետորական հարց, թե արդյոք ինքը քննչական կոմիտեից է և հավելել, որ նա էլ կոմիտեում ընկերներ ունի, ապա իր հարցին պատասխանելով՝ ասել է, որ իրենց մոտից Գոռը, ով պետ է: Այդ ժամանակ արդեն գտնվել են «Հայփոստի» նախկին մասնաշենքի մոտ և ժամը 08:29-ին իր կողմից օգտագործվող վերոհիշյալ հեռախոսահամարի WhatsApp հավելվածով զանգահարել է գլխավոր վարչության 5-րդ վարչության պետի պաշտոնակատար Գոռ Թադևոսյանին և մինչև նա պատասխանել է հեռախոսազանգին, այդ անձն իր հարցին պատասխանել է, որ Արթուր Սահակյանն է՝ իր ընկեր Էդգարի եղբայրը: Թադևոսյանի պատասխանից հետո, հարցրել է նրան, թե իր ընկեր Էդգարի եղբայր Արթուր Սահակյանին ճանաչում է, ով մի պահ լռել է, հավանաբար փորձել է հիշել, որի ընթացքում հեռախոսը մոտեցրել է այդ անձի ու ասել, որ ներկայանա, թե ով է, ով շատ արագ խոսելով՝ նույն կերպ ներկայացրել է, որ Տաթևի համար շենք է եկել ու իր պահանջով վերադարձրել է հեռախոսը: Դրանից հետո ինքը Թադևոսյանին հարցրել է, արդյոք ճանաչել է այդ անձին, թե՝ ոչ, նա պատասխանել է, որ ճանաչել է, նա հանդիսանում է ամերիկացի Արթուրը: Այնուհետև շրջվելով նշված անձին՝ հարցրել է, թե նա է ամերիկացի Արթուրը, նա էլ գլխով դրական պատասխան է տվել։ Այնուհետև վերադարձել է վարչական շենք, որպեսզի հասկանա և ստուգի, թե արդյոք այդ չիպը քննչական վարչության դռները ևս բացում է, թե ոչ ու 6-րդ հարկի մուտքի դռների մոտ մոտեցրել է այդ անձից վերցված սև գույնի չիպն ու դուռը բացվել է: Դրանից հետո արդեն 6-րդ հարկում հանդիպել է Գոռ Թադևոսյանին, պատմել ողջ պատմությունը՝ նկատի ունենալով այն հանգամանքը, որ եթե չիպը, ինչպես այդ անձն է հայտնել, իրեն տվել են նրա նշած Արմանը կամ Տաթևը, ապա այն կբացեր առաջին հարկի անցակետը, սակայն քննչական վարչության մուտքի դուռը չէր բացի: Թադևոսյանից հարցրել է, թե իր ճանաչած Արթուրն ինչ տեսք ունի, ու առաջին հատկանիշը, որ նա նշել է, եղել է այն, որ ջահել բոյով տղա է, որոնք ակնհայտորեն չեն համապատասխանել իրեն հանդիպած անձի արտաքինին, որի մասին հայտնել է Գոռին և խնդրել, որպեսզի իր ընկերոջ Էդգարի միջոցով պարզի, թե եղբայրը Արթուրը որտեղ է գտնվում: Այդ պահին Գոռը Էդգարի հետ կապնվել չի կարողացել, որից հետո ինքն իջել ու ամեն դեպքում փորձել է բացել 5-րդ հարկի մուտքի դուռը և պարզվել է, որ այն բացվում է: Այսինքն, այդ չիպով հնարավոր է եղել մուտք գործել քննչական վարչության 5-րդ հարկ: Դրանից մի որոշ ժամանակ անց բարձրացել է 6-րդ հարկ, ժամը 09:04 րոպեին միջանցքում մոտեցել է քննիչների մուտքի և ելքի ժամերն արձանագրող սարքին և նույն չիպն անցկացրել է դրանով, պարզվել է, որ անցել է: Տեսնելով այդ՝ ամբողջ պատմությունը ներկայացրել է անմիջական ղեկավար Արթուր Գևորգյանին և խնդրել է, որ ներքին անվտանգության վարչության միջոցով պարզեն, թե ում անունով է այդ չիպը մուտք լինում: Այնուհետև, դասընթացների շտապող Արթուր Գևորգյանի հեռախոսազանգից հետո մեկ անգամ էլ այդ պահին է չիպն անցկացրել, ինչից որոշ ժամանակ անց նրա հեռախոսազանգից տեղեկացել է, որ չիպը քննիչ Արկադի Աղաջանյանի անունով է: Դրանից րոպեներ անց կատարվածի մասին զեկուցել է գլխավոր վարչության պետի տեղակալ Հայկ Կատվալյանին, որից հետո նրա հետ նույնը զեկուցել է գլխավոր վարչության պետին: Հետագայում, օրվա երկրորդ կեսին ժամը մոտավորապես 15:30-ի սահմաններում Գոռ Թադևոսյանն ասել է, որ քննիչ Սուրեն Հակոբյանի աշխատասենյակի չհրկիզվող պահարանը բացել և գումար են գողացել:
Հայտնեց, որ Գոռ Թադևոսյանին բնութագրում է դրականորեն:
(դատական նիստի արձանագրություն)
- Վկա Սիմոն Պետրոսյանը դատաքննության ընթացքում ցուցմունք տվեց այն մասին, որ ունեն ընտանեկան բիզնես, հայրը շինանյութի առուվաճառքով է զբաղվում, ինքն էլ օգնում է: 077-80-80-88, 041-80-80-88 բջջային հեռախոսահամարներն է օգտագործում: Ճանաչում է Էդգար Գրիգորյանին մոտ 15 տարի, վերջինիս եղբայրը՝ Արթուր Գրիգորյանը, ով այժմ գտնվում է ԱՄՆ-ում, իր ընկերն է, Արթուրի միջոցով նաև Էդգար Գրիգորյանի հետ մոտ է, սակայն իր ընկերն Արթուր Գրիգորյանն է, իսկ Էդգարի հետ պարզապես մոտ հարաբերություններ ունի: Էդգար Գրիգորյանին հանդիպել է մեկ ամիս առաջ, հրավիրված է եղել Էդգար Գրիգորյանի քրոջ հարսանիքին, այդ հարսանիքին նաև Արթուր Գրիգորյանն է մասնակցել և իրեն Արթուրն է հրավիրել: Նշվածից հետո Էդգար Գրիգորյանին հանդիպել է 2025 թվականի մայիսի 23-ին: 2025 թվականի մայիսի 23-ին՝ ժամը 12:27-ին, զանգահարել է իրեն 093-03-93-88 բջջային հեռախոսահամարի «WhatsApp» հավելվածով և հայտնել է, որ իր ավտոմեքենան խնդիր ունի փոխանցման տուփի հետ կապված ու խնդրել է իր ավտոմեքենան: Ինքը հայտնել է, որ իրենց խանութում է՝ Երևան-Էջմիածին խճուղի 12 հասցեում, և կարող է ավտոմեքենան վերցնել: Ինքը վարում է 08UL088 հաշվառման համարանիշի «Տոյոտա Քեմրի» մակնիշի ավտոմեքենա, որն էլ հանձնել է Էդգար Գրիգորյանին: Ժամը 13:10-ի սահմաններում է Էդգար Գրիգորյանը վերցրել իր ավտոմեքենան: Էդգարն իր մոտ գնացել է սև գույն «Կրայսլեռ» մակնիշի ավտոմեքենայով, որի համարանիշները հստակ չի հիշում: Էդգարին հարցրել է, թե նորմալ է ամեն ինչ, հանդիպել են խանութի դիմացը, տվել է բանալին ու Էդգարը, ավտոմեքենան թողնելով խանութի բակում, գնացել է իր մեքենայով: Մի քանի ժամ հետո՝ ժամը 19:00-ի սահմաններում, Էդգար Գրիգորյանը հետ է գնացել նույն վայր, մի քանի րոպե զրուցել են կենցաղային հարցերից, հաջորդիվ Էդգար Գրիգորյանը հայտնել է, որ գումար ունի մոտը, խնդրել է, որ թողնի իր մոտ: Ինքը չի նկատել Էդգարն ի սկզբանե գումարով է գնացել իր մոտ, թե իր մեքենայով գնալուց հետո է գումարով հետ եկել: Էդգարը նշել է, որ 100.000 ԱՄՆ դոլար է դնում իր ավտոմեքենան, հայտնել է, որ երկու օրից կգնա կվերցնի, ճշտել է, թե նորմալ է ամեն ինչ, հայտնել է, որ նորմալ է և իր գումարն է թողնելու մոտը, ինչից հետո նստել է իր ավտոմեքենան ու տեսել հետևի նստատեղին դրված գումարը: Էդգար Գրիգորյանի գործողություններն իր մոտ կասկածի առիթ չեն տվել:
(դատական նիստի արձանագրություն)
- Վկա Ալեքսանդրա Լևանդրովսկայան դատաքննության ընթացքում հրաժարվեց ցուցմունք տալ իր մերձավոր ազգականի դեմ:
(դատական նիստի արձանագրություն)
- Հանրային մեղադրողի միջնորդությամբ ՀՀ քրեական դատավարության օրենսգրքի 334-րդ հոդվածով սահմանված կարգով հետազոտված ապացույցները.
- 2025 թվականի հունիսի 02-ին նախաքննության մարմնի կողմից իրեղեն ապացույց ճանաչելու մասին որոշումը, համաձայն որի՝ իրեղեն ապացույց է ճանաչվել Էդգար Գրիգորյանի կողմից շահագործվող «Chrysler 300» մակնիշի 90AM101 համարանիշի 2C3KA53626H134027 նույնականացման համարի սև մետալիկ գույնի ավտոմեքենան։
(դատական նիստի արձանագրություն, հատոր 6, գ.թ. 4-7)
- 2025 թվականի հունիսի 02-ին նախաքննության մարմնի կողմից իրեղեն ապացույց ճանաչելու մասին որոշումը, համաձայն որի՝ իրեղեն ապացույց է ճանաչվել Անահիտ Գասպարյանի կողմից ներկայացված 279.800 ԱՄՆ դոլար գումարը` թվով 3 (երեք) փաթեթներում, որոնցից` 1-ին փաթեթում (փաթեթ № 1)` 50.000 ԱՄՆ դոլար, որը կնքված է ՀՀ հակակոռուպցիոն կոմիտեի № 45 կնիքի դրոշմաթղթով, 2-րդ փաթեթում (փաթեթ № 3)՝ 100.000 ԱՄՆ դոլար, որը կնքված է ՀՀ հակակոռուպցիոն կոմիտեի № 66 կնիքի դրոշմաթղթով, 3-րդ փաթեթում (փաթեթ № 4)՝ 129.800 ԱՄՆ դոլար, որը կնքված է ՀՀ հակակոռուպցիոն կոմիտեի № 45 կնիքի դրոշմաթղթով, Սիմոն Պետրոսյանի կողմից ներկայացրած 99.900 ԱՄՆ դոլար գումարը՝ թվով 1 փաթեթում (փաթեթ № 5), որը կնքված է ՀՀ հակակոռուպցիոն կոմիտեի «Փաթեթների համար» № 22 կնիքի դրոշմաթղթով, Էդգար Գրիգորյանի բնակարանի խուզարկությամբ հայտնաբերված 9.200 ԱՄՆ դոլար գումարը` թվով 1 փաթեթում (փաթեթ № 6), որը կնքված է ՀՀ հակակոռուպցիոն կոմիտեի «Փաթեթների համար» N 22 կնիքի դրոշմաթղթով, Էդգար Գրիգորյանի կողմից շահագործվող «Chrysler 300» մակնիշի 90AM101 համարանիշի ավտոմեքենայի խուզարկությամբ հայտնաբերված 189.900 ԱՄՆ դոլար գումարը՝ թվով 2 փաթեթներում, որոնցից 1-ին փաթեթում (փաթեթ N7)՝ 90.000 ԱՄՆ դոլար, որը կնքված է ՀՀ հակակոռուպցիոն կոմիտեի № 11 կնիքի դրոշմաթղթով, 2-րդ փաթեթում՝ (փաթեթ № 8)՝ 99.900 ԱՄՆ դոլար, որը կնքված է ՀՀ հակակոռուպցիոն կոմիտեի № 66 կնիքի դրոշմաթղթով։
(դատական նիստի արձանագրություն, հատոր 6, գ.թ. 20-24)
- 2025 թվականի հունիսի 30-ին նախաքննության մարմնի կողմից իրեղեն ապացույց ճանաչելու մասին որոշումը, համաձայն որի՝ իրեղեն ապացույց է ճանաչվել Սուրեն Արմենի Հակոբյանի աշխատասենյակից վերցված չհրկիզվող պահարանը, դրա դիմաց՝ գետնին հայտնաբերված մետաղական մոտ 110մմ երկարությամբ իրը, չհրկիզվող պահարանի երկրորդ փականի բանալու անցքի միջից մետաղական մոտ 20մմ երկարությամբ իրը, ինչպես նաև աշխատասենյակի մուտքի դռան փականի գլանաձև մեխանիզմը՝ 3 բանալիներով:
(դատական նիստի արձանագրություն, հատոր 6, գ.թ. 321)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Գոռ Գևորիկի Թադևոսյանը նախկինում դատված չի եղել:
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Էդգար Գարիկի Գրիգորյանն ունի մարված դատվածություն:
 ՀՀ ՊՆ հանրապետական զինվորական կոմիսարիատի Երևանի թիվ 3 զինվորական կոմիսարիատի կողմից տրված տեղեկանք, համաձայն որի՝ Էդգար Գրիգորյանը մասնակցել է մարտական գործողությունների:
 Էդգար Գրիգորյանի հոր՝ Արցախյան ազատամարտին մասնակցած լինելու, ինչպես նաև «Մարտական խաչ» երկրորդ աստիճանի շքանշանակիր լինելու փաստը հավաստող փաստաթղթերի պատճենները:
 Էդգար Գրիգորյանի վերաբերյալ գրված բնութագրեր, համաձայն որոնց՝ վերջինը բնութագրվում է դրականորեն:
 Էդգար Գրիգորյանի խնամքին գտնվող երեխաների ծննդյան պետական վկայականների պատճենները:
 Գոռ Թադևոսյանի խնամքին գտնվող երեխաների ծննդյան պետական վկայականների պատճենները:
 ՀՀ ՔԿ նախագահի կողմից Գոռ Թադևոսյանին «Անբասիր ծառայության համար» չորրորդ աստիճանի մեդալով պարգևատրելու վերաբերյալ վկայականի պատճենը:
 ՀՀ ՊՆ նախարարի կողմից Գոռ Թադևոսյանին «Ծովակալ Հ.Ս. Իսակով» մեդալով պարգևատրելու վերաբերյալ վկայականի պատճենը:
 Գոռ Թադևոսյանի մոր առողջական վիճակի վերաբերյալ բժշկական փաստաթղթի պատճենը:
 Գոռ Թադևոսյանի հոր՝ Գևորիկ Սայաթի Թադևոսյանի կենսաթոշակի վկայականի պատճենը:
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Գոռ Գևորիկի Թադևոսյանը, հանդիսանալով ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության հինգերորդ վարչության պետի պաշտոնակատարը, ի պաշտոնե տեղյակ է եղել իր ղեկավարած վարչության քննիչ Սուրեն Հակոբյանի աշխատասենյակի չհրկիզվող պահարանում առանձնապես խոշոր չափերով՝ 590.000 ԱՄՆ դոլար գումարի առկայության մասին:
Էդգար Գրիգորյանը, իր ծանոթ՝ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության հինգերորդ վարչության պետի պաշտոնակատար Գոռ Թադևոսյանից տեղեկանալով վերջինիս ղեկավարած վարչության քննիչ Սուրեն Հակոբյանի թիվ 617 աշխատասենյակի չհրկիզվող պահարանում պահվող 590․000 ԱՄՆ դոլար գումարի առկայության մասին, նախնական համաձայնության է եկել Գոռ Թադևոսյանի հետ այդ գումարը գաղտնի հափշտակելու, ապա միմյանց միջև հավասարապես բաժանելու շուրջ։ Այնուհետև, իրենց հանցավոր դիտավորությունն իրագործելու նպատակով, Գոռ Թադևոսյանն Էդգար Գրիգորյանին է տվել քննիչ Սուրեն Հակոբյանի աշխատասենյակի մուտքի դռան և չհրկիզվող պահարանի բանալիները, ինչպես նաև վարչության շենք մուտք գործելու անցաքարտ, ով պատրաստել է դրանց կրկնօրինակները, և նշված անցաքարտի կրկնօրինակն օգտագործելով, 2025 թվականի մայիսի 20-ին՝ 16:40-ի սահմաններում, ապօրինի մուտք է գործել Երևան քաղաքի Դեղատան փողոցի 3 հասցեում գտնվող ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության շենքը, որտեղ գտնվելու ընթացքում՝ գիշերային ժամի, բացել է վեցերորդ հարկում գտնվող՝ քննիչ Սուրեն Հակոբյանի թիվ 617 աշխատասենյակի դուռը, այնուհետև՝ չհրկիզվող պահարանը, որտեղից գաղտնի հափշտակել է այնտեղ պահվող՝ թիվ 83-0237-24 քրեական վարույթով առգրավված և իրեղեն ապացույց հանդիսացող՝ առանձնապես խոշոր չափերով՝ 227.185.400 ՀՀ դրամին համարժեք՝ 590.000 ԱՄՆ դոլար գումարը և 2025 թվականի մայիսի 21-ին՝ ժամը 08։20-ի սահմաններում, գումարը պայուսակներում դուրս եկել վարչական շենքից: Այնուհետև, հանդիպելով ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության քննիչներից մեկին, վերջինիս հարցին ի պատասխան, Էդգար Գևորգյանը կատարած հանցանքն անխոչընդոտ ավարտին հասցնելու և բացահայտումից խուսափելու նպատակով, հայտնել է, որ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության պետերից Գոռ Թադևոսյանն իր ընկերն է, որից հետո, քննիչը նշված հանգամանքը պարզելու նպատակով զանգահարել է Գոռ Թադևոսյանին: Գոռ Թադևոսյանը խմբի կողմից նախնական համաձայնությամբ առանձնապես խոշոր չափերով գումարի գաղտնի հափշտակությունն ավարտին հասցնելու նպատակով քննիչին հայտնել է, որ տվյալ անձն իր ընկերոջ եղբայր Արթուրն է, որից հետո Էդգար Գևորգյանը անխոչընդոտ հեռացել է դեպքի վայրից և Գոռ Թադևոսյանի հետ նախնական համաձայնությամբ հափշտակել 590.000 ԱՄՆ դոլար գումարը:
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Էդգար Գարիկի Գրիգորյանը իր ծանոթ՝ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության հինգերորդ վարչության պետի պաշտոնակատար Գոռ Թադևոսյանից տեղեկանալով վերջինիս ղեկավարած վարչության քննիչ Սուրեն Հակոբյանի թիվ 617 աշխատասենյակի չհրկիզվող պահարանում պահվող 590․000 ԱՄՆ դոլար գումարի առկայության մասին, նախնական համաձայնության է եկել Գոռ Թադևոսյանի հետ այդ գումարը գաղտնի հափշտակելու, ապա միմյանց միջև հավասարապես բաժանելու շուրջ։ Այնուհետև, իրենց հանցավոր դիտավորությունն իրագործելու նպատակով, Գոռ Թադևոսյանը Էդգար Գրիգորյանին է տվել քննիչ Սուրեն Հակոբյանի աշխատասենյակի մուտքի դռան և չհրկիզվող պահարանի բանալիները, ինչպես նաև նույն վարչության քննիչ Արկադի Աղաջանյանի վարչության շենք մուտք գործելու անցաքարտ, ով պատրաստել է դրանց կրկնօրինակները, և նշված անցաքարտի կրկնօրինակն օգտագործելով, 2025 թվականի մայիսի 20-ին՝ 16:40-ի սահմաններում, ապօրինի մուտք է գործել Երևան քաղաքի Դեղատան փողոցի 3 հասցեում գտնվող ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության շենքը, որտեղ գտնվելու ընթացքում՝ գիշերային ժամի, բացել է վեցերորդ հարկում գտնվող՝ քննիչ Սուրեն Հակոբյանի թիվ 617 աշխատասենյակի դուռը, այնուհետև՝ չհրկիզվող պահարանը, որտեղից գաղտնի հափշտակել է այնտեղ պահվող՝ թիվ 83-0237-24 քրեական վարույթով առգրավված և իրեղեն ապացույց հանդիսացող՝ առանձնապես խոշոր չափերով՝ 227.185.400 ՀՀ դրամին համարժեք՝ 590.000 ԱՄՆ դոլար գումարը և 2025 թվականի մայիսի 21-ին՝ ժամը 08։20-ի սահմաններում, գումարը պայուսակներում դուրս եկել վարչական շենքից: Այնուհետև, հանդիպելով ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության քննիչ Սահակ Պետրոսյանին, վերջինի հարցին ի պատասխան՝ Էդգար Գրիգորյանը կատարած հանցանքն անխոչընդոտ ավարտին հասցնելու և բացահայտումից խուսափելու նպատակով, հայտնել է, որ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության պետերից Գոռ Թադևոսյանն իր ընկերն է, որից հետո, քննիչը նշված հանգամանքը պարզելու նպատակով զանգահարել է Գոռ Թադևոսյանին: Գոռ Թադևոսյանը խմբի կողմից նախնական համաձայնությամբ առանձնապես խոշոր չափերով գումարի գաղտնի հափշտակությունն ավարտին հասցնելու նպատակով քննիչին հայտնել է, որ տվյալ անձն իր ընկերոջ եղբայր Արթուրն է, այդ ընթացում Սահակ Պետրոսյանը Էդգար Գրիգորյանից վերցրել է անցաքարտի կրկնօրինակը, որից հետո վերջինս անխոչընդոտ հեռացել է դեպքի վայրից և Գոռ Թադևոսյանի հետ նախնական համաձայնությամբ հափշտակել 590.000 ԱՄՆ դոլար գումարը:
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Գոռ Թադևոսյանին և Էդգար Գրիգորյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Գոռ Թադևոսյանը նախկինում դատված չի եղել, բնութագրվում է դրականորեն, պաշտոնավարման ընթացքում խրախուսվել է պետական մեդալներով, խնամքին են գտնվում երեք անչափահաս երեխաներ, հաշմանդամություն ունեցող մայրը, թոշակառու հայրը։ Էդգար Գրիգորյանը նախկինում դատապարտվել է, դատվածությունը մարվել է, բնութագրվում է դրականորեն, մասնակցել է մարտական գործողությունների, հայրը հանդիսացել է Արցախյան պատերազմի մասնակից, «Մարտական խաչ» երկրորդ աստիճանի շքանշանակիր, վերջինի խնամքին են գտնվում երկու անչափահաս երեխաներ:
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալների մեղավորության վերաբերյալ չփարատվող բոլոր ողջամիտ կասկածները նրանց օգտին մեկնաբանելով, Դատարանը հանգում է հետևության, որ ապացուցված են Գոռ Գևորիկի Թադևոսյանին և Էդգար Գարիկի Գրիգորյանին վերագրվող արարքները, այդ արարքների քրեական հակաիրավականությունը, այդ արարքները մեղադրյալների կողմից կատարելը, ինչպես նաև նրանց մեղավորությունը տվյալ արարքների կատարման մեջ:
Դատարանը հանգում է այն հետևության, որ մեղադրյալներ Գոռ Գևորիկի Թադևոսյանը և Էդգար Գարիկի Գրիգորյանը կատարել են իրենց մեղսագրված արարքները, որոնց նկատմամբ կիրառելի են ՀՀ քրեական օրենսգրքի 46-254-րդ հոդվածի 3-րդ մասի 4-րդ կետը և ՀՀ քրեական օրենսգրքի 254-րդ հոդվածի 3-րդ մասի 4-րդ կետը:
Դատարանը գտնում է, որ կատարած հանցանքի համար մեղադրյալ Գոռ Գևորիկի Թադևոսյանը և Էդգար Գարիկի Գրիգորյանը ենթակա են պատժի։
ՀՀ քրեական օրենսգրքի 7-րդ հոդվածի 1-ին մասի համաձայն՝
«Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը»:
ՀՀ քրեական օրենսգրքի 55-րդ հոդվածի 2-րդ մասի համաձայն՝
«Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»:
ՀՀ քրեական օրենսգրքի 69-րդ հոդվածի համաձայն՝
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
(…)»:
Վճռաբեկ դատարանը, անդրադառնալով պատիժ նշանակելու ընդհանուր սկզբունքներին, կայուն նախադեպային իրավունք է ձևավորել՝ առ այն, որ հանցավորի անձին և հանցագործության վտանգավորության բնույթին ու աստիճանին համաչափ քրեաիրավական ներգործության միջոց ընտրելու, ինչպես նաև դրա շրջանակներում համաչափ պատժաչափ սահմանելու պահանջն ուղղակիորեն բխում է պատիժ նշանակելու ընդհանուր սկզբունքների, մասնավորապես` արդարության և պատասխանատվության անհատականացման հիմնարար սկզբունքների բովանդակությունից: Արդարացի է այն պատիժը, որի ընտրությունը գործի բոլոր հանգամանքների` հանցագործության վտանգավորության բնույթի և աստիճանի (հանցագործության մեղքի ձև, շարժառիթ, նպատակ, պատճառված վնասի չափ, եղանակ, գործիքներ ու միջոցներ և այլն), հանցավորի անձը բնութագրող տվյալների, մեղմացնող և ծանրացնող հանգամանքների ամբողջական ու բազմակողմանի վերլուծության արդյունք է և բխում է պատժի նպատակների իրացումն ապահովելու անհրաժեշտությունից: Վերոնշյալ պահանջներից նահանջը կարող է հանգեցնել չափազանց մեղմ կամ չափազանց խիստ պատժի նշանակման:
Ավելին՝ Վճռաբեկ դատարանը, զարգացնելով նախկինում արտահայտած իրավական դիրքորոշումները, Ն.Սարգսյանի գործով արձանագրել է որ. 14. (…) Պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են`
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս: Նշված սկզբունքներից յուրաքանչյուրը՝ որպես առանձին բաղադրամաս, ունի ինքնուրույն նշանակություն և պարտադիր հաշվի է առնվում քրեական պատիժ նշանակելիս: Սկզբունքների ինքնուրույնությունը, սակայն, չի նշանակում, որ դրանք մեկուսացված են մեկը մյուսից, քանի որ միայն համակցության մեջ այդ սկզբունքները կարող են ապահովել օրինական, արդար, անհատականացված և մարդասիրական պատժի նշանակումը:
15. (…) Օրինականության սկզբունքի իմաստով՝ պատիժ նշանակելու հիմնական և առաջին պայմանը հանրորեն վտանգավոր արարք կատարած անձին քրեական պատասխանատվության ենթարկելու ՀՀ քրեական օրենսգրքով նախատեսված հիմքերի առկայությունն է: Պատժի կիրառումը միայն հանցանք կատարած անձանց նկատմամբ մի կողմից բացառում է անհիմն և անօրինական դատապարտումը, մյուս կողմից հանգեցնում է հանրորեն վտանգավոր արարք կատարած անձանց մեկուսացմանը հասարակությունից, կանխում է նրանց կողմից նոր հանցագործությունների կատարումը, որով էլ ապահովվում է անձի, հասարակության և պետության իրավունքների և օրինական շահերի պաշտպանությունը:
Վճռաբեկ դատարանն արձանագրում է նաև, որ պատժի նշանակման օրինականության սկզբունքի իմաստով հանցանք կատարած անձի նկատմամբ կարող են կիրառվել պատժի միայն այն տեսակները, որոնք անմիջականորեն նախատեսված են ՀՀ քրեական օրենսգրքով: Պատժի տեսակների սպառիչ ցանկի օրենսդրական սահմանումը նշանակում է, որ դատարանը հանցագործություն կատարած անձի նկատմամբ չի կարող նշանակել այդ ցանկով չնախատեսված պատիժ:
16. (…) Պատժի արդարությունը դրսևորվում է հանցագործությանը քրեաիրավական միջոցներով արձագանքելու պարտադիրությամբ, ինչպես նաև հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման:
Վճռաբեկ դատարանն արձանագրում է նաև, որ արդարության՝ որպես պատիժ նշանակելու սկզբունքի բովանդակությունն ընդգրկում է դատապարտյալի, տուժողի և հասարակության վերաբերմունքը նշանակված պատժի նկատմամբ: Ուստի, պատիժ նշանակելիս արդարության սկզբունքը դատարանից պահանջում է ողջամտորեն հաշվի առնել արդարության մասին վերոնշյալ սուբյեկտների կարծիքը, առավել ևս, որ դրանք ձևավորվում են այն նույն հանգամանքների հիման վրա, որոնք դատարանը հաշվի է առնում պատիժ նշանակելիս (հանցագործության հանրորեն վտանգավորությունը, հանցավորի անձը և այլն): Այս կապակցությամբ Վճռաբեկ դատարանն ընդգծում է, որ պատժի նշանակման արդարության սկզբունքը դատարանը պետք է կիրառի պատժի նշանակման մյուս սկզբունքների, ինչպես նաև պատժի նպատակների համատեքստում:
17. Պատժի անհատականացման սկզբունքի իմաստով դատարանի խնդիրն է հանցանք կատարած անձի նկատմամբ կոնկրետ հանցակազմի սանկցիայի սահմաններում նշանակել կոնկրետ պատիժ: Կոնկրետ պատժի նշանակումը դատարանի համար խիստ կարևոր և պատասխանատու խնդիր է, որի լուծման համար մեծ նշանակություն ունի պատժի անհատականացման կարգի և չափանիշների հարցը:
Վերոգրյալի հիման վրա Վճռաբեկ դատարանն արձանագրում է, որ պատժի անհատականացումն անհրաժեշտ է դիտարկել երկու տեսանկյունից:
1) պատժի անհատականացում օրենքում: Վերջինս ենթադրում է ՀՀ քրեական օրենսգրքի նորմերում արտահայտված ընդհանուր դրույթների առկայությունը, որոնք դատարանը պարտավոր է հաշվի առնել հանցանք կատարած անձի նկատմամբ ՀՀ քրեական օրենսգրքի սանկցիայի շրջանակներում պատիժ նշանակելիս:
2) պատժի անհատականացում դատարանում: Վերջինս ենթադրում է կոնկրետ անձի նկատմամբ պատիժ սահմանելիս ՀՀ քրեական օրենսգրքի Ընդհանուր և Հատուկ մասերի դրույթների կիրառում՝ հաշվի առնելով հանցավորի անձի առանձնահատկությունները, հանցագործության կատարման հանգամանքները, ինչպես նաև պատասխանատվությունն ու պատիժը մեղմացնող և ծանրացնող հանգամանքները:
ՀՀ քրեական օրենսգիրքը չի բովանդակում բոլոր այն հանգամանքների սպառիչ ցանկը, որոնք պետք է հաշվի առնվեն դատարանի կողմից կոնկրետ հանցագործության համար պատիժ նշանակելիս: Օրենսգիրքը, սակայն, դատարանին տալիս է պատժի անհատականացման ընդհանուր չափանիշներ, որոնց հիման վրա դատարանը կարող է նշանակել արդարության պահանջներին համապատասխանող պատիժ: Նշված չափանիշներն են`
ա) հանցագործության` հանրության համար վտանգավորության աստիճանն ու բնույթը, ընդհանրապես, կոնկրետ հանցագործության կատարման հանգամանքների տեսանկյունից մասնավորապես,
բ) հանցավորի անձը,
գ) պատասխանատվությունն ու պատիժը մեղմացնող և ծանրացնող հանգամանքները:
(…)
21. Պատժի նշանակման մարդասիրության սկզբունքն ունի երկու կողմ, այն է՝
1) մարդասիրություն հասարակության նկատմամբ, որի էությունը տուժողի, հասարակության և պետության շահերի պաշտպանությունն է:
2) մարդասիրություն հանցանք կատարած անձի նկատմամբ. դա նշանակում է մարդկային վերաբերմունք նրա անձի նկատմամբ, պատվի և արժանապատվության հարգում, ֆիզիկական և բարոյական տանջանքների բացառում:
Պատիժ նշանակելիս դատարանը պետք է հաշվի առնի մարդասիրության սկզբունքի վերոնշյալ երկու կողմերը։:
Բացի այդ, Վճռաբեկ դատարանը մի շարք այլ գործերով ևս ընդգծել է, որ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Հետևաբար՝ կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա:
Այսպես՝ մեղադրյալին մեղսագրվող հանցանքի հանրային վտանգավորության աստիճանի և բնույթի վերաբերյալ՝ Վճռաբեկ դատարանն իրավական դիրքորոշում է արտահայտել Գ.Մադաթյանի գործով, համաձայն որի. «14. Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության՝ հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված կոնկրետ հանցանքի առանձնահատուկ հատկանիշները, որոնք կարող են ազդել հանրության վտանգավորության վրա՝ հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում՝ հանցավորի կատարած արարքը և հանցագործությանը նրա մասնակցության աստիճանը»:
Ընդ որում, Վճռաբեկ դատարանը մշտապես ընդգծել է, որ հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա:
Ինչ վերաբերում է հանցագործության կատարման հանգամանքներին, ապա Վճռաբեկ դատարանն արձանագրել է, որ դրանք յուրաքանչյուր քրեական գործով պետք է գնահատման ենթարկվեն հանցագործության՝ հանրության համար վտանգավորության աստիճանի ու բնույթի համատեքստում: Գնահատման արդյունքում դատարանը պետք է պարզի հանցավոր վարքագծի դրսևորմանը նախորդող և ուղեկցող հանգամանքները, հանցավոր վարքագծի դրսևորման եղանակը, հանցավոր մտադրության իրականացման աստիճանը և այլն:
Դրանից բացի, դատարանի հետևությունները, ի թիվս այլոց, պետք է հիմնված լինեն օբյեկտիվ գոյություն ունեցող այնպիսի տվյալների համակողմանի վերլուծության վրա, որոնք բնութագրում են արարքը, հանցավորի կողմից արարքի հանրորեն վտանգավոր հետևանքները նախատեսելու բնույթն ու աստիճանը, հանցավորի անձը (…):
ՀՀ քրեական օրենսգրքի Ընդհանուր մասի վերը թվարկված իրավադրույթներից և Վճռաբեկ դատարանի վերոնշյալ իրավական դիրքորոշումներից հետևում է, որ հանցագործության համար մեղավոր ճանաչված անձի նկատմամբ պատժատեսակի և պատժաչափի վերաբերյալ դատարանի որոշումը պետք է հիմնված լինի կատարված հանցագործության, դրա հանրային վտանգավորության բնույթի ու աստիճանի և այլ առանձնահատկությունների, այդ թվում նաև՝ շարժառիթի, նպատակի, կատարման հանգամանքների, հանցավոր մտադրության իրականացման աստիճանի, քրեական օրենսդրությամբ պահպանվող կոնկրետ հասարակական հարաբերության սոցիալական նշանակության և այլ հանգամանքների, ինչպես նաև հանցավորի անձը բնութագրող և/կամ պատասխանատվությունն ու պատիժը մեղմացնող և/կամ ծանրացնող հանգամանքների բազմակողմանի գնահատման վրա՝ օրինականության, արդարության և պատասխանատվության անհատականացման ու մարդասիրության սկզբունքներին համապատասխան՝ նպատակ ունենալով ապահովել ՀՀ քրեական օրենսգրքի 55-րդ հոդվածի 2-րդ մասում նշված պատժի նպատակների իրագործման հնարավորությունը:
Դատարանը, որպես մեղադրյալ Գոռ Գևորիկի Թադևոսյանի անձը բնութագրող հանգամանք, հաշվի է առնում այն, որ նախկինում դատված չի եղել, բնութագրվում է դրականորեն, պաշտոնավարման ընթացքում խրախուսվել է պետական մեդալներով:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Գոռ Թադևոսյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը), խնամքին անչափահաս երեք երեխաների, հաշմանդամություն ունեցող մոր և կենսաթոշակառու հոր առկայությունը:
Դատարանը, ղեկավարվելով ՀՀ քրեական օրենսգրքի 71-րդ հոդվածով, գտնում է, որ Գոռ Թադևոսյանի պատասխանատվությունն ու պատիժը ծանրացնող հանգամանք պետք է դիտել հանցանքն իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով կատարելը:
Վերը շարադրված իրավադրույթների, դրանց վերլուծության արդյունքում ձևավորված դատողությունների և ՀՀ վճռաբեկ դատարանի իրավական դիրքորոշումների լույսի ներքո Գոռ Գևորիկի Թադևոսյանի նկատմամբ պատժի տեսակը որոշելիս Դատարանը հաշվի է առնում հետևյալը.
- Գոռ Գևորիկի Թադևոսյանի կատարած հանցանքի բնույթն ու վտանգավորության աստիճանը, մասնավորապես այն, որ նրան մեղսագրված արարքը սեփականության դեմ ուղղված, դիտավորյալ, ծանր հանցագործություն է,
- հանցավորի հոգեբանական վերաբերմունքն իր արարքի նկատմամբ, մասնավորապես այն, որ մեղադրյալը գործել է ուղղակի դիտավորությամբ, գիտակցել է, որ իր արարքը ոտնձգում է իրավական պաշտպանության ներքո գտնվող այնպիսի արժեքի դեմ, ինչպիսին է սեփականությունը,
- խախտված հասարակական հարաբերության սոցիալական նշանակությունը, մասնավորապես՝ հանցանքը կատարելու պահին Գոռ Թադևոսյանի՝ ՀՀ քննչական կոմիտեում բարձր պաշտոն զբաղեցնելու փաստը և այն, որ վերջինս, լինելով պետական համակարգի աշխատակից, ուղղակիորեն օրենքի ուժով պարտականություն է կրել առերևույթ հանցագործության հատկանիշների առկայության դեպքում ձեռնամուխ լինել նախաքննության կատարմանը և բացահայտել հանցագործությունները, այնինչ ինքն անձամբ կատարել է սեփականության դեմ ուղղված, հանրային բարձր վտանգավորությամբ օժտված ծանր հանցագործություն,
- հանցագործության շարժառիթը, նպատակը, կատարման հանգամանքները,
- այդ ոլորտում պետության քրեական քաղաքականության ուղղվածությունը, պատասխանատվությունը կամ պատիժը մեղմացնող և ծանրացնող սույն դատավճռում նշված հանգամանքները,
- անձը բնութագրող հանգամանքները, այդ թվում՝ տարիքը, այն, որ դատվածություն չունեցող անձ է:
- նշանակվող պատժի` վերջինիս վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությունը։
Վերոգրյալների հիման վրա Դատարանը հանգում է այն հետևության, որ տվյալ դեպքում ՀՀ քրեական օրենսգրքի 254-րդ հոդվածի 3-րդ մասի սանկցիայի սահմաններում, իր հայեցողության շրջանակներում ղեկավարվելով պատժի նշանակման օրինականության, արդարության և պատասխանատվության անհատականացման ու մարդասիրության սկզբունքներով, օրենքով և ներքին համոզմամբ, Գոռ Գևորիկի Թադևոսյանի նկատմամբ ՀՀ քրեական օրենսգրքի 46-254-րդ հոդվածի 3-րդ մասի 4-րդ կետի սանկցիայով պատիժ պետք է նշանակել ազատազրկման ձևով՝ 4 չորս տարի ժամկետով, որը նա պետք է կրի, քանի որ նրան պատժից ազատելու, այդ թվում՝ պատիժը պայմանականորեն չկիրառելու հիմքեր առկա չեն: Ավելին՝ համակողմանի գնահատման ենթարկելով մեջբերված, այդ թվում՝ Գոռ Գևորիկի Թադևոսյանի կատարած հանցանքի փաստական հանգամանքները՝ Դատարանը գտնում է, որ Գոռ Գևորիկի Թադևոսյանի նկատմամբ 4 չորս տարի ժամկետով ազատազրկման ձևով պատիժ նշանակելն ու այն փաստացի կիրառելն առավել քան արդարացված կլինի:
Դատարանը միաժամանակ գտնում է, որ կատարած հանցանքի համար Գոռ Գևորիկի Թադևոսյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Ընդհանրացնելով վերոշարադրյալը՝ Դատարանը գտնում է, որ մեղադրյալ Գոռ Գևորիկի Թադևոսյանի նկատմամբ ՀՀ քրեական օրենսգրքի 254-րդ հոդվածի 3-րդ մասի սանկցիայով ազատազրկման ձևով պատժի նման չափ նշանակելով և այն փաստացի կիրառելով է հնարավոր հասնել ՀՀ քրեական օրենսգրքի 55-րդ հոդվածի 2-րդ մասով նախատեսված պատժի նպատակներին՝ սոցիալական արդարության վերականգնմանը, պատժի ենթարկված անձի վերասոցիալականացմանն ու հանցագործությունների կանխմանը, ինչպես նաև ապահովել ՀՀ քրեական օրենսգրքի 7-րդ և 69-րդ հոդվածներով սահմանված՝ արդարության, պատասխանատվության անհատականացման և պատիժ նշանակելու ընդհանուր սկզբունքները:
ՀՀ քրեական օրենսգրքի 79-րդ հոդվածի 3-րդ մասի համաձայն՝
3. Մինչև դատավճռի օրինական ուժի մեջ մտնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը հաշվակցվում է կարճաժամկետ ազատազրկման, կարգապահական գումարտակում պահելու, ազատազրկման ձևով նշանակված պատժին` 1 օրը հաշվելով 1 օրվա դիմաց, ազատության սահմանափակման ձևով նշանակված պատժին՝ 1 օրը հաշվելով 2 օրվա դիմաց, իսկ հանրային աշխատանքների դեպքում՝ 1 օրը 8 ժամի դիմաց:
Վերոգրյալի հաշվառմամբ՝ Դատարանը գտնում է, որ ՀՀ քրեական օրենսգրքի 79-րդ հոդվածի 3-րդ մասի կիրառմամբ Գոռ Գևորիկի Թադևոսյանի նկատմամբ նշանակված պատժին՝ 4 չորս տարի ժամկետով ազատազրկմանը պետք է հաշվակցել Գոռ Թադևոսյանի՝ 2025 թվականի մայիսի 22-ից մինչև 2025 թվականի հուլիսի 22-ը փաստացի անազատության մեջ գտնվելու ժամանակահատվածը և վերջնական պատիժ պետք է թողնել կրելու ազատազրկում 3 երեք տարի 10 տասը ամիս ժամկետով:
Պատժի կրման սկիզբը պետք է հաշվել Գոռ Թադևոսյանին փաստացի ազատությունից զրկելու օրվանից՝ 2025 թվականի հուլիսի 23-ից։
Անդրադառնալով մեղադրյալ Էդգար Գարիկի Գրիգորյանի նկատմամբ պատիժ նշանակելու հարցին՝ Դատարանն արձանագրում է, որ մեղադրյալ Էդգար Գարիկի Գրիգորյանի նկատմամբ պատիժ նշանակելիս Դատարանը հաշվի է առնում վերջինիս կատարած հանցանքի բնույթն ու վտանգավորության աստիճանը և այլ առանձնահատկություններ, այդ թվում նաև՝ շարժառիթը, նպատակը, կատարման հանգամանքները, հանցավոր մտադրության իրականացման աստիճանը, քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը և այլն, ինչպես նաև նրա անձը բնութագրող և/կամ պատասխանատվությունն ու պատիժը մեղմացնող և/կամ ծանրացնող հանգամանքներն ու նշանակվող պատժի` վերջինիս վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությունը, մասնավորապես.
Դատարանը, որպես մեղադրյալ Էդգար Գարիկի Գրիգորյանի անձը բնութագրող հանգամանք, հաշվի է առնում այն, որ բնութագրվում է դրականորեն, մասնակցել է մարտական գործողությունների:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Էդգար Գրիգորյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը), խնամքին երկու անչափահաս երեխաների առկայությունը:
Դատարանը մեղադրյալ Էդգար Գարիկի Գրիգորյանի պատասխանատվությունն ու պատիժը ծանրացնող հանգամանքներ չի արձանագրում:
Վերը շարադրված իրավադրույթների, դրանց վերլուծության արդյունքում ձևավորված դատողությունների և ՀՀ վճռաբեկ դատարանի իրավական դիրքորոշումների լույսի ներքո Էդգար Գարիկի Գրիգորյանի նկատմամբ պատժի տեսակը որոշելիս Դատարանը հաշվի է առնում հետևյալը.
- Էդգար Գարիկի Գրիգորյանի կատարած հանցանքի բնույթն ու վտանգավորության աստիճանը, մասնավորապես այն, որ նրան մեղսագրված արարքը սեփականության դեմ ուղղված, դիտավորյալ, ծանր հանցագործություն է,
- հանցավորի հոգեբանական վերաբերմունքն իր արարքի նկատմամբ, մասնավորապես այն, որ մեղադրյալը գործել է ուղղակի դիտավորությամբ, գիտակցել է, որ իր արարքը ոտնձգում է իրավական պաշտպանության ներքո գտնվող այնպիսի արժեքի դեմ, ինչպիսին է սեփականությունը,
- հանցագործության շարժառիթը, նպատակը, կատարման հանգամանքները, մասնավորապես այն, որ Էդգար Գրիգորյանն ունի քողարկված գործելու հմտություններ, ինչի մասին է վկայում այն հանգամանքը, որ վերջինս, կարողանալով պայմանավորվածություն ձեռք բերել պաշտոնատար անձ հանդիսացող Գոռ Թադևոսյանի հետ, ձեռք է բերել տվյալ շենք և աշխատասենյակ մուտք գործելու համար անհրաժեշտ էլեկտրոնային անցագիր և բանալիներ, կարողացել է աննկատ մուտք գործել շենք, թաքնվել այնտեղ, իսկ հանցանքի կատարումից հետո կրել է դեմքը քողարկող դիմակ և ակնոց,
- այդ ոլորտում պետության քրեական քաղաքականության ուղղվածությունը, պատասխանատվությունը կամ պատիժը մեղմացնող սույն դատավճռում նշված հանգամանքները,
- անձը բնութագրող հանգամանքները, այդ թվում՝ տարիքը, այն, որ մեղադրյալը ունի մարված դատվածություն,
- նշանակվող պատժի` վերջինիս վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությունը:
Վերոգրյալների հիման վրա Դատարանը հանգում է այն հետևության, որ տվյալ դեպքում ՀՀ քրեական օրենսգրքի 254-րդ հոդվածի 3-րդ մասի սանկցիայի սահմաններում, իր հայեցողության շրջանակներում ղեկավարվելով պատժի նշանակման օրինականության, արդարության և պատասխանատվության անհատականացման ու մարդասիրության սկզբունքներով, օրենքով և ներքին համոզմամբ, գտնում է, որ Էդգար Գարիկի Գրիգորյանի նկատմամբ ՀՀ քրեական օրենսգրքի 254-րդ հոդվածի 3-րդ մասի 4-րդ կետի սանկցիայով պատիժ պետք է նշանակել ազատազրկման ձևով՝ 4 չորս տարի ժամկետով, որը նա պետք է կրի, քանի որ նրան պատժից ազատելու, այդ թվում՝ պատիժը պայմանականորեն չկիրառելու հիմքեր առկա չեն: Ավելին՝ համակողմանի գնահատման ենթարկելով մեջբերված, այդ թվում՝ Էդգար Գարիկի Գրիգորյանի կատարած հանցանքի փաստական հանգամանքները՝ Դատարանը գտնում է, որ Էդգար Գարիկի Գրիգորյանի նկատմամբ 4 չորս տարի ժամկետով ազատազրկման ձևով պատիժ նշանակելն ու այն փաստացի կիրառելն առավել քան արդարացված կլինի:
Դատարանը միաժամանակ գտնում է, որ կատարած հանցանքի համար Էդգար Գարիկի Գրիգորյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Ընդհանրացնելով վերոշարադրյալը՝ Դատարանը գտնում է, որ մեղադրյալ Էդգար Գարիկի Գրիգորյանի նկատմամբ ՀՀ քրեական օրենսգրքի 254-րդ հոդվածի 3-րդ մասի սանկցիայով ազատազրկման ձևով պատժի նման չափ նշանակելով և այն փաստացի կիրառելով է հնարավոր հասնել ՀՀ քրեական օրենսգրքի 55-րդ հոդվածի 2-րդ մասով նախատեսված պատժի նպատակներին՝ սոցիալական արդարության վերականգնմանը, պատժի ենթարկված անձի վերասոցիալականացմանն ու հանցագործությունների կանխմանը, ինչպես նաև ապահովել ՀՀ քրեական օրենսգրքի 7-րդ և 69-րդ հոդվածներով սահմանված՝ արդարության, պատասխանատվության անհատականացման և պատիժ նշանակելու ընդհանուր սկզբունքները:
Պատժի կրման սկիզբը պետք է հաշվել Էդգար Գրիգորյանին փաստացի ազատությունից զրկելու օրվանից՝ 2025 թվականի մայիսի 25-ից։
Անդրադառնալով իրեղեն ապացույցների պահպանման և տնօրինման հարցին՝ Դատարանն արձանագրում է, որ դատավճիռն օրինական ուժի մեջ մտնելուց հետո Անահիտ Գասպարյանի կողմից ներկայացված 279.800 ԱՄՆ դոլար գումարը՝ թվով 3 երեք փաթեթում, Սիմոն Պետրոսյանի կողմից ներկայացված 99.900 ԱՄՆ դոլար գումարը՝ թվով 1 մեկ փաթեթում, Էդգար Գրիգորյանի բնակարանի խուզարկությամբ հայտնաբերված 9.200 ԱՄՆ դոլար գումարը՝ թվով 1 փաթեթում, Էդգար Գրիգորյանի կողմից շահագործվող «Chrysler 300» մակնիշի 90AM101 համարանիշի ավտոմեքենայի խուզարկությամբ հայտնաբերված 189.900 ԱՄՆ դոլար գումարը՝ թվով 2 փաթեթում, պետք է թողնել թիվ 83-0237-24 քրեական վարույթով ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության պահպանությանը։
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված՝ Սուրեն Հակոբյանի աշխատասենյակից վերցված չհրկիզվող պահարանը պետք է թողնել ՀՀ քննչական կոմիտեի տնօրինմանը, աշխատասենյակի մուտքի դռան փականի գլանաձև մեխանիզմը՝ 3 բանալիներով հանձնել ՀՀ քննչական կոմիտեի տնօրինմանը, իսկ մետաղական մոտ 110մմ երկարությամբ իրը, չհրկիզվող պահարանի երկրորդ փականի բանալու անցքի միջից մետաղական մոտ 20մմ երկարությամբ իրը պետք է ոչնչացնել։
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված՝ Էդգար Գրիգորյանի կողմից շահագործվող «Chrysler 300» մակնիշի 90 AM 101 համարանիշի ավտոմեքենան պետք է հանձնել դրա սեփականատիրոջ տնօրինությանը։
Քննարկելով խափանման միջոցի հարցը՝ Դատարանը գտնում է, որ մեղադրյալ Էդգար Գրիգորյանի նկատմամբ որպես խափանման միջոց կիրառված կալանքը պետք է թողնել անփոփոխ՝ մինչև դատավճիռն օրինական ուժի մեջ մտնելը։
Մեղադրյալ Գոռ Թադևոսյանի նկատմամբ որպես այլընտրանքային խափանման միջոց կիրառված տնային կալանքը՝ համակցված 5․000․000 (հինգ միլիոն) ՀՀ դրամի չափով և անշարժ գույքի ձևով գրավի ու բացակայելու արգելքի հետ պետք է թողնել անփոփոխ՝ մինչև դատավճիռն օրինական ուժի մեջ մտնելը։
Դատավճիռն օրինական ուժի մեջ մտնելուց հետո Գոռ Թադևոսյանի վերաբերյալ ՀՀ միգրացիոն ծառայությունում Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքները պետք է վերացնել, 5․000․000 (հինգ միլիոն) ՀՀ դրամի չափով գրավի գումարը պետք է վերադարձնել գրավատուին, իսկ որպես գրավ ընդունված՝ Գոռ Թադևոսյանին սեփականության իրավունքով պատկանող՝ Շիրակի մարզ, ք. Գյումրի, Նոր-Ավան 13 շենք, 6 բնակելի տուն անշարժ գույքի վրա դրված արգելանքը պետք է վերացնել։
Քննարկելով վարութային ծախսերի հարցը՝ Դատարանը գտնում է, որ մեղադրյալներ Էդգար Գրիգորյանից և Գոռ Թադևոսյանից հօգուտ ՀՀ պետական բյուջեի համապարտությամբ պետք է գանձել փորձաքննությունների արժեք կազմող՝ ընդհանուր 729.000 (յոթ հարյուր քսանինը հազար) ՀՀ դրամը՝ որպես վարութային ծախս։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 100-րդ, 167-րդ, 347-350-րդ, 352-353-րդ, 364-րդ հոդվածներով` Դատարանը:

ՎՃՌԵՑ

Էդգար Գարիկի Գրիգորյանին մեղավոր ճանաչել ՀՀ քրեական օրենսգրքի 254-րդ հոդվածի 3-րդ մասի 4-րդ կետով նախատեսված հանցագործության կատարման մեջ, և նրա նկատմամբ պատիժ նշանակել ազատազրկում՝ 4 չորս տարի ժամկետով:
Պատժի կրման սկիզբը հաշվել Էդգար Գրիգորյանին փաստացի ազատությունից զրկելու օրվանից՝ 2025 թվականի մայիսի 25-ից։
Գոռ Գևորիկի Թադևոսյանին մեղավոր ճանաչել ՀՀ քրեական օրենսգրքի 46-254-րդ հոդվածի 3-րդ մասի 4-րդ կետով նախատեսված հանցագործության կատարման մեջ, և նրա նկատմամբ պատիժ նշանակել ազատազրկում՝ 4 չորս տարի ժամկետով:
ՀՀ քրեական օրենսգրքի 79-րդ հոդվածի 3-րդ մասի կիրառմամբ Գոռ Թադևոսյանի նկատմամբ նշանակված պատժին՝ 4 չորս տարի ժամկետով ազատազրկմանը հաշվակցել Գոռ Թադևոսյանի՝ 2025 թվականի մայիսի 22-ից մինչև 2025 թվականի հուլիսի 22-ը փաստացի անազատության մեջ գտնվելու ժամանակահատվածը և վերջնական պատիժ թողնել կրելու ազատազրկում 3 երեք տարի 10 տասը ամիս ժամկետով:
Պատժի կրման սկիզբը հաշվել Գոռ Թադևոսյանին փաստացի ազատությունից զրկելու օրվանից՝ 2025 թվականի հուլիսի 23-ից։
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված՝ Անահիտ Գասպարյանի կողմից ներկայացված 279.800 ԱՄՆ դոլար գումարը՝ թվով 3 երեք փաթեթում, Սիմոն Պետրոսյանի կողմից ներկայացված 99.900 ԱՄՆ դոլար գումարը՝ թվով 1 մեկ փաթեթում, Էդգար Գրիգորյանի բնակարանի խուզարկությամբ հայտնաբերված 9.200 ԱՄՆ դոլար գումարը՝ թվով 1 փաթեթում, Էդգար Գրիգորյանի կողմից շահագործվող «Chrysler 300» մակնիշի 90AM101 համարանիշի ավտոմեքենայի խուզարկությամբ հայտնաբերված 189.900 ԱՄՆ դոլար գումարը՝ թվով 2 փաթեթում, թողնել թիվ 83-0237-24 քրեական վարույթով ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության պահպանությանը։
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված՝ Սուրեն Հակոբյանի աշխատասենյակից վերցված չհրկիզվող պահարանը թողնել ՀՀ քննչական կոմիտեի տնօրինմանը, աշխատասենյակի մուտքի դռան փականի գլանաձև մեխանիզմը՝ 3 բանալիներով հանձնել ՀՀ քննչական կոմիտեի տնօրինմանը, իսկ մետաղական մոտ 110մմ երկարությամբ իրը, չհրկիզվող պահարանի երկրորդ փականի բանալու անցքի միջից մետաղական մոտ 20մմ երկարությամբ իրը ոչնչացնել։
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված՝ Էդգար Գրիգորյանի կողմից շահագործվող «Chrysler 300» մակնիշի 90 AM 101 համարանիշի ավտոմեքենան հանձնել դրա սեփականատիրոջ տնօրինությանը։
Մեղադրյալ Էդգար Գրիգորյանի նկատմամբ որպես խափանման միջոց կիրառված կալանքը թողնել անփոփոխ՝ մինչև դատավճիռն օրինական ուժի մեջ մտնելը։
Մեղադրյալ Գոռ Թադևոսյանի նկատմամբ որպես այլընտրանքային խափանման միջոց կիրառված տնային կալանքը՝ համակցված 5․000․000 (հինգ միլիոն) ՀՀ դրամի չափով և անշարժ գույքի ձևով գրավի ու բացակայելու արգելքի հետ թողնել անփոփոխ՝ մինչև դատավճիռն օրինական ուժի մեջ մտնելը։
Դատավճիռն օրինական ուժի մեջ մտնելուց հետո Գոռ Թադևոսյանի վերաբերյալ ՀՀ միգրացիոն ծառայությունում Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքները վերացնել, 5․000․000 (հինգ միլիոն) ՀՀ դրամի չափով գրավի գումարը վերադարձնել գրավատուին, իսկ որպես գրավ ընդունված՝ Գոռ Թադևոսյանին սեփականության իրավունքով պատկանող՝ Շիրակի մարզ, ք. Գյումրի, Նոր-Ավան 13 շենք, 6 բնակելի տուն անշարժ գույքի վրա դրված արգելանքը վերացնել։
Մեղադրյալներ Էդգար Գրիգորյանից և Գոռ Թադևոսյանից հօգուտ Հայաստանի Հանրապետության պետական բյուջեի համապարտությամբ գանձել փորձաքննությունների արժեք կազմող՝ ընդհանուր 729.000 (յոթ հարյուր քսանինը հազար) ՀՀ դրամը՝ որպես վարութային ծախս։
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ