ԵԴ1/2279/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«25» Օգոստոսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ԴԱՎԻԹ ՄԱՐԳԱՐՅԱՆԻ
մեղադրյալ՝ ԱՐԹՈՒՐ ՄԱՆՈՒԿՅԱՆԻ
դռնբաց դատական նիստում քննելով Արթուր Հովհաննեսի Մանուկյանի (1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 344 հոդվածի 1-ին մասով.







1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 60-0310-24 քրեական վարույթով Արթուր Հովհաննեսի Մանուկյանին ՀՀ քրեական օրենսգրքի 344 հոդվածի 1-ին մասով մեղադրանք է ներկայացվել հետևյալ արարքի համար.
«ՀՀ ՆԳՆ ոստիկանության պարեկային ծառայության կողմից թիվ 8300726411 վարչական իրավախախտման գործով 2023 թվականի օգոստոսի 1-ին կայացված որոշմամբ Արթուր Հովհաննեսի Մանուկյանի տրանսպորտային միջոցներ վարելու իրավունքը կասեցվել է 6 /վեց/ ամիս ժամանակով՝ սկսած 2023 թվականի օգոստոսի 1- ից մինչև 2024 թվականի փետրվարի 1-ը, որի մասին վերջինս տեղում ծանուցվել է և ստորագրությամբ ստացել որոշման պատճենը: Տեղյակ լինելով, որ իր՝ տրանսպորտային միջոցներ վարելու իրավունքը կասեցված է, Արթուր Հովհաննեսի Մանուկյանը, կասեցման ժամկետը դեռ չլրացած, 2023 թվականի օգոստոսի 4-ին՝ ժամը 02:05-ի սահմաններում, Երևան քաղաքի Ագաթանգեղոսի փողոցում վարել է «Մերսեդես» մակնիշի 37 PX 477 հաշվառման համարանիշի տրանսպորտային միջոցը, որի վերաբերյալ ՀՀ ՆԳՆ ոստիկանության պարեկային ծառայության պարեկ Գոռ Խալաթյանի կողմից նույն օրը՝ ժամը 02:30-ին, կազմվել է վարչական իրավախախտման վերաբերյալ թիվ 8180262183 արձանագրությունը»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 Արտավարութային փաստաթուղթ ճանաչված՝ «Վարչական իրավախախտման վերաբերյալ» թիվ 8180262183 արձանագրության համաձայն՝ այն կազմվել է 2023 թվականի օգոստոսի 4-ին՝ ժամը 02:30-ին։ Արթուր Հովհաննեսի Մանուկյանը տրանսպորտային միջոցներ վարելու իրավունքը կասեցված վիճակում նույն օրը՝ ժամը 02:05-ին, Երևան քաղաքի Ագաթանգեղոսի փողոցում վարել է «Մերսեդես» մակնիշի 37 PX 477 հաշվառման համարանիշի տրանսպորտային միջոցը։
(...)
«Արձանագրությանը ծանոթացա, իմ իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումն ստացա» հատվածում առկա է Արթուր Հովհաննեսի Մանուկյանի ստորագրությունը»: (2)
2.2 Արտավարութային փաստաթուղթ ճանաչված՝ Արթուր Հովհաննեսի Մանուկյանի վերաբերյալ ՀՀ ճանապարհային ոստիկանության էլեկտրոնային ռեգիստրից արտատպված քաղվածքի համաձայն՝ որպես վարորդական վկայականի կարգավիճակ նշված է՝ «Կասեցված», ժամկետի սկիզբ՝ 2023 թվականի օգոստոսի 1-ը, ավարտ՝ 2024 թվականի փետրվարի 1-ը: (3)
2.3 Արտավարութային փաստաթուղթ ճանաչված՝ վարչական իրավախախտման գործի վերաբերյալ թիվ 8300726411 որոշման համաձայն՝ 2023 թվականի օգոստոսի 1-ին Արթուր Հովհաննեսի Մանուկյանի տրանսպորտային միջոցներ վարելու իրավունքը կասեցվել է 6 (վեց) ամիս ժամկետով։
«Ստացա որոշման պատճենը և կատարման կարգի մասին քաղվածքը» մասում առկա է Արթուր Հովհաննեսի Մանուկյանի ստորագրությունը: (4)
2.4 «Փաստաթղթերի զննում կատարելու մասին» 2025 թվականի փետրվարի 3-ի արձանագրությունը պարունակում է դատավճռի 2.1-2.3 կետերում նշված նույնական տվյալներ: (5)
2.5 Մեղադրյալ Արթուր Հովհաննեսի Մանուկյանն օգտվելով իր սահմանադրական իրավունքից, հրաժարվել է դատարանում ցուցմունք տալուց: Մեղադրյալ Արթուր Մանուկյանը չի հրաժարվել նախաքննության ընթացքում պաշտպանի բացակայությամբ տրված ցուցմունքներից: Վերոգրյալի հիման վրա Դատարանը բավարարել է հանրային մեղադրողի միջնորդությունը և հրապարակվել է նախաքննության ընթացքում՝ 2025 թվականի հունիսի 23-ին, պաշտպանի բացակայությամբ Արթուր Մանուկյանի տված ցուցմունքի վերծանումը:
«քրեական վարույթի նյութերում առկա 8300726411 որոշման համապատասխան հատվածում առկա ստորագրությունն իրեն է պատկանում: 2023 թվականի օգոստոսի 4-ին վարչական իրավախախտման վերաբերյալ արձանագրության կազմման ժամանակ տեղեկացված է եղել, որ իր վարորդական իրավունքի վկայականը կասեցված է եղել 6 (վեց) ամիս ժամկետով: Առաջադրված մեղադրանքն իր համար պարզ է, իրեն մեղավոր է ճանաչում և զղջում է կատարածի համար»: (6)
ԼՐԱՑՈՒՑԻՉ ԴԱՏԱԼՍՈՒՄՆԵՐ

2.6 Դատվածությունների և հետախուզման առկայության Ձև 8 հարցման պատասխանի համաձայն՝
-2023 թվականի մարտի 21-ին ՀՀ քննչական կոմիտեի Երևան քաղաքի քննչական վարչության Մալաթիայի քննչական բաժնում ՀՀ քրեական օրենսգրքի 396 հոդվածի 1-ին մասով նախատեսված հանցագործության հատկանիշներով նախաձեռնվել է թիվ 16151023 քրեական վարույթը, որն ուղարկվել է դատարան։
-2023 թվականի սեպտեմբերի 7-ին ՀՀ քննչական կոմիտեի Երևանի քննչական վարչության կողմից ՀՀ քրեական օրենսգրքի 393 հոդվածի 1-ին մասով նախատեսված հանցագործության հատկանիշներով նախաձեռնվել է թիվ 10000623 քրեական վարույթը:
-Երևան քաղաքի առաջին ատյանի ընդհանուր իրավասության քրեական դատարանի 2024 թվականի փետրվարի 8-ի դատավճռով Արթուր Հովհաննեսի Մանուկյանը մեղավոր է ճանաչվել ՀՀ քրեական օրենսգրքի 396 հոդվածի 1-ին մասով նախատեսված թվով երկու հանցանքները կատարելու մեջ, և նրա նկատմամբ վերջնական պատիժ է նշանակվել տուգանք՝ 680.000 ՀՀ դրամի չափով, որի վճարման ժամկետ է սահմանվել 1 տարին:
2.7 ՀՀ ԱՆ պրոբացիայի ծառայության Կոտայքի մարզային մարմնի պետ Արման Շահինյանի 2025 թվականի հուլիսի 14-ի թիվ 29.3.2.6/47090-2025 գրության համաձայն.
«Արթուր Հովհաննեսի Մանուկյանը ՀՀ Երևան քաղաքի առաջին ատյանի ընդհանուր իրավասության քրեական դատարանի 2024 թվականի փետրվարի 8-ին կայացված և 19.03.2024թ-ին ուժի մեջ մտած թիվ ԵԴ/0627/01/23 դատավճռով մեղավոր է ճանաչվել Հայաստանի Հանրապետության քրեական օրենսգրքի 396հոդվածի 1-ին մասով /2 դրվագ/ նախատեսված հանցագործության կատարման մեջ։
Պատիժների լրիվ գումարմամբ Ա.Մանուկյանի նկատմամբ վերջնական պատիժ է նշանակվել տուգանք 680.000 /վեց հարյուր ութսուն հազար/ ՀՀ դրամի չափով:
Դատավճիռն օրինական ուժի մեջ մտնելուց հետո Արթուր Մանուկյանին թույլատրվել է դատավճռով նշանակված 680.000 /վեց հարյուր ութսուն հազար/ ՀՀ դրամի չափով տուգանքը վճարել մեկ տարվա ընթացքում։
ՀՀ ԱՆ պրոբացիայի ծառայության Արմավիրի մարզային մարմնի պետ Արթուր Գևորգյանի կողմից 25.03.2025թ-ին միջնորդություն է ներկայացվել դատարան՝ տուգանքի չափին համարժեք գույք բռնագանձելու մասին:
14.07.2025թ-ի դրությամբ Արթուր Մանուկյանի կողմից թիվ ԵԴ/0627/01/23 դատավճռով նշանակված 680.000 /վեց հարյուր ութսուն հազար/ ՀՀ դրամից վճարումներ չեն կատարվել»։
2.8 ՀՀ պետական եկամուտների կոմիտեի տվյալների շտեմարանից արտատպված քաղվածքի համաձայն՝ Արթուր Հովհաննեսի Մանուկյանի եկամտի վերաբերյալ տվյալներ չեն հայտնաբերվել: (7)
2.9 «DataLex» դատական տեղեկատվական համակարգից արտատպված՝ թիվ ԵԴ/0627/01/23 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2024 թվականի փետրվարի 8-ի դատավճռի «ՎՃՌԵՑ» մասի համաձայն.
«(...)
Արթուր Հովհաննեսի Մանուկյանին մեղավոր ճանաչել 2 դրվագ ՀՀ քրեական օրենսգրքի 396-րդ հոդվածի 1-ին մասով:
(...)»: (8)
Քննարկման ենթակա հարցերի վերաբերյալ կողմերի դիրքորոշումները.
2.10 Պատժի վերաբերյալ հարցերը քննարկելիս հանրային մեղադրող Դավիթ Մարգարյանը, հաշվի առնելով այն, որ Արթուր Մանուկյանը մինչ օրս չի կարողացել վճարել իր նկատմամբ Երևան քաղաքի առաջին ատյանի ընդհանուր իրավասության քրեական դատարանի 2024 թվականի փետրվարի 8-ի դատավճռով նշանակված տուգանքը՝ խնդրեց Դատարանին Արթուր Հովհաննեսի Մանուկյանի նկատմամբ որպես պատիժ նշանակել կարճաժամկետ ազատազրկում՝ 15 օր ժամկետով:
2.11 Մեղադրյալն, ըստ էության, Դատարանին հայտնեց, որ չի ցանկանում կատարել հանրային աշխատանքներ, և նշեց, որ համաձայն է պատժի վերաբերյալ հանրային մեղադրողի հայտնած դիրքորոշմանը:
3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում այն, որ տրանսպորտային միջոցներ վարելու իրավունքը կասեցված Արթուր Հովհաննեսի Մանուկյանը 2023 թվականի օգոստոսի 4-ին՝ ժամը 02:05-ի սահմաններում, Երևան քաղաքի Ագաթանգեղոսի փողոցում վարել է «Մերսեդես» մակնիշի 37 PX 477 հաշվառման համարանիշի տրանսպորտային միջոցը:
3.2 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
-Արթուր Հովհաննեսի Մանուկյանը սույն քրեական գործով հաստատված հանցանքը կատարելու պահին չի ունեցել դատվածություն,
-Արթուր Հովհաննեսի Մանուկյանի եկամտի վերաբերյալ տվյալներ առկա չեն։
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի օգոստոսի 25-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Արթուր Հովհաննեսի Մանուկյանին վերագրվող արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ նրա կատարած արարքի նկատմամբ ենթակա է կիրառման ՀՀ քրեական օրենսգրքի 344 հոդվածի 1-ին մասը:
4.2 Դատարանի կողմից հաստատված փաստական հանգամանքների հիման վրա Դատարանն արձանագրում է, որ Արթուր Հովհաննեսի Մանուկյանի պատասխանատվությունն ու պատիժը մեղմացնող և ծանրացնող հանգամանքներ առկա չեն:
4.3 Կատարած հանցանքի համար մեղադրյալ Արթուր Հովհաննեսի Մանուկյանը ենթակա է պատժի։
4.4 Դատապարտված մեղադրյալի նկատմամբ նշանակվող պատժի տեսակն ու չափը որոշելիս՝ Դատարանը հաշվի է առնում հետևյալը՝
-Արթուր Հովհաննեսի Մանուկյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է ոչ մեծ ծանրության հանցագործությունների շարքին։
-Արթուր Հովհաննեսի Մանուկյանը չունի մշտական եկամուտ, չի վճարել թիվ ԵԴ/0627/01/23 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2024 թվականի փետրվարի 8-ի դատավճռով նշանակված տուգանքը, չի ցանկացել կատարել հանրային աշխատանքներ, հետևաբար նրա նկատմամբ տուգանքի և հանրային աշխատանքների ձևով պատիժ նշանակելու հնարավորությունը բացակայում է:
-Արթուր Հովհաննեսի Մանուկյանի անձը բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Արթուր Հովհաննեսի Մանուկյանի կողմից կատարված հանցագործության բնույթին, վտանգավորության աստիճանին, դրա կատարելու հանգամանքներին, ինչպես նաև հանցավորի անձին համաչափ պատիժ է կարճաժամկետ ազատազրկումը՝ 15 (տասնհինգ) օր ժամկետով:
• Միևնույն ժամանակ, Դատարանն արձանագրում է, որ կատարած հանցանքի համար Արթուր Մանուկյանի նկատմամբ լրացուցիչ պատիժ նշանակելու հիմքերն ու անհրաժեշտությունը տվյալ դեպքում բացակայում են։
4.5 Արթուր Հովհաննեսի Մանուկյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն:
Միևնույն ժամանակ Դատարանը գտնում է, որ Արթուր Հովհաննեսի Մանուկյանի պատժի կրման սկիզբը պետք է հաշվել նրան փաստացի արգելանքի վերցնելու օրվանից:
4.6 Անդրադառնալով Արթուր Հովհաննեսի Մանուկյանի նկատմամբ սույն դատավճռով նշանակված պատժին թիվ ԵԴ/0627/01/23 քրեական գործով նշանակված պատիժը լրիվ կամ մասնակիորեն գումարելու հարցին՝ Դատարանը գտնում է, որ սույն քրեական գործով դատավճռի համակցությամբ պատիժ նշանակելը կարող է բացասաբար անդրադառնալ թիվ ԵԴ/0627/01/23 քրեական գործով տուգանքի ձևով նշանակված պատժի կատարման վրա, քանի որ այն արդեն իսկ գտնվում է կատարման այլ փուլում, (տուգանքի չափին համարժեք գույք բռնագանձելու մասին միջնորդություն է ներկայացվել դատարան), իսկ պատիժները գումարելն անխուսափելիորեն կհանգեցնի թիվ ԵԴ/0627/01/23 քրեական գործով տուգանքի կատարման կասեցմանը։
Վերոգրյալի պայմաններում Դատարանը գտնում է, որ սույն քրեական գործով պատիժ նշանակելիս պետք է չկիրառել ՀՀ քրեական օրենսգրքի 75 հոդվածի 1-ին մասը և սույն դատավճռով նշանակվող պատժին պետք է չգումարել թիվ ԵԴ/0627/01/23 քրեական գործով Արթուր Հովհաննեսի Մանուկյանի նկատմամբ տուգանքի ձևով նշանակված պատիժը:
4.7 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.8 Արթուր Հովհաննեսի Մանուկյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.9 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Արթուր Հովհաննեսի Մանուկյանին մեղավոր ճանաչել ՀՀ քրեական օրենսգրքի 344 հոդվածի 1-ին մասով նախատեսված հանցանքը կատարելու մեջ, և նրա նկատմամբ պատիժ նշանակել կարճաժամկետ ազատազրկում՝ 15 (տասնհինգ) օր ժամկետով։
2. Պատժի կրման սկիզբը հաշվել Արթուր Մանուկյանին փաստացի արգելանքի վերցնելու օրվանից:
3. Արթուր Մանուկյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
4. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ

(1)Ծնված՝ 1981 թվականի մայիսի 11-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնալուծված, նախկինում դատապարտված, հաշվառված է Երևան քաղաքի Թավրիզյան փողոցի թիվ 50 տանը, բնակվում է Կոտայքի մարզի Չարենցավան քաղաքի 6 թաղամասի 28 շենքի թիվ 9 բնակարանում, որպես խափանման միջոց է կիրառված բացակայելու արգելքը:
(2)Տե՛ս, քրեական գործ, հատոր 1, թերթ 3:
(3)Տե՛ս, քրեական գործ, հատոր 1, թերթ 4:
(4)Տե՛ս, քրեական գործ, հատոր 1, թերթ 20:
(5)Տե՛ս, քրեական գործ, հատոր 1, թերթեր 56-57:
(6)Տե՛ս, քրեական գործ, հատոր 1, թերթեր 92-94:
(7)2.6-2.8 կետերի վերաբերյալ, տե՛ս, Դատարանում ստեղծված նյութերը:
(8)2.9 կետի վերաբերյալ, տե՛ս քրեական գործ, հատոր 1, թերթեր 73-78: