ԵԴ1/2269/01/25





Դ Ա Տ Ա Վ Ճ Ի Ռ

ՀԱՅԱՍՏԱՆԻ ՀԱՆՐԱՊԵՏՈւԹՅԱՆ ԱՆՈւՆԻՑ


«12» սեպտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)
նախագահող դատավոր՝ Ռազմիկ Մարիկյան
դատական նիստերի քարտուղար՝ Գոռ Բադալյան
Անուշ Ափունց
մասնակցությամբ`

հանրային մեղադրող Աննա Մկրտչյանի
մեղադրյալ Գոռ Մանուկյանի


Պ Ա Ր Զ Ե Ց

դռնբաց դատական նիստում քննելով քրեական վարույթն ըստ մեղադրանքի Գոռ Հարությունի Մանուկյանի (ծնված՝ 28.11.1988թ., ՀՀ քաղաքացի, միջնակարգ կրթությամբ, ամուսնացած, խնամքին մեկ անչափահաս երեխա, չի աշխատում, արարքի կատարման պահին դատվածություն չի ունեցել, ներկայում ունի դատվածություն, հաշվառված է Երևան քաղաքի Կիևյան փողոցի 3 շենքի 35 բնակարան հասցեում)՝ ՀՀ քրեական օրենսգրքի 396-րդ հոդվածի 1-ին մասով, որպես խափանման միջոց է կիրառվել բացակայելու արգելքը,
1. Գործի դատավարական նախապատմությունը.
2024 թվականի փետրվարի 23-ին ՀՀ քրեական օրենսգրքի 396-րդ հոդվածի 1-ին մասի հատկանիշներով նախատեսված հանցագործության դեպքով ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում նախաձեռնվել է թիվ 14-0232-24 քրեական վարույթը։
2025 թվականի հունիսի 24-ին ՀՀ քրեական օրենսգրքի 396-րդ հոդվածի 1-ին մասի հատկանիշներով Գոռ Հարությունի Մանուկյանի նկատմամբ հարուցվել է հանրային քրեական հետապնդում:
2025 թվականի հունիսի 26-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազությունից մեղադրական եզրակացությամբ Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 14805425 նախաքննական համարով քրեական գործը, որին շնորհվել է թիվ ԵԴ1/2269/01/25 համարը։
2025 թվականի հուլիսի 4-ին Երևան քաղաքի առաջին ատյանի ընդհանուր իրավասության քրեական դատարանի դատավոր Ռազմիկ Մարիկյանի կողմից որոշում է կայացվել թիվ ԵԴ1/2269/01/25 քրեական գործով վարույթը ստանձնելու մասին:
2025 թվականի հուլիսի 14-ին Դատարանը թիվ ԵԴ1/2269/01/25 քրեական գործով կայացրել է մեղադրական վերդիկտ՝ Գոռ Հարությունի Մանուկյանին մեղավոր ճանաչելով ՀՀ քրեական օրենսգրքի 396-րդ հոդվածի 1-ին մասով նախատեսված արարքի կատարման մեջ:
2. Մեղադրանքի փաստական նկարագրությունը.
Գոռ Հարությունի Մանուկյանին մեղադրանք է ներկայացվել ՀՀ քրեական օրենսգրքի 396-րդ հոդվածի 1-ին մասով` այն բանի համար, որ «նա առանց իրացնելու նպատակի ապօրինի ձեռք է բերել և ապօրինի պահել է զգալի չափերով <<MDMB(N)-022 տեսակի թմրամիջոց կրող բուսական զանգված>> տեսակի թմրամիջոց:
Այսպես.
Գոռ Հարությունի Մանուկյանը խախտելով «Թմրամիջոցների և հոգեմետ (հոգեներգործուն) նյութերի մասին» 2002 թվականի դեկտեմբերի 26-ի ՀՀ օրենքի 11-րդ հոդվածի 2-րդ կետի և ՀՀ կառավարության 2010 թվականի մարտի 18-ի թիվ 270-Ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ թմրամիջոցների և հոգեմետ (հոգեներգործուն) նյութերի շրջանառություն իրականացնելու՝ այն ձեռք բերելու և պահելու թույլտվություն, քննությամբ դեռևս չպարզված ժամանակահատվածում և հանգամանքներում առանց իրացնելու նպատակի ապօրինի ձեռք է բերել և իր մոտ՝ թվով երեք փաթեթներում, ապօրինի պահել է ընդհանուր զգալի չափերով՝ 0,204 գրամ (0,097 գրամ, 0,076 գրամ, 0,031 գրամ) հաստատուն քաշով «MDMB(N)-022» տեսակի թմրամիջոց կրող բուսական զանգված» տեսակի թմրամիջոցը, որը հայտնաբերվել և վերցվել է 2024 թվականի փետրվարի 22-ին ՀՀ ՆԳՆ ոստիկանության Արաբկիրի բաժնում կատարված Գոռ Մանուկյանի անձնական խուզարկությամբ:»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Մեղադրյալ Գոռ Մանուկյանը, օգտվելով իր դատավարական իրավունքից, հրաժարվել է ցուցմունք տալ:
Ձերբակալելու և անձնական խուզարկություն կատարելու վերաբերյալ արձանագրությունը, որի համաձայն՝ 2024 թվականի փետրվարի 2-ին ժամը 23:30-ին Երևան քաղաքի Կոմիտաս 26 հասցեի դիմացից անմիջականորեն ծագած հիմնավոր կասկածի առկայության հիմքով՝ ապօրինի թմրանյութ ձեռք բերելու, պահելու և օգտագործելու համար ձերբակալվել և ՀՀ ՆԳՆ ոստիկանության Արաբկիրի բաժին է տեղափոխվել Գոռ Հարությունի Մանուկյանը: Բաժնում կատարված անձնական խուզարկությամբ, ի թիվս այլ իրերի վերջինին մոտից հայտնաբերվել և վերցվել է՝ 1 հատ ապակյա գլանակ կիսամոխրացված հետքերով, 1 հատ զիփ փականով պոլիէթիլենային տոպրակ, որի մեջ առկա է եղել, շագանակագույն զանգված, որի քաշը կազմել է 0.67 գրամ, 1 հատ 100 ԱՄՆ դոլարանոց թղթադրամին նմանվող թուղթ, որի մեջ առկա է եղել դեղնականաչավուն զանգված, որի քաշը կազմել է 0.86 գրամ, ինչպես նաև թվով 1 հատ «Գաբապենտին» գրառմամբ դեղահաբ:
Զննություն կատարելու մասին արձանագրությունը, որի համաձայն՝ զննության է ենթարկվել Գոռ Հարությունի Մանուկյանի անձնական խուզարկությամբ հայտնաբերված և վերցված բջջային հեռախոսը: Պարզվել է, որ բջջային հեռախոսը կապույտ գույն է: Բջջային հեռախոսի մի կողմը ամբողջությամբ էկրանն է, որի վրա վնասված հատվածներ առկա չեն, բջջային հեռախոսի մյուս կողմը կապույտ գույն է, որի վերին աջակողմյան հատվածում առկա է POCO գրառումը: Համապատասխան ստեղմնի միջոցով միացվեց բջջային հեռախոսը, որից հետո մուտք գործեցի բջջային հեռախոսում առկա կարգավորումներ բաժին և պարզվեց, որ բջջային հեռախոսը POCՕ C40 մոդելի է, բջջային հեռախոսի գործարանային համարներն են՝ 867824064268522 և 867824064268530: Այնուհետև զննության ենթարկվեց բջջային հեռախոսի sms հաղորդագրությունների և հեռախոսազանգերի հավելվածը, որտեղ քննության համար հետաքրքրություն ներկայացնող տեղեկություններ չհայտնաբերվեց: Զննության ենթարկվեց բջջային հեռախոսում առկա լուսանկարների պահման համար նախատեսված հավելվածը, որտեղ հայտնաբերվեց քրեական վարույթով հետաքրքրություն ներկայացնող լուսանկարներ: Լուսանկարները լուսանկարահանվեցին զննության արձանագրությանը կցելու նպատակով: Բջջային հեռախոսում առկա է նաև TikTok և WhatsApp հավելվածներ, որոնցում ըստ էության քննության համար հետաքրքրություն ներկայացնող տեղեկություններ չպարզվեցին: Առկա է նաև Telegram հավելված, որում առկա են բազմաթիվ կայքէջեր, որոնք զբաղվում են թմրամիջոցների վաճառքով, մասնավորապես՝ Big_Bong_Coffeeshop, @HerculesWeedsOperator, @HerculesWeeds, @qar_qarot, Cristian /CristianAM/ և Ձյաձի Հայաթ անվանումներով: Բացի այդ առկա է նաև փոխանցման կայքեր /չենջեր/ մասնավորապես՝ Bitcoin Operator bot և Bitcoin Operator, Koko Change և @ka_btc անվանումներով:
Դատաքիմիական և դատաբուսաբանական համալիր փորձաքննության թիվ 07052405 եզրակացությունը, որի համաձայն՝
1.Փորձաքննությանը ներկայացված մեկ հատ սև գույնի պոլիմերային հատվածով, ապակյա գլանակի մեջ առկա 0.099 գրամ քաշով, մասնակի այրված, դարչնավուն երանգի, անհամասեռ մանր բուսական զանգվածը հանդիսանում է 0.097 գրամ հաստատուն քաշով <<MDMB(N)-022>> տեսակի թմրամիջոց կրող բուսական զանգված տեսակի թմրամիջոց,
2.Փորձաքննությանը ներկայացված թափանցիկ պոլիէթիլենային զիպ փաթեթով փաթեթավորված 0.078 գրամ քաշով դարչնավուն երանգի, համասեռ մանրացված բուսական զանգվածը հանդիսանում է 0.076 գրամ հաստատուն քաշով «MDMB(N)-022» տեսակի թմրամիջոց կրող բուսական զանգված տեսակի թմրամիջոց,
3.Փորձաքննությանը ներկայացված մեկ հատ 100 ԱՄՆ դոլարանոց թղթադրամին նմանվող թղթով փաթեթավորված 0.033 գրամ քաշով դարչնավուն երանգի, անհամասեռ մանր բուսական զանգվածը հանդիսանում է 0.031 գրամ հաստատուն քաշով «MDMB(N)-022» տեսակի թմրամիջոց կրող բուսական զանգված տեսակի թմրամիջոց,
4.Փորձաքննությանը ներկայացված մեկ հատ «Габап... 300 мг капсулы АРПИ- MED» գրառումներով փայլաթիթեղյա դեղաթերթիկի կտրված հատվածի մեջ առկա, 0,378 գրամ քաշով, դեղին գույնի երկու կեսից կազմված դեղապատիճն (օբյեկտ 4) իր բաղադրության մեջ պարունակում է «գաբապենտին» տեսակի բաղադրատարր, որը ներառված չէ «Թմրամիջոցների, հոգեմետ (հոգեներգործուն) նյութերի մանր, զգալի, խոշոր և առանձնապես խոշոր չափերը» ՀՀ կառավարության 2018 թվականի հունիսի 28-ի N 707-Ն որոշման հավելված N 1»-ում:
Իրեղեն ապացույց ճանաչված՝ քրեական վարույթով 0.097 գրամ, 0.076 գրամ և 0.031 գրամ (ընդհանուր 0.204 գրամ) հաստատուն քաշով «MDMB(N)-022» տեսակի թմրամիջոց կրող բուսական զանգվածները և Գոռ Մանուկյանի անձնական խուզարկությամբ հայտնաբերված և վերցված PՕCO C40 մոդելի 867824064268522 և 867824064268530 գործարանային համարներով բջջային հեռախոսը:
Արտավարութային փաստաթուղթ ճանաչված՝ քրեական վարույթով Գոռ Մանուկյանի անձնական խուզարկությամբ հայտնաբերված և վերցված PՕCO C40 մոդելի 867824064268522 և 867824064268530 գործարանային համարներով բջջային հեռախոսում առկա տեղեկատվությունը:
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքի համաձայն՝ Գոռ Մանուկյանն արարքը կատարելու պահին դատվածություն չի ունեցել, ներկայում ունի դատվածություն:
 ՊԵԿ տվյալների շտեմարանից արտատպված տեղեկատվության համաձայն՝ դեպքին նախորդող 12 ամիսների ընթացքում Գոռ Մանուկյանի եկամուտը բացակայում է:
 ՀՀ ԱՆ «Սևան» ՔԿ հիմնարկի՝ 2025 թվականի օգոստոսի 27-ի գրությունը, որի համաձայն. «Գոռ Մանուկյանը դատապարտվել է Երևան քաղաքի առաջին ատյանի ընդհանուր իրավասության քրեական դատարանի 26.06.2023թ.-ի դատավճռով /գործ ԵԴ/0528/01/18 (2021 թվականի) ՀՀ քրեական օրենսգրքի 393-րդ հոդվածի 1-ին մասով, 393-րդ հոդվածի 2-րդ մասի 3-րդ կետով, 74 հոդվածի կիրառմամբ՝ ազատազրկման 5 տարի, ՀՀ քրեական օրենսգրքի 79-րդ հոդվածի 3-րդ մասով հաշվակցվել է նախնական կալանք 2 տարի 8 ամիս 22 օր և վերջնական պատիժ է սահմանվել ազատազրկում 2 տարի 3 ամիս 8 օր ժամկետով: Պատժի սկիզբը 13.08.2024թ.:»:
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Գոռ Մանուկյանը, խախտելով «Թմրամիջոցների և հոգեմետ (հոգեներգործուն) նյութերի մասին» 2002 թվականի դեկտեմբերի 26-ի ՀՀ օրենքի 11-րդ հոդվածի 2-րդ կետի և ՀՀ կառավարության 2010 թվականի մարտի 18-ի թիվ 270-Ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ թմրամիջոցների և հոգեմետ (հոգեներգործուն) նյութերի շրջանառություն իրականացնելու՝ այն ձեռք բերելու և պահելու թույլտվություն, քննությամբ դեռևս չպարզված ժամանակահատվածում և հանգամանքներում առանց իրացնելու նպատակի ապօրինի ձեռք է բերել և իր մոտ՝ թվով երեք փաթեթներում, ապօրինի պահել է ընդհանուր զգալի չափերով՝ 0,204 գրամ (0,097 գրամ, 0,076 գրամ, 0,031 գրամ) հաստատուն քաշով «MDMB(N)-022» տեսակի թմրամիջոց կրող բուսական զանգված» տեսակի թմրամիջոցը, որը հայտնաբերվել և վերցվել է 2024 թվականի փետրվարի 22-ին ՀՀ ՆԳՆ ոստիկանության Արաբկիրի բաժնում կատարված Գոռ Մանուկյանի անձնական խուզարկությամբ։
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Գոռ Մանուկյանի ներկայացված մեղադրանքի (առանց իրացնելու նպատակի թմրամիջոց ապօրինի ձեռք բերել ապօրինի պահել) ապացուցվածության վերաբերյալ ցանկացած հիմնավոր կասկած։
5. Դատարանի իրավական վերլուծությունները, հետևությունները և որոշումները.
Դատարանի կողմից հաստատված փաստական հանգամանքների և 2025 թվականի հուլիսի 14-ին կայացված մեղադրական վերդիկտի հիման վրա Դատարանը գտնում է, որ ապացուցված է մեղադրյալ Գոռ Հարությունի Մանուկյանին վերագրվող փաստական հանգամանքները (առանց իրացնելու նպատակի թմրամիջոց ապօրինի ձեռք բերել և պահել):
Դատարանը որպես մեղադրյալ Գոռ Մանուկյանի պատասխանատվությունն ու պատիժը մեղմացնող հանգամանքներ է դիտարկում՝
- առաջադրված մեղադրանքում իրեն մեղավոր ճանաչելը (տե՛ս Սերոբ Ֆրունզիկի Սարգսյանի վերաբերյալ ՀՀ վճռաբեկ դատարանի 2012 թվականի նոյեմբերի 1-ի թիվ ՍԴ/0109/01/12 որոշումը),
- խնամքին մեկ անչափահաս երեխայի առկայությունը (հիմք՝ 26.06.2023թ. Երևան քաղաքի առաջին ատյանի ընդհանուր իրավասության քրեական դատարանի ԵԴ/0528/01/18 դատավճիռը):
Դատարանն արձանագրում է, որ բացակայում են Գոռ Մանուկյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածներով նախատեսված հանգամանքները:
Դատարանի կողմից հաստատված փաստական հանգամանքների հիման վրա Դատարանը գտնում է, որ Գոռ Մանուկյանի անձը բնութագրող հանգամանք է ներկայում դատվածություն ունենալը:
Դատարանը, դրական պատասխանելով ՀՀ քրեական դատավարության օրենսգրքի 342-րդ հոդվածի 1-ին մասով նախատեսված հարցերին, գտնում է, որ կատարած արարքի համար Գոռ Մանուկյանը ենթակա է քրեական պատասխանատվության և պատժի:
ՀՀ քրեական օրենսգրքի 17-րդ հոդվածի համաձայն՝
(…)
2. Ոչ մեծ ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 2 տարի ժամկետով ազատազրկումը, կամ որոնց համար նախատեսված է ազատությունից զրկելու հետ չկապված պատիժ:
(…)
ՀՀ քրեական օրենսգրքի 55-րդ հոդվածի 1-ին մասի համաձայն՝
1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
ՀՀ քրեական օրենսգրքի 69-րդ հոդվածի համաձայն՝
1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե Դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ:
ՀՀ քրեական օրենսգրքի 396-րդ հոդվածի համաձայն՝
1. Առանց իրացնելու նպատակի զգալի չափերով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ կամ պրեկուրսոր ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը կամ առաքելը՝
պատժվում է տուգանքով՝ առավելագույնը տասնապատիկի չափով, կամ հանրային աշխատանքներով՝ առավելագույնը հարյուր ժամ տևողությամբ, կամ ազատության սահմանափակմամբ՝ առավելագույնը մեկ տարի ժամկետով, կամ կարճաժամկետ ազատազրկմամբ՝ առավելագույնը մեկ ամիս ժամկետով, կամ ազատազրկմամբ՝ առավելագույնը մեկ տարի ժամկետով:
(…):
Դատարանը, հիմք ընդունելով մեղադրյալի կողմից կատարած հանցագործության եղանակը, տեղը, ժամանակը, հանցագործության շարժառիթը և նպատակները, դիտավորության տեսակը, անձը բնութագրող տվյալները, պատասխանատվությունը և պատիժը մեղմացնող հանգամանքների առկայությունը, պատասխանատվությունը և պատիժը ծանրացնող հանգամանքների բացակայությունը և ղեկավարվելով ՀՀ քրեական օրենսգրքի 7-րդ հոդվածի 1-ին, 55-րդ և 69-րդ հոդվածներով, գտնում է, որ Գոռ Մանուկյանի նկատմամբ պետք է նշանակել ՀՀ քրեական օրենսգրքի 396-րդ հոդվածի 2-րդ մասի սանկցիայով նախատեսված տուգանքի ձևով պատիժ:
ՀՀ քրեական օրենսգրքի 59-րդ հոդվածի համաձայն՝
(…)
Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
(…):
Քրեաիրավական նշված նորմի վերլուծությունից պարզ է դառնում, որ տուգանքի հաշվարկման հիմքում դրվում է ոչ թե նվազագույն աշխատավարձը, այսինքն պետությունում սահմանված ֆիքսված որևէ գումար, այլ հանցանք կատարած անձի եկամուտը:
ՀՀ քրեական օրենսգրքի 3-րդ հոդվածի համաձայն՝
(…)
Ամսական եկամուտ` հանցանքն ավարտվելու օրվան նախորդող 12 ամիսների ընթացքում անձի ստացած միջին ամսական եկամտի 35 տոկոսը: Միջին ամսական եկամտի մեջ հաշվարկվում են ստացվող աշխատավարձը և դրան հավասարեցված այլ վճարումները,
(…):
Հաշվի առնելով այն, որ քրեական նոր օրենսգրքում տուգանքի հաշվարկման հիմքում դրվում է հանցանք կատարած անձի եկամուտը, օրենսդիրը կարգավորել է նաև այն իրավիճակները, երբ անձը եկամուտ չունի կամ դրա չափը անհնարին է պարզել: Այդ դեպքերում տուգանքի չափը հաշվարկվում է հանցանքը կատարելու պահին նվազագույն ամսական աշխատավարձի չափով:
Հաշվի առնելով, այն հանգամանքը, որ «Էկենգ» ՓԲԸ փոխգործելիության հարթակի միջոցով ստացված տեղեկանքի համաձայն՝ դեպքին նախորդող 12 ամիսների ընթացքում մեղադրյալ Գոռ Մանուկյանի եկամուտը բացակայել է, ուստի վերջինիս նկատմամբ որպես պատիժ նշանակվող տուգանքի չափը պետք է որոշվի ՀՀ-ում սահմանված նվազագույն ամսական աշխատավարձի չափով:
«Նվազագույն ամսական աշխատավարձի մասին» ՀՀ օրենքի՝ 2022 թվականի դեկտեմբերի 7-ի փոփոխության համաձայն՝ 2023 թվականի հունվարի 1-ին ՀՀ-ում որպես նվազագույն ամսական աշխատավարձ է սահմանվել 75.000 ՀՀ դրամը:
Նման պայմաններում, հաշվի առնելով, որ մեղադրյալ Գոռ Մանուկյանն իրեն մեղսագրվող հանցանքը կատարել է 2024 թվականի փետրվարի 22-ին՝ Դատարանն արձանագրում է, որ նրա նկատմամբ կիրառելի է ներկայում գործող նվազագույն ամսական աշխատավարձի չափը:
Դատարանը հիմք ընդունելով մեղադրյալ Գոռ Մանուկյանի անձը բնութագրող տվյալները, պատիժն ու պատասխանատվությունը մեղմացնող հանգամանքների առկայությունը և պատիժն ու պատասխանատվությունը ծանրացնող հանգամանքների բացակայությունը, ինչպես նաև նրա կողմից կատարված հանցանքի բնույթն ու նշանակությունը գտնում է, որ վերջինիս նկատմամբ որպես պատիժ պետք Է նշանակվի տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածի համաձայն՝
(…)
11. Պատիժը նշանակվում է սույն հոդվածի կանոններով, եթե դատավճիռ կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը և պատժի կրման սկիզբ է համարվում առաջին դատավճռով նշանակված պատժի կրման սկիզբը:
Հետևաբար, նկատի ունենալով, որ Երևան քաղաքի առաջին ատյանի ընդհանուր իրավասության քրեական դատարանի՝ Երևան քաղաքի առաջին ատյանի ընդհանուր իրավասության քրեական դատարանի՝ 2023 թվականի հունիսի 26-ի թիվ ԵԴ1/0528/01/18 դատավճռով Գոռ Մանուկյանի նկատմամբ որպես պատիժ նշանակվել է 2 (երկու) տարի 3 (երեք) ամիս 8 (ութ) օր ժամկետով ազատազրկումը՝ Դատարանը գտնում է, որ ՀՀ քրեական օրենսգրքի 75-րդ հոդվածի կիրառմամբ՝ դատավճիռների համակցությամբ սույն դատավճռով նշանակված 375.000 (երեք հարյուր յոթանասունհինգ հազար) ՀՀ դրամին պետք է լրիվ գումարել Երևան քաղաքի առաջին ատյանի ընդհանուր իրավասության քրեական դատարանի՝ 2023 թվականի հունիսի 26-ի թիվ ԵԴ1/0528/01/18 դատավճռով նշանակված 2 (երկու) տարի 3 (երեք) ամիս 8 (ութ) օր ժամկետով ազատազրկումը, և Գոռ Հարությունի Մանուկյանի նկատմամբ վերջնական պատիժ նշանակել տուգանք՝ 375.000 (երեք հարյուր յոթանասունհինգ հազար) ՀՀ դրամի չափով և ազատազրկում՝ 2 (երկու) տարի 3 (երեք) ամիս 8 (ութ) օր ժամկետով՝ ազատազրկման ձևով պատժի կրման սկիզբ համարելով 2024 թվականի օգոստոսի 13-ը:
Դատարանը հաշվի առնելով, մեղադրյալի գույքային դրությունը գտնում է, որ վերջինս ի վիճակի չէ անհապաղ և ամբողջությամբ վճարել տուգանքը:
ՀՀ քրեական օրենսգրքի 59-րդ հոդվածի համաձայն՝
(…)
7. Տուգանքի նշանակման հնարավորությունը և չափը դատարանը որոշում է՝ հաշվի առնելով հանցագործության ծանրությունը, հանցագործությամբ պատճառված վնասի բնույթն ու չափը, հանցագործությամբ ստացված գույքային կամ ոչ գույքային բնույթի օգուտները, դատապարտվողի ու նրա ընտանիքի գույքային դրությունը, ինչպես նաև դատապարտվողի՝ եկամուտ ստանալու հնարավորությունը կամ նրան պատկանող այնպիսի գույքի առկայությունը, որի վրա կարող է բռնագանձում տարածվել։
8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ Եթե տուգանքը նշանակելուց հետո դատապարտյալի նյութական վիճակի վատթարացման հետևանքով նա զրկվում է տուգանքը վճարելու հնարավորությունից, ապա դատարանը, հաշվի առնելով դատապարտյալի դիրքորոշումը`
1) երկարաձգում է տուգանքի վճարման սահմանված վերջնաժամկետը` առավելագույնը 1 տարով,
2) նշանակում է հանրային աշխատանքներ` հանրային աշխատանքների 24 ժամը հաշվարկելով հանցանքը կատարելու պահին նվազագույն աշխատավարձի չափով: (…):
Հետևաբար, Դատարանը գտնում է, որ մեղադրյալին պետք է թույլատրել որպես պատիժ նշանակված 375.000 (երեք հարյուր յոթանասունհինգ հազար) ՀՀ դրամի չափով տուգանքը վճարել մաս առ մաս 12 (տասներկու) ամսվա ընթացքում՝ ամսական նվազագույնը 31.250 (երեսունմեկ հազար երկու հարյուր հիսուն) ՀՀ դրամի չափով՝ ըստ նրա և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը գտնում է, որ Գոռ Մանուկյանի խափանման միջոցի հարցը պետք է համարել լուծված դրա բացակայության պատճառաբանությամբ:
Քննության առնելով իրեղեն ապացույցների տնօրինման հարցը՝ Դատարանը գտնում է, որ դատավճիռն օրինական ուժի մեջ մտնելուց հետո գործով իրեղեն ապացույց ճանաչված՝ 0.097 գրամ, 0.076 գրամ և 0.031 գրամ (ընդհանուր 0.204 գրամ) քաշով «MDMB(N)-022» տեսակի թմրամիջոց կրող բուսական զանգվածները պետք է հանձնել ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանների քննչական բաժին՝ թիվ 14805425 քրեական վարույթի նյութերին կցելու համար, իսկ Գոռ Մանուկյանի անձնական խուզարկությամբ հայտնաբերված POCO C40 մոդելի բջջային հեռախոսը պետք է վերադարձնել նրան:
Անդրադառնալով արտավարութային փաստաթղթերի տնօրինման և պահպանման հարցին՝ Դատարանը գտնում է, որ վարույթն իրականացնող մարմնի՝ 2025 թվականի հունիսի 2-ի որոշմամբ արտավարութային փաստաթուղթ ճանաչված փաստաթղթերը պետք է պահել գործի հետ այն պահելու ամբողջ ժամանակահատվածում:
Անդրադառնալով վարութային ծախսերի հարցին՝ Դատարանը հարկ է համարում արձանագրել, որ ՀՀ քրեական դատավարության օրենսգրքի 167-րդ հոդվածի 1-ին մասի 1-6-րդ կետերով նախատեսված վարութային ծախսեր չկան, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին` այդ վարութային ծախսերի հատուցման պահանջ Դատարանին չի ներկայացվել։ Հետևաբար՝ Դատարանը գտնում է, որ վարութային ծախսերի հարցը պետք է համարել լուծված։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 276-րդ և 347-349-րդ հոդվածներով` Դատարանը

Վ Ճ Ռ Ե Ց

Գոռ Հարությունի Մանուկյանին մեղավոր ճանաչել ՀՀ քրեական օրենսգրքի 396-րդ հոդվածի 1-ին մասով նախատեսված հանցանք կատարելու մեջ, և նրա նկատմամբ պատիժ նշանակել տուգանք նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 75-րդ հոդվածի կիրառմամբ՝ դատավճիռների համակցությամբ սույն դատավճռով նշանակված տուգանքին լրիվ գումարել Երևան քաղաքի առաջին ատյանի ընդհանուր իրավասության քրեական դատարանի՝ 2023 թվականի հունիսի 26-ի թիվ ԵԴ1/0528/01/18 դատավճռով նշանակված 2 (երկու) տարի 3 (երեք) ամիս 8 (ութ) օր ժամկետով ազատազրկումը, և Գոռ Հարությունի Մանուկյանի նկատմամբ վերջնական պատիժ նշանակել տուգանք՝ 375.000 (երեք հարյուր յոթանասունհինգ հազար) ՀՀ դրամի չափով և ազատազրկում՝ 2 (երկու) տարի 3 (երեք) ամիս 8 (ութ) օր ժամկետով՝ ազատազրկման ձևով պատժի կրման սկիզբ համարելով 2024 թվականի օգոստոսի 13-ը:
Գոռ Հարությունի Մանուկյանին թույլատրել որպես պատիժ նշանակված 375.000 (երեք հարյուր յոթանասունհինգ հազար) ՀՀ դրամի չափով տուգանքը վճարել մաս առ մաս 12 (տասներկու) ամսվա ընթացքում՝ ամսական նվազագույնը 31.250 (երեսունմեկ հազար երկու հարյուր հիսուն) ՀՀ դրամի չափով՝ ըստ նրա և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Գոռ Հարությունի Մանուկյանի նկատմամբ խափանման միջոցի հարցը համարել լուծված դրա բացակայության պատճառով:
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված՝ 0.097 գրամ, 0.076 գրամ և 0.031 գրամ (ընդհանուր 0.204 գրամ) քաշով «MDMB(N)-022» տեսակի թմրամիջոց կրող բուսական զանգվածները հանձնել ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանների քննչական բաժին՝ թիվ 14805425 քրեական վարույթի նյութերին կցելու համար, իսկ Գոռ Մանուկյանի անձնական խուզարկությամբ հայտնաբերված POCO C40 մոդելի բջջային հեռախոսը վերադարձնել նրան:
Դատավճիռն օրինական ուժի մեջ մտնելուց հետո վարույթն իրականացնող մարմնի՝ 2025 թվականի հունիսի 2-ի որոշմամբ արտավարութային փաստաթուղթ ճանաչված փաստաթղթերը պահել գործի հետ այն պահելու ամբողջ ժամանակահատվածում:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:

ԴԱՏԱՎՈՐ ՌԱԶՄԻԿ ՄԱՐԻԿՅԱՆ