ԵԴ1/2194/01/25







Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ս.ԳԶՈԳՅԱՆԻ
քարտուղարությամբ Լ.ՉՈԲԱՆՅԱՆԻ
մասնակցությամբ
հանրային մեղադրող Ս․ՊԵՏՐՈՍՅԱՆԻ
մեղադրյալ Ա․ԳԵՎՈՐԳՅԱՆԻ

2025 թվականի հուլիսի 30-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Արսեն Լևոնի Գևորգյանի՝ ծնված 1999 թվականի դեկտեմբերի 22-ին, Բերձոր քաղաքում, հայ, ՀՀ քաղաքացի, միջնակարգ կրթությամբ, չամուսնացած, չի աշխատում, նախկինոմ չդատապարտված, հաշվառված է ԼՂՀ, ք․Բերձոր, 2-րդ թաղամաս, 22-րդ տուն և փաստացի բնակվում է Երևան քաղաքի Բաշինջաղյան փողոցի 163-րդ շենքի 24-րդ բնակարան հասցեում, քրեական հետապնդում է հարուցվել 2 դրվագ ՀՀ քրեական օրենսգրքի 344-րդ հոդվածի 1-ին մասով, որպես խափանման միջոց է ընտրվել բացակայելու արգելքը,

ՊԱՐԶԵՑ

1.Գործի դատավարական նախապատմությունը
2025 թվականի ապրիլի 7-ին ՀՀ քրեական օրենսգրքի 344-րդ հոդվածի 1-ի մասի հատկանիշներով նախաձեռնվել թիվ 60251725 քրեական վարույթը:
2025 թվականի ապրիլի 11-ին ՀՀ քրեական օրենսգրքի 344-րդ հոդվածի 1-ի մասի հատկանիշներով նախաձեռնվել թիվ 60270725 քրեական վարույթը:
Նախաքննական մարմնի 2025 թվականի ապրիլի 21-ի որոշմամբ թիվ 60270725 քրեական վարույթը միացվել է թիվ 60251725 քրեական վարույթին, նախաքննությունը շարունակվել է թիվ 60251725 համարով։
2025 թվականի հունիսի 16-ի որոշմամբ Արսեն Լևոնի Գևորգյանի նկատմամբ քրեական հետապնդում է հարուցվել 2 դրվագ ՀՀ քրեական օրենսգրքի 344-րդ հոդվածի 1-ին մասով այն արարքների համար, որ նա, թիվ 8400670020 որոշմամբ 6 ամիս ժամկետով՝ 2024 թվականի հոկտեմբերի 03-ից մինչև 2025 թվականի ապրիլի 03-ը ներառյալ, տրանսպորտային միջոցներ վարելու իրավունքը կասեցված և այդ մասին պատշաճ իրազեկված լինելու պայմաններում, 2025 թվականի մարտի 10-ին՝ ժամը 12:29-ի սահմաններում, Երևան քաղաքի Սեբաստիա փողոցում վարել է «Մերսեդես» մակնիշի 51 YZ 500 հաշվառման համարանիշի ավտոմեքենան, ինչի կապակցությամբ ՀՀ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8259010436, արձանագրությունը:
(․․․)
Բացի այդ, Արսեն Լևոնի Գևորգյանը, թիվ 8400670020 որոշմամբ 6 ամիս ժամկետով՝ 2024 թվականի հոկտեմբերի 03-ից մինչև 2025 թվականի ապրիլի 03-ը ներառյալ, տրանսպորտային միջոցներ վարելու իրավունքը կասեցված և այդ մասին պատշաճ իրազեկված լինելու պայմաններում, 2025 թվականի ապրիլի 01-ին՝ ժամը 01:35-ի սահմաններում, Երևան քաղաքի Դավթաշենի կամուրջի մոտ վարել է «Մերսեդես» մակնիշի 51 YZ 500 հաշվառման համարանիշի ավտոմեքենան, ինչի կապակցությամբ ՀՀ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8259039173 արձանագրությունը:
2025 թվականի հունիսի 16-ի որոշմամբ Արսեն Լևոնի Գևորգյանի նկատմամբ խափանման միջոց է ընտրվել բացակայելու արգելքը:
2025 թվականի հունիսի 24-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում, գործին շնորհվել է ԵԴ1/2194/01/25 համարը:
2025 թվականի հունիսի 27-ին Դատարանի դատավոր Ս.Գզոգյանը որոշում է կայացրել վարույթը ստանձնելու և նախնական դատալսումներ նշանակելու մասին։
2025 թվականի հուլիսի 30-ին Դատարանը Արսեն Լևոնի Գևորգյանի նկատմամբ կայացրել է մեղադրական վերդիկտ։


2.Դատարանում հետազոտված և գնահատված ապացույցներ
Մեղադրյալ Արսեն Լևոնի Գևորգյանն առաջադրված մեղադրանքում իրեն մեղավոր է ճանաչել, հիմնական դատալսումների ընթացքում, օգտվելով իր իրավունքներից, հրաժարվել է ցուցմունք տալ (տե՛ս դատական նիստի արձանագրությունը):
Մինչդատական վարույթի ընթացքում Արսեն Լևոնի Գևորգյանը ցուցմունք է տվել այն մասին, որ իրեն բացատրվել է մեղադրանքի փաստական հանգամանքների և իրավական գնահատականի մասին, առաջադրված մեղադրանքում իրեն մեղավոր է ճանաչել, տեղեկացված է եղել, որ կասեցված է իր վարորդական իրավունքը, և վարել է ավտոմեքենա (տե´ս դատական նիստի արձանագրություն, քրեական գործ, 48-50-րդ թերթեր)։
Ցուցմունքները հրապարակելուց հետո Արսեն Լևոնի Գևորգյանը հայտարարել է, որ դրանք համապատասխանում են իրականությանը և պնդում է դրանք (տե՛ս դատական նիստի արձանագրությունը):
Հիմնական դատալսումների ընթացքում հետազոտվել են հետևյալ գրավոր ապացույցները.
Վարչական իրավախախտման վերաբերյալ 2025 թվականի մարտի 10-ի արձանագրությունը, որի համաձայն՝ Արսեն Լևոնի Գևորգյանը, տրանսպորտային միջոցներ վարելու իրավունքը կասեցված և այդ մասին պատշաճ իրազեկված լինելու պայմաններում, 2025 թվականի մարտի 10-ին՝ ժամը 12:29-ի սահմաններում, Երևան քաղաքի Սեբաստիա փողոցում վարել է «Մերսեդես» մակնիշի 51 YZ 500 հաշվառման համարանիշի ավտոմեքենան։
Վարչական իրավախախտման վերաբերյալ 2025 թվականի ապրիլի 1-ի արձանագրությունը, որի համաձայն՝ Արսեն Լևոնի Գևորգյանը, տրանսպորտային միջոցներ վարելու իրավունքը կասեցված և այդ մասին պատշաճ իրազեկված լինելու պայմաններում, 2025 թվականի ապրիլի 01-ին՝ ժամը 01:35-ի սահմաններում, Երևան քաղաքի Դավթաշենի կամուրջի մոտ վարել է «Մերսեդես» մակնիշի 51 YZ 500 հաշվառման համարանիշի ավտոմեքենան։
Վարչական իրավախախտման վերաբերյալ 2024 թվականի հոկտեմբերի 3-ի որոշումը, որի համաձայն՝ Արսեն Լևոնի Գևորգյանի տրանսպորտային միջոցներ վարելու իրավունքը կասեցվել է 6 ամիս ժամկետով։
ՀՀ ՆԳՆ ոստիկանության Ճանապարհային ոստիկանություն» ծառայության էլեկտրոնային ռեգիստրից արտատպված վարորդական իրավունքի վկայականը կասեցված լինելու վերաբերյալ քաղվածքը (տե´ս դատական նիստի արձանագրություն, քրեական գործ, 4-6-րդ, 14-րդ, 25-26-րդ թերթեր):
Արսեն Գևորգյանի դատավածության վերաբերյալ տեղեկանքը, որի համաձայն Արսեն Գևորգյանը նախկինում դատապարտված չէ եղել (տե´ս դատական նիստի արձանագրություն, քրեական գործ, 30-րդ թերթեր):


3.Դատարանի իրավական վերլուծությունները
Դատարանը, վերլուծելով մեղադրյալ Արսեն Լևոնի Գևորգյանի առաջադրված մեղադրանքի հիմքում դրված և հիմնական դատալսումների ընթացքում հետազոտված վերոգրյալ ապացույցները՝ դրանք գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր կասկածները նրա օգտին մեկնաբանելով, հաստատված է համարում, որ նա, թիվ 8400670020 որոշմամբ 6 ամիս ժամկետով՝ 2024 թվականի հոկտեմբերի 03-ից մինչև 2025 թվականի ապրիլի 03-ը ներառյալ, տրանսպորտային միջոցներ վարելու իրավունքը կասեցված և այդ մասին պատշաճ իրազեկված լինելու պայմաններում, 2025 թվականի մարտի 10-ին՝ ժամը 12:29-ի սահմաններում, Երևան քաղաքի Սեբաստիա փողոցում վարել է «Մերսեդես» մակնիշի 51 YZ 500 հաշվառման համարանիշի ավտոմեքենան, ինչի կապակցությամբ ՀՀ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8259010436, արձանագրությունը, բացի այդ, Արսեն Լևոնի Գևորգյանը, թիվ 8400670020 որոշմամբ 6 ամիս ժամկետով՝ 2024 թվականի հոկտեմբերի 03-ից մինչև 2025 թվականի ապրիլի 03-ը ներառյալ, տրանսպորտային միջոցներ վարելու իրավունքը կասեցված և այդ մասին պատշաճ իրազեկված լինելու պայմաններում, 2025 թվականի ապրիլի 01-ին՝ ժամը 01:35-ի սահմաններում, Երևան քաղաքի Դավթաշենի կամուրջի մոտ վարել է «Մերսեդես» մակնիշի 51 YZ 500 հաշվառման համարանիշի ավտոմեքենան, ինչի կապակցությամբ ՀՀ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8259039173 արձանագրությունը:
Այսպիսով, Դատարանը գտնում է, որ սույն գործով ձեռք բերված հավաստի ապացույցների համակցությունը բավարար է հիմնավոր կասկածից վեր ապացուցողական չափանիշին համապատասխան հաստատված համարելու մեղադրյալ Արսեն Լևոնի Գևորգյանի կողմից երկու անգամ տրանսպորտային միջոց վարելն այն վարելու իրավունքը կասեցված լինելու պայմաններում, այդ արարքներն ապացուցված են, ճիշտ են որակված և համապատասխանում են 2 դրվագ ՀՀ քրեական օրենսգրքի 344-րդ հոդվածի 1-ին մասի հատկանիշներին:
Անդրադառնալով մեղադրյալի նկատմամբ նշանակվելիք պատժի հարցին՝ Դատարանն արձանագրում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի մի շարք դրույթներով:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»։
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ։ (․․․)»։
Այսպես` Դատարանը մեղադրյալ Արսեն Գևորգյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հանրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Արսեն Գևորգյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, Դատարանը, որպես Արսեն Գևորգյանի անձը բնութագրող տվյալ հաշվի է առնում այն, որ նակինում դատապարտված չի եղել։
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալ Արսեն Գևորգյանի պատասխանատվությունն ու պատիժը մեղմացնող հանգամանք հաշվի է առնում այն, որ նա իրեն լիովին մեղավոր է ճանաչել և տվել խոստովանական ցուցմունքներ, անկեղծորեն զղջացել է կատարած արարքի համար:
Դատարանը, արձանագրում է, որ մեղադրյալ Արսեն Գևորգյանի պատասխանատվությունն ու պատիժը ծանրացնող հանգամանքներ առկա չեն:
ՀՀ քրեական օրենսգրքի 60-րդ հոդվածի համաձայն՝ «1. Հանրային աշխատանքները դատարանի նշանակած և իրավասու մարմնի որոշած վայրում չվարձատրվող, դատապարտյալի ուսումնառությունից կամ աշխատանքից ազատ ժամանակահատվածում նրա կողմից հանրության համար օգտակար այնպիսի աշխատանքների կատարումն է, որոնք չեն վտանգում նրա ֆիզիկական կամ հոգեկան առողջությունը։
2. Հանրային աշխատանքները դատապարտյալի համաձայնությամբ ոչ ավելի, քան օրական 4 ժամ տևողությամբ սահմանվում են ոչ մեծ և միջին ծանրության հանցագործությունների համար՝ 60-270 ժամ տևողությամբ: (․․․)»։
Դատարանը, հաշվի առնելով մեղադրյալ Ա․Գևորգյանի կատարած արարքների՝ հանրության համար վտանգավորության աստիճանն ու բնույթը, նրա անձը բնութագրող, պատասխանատվությունը և պատիժը մեղմացնող հանգամանքները, գտնում է, որ մեղադրյալ Ա․Գևորգյանն իր կատարած 2 դրվագ ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության համար ենթակա է պատժի հանրային աշխատանքների ձևով՝ ՀՀ քրեական օրենսգրքի 344-րդ հոդվածի 1-ին մասով՝ հանրային աշխատանքներ 60 (վաթսուն) ժամ տևողությամբ, ՀՀ քրեական օրենսգրքի 344-րդ հոդվածի 1-ին մասով՝ հանրային աշխատանքներ 60 (վաթսուն) ժամ տևողությամբ:
ՀՀ քրեական օրենսգրքի 74-րդ հոդվածի հիման վրա՝ նշանակված պատիժները լրիվ գումարելու միջոցով, նրա նկատմամբ վերջնական պատիժ պետք է նշանակել հանրային աշխատանքներ 120 (հարյուր քսան) ժամ տևողությամբ։
Դատարանն արձանագրում է, որ արտավարութային փաստաթուղթ ճանաչված և քրեական գործին կցված փաստաթղթերը պետք է թողնել կցված քրեական գործին՝ դատավճիռն օրինական ուժի մեջ մտնելուց հետո։
Քննարկելով մեղադրյալ Արսեն Լևոնի Գևորգյանի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 342-349-րդ հոդվածներով` Դատարանը

Վ Ճ Ռ Ե Ց

Արսեն Լևոնի Գևորգյանին մեղավոր ճանաչել 2 դրվագ ՀՀ քրեական օրենսգրքի 344-րդ հոդվածի 1-ին մասով նախատեսված արարքների կատարման մեջ, և նրա նկատմամբ պատիժ նշանակել․
ՀՀ քրեական օրենսգրքի 344-րդ հոդվածի 1-ին մասով՝ հանրային աշխատանքներ՝ 60 (վաթսուն) ժամ տևողությամբ:
ՀՀ քրեական օրենսգրքի 344-րդ հոդվածի 1-ին մասով՝ հանրային աշխատանքներ՝ 60 (վաթսուն) ժամ տևողությամբ:
ՀՀ քրեական օրենսգրքի 74-րդ հոդվածի հիման վրա՝ պատիժների լրիվ գումարելու միջոցով, մեղադրյալ Արսեն Լևոնի Գևորգյանի նկատմամբ վերջնական պատիժ նշանակել հանրային աշխատանքներ՝ 120 (հարյուր քսան) ժամ տևողությամբ:
Մեղադրյալ Արսեն Լևոնի Գևորգյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Արտավարութային փաստաթուղթ ճանաչված և քրեական գործին կցված փաստաթղթերը թողնել քրեական գործին կցված դատավճիռն օրինական ուժի մեջ մտնելուց հետո։
Դատավճիռը կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո՝ մեկամսյա ժամկետում:


ԴԱՏԱՎՈՐ՝ Ս.ԳԶՈԳՅԱՆ