ԵԴ1/2187/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
2025 թվականի սեպտեմբերի 11-ին քաղաք Երևան

Երևան քաղաքի առաջին ատյանի ընդհանուր իրավասության քրեական դատարանը /այսուհետ նաև` Դատարան/` հետևյալ կազմով
Նախագահությամբ դատավոր՝ Վ.Մելիքյանի
Քարտուղարությամբ՝ Մ.Ներսիսյանի
Մասնակցությամբ.
Հանրային մեղադրող՝ Վ.Ասատրյանի
Պաշտպան՝ Հ.Վարդանյանի
Մեղադրյալ՝ Կ.Սարգսյանի
դռնբաց դատական նիստում արագացված վարույթի կիրառմամբ, քննության առնելով քրեական գործն ըստ մեղադրանքի Կարինե Մացակի Սարգսյանի (ծնված՝ 1966 թվականի օգոստոսի 18-ին՝ ՀՀ-ում, ազգությամբ հայ, ՀՀ քաղաքացի, ամուսնացած, չդատված, բարձրագույն կրթությամբ, հաշվառված՝ ք.Երևան, Չեխովի փ., 25 շենք, 53 բնակարան հասցեում, փաստացի բնակվել է Ֆրանսիայի Հանրապետություն, ք.Լիոն, 20 Ավենյու, Ժուլ Գեթս հասցեում) ՀՀ քրեական օրենսգրքի 457-րդ հոդվածի 1-ին մասով՝ երկու դրվագով, ՀՀ քրեական օրենսգրքի 469-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով,
1.Գործի դատավարական նախապատմությունը.
10.05.2025 թվականին ՀՀ ՔԿ պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում նախաձեռնվել է թիվ 58213825 քրեական վարույթը /հատոր 1-ին, գ.թ. 21/:
10.05.2025 թվականին ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության դատախազ Ա.Դանիելյանի որոշմամբ Կարինե Մացակի Սարգսյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 457-րդ հոդվածի 1-ին մասով՝ երկու դրվագով, ՀՀ քրեական օրենսգրքի 469-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով /հատոր 1-ին, գ.թ. 40-43/:
10.05.2025 թվականին նախաքննական մարմնի որոշմամբ մեղադրյալ Կարինե Մացակի Սարգսյանի նկատմամբ խափանման միջոց է կիրառվել բացակայելու արգելքը /հատոր 1-ին, գ.թ. 57-58/:
Թիվ ԵԴ1/2187/01/25 (58213825 նախաքննական համար) քրեական գործն ըստ մեղադրանքի՝ Կարինե Մացակի Սարգսյանի ՀՀ քրեական օրենսգրքի 457-րդ հոդվածի 1-ին մասով՝ երկու դրվագով, 469-րդ հոդվածի 1-ին մասով և 44-469-րդ հոդվածի 1-ին մասով ուղարկվել է Երևան քաղաքի առաջին ատյանի ընդհանուր իրավասության քրեական դատարան, մուտքագրվել է 2025 թվականի հունիսի 24-ին և նույն օրը համակարգչային ծրագրի միջոցով իրականացվող գործերի բաշխմամբ մակագրվել է դատավոր Վահագն Մելիքյանին:
Դատարանի 25.06.2025 թվականի որոշմամբ քրեական գործը վարույթ է ստանձնվել և նախնական դատալսումներ է նշանակվել:
Կարինե Մացակի Սարգսյանի նկատմամբ ՀՀ քրեական օրենսգրքի 457-րդ հոդվածի 1-ին մասով՝ երկու դրվագով, 469-րդ հոդվածի 1-ին մասով և 44-469-րդ հոդվածի 1-ին մասով մեղադրանք է առաջադրվել այն բանի համար, որ նա քննությամբ դեռևս չպարզված օրը և հանգամանքներում 1.000 Եվրո գումարով ձեռք է բերել իր լուսանկարով և տվյալներով լրացված, պետական լիազոր մարմնի կողմից տրված իրավունք վերապահող Բուլղարիայի Հանրապետության քաղաքացու 386855625 համարի կեղծ անձնագիրը, այնուհետև 2025 թվականի մայիսի 2-ին «Զվարթնոց» սահմանային անցակետում՝ սահմանային վերահսկողության ժամանակ, օգտագործելով վերը նշված կեղծ անձնագիրը պետական մարմնի կողմից տրվող, իրավունք վերապահող՝ հիշյալ փաստաթղթերի օգտագործմամբ ՀՀ պետական սահմանն ապօրինի հատելու դիտավորությամբ, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, ապօրինի՝ առանց սահմանված փաստաթղթերի և պատշաճ թույլտվության, հատել է ՀՀ պետական սահմանը և մուտք գործել Հայաստանի Հանրապետություն:
Բացի այդ, Կարինե Սարգսյանը 2025 թվականի մայիսի 9-ին՝ ժամը 19:27-ին, ՀՀ-ից ելք կատարելու նպատակով «Զվարթնոց» սահմանային անցակետում՝ սահմանային վերահսկողության ժամանակ, ներկայացրել է պետական մարմնի կողմից տրվող, իրավունք վերապահող փաստաթուղթ հանդիսացող, իր լուսանկարով և տվյալներով լրացված Բուլղարիայի Հանրապետության քաղաքացու 386855625 համարի կեղծ անձնագիրը և հիշյալ կեղծ փաստաթղթի օգտագործմամբ ՀՀ պետական սահմանն ապօրինի հատելու դիտավորությամբ, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, ապօրինի՝ առանց սահմանված փաստաթղթերի և պատշաճ թույլտվության, փորձել է հատել ՀՀ պետական սահմանը և Երևան-Լիոն թիվ 7501 չվերթով մեկնել ՀՀ-ից, սակայն նշված հանցագործությունն իր կամքից անկախ հանգամանքներով չի իրագործվել, քանի որ վերջինիս փաստաթղթի կեղծ լինելու հանգամանքը բացահայտվել է ՀՀ ԱԱԾ սահմանապահ զորքերի ծառայողների կողմից:
Արագացված վարույթ.
Նախնական դատալսումների փուլում մեղադրյալ Կարինե Սարգսյանը միջնորդել է կիրառել արագացված վարույթ, հայտնելով, որ միջնորդությունը ներկայացրել է կամավոր, խորհրդակցել է պաշտպանի հետ, գիտակցում է արագացված վարույթի կիրառման հետևանքները, առաջադրված մեղադրանքն իրեն պարզ է, համաձայն է մեղադրանքի հետ, իրեն լիովին մեղավոր է ճանաչում առաջադրված մեղադրանքում:
Պաշտպան Հ.Վարդանյանը հայտնեց, որ մեղադրյալը խորհրդակցել է իր հետ:
Հանրային մեղադրողը չառարկեց արագացված վարույթի կիրառման դեմ:
Դատարանը, համոզվելով, որ առկա են ՀՀ քրեական դատավարության օրենսգրքի 464.1-րդ հոդվածի 1-ին մասով նախատեսված հիմքը և բացակայում են նույն հոդվածի 2-րդ մասով նախատեսված՝ արագացված վարույթի կիրառումը բացառող հանգամանքները, ինչպես նաև մեղադրյալը համաձայն է իրեն մեղսագրվող արարքին, միջնորդությունը ներկայացրել է կամավոր և գիտակցում է իր միջնորդության բնույթը և հետևանքները, որոշում է կայացրել արագացված վարույթ կիրառելու մասին և անցել է լրացուցիչ դասալսումների փուլ:
Դատարանի իրավական վերլուծությունները.
Դատարանը հիմք ընդունելով մեղադրանքն ամբողջ ծավալով մեղադրյալ Կարինե Մացակի Սարգսյանի կողմից կամովին ու գիտակցաբար ընդունելու և դրա հետ համաձայն լինելու փաստերը, հանգում է հետևության, որ նա մեղավորությամբ կատարել է իրեն ՀՀ քրեական օրենսգրքի 457-րդ հոդվածի 1-ին մասով՝ երկու դրվագով, ՀՀ քրեական օրենսգրքի 469-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով մեղսագրվող արարքները, դրանք կատարելու համար ենթակա է քրեական պատասխանատվության և պատժի:
Ուսումնասիրելով և գնահատելով գործով ձեռք բերված և հետազոտված ապացույցները վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, Դատարանն ապացուցված է համարում մեղադրյալ Կարինե Մացակի Սարգսյանի կողմից հանցավոր արարքներ կատարելը:
Արարքները, որոնց կատարման մեջ մեղադրվում է վերջինս, համապատասխանում են ՀՀ քրեական օրենսգրքի 457-րդ հոդվածի 1-ին մասին՝ երկու դրվագով, ՀՀ քրեական օրենսգրքի 469-րդ հոդվածի 1-ին մասին և ՀՀ քրեական օրենսգրքի 44-469-րդ հոդվածի 1-ին մասին և ճիշտ են որակված:
Ապացուցված է նաև մեղադրյալ Կարինե Մացակի Սարգսյանի կողմից նշված արարքները կատարելը և մեղավորությունը տվյալ հանցանքները կատարելու մեջ:
Մեղադրյալ Կարինե Մացակի Սարգսյանի նկատմամբ պատիժ նշանակելիս դատարանը հաշվի է առնում ինչպես կատարած հանցագործությունների բնույթն ու հասարակական վտանգավորության աստիճանը, այնպես էլ նրա անձը:
Դատարանը մեղադրյալ Կարինե Մացակի Սարգսյանի անձը բնութագրող և պատասխանատվությունն ու պատիժը մեղմացնող հանգամանքներ է արձանագրում, մեղքն ընդունելը, անկեղծորեն զղջալը և նախկինում դատապարտված չլինելը:
Դատարանը մեղադրյալ Կարինե Մացակի Սարգսյանի պատասխանատվությունն ու պատիժը ծանրացնող հանգամանք չի արձանագրում:
Դատարանը, նպատակ ունենալով վերականգնելու սոցիալական արդարությունը, ուղղելու պատժի ենթարկված անձին, ինչպես նաև կանխելու հանցագործությունները և հաշվի առնելով Կարինե Մացակի Սարգսյանի անձը, նրան բնութագրող դրական տվյալները, նրա պատասխանատվությունն ու պատիժը մեղմացնող հանգամանքների առկայությունը և ծանրացնող հանգամանքների բացակայությունը, հանգում է հետևության, որ մեղադրյալ Կարինե Մացակի Սարգսյանն իր կատարած հանցագործություններից յուրաքանչյուրի համար ենթակա է պատժի` նվազ խիստ տեսակի նշանակմամբ, քանի որ այն կարող է ապահովել պատժի նպատակները:
Միաժամանակ Դատարանը հաշվի առնելով, որ բացակայում է մեղադրյալի կողմից հանցանք կատարելու օրվան նախորդող մեկ տարվա ընթացքում եկամուտները, գտնում է, որ մեղադրյալի նկատմամբ նշանակվելիք տուգանքի ձևով պատժի չափը պետք է սահմանել վերջինիս կողմից հանցանք կատարելու պահին ՀՀ-ում գործող նվազագույն աշխատավարձի չափը, այն է 75.000 ՀՀ դրամը:
Քննության առնելով մեղադրյալ Կարինե Մացակի Սարգսյանի նկատմամբ կիրառված խափանման միջոցի հարցը, Դատարանը գտնում է, որ Կարինե Մացակի Սարգսյանի նկատմամբ կիրառված բացակայելու արգելք խափանման միջոցը պետք է թողնել անփոփոխ՝ մինչև դատավճռի օրինական ուժի մեջ մտնելը:
Քննության առնելով իրեղեն ապացույցների տնօրինման հարցը, Դատարանը գտնում է, որ Բուլղարիայի Հանրապետության քաղաքացու 386855625 համարի կեղծ անձնագիրը պետք է թողնել կցված քրեական գործին՝ դրա պահպանության ողջ ժամանակահատվածում:
Արտավարույթային փաստաթղթերը պետք է թողնել կցված քրեական գործին՝ դրա պահպանության ողջ ժամանակահատվածում:
Քրեական գործով գույքային հայց և դատական ծախսեր առկա չեն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 345-350-րդ, 464.4-րդ և 464.5-րդ հոդվածներով` Դատարանը



Վ Ճ Ռ Ե Ց
Մեղադրյալ Կարինե Մացակի Սարգսյանի մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով՝ երկու դրվագով, ՀՀ քրեական օրենսգրքի 469-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով:
ՀՀ քրեական օրենսգրքի 457-րդ հոդվածի 1-ին մասով /առաջին դրվագով/ դատապարտել տուգանքի նվազագույն աշխատավարձի հնգապատիկի՝ 375.000 /երեք հարյուր յոնթանասուն հինգ հազար/ ՀՀ դրամի չափով:
ՀՀ քրեական օրենսգրքի 457-րդ հոդվածի 1-ին մասով /երկրորդ դրվագով/ դատապարտել տուգանքի նվազագույն աշխատավարձի հնգապատիկի՝ 375.000 /երեք հարյուր յոնթանասուն հինգ հազար/ ՀՀ դրամի չափով:
ՀՀ քրեական օրենսգրքի 469-րդ հոդվածի 1-ին մասով դատապարտել տուգանքի նվազագույն աշխատավարձի տասնապատիկի՝ 750.000 /յոթ հարյուր հիսուն հազար/ ՀՀ դրամի չափով:
ՀՀ քրեական օրենսգրքի 44-469-րդ հոդվածի 1-ին մասով դատապարտել տուգանքի նվազագույն աշխատավարձի տասնապատիկի՝ 750.000 /յոթ հարյուր հիսուն հազար/ ՀՀ դրամի չափով:
ՀՀ քրեական օրենսգրքի 74-րդ հոդվածի կիրառմամբ նշանակված պատիժները լրիվ գումարելու միջոցով վերջնական պատիժ նշանակել տուգանք նվազագույն աշխատավարձի 30/երեսնապատիկի/՝ 2.250.000 /երկու միլիոն երկու հարյուր հիսուն հազար/ ՀՀ դրամի չափով:
Մեղադրյալ Կարինե Մացակի Սարգսյանի նկատմամբ կիրառված բացակայելու արգելք խափանման միջոցը թողնել անփոփոխ՝ մինչև դատավճռի օրինական ուժի մեջ մտնելը:
Իրեղեն ապացույց ճանաչված Բուլղարիայի Հանրապետության քաղաքացու 386855625 համարի կեղծ անձնագիրը թողնել կցված քրեական գործին՝ դրա պահպանության ողջ ժամանակահատվածում:
Արտավարութային փաստաթղթերը թողնել կցված քրեական գործին՝ դրա պահպանության ողջ ժամանակահատվածում:
Դատավճիռը կարող է բողոքարկվել ՀՀ վերաքննիչ քրեական դատարան դատավճիռը ստանալու օրվանից հետո՝ մեկամսյա ժամկետում, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով նախատեսված հիմքերով:

ԴԱՏԱՎՈՐ Վ.ՄԵԼԻՔՅԱՆ