ԵԴ1/2155/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«8» Սեպտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ՌԻՏԱ ՀԱՐՈՒԹՅՈՒՆՅԱՆԻ
մեղադրյալ՝ ԳՐԻԳՈՐ ՄՆԱՑԱԿԱՆՅԱՆԻ
դռնբաց դատական նիստում քննելով Գրիգոր Աշոտի Մնացականյանի(1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 344 հոդվածի 1-ին մասով.








1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 60104925 քրեական վարույթով Գրիգոր Աշոտի Մնացականյանին ՀՀ քրեական օրենսգրքի 344 հոդվածի 1-ին մասով մեղադրանք է ներկայացվել հետևյալ արարքի համար.
«ՀՀ ՆԳՆ ոստիկանության պարեկային ծառայության կողմից թիվ 8400767326 վարչական իրավախախտման գործով 2024 թվականի նոյեմբերի 10-ին կայացված որոշմամբ Գրիգոր Աշոտի Մնացականյանի տրանսպորտային միջոցներ վարելու իրավունքը կասեցվել է 6 (վեց) ամիս ժամանակով՝ 2024 թվականի նոյեմբերի 10-ից մինչև 2025 թվականի մայիսի 10-ը: Ծանուցված լինելով իր՝ տրանսպորտային միջոցներ վարելու իրավունքը կասեցված լինելու մասին՝ Գրիգոր Աշոտի Մնացականյանը 2024 թվականի դեկտեմբերի 8-ին՝ ժամը 00:45-ի սահմաններում, Երևան քաղաքի Աթենքի փողոցում վարել է «Կիա» մակնիշի 200 CS 61 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկի կողմից կազմվել է վարչական իրավախախտման վերաբերյալ թիվ 8180404995 արձանագրությունը»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 «Զննում կատարելու մասին» 2025 թվականի մայիսի 8-ի արձանագրության համաձայն.
«(...)
2024 թվականի դեկտեմբերի 8-ին՝ ժամը 01:04-ին, Երևան քաղաքի Աթենքի փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 2-րդ վաշտի կրտսեր պարեկ Գոռ Սարգսյանի /կրծքանշան թիվ 01148/ կողմից կազմվել է վարչական իրավախախտման վերաբերյալ թիվ 8180404995 արձանագրությունը, համաձայն որի՝ Գրիգոր Աշոտի Մնացականյանի (ծնված՝ 05.03.1991թ.) տրանսպորտային միջոցներ վարելու իրավունքը կասեցված լինելով՝ 08.12.2024թ., ժամը 00:45-ին Երևան քաղաքի Աթենքի փողոցում՝ վարել է «Կիա» մակնիշի 200 CS 61 հաշվառման համարանիշի տրանսպորտային միջոցը։
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն:
Արձանագրությանը ծանոթացա, իմ իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն:
ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության զննությամբ պարզվեց, որ Գրիգոր Աշոտի Մնացականյանի անվամբ թիվ RB835118 վարորդական վկայականի կարգավիճակը կասեցված է, սկիզբ՝ 10.11.2024թ., ավարտ՝ 10.05.2025թ.:
2024 թվականի նոյեմբերի 10-ին՝ ժամը 10:10-ին, Արարատ-Երևան-Մեղրի ավտոմայրուղում ՀՀ ՆԳՆ ոստիկանության պարեկային ծառայության կրտսեր պարեկ Վրեժ Ապերյանի /կրծքանշան թիվ 05664/ կողմից կազմվել է վարչական իրավախախտման վերաբերյալ թիվ 8400767326 արձանագրությունը, համաձայն որի՝ Գրիգոր Աշոտի Մնացականյանը (ծնված՝ 05.03.1991թ.) 10.11.2024թ. ժամը 10:09-ին Արարատ-Երևան-Մեղրի ավտոմայրուղում «Կիա» մակնիշի 200 CS 61 հաշվառման համարանիշի տրանսպորտային միջոցը վարելիս գերազանցել է երթևեկության սահմանված արագությունը։
Արձանագրությանը ծանոթացա, իմ իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն:
Նույն օրը կայացված թիվ 8400767326 որոշմամբ Գրիգոր Աշոտի Մնացականյանի տրանսպորտային միջոցներ վարելու իրավունքը կասեցվել է 6 /վեց/ ամիս ժամկետով։
Որոշման պատճենը և կատարման կարգի մասին քաղվածքն ստացա հատվածում առկա է ստորագրություն:
Զննությամբ քննությանը հետաքրքրություն ներկայացնող չհայտնաբերվեցին»: (2)
2.2 Արտավարութային փաստաթուղթ ճանաչված՝ վարչական իրավախախտման վերաբերյալ թիվ 8180404995 և 8400767326 արձանագրությունների, ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրի պատճենները պարունակում են դատավճռի 2.1 կետում նշված նույնական տվյալներ: (3)

ԼՐԱՑՈՒՑԻՉ ԴԱՏԱԼՍՈՒՄՆԵՐ

2.3 Դատվածությունների և հետախուզման առկայության Ձև 8 հարցման պատասխանի համաձայն՝ Գրիգոր Աշոտի Մնացականյանը նախկինում դատապարտված չի եղել:
2.4 ՀՀ պետական եկամուտների կոմիտեի տվյալների շտեմարանից արտատպված քաղվածքում առկա տեղեկատվության համաձայն՝ հանցանքն ավարտվելու օրվան նախորդող 12 ամիսների ընթացքում Գրիգոր Մնացականյանի ամսական եկամուտը պակաս է ստացվում նվազագույն աշխատավարձի չափից: (4)
2.5 Զինվորական թիվ 133160 գրքույկի համաձայն՝ Գրիգոր Աշոտի Մնացականյանը 2020 թվականի հոկտեմբերի 1-ից 2020 թվականի նոյեմբերի 9-ը թիվ N զորամասի կազմում մասնակցել է մարտական գործողություններին:
ՀՀ ՊՆ զորակոչային և զորահավաքային համալրման ծառայության Երևանի թիվ 3 տարածքային բաժնի կողմից 2020 թվականի հոկտեմբերի 30-ին տրված «Զորահավաքային զորակոչին զորակոչված լինելու մասին» տեղեկանքի համաձայն՝ Գրիգոր Աշոտի Մնացականյանը հայտարարված զորահավաքի շրջանակներում 2020 թվականի սեպտեմբերի 27-ին զորահավաքային զորակոչի միջոցով զորակոչվել է զինվորական ծառայության: (5)
Քննարկման ենթակա հարցերի վերաբերյալ կողմերի դիրքորոշումները.
2.6 Պատժի վերաբերյալ հարցերը քննարկելիս հանրային մեղադրողը Դատարանին խնդրեց Գրիգոր Աշոտի Մնացականյանի նկատմամբ որպես պատիժ նշանակել տուգանք՝ նվազագույն աշխատավարձի հնգապատիկի չափով:
2.7 Գրիգոր Մնացականյանը ներկայում աշխատելու հանգամանքով պայմանավորված հրաժարվեց հանրային աշխատանքներ կատարելուց: Մեղադրյալը նշեց, որ իր նկատմամբ որպես պատիժ տուգանք նշանակվելու պարագայում ինքն այն կկարողանա վճարել, և խնդրեց Դատարանին վճարման ժամկետը սահմանել մինչև 1 տարի, քանի որ հնարավորություն չի ունենա անհապաղ և ամբողջությամբ վճարել այն:
3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանն արձանագրում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարել, որ Գրիգոր Աշոտի Մնացականյանը տրանսպորտային միջոցներ վարելու իրավունքը 2024 թվականի նոյեմբերի 10-ից մինչև 2025 թվականի մայիսի 10-ը կասեցված վիճակում՝ 2024 թվականի դեկտեմբերի 8-ին՝ ժամը 00:45-ին, Երևան քաղաքի Աթենքի փողոցում վարել է «Կիա» մակնիշի 200 CS 61 հաշվառման համարանիշի տրանսպորտային միջոցը:
3.2 Լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
-Գրիգոր Մնացականյանը նախկինում դատապարտված չի եղել, մասնակցել է ադրբեջանի հանրապետության կողմից Արցախի Հանրապետության դեմ սանձազերծած 44-օրյա պատերազմին։
-Հանցանքն ավարտվելու օրվան նախորդող 12 ամիսների ընթացքում Գրիգոր Մնացականյանի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից։

4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի սեպտեմբերի 8-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Գրիգոր Աշոտի Մնացականյանին վերագրվող արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ դատապարտված մեղադրյալի արարքի նկատմամբ ենթակա է կիրառման ՀՀ քրեական օրենսգրքի 344 հոդվածի 1-ին մասը։
4.2 Դատարանն արձանագրում է, որ Գրիգոր Աշոտի Մնացականյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը, քանի որ մեղքն ընդունելը, կատարածի համար զղջալը, որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը և զղջացել է դրա համար։
4.3 Դատարանն արձանագրում է, որ Գրիգոր Աշոտի Մնացականյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.4 Կատարած հանցանքի համար մեղադրյալ Գրիգոր Աշոտի Մնացականյանը ենթակա է պատժի։
4.5 Պատժի տեսակն ու չափը որոշելիս՝ Դատարանը հաշվի է առնում հետևյալը՝
-Գրիգոր Աշոտի Մնացականյանի կատարած հանցանքի հանգամանքները, հանրային վտանգավորության աստիճանն ու բնույթը, ինչպես նաև այն որ նրա կատարած հանցանքը դասվում է ոչ մեծ ծանրության հանցագործությունների շարքին:
-Գրիգոր Աշոտի Մնացականյանի անձը բնութագրող տվյալները, պատասխանատվությունը և պատիժը մեղմացնող հանգամանքները, ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Գրիգոր Աշոտի Մնացականյանի կողմից ՀՀ քրեական օրենսգրքի 344 հոդվածի 1-ին մասով կատարված հանցագործության բնույթին, վտանգավորության աստիճանին, դրա կատարելու հանգամանքներին, ինչպես նաև հանցավորի անձին համաչափ պատիժ է հնգապատիկի չափով տուգանքը:
Հիմք ընդունելով ՀՀ քրեական օրենսգրքի 59 հոդվածի 5-րդ մասը, և հաշվի առնելով հանցանքն ավարտվելու օրվան նախորդող 12 ամիսների ընթացքում Գրիգոր Մնացականյանի ամսական եկամտի չափը՝ տուգանքի չափը պետք է հաշվարկել հանցանքը կատարելու պահին՝ 2024 թվականի դեկտեմբերի 8-ին ՀՀ-ում սահմանված նվազագույն աշխատավարձի՝ 75.000 (յոթանասունհինգ հազար) ՀՀ դրամի չափով:
• Այսպիսով, Դատարանը գտնում է, որ ՀՀ քրեական օրենսգրքի 344 հոդվածի 1-ին մասով նախատեսված հանցանքի կատարման համար Գրիգոր Աշոտի Մնացականյանի նկատմամբ պատիժ պետք է նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
4.6 Դատարանը գտնում է, որ կատարած հանցանքի համար Գրիգոր Աշոտի Մնացականյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
4.7 Գրիգոր Աշոտի Մնացականյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
Հիմք ընդունելով ՀՀ քրեական օրենսգրքի 59 հոդվածի 8-րդ մասը, հաշվի առնելով մեղադրյալ Գրիգոր Աշոտի Մնացականյանի եկամտի վերաբերյալ ստացված տվյալները, ինչպես նաև տուգանքի վճարման համար ժամկետ սահմանելու մասին վերջինի խնդրանքը՝ Դատարանը գտնում է, որ նշանակված տուգանքի վճարման ժամկետ պետք է սահմանել առավելագույնը՝ 1 (մեկ) տարի:
4.8 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.9 Գրիգոր Աշոտի Մնացականյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.10 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 100, 167, 276, 347, 348, 349 և 364 հոդվածներով՝ Դատարանը
Վ Ճ Ռ Ե Ց

1. Գրիգոր Աշոտի Մնացականյանին մեղավոր ճանաչել ՀՀ քրեական օրենսգրքի 344 հոդվածի 1-ին մասով նախատեսված հանցանքը կատարելու մեջ, և նրա նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
2. Նշանակված տուգանքի վճարման ժամկետ սահմանել առավելագույնը՝ 1 (մեկ) տարի:
3. Գրիգոր Մնացականյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը։
4. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ

(1)Ծնված՝ 1991 թվականի մարտի 5-ին ՀՀ Վայոց ձորի մարզի Վայք քաղաքում, ազգությամբ հայ, ՀՀ քաղաքացի, բարձրագույն կրթությամբ, նախկինում չդատապարտված, չամուսնացած, հաշվառված է և բնակվում է Երևան քաղաքի Ն.Ստեփանյան փողոցի 3/7 տանը, որպես խափանման միջոց է կիրառված բացակայելու արգելքը:
(2)Տե՛ս քրեական գործ, հատոր 1, թերթ 11-12։
(3)Տե՛ս քրեական գործ, հատոր 1, թերթեր 4-6։
(4)2.3-2.4 կետերի վերաբերյալ տե՛ս Դատարանում ստեղծված նյութերը։
(5)Տե՛ս քրեական գործ, հատոր 1, թերթեր 35-37։