ԵԴ1/2127/01/25
ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Երևան քաղաքի առաջին ատյանի ընդհանուր իրավասության քրեական դատարանը, (այսուհետ՝ Դատարան) հետևյալ կազմով՝

ՆԱԽԱԳԱՀՈՒԹՅԱՄԲ՝ Ա.ԿԱՐԱՊԵՏՅԱՆԻ

ՔԱՐՏՈՒՂԱՐՈՒԹՅԱՄԲ՝ Է․ԱԲԵԼՅԱՆԻ

ՄԱՍՆԱԿՑՈՒԹՅԱՄԲ՝

ՀԱՆՐԱՅԻՆ ՄԵՂԱԴՐՈՂ Ծ․ՄՆԱՑԱԿԱՆՅԱՆԻ

ՊԱՇՏՊԱՆ Մ․ՇԽԻՄՅԱՆԻ

ՄԵՂԱԴՐՅԱԼ Ա․ՋԱԲԻԵՎԻ

ԹԱՐԳՄԱՆԻՉ Վ․ՇԱՀԻՆՅԱՆԻ

2025 թվականի հուլիսի 8-ին Երևան քաղաքում, դռնբաց դատական նիստում, համաձայնեցված վարույթի կարգով քննելով քրեական գործն ըստ մեղադրանքի Ալվի Շախիդի Ջաբիևի՝ ծնվել է 1971 թվականի սեպտեմբերի 11-ին՝ ՌԴ-ում, ազգությամբ չեչեն է, ՌԴ քաղաքացի, ստացել է բարձրագույն կրթություն, ամուսնացած չէ, խնամքին ունի 1 անչափահաս երեխա, զբաղվում է բժշկական ապահովագրությամբ, դատվածություն չունի, հաշվառված է և բնակվում է Ավստիայի Հանրապետության Վիեննա քաղաքի Տյուրնըլ Խոֆշտրասե 2011 հասցեում, մեղադրանք է ներկայացվել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 469-րդ հոդվածի 1-ին մասով, խափանման միջոցներ են կիրառվել բացակայելու արգելքը և գրավը՝ 1․000․000 ՀՀ դրամ.

Պ Ա Ր Զ Ե Ց

1․ Գործի դատավարական նախապատմությունը.
Ալվի Շախիդի Ջաբիևը 2025 թվականի մարտի 12-ին ձերբակալվել է՝ հանցագործություն կատարելու անմիջականորեն ծագած հիմնավոր կասկածի հիմքով։
2025 թվականի մայիսի 13-ին ՀՀ ՔԿ պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում ՀՀ քրեական օրենսգրքի 469-րդ հոդվածի 1-ին մասով և 457-րդ հոդվածի 1-ին մասով նախաձեռնվել է թիվ 58214125 քրեական վարույթը:
ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության ավագ դատախազ Ծ․Մնացականյանի՝ 2025 թվական մարտի 13-ի որոշմամբ Ալվի Շախիդի Ջաբիևի նկատմամբ ՀՀ քրեական օրենսգրքի 457-րդ հոդվածի 1-ին մասով և 469-րդ հոդվածի 1-ին մասով հարուցվել է հանրային քրեական հետապնդում այն բանի համար, որ նա հանդիսանալով Ռուսաստանի Դաշնության քաղաքացի, քննությամբ դեռևս չպարզված ժամանակ և հանգամանքներում ձեռք է բերել պետական մարմնի կողմից տրված, իրավաբանական նշանակություն ունեցող, փաստ հավաստող, իր լուսանկարով, սակայն Ասլան Բեռգեռ /ծնվ. 03.05.1972թ., անձ. K1389997, ազգությամբ չեչեն/ կենսորոշիչ տվյալներով, Ավստրիայի Հանրապետության քաղաքացու բովանդակությամբ կեղծ անձնագիր, որի օգտագործմամբ 2025 թվականի մայիսի 11-ին դիտավորությամբ խախտելով <<Պետական սահմանի մասին>> ՀՀ օրենքի 11-րդ հոդվածի և <<ՀՀ պետական սահմանի ռեժիմ սահմանելու մասին>> ՀՀ Կառավարության 2011 թվականի մայիսի 12-ի թիվ 702-Ն որոշման պահանջները, Վիեննա-Երևան թիվ 2891 չվերթով ապօրինի՝ առանց սահմանված փաստաթղթերի և պատշաճ թույլտվության, հատել է ՀՀ պետական սահմանը և մուտք է գործել ՀՀ, ինչը բացահայտվել է 2025 թվականի մայիսի 12-ին ՀՀ ԱԱԾ ՍԶ զինծառայողի կողմից, երբ Ալվի Շախիդի Ջաբիևը, թիվ 9617710310 սերիա-համարի ՌԴ քաղաքացու անձնագիրն օգտագործելով, փորձել է Երևան-Մինվոդի թիվ 4332 չվերթով մեկնել Ռուսաստանի Դաշնություն:
Նախաքննություն իրականացրած մարմնի՝ 2025 թվականի մայիսի 13-ի որոշմամբ Ալվի Շախիդի Ջաբիևն ազատ է արձակվել՝ արգելանքի տակ պահելու անհրաժեշտությունը վերանալու հանգամանքով պայամանավորված։
Նախաքննություն իրականացրած մարմնի՝ 2025 թվականի մայիսի 13-ի որոշմամբ Ալվի Շախիդի Ջաբիևի նկատմամբ խափանման միջոց է կիրառվել բացակայելու արգելքը՝ վերջինիս փախուստը կանխելու նպատակով:
Հսկող դատախազի համաձայնությամբ քննիչը 2025 թվականի մայիսի 13-ին որոշում է կայացրել մեղադրյալ Ալվի Շախիդի Ջաբիևի նկատմամբ 1.000.000 /մեկ միլիոն/ ՀՀ դրամի չափով գրավը որպես խափանման միջոց կիրառելու մասին։ Խափանման միջոցը կիրառվել է մեղադրյալի կողմից իր վրա դրված պարտականությունների կատարումն ապահովելու, նրա փախուստը և նոր հանցանք կատարելը կանխելու նպատակով։
2025 թվականի հունիսի 17-ին թիվ 58214125 քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում: Գործին շնորհվել է թիվ ԵԴ1/2127/01/25 համարը, այնուհետև գործը մակագրվել և 2025 թվականի հունիսի 18-ին հանձնվել է դատավոր Ա.Կարապետյանին:
2025 թվականի հունիսի 23-ին դատավոր Ա.Կարապետյանի կողմից որոշում է կայացվել քրեական գործի վարույթը ստանձնելու և նախնական դատալսումներ նշանակելու մասին:

2. Համաձայնեցված վարույթ կիրառելու միջնորդությունը և դրա քննարկումը․
ՀՀ քրեական դատավարության օրենսգրքի 311-րդ հոդվածով նախատեսված հարցերի քննարկման ընթացքում մեղադրյալ Ալվի Շախիդի Ջաբիևը միջնորդեց կիրառել համաձայնեցման վարույթ և հայտնեց, որ միջնորդությունը ներկայացրել է կամավոր, խորհրդակցել է պաշտպան հետ, գիտակցում է համաձայնեցման վարույթով դատաքննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ, ինչպես նաև հայտնեց, որ առաջադրված մեղադրանքում իրեն մեղավոր է ճանաչում:
Պաշտպան Միքայել Շխիմյանը և հանրային մեղադրող Ծովակ Մնացականյանը չառարկեցին համաձայնեցման վարույթով դատաքննություն անցկացնելու միջնորդության դեմ:
Դատարանը, նկատի ունենալով, որ առկա է ՀՀ քրեական դատավարության օրենսգրքի 458-րդ հոդվածի 1-ին մասով նախատեսված հիմքը, ինչպես նաև այն, որ մեղադրյալը համաձայն է իրեն մեղսագրվող արարքներին, միջնորդությունը ներկայացրել է կամավոր, գիտակցում է միջնորդության բնույթը, հետևանքները, և բացակայում են նույն օրենսգրքի 458-րդ հոդվածի 2-րդ մասի 1-5-րդ կետերով նախատեսված` համաձայնեցման վարույթի կիրառումը բացառող հանգամանքները, ղեկավարվելով ՀՀ քրեական դատավարության օրենսգրքի 459-րդ հոդվածի 2-րդ մասով, բավարարեց մեղադրյալի միջնորդությունն ու կողմերի բանակցությունների համար սահմանեց վերջիններիս կողմից միջնորդված ժամկետը:

3. Համաձայնության մասին արձանագրությունը.
<< Սույն արձանագրությունը կազմվել է 2025 թվականի հուլիսի 8-ին, Երևան քաղաքում, մասնակցությամբ՝ հանրային մեղադրող` ՀՀ գլխավոր դատախազության վարչության ավագ դատախազ Ծովակ Մնացականյանի, մեղադրյալ Ալվի Շախիդի Ջաբիևի (ծնված՝ 11/09/1971թ, ՌԴ-ում, բարձրագույն կրթությամբ, ազգությամբ՝ չեչեն, ՌԴ քաղաքացի, չի աշխատում, ամուսնացած չէ, ՀՀ–ում նախկինում չդատված, հաշվառված՝ ՌԴ, Մոսկվայի մ., ք.Դոմոդեդովո, ռաստունովա տ.53, բնակվող՝ Ավստրիայի Հանրապետություն, քաղաք Վիեննա) և վերջինիս շահերի պաշտպան, փաստաբան Միքայել Շխիմյանի (արտոնագիր՝ 2521):
Ալվի Շախիդի Ջաբիևը մեղադրվում է ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 469-րդ հոդցածի 1-ին մասով այն բանի համար, որ նա, հանդիանալով Ռուսաստանի Դաշնության քաղաքացի, քննությամբ դեռևս չպարզված ժամանակ և հանգամանքներում ձեռք է բերել պետական մարմնի կողմից տրված, իրավաբանական նշանակություն ունեցող, փաստ հավաստող, իր լուսանկարով, սակայն Ասլան Բեռգեռ /ծնվ. 03.05.1972թ., անձ. K1389997, ազգությամբ չեչեն/ կենսորոշիչ տվյալներով, Ավստրիայի Հանրապետության քաղաքացու բովանդակությամբ կեղծ անձնագիր, որի օգտագործմամբ 2025 թվականի մայիսի 11-ին դիտավորությամբ խախտելով <<Պետական սահմանի մասին>> ՀՀ օրենքի 11-րդ հոդվածի և ՀՀ պետական սահմանի ռեժիմ սահմանելու մասին>> ՀՀ Կառավարության 2011 թվականի մայիսի 12-ի թիվ 702-Ն որոշման պահանջները, Վիեննա-Երևան թիվ 2891 չվերթով ապօրինի՝ առանց սահմանված փաստաթղթերի և պատշաճ թույլտվության հատել է ՀՀ պետական սահմանը և մուտք է գործել ՀՀ, ինչը բացահայտվել է 2025 թվականի մայիսի 12-ին ՀՀ ԱԱԾ ՍԶ զինծառայողի կողմից, երբ Ալվի Շախիդի Ջաբիևը թիվ 9617710310 սերիա-համարի ՌԴ քաղաքացու անձնագիրն օգտագործելով փորձել է Երևան-Մինվոդի թիվ 4332 չվերթով մեկնել Ռուսաստանի Դաշնություն:
ՀՀ քրեական օրենսգրքի 457-րդ հոդվածի 1-ին մասով սահմանված է.
1. Պետական կամ տեղական ինքնակառավարման մարմնի կամ դրանց կազմակերպության, առևտրային կամ այլ կազմակերպության, անհատ ձեռնարկատիրոջ, նոտարի, աուդիտորի կամ փաստաթուղթ կազմելու, տալու կամ դրա իսկությունը հավաստելու համար լիազորված այլ անձի կողմից տրվող իրավաբանական նշանակություն ունեցող փաստ հավաստող կամ իրավունք վերապահող կամ պարտականությունից կամ պատասխանատվությունից ազատող փաստաթուղթ կեղծելը՝ կեղծողի կողմից անձամբ կամ այլ անձի կողմից այն օգտագործելու կամ իրացնելու նպատակով, կամ այդպիսի փաստաթուղթ իրացնելը կամ նույն նպատակով կեղծ դրոշմ, կնիք կամ ձևաթուղթ պատրաստելը կամ իրացնելը, ինչպես նաև կեղծ փաստաթուղթ օգտագործելը՝ պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:
ՀՀ քրեական օրենսգրքի 469-րդ հոդվածի 1-ին մասով սահմանված է.
Առանց սահմանված փաստաթղթի կամ պատշաճ թույլտվության Հայաստանի Հանրապետության պետական սահմանը հատելը պատժվում է տուգանքով՝ տասնապատիկից երեսնապատիկի չափով, կամ հանրային աշխատանքներով՝ հարյուրից երկու հարյուր ժամ տևողությամբ, կամ կարճաժամկետ ազատազրկմամբ` առավելագույնը երկու ամիս ժամկետով, կամ ազատազրկմամբ՝ առավելագույնը երեք տարի ժամկետով:
Վերոշարադրյալի համադրման արդյունքում կողմերն արձանագրում են, որ Ալվի Շախիդի Ջաբիևին վերագրվող հանցագործության հետևանքով հատուցման ենթակա վնաս չի պատճառվել:
Հիմք ընդունելով ՀՀ քրեական դատավարության օրենսգրքի 460-րդ հոդվածը և ղեկավարվելով ՀՀ քրեական օրենսգրքի 77-րդ հոդվածով՝ կողմերը համաձայնվում են մեղադրյալին մեղսագրվող արարքի համար հետևյալ պատժատեսակի և պատժաչափի վերաբերյալ:
Մեղադրյալ Ալվի Շախիդի Ջաբիևին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 469-րդ հոդվածի 1-ին մասով նախատեսված հանցանքների կատարման համար և վերջինիս նկատմամբ ՀՀ քրեական օրենսգրքի 457-րդ հոդվածի 1-ին մասով նշանակել պատիժ՝ տուգանքի ձևով՝ քսանապատիկի չափով, իսկ ՀՀ քրեական օրենսգրքի 469-րդ հոդվածի 1-ին մասով՝ երեսնապատիկի չափով: ՀՀ քրեական օրենսգրքի 74-րդ հոդվածի 1-ին մասով սահմանված կարգի համաձայն՝ նշանակվող պատիժները մասնակի գումարելու միջոցով՝ մեղադրյալ Ալվի Շախիդի Ջաբիևի նկատմամբ վերջնական պատիժ սահմանել տուգանք՝ քառասունհինգապատիկի չափով:
Որպես լրացուցիչ պատիժ սահմանել՝ օտարերկրյա քաղաքացուն Հայաստանի Հանրապետության տարածքից վտարելը՝ 5 (հինգ) տարի ժամկետով:
Հաշվի առնելով մեղադրյալ Ալվի Շախիդի Ջաբիևի կարծիքը՝ վերջինիս Հայաստանի Հանրապետության տարածքից վտարել Ավստրիայի Հանրապետություն, քաղաք Վիեննա:
Մեղադրյալի նկատմամբ կիրառված խափանման միջոց գրավը՝ 1.000.000 ՀՀ դրամի չափով և ՀՀ-ից բացակայելու արգելքը թողնել անփոփոխ` մինչև դատավճռի օրինական ուժի մեջ մտնելը>>:
Դատարանը, ղեկավարվելով ՀՀ քրեական դատավարության օրենսգրքի 461-րդ հոդվածի 1-ին մասով, ընդունեց համաձայնության մասին արձանագրությունները և որոշում կայացրեց լրացուցիչ դատալսումներ անցկացնելու մասին:

4. Համաձայնեցման վարույթով լրացուցիչ դատալսումները.
Հանրային մեղադրողի կողմից համաձայնության մասին արձանագրության հրապարակումից հետո մեղադրյալ Ալվի Շախիդի Ջաբիևը, պատասխանելով նախագահողի հարցերին, հայտնեց, որ իրեն պարզ է կնքված համաձայնության բովանդակությունը, համաձայն է դրան, արտահայտել է իր իրական կամքը, գիտակցել է կնքված համաձայնության հետևանքները և պնդում է կնքված համաձայնությունը։
Հրապարակված արձանագրության վերաբերյալ հանրային մեղադրողը և պաշտպանը հայտնեցին, որ պնդում են այն:

5. Դատարանի իրավական վերլուծությունները․
ՀՀ քրեական դատավարության օրենսգրքի 463-րդ հոդվածի 1-ին մասի համաձայն՝ համաձայնեցման վարույթի արդյունքով դատարանը կայացնում է մեղադրական դատավճիռ սույն օրենսգրքի 347-350-րդ հոդվածներով սահմանված կարգով` հաշվի առնելով սույն հոդվածով նախատեսված առանձնահատկությունները:
Նույն հոդվածի 2-րդ և 3-րդ մասերի համաձայն՝ մեղադրական դատավճիռը պարունակում է համաձայնության մասին արձանագրության տեքստի բառացի շարադրանքը: Մեղադրական դատավճռով դատարանը նշանակում է համաձայնության մասին արձանագրությամբ համաձայնեցված պատիժը (պատժատեսակն ու պատժաչափը), սահմանում է բռնագրավման ենթակա գույքը և դրա չափը:
Այսպիսով, ներկայացված մեղադրանքը մեղադրյալ Ալվի Շախիդի Ջաբիևի կողմից ընդունելու և համաձայնեցման վարույթ կիրառելու պայմաններում՝ Դատարանը գտնում է, որ մեղադրյալին մեղսագրված արարքի կատարումն ապացուցված է, այն ճիշտ է որակված, համապատասխանում է ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 469-րդ հոդվածի 1-ին մասով նախատեսված հանցագործությունների հատկանիշներին։
Միաժամանակ հաշվի առնելով, որ կատարած հանցագործության համար մեղադրյալ Ալվի Շախիդի Ջաբիևի՝ պատժի ենթակա լինելու և նրանց նկատմամբ պատիժ նշանակելու հարցերը համաձայնեցվել են կողմերի միջև, ղեկավարվելով ՀՀ քրեական դատավարության օրենսգրքի 463-րդ հոդվածի 3-րդ մասով՝ Դատարանը գտնում է, որ դրանք պետք է լուծվեն՝ ըստ համաձայնության մասին արձանագրությունների։
Անդրադառնալով մեղադրյալ Ալվի Շախիդի Ջաբիևի նկատմամբ ընտրված խափանման միջոցի կիրառման ժամկետի (պահպանման) հարցին՝ Դատարանը գտնում է, որ դատավճիռն օրինական ուժի մեջ մտնելուց հետո Ալվի Շախիդի Ջաբիևի նկատմամբ կիրառված խափանման միջոցներ բացակայելու արգելքը և գրավը` 1․000․000 (մեկ միլիոն) ՀՀ դրամի չափով պետք է վերացնել, գրավի գումարը վերադարձնելով այն վճարած անձին:
Անդրադառնալով ապացույցների տնօրինման և պահպանման հարցին, Դատարանն արձանագրում է, որ քրեական գործով իրեղեն ապացույց ճանաչված և քրեական գործի հետ պահվող Ալվի Շախիդի Ջաբիևին Ասլան Բեռգեռի անվամբ տրված K1389997 սերիա-համարի կեղծ անձնագիրը, ինչպես նաև որպես արտավարութային փաստաթուղթ ճանաչված՝ ՀՀ ԱԱԾ ծառայողի հաղորդումը, անձանց և փաստաթղթերի հատուկ ստուգման՝ 2025 թվականի մայիսի 12-ի 2/120501 ակտը, Ալվի Շախիդի Ջաբիևի ձերբակալման արձանագրությունը, Ալվի Շախիդի Ջաբիևի սահմանահատումների պատմությունը և երեխաների ծննդյան վկայականների պատճենները պետք է պահել քրեական գործում: Ալվի Շախիդի Ջաբիևին Ասլան Բեռգեռի անվամբ տրված 22098890 համարի վարորդական իրավունքի վկայականը, Ալվի Շախիդի Ջաբիևի անձնական խուզարկությամբ հայտնաբերված Երևան-Մինվոդի չվերթի նստեցման կտրոնը ևս պետք է պահել քրեական գործի նյութերում։
Արտավարութային փաստաթուղթ ճանաչված՝ Ալվի Շախիդի Ջաբիևի ՌԴ քաղաքացու թիվ 9617710310 անձնագիրը, ինչպես նաև նրան տրված 99 24 277794 համարի ՌԴ վարորդական իրավունքի վկայականը դատավճիռը հրապարակելուց հետո պետք է վերադարձնել Ալվի Շախիդի Ջաբիևին՝ այդ փաստաթղթերի պատճենները պահելով գործի նյութերում։ Ալվի Շախիդի Ջաբիևի անձնական խուզարկությամբ հայտնաբերված բանկային քարտերը և 309 եվրո թղթադրամները ևս դատավճիռը հրապարակելուց հետո պետք է վերադարձնել Ալվի Շախիդի Ջաբիևին։
ՀՀ քրեական դատավարության օրենսգրքի 463–րդ հոդվածի 5-րդ մասի համաձայն՝ նույն օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալից ենթակա չեն բռնագանձման (քրեական գործով այդպիսիք առկա չեն), իսկ քրեական վարույթի ընթացքում հատուցման ենթակա՝ մեղադրյալին վերագրվող արարքի հետևանքով պատճառված այլ վնաս/ներ/ առկա չէ/են/:
Ելնելով վերոգյալից և ղեկավարվելով ՀՀ քրեական դատավարության օրենսգրքի 33-րդ հոդվածի 1-ին մասի 1-ին կետով, 347-350-րդ, 364-րդ, 458-464-րդ հոդվածներով՝ Դատարանը

Վ Ճ Ռ Ե Ց

Ալվի Շախիդի Ջաբիևին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով և 469-րդ հոդվածի 1-ին մասով։
ՀՀ քրեական օրենսգրքի 457-րդ հոդվածի 1-ին մասով նախատեսված հանցանքը կատարելու համար Ալվի Շախիդի Ջաբիևի նկատմամբ պատիժ նշանակել տուգանքը հանցանքը կատարելու պահին սահմանված նվազագույն աշխատավարձի քսանապատիկի՝ 1․500․000 (մեկ միլիոն հինգ հարյուր հազար) ՀՀ դրամի չափով:
ՀՀ քրեական օրենսգրքի 469-րդ հոդվածի 1-ին մասով նախատեսված հանցանքը կատարելու համար Ալվի Շախիդի Ջաբիևի նկատմամբ պատիժ նշանակել տուգանքը հանցանքը կատարելու պահին սահմանված նվազագույն աշխատավարձի երեսնապատիկի՝ 2․250․000 (երկու միլիոն երկու հարյուր հիսուն հազար) ՀՀ դրամի չափով:
Ալվի Շախիդի Ջաբիևի նկատմամբ ՀՀ քրեական օրենսգրքի 469-րդ հոդվածի 1-ին մասով նախատեսված հանցանքը կատարելու համար որպես լրացուցիչ պատիժ նշանակել Հայաստանի Հանրապետության տարածքից վտարելը՝ 5 (հինգ) տարի ժամկետով, արգելելով նրան այդ ժամանակահատվածում գտնվել Հայաստանի Հանրապետությունում:
ՀՀ քրեական օրենսգրքի 74-րդ հոդվածի 1-ին մասի կիրառմամբ Ալվի Շախիդի Ջաբիևի նկատմամբ ՀՀ քրեական օրենսգրքի 469-րդ հոդվածի 1-ին մասով նախատեսված արարքը կատարելու համար նշանակված հիմնական պատժին՝ 2․250.000 (երկու միլիոն երկու հարյուր հիսուն հազար) ՀՀ դրամ տուգանքին, մասնակի գումարել ՀՀ քրեական օրենսգրքի 457-րդ հոդվածի 1-ին մասով նախատեսված արարքը կատարելու համար նշանակված պատժից՝ 1․125.000 (մեկ միլիոն հարյուր քսանհինգ հազար) ՀՀ դրամը, և որպես հիմնական պատիժ՝ Ալվի Շախիդի Ջաբիևի նկատմամբ նշանակել տուգանքը` հանցանքը կատարելու պահին սահմանված նվազագույն աշխատավարձի քառասունhինգապատիկի՝ 3․375․000 (երեք միլիոն երեք հարյուր յոթանասունհինգ հազար) ՀՀ դրամի չափով։
ՀՀ քրեական օրենսգրքի 74-րդ հոդվածի 10-րդ մասի կիրառմամբ Ալվի Շախիդի Ջաբիևի նկատմամբ նշանակված հիմնական պատժին՝ 3․375․000 (երեք միլիոն երեք հարյուր յոթանասունհինգ հազար) ՀՀ դրամ տուգանքին, միացնել Ալվի Շախիդի Ջաբիևի նկատմամբ որպես լրացուցիչ պատիժ նշանակված Հայաստանի Հանրապետության տարածքից վտարելը, և Ալվի Շախիդի Ջաբիևի նկատմամբ վերջնական պատիժ նշանակել տուգանքը՝ 3․375․000 (երեք միլիոն երեք հարյուր յոթանասունհինգ հազար) ՀՀ դրամի չափով և Հայաստանի Հանրապետության տարածքից վտարելը՝ 5 (հինգ) տարի ժամկետով, արգելելով նրան այդ ժամանակահատվածում գտնվել Հայաստանի Հանրապետությունում:
Հաշվի առնելով Ալվի Շախիդի Ջաբիևի կարծիքը՝ վտարման երկիր սահմանել Ավստրիայի Հանրապետությունը՝ քաղաք Վիեննան:
Լրացուցիչ պատժի սկիզբը հաշվել Ալվի Շախիդի Ջաբիևին Հայաստանի Հանրապետության տարածքից վտարելու պահից:
Դատավճիռն օրինական ուժի մեջ մտնելուց հետո Ալվի Շախիդի Ջաբիևի նկատմամբ կիրառված խափանման միջոցներ բացակայելու արգելքը և գրավը` 1․000․000 (մեկ միլիոն) ՀՀ դրամի չափով, վերացնել՝ գրավի գումարը վերադարձնելով այն վճարած անձին:
Դատավճիռն օրինական ուժի մեջ մտնելուց հետո իրեղեն ապացույց ճանաչված և քրեական գործի հետ պահվող Ալվի Շախիդի Ջաբիևին Ասլան Բեռգեռի անվամբ տրված K1389997 սերիա-համարի կեղծ անձնագիրը, ինչպես նաև որպես արտավարութային փաստաթուղթ ճանաչված՝ ՀՀ ԱԱԾ ծառայողի հաղորդումը, անձանց և փաստաթղթերի հատուկ ստուգման՝ 2025 թվականի մայիսի 12-ի 2/120501 ակտը, Ալվի Շախիդի Ջաբիևի ձերբակալման արձանագրությունը, Ալվի Շախիդի Ջաբիևի սահմանահատումների պատմությունը և երեխաների ծննդյան վկայականների պատճենները պահել քրեական գործում: Ալվի Շախիդի Ջաբիևին Ասլան Բեռգեռի անվամբ տրված 22098890 համարի վարորդական իրավունքի վկայականը, Ալվի Շախիդի Ջաբիևի անձնական խուզարկությամբ հայտնաբերված Երևան-Մինվոդի չվերթի նստեցման կտրոնը ևս պահել քրեական գործի նյութերում։
Արտավարութային փաստաթուղթ ճանաչված՝ Ալվի Շախիդի Ջաբիևի ՌԴ քաղաքացու թիվ 9617710310 անձնագիրը, ինչպես նաև նրան տրված 99 24 277794 համարի ՌԴ վարորդական իրավունքի վկայականը դատավճիռը հրապարակելուց հետո վերադարձնել Ալվի Շախիդի Ջաբիևին՝ այդ փաստաթղթերի պատճենները պահելով գործի նյութերում։ Ալվի Շախիդի Ջաբիևի անձնական խուզարկությամբ հայտնաբերված բանկային քարտերը և 309 եվրո թղթադրամները ևս դատավճիռը հրապարակելուց հետո վերադարձնել Ալվի Շախիդի Ջաբիևին։
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերի, կարող է բողոքարկվել ՀՀ Վերաքննիչ քրեական դատարան՝ ստանալու պահից մեկամսյա ժամկետում:


ԴԱՏԱՎՈՐ՝ Ա.ԿԱՐԱՊԵՏՅԱՆ