ԵԴ1/2065/01/25

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ
ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

2025թ․ օգոստոսի <<26>> ք․Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

Նախագահող դատավոր Ա.Հովհաննիսյան
դատական նիստերի քարտուղար Մ.Հովհաննիսյան
հանրային մեղադրող Ա.Բարսեղյան

դռնբաց դատական նիստում քննեց քրեական վարույթն ըստ մեղադրանքի՝ Արմեն Ալբերտի Վարդանյանի՝ ծնված 1978 թվականի մայիսի 20-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնալուծված, չի աշխատում, նախկինում դատապարտված, հաշվառված և բնակվող՝ Երևան քաղաքի Վարդաշեն 6-րդ փողոցի 23-րդ տանը: Հանրային քրեական հետապնդում է հարուցվել ՀՀ քրեական օրենսգրքի 344-րդ հոդված 1-ին մասով. որպես խափանման միջոց է կիրառվել բացակայելու արգելքը:
Վարույթի դատավարական նախապատմությունը.
2024 թվականի մարտի 21-ի ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Ա.Հարությունյանի արձանագրությամբ ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60105924 քրեական վարույթը:
2025 թվականի մայիսի 30-ի ՀՀ դատախազության Երևանի կայազորի զինվորական դատախազության դատախազ Ա.Բարսեղյանի որոշմամբ Արմեն Ալբերտի Վարդանյանի նկատմամբ հանրային քրեական հետապնդում է հարուցվել քրեական օրենսգրքով նախատեսված այն արարքի կատարման համար, որ նա, ՀՀ ոստիկանության պարեկային ծառայության թիվ ԱՆ037835 ակտով մեկ տարի ժամկետով՝ 2022 թվականի նոյեմբերի 4- ից մինչև 2023 թվականի նոյեմբերի 4-ը զրկված լինելով տրանսպորտային միջոցներ վարելու իրավունքից, 2023 թվականի հունիսի 24-ին՝ ժամը 00:05-ի սահմաններում, Երևան քաղաքի Հ.Աճառյան փողոցում վարել է <<Օպել>> մակնիշի 37 GM 911 հաշվառման համարանիշի տրանսպորտային միջոցը, որի առթիվ կազմվել է վարչական իրավախախտման վերաբերյալ արձանագրություն։
Այսինքն՝ Արմեն Ալբերտի Վարդանյանը կատարել է հանցավոր արարք՝ նախատեսված ՀՀ քրեական օրենսգրքի 344-րդ հոդվածի 1-ին մասով։
2025 թվականի մայիսի 31-ի ՀՀ քննչական կոմիտեի զինվորական քննչական գլխավոր վարչության չորրորդ կայազորային քննչական բաժնի ՀԿԳ քննիչ Ա.Աղաբեկյանի որոշմամբ Արմեն Ալբերտի Վարդանյանի նկատմամբ որպես խափանման միջոց է կիրառվել բացակայելու արգելքը:
2025 թվականի հունիսի 6-ին թիվ 60105924 քրեական գործը մեղադրական եզրակացությամբ ուղարկվել է Երևան քաղաքի առաջին ատյանի ընդհանուր իրավասության քրեական դատարան:
Ապացույցների հետազոտումը և գնահատումը.
Հիմնական դատալսումների ընթացքում մեղադրյալ Արմեն Ալբերտի Վարդանյանը, օգտվելով իր քրեադատավարական իրավունքից, հրաժարվել է ցուցմունք տալուց:
2025 թվականի մայիսի 31-ի մեղադրյալի հարցաքննության արձանագրության համաձայն. <<Մեղադրյալ Արմեն Վարդանյանը հայտնել է, որ ՀՀ քրեական օրենսգրքի 344-րդ հոդվածի 1-ին մասի հատկանիշներով ներկայացված մեղադրանքում իրեն լիովին մեղավոր է ճանաչում:
Հարց - ինչ է տեղի ունեցել 2023 թվականի հունիսի 24-ին՝ ժամը 00:05-ի սահմաններում, երբվանից եք ծառայում ԶՈՒ-ում, ներկայումս որտեղ եք ծառայում և ինչ պաշտոն եք զբաղեցնում:
Պատասխան - 2012 թվականից ծառայում եմ զինված ուժերում՝ ՀՀ ՊՆ 43775 զորամասում, որտեղ զբաղեցնում եմ 1-ին զենիթահրթիռային դիվիզիոնի պահպանության ջոկի հրաձիգի պաշտոնը, որը զբաղեցնում եմ 2022 թվականի նոյեմբեր ամսից, կոչումով շարքային պայմանագրային եմ: 2023 թվականի հունիսի 24-ին՝ ժամը 00:05-ի սահմաններում զրկված լինելով տրանսպորտային միջոցներ վարելու՝ շահագործելու իրավունքից առանց վարորդական վկայականի վարել եմ ինձ պատկանող <<Օպել աստրա ջի>> մակնիշի 37 GM 911 հաշվառման համարանիշի ավտոմեքենան։ 2022 թվականից իմ հիշելով՝ հոկտեմբեր ամսին ալկոհոլ օգտագործած լինելով վարել եմ <<Օպել աստրա ջի>> մակնիշի ավտոմեքենան, ինչի պատճառով նույն օրը զրկել են վարորդական իրավունքի վկայականից:
Հարց - կարող եք նշել, թե ինչն է հանդիսացել պատճառ, որ Դուք 2023 թվականի հունիսի 24-ին՝ ժամը 00:05-ի սահմաններում զրկված լինելով տրանսպորտային միջոցներ վարելու՝ շահագործելու իրավունքից, առանց վարորդական վկայականի վարել եք փաստացի Ձեզ պատկանող <<Օպել աստրա ջի>> մակնիշի 37 GM 911 հաշվառման համարանիշի ավտոմեքենան: Ինչ կարող եք ասել վերոնշյալի մասին, մասնավորապես՝ Դուք գիտակցել եք, որ նման քայլի դիմելով կարող եք ենթարկվել քրեական պատասխանատվության:
Պատասխան - 2023 թվականի հունիսի 24-ին՝ ժամը 00:05-ի սահմաններում ցանկացել եմ խիստ անձնական հարցերով Երևան քաղաքից վարելով գնալ Պտղնի գյուղ, այլ անձ չի եղել, որ ավտոմեքենաս վարի, ինչի արդյունքում, գիտակցելով, որ իրավունք չունեմ ավտոմեքենա վարել, քանի որ 2022 թվականի իմ հիշելով՝ հոկտեմբեր ամսին ալկոհոլ օգտագործած լինելով վարել եմ <<Օպել աստրա ջի>> մակնիշի ավտոմեքենան, ինչի պատճառով նույն օրը զրկել են վարորդական իրավունքի վկայականից: Տեղյակ եմ եղել, որ զրկված եմ տրանսպորտային միջոցներ վարելու՝ շահագործելու իրավունքից, սակայն դա հաշվի չառնելով 2023 թվականի հունիսի 24-ին՝ ժամը 00:05-ի սահմաններում Երևան քաղաքի Աճառյան փողոցում վարել եմ ինձ պատկանող <<Օպել աստրա ջի>> մակնիշի 37 GM 911 հաշվառման համարանիշի ավտոմեքենան, որն էլ նույն փողոցում կանգեցրել են պարեկային ծառայության աշխատակիցները, ինչի վերաբերյալ կազմվել է համապատասխան արձանագրություն: Նշված ավտոմեքենան վարելու ժամանակ գտնվել եմ միայնակ: Ավտոմեքենայում ոչ ոք ինձնից բացի չի եղել և գիտակցել եմ, որ վերոնշյալ քայլին դիմելով՝ կարող եմ ենթարկվել քրեական պատասխանատվության, սակայն այդ ժամանակ հետևանքների լրջության մասին չեմ մտածել, իսկ ներկայումս հասկացել եմ, որ սխալ բան եմ արել, զղջացել եմ կատարածի համար, խնդրում եմ իմ նկատմամբ մեղմ վերաբերվել>>:
2025 թվականի ապրիլի 14-ի զննում կատարելու մասին արձանագրության համաձայն՝ զննությամբ պարզվել է, որ ՀՀ ոստիկանության պարեկային ծառայության 2023 թվականի հունիսի 24-ին կազմված թիվ 8180255530 վարչական իրավախախտման վերաբերյալ արձանագրության զննությամբ պարզվել է, որ ոստիկանության պարեկային ծառայության Երևանի գնդի 1-ին գումարտակի 2-րդ վաշտի պարեկ, Ազատ Սարգիսի աչատրյանը (08615) 2023 թվականի հունիսի 24-ին՝ ժամը 00:45-ին կազմել է արձանագրություն այն մասին, որ քաղաքացի Արմեն Ալբերտի Վարդանյանը (ծնված՝ 1978 թվականի մայիսի 20-ին, բնակվող՝ Երևան քաղաքի Վարդաշեն 6-րդ փողոց 23-րդ տուն հասցեում) տրանսպորտային միջոցներ վարելու իրավունքից զրկված լինելով ժամը 00:05-ին Երևան քաղաքի Հ.Աճառյան փողոցում վարել է <<Օպել>> մակնիշի 37 GM 911 հաշվառման համարանիշի տրանսպորտային միջոցը: Վարչական իրավախախտում կատարած անձի բացատրությունը, դիտողությունը, ստորագրությունը բաժնում առկա է իրավունքների և պարտականությունների մասին քաղվածքի և խախտման քննարկման վայրի ու ժամանակի վերբերյալ ծանուցման բաժնում առկա է ստորագրություն։ Խախտման ծածկագիրն է՝ 201.1:
Ճանապարհային ոստիկանության էլեկտրոնային ռեգիստրի տվյալների զննությամբ պարզվել է, որ վարորդական վկայականի տվյալներ բաժնում առկա է B(23-10-2003), C (23-10-2003), վարորդական վկայականի կարգերը: Կարգավիճակը՝ զրկված, թողարկված՝ 2016 թվականի փետրվարի 3-ին: Զրկումներ՝ սկիզբը՝ 2022 թվականի նոյեմբերի 4, ավարտ՝ 2023 թվականի նոյեմբերի 4:
Զննմամբ քննությանը հետաքրքրող այլ տվյալներ չեն հայտնաբերվել:
2025 թվականի ապրիլի 14-ի արտավարութային փաստաթուղթ ճանաչելու մասին որոշման համաձայն՝ քրեական վարույթի նյութերում առկա ՀՀ ոստիկանության պարեկային ծառայության 2023 թվականի հունիսի 24-ին կազմված թիվ 8180255530 վարչական իրավախախտման վերաբերյալ արձանագրությունը, ճանապարհային ոստիկանության էլեկտրոնային ռեգիստրի տվյալներն արտավարութային փաստաթուղթ են ճանաչվել և կցվել սույն քրեական վարույթին:
2025 թվականի մայիսի 27-ի զննում կատարելու մասին արձանագրության համաձայն՝ զննման ընթացքում ուսումնասիրվել են քրեական վարույթի 2-րդ թերթում առկա 2023 թվականի հունիսի 30-ին ՀՀ ՆԳՆ ոստիկանության ՊԾ Երևան քղաքի գնդի հրամանատարին հասցեագրված զեկուցագիրը, համաձայն որի՝ ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտի պարեկ՝ Ազատ Խաչատրյանը, Արմեն Ալբերտի Վարդանյանի նկատմամբ 2023 թվականի հունիսի 24-ին՝ ժամը 00:45-ի կազմվել է թիվ 8180255590 արձանագրություն, քանի որ վերջինը 2023 թվականի հունիսի 24-ին՝ ժամը 00:05-ին, Երևան քաղաքի Աճառյան փողոցում <<ՕՊԵԼ>> մակնիշի 37 GM 911 հաշվառման համարանիշի տրանսպորտային միջոցը վարել է տրանսպորտային միջոցներ վարելու իրավունքից զրկված, ինչի համար վերջինը ՀՀ ՆԳՆ ոստիկանության ՃՈ ՊԾ 2-րդ գումարտակի, 1-ին վաշտի, 1-ին դասակի ծառայողի կողմից կայացված ԱՆ 037835 որոշմամբ՝ մեկ տարի ժամկետով: 5-7 թերթերում առկա <<Մալբրի>> համակարգից արտատպված Արմեն Ալբերտի Վարդանյանի վերաբերյալ տեղեկատվությունը, համաձայն որի՝ Արմեն Ալբերտի Վարդանյանը վարչական իրավախախտման վերաբերյալ թիվ ԱՆ 037835 որոշմամբ 2022 թվականի նոյեմբերի 4-ին զրկվել է տրանսպորտային միջոցներ վարելու RB169741 վարորդական իրավունքի վկայականից <<Օպել>> մակնիշի 35 FQ 763 hաշվառման hամարանիշի ավոտմեքենան ոչ սթափ վիճակում վարելու համար, որն անբողոքարկելի է դարձել 2022 թվականի դեկտեմբերի 4-ին: 41-50 թերթերում առկա ԿԴ/0308/01/23 դատական գործով 2024 թվականի հունվարի 4-ի դատավճիռը, որի համաձայն՝ Արմեն Ալբերտի Վարդանյանին մեղադրանք է առաջադրվել այն բանի համար, որ 2023 թվականի հունիսի 9-ին՝ ժամը 15:10-ի սահմաններում, Երևան-Սևան ավտոճանապարհի 45 կմ հատվածում ծառայություն իրականացնելիս, ՀՀ ՆԳՆ ոստիկանության պարեկային ծառայության Կոտայքի մարզի գումարտակի աշխատակիցների կողմից կանգնեցվել է <<Օպել>> մակնիշի 37 GM 911 հաշվառման համարանիշի ավտոմեքենան, որի ընթացքում պարզվել է, որ հիշյալ տրանսպորտային միջոցի վարորդ Արմեն Ալբերտի Վարդանյանն օրենքով սահմանված կարգով՝ վարչական իրավախախտման վերաբերյալ թիվ ԱՆ 037835 որոշման հիման վրա, զրկվել է տրանսպորտային միջոցներ վարելու իրավունքից 2022 թվականի նոյեմբերի 4-ից մինչև 2023 թվականի նոյեմբերի 4-ը, ինչի մասին վերջինը պատշաճ ծանուցված լինելով վարել է հիշյալ տրանսպորտային միջոցը: Պատիժ է նշանակվել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամ չափով:
2025 թվականի մայիսի 27-ի արտավարութային փաստաթուղթ ճանաչելու մասին որոշման համաձայն՝ 2023 թվականի հունիսի 30-ին ՀՀ ՆԳՆ ոստիկանության պարեկային ծառայության Երևան քաղաքի գնդի հրամանատարին հասցեագրված զեկուցագիրը, Արմեն Ալբերտի Վարդանյանի վերաբերյալ <<Մալբրի>> համակարգից արտատպված տեղեկատվությունը, ԿԴ/0308/01/23 դատական գործով 2024 թվականի հունվարի 4-ի դատավճիռն արտավարութային փաստաթուղթ են ճանաչվել և կցվել սույն քրեական վարույթին:
ՀՀ ՆԳՆ ոստիկանության ինֆորմացիոն կենտրոնի պահանջագրի համաձայն՝ Արմեն Վարդանյանը Կոտայքի մարզի առաջին ատյանի ընդհանուր իրավասության դատարանի 2023 թվականի նոյեմբերի 8-ի դատավճռով ՀՀ քրեական օրենսգրքի 344-րդ հոդվածի 1-ին մասով դատապարտվել է տուգանքի՝ 375.000 ՀՀ դրամի չափով: Այնուհետև՝ Երևան քաղաքի առաջին ատյանի ընդհանուր իրավասության քրեական դատարանի 2025 թվականի հունիսի 11-ի թիվ ԵԴ1/0031/13/25 որոշմամբ նշանակված 375.000 ՀՀ դրամի չափով տուգանքը փոխարինվել է 120 (հարյուր քսան) ժամ հանրային աշխատանքներով:
Դատարանի իրավական վերլուծությունները.
ՀՀ վճռաբեկ դատարանը 2013 թվականի մայիսի 8-ի թիվ ԵԿԴ/0168/01/12 որոշմամբ դիրքորոշում է հայտնել, որ ապացույցների գնահատումը կատարվում է ներքին համոզման հիման վրա: Ներքին համոզմունքը, որպես ապացույցների գնահատման արդյունք, բնութագրվում է օբյեկտիվ և սուբյեկտիվ գործոնների անխզելի կապով. այն, մի կողմից, պետք է բխի հետազոտվող ապացույցների բավարար համակցությունից և հիմնվի դրանց վրա, իսկ մյուս կողմից, անկողմնակալ դիտորդի մոտ պետք է առաջացնի այն վստահությունը, որ ապացույցները հետազոտվել են արդարության բոլոր պահանջների պահպանմամբ:
Հանցանք կատարելու մեջ անձի մեղավորությունը հաստատելիս ապացույցների բավարարությունը որոշելու հարցին ՀՀ վճռաբեկ դատարանն անդրադարձել է Արարատ Ավագյանի և Վահան Սահակյանի վերաբերյալ գործով 2014 թվականի հոկտեմբերի 31-ի թիվ ԵԿԴ/0252/01/13 որոշմամբ: Մասնավորապես` իրացնելով օրենքի միատեսակ կիրառությունն ապահովելու իր սահմանադրական գործառույթը` Վճռաբեկ դատարանը հիշատակված դատական ակտում նախադեպային նշանակության իրավական դիրքորոշումներ է արտահայտել առ այն, որ գործի լուծման համար բավարար ապացույցներ ասելով` պետք է հասկանալ թույլատրելի, վերաբերելի և արժանահավատ ապացույցների համակցություն, որը, հաղթահարելով անմեղության կանխավարկածը, անաչառ դիտորդի մոտ կձևավորի հիմնավոր կասկածից վեր համոզվածություն անձի մեղավորության վերաբերյալ, ինչպես նաև կհաստատի գործով ապացուցման առարկան կազմող մյուս հանգամանքները և հնարավորություն կտա կայացնել հիմնավորված և պատճառաբանված որոշում: Ապացույցների բավարարությունը չի կարող որոշվել թվաբանական ցուցանիշով: Ակնհայտ է, որ ապացույցները բավարար չեն, եթե`
1) գործում բացակայում է որևէ ապացույց գործի ճիշտ լուծման համար նշանակություն ունեցող որևէ հանգամանքի պարզման համար,
2) եղած ապացույցը թույլ չի տալիս պարզել այդ հանգամանքն անհրաժեշտ խորությամբ և լրիվությամբ,
3) այդ հանգամանքի ապացուցվածությունը կասկած է հարուցում (...):
Արդյունքում՝ Վճռաբեկ դատարանն արձանագրել է, որ քրեական դատավարությունում մեղքի հարցը լուծելիս որպես ապացույցների բավարարության շեմ պետք է գործի <<հիմնավոր կասկածից վեր>> ապացուցողական չափանիշը: Ընդ որում` <<հիմնավոր կասկածից վեր>> ապացուցողական չափանիշ ասելով պետք է հասկանալ փաստական տվյալների (ապացույցների) այնպիսի համակցություն, որը բացառում է հակառակի ողջամիտ հավանականությունը: Վերոգրյալը չի նշանակում, որ հանցանք գործելու մեջ անձի մեղավորությունն ընդհանրապես չի կարող առաջացնել որևէ կասկած, սակայն այդպիսի կասկածի հավանականության դեպքում դրա աստիճանը պետք է լինի աննշան (խիստ ցածր): Այլ խոսքով` մեղադրանքը կազմող յուրաքանչյուր փաստական հանգամանք պետք է հիմնավորվի ապացույցների այնպիսի ծավալով, որը կբացառի դրա ապացուցվածության վերաբերյալ ցանկացած ողջամիտ կասկած (...):
Անդրադառնալով մեղադրյալ Արմեն Ալբերտի Վարդանյանի արարքում ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի առկայության կամ բացակայության հարցին՝ Դատարանը գտնում է, որ այն հիմնավոր կասկածից վեր ապացուցողական չափանիշով հաստատվում է սույն քրեական գործի շրջանակներում ձեռք բերված ապացույցներով, այլ կերպ ասած՝ ապացուցված է Արմեն Ալբերտի Վարդանյանի մեղավորությունը ՀՀ քրեական օրենսգրքի 344-րդ հոդվածի 1-ին մասով, նախատեսված հանցավոր արարքի կատարման մեջ:
Ընդ որում, Դատարանի համար առանցքային նշանակություն ունի նաև այն, որ սույն քրեական գործի շրջանակներում մեղադրյալ Արմեն Ալբերտի Վարդանյանն ամբողջովին ընդունում է մեղքը և զղջում է կատարվածի համար:
Դատարանը, ուսումնասիրելով Արմեն Ալբերտի Վարդանյանի պատասխանատվությունը և պատիժը մեղմացնող ու ծանրացնող հանգամանքները, վերասոցիալականացման և իրավահպատակ վարքագծի ձևավորման համար նշանակություն ունեցող տվյալները, հանգում է հետևյալ եզրահանգման.
Արմեն Ալբերտի Վարդանյանի քրեական պատասխանատվություն ու պատիժը մեղմացնող հանգամանք է մեղքն ընդունելը և կատարվածի համար զղջալը, ինչպես նաև որոշակի առողջական խնդիրների առկայությունը (այդ մասին Դատարանի աշխատակազմին հայտնել է նաև Պրոբացիայի ծառայության աշխատակիցը)։
Միևնույն ժամանակ, պետք է նկատել, որ Արմեն Ալբերտի Վարդանյանի պատասխանատվությունն ու պատիժը ծանրացնող հանգամանքներ առկա չեն:
Կատարված արարքի համար մեղադրյալ Արմեն Ալբերտի Վարդանյանը ենթակա է քրեական պատասխանատվության և պատժի։
ՀՀ վճռաբեկ դատարանը 2010 թվականի օգոստոսի 27-ի թիվ ՍԴ/0293/01/09 որոշմամբ դիրքորոշում է հայտնել, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձը բնութագրող տվյալները և, քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ է և բավարար է այդ անձին ուղղելու և նրա կողմից նոր հանցանքի կատարումը կանխելու համար: Պատժի տեսակի և չափի որոշման ժամանակ դատարանը պետք է հաշվի առնի կատարված հանցագործության՝ հանրության համար վտանգավորության աստիճանն ու բնույթը, հանցավորի անձը բնութագրող տվյալները, այդ թվում՝ նրա պատասխանատվությունը մեղմացնող և (կամ) ծանրացնող հանգամանքները:
Դատարանը, հաշվի առնելով Արմեն Ալբերտի Վարդանյանի կատարած արարքի՝ հանրության համար վտանգավորության աստիճանն ու բնույթը, այդ թվում՝ նրա գործողությունների վտանգավորության աստիճանը, մասնավորապես՝ վերջինին մեղսագրվող արարքի ոչ մեծ ծանրության լինելը, ինչպես նաև պատասխանատվությունն ու պատիժը մեղմացնող հանգամանքների առկայությունը, ծանրացնող հանգամանքների բացակայությունը, ինչպես նաև այն, որ մեղադրյալի կատարած արարքի համար ՀՀ քրեական օրենսգրքի համապատասխան հոդվածի սանկցիայով նախատեսված է պատիժ նաև հանրային աշխատանքների ձևով, իսկ ՀՀ քրեական օրենսգրքի 69-րդ հոդվածի 3-րդ մասի կարգավորմամբ՝ ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները, գտնում է, որ Արմեն Ալբերտի Վարդանյանի նկատմամբ ՀՀ քրեական օրենսգրքի 344-րդ հոդված 1-ին մասով՝ պատիժ պետք է նշանակել հանրային աշխատանքներ՝ 60 (վաթսուն) ժամ տևողությամբ:
Ընդ որում, պատժի տեսակն ընտրելիս Դատարանի կողմից կարևորվում է նաև դատական նիստի ընթացքում մեղադրյալ Արմեն Վարդանյանի հայտարարությունը, ըստ որի՝ չի կարող տուգանքի գումար վճարել, հետևաբար՝ համաձայն է, որ իր նկատմամբ նշանակվի հանրային աշխատանքներ պատժատեսակը:
ՀՀ քրեական օրենսգրքի 74-րդ հոդվածով սահմանված պատիժները գումարելու կանոնի կիրառմամբ՝ նշանածված 60 (վաթսուն) ժամ տևողությամբ հանրային աշխատանքներին պետք է գումարել Երևան քաղաքի առաջին ատյանի ընդհանուր իրավասության քրեական դատարանի 2025 թվականի հունիսի 11-ի թիվ ԵԴ1/0031/13/25 որոշմամբ նշանակված հանրային աշխատանքների չկատարած մասը՝ 52 (հիսուներկու) ժամը և վերջնական պատիժ նշանակել հանրային աշխատանքներ՝ 112 (հարյուր տասներկու) ժամ տևողությամբ:
Անդրադառնալով դատապարտված մեղադրյալի նկատմամբ կիրառված խափանման միջոցի հարցին՝ Դատարանը գտնում է, որ Արմեն Ալբերտի Վարդանյանի նկատմամբ ընտրված բացակայելու արգելքը, պետք է թողնել անփոփոխ մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 167-րդ հոդվածի 1-ին մաuի 1-ին, 2-րդ և 4-7-րդ կետերով նախատեսված վարութային ծախսերը մեղադրյալ Արմեն Ալբերտի Վարդանյանից ենթակա չեն հատուցման, քանի որ նմանատիպ վարութային ծախսեր առկա չեն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 276-րդ, 342-րդ, 347-349-րդ, 353-րդ, 364-րդ հոդվածներով՝ Դատարանը


Վ Ճ Ռ Ե Ց

Արմեն Ալբերտի Վարդանյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով և պատիժ նշանակել տուգանք՝ հանրային աշխատանքներ՝ 60 (վաթսուն) ժամ տևողությամբ:
ՀՀ քրեական օրենսգրքի 74-րդ հոդվածով սահմանված պատիժները գումարելու կանոնի կիրառմամբ՝ նշանածված 60 (վաթսուն) ժամ տևողությամբ հանրային աշխատանքներին գումարել Երևան քաղաքի առաջին ատյանի ընդհանուր իրավասության քրեական դատարանի 2025 թվականի հունիսի 11-ի թիվ ԵԴ1/0031/13/25 որոշմամբ նշանակված հանրային աշխատանքների չկատարած մասը՝ 52 (հիսուներկու) ժամը և վերջնական պատիժ նշանակել հանրային աշխատանքներ՝ 112 (հարյուր տասներկու) ժամ տևողությամբ:
Արմեն Ալբերտի Վարդանյանի նկատմամբ կիրառված խափանման միջոց՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից մեկամսյա ժամկետում:

ԴԱՏԱՎՈՐ Ա.ՀՈՎՀԱՆՆԻՍՅԱՆ

 

ԵԴ1/2065/01/25

ՄԵՂԱԴՐԱԿԱՆ ՎԵՐԴԻԿՏ
26.08.2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)` նախագահող դատավոր Ա.Հովհաննիսյանի, քարտուղարությամբ Մ.Հովհաննիսյան, մասնակցությամբ՝ հանրային մեղադրող Ա.Բարսեղյան, մեղադրյալ Ա.Վարդանյան, քննարկելով մեղադրյալ Արմեն Ալբերտի Վարդանյանի մեղավորության կամ անմեղության հարցը՝ եկավ հետևյալ եզրահանգման.
վերոնշյալ փաստերի հիման վրա Դատարանը գալիս է այն եզրահանգման, որ Արմեն Ալբերտի Վարդանյանը, ՀՀ ոստիկանության պարեկային ծառայության թիվ ԱՆ037835 ակտով մեկ տարի ժամկետով՝ 2022 թվականի նոյեմբերի 4- ից մինչև 2023 թվականի նոյեմբերի 4-ը զրկված լինելով տրանսպորտային միջոցներ վարելու իրավունքից, 2023 թվականի հունիսի 24-ին՝ ժամը 00:05-ի սահմաններում, Երևան քաղաքի Հ.Աճարյան փողոցում վարել է <<Օպել>> մակնիշի 37 GM 911 հաշվառման համարանիշի տրանսպորտային միջոցը, որի առթիվ կազմվել է վարչական իրավախախտման վերաբերյալ արձանագրություն, որպիսի պայմաններում հիմնավոր կասկածից վեր ապացուցողական չափանիշով ապացուցված է՝
1) մեղադրյալ Արմեն Ալբերտի Վարդանյանին վերագրվող փաստական հանգամանքները (արարքը),
2) ՀՀ քրեական օրենսգրքի 344-րդ հոդվածի 1-ին մասով նախատեսված արարքի քրեական հակաիրավականությունը,
3) մեղադրյալ Արմեն Ալբերտի Վարդանյանի կողմից այդ արարքը կատարելը,
4) մեղադրյալ Արմեն Ալբերտի Վարդանյանի մեղավորությունը տվյալ արարքը կատարելու մեջ,

Հ Ե Տ Ե Վ Ա Պ Ե Ս
ապացուցած է Արմեն Ալբերտի Վարդանյանի մեղավորությունը ՀՀ քրեական օրենսգրքի 344-րդ հոդվածի 1-ին մասով նախատեսված հանցավոր արարքի կատարման մեջ:
ԴԱՏԱՎՈՐ Ա.ՀՈՎՀԱՆՆԻՍՅԱՆ