ԵԴ1/2033/01/25


ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ
ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«13» հոկտեմբերի 2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` նաև Դատարան)՝
նախագահությամբ դատավոր՝ Գ.ԱԲԵԼՅԱՆԻ
քարտուղարությամբ՝ Գ․ԳԱԼՍՏՅԱՆԻ
Ա․ՄԿՐՏՉՅԱՆԻ
Դ․ՀԱԽՆԱԶԱՐՅԱՆԻ
հանրային մեղադրող՝ Ն․ԲԱՐԵԿՅԱՆԻ
տուժողի լիազոր ներկայացուցիչ՝ Ա․ԲԱՂԴԱՍԱՐՅԱՆԻ
պաշտպան՝ Լ․ԱՎԵՏԻՍՅԱՆԻ
մեղադրյալ՝ Մ․ՍԱՐԳՍՅԱՆԻ
դռնբաց դատական նիստում` արագացված վարույթի կարգով, քննեց քրեական գործն ըստ մեղադրանքի`
Մխիթար Կորյունի Սարգսյանի՝ ծնված՝ 1996 թվականի հունիսի 10-ին, ազգությամբ հայ՝ ՀՀ քաղաքացի, միջնակարգ կրթությամբ, նախկինում չդատապարտված, չամուսնացած, չի աշխատում, բնակվող՝ Վարդան Աճեմյան 1-ին նրբանցք 8-րդ տուն հասցեում, մեղադրանք է ներկայացվել ՀՀ քրեական օրենսգրքի 452-րդ հոդվածի 2-րդ մասով և որպես խափանման միջոց է կիրառվել ՀՀ-ից բացակայելու արգելքը։

1․ Գործի դատավարական նախապատմությունը.
2024 թվականի հոկտեմբերի 15-ին, ՀՀ ՆԳՆ ոստիկանության ՊԾ Երևան քաղաքի գնդի 2-րդ գումարտակի 1-ին վաշտի պարեկ Մ․Հակոբյանը զեկուցագիր է ներկայացրել ՀՀ ՆԳՆ ոստիկանության Երևան քաղաքի վարչության Արաբկիր վարչական շրջանի Ռ․Ներսիսյանին, որի համաձայն՝ «(…) 2024 թվականի հոկտեմբերի 15-ին ժամը՝ 04:05-ից ծառայություն էին իրականացնում նույն վաշտի պարեկ ոստ. ավ. լ-նտ. Արթուր Հարությունյանի հետ 1055 պ/ա-ով Արաբկիր վարչական շրջանում։ Արձանագրություն կազմելու ժամանակ մի քաղաքացի մայթից վազելով, քարը ձեռքին մոտեցել է Երևան քաղաքի Կոմիտասի պողոտա-Վ.Վաղարշյան փողոցների խաչմերուկի մոտ կայանված պարեկների ծառայողական ավտոմեքենային և ձեռքի քարը նետեց ավտոմեքենայի ուղղությամբ վնասելով՝ ավտոմեքենայի բեռնախցիկը, կտուրը և բեռնախցիկի վրա գտնվող ապակին, որից հետո դիմել է փախուստի, վերջինիս սկսել են հետապնդել, ով Կոմիտաս փողոցի 16 հասցեի մոտ ընկել է՝ վերջինս իրեն պահում էր ոչ ադեկվատ հնչեցնելով վերացական բնույթի սեռական հայհոյանքներ և նշված անձին ժամը 04:10-ին պետական գույքի դիտավորյալ՝ վնասելու և խուլիգանություն՝ կատարելու հիմնավոր կասկածի հիման վրա ձերբակալել և տեղափոխել են ՀՀ ՆԳՆ ոստիկանության՝ Արաբկիրի բաժին։
Արթուր Հարությունյանը ձերբակալում կատարելու ժամանակ ընկել և վնասել է ձեռքը։
Բաժնում պարզվեց, որ նշված քաղաքացին հանդիսանում է Մխիթար Կորյունի Սարգսյանը (ծնված՝ 1996 թվականի հունիսի 10-ին, հաշվառման վայր չունի)։
Մ.Սարգսյանին ձերբակալելու ժամանակ կիրառվել է ձեռնամարտի հնարքներ, արցունքաբեր գազ և հատուկ միջոց՝ ձեռնաշղթա: (…)»:
2024 թվականի հոկտեմբերի 15-ին, ՀՀ ՆԳՆ ոստիկանության Երևան քաղաքի վարչության Արաբկիր վարչական շրջանի բաժնի պետ Ռ․Ներսիսյանը հաղորդում է ներկայացրել ՀՀ ՔԿ ԵՔՔՎ Արաբկիր վարչական շրջանի քննչական բաժնի պետ Հ․Պողոսյանին, որի համաձայն՝ «(…) [Ս]ույն թվականի հոկտեմբերի 15-ին՝ ՀՀ ՆԳՆ ոստիկանության պարեկային ծառայության 2-րդ գումարտակի 1-ին վաշտի պարեկ ավագ սերժանտ Մ. Հակոբյանը զեկուցագիր է ներկայացրել այն մասին, որ 2024 թվականի հոկտեմբերի 15-ին ժամը՝ 04:05-ից ծառայություն էին իրականացնում նույն վաշտի պարեկ ոստ. ավ. լ-նտ. Արթուր Հարությունյանի հետ 1055 պ/ա-ով Արաբկիր վարչական շրջանում։ Արձանագրություն կազմելու ժամանակ մի քաղաքացի մայթից վազելով, քարը ձեռքին մոտեցել է Երևան քաղաքի Կոմիտասի պողոտա-Վ.Վաղարշյան փողոցների խաչմերուկի մոտ կայանված պարեկների ծառայողական ավտոմեքենային և ձեռքի քարը նետեց ավտոմեքենայի ուղղությամբ վնասելով՝ ավտոմեքենայի բեռնախցիկը, կտուրը և բեռնախցիկի վրա գտնվող ապակին, որից հետո դիմել է փախուստի, վերջինիս սկսել են հետապնդել, ով Կոմիտաս փողոցի 16 հասցեի մոտ ընկել է՝ վերջինս իրեն պահում էր ոչ ադեկվատ հնչեցնելով վերացական բնույթի սռեկան հայհոյանքներ և նշված անձին ժամը 04:10-ին պետական գույքի դիտավորյալ՝ վնասելու և խուլիգանություն՝ կատարելու հիմնավոր կասկածի հիման վրա ձերբակալել և տեղափոխել են ՀՀ ՆԳՆ ոստիկանության՝ Արաբկիրի բաժին։ Բաժնում պարզվել է, որ նշված քաղաքացին հանդիսանում է Մխիթար Կորյունի Սարգսյանը (ծնված՝ 1996 թվականի հունիսի 10-ին, հաշվառման վայր չունի)։
Մ.Սարգսյանին ձերբակալելու ժամանակ կիրառվել է ձեռնամարտի հնարքներ, արցունքաբեր գազ և հատուկ միջոց՝ ձեռնաշղթա: (…)»:
Հաղորդման հիման վրա՝ 2024 թվականի հոկտեմբերի 15-ին ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում ՀՀ քրեական օրենսգրքի 264-րդ հոդվածի 2-րդ մասի 3-րդ և 5-րդ կետերի հատկանիշներով նախաձեռնվել է թիվ 14190824 քրեական վարույթը:
2024 թվականի հոկտեմբերի 15-ին, ժամը՝ 04։15-ին, Մխիթար Կորյունի Սարգսյանը՝ հանցանք կատարած լինելու անմիջականորեն ծագած հիմնավոր կասկածի առկայության հիմքով ձերբակալել է և նույն օրը ներկայացվել է վարույթն իրականացնող մարմնին։
2024 թվականի հոկտեմբերի 15-ին ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ․Սիմոնյանն որոշում է կայացրել թիվ 14190824 քրեական վարույթով Մխիթար Կորյունի Սարգսյանին՝ հանցանք կատարած լինելու անմիջականորեն ծագած հիմնավոր կասկածի առկայության հիմքով, ձերբակալելու վերաբերյալ։
2024 թվականի հոկտեմբերի 16-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության ավագ դատախազ Ա․Ալիխանյանի որոշմամբ՝ թիվ 14190824 քրեական վարույթով, Մխիթար Կորյունի Սարգսյանի նկատմամբ հանրային քրեական հետապնդում է հարուցվել ՀՀ քրեական օրենսգրքի 452-րդ հոդվածի 2-րդ մասով։
2024 թվականի հոկտեմբերի 17-ին ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ․Սիմոնյանը միջնորդություն է ներկայացրել Դատարան՝ Մխիթար Կորյունի Սարգսյանի նկատմամբ կալանքը որպես խափանման միջոց կիրառելու մասին, որը Դատարանի՝ նույն օրվա որոշմամբ, մերժվել է։
2024 թվականի հոկտեմբերի 17-ին Մխիթար Կորյունի Սարգսյանի նկատմամբ որպես խափանման միջոց է կիրառվել բացակայելու արգելքը:
2025 թվականի մարտի 6-ին ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ․Սիմոնյանը փոփոխություն է կատարել թիվ 14190824 քրեական վարույթը նախաձեռնելու մասին արձանագրության մեջ՝ վարույթին իրավական գնահատական տալով ՀՀ քրեական օրենսգրքի 452-րդ հոդվածի 2-րդ մասով։
2025 թվականի մարտի 6-ին, ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ․Սիմոնյանը միջնորդություն է ներկայացրել հսկող դատախազին՝ Մխիթար Կորյունի Սարգսյանի նկատմամբ հարուցված հանրային քրեական հետապնդման ժամկետը կասեցնելու վերաբերյալ։
2025 թվականի մարտի 7-ին հսկող դատախազ Ն․Բարեկյանն որոշում է կայացրել թիվ 14190824 քրեական վարույթով Մխիթար Կորյունի Սարգսյանի նկատմամբ հարուցված հանրայի քրեական հետապնդման ժամկետը՝ 2 (երկու) ամիս ժամկետով կասեցնելու մասին։
2025 թվականի մայիսի 6-ին, ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ․Սիմոնյանը միջնորդություն է ներկայացրել հսկող դատախազին՝ Մխիթար Կորյունի Սարգսյանի նկատմամբ հարուցված հանրային քրեական հետապնդման ժամկետը կասեցնելու վերաբերյալ։
2025 թվականի մայիսի 7-ին հսկող դատախազ Ն․Բարեկյանն որոշում է կայացրել թիվ 14190824 քրեական վարույթով Մխիթար Կորյունի Սարգսյանի նկատմամբ հարուցված հանրայի քրեական հետապնդման ժամկետը՝ 2 (երկու) ամիս ժամկետով կասեցնելու մասին։
ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ․Սիմոնյանը միջնորդություն է ներկայացրել հսկող դատախազին՝ Մխիթար Կորյունի Սարգսյանի նկատմամբ հարուցված հանրային քրեական կասեցված ժամկետը վերսկսելու վերաբերյալ։
2025 թվականի հունիսի 7-ին հսկող դատախազ Ն․Բարեկյանն որոշում է կայացրել թիվ 14190824 քրեական վարույթով Մխիթար Կորյունի Սարգսյանի նկատմամբ հարուցված հանրային քրեական հետապնդման կասեցված ժամկետը վերսկսելու մասին։
2025 թվականի հունիսի 7-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Ն․Բարեկյանի որոշմամբ՝ թիվ 14190824 քրեական վարույթով, Մխիթար Կորյունի Սարգսյանի նկատմամբ հանրային նոր քրեական հետապնդում է հարուցվել ՀՀ քրեական օրենսգրքի 452-րդ հոդվածի 2-րդ մասով։
2025 թվականի հունիսի 10-ին, ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ․Սիմոնյանը որոշմամբ՝ ՀՀ ՆԳՆ ոստիկանությունը ճանաչվել է տուժող։
2025 թվականի հունիսի 10-ին, ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ․Սիմոնյանի որոշմամբ՝ Արթուր Բաղդասարյանը ճանաչվել է տուժող ՀՀ ՆԳՆ ոստիկանության լիազոր ներկայացուցիչ։
2025 թվականի հունիսի 11-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազությունից Դատարան է ստացվել թիվ ԵԴ1/2033/01/25 (նախաքննական համարը՝ 14190824) քրեական գործն ըստ մեղադրանքի Մխիթար Կորյունի Սարգսյանի՝ ՀՀ քրեական օրենսգրքի 452-րդ հոդվածի 2-րդ մասով։
Նույն օրը քրեական գործն էլեկտրոնային եղանակով մակագրվել, իսկ 2025 թվականի հունիսի 12-ին հանձնվել է Դատարանի դատավոր Գ․Աբելյանի աշխատակազմին։
2025 թվականի հունիսի 13-ին՝ Դատարանի դատավոր Գ․Աբելյանի կողմից որոշում է կայացվել թիվ ԵԴ1/2033/01/25 քրեական գործով վարույթը ստանձնելու և նախնական դատալսումներ նշանակելու մասին։
Նախնական դատալսումների ընթացքում՝ հանրային մեղադրող Ն․Բարեկյանը ներկայացրել է գույքային հայց՝ խնդրելով Մխիթար Կորյունի Սարգսյանից հօգուտ ՀՀ-ի բռնագանձել 297,000 ՀՀ դրամ, որպես հանցագործությամբ ուղղակիորեն պատճառված վնասի հատուցում։
Դատարանի 2025 թվականի սեպտեմբերի 10-ի որոշմամբ՝ Մխիթար Կորյունի Սարգսյանը ճանաչվել է գույքային պատասխանող։

2. Մեղադրանքի փաստական նկարագրությունը.
Մխիթար Կորյունի Սարգսյանին մեղադրանք է ներկայացվել ՀՀ քրեական օրենսգրքի 452-րդ հոդվածի 2-րդ մասով՝ այն բանի համար, որ. «(…) [Նա], 2024 թվականի հոկտեմբերի 15-ին՝ ժամը 04:05-ի սահմաններում ՀՀ ՆԳՆ ոստիկանության պարեկային ծառայության աշխատակիցների օրինական ծառայողական գործունեությանը միջամտելու նպատակով քարով հարվածել է Երևան քաղաքի Կոմիտասի պողոտա Վ.Վաղարշյան խաչմերուկի մոտ կայանված վերջիններիս ծառայողական՝ «SKODA OCTAVIA 1.4TSI» 42 683CA61 պետհամարանիշի տրանսպորտային միջոցին, պատճառելով 297.000 ՀՀ դրամի գույքային վնաս:
Այսպես.
Մխիթար Սարգսյանը, 2024 թվականի հոկտեմբերի 15-ին՝ ժամը 04:05-ի սահմաններում ՀՀ ՆԳՆ ոստիկանության պարեկային ծառայության աշխատակիցներ Մկրտիչ Վարդանի Հակոբյանի և Արթուր Ռաֆիկի Հարությունյանի օրինական ծառայողական գործունեությանը, այն է՝ Ստեփան Արտյոմի Ղազարյանի նկատմամբ վարչական իրավախախտման վերաբերյալ արձանագրություն կազմելուն միջամտելու նպատակով, ուղղակի դիտավորությամբ քարով հարվածել է Երևան քաղաքի Կոմիտասի պողոտա Վ. Վաղարշյան խաչմերուկի մոտ կայանված Մկրտիչ Հակոբյանի և Արթուր Հարությունյանի ծառայողական՝ «SKODA OCTAVIA 1.4TSI» մակնիշի 683CA61 պետհամարանիշի տրանսպորտային միջոցին, ինչի արդյունքում կոտրվել է դրա հետևի հողմապակին, վնասվել է տանիքի վահանակը և բեռնախցիկի ծածկոցը՝ պատճառելով ընդհանուր 297.000 ՀՀ դրամի գույքային վնաս:
Արդյունքում, ՆԳՆ ոստիկանության պարեկային ծառայության աշխատակիցներ Մկրտիչ Վարդանի Հակոբյանը և Արթուր Ռաֆիկի Հարությունյանը ավարտին չեն հասցրել Ստեփան Արտյոմի Ղազարյանի նկատմամբ վարչական իրավախախտման վերաբերյալ արձանագրություն կազմելը։
Այսպիսով՝ Մխիթար Կորյունի Սարգսյանին մեղսագրվում է ՀՀ քրեական օրենսգրքի 452-րդ հոդվածի 2-րդ մասով նախատեսված հանցանքի կատարում: (…)»։

3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում մեղադրյալ Մխիթար Կորյունի Սարգսյանը ներկայացրեց արագացված վարույթ կիրառելու մասին միջնորդություն՝ հայտնելով, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Հանրային մեղադրող Ն․Բարեկյանը և տուժողի լիազոր ներկայացուցիչ Ա․Բաղդասարյանը չեն առարկել արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-ին հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1-ին հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
- 2024 թվականի հոկտեմբերի 15-ին` ժամը 04:15-ին, պետական գույքի դիտավորյալ վնասում և խուլիգանություն կատարելու անմիջականորեն ծագած հիմնավոր կասկածի առկայության հիմքով, ՀՀ ՆԳՆ ոստիկանության ՊԾ Երևան քաղաքի գնդի 2-րդ գումարտակի 1-ին վաշտի ծառայողների կողմից Մխիթար Կորյունի Սարգսյանին ձերբակալելու մասին արձանագրությունը , որի համաձայն՝ վերջինս նույն օրը, ժամը՝ 04։15-ին ձերբակալվել է։
- ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանի՝ 2024 թվականի հոկտեմբերի 15-ի ձև 8 տեղեկանքը , համաձայն որի`
«(…) 1. ՍԱՐԳՍՅԱՆ ՄԽԻԹԱՐ ԿՈՐՅՈՒՆԻ
Ծննդյան ամսաթիվը` 10/06/1996, Ծննդավայրը` ԵՐԵՎԱՆ ՆՈՐ ՆՈՐՔ
Համարը` 17951017
1) Նախաքննության վերաբերյալ տեղեկատվություն
Նախաձեռնող մարմինը` ՆՈՐ ՆՈՐՔԻ ՔՆՆՉ/Բ,ամս՝ 18/12/2017
Մեղադրական հոդված՝ ՀՀ ՔՐ.ՕՐ. (2003Թ.) h 118
ՆՅՈՒԹԸ ՄԵՐԺՎԱԾ է ամս՝ 18/12/2017 հիմք` 35 Հ. 1 Մ. 4 Կ. (…)»։
- «ALCOVISOR - JUPITER XVRP» տեսակի ալկոտեստերի միջոցով սթափության վերաբերյալ կազմված թիվ 91101122 արձանագրությունը , որի համաձայն՝ Մխիթար Կորյունի Սարգսյանը գտնվել է ոչ սթափ վիճակում (ալկոհոլի պարունակությունը օրգանիզմում՝ 0․403 mg/L),
- ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ․Սիմոնյանի կողմից Մխիթար Կորյունի Սարգսյանին անմիջականորեն ծագած հիմնավոր կասկածի առկայության հիմքով ձերբակալելու մասին որոշումը , որի համաձայն՝ վերջինս նույն օրը ժամը՝ 07։30-ին ձերբակալվել է,
- 2024 թվականի հոկտեմբերի 17-ին մեղադրյալի հարցաքննության արձանագրությունը, համաձայն որի՝ Մխիթար Կորյունի Սարգսյանը, ընդունել է իրեն առաջադրված մեղադրանքը և զղջացել կատարածի համար ,
- Դատարանի՝ 2024 թվականի հոկտեմբերի 17-ի որոշումը , որի համաձայն՝ մեղադրյալ Մխիթար Կորյունի Սարգսյանի նկատմամբ կալանքը որպես խափանման միջոց ընտրելու վերաբերյալ քննիչի միջնորդությունը մերժվել է,
- 2023 թվականի հուլիսի 26-ի՝ ՀՀ ԱՆ «Ավան» հոգեկան առողջության կենտրոն ՓԲ ընկերության կողմից տրված գրությունը , որի համաձայն՝ Մխիթար Կորյունի Սարգսյանը 2021 թվականի ապրիլի 28-ից հաշվառված է ԱՆ «Ավան» հոգեկան առողջության կենտրոն ՓԲ ընկերությունում «Սուր պոլիմորֆ փսիխոտիկ խանգարում (F 23.1) ախտորոշմամբ»,
- 2024 թվականի դեկտեմբերի 18-ի՝ ՀՀ ԱՆ «Կախվածությունների բուժման ազգային կենտրոն» ՓԲ ընկերության կողմից տրված գրությունը , որի համաձայն՝ Մխիթար Կորյունի Սարգսյանը նշված ընկերությունում հաշվառված չէ,
- Փորձագետի թիվ Հմ 24-3248 եզրակացությունը , որի «Հետևություններ» բաժնի համաձայն՝ «(…) 1,2,3,4,5,6,7,8՝ ներկայացված բժշկական փաստաթղթերի տվյալները և սույն փորձաքննության իրականացման շրջանակներում կատարված հետազոտությունների արդյունքները հիմք են տալիս եզրակացնել, որ Մխիթար Կորյունի Սարգսյանը՝ խրոնիկական հոգեկան հիվանդությամբ չի տառապել, այլ նա տարել է՝ «Սուր պոլիմորֆ փսիխոտիկ խանգարում» F23 ախտորոշմամբ հոգեկան գործունեության ռեակտիվ բնույթի ժամանակավոր փսիխոտիկ մակարդակի հիվանդագին խանգարված վիճակ 2021 թվականին։ Այդ մասին վկայում են անամնեստիկ տեղեկությունները նրա մոտ 2021 թվականի ապրիլ ամսին թիվ 960 հիվանդության պատմագրում նկարագրված պերսեկուտոր բնույթի (վերաբերման, հետապնդման, հատուկ նշանակության) զառանցական մտքերի առկայությունը, սուր պարանոիդ համախտանիշը, որոնք բերել էին՝ 2021 թվականին անկառավարելի ագրեսիայի բռնկումների, քննադատական և պրոգնոստիկ կարողությունների կոպիտ խանգարումների, որոնց կապակցությամբ նա 07.04-28.04.2021 թվականին ստացիոնար բուժման մեջ է գտնվել «Ավան» ՀԱԿ ՓԲԸ-ում, ինչը նաև հաստատվում է ներկա հետազոտության ժամանակ փորձաքննվողի կողմից հայտնած տեղեկություններով: Նրա մոտ տարած փսիխոտիկ խանգարումից դուրս ընկած ժամանակահատվածում հայտնաբերվում են բնավորության որոշ գծերի շեշտվածություն, արտահայտվածություն, որը հայտնաբերվում է ներկա հետազոտության արդյունքում կլինիկոանամնեստիկ հետազոտություններով: Անձնային գծերը՝ զգայունությունը, պոռթկունությունը, ցուցադրականությունը, բծախնդրությունը, կասկածամտության հակվածությունը, զգուշավորությունը՝ արտահայտիչ են, փոքր-ինչ սրված, սակայն չեն կրում ստաբիլ և տոտալ բնույթ, չեն ընդգրկում բոլոր հոգեկան ոլորտները արդիականանում են անբարենպաստ հոգեբանական պայմաններում և միջավայրում, երբ խոցվում են վերոնշված գծերը, տոտալ չեն՝ չեն գրավում անձի ամբողջ կառուցվածքը: Հարկ է նշել, որ Մ.Սարգսյանի մոտ հայտնաբերված բնավորության գծերի շեշտվածությունը, հանդիսանում է նորմայի տարատեսակ և իր մեջ ներառում է իրավիճակային ռեակցիաների հակվածություն, որն մասնավորապես կարող է դրսևորվել անբարենպաստ հոգեբանական (հոգեծին) իրավիճակներում, երբ խոցվում են վերոնշյալ գծերը։ Որպես հոգեկան հիվանդությամբ չտառապող անձ, նա իրեն մեղսագրվող արարքի կատարման ժամանակահատվածում կարող էր իրեն հաշիվ տալ իր գործողությունների համար և ղեկավարել դրանք, ուստի Մ.Սարգսյանին հարկավոր է կատարածի համար ճանաչել ՄԵՂՍՈՒՆԱԿ: Քանի որ, Մ. Սարգսյանը չի տառապում հոգեկան հիվանդությամբ, ուստի և բժշկական բնույթի հարկադրանքի միջոցների կարիք չունի: Մ.Սարգսյանը իր հոգեկան վիճակով պայմանավորված ինչպես արարքի պահին, այնպես էլ ներկայում կարող էր և կարող է ճիշտ ընկալել քրեական վարույթի համար կարևոր նշանակություն ունեցող հանգամանքները, դրանք ճիշտ վերարտադրել և տալ ճշմարիտ ցուցմունքներ։ Մ.Սարգսյանն իր հոգեկան վիճակով հանդիսանում է քրեադատավարական գործունակ անձ: Միևնույն ժամանակ հարկ է նշել, որ արարքի կատարման պահին Մ.Սարգսյանի մոտ հայտնաբերված 0.403մգ/լ ալկոհոլի քանակությունը համապատասխանում է թեթև աստիճանի ալկոհոլային հարբածությանը, որի ժամանակ չի խանգարվում՝ անձի մոտ գիտակցությունը, ուստի չի սահմանափակել Մ.Սարգսյանին իր կողմից կատարված գործողությունների նշանակությունը հասկանալու և դրանք ղեկավարելու ունակությունները։ (…)»։
- 2025 թվականի հունիսի 10-ին մեղադրյալի հարցաքննության արձանագրությունը, համաձայն որի՝ Մխիթար Կորյունի Սարգսյանը, ընդունել է իրեն առաջադրված մեղադրանքը և զղջացել կատարածի համար ,
- տուժողի լիազոր ներկայացուցիչ Արթուր Բաղդասարյանի արված հայտարարությունն առ այն, որ վերջինս բողոքում է մեղադրյալ Մխիթար Կորյունի Սարգսյանի դեմ և պահանջում է, որ մեղադրյալը վերականգնի պետությանը պատճառված գույքային վնասի չվերականգնված մասը ,
- մեղադրյալ Մխիթար Կորյունի Սարգսյանի արված հայտարարությունն առ այն, որ ընդունում է ներկայացված մեղադրանքը և զղջում իր կողմից կատարած արարքի համար և պատրաստակամ է վերականգնել պատճառված վնասը, ինչպես նաև դատալսումների ընթացքում, Դատարանին է ներկայացրել Սահմանադրական դատարանի պահպանմանը (ՀՀ դատական դեպարտամենտ AM90001) 900013298014 հաշվեհամարին փոխանցված՝ 170․000 (հարյուր յոթանասուն հազար) ՀՀ դրամ գումարը վճարված լինելու մասին անդորրագիրը ։

4.Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
- Մխիթար Կորյունի Սարգսյանը նախկինում դատապարտված չի եղել,
- Մխիթար Կորյունի Սարգսյանն ունի միջնակարգ կրթություն,
- Մխիթար Կորյունի Սարգսյանը հանցանք կատարելիս գտնվել է ոչ սթափ (ալկոհոլի ազդեցության տակ) վիճակում,
- Մխիթար Կորյունի Սարգսյանի մոտ ախտորոշվել է «Սուր պոլիմորֆ փսիխոտիկ խանգարում (F 23.1)» հիվանդությունը,
- Ներկայացված մեղադրանքում Մխիթար Կորյունի Սարգսյանն իրեն լիովին մեղավոր է ճանաչել, զղջացել կատարածի համար և պատրաստակամ է հատուցելու տուժողին պատճառված վնասը՝ կատարել է դրա մասնակի վերականգնում։

5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Մխիթար Կորյունի Սարգսյանին վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, ինչպես նաև գտնում է, որ մեղադրյալի արարքի նկատմամբ պետք է կիրառվի ՀՀ քրեական օրենսգրքի 452-րդ հոդվածի 2-րդ մասը։
Դատարանի կողմից հաստատված փաստական հանգամանքների հիման վրա՝ Դատարանը գտնում է, որ Մխիթար Կորյունի Սարգսյանի անձը բնութագրող հանգամանք է միջնակարգ կրթություն ունենալը։
Դատարանը, ղեկավարվելով ՀՀ քրեական օրենսգրքի (այսուհետ՝ նաև Օրենսգիրք) 70-րդ հոդվածով, գտնում է, որ Մխիթար Կորյունի Սարգսյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը և հանցագործությամբ պատճառված վնասը կամովին հատուցելուն ուղղված գործողություն կատարելը (մասնակի վերականգնելը)։
Դատարանը, ղեկավարվելով ՀՀ քրեական օրենսգրքի (այսուհետ՝ նաև Օրենսգիրք) 71-րդ հոդվածի 1-ին մասի 16-րդ կետով, գտնում է, որ Մխիթար Կորյունի Սարգսյանի պատասխանատվությունն ու պատիժը ծանրացնող հանգամանք պետք է դիտել հանցանքը ալկոհոլի ազդեցության տակ գտնվող անձի կողմից կատարելը։
Դատարանը գտնում է, որ կատարած հանցանքի համար մեղադրյալ Մխիթար Կորյունի Սարգսյանը ենթակա է պատժի։
Պատիժ նշանակելու հարցի համատեքստում Դատարանը հարկ է համարում արձանագրել հետևյալը՝
Օրենսգրքի 55-րդ հոդվածի համաձայն՝ «1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»։
Օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները»։
Վճռաբեկ դատարանը մշտապես ընդգծել է, որ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ։ Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են։ Հետևաբար, կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի , հանցավորի անձի, պատիժը մեղմացնող և ծանրացնող հանգամանքների վերլուծության հիման վրա` ելնելով պատժի նպատակների իրացումն ապահովելու անհրաժեշտությունից ։
Մասնավորապես, Վճռաբեկ դատարանն ընդգծել է, որ հանցանքի հանրային վտանգավորության բնույթն ու աստիճանը ճիշտ գնահատելու և հանցավորի նկատմամբ համաչափ պատիժ նշանակելու համար անհրաժեշտ է, ի թիվս այլնի, հատուկ ուշադրություն դարձնել հանցավոր վարքագծի դրսևորման եղանակին, հանցանքի կատարման գործիքին և հանցագործության իրադրությանը, պատճառված վնասի բնույթին, արարքի նկատմամբ անձի հոգեբանական վերաբերմունքին, հանցագործության նպատակին և շարժառիթին: Այս առումով Վճռաբեկ դատարանը փաստել է, որ անձի արարքում հանցակազմը որակյալ դարձնող մեկից ավելի հանգամանքների առկայությունը կարող է վկայել ինչպես հանցագործության, այնպես էլ հանցավորի անձի հանրային բարձր վտանգավորության մասին, հետևաբար այն պետք է համաչափ գնահատականի արժանանա դատարանի կողմից և հաշվի առնվի պատիժ նշանակելիս :
Անդրադառնալով պատիժ նշանակելիս հանցավորի անձը բնութագրող տվյալները գնահատման ենթարկելու կարևորությանը` Վճռաբեկ դատարանը մշտապես ընդգծել է, որ պատասխանատվության և պատժի անհատականացման հիմք են ոչ միայն կատարված արարքի հանրային վտանգավորության բնույթն ու աստիճանը, այլև հանցավորի անձը բնութագրող սոցիալ-հոգեբանական, սոցիալ-ժողովրդագրական, քրեաբանական և քրեաիրավական, ֆիզիկական հատկությունների համակցությունը (ընտանեկան դրությունը, վարքագիծը աշխատանքում և կենցաղում, աշխատունակությունը, առողջական վիճակը, տարիքը, սեռը, դատվածությունը և այլն): Մասնավորապես Վճռաբեկ դատարանը փաստել է հանցավորի ընտանեկան դրությունը, վերջինիս ընտանիքի կյանքի պայմանների վրա նշանակված պատժի ազդեցությունը, նրա խնամքին այլ անձանց առկայությունը, սոցիալական միջավայրում նրա զբաղեցրած տեղն ու դիրքը, սոցիալական միջավայրում նրա ունեցած բնութագիրը և մի շարք այլ հանգամանքների վերաբերյալ փաստական տվյալները գնահատման ենթարկելու անհրաժեշտությունը :
Դատարանը, հաշվի առնելով Մխիթար Կորյունի Սարգսյանի կատարած հանցանքի հանգամանքները, նրա անձը բնութագրող տվյալները, պատասխանա-տվությունը և պատիժը մեղմացնող հանգամանքները, պատասխա¬նատվու¬¬¬¬¬թյունը և պատիժը ծանրացնող հանգամանքը, Օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ Օրենսգրքի 452-րդ հոդվածի 2-րդ մասի սանկցիայով որպես հիմնական պատիժ է նախատեսված նաև տուգանքը, գտնում է, որ Օրենսգրքի 77-րդ հոդվածի վերաբերելի կանոնների կիրառմամբ և Օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար Օրենսգրքի 452-րդ հոդվածի 2-րդ մասով նախատեսված հանցանքի կատարման համար նրա նկատմամբ որպես հիմնական պատիժ պետք է նշանակել տուգանքը՝ տասնապատիկի չափով։
Հիմք ընդունելով Օրենսգրքի 59-րդ հոդվածի 5-րդ մասը և հաշվի առնելով, որ մեղսագրվող հանցանքն ավարտվելու օրվան նախորդող 12 ամիսների ընթացքում Մխիթար Կորյունի Սարգսյանը եկամուտ չի հանդիսացել վարձու աշխատող՝ Դատարանը գտնում է, որ տուգանքի չափը պետք է հաշվարկել հանցանքը կատարելու պահին` 2024 թվականի հոկտեմբերի 15-ին, ՀՀ-ում սահմանված նվազագույն աշխատավարձի, այն է՝ 75.000 (յոթանասունհինգ հազար) ՀՀ դրամի չափով։
Այսպիսով, Դատարանը գտնում է, որ Մխիթար Կորյունի Սարգսյանի նկատմամբ պատիժ պետք է նշանակել տուգանք` հանցանքը կատարելու պահին նվազագույն աշխատավարձի վեցապատիկի՝ 750.000 (յոթ հարյուր հիսուն հազար) ՀՀ դրամի չափով (10 x 75.000)։
Ղեկավարվելով ՀՀ քրեական օրենսգրքի 79-րդ հոդվածի 4-րդ մասով և հաշվի առնելով Մխիթար Կորյունի Սարգսյանի երկու օր անազատության մեջ գտնվելու հանգամանքը՝ Դատարանը գտնում է, որ մեղադրյալի նկատմամբ նշանակված պատիժը պետք է մեղմացնել և նշանակված տուգանքի գումարից հաշվակցել 50․000 ՀՀ դրամը՝ վերջնական պատիժ նշանակելով տուգանք 700․000 (յոթ հարյուր հազար) ՀՀ դրամի չափով ։
Հիմք ընդունելով Օրենսգրքի 59-րդ հոդվածի 8-րդ մասը և հաշվի առնելով, որ մեղադրյալ Մխիթար Կորյունի Սարգսյանն ի վիճակի չէ անհապաղ և ամբողջությամբ վճարելու 700․000 (յոթ հարյուր հազար) ՀՀ դրամի չափով նշանակված տուգանքը՝ Դատարանը գտնում է, որ տուգանքի վճարման ժամկետ պետք է սահմանել (վճարումը տարաժամկետել) 1 (մեկ) տարին։
Դատարանը միաժամանակ գտնում է, որ Մխիթար Կորյունի Սարգսյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Անդրադառնալով հանրային մեղադրող Ն․Բարեկյանի կողմից ներկայացված գույքային հայցին՝ Դատարանը գտնում է, որ այն պետք է բավարարել հետևյալ հիմնավորմամբ.
ՀՀ քրեական դատավարության օրենսգրքի 158-րդ հոդվածի համաձայն`
«1. Գույքային հայցը հարուցվում, ապացուցվում և լուծվում է սույն օրենսգրքի դրույթներով սահմանված կանոններով:
2.Քաղաքացիական դատավարության օրենսդրության նորմերի կիրառումը թույլատրվում է, եթե դրանք չեն հակասում սույն օրենսգրքին, և գույքային հայցով վարույթի համար անհրաժեշտ են կանոններ, որոնք նախատեսված չեն սույն օրենսգրքով: (...)»:
ՀՀ քրեական դատավարության օրենսգրքի 159-րդ հոդվածի համաձայն`
«1. Քրեական վարույթի ընթացքում հատուցման ենթակա են մեղադրյալին վերագրվող արարքի հետևանքով պատճառված հետևյալ վնասները․
1) անմիջականորեն պատճառված գույքային վնասը.
2) կորցված, վնասված կամ ոչնչացված գույքը փոխարինելու կամ նորոգելու համար կատարված ծախսերը.
(...):»:
ՀՀ քրեական դատավարության օրենսգրքի 160-րդ հոդվածի համաձայն`
«1. Մասնավոր շահերի պաշտպանության համար գույքային հայցը հարուցում և պաշտպանում է տուժողը կամ նրա ներկայացուցիչը, իսկ պետական շահերի պաշտպանության համար` դատախազը:
2. Գույքային հայցը կարող է հարուցվել քրեական գործը դատարան հանձնելուց հետո` մինչև նախնական դատալսումների ավարտը: Վարույթին ավելի ուշ ներգրավված տուժողն իրավասու է գույքային հայց հարուցելու տուժող ճանաչվելուց անմիջապես հետո:
3. Գույքային հայց հարուցվում է մեղադրյալի կամ այն անձի դեմ, որի վրա կարող է գույքային պատասխանատվություն դրվել մեղադրյալի գործողությունների համար:
(...)»:
ՀՀ քրեական դատավարության օրենսգրքի 162-րդ հոդվածի համաձայն`
«1. Գույքային հայցը լուծվում է եզրափակիչ դատական ակտով` լրիվ կամ մասնակի բավարարվում է, ներառյալ հաշտության համաձայնության տեսքով, մերժվում է կամ թողնվում առանց լուծման:
(...)
3. Գույքային հայցը մերժելու, լրիվ կամ մասնակի բավարարելու մասին` օրինական ուժի մեջ մտած դատական ակտը բացառում է նույն անձանց միջև նույն առարկայի մասին հայցի քննությունը քաղաքացիական դատավարության կարգով:
(...)»:
Այսպիսով՝ վերոհիշյալ իրավանորմերի մեկնաբանությունից հետևում է, որ քրեական դատավարությունում գույքային հայցի քննության շրջանակներում ենթակա են հատուցման, ի թիվս այլոց քրեական օրենքով արգելված արարքով անմիջականորեն պատճառված գույքային վնասը, կորցված, վնասված կամ ոչնչացված գույքը փոխարինելու կամ նորոգելու համար կատարված ծախսերը։
Դատարանը փաստում է, որ ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Նարեկ Բարեկյանը ներկայացրել է 297․000 (երկու հարյուր իննսունյոթ հազար) ՀՀ դրամի չափով գույքային հայց, որը կապված է քրեական օրենքով արգելված արարքով պետությանը անմիջականորեն պատճառված գույքային վնասի հետ։ Ընդ որում՝ մեղադրյալ Մխիթար Կորյունի Սարգսյանը չի առարկել ներկայացված գույքային հացի դեմ և ընդունել է այն։ Դատարանը, գտնում է, որ ներկայացված գույքային հայցը պետք է բավարարել՝ մեղադրյալ Մխիթար Կորյունի Սարգսյանից հօգուտ Հայաստանի Հանրապետության բռնագանձել 297.000 (երկու հարյուր իննսունյոթ հազար) ՀՀ դրամը։
Այս համատեքստում՝ Դատարանը գտնում է նաև, որ Արմեն Աղասու Սարգսյանի կողմից Սահմանադրական դատարանի պահպանմանը (ՀՀ դատական դեպարտամենտ AM90001) 900013298014 հաշվեհամարին փոխանցված՝ 170․000 (հարյուր յոթանասուն հազար) ՀՀ դրամ գումարը պետք է ուղղել հանցագործությամբ պատճառված վնասի հատուցմանը։
Դատարանը, նկատի ունենալով, որ մեղադրյալ Մխիթար Կորյունի Սարգսյանի անվամբ գրանցված չէ անշարժ և շարժական գույք, գտնում է, որ սույն դեպքում հայցի ապահովման միջոցներ ձեռնարկելու հարցին, ինչպես նաև ՀՀ քրեական դատավարության օրենսգրքի 348-րդ հոդվածի 1-ին մասի 12-13-րդ հարցերին անդրադառնալու անհրաժեշտությունը բացակայում է։
Դատարանը գտնում է, որ Մխիթար Կորյունի Սարգսյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ` մինչև դատավճռի օրինական ուժի մեջ մտնելը, քանի որ մեղադրական դատավճիռ կայացնելու և տուգանքի ձևով պատիժ նշանակելու պայմաններում առկա է ողջամիտ ենթադրություն առ այն, որ մեղադրյալը, օգտագործելով անձը հաստատող փաստաթուղթ, կարող է հեռանալ Հայաստանի Հանրապետությունից՝ այդպիսով դիմելով փախուստի կամ չկատարելով իր վրա դրված պարտականությունները, իսկ բացակայելու արգելքի կիրառումը բավարար է մեղադրյալի փախուստը կանխելու և նրա վրա դրված պարտականությունների կատարումն ապահովելու համար։
Դատարանը գտնում է, որ դատավճիռն օրինական ուժի մեջ մտնելուց հետո՝ դեպքի վայրի զննությամբ հայտնաբերված քարը՝ փաթեթավորված և կնիքված ՀՀ ՔԿ հատուկ փաթեթով, պետք է ոչնչացնել, իսկ արտավարութային փաստաթղթերը՝ պահել քրեական գործի նյութերում՝ դրանք պահելու ամբողջ ընթացքում։
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Մխիթար Կորյունի Սարգսյանից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4-րդ հոդվածի 3-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 99-րդ, 100-րդ, 276-րդ, 347-350-րդ, 464.4-րդ և 464.5-րդ հոդվածներով` Դատարանը

ՎՃՌԵՑ

1. Մխիթար Կորյունի Սարգսյանին մեղավոր ճանաչել ՀՀ քրեական օրենսգրքի 452-րդ հոդվածի 2-րդ մասով և նրա նկատմամբ պատիժ նշանակել տուգանք` հանցանքը կատարելու պահին նվազագույն աշխատավարձի տասնապատիկի՝ 750.000 (յոթ հարյուր հիսուն հազար) ՀՀ դրամի չափով։
2. ՀՀ քրեական օրենսգրքի 79-րդ հոդվածի 4-րդ մասի հիման վրա՝ Մխիթար Կորյունի Սարգսյանի նկատմամբ նշանակված պատիժը մեղմացնել և վերջնական պատիժ նշանակել տուգանք՝ 700․000 (յոթ հարյուր հազար) ՀՀ դրամի չափով՝ հաշվի առնելով սույն գործով վերջինիս անազատության մեջ գտնված երկու օրը:
3. ՀՀ քրեական օրենսգրքի 59-րդ հոդվածի 8-րդ մասով սահմանված կարգով՝ տուգանքի վճարման ժամկետ սահմանել (վճարումը տարաժամկետել) 1 (մեկ) տարին։
4. Հարուցված գույքային հայցը բավարարել՝ Մխիթար Կորյունի Սարգսյանից հօգուտ Հայաստանի Հանրապետության բռնագանձել 297.000 (երկու հարյուր իննսունյոթ հազար) ՀՀ դրամը, ինչպես նաև Արմեն Աղասու Սարգսյանի կողմից Սահմանադրական դատարանի պահպանմանը (ՀՀ դատական դեպարտամենտ AM90001) 900013298014 հաշվեհամարին փոխանցված՝ 170․000 (հարյուր յոթանասուն հազար) ՀՀ դրամ գումարը` ուղղել որպես հանցագործությամբ անմիջականորեն պատճառված գույքային վնասի հատուցում:
5. Մխիթար Կորյունի Սարգսյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ` մինչև դատավճռի օրինական ուժի մեջ մտնելը:
6. Դատավճիռն օրինական ուժի մեջ մտնելուց հետո՝ դեպքի վայրի զննությամբ հայտնաբերված քարը՝ փաթեթավորված և կնիքված ՀՀ ՔԿ հատուկ փաթեթով, ոչնչացնել, իսկ արտավարու¬թային փաստաթղթերը պահել քրեական գործի նյութերի հետ՝ դրանք պահելու ամբողջ ընթացքում։
7. Վարութային ծախսերի հարցը համարել լուծված:
8. Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում, սակայն այն չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով:


ԴԱՏԱՎՈՐ՝ Գ․ԱԲԵԼՅԱՆ