Ո Ր Ո Շ ՈԻ Մ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
քրեական գործ թիվ ԵԴ1/2045/01/25
Երևան քաղաքի առաջին ատյանի ընդհանուր իրավասության քրեական դատարանը,

ՆԱԽԱԳԱՀՈՒԹՅԱՄԲ՝ ԴԱՏԱՎՈՐ Ա.ԴԱՆԻԵԼՅԱՆԻ,
ՔԱՐՏՈՒՂԱՐՈՒԹՅԱՄԲ՝ Լ.ՄԱԿԱՐՅԱՆԻ,

ՄԱՍՆԱԿՑՈՒԹՅԱՄԲ`
ՀԱՆՐԱՅԻՆ ՄԵՂԱԴՐՈՂ,
ՀՀ ԴԱՏԱԽԱԶՈՒԹՅԱՆ ԵՐԵՎԱՆ ՔԱՂԱՔԻ
ԱՋԱՓՆՅԱԿ ԵՎ ԴԱՎԹԱՇԵՆ ՎԱՐՉԱԿԱՆ
ՇՐՋԱՆՆԵՐԻ ԴԱՏԱԽԱԶՈՒԹՅԱՆ
ԱՎԱԳ ԴԱՏԱԽԱԶ Ն.ԹՈՓՈՒԶՅԱՆԻ,

ՄԵՂԱԴՐՅԱԼ ԱՐԿԱԴԻ ՄԱՐԳԱՐՅԱՆԻ,
ՊԱՇՏՊԱՆ Ա․ՏՈՆՈՅԱՆԻ,
ՏՈՒԺՈՂ ԱՐՄԱՆ ՄԱՐԳԱՐՅԱՆԻ,

2025 թվականի հոկտեմբերի 2-ին Երևան քաղաքում
դատարանում, դռնբաց դատական նիստում քննելով քրեական գործն ըստ մեղադրանքի
Արկադի Հայկի Մարգարյանի՝
(ծնված 1985 թվականի հուլիսի 10-ին Երևան քաղաքում, հայ, ՀՀ քաղաքացի, չդատված, միջնակարգ կրթությամբ, ամուսնացած, խնամքին երկու անչափահաս երեխա, ըստ իր հայտարարության՝ մասնավոր կարգով մատուցում է գովազդային ծառայություններ, հաշվառված է Երևան քաղաքի Դավթաշեն 5-րդ փողոցի թիվ 3 տանը, բնակվում է Երևան քաղաքի Ամիրյան փողոցի թիվ 15 շենքի թիվ 1 բնակարանում)
ՀՀ քրեական օրենսգրքի 167-րդ հոդվածի 1-ին մասի 1-ին կետով,

Պ Ա Ր Զ Ե Ց
Գործի դատավարական ընթացքը.
1. 2023 թվականի մայիսի 1-ին ՀՀ քննչական կոմիտեի Երևան քաղաքի քննչական վարչության Աջափնյակ և Դավթաշեն շրջանների քննչական բաժնում (այսուհետ՝ նաև Նախաքննության մարմին) ՀՀ քրեական օրենսգրքի 166-րդ հոդվածի 1-ին մասով նախաձեռնվել է թիվ 10157023 քրեական վարույթը:
2․ Նախաքննության մարմնի 2023 թվականի մայիսի 1-ի որոշմամբ Արամ Հայկի Մարգարյանը ճանաչվել է տուժող։
2․ Հսկող դատախազի 2023 թվականի մայիսի 2-ի որոշմամբ քննիչի միջնորդության հիման վրա Արման Գևորգի Մարգարյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 166-րդ հոդվածի 2-րդ մասի 6-րդ կետով։
3․ Նախաքննության մարմնի կողմից 2023 թվականի մայիսի 5-ին Արման Գևորգի Մարգարյանին ներկայացվել է մեղադրանք:
4․ 2023 թվականի հոկտեմբերի 23-ին Նախաքննության մարմնի կողմից ՀՀ քրեական օրենսգրքի 167-րդ հոդվածի 1-ին մասով նախաձեռնվել է թիվ 10516023 քրեական վարույթը։
5․ Նախաքննության մարմնի 2023 թվականի հոկտեմբերի 23-ի որոշմամբ թիվ 10516023 քրեական վարույթը միացվել է թիվ 10157023 քրեական վարույթին, և նախաքննությունը շարունակվել է թիվ 10157023 քրեական վարույթի համարի ներքո։
6․ Հսկող դատախազի 2023 թվականի դեկտեմբերի 14-ի որոշմամբ քննիչի միջնորդության հիման վրա Արման Գևորգի Մարգարյանի նկատմամբ հարուցվել է նոր հանրային քրեական հետապնդում ՀՀ քրեական օրենսգրքի 166- րդ հոդվածի 2-րդ մասի 6-րդ կետով։
7․ Նախաքննության մարմնի կողմից 2023 թվականի դեկտեմբերի 14-ին Արման Գևորգի Մարգարյանին ներկայացվել է մեղադրանք:
8․ Նխաքննության մարմնի 2023 թվականի դեկտեմբերի 14-ի որոշմամբ թիվ 10157023 քրեական վարույթից անջատվել է մեղադրյալ Արման Գևորգի Մարգարյանի վերաբերյալ մասը, որին շնորհվել է թիվ 10830423 քրեական վարույթի համարը։
9․ Նախաքննության մարմնի 2025 թվականի մայիսի 5-ի որոշմամբ Արման Մարգարյանը ճանաչվել է տուժող։
10․ Նախաքննության մարմնի 2025 թվականի մայիսի 6-ի որոշմամբ գազօջախի դետալները, մետաղի անկյունակները և աթոռի կտորները ճանաչվել են իրեղեն ապացույց։
11․ Նախաքննության մարմնի 2025 թվականի մայիսի 26-ի որոշմամբ Ռուզաննա Հակոբյանը ճանաչվել է տուժող։
12. Հսկող դատախազի 2025 թվականի մայիսի 30-ի որոշմամբ քննիչի միջնորդության հիման վրա Արկադի Հայկի Մարգարյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 167-րդ հոդվածի 1-ին մասի 1-ին կետով:
13. Նախաքննության մարմնի կողմից 2025 թվականի մայիսի 31-ին Արկադի Հայկի Մարգարյանին ներկայացվել է մեղադրանք:
14. Նախաքննության մարմնի 2025 թվականի մայիսի 31-ի որոշմամբ մեղադրյալ Արկադի Հայկի Մարգարյանի նկատմամբ որպես խափանման միջոց է ընտրվել բացակայելու արգելքը։
15․ Նախաքննության մարմնի 2025 թվականի մայիսի 31-ի որոշմամբ թիվ 10157023 քրեական վարույթից անջատվել է Ռուզաննա Հակոբյանի և Գևորգ Մարգարյանի առողջությանը վնաս պատճառելու վերաբերյալ մասը, որին շնորհվել է թիվ 10167225 քրեական վարույթի համարը։
16. 2025 թվականի հունիսի 11-ին թիվ 10157023 վարույթի նյութերը մեղադրական եզրակացությամբ հանձնվել են Երևան քաղաքի առաջին ատյանի ընդհանուր իրավասության քրեական դատարան (այսուհետ՝ նաև Դատարան):
2025 թվականի հունիսի 16-ին որոշում է կայացվել քրեական գործով վարույթ ստանձնելու և նախնական դատալսումներ նշանակելու մասին։ Նախնական դատալսումներով դատական նիստը նշանակվել է նույն թվականի հունիսի 26-ին:

Մեղադրանքի փաստական նկարագրությունը.
17. Մեղադրյալ Արկադի Հայկի Մարգարյանին ՀՀ քրեական օրենսգրքի 167-րդ հոդվածի 1-ին մասի 1-ին կետով մեղադրանք է ներկայացվել հետևյալ արարքի համար. «(...) նա 2023 թվականի մայիսի 01-ին` ժամը 18:00-ից 18:30-ի սահմաններում, Երևան քաղաքի Դավթաշեն վարչական շրջանի 5-րդ փողոցի 3-րդ հասցեում գտնվող տան մասնաբաժնի ժառանգության վերաբերյալ դատարանում քննվող գործով տևական ժամանակ ձևավորված լարված փոխհարաբերություններով պայմանավորված հիշյալ հասցեի տան բակում վիճաբանել է իր հորեղբոր՝ Գևորգ Մարգարյանի որդու՝ Արման Գևորգի Մարգարյանի հետ, որի ընթացքում Արման Մարգարյանը տանից վերցրած խոհանոցային դանակի գործադրմամբ դիտավորությամբ մեկ անգամ հարվածել է Արկադի Մարգարյանի եղբոր՝ Արամ Մարգարյանի որովայնին՝ վերջինիս առողջությանը պատճառելով ծանր վնաս, ինչից հետո Արկադի Մարգարյանը, Արման Մարգարյանին մարմնական վնասվածքներ պատճառելու դիտավորությամբ, ինչպես նաև վերջինիս ձեռքին եղած դանակը գցելու նպատակով, բակում առկա գազօջախի դետալներով, մետաղի և աթոռի կտորներով հարվածներ է հասցրել վերջինիս մարմնի տարբեր հատվածներին՝ Արման Մարգարյանին պատճառելով առողջությանը միջին ծանրության վնասի հատկանիշներ պարունակող՝ աջ գագաթային շրջանի սալջարդ վերքի, գագաթային, ձախ ստորին կոպի, քթի, աջ բազկի, աջ և ձախ նախաբազուկների շրջանների քերծվածքների, արյունազեղումների, ձախ ծղիկոսկրի կոտրվածքի ձևով մարմնական վնասվածքներ՝ առողջության տևական քայքայումով:»:

Քրեական հետապնդումը դադարեցնելու կամ վարույթը կարճելու հարցի քննարկումը.
18. Նախնական դատալսումների փուլում տուժող Արման Մարգարյանը գրավոր դիմում է ներկայացրել Դատարան՝ հայտնելով, որ հաշտվել է մեղադրյալ Արկադի Հայկի Մարգարյանի հետ։
Ի պատասխան Դատարանի հարցադրումների՝ տուժողը հայտնեց, որ իր վրա որևէ ազդեցություն, սպառնալիք, ճնշում չի գործադրվել, իր կամքով է հաշտվել մեղադրյալի հետ, քանի որ նա ընդունել է իր մեղքն ու ներողություն խնդրել, ուստի ներել է նրան՝ գիտակցելով դրա իրավական հետևանքները։
19․ Մեղադրյալ Արկադի Հայկի Մարգարյանը նույնպես դիմում է ներկայացրել Դատարան՝ հայտնելով, որ հաշտվել է տուժողի հետ և չի առարկում, որպեսզի իր նկատմամբ նախաձեռնված քրեական վարույթն ոչ արդարացնող՝ հաշտության հիմքով, կարճվի։
Ի պատասխան Դատարանի հարցադրումների՝ հայտնեց, որ իր վրա որևէ ազդեցություն, սպառնալիք, ճնշում չի գործադրվել, իր կամքով է հաշտվել տուժողի հետ, ինքն ընդունում է իրեն ներկայացված մեղադրանքը, զղջում է կատարվածի համար և ցանկանում է, որ քրեական հետապնդումը դադարեցվի՝ հաշտության հիմքով։
20․ Հանրային մեղադրողը հայտնեց, որ առկա է քրեական հետապնդումը դադարեցնելու և գործի վարույթը կարճելու քննարկվող հիմք։

Դատարանի վերլուծությունները․
21․ ՀՀ քրեական օրենսգրքի 167-րդ հոդվածի 1-ին մասի համաձայն՝
« Մեկ ուրիշին մարմնական վնասվածք կամ առողջությանը որևէ այլ վնաս պատճառելը, որը վտանգավոր չէ կյանքի համար և չի առաջացրել սույն օրենսգրքի 166-րդ հոդվածով նախատեսված հետևանքներ, բայց առաջացրել է`
1) առողջության տևական քայքայում կամ
2) ընդհանուր աշխատունակության մեկ երրորդից պակաս զգալի կայուն կորուստ՝
պատժվում է ազատության սահմանափակմամբ` առավելագույնը երեք տարի ժամկետով, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ առավելագույնը երեք տարի ժամկետով:»:
ՀՀ քրեական օրենսգրքի 82-րդ հոդվածի համաձայն՝
«1․ Եթե անձն առաջին անգամ է հանցանք կատարել, ապա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նրա ու տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնությունը, բացառությամբ այն դեպքերի, երբ կատարված հանցանքում առկա են ընտանիքում բռնության հատկանիշներ։
(…)
5. Նախկինում սույն հոդվածով նախատեսված հիմքով քրեական պատասխանատվությունից ազատված անձը չի կարող նույն հիմքով կրկին ազատվել քրեական պատասխանատվությունից»:
22. Տուժողի հետ հաշտվելու հիմքով քրեական պատասխանատվությունից ազատելու իրավահարաբերությունները կարգավորող վերը մեջբերված նորմի վերլուծությունից երևում է, որ քննարկվող հիմքով անձին քրեական պատասխանատվությունից ազատելու համապատասխան պայմանների առկայության դեպքում վարույթն իրականացնող մարմինը պարտավոր է անձին ազատել քրեական պատասխանատվությունից (իմպերատիվ բնույթ է կրում)։ Քննարկվող հիմքը կիրառելի է առաջին անգամ ոչ մեծ կամ միջին ծանրության հանցանք կատարած անձի նկատմամբ, ով նախկինում նույն հիմքով քրեական պատասխանատվությունից չի ազատվել։
Հանցանք կատարած անձի համար հաշտությունը հանցանքի կատարման մեջ իրեն մեղավոր ճանաչելն է, այդ արարքի համար զղջալը, ափսոսանք հայտնելը, իսկ տուժողի համար՝ հանցանք կատարած անձին ներելը: Բացի այդ, հաշտությունը ենթադրում է տուժողի և ենթադրյալ հանցանք կատարած անձի կամավոր և փոխադարձ համաձայնություն միմյանց հետ հաշտվելու վերաբերյալ: Այսինքն` հաշտությունը պետք է լինի ինչպես գործողություն, այնպես էլ փոխադարձ գործողությունների արդյունք:
Կողմերից երկուսն էլ պետք է հայտարարեն հաշտության մասին (փոխադարձության չափանիշ) և դա պետք է լինի նրանց ինքնուրույն և ազատ կամահայտնության արդյունք (կամավորության չափանիշ)։
Հաշտության կամավորության և փոխադարձության չափանիշների բացակայության դեպքում վարույթն իրականացնող մարմինը չի կարող որոշում կայացնել հաշտության հիմքով քրեական հետապնդումը դադարեցնելու վերաբերյալ: Այլ կերպ՝ հաշտությունը երկու կողմերի փոխադարձ կամահայտնությունն է, այն երբեք չի կարող կրել միակողմանի բնույթ, և եթե տուժողը ցանկություն է հայտնում հաշտվելու, իսկ հանցանք կատարած անձը դրա դեմ առարկում է, կամ հակառակը, ապա հաշտության հիմքով քրեական հետապնդումը դադարեցնելու իրավական հիմքը բացակայում է: Նույն կերպ, հաշտությունը կամավոր և փոխադարձ չի կարող համարվել, հետևաբար՝ այդ հիմքով քրեական հետապնդում չի կարող դադարեցվել, եթե հաշտությունը հետևանք է տուժողի նկատմամբ հանցանք կատարած անձի գործադրած ոչ իրավաչափ ներգործության:
23․ Մեջբերված իրավանորմի լույսի ներքո՝ Դատարանն արձանագրում է, որ․
- մեղադրյալ Արկադի Հայկի Մարգարյանին մեղսագրված արարքը միջին ծանրության հանցագործություն է, նա հայտնել է, որ չի առարկում իր նկատմամբ քննարկվող հիմքով քրեական հետապնդումը դադարեցնելու դեմ,
- ինչպես տուժող Արման Մարգարյանը, այնպես էլ մեղադրյալ Արկադի Մարգարյանը հայտնել են, որ հաշտվել են միմյանց հետ։ Մասնավորապես՝ մեղադրյալը հայտնել է, որ ընդունում է իրեն ներկայացված մեղադրանքը, զղջում է կատարվածի համար։ Տուժողն իր հերթին հայտնել է, որ ներել է մեղադրյալին, քանի որ նա ընդունել է իր մեղքն ու ներողություն խնդրել։ Ուստի Դատարանը գտնում է առկա է հաշտության վերաբերյալ փոխադարձ համաձայնություն,
- ինչպես տուժող Արման Մարգարյանը, այնպես էլ մեղադրյալ Արկադի Մարգարյանը հայտնել են, որ իրենց վրա որևէ ազդեցություն, սպառնալիք, ճնշում չի գործադրվել, իրենց կամքով են հաշտվել, ուստի հաշտությունը հիմնված է ինքնուրույն և ազատ կամարտահայտության վրա,
- մեղադրյալ Արկադի Մարգարյանի կողմից նախկինում հանցանք կատարած, ինչպես նաև նույն հիմքով քրեական պատասխանատվությունից ազատված լինելու վերաբերյալ տվյալներ Դատարանին չեն ներկայացվել:
24. ՀՀ քրեական դատավարության օրենսգրքի 12-րդ հոդվածի համաձայն․
«1․ Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(…)
12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից․
(…)
4. Սույն հոդվածի 1-ին մաuի 11-14-րդ կետերով նախատեսված հանգամանքների առկայությունը քրեական հետապնդումը բացառող չէ, եթե անձն առարկում է դրա դեմ այն հիմքով, որ չի կատարել իրեն մեղսագրվող արարքը: (…)»։
Նույն օրենսգրքի 13-րդ հոդվածի 1-ին մասի 3-րդ կետի համաձայն․
«Քրեական վարույթը ենթակա է կարճման, եթե`
(…) մեղադրյալի նկատմամբ դադարեցվել է քրեական հետապնդումը, և սպառվել են վարույթը շարունակելու բոլոր հնարավորությունները.»։
25. Այսպիսով, Դատարանն արձանագրում է, որ սույն գործով առկա են ՀՀ քրեական օրենսգրքի 82-րդ հոդվածի 1-ին մասով նախատեսված՝ տուժողի և հանցանք կատարած անձի հաշտության հիմքով մեղադրյալ Արկադի Մարգարյանին ՀՀ քրեական օրենսգրքի 167-րդ հոդվածի 1-ին մասի 1-ին կետով նախատեսված հանցանք կատարելու համար քրեական պատասխանատվությունից ազատելու հիմքը, որը դասվում է քրեական հետապնդումը բացառող հանգամանքների շարքին։ Հաշվի առնելով նաև, որ մեղադրյալ Արկադի Մարգարյանը չի առարկել ոչ ռեաբիլիտացնող հիմքով իր նկատմամբ քրեական հետապնդումը դադարեցնելու դեմ՝ Դատարանը գտնում է, որ առկա են մեղադրյալ Արկադի Մարգարյանի նկատմամբ ՀՀ քրեական դատավարության օրենսգքրի 12-րդ հոդվածի 1-ին մասի 12-րդ կետով նախատեսված հիմքով քրեական հետապնդումը դադարեցնելու նյութաիրավական և դատավարական պայմանները։
Վերոգրյալի հիման վրա Դատարանն արձանագրում է, որ սպառվել են վարույթը շարունակելու բոլոր հնարավորությունները, հետևաբար առկա է քրեական վարույթը կարճելու՝ ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետով նախատեսված հիմքը։
26․ Անդրադառնալով մեղադրյալի նկատմամբ կիրառված խափանման միջոցին՝ բացակայելու արգելքին, Դատարանը գտնում է, որ այն անհրաժեշտ է վերացնել՝ դրա հիմքերը վերանալու պատճառաբանությամբ:
27․ Անդրադառնալով իրեղեն ապացույցների տնօրինման հարցին՝ Դատարանը գտնում է, որ դատավճիռն օրինական ուժի մեջ մտնելուց հետո Նախաքննության մարմնի 2025 թվականի մայիսի 6-ի որոշմամբ գազօջախի դետալները, մետաղի անկյունակները և աթոռի կտորներն անհրաժեշտ է ոչնչացնել:
28․ Նկատի ունենալով, որ սույն քրեական գործով գույքային հայցի, գույքի վրա արգելանք դնելու, վերաբերյալ տվյալներ առկա չեն՝ Դատարանն այդ հարցերը համարում է լուծված։
29․ Քրեական հետապնդումը դադարեցնելու և քրեական վարույթը կարճելու պայմաններում Դատարանը վարույթային ծախսերի հարցը համարում է լուծված։
Ղեկավարվելով ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետով, 13-րդ հոդվածի 1-ին մասի 3-րդ կետով, 100-րդ, 315-րդ հոդվածով՝ Դատարանը

Ո Ր Ո Շ Ե Ց
1. Մեղադրյալ Արկադի Հայկի Մարգարյանի նկատմամբ ՀՀ քրեական օրենսգրքի 167-րդ հոդվածի 1-ին մասի 1-ին կետով քրեական հետապնդումը դադարեցնել՝ տուժողի հետ հաշտվելու հիմքով:
2. Քրեական գործի վարույթը կարճել՝ վարույթը շարունակելու բոլոր հնարավորությունները սպառված լինելու հիմքով:
3. Մեղադրյալ Արկադի Հայկի Մարգարյանի նկատմամբ ընտրված խափանման միջոցը՝ բացակայելու արգելքը, վերացնել:
4․ Դատավճիռն օրինական ուժի մեջ մտնելուց հետո Նախաքննության մարմնի 2025 թվականի մայիսի 6-ի որոշմամբ գազօջախի դետալները, մետաղի անկյունակները և աթոռի կտորները ոչնչացնել։
4․ Որոշումը վերաքննության կարգով կարող է բողոքարկվել ՀՀ վերաքննիչ քրեական դատարան` ստանալու օրվանից հետո՝ մեկամսյա ժամկետում:

ԴԱՏԱՎՈՐ ԱՆԻ ԴԱՆԻԵԼՅԱՆ