ԵԴ1/2024/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«01» հուլիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրող՝ Արա Դավթյանի,
մեղադրյալ՝ Էդգար Ինդրիկյանի,

դռնբաց դատական նիստում քննելով քրեական գործն ըստ մեղադրանքի՝
Էդգար Գարեգինի Ինդրիկյանի՝
(ծնված՝ 09.06.1983թ. ք. Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին մեկ անչափահաս, դատվածություն չունեցող, հաշվառված՝ Արմավիրի մարզ, Նորակերտ, Բարեկամության փողոց, 1-ին շենք, 4-րդ բնակարան հասցեում, որպես խափանման միջոց է կիրառվել բացակայելու արգելքը) ՀՀ քրեական օրենսգրքի 344-րդ հոդվածի 1-ին մասով,

ՊԱՐԶԵՑ

1. Քրեական գործի դատավարական նախապատմությունը.
2023 թվականի նոյեմբերի 16-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության հատկանիշներով նախաձեռնվել է թիվ 60-0772-23 քրեական վարույթը:
2025 թվականի մայիսի 30-ին ՀՀ դատախազության Երևան քաղաքի Մալաթիա-Սեբաստիա վարչական շրջանի դատախազության դատախազ Ա.Դավթյանի որոշմամբ՝ թիվ 60-0772-23 քրեական վարույթով Էդգար Գարեգինի Ինդրիկյանի նկատմամբ ՀՀ քրեական օրենսգրքի 344-րդ հոդվածի 1-ին մասով հարուցվել է հանրային քրեական հետապնդում:
2025 թվականի հունիսի 10-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի՝ Էդգար Գարեգինի Ինդրիկյանի՝ ՀՀ քրեական օրենսգրքի 344-րդ հոդվածի 1-ին մասով, որին շնորհվել է ԵԴ1/2024/01/25 համարը:
Նույն օրը քրեական գործն էլեկտրոնային եղանակով մակագրվել և 2025 թվականի հունիսի 11-ին հանձնվել է Երևան քաղաքի առաջին ատյանի ընդհանուր իրավասության քրեական դատարանի դատավոր Տաթևիկ Մուրադյանին։
2025 թվականի հունիսի 13-ին Դատարանի կողմից որոշում է կայացվել թիվ ԵԴ1/2024/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի հունիսի 27-ին Դատարանը թիվ ԵԴ1/2024/01/25 քրեական գործով կայացրել է մեղադրական վերդիկտ՝ Էդգար Գարեգինի Ինդրիկյանին մեղավոր ճանաչելով ՀՀ քրեական օրենսգրքի 344-րդ հոդվածի 1-ին մասով նախատեսված արարքի կատարման մեջ:
2. Մեղադրանքի փաստական նկարագրությունը.
Էդգար Գարեգինի Ինդրիկյանին մեղադրանք է ներկայացվել ՀՀ քրեական օրենսգրքի 344-րդ հոդվածի 1-ին մասով այն բանի համար, որ «նա, տրանսպորտային միջոցներ վարելու իրավունքից մեկ տարի ժամկետով՝ 2023 թվականի հունվարի 3-ից մինչև 2024 թվականի հունվարի 3-ը, զրկված լինելու և այդ մասին նախապես տեղյակ լինելու պայմաններում, 2023 թվականի փետրվարի 13-ին՝ ժամը 11:00-ի սահմաններում, Երևան քաղաքի «Զվարթնոց» օդանավակայանի տարածքում վարել է «Օփել» մակնիշի 36 VC 702 հաշվառման համարանիշի տրանսպորտային միջոցը, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության աշխատակցի կողմից, և ինչի կապակցությամբ կազմվել է վարչական իրավախախտման վերաբերյալ թիվ 8180247064 արձանագրությունը։»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Մեղադրյալ Էդգար Գարեգինի Ինդրիկյանը, օգտվելով իր սահմանադրական իրավունքից, հրաժարվեց ցուցմունք տալ։
Հրապարակվեց վերջինիս նախաքննական ցուցմունքը, համաձայն որի՝ Էդգար Ինդրիկյանը տեղյակ է եղել, որ 2023 թվականի հունվարի 3-ից 1 տարի ժամանակով զրկված է եղել տրանսպորտային միջոցներ վարելու իրավունքից, սակայն ընտանիքը պահելու համար «Օպել» մակնիշի 36 VC 702 հաշվառման համարանիշի ավտոմեքենան վարել է որպես տաքսի: 2023 թվականի փետրվարի 13-ին «Զվարթնոց» օդանավակայանում իրեն կանգնեցրել են ոստիկանության պարեկային աշխատակիցները և արձանագրել են, որ զրկված վիճակով վարել է տրանսպորտային միջոցը: Ներկայումս ավտոմեքենա չի վարում, նոր վարորդական վկայական ստանալու համար որևէ տեղ չի դիմել: 2023 թվականի հունվարի 19-ին ծանուցվել է, որ զրկված է տրանսպորտային միջոց վարելու իրավունքից: Ընդունում է մեղավորությունը:
(գ.թ. 44-47, 58-59, դատական նիստի արձանագրություն)
- ՀՀ ՆԳՆ ոստիկանության պարեկային ծառայության 2-րդ գումարտակի 1-ին վաշտի պարեկ Սաղաթել Մելիքսեթի Եղիազարյանի /07649/ կողմից 13.02.2023թ.-ին` ժամը 11:10-ին կազմված վարչական իրավախախտման վերաբերյալ արձանագրությունը, համաձայն որի՝ Էդգար Գարեգինի Ինդրիկյանը /ծնված 09.06.1983թ./ ժամը 11:00-ին, զրկված լինելով տրասնպորտային միջոցներ վարելու իրավունքից, Երևան քաղաքի «Զվարթնոց» օդանավակայանում «Օպել» մակնիշի 36 VC 702 հաշվառման համարանիշի ավտոմեքենան վարել է ոչ սթափ վիճակում:
(գ.թ. 3, դատական նիստի արձանագրություն)
- 08.12.2022թ. կազմված վարչական տույժ նշանակելու մասին թիվ 2215604720 որոշումը, համաձայն որի՝ Էդգար Գարեգինի Ինդրիկյանը զրկվել է տրանսպորտային միջոցներ վարելու իրավունքից՝ 1 տարի ժամկետով:
(գ.թ. 5, դատական նիստի արձանագրություն)
- ՃՈ 08.12.2022թ. կայացված թիվ 2215604720 որոշման պատճենը ստանալու վերաբերյալ ծանուցումը, համաձայն որի՝ առկա է անուն ազգանուն՝ Էդգար Ինդրիկյան, ամսաթիվ՝ 14.02.2023թ., հասցե՝ գյուղ Նորակերտ, Բարեկամության 1 շենք, բնակարան 4/1:
(գ.թ. 21, դատական նիստի արձանագրություն)
- Ճանապարհային ոստիկանության էլեկտրոնային ռեգիստրից արտատպված վարորդական վկայականի տվյալների քաղվածքը, համաձայն որի՝ Էդգար Գարեգինի Ինդրիկյանը վարորդական իրավունքի վկայականից զրկված է: Սկիզբ՝ 03.01.2023, ավարտ՝ 03.01.2024:
(գ.թ. 6, դատական նիստի արձանագրություն)
- Հարթակից օգտվելու և էլեկտրոնային եղանակով ծանուցումների վերաբերյալ տեղեկանքը, համաձայն որի՝ 2023-01-19-ին 37444713434 հեռախոսահամարին ուղարկվել է հետևյալ բովանդակությամբ հաղորդագրություն՝ «ԷԴԳԱՐ ԳԱՐԵԳԻՆԻ ԻՆԴՐԻԿՅԱՆ վարորդական վկայական զրկվել է»:
(գ.թ. 16-19, դատական նիստի արձանագրություն)
- 2025 թվականի մայիսի 21-ին կազմված զննում կատարելու մասին արձանագրությունը, համաձայն որի՝ զննության են ենթարկվել վերը նշված փաստաթղթերը:
(գ.թ. 40-41, դատական նիստի արձանագրություն)
- Նախաքննության մարմնի որոշմամբ որպես արտավարութային փաստաթուղթ ճանաչված՝ զննության ենթարկված՝ Էդգար Ինդրիկյանի վերաբերյալ վարչական իրավախախտման մասին 13.02.2023թ. արձանագրությունը, թիվ 215604720 վարչական տույժ նշանակելու մասին որոշումը և ՀՀ ոստիկանության ճանապարհային ոստիկանության էլեկտրոնային ռեգիստրում Էդգար Գարեգինի Ինդրիկյանի տվյալներով վարորդական վկայականի հարցման արդյունքների արտատպված պատճենը։
(գ.թ. 42-43, դատական նիստի արձանագրություն)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Էդգար Գարեգինի Ինդրիկյանը չունի դատվածություն:
 Միասնական էլեկտրոնային տեղեկատվական համակարգում կատարված հարցման պատասխանի համաձայն՝ ՊԵԿ տվյալների շտեմարանում Էդգար Ինդրիկյանի կողմից հանցանքը կատարելուն նախորդող տասներկու ամիսների ընթացքում ստացած եկամուտների վերաբերյալ տվյալները բացակայում են:
 Էդգար Գարեգինի Ինդրիկյանի երեխայի ծննդյան պետական վկայականի պատճենը, համաձայն որի՝ Էդգար Գարեգինի Ինդրիկյանի խնամքին է գտնվում 17.09.2010 թվականին ծնված Էլենա Էդգարի Ինդրիկյանը:
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Էդգար Գարեգինի Ինդրիկյանը, տրանսպորտային միջոցներ վարելու իրավունքից մեկ տարի ժամկետով՝ 2023 թվականի հունվարի 3-ից մինչև 2024 թվականի հունվարի 3-ը, զրկված լինելու և այդ մասին նախապես տեղյակ լինելու պայմաններում, 2023 թվականի փետրվարի 13-ին՝ ժամը 11:00-ի սահմաններում, Երևան քաղաքի «Զվարթնոց» օդանավակայանի տարածքում վարել է «Օփել» մակնիշի 36 VC 702 հաշվառման համարանիշի տրանսպորտային միջոցը, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության աշխատակցի կողմից, և ինչի կապակցությամբ կազմվել է վարչական իրավախախտման վերաբերյալ թիվ 8180247064 արձանագրությունը։
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Էդգար Գարեգինի Ինդրիկյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Էդգար Գարեգինի Ինդրիկյանը չունի դատվածություն, մեղսագրվող հանցանքը ավարտվելու օրվան նախորդող 12 ամիսների ընթացքում վերջինիս ստացած ընդհանուր եկամուտների վերաբերյալ տվյալները բացակայում են, Էդգար Գարեգինի Ինդրիկյանի խնամքին է գտնվում մեկ անչափահաս երեխա:
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Էդգար Գարեգինի Ինդրիկյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Էդգար Գարեգինի Ինդրիկյանը կատարել է իրեն մեղսագրված արարքը, որոնց նկատմամբ կիրառելի է ՀՀ քրեական օրենսգրքի 344-րդ հոդվածի 1-ին մասը:
Դատարանը, հաստատված համարելով հանցագործության և դրա կատարման մեջ Էդգար Գարեգինի Ինդրիկյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Էդգար Գարեգինի Ինդրիկյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը, ինչպես նաև խնամքին մեկ անչափահաս երեխայի առկայությունը։
Դատարանը միաժամանակ արձանագրում է, որ Էդգար Ինդրիկյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Դատարանը, հաշվի առնելով Էդգար Գարեգինի Ինդրիկյանի կատարած հանցանքի հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 1-ին մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործության կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ ՀՀ քրեական օրենսգրքի 344-րդ հոդվածի 1-ին մասով հիմնական պատիժ պետք է նշանակել տուգանքի ձևով, ընդ որում տուգանքի չափ սահմանելով՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամ գումարի չափով։
Դատարանը միաժամանակ գտնում է, որ կատարած հանցանքի համար Էդգար Գարեգինի Ինդրիկյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Միաժամանակ հաշվի առնելով վերջինիս գույքային դրության վերաբերյալ գործում առկա տվյալները և մեղադրյալի հայտարարությունը՝ Դատարանը գտնում է, որ Էդգար Գարեգինի Ինդրիկյանի նկատմամբ նշանակվող տուգանքի վճարումը պետք է տարաժամկետել և նրան թույլատրել որպես պատիժ նշանակված 375.000 (երեք հարյուր յոթանասունհինգ հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա մյուս հարցերին, արձանագրում է, որ գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական վարույթով առկա չեն նաև վարութային ծախսեր:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ և 352-353-րդ հոդվածներով` Դատարանը

ՎՃՌԵՑ

Էդգար Գարեգինի Ինդրիկյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
Էդգար Գարեգինի Ինդրիկյանին թույլատրել որպես պատիժ նշանակված 375.000 (երեք հարյուր յոթանասունհինգ հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Էդգար Գարեգինի Ինդրիկյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել։
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ