ԵԴ1/2009/01/25

ՈՐՈՇՈՒՄ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՀԱՐՑԸ ՔՆՆՈՒԹՅԱՆ ԱՌՆԵԼՈՒ ՄԱՍԻՆ

05 փետրվարի 2026 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև՝ Դատարան),
նախագահությամբ դատավոր Հ.Մանուկյանի,
քարտուղարությամբ Ն.Սարգսյանի,
մասնակցությամբ՝
պաշտպան՝ Ռ.Սիրեկանյանի,
հանրային մեղադրող՝ Ն․Այվազյանի,
մեղադրյալի օրինական ներկայացուցիչ՝ Գ.Երանոսյանի,

դռնբաց դատական նիստում, քննության առնելով մեղադրյալ Անանիա Ասկանազի Երանոսյանի (ծնված՝ 1961 թվականի մարտի 18-ին, Երևան քաղաքում, ազգությամբ հայ, ՀՀ քաղաքացի, հաշվառված է եղել՝ Կոտայքի մարզ, Նաիրի համայնք, Քասախ, Անդրանիկի փողոց, 18 տուն հասցեում, բնակվել է Կոտայքի մարզ, Նաիրի համայնք, Սոսե փողոց, 11 տուն հասցեում, որպես խափանման միջոց է կիրառվել բացակայելու արգելքը, մահացել է 2026 թվականի հունվարի 22-ին) նկատմամբ ՀՀ քրեական օրենսգրքի 342-րդ հոդվածի 1-ին մասով քրեական հետապնդումը դադարեցնելու և քրեական գործի վարույթը կարճելու հարցը,

Պ Ա Ր Զ Ե Ց

2024 թվականի հունվարի 6-ին նախաձեռնվել է թիվ 60-0031-24 քրեական վարույթը՝ ՀՀ քրեական օրենսգրքի 342-րդ հոդվածի 1-ին մասի հատկանիշներով։
2024 թվականի հունվարի 6-ի որոշմամբ Մարիանն Ռոբերտի Գրիգորյանը ճանաչվել է որպես տուժող։
2024 թվականի փետրվարի 23-ի որոշմամբ որպես իրեղեն ապացույց է ճանաչվել Անանիա Ասկանազի Երանոսյանի վարած «Մերսեդես» մակնիշի 35 QL 581 հաշվառման համարանիշի ավտոմեքենան։

2024 թվականի հունիսի 28-ին թիվ 60-0031-24 քրեական վարույթով միջնորդություն է ներկայացվել հսկող դատախազին՝ Անանիա Ասկանազի Երանոսյանի նկատմամբ ՀՀ քրեական օրենսգրքի 342-րդ հոդվածի 1-ին մասով հանրային քրեական հետապնդում հարուցելու վերաբերյալ։
ՀՀ դատախազության Երևան քաղաքի դատախազության դատախազ Ռ․Դոխոյանի՝ 2024 թվականի հունիսի 28-ի որոշմամբ թիվ 60-0031-24 քրեական վարույթով Անանիա Ասկանազի Երանոսյանի նկատմամբ ՀՀ քրեական օրենսգրքի 342-րդ հոդվածի 1-ին մասով հանրային քրեական հետապնդում հարուցելու մասին միջնորդությունը մերժվել է։
2025 թվականի մայիսի 16-ին թիվ 60-0031-24 քրեական վարույթով միջնորդություն է ներկայացվել հսկող դատախազին՝ Անանիա Ասկանազի Երանոսյանի նկատմամբ ՀՀ քրեական օրենսգրքի 342-րդ հոդվածի 1-ին մասով հանրային քրեական հետապնդում հարուցելու վերաբերյալ։
ՀՀ դատախազության Երևան քաղաքի դատախազության դատախազ Հ․Ավետյանի՝ 2025 թվականի մայիսի 16-ի որոշմամբ թիվ 60-0031-24 քրեական վարույթով Անանիա Ասկանազի Երանոսյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 342-րդ հոդվածի 1-ին մասով։
Թիվ 60-0031-24 քրեական վարույթով Անանիա Ասկանազի Երանոսյանի նկատմամբ որպես խափանման միջոց է ընտրվել բացակայելու արգելքը։
2025 թվականի մայիսի 31-ին թիվ 60-0031-24 քրեական վարույթով կազմվել է մեղադրական եզրակացությունը, որը ՀՀ դատախազության Երևան քաղաքի դատախազության դատախազ Հ․Ավետյանի՝ 2025 թվականի հունիսի 9-ի որոշմամբ հաստատվել է։
2025 թվականի հունիսի 10-ին թիվ 60-0031-24 քրեական վարույթը՝ հաստատված մեղադրական եզրակացությամբ, ստացվել է Երևան քաղաքի առաջին ատյանի ընդհանուր իրավասության քրեական դատարան (քրեական գործին շնորհվել է թիվ ԵԴ1/2009/01/25 համարը) և մակագրվել նույն դատարանի դատավոր Հ․Մանուկյանին։
2025 թվականի հունիսի 13-ին Դատարանը որոշում է կայացրել ստանձնել թիվ ԵԴ1/2009/01/25 քրեական գործով վարույթը և նշանակել նախնական դատալսումներ:
2026 թվականի փետրվարի 5-ի դատական նիստի ընթացքում քննարկվել է մեղադրյալ Անանիա Ասկանազի Երանոսյանի նկատմամբ ՀՀ քրեական դատավարության օրենսգրքի 12-րդ հոդվածի 1-ին մասի 10-րդ կետի՝ մեղադրյալի մահվան հիմքով Անանիա Ասկանազի Երանոսյանի նկատմամբ քրեական հետապնդումը դադարեցնելու և քրեական գործի վարույթը կարճելու հարցը։
Դատավարության կողմերի արտահայտած դիրքորոշումները.
Մեղադրյալ Անանիա Ասկանազի Երանոսյանի որդին՝ Գրիգոր Անանիայի Երանոսյանը նշեց, որ որևէ առարկություն չունի հոր մահվան հիմքով վերջինիս նկատմամբ քրեական հետապնդումը դադարեցնելու դեմ։
Մեղադրյալ Անանիա Ասկանազի Երանոսյանի պաշտպան Ռուզաննա Սիրեկանյանը և հանրային մեղադրող Ն.Այվազյանը նշեցին, որ չեն առարկում մեղադրյալի մահվան հիմքով վերջինիս նկատմամբ քրեական հետապնդումը դադարեցնելու դեմ։
Տուժող Մարիաննա Գրիգորյանը չի ներկայացել դատական նիստին, սակայն ուղարկել է գրավոր դիրքորոշում, համաձայն որի՝
«(…) որպես տուժող տեղեկացա մեղավորի մահվան մասին, ցավակցում եմ ընտանիքին։ Վթարից առաջացած վնասվածքների հետևանքով ունեմ բուժ զննման կարիք։ Ում պետք է դիմեմ հարցին լուծում տալու համար։ (…):»
(Մանրամասն տե՛ս դատական նիստի արձանագրությունը և դատական գործի նյութերը):
Դատարանի իրավական վերլուծությունները և եզրահանգումները.
Լսելով դատավարության կողմերի դիրքորոշումները` Դատարանը գտնում է, որ սույն քրեական գործով պետք է մեղադրյալի նկատմամբ քրեական հետապնդումը դադարեցնել և քրեական գործի վարույթը կարճել հետևյալ պատճառաբանությամբ.
ՀՀ քրեական դատավարության օրենսգրքի 33-րդ հոդվածի համաձայն`
«1. Դատարանը սույն օրենսգրքով սահմանված կարգով իրավասու է՝
1) իրականացնելու վարույթ առաջին ատյանի կարգով.
2) իրականացնելու դատական երաշխիքների վարույթ.
3) իրականացնելու դատական վերանայման վարույթ.
4) վարույթ իրականացնելիս կիրառելու դատավարական սանկցիաներ.
5) վարույթ իրականացնելիս կիրառելու խափանման և անվտանգության միջոցներ, գույքի արգելադրում.
6) դատական ակտը հանձնելու կատարման:
2. Դատարանը սույն օրենսգրքով նախատեսված դեպքերում իրականացնում է այլ լիազորություններ:»
ՀՀ քրեական դատավարության օրենսգրքի 12-րդ հոդվածի համաձայն`
«1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(…)
10) անձը մահացել է.
(…)
3. Սույն հոդվածի 1-ին մաuի 10-րդ կետով նախատեսված հանգամանքի առկայությունը քրեական հետապնդումը բացառող չէ, եթե մահացածի օրինական ներկայացուցիչն առարկում է դրա դեմ այն հիմքով, որ մահացածը չի կատարել իրեն մեղսագրվող արարքը: Այu դեպքում քրեական վարույթը շարունակվում է ընդհանուր կարգով, սակայն մեղադրական վերդիկտ կայացնելու դեպքում այդ անձի նկատմամբ պատիժ չի նշանակվում: Սույն հոդվածի 1-ին մաuի 10-րդ կետը չի տարածվում քաղաքացիական դատավարության կարգով անձին մահացած ճանաչելու դեպքերի վրա:
(…):»
ՀՀ քրեական դատավարության օրենսգրքի 315-րդ հոդվածի համաձայն`
«1. Սույն օրենսգրքի 12-րդ հոդվածի 1-ին մասի 3-14-րդ կետերով նախատեսված որևէ հանգամանքի առկայության դեպքում, երբ դա հնարավոր է առանց ապացույցների հետազոտման, դատարանը որոշում է կայացնում քրեական հետապնդումը դադարեցնելու և վարույթը կարճելու մասին: Եթե քրեական հետապնդումը բացառող հանգամանքը վերաբերում է մեղադրյալներից մեկին, ապա քրեական հետապնդումը դադարեցվում է միայն նրա նկատմամբ՝ առանց վարույթը կարճելու:
2. Քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները: Վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
3. Քրեական հետապնդումը դադարեցնելու և վարույթը կարճելու մասին որոշման պատճենն ուղարկվում է հանրային մեղադրողին և վարույթի մասնավոր մասնակիցներին:»
Հաշվի առնելով վերոգրյալն ու այն հանգամանքը, որ Անանիա Ասկանազի Երանոսյանի մահվան մասին պետական վկայականի համաձայն՝ Անանիա Ասկանազի Երանոսյանը 2026 թվականի հունվարի 22-ին մահացել է և նրա օրինական ներկայացուցիչը (որդին) ու պաշտպանը չեն առարկել մեղադրյալի մահվան հիմքով վերջինիս նկատմամբ քրեական հետապնդումը դադարեցնելու դեմ, ուստի Դատարանն արձանագրում է, որ ՀՀ քրեական դատավարության օրենսգրքի 12-րդ հոդվածի 1-ին մասի 10-րդ կետով նախատեսված հիմքով Անանիա Ասկանազի Երանոսյանի նկատմամբ ՀՀ քրեական օրենսգրքի 342-րդ հոդվածի 1-ին մասով քրեական հետապնդումը ենթակա է դադարեցման, իսկ թիվ ԵԴ1/2009/01/25 քրեական գործի վարույթը ենթակա է կարճման:
Ինչ վերաբերում է տուժողի կողմից ուղարկված դիրքորոշմանը, ապա նախ հարկ է նշել, որ վերջինս որևէ կերպով չի առարկել սույն հարցի քննարկման դեմ, բացի դա էլ տվյալ դիրքորոշումը Դատարանի համար պարզ չէ, թե ինչի համատեքստում է ներկայացվել։
ՀՀ քրեական դատավարության օրենսգրքի 315-րդ հոդվածի 2-րդ մասի համաձայն` քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները, վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանը գտնում է, որ հարկ է մեղադրյալ Անանիա Ասկանազի Երանոսյանի նկատմամբ ընտրված խափանման միջոցը՝ բացակայելու արգելքը, ինչպես նաև ՀՀ ՆԳՆ ոստիկանության ՍԷԿՏ համակարգում առկա տեղեկությունները վերացնել:
Անդրադառնալով իրեղեն ապացույցների տնօրինման հարցին՝ Դատարանը գտնում է, որ հարկ է 2024 թվականի փետրվարի 23-ի որոշմամբ որպես իրեղեն ապացույց ճանաչված՝ Անանիա Ասկանազի Երանոսյանի վարած «Մերսեդես» մակնիշի 35 QL 581 հաշվառման համարանիշի ավտոմեքենան վերադարձնել Անանիա Ասկանազի Երանոսյանի օրինական ներկայացուցչին՝ սույն որոշումն օրինական ուժի մեջ մտնելուց հետո։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 12-րդ հոդվածի 1-ին մասի 10-րդ կետով, 33-րդ, 270-րդ, 315-րդ հոդվածներով` Դատարանը.

Ո Ր Ո Շ Ե Ց

Անանիա Ասկանազի Երանոսյանի նկատմամբ ՀՀ քրեական օրենսգրքի 342-րդ հոդվածի 1-ին մասով քրեական հետապնդումը դադարեցնել` ՀՀ քրեական դատավարության օրենսգրքի 12-րդ հոդվածի 1-ին մասի 10-րդ կետի հիմքով։
Թիվ ԵԴ1/2009/01/25 քրեական գործի վարույթը կարճել:
Անանիա Ասկանազի Երանոսյանի նկատմամբ ընտրված խափանման միջոցը՝ բացակայելու արգելքը, ինչպես նաև ՀՀ ՆԳՆ ոստիկանության ՍԷԿՏ համակարգում առկա տեղեկությունները վերացնել:
2024 թվականի փետրվարի 23-ի որոշմամբ որպես իրեղեն ապացույց ճանաչված՝ Անանիա Ասկանազի Երանոսյանի վարած «Մերսեդես» մակնիշի 35 QL 581 հաշվառման համարանիշի ավտոմեքենան վերադարձնել Անանիա Ասկանազի Երանոսյանի օրինական ներկայացուցչին՝ սույն որոշումն օրինական ուժի մեջ մտնելուց հետո։
Որոշումը կարող է բողոքարկվել ՀՀ քրեական վերաքննիչ դատարան` ստանալու օրվանից հետո մեկամսյա ժամկետում:


ԴԱՏԱՎՈՐ` ՀԱՐՈՒԹՅՈՒՆ ՄԱՆՈՒԿՅԱՆ