ԵԴ1/1959/01/25



Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ս.ԳԶՈԳՅԱՆԻ
քարտուղարությամբ Լ.ՉՈԲԱՆՅԱՆԻ
մասնակցությամբ
հանրային մեղադրող Վ․ՍԱՐԳՍՅԱՆԻ
պաշտպաններ Ա․ԲԱԲԱՅԱՆԻ
Վ․ՀԱՐՈՒԹՅՈՒՆՅԱՆԻ
մեղադրյալ Ս․ՍՏԵՓԱՆՅԱՆԻ


2025 թվականի հոկտեմբերի 6-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Սամվել Հրաչյայի Ստեփանյանի՝ ծնված 2000 թվականի փետրվարի 19-ին, Երևան քաղաքում, հայ, ՀՀ քաղաքացի, թերի բարձրագույն կրթությամբ, չամուսնացած, աշխատում է որպես վառելիքի լիցքավորող, արարքը կատարելու պահին չդատապարտված, հաշվառված և բնակվում է Երևան քաղաքի Նազարբեկյան թիվ 12/17 տուն հասցեում, մեղադրանք է առաջադրվել ՀՀ քրեական օրենսգրքի 396-րդ հոդվածի 2-րդ մասով, որպես խափանման միջոց է ընտրվել բացակայելու արգելքը,

ՊԱՐԶԵՑ

1.Գործի դատավարական նախապատմությունը
2023 թվականի հուլիսի 25-ին ՀՀ քրեական օրենսգրքի 393-րդ հոդվածի 1-ին մասի և 396-րդ հոդվածի 1-ին մասի հատկանիշներով նախաձեռնվել է թիվ 14836423 քրեական վարույթը:
2023 թվականի հուլիսի 25-ին Սամվել Հրաչյայի Ստեփանյանը ձերբակալվել և նույն օրը ազատ է արձակվել։
2023 թվականի մարտի 20-ի որոշմամբ Սամվել Հրաչյայի Ստեփանյանի նկատմամբ քրեական հետապնդում է հարուցվել ՀՀ քրեական օրենսգրքի 396-րդ հոդվածի 2-րդ մասով այն արարքի համար, որ նա, խախտելով «թմրամիջոցների և հոգեմետ (հոգեներգործող) նյութերի մասին» 2002թ. դեկտեմբերի 26-ի ՀՀ օրենքի 11-րդ հոդվածի 2-րդ կետի և ՀՀ Կառավարության 2010թ. մարտի 18-ի թիվ 270- Ն որոշման պահանջները, այն է` չունենալով բժշկական նպատակներով կամ բժշկի նշանակմամբ թմրամիջոցների և հոգեմետ (հոգեներգործուն) նյութերի շրջանառություն իրականացնելու՝ թմրամիջոց ձեռք բերելու և պահելու թույլտվություն, առանց իրացնելու նպատակի՝ քննությամբ դեռևս հստակ չպարզված ժամանակահատվածում և հանգամանքներում, իր անձնական օգտագործման համար, ապօրինի ձեռք է բերել և ապօրինի պահել խոշոր չափերի՝ ընդհանուր՝ 0.12 գրամ քաշով «տետրահիդրականնաբինոլ (ՏՀԿ)» տեսակի թմրամիջոց, որը 2023 թվականի հուլիսի 25-ին հայտնաբերվել և վերցվել է նույն օրը ՀՀ ՆԳՆ ոստիկանության ՔՈԳՎ Երևան քաղաքի վարչության Արաբկիրի բաժնում, կատարված անձնական խուզարկության ժամանակ»։
2023 թվականի մարտի 21-ի որոշմամբ Սամվել Հրաչյայի Ստեփանյանի նկատմամբ որպես խափանման միջոց է ընտրվել բացակայելու արգելքը:
Նախաքննության մարմնի 2025 թվականի մայիսի 29-ի որոշմամբ թիվ 14836423 քրեական վարույթից անջատվել է ՀՀ քրեական օրենսգրքի 393-րդ հոդվածի 2-րդ մասով նոր քրեական վարույթ, վարույթին շնորհվել է թիվ 14189725 համարը։
2025 թվականի հունիսի 9-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում, գործին շնորհվել է ԵԴ1/1959/01/25 համարը:
2025 թվականի հունիսի 11-ին Դատարանի դատավոր Ս.Գզոգյանը որոշում է կայացրել վարույթը ստանձնելու և նախնական դատալսումներ նշանակելու մասին։
2025 թվականի հոկտեմբերի 6-ին Դատարանը Սամվել Հրաչյայի Ստեփանյանի նկատմամբ կայացրել է մեղադրական վերդիկտ։


2.Դատարանում հետազոտված և գնահատված ապացույցներ
Մեղադրյալ Սամվել Հրաչյայի Ստեփանյանն դատաքննության ընթացքում ցուցմունք է տվել այն մասին, որ ինքը առաջադրված մեղադրանքում իրեն մեղավոր չի ճանաչում, քանի որ ինքը խոշոր չափի քիմիական տեսակի թմրամիջոց ձեռք բերելու նպատակ չի ունեցել։ Ինքը ձեռք է բերել բնական օրգանական» թմրամիջոց։ Մի քանի անգամ օգտագործել է մարիխուանա» տեսակի թմրամիջոց։ Ինքը ձեռք է բերել 0,5 գրամ բնական մարիխուանա», բուսական նյութից է պատրաստված, քիմիական տարր չի պարունակում, ուղարկել են հասցե, որտեղից ինքը կարող է վերցնել, ինքը գնացել է, վերցրել է։ Դրա հաջորդ օրը պարեկային ծառայության աշխատակիցները մալականի այգու» մոտ իրեն կանգնեցրել են, իսկ փաթեթն իր մոտից հայտնաբերել են ոստիկանության բաժնում, ինքը հանձնել է նրանց։ Ինքը ցանկանում է հայտնել, որ քիմիական նյութեր չի օգտագործում։ Դեպքից անցել է երկու տարի, ինքն այս ընթացքում ոչ մի թմրամիջոց չի օգտագործել և պատրաստ է ցանկացած պահի փորձաքննութան ենթարկվել։ Ինքը զղջում է իր կատարած արարքի համար և խոստացել է երբեք չօգտագործել թմրամիջոց։ Ինքը իմացել է, որ 0,5 գրամ մարիխուաննա» տեսակի թմրամիջոցը քրեորեն պատժելի չէ, օրգանիկ թմրամիջոց է։ Արտաքինից խոտի նման չի եղել, այլ յուղի։ Իրեն ուղարկել են նկար, ինքը տեսել է նկարը, կարդացել է բաղադրությունը նոր ուղարկել են։ Ումից ինքը ձեռք է բերել, նա իրեն ասել է, որ թմրամիջոցը օրգանիկ է, ոչ մի քիմիական տարր չի պարունակում, գուգլ հավելվածով» գրել է մաքս մարիխուանա» և տեսել է, որ օրգանական է։ Առաջին անգամ է գնելով ձեռք բերել թմրամիջոց, մնացած անգամները քաղել է, բայց միշտ չի եղել։ Ինքը, երբ իմացել է իր ուզած թմրամիջոցը չէ, զանգահարել է ուղարկողին, բայց տելեգրամը ջնջել է, հիմա չի կարող ցույց տալ։ Այդ թմրամիջոցը չի օգտագործել, չի հասցրել։ Դեպքը 2022 թվականի ամառ է եղել, բայց օր ամսաթիվ չի հիշում (տե՛ս 2025 թվականի սեպտեմբերի 9-ի դատական նիստի արձանագրությունը):
Վկա Լևոն Մկրտչի Բաղդասարյանն դատաքննության ընթացքում ցուցմունք է տվել այն մասին, որ մեղադրյալին ճանաչում է գործի հանգամանքներից ելնելով։ Դեպքից երկու տարի է անցել։ 2023 թվականի հուլիսի 25-ին ծառայություն է իրականացրել Արաբկիր վարչական շրջանում, գործընկերոջ հետ։ Նշված հասցեում կայանել են մեքենա, մոտեցել են քաղաքացու, վերջինս իրենց տեսել ուղղությունը փոխել է, երբ մոտեցել են նրան, նա դողում էր, այդ պատճառով իրենց մոտ նրա վարքագիծը կասկածելի է թվացել։ Երբ նրան կանգնեցրել են, նա ասել է, որ իր մոտ թմրամիջոց կա, այդ հիմքով Սամվել Ստեփանյանին ձերբակալել, տարել են ոստիկանության բաժին, որտեղ նա թմրամիջոցը հանել տվել է։ Կազմել են արձանագրություն, բայց չի հիշում ինչ տեսակի թմրամիջոց են նշել արձանագրությունում, իր հիշելով մարիխուաննա» տեսակի թմրամիջոց են գրել։ (տե՛ս 2025 թվականի օգոստոսի 26-ի դատական նիստի արձանագրությունը):
Փորձագետ Անի Վարագյանն դատաքննության ընթացքում ցուցմունք է տվել այն մասին, որ Տետրահիդրոկաննաբինոլ» տեսակի թմրամիջոցը պատրաստված է կանաբինոլի ակտիվ նյութերից է, բնության մեջ որպես այդպիսին հանդես չի գալիս, ինքը որպես բաղադրատար պարունակում է կանեփ բույսի մեջ, բայց տնային պայմաններում հնարավոր է ստանալ։ Ինքը ավելի շատ բուսական զանգված է, իսկ բյուրեղները բուսական տեսք չունեն։ Տետրահիդրոկաննաբինոլ» թմրամիջոցը Մարիխուաննա» թմրանմիջոցի հետ որևէ կապ չունի, արտաքնապես տարբերվում են իրարից (տե՛ս 2025 թվականի հուլիսի 22-ի դատական նիստի արձանագրությունը):
Հիմնական դատալսումների ընթացքում հետազոտվել են հետևյալ գրավոր ապացույցները.
ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի պարեկ Խաչիկ Հովհաննիսյանի կազմած 2023 թվականի հուիսի 25-ի զեկուցագիրը, ըստ որի՝ 2023 թվականի հուլիսի 25-ին, ծառայություն իրականացնելիս Երևան քաղաքի Համո Սահյան 53 հասցեի մոտ իրավախախտման համար կանգնեցրել են Մերսեդես» մակնիշի 74 00 007 հաշվառման համարանիշի ավտոմեքենան, որի ընթացքում վարորդի կողմից կասկածելի վարքագիծ նկատելու արդյունքում պահանջել է վերջինիս իջնել ավտոմեքենայից, ինչի ընթացքում վարորդը իր տաբատի աջ գրպանից նետել է բժշկական կաթուցիչ, թղթյա փաթեթ և պոլիէթիլենային տոպրակով փաթեթավորված մետաղյա իր: Նույն օրը՝ ժամը 13:40-ին, նշված ավտոմքենայի վարորդին ապօրինի թմրամիջոց ձեռք բերելու, պահելու և օգտագործելու հիմնավոր կասկածանքով ձերբակալել և տեղափոխել են ոստիկանության Արաբկիրի բաժին, որտեղ Սամվել Հրաչյայի Ստեփանյանը` բանավոր հայտարարել է, որ իր կողմից դրսում նետածը հանդիսացել է Մարիխուաննա, տեսակի թմրամիջոցի յուղ», իսկ անձանական խուզարկությամբ հայտնաբերվել է պլաստամասե տարա, որում ըստ Սամվել Ստեփանյնաի հայտարարության, կրկին հանդիսանում է Մարիխուանա տեսակի թմրամիջոցի յուղ» (տե՛ս դատական նիստի արձանագրություն, քրեական գործ, 3-րդ թերթ):
Սամվել Հրաչյայի Ստեփանյանին 25.07.2023թ. ձերբակալելու մասին և անձնական խուզարկության ենթարկելու մասին կազմված արձանագրություննեը, որի համաձայն՝ նշված օրը՝ ժամը 13:40-ին, Սամվել Ստեփանյանը ձերբակալվել է ապօրինի թմրամիջոց ձեռք բերելու, պահելու և օտագործելու հիմնավոր կասկածանքով, ում անձնական խուզարկությամբ հայտնաբերվել է պլաստամսե փոքրիկ թափանցիկ տարա: Սամվել Ստեփանյանը հայտարարել է, որ հայտաբերվածը հանդիսանում է Մարիխուանա յուղ» տեսակի թմրամիջոց (տե՛ս դատական նիստի արձանագրություն, քրեական գործ, 5-7-րդ թերթ):
Դեպքի վայրի զննության մասին կազմված 2023 թվականի հուլիսի 25-ին արձանագրությունը, որի համաձայն՝ Սամվել Ստեփանյանը մատնացույց է արել Երևան քաղաքի Համո Սահյան 53 հասցեի մոտակայքը, որտեղ կայանված է եղել Մերսեդես» մակնիշի 74 00 007 հաշվառման համարանիշի ավտոմեքենան, իսկ իր մոտ եղածը նետել է առուն (տե՛ս դատական նիստի արձանագրություն, քրեական գործ, 25-28-րդ թերթը):
ՀՀ ՔԿ Փորձաքրեագիտական կենտրոն» ՊՈԱԿ-ից ստացված թիվ 28432305 եզրակացությունը, որի համաձայն՝ փորձաքննությանը ներկայացված Սամվել Ստեփանյան Թմրանյութ» ձեռագիր գրառումներով դարչնավուն երանգի թղթե փաթեթում դրված պոլիմերային թափանցիկ տարայի մեջ առկա 0.12 գրամ քաշով դարչնավուն երանգի բյուրեղանման զանգվածը հանդիսանում Տետրահիդրոկաննաբինոլ» տեսակի թմրամիջոց (տե՛ս դատական նիստի արձանագրություն, քրեական գործ, 42-64-րդ թերթը):
Զննություն կատարելու մասին արձանագրությունը, որի համաձայն՝ զննության է ենթարկվել Փորձագիտական կենտրոն» ՊՈԱԿ-ից ստաված փաթեթների և ծրարների համար նախատեսված կնիքով փաթեթավորված 28432305 եզրակացությանը կից բյուրեղանման զանգվածի պարունակությամբ փաթեթը (տե՛ս դատական նիստի արձանագրություն, քրեական գործ, 66-67-րդ թերթը):
Իրեղեն ապացույց ճանաչելու մասին կայացված որոշումը, որի համաձայն՝ 25.07.2023 թվականին Սամվել Հրաչյայի Ստեփանյանի անձնական խուզարկությամբ հայտնաբերված Տետրահիդրոկաննաբինոլ» տեսակի թմրամիջոցը ճանաչվել է իրեղեն ապացույց և կցվել է քրեական վարույթի նյութերին (տե՛ս դատական նիստի արձանագրություն, քրեական գործ, 68-69-րդ թերթը):
ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի պարեկ Խաչիկ Հովհաննիսյանի կողմից կազմված զեկուցագրի զննության արձանագրությունը, որի համաձայն՝ 2023 թվականի հուլիսի 25-ին, ծառայություն իրականացնելիս Երևան քաղաքի Համո Սահյան 53 հասցեի մոտ իրավախախտման համար կանգնեցրել են Մերսեդես» մակնիշի 74 00 007 հաշվառման համարանիշի ավտոմեքենան, որի ընթացքում վարորդի կողմից կասկածելի վարքագիծ դրսևորելու արդյունքում պահանջել է վերջինիս իջնել ավտոմեքենայից, ինչի ընթացքում վարորդը իր տաբատի աջ գրպանից նետել է բժշկական կաթուցիչ, թղթյա փաթեթ և պոլիէթիլենային տոպրակով փաթեթավորված մետաղյա իր: Նույն օրը՝ ժամը 13:40-ին, նշված ավտոմքենայի վարորդին ապօրինի թմրամիջոց ձեռք բերելու, պահելու և օգտագործելու հիմնավոր կասկածանքով ձերբակալել և տեղափոխել են ոստիկանության Արաբկիրի բաժին, որտեղ Սամվել Հրաչյայի Ստեփանյանը բանավոր հայտարարել է, որ իր կողմից դրսում նետածը հանդիսացել է Մարիխուանա տեսակի թմրամիջոցի յուղ», իսկ անձանական խուզարկությամբ հայտնաբերվել է պլաստամասե տարա, որում ըստ Սամվել Ստեփանյանի հայտարարության, կրկին հանդիսանում է Մարիխուանա տեսակի թմրամիջոցի յուղ» (տե՛ս դատական նիստի արձանագրություն, քրեական գործ, 122-123-րդ թերթը):
ՀՀ ՆԳՆ պարեկային ծառայության Երևան քաղաքի գնդի 4-րդ գումարտակի 1-ին վաշտի պարեկ Լևոն Մկրտչի Բաղդասարյանի մասնակցությամբ իրականացված դեպքի վայրի զննության մասին կազմված արձանագրությունը, որի համաձայն՝ Լևոն Բաղդարսարյանը մատնացույց է արել Երևան քաղաքի Համո Սահյան 53 հասցեի մոտակայքը, որտեղ կայանված է եղել Մերսեդես» մակնիշի 74 00 007 հաշվառման համարանիշի ավտոմեքենան, և այն առուն, որի մեջ Սամվել Ստեփանյանը նետել իր մոտ եղած զանգվածը (տե՛ս դատական նիստի արձանագրություն, քրեական գործ, 181-184-րդ թերթը):
Սամվել Ստեփանյանի դատավածության վերաբերյալ տեղեկանքը, որի համաձայն՝ Սամվել Ստեփանյանը Երևան քաղաքի ընդհանուր իրավասության քրեական դատարանի 2025 թվականի փետրվարի 27-ի դատավճռով մեղավոր է ճանաչվել 2 դրվագ ՀՀ նախկին քրեական օրենսգրքի 344-րդ հոդվածի 2-րդ մասով և դատապարտվել տուգանքի՝ 750․000 ՀՀ դրամի չափով (տե´ս դատական նիստի արձանագրություն):
ՀՀ ԱՆ պրոբացիայի ծառայությունից բանավոչ տեղեկատվույուն է ստացվել առ այն, որ մեղադրյալ Սամվել Ստեփանյանն իր նկատմամբ նշանակված տուգանքից վճարել է 438․000 ՀՀ դրամ (տե´ս դատական նիստի արձանագրություն):

3.Դատարանի իրավական վերլուծությունները
Դատարանը, վերլուծելով մեղադրյալ Սամվել Հրաչյայի Ստեփանյանին առաջադրված մեղադրանքի հիմքում դրված և հիմնական դատալսումների ընթացքում հետազոտված վերոգրյալ ապացույցները՝ դրանք գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր կասկածները նրա օգտին մեկնաբանելով, հաստատված է համարում, որ Սամվել Ստեփանյանը, խախտելով «Թմրամիջոցների և հոգեմետ (հոգեներգործող) նյութերի մասին» 2002թ. դեկտեմբերի 26-ի ՀՀ օրենքի 11-րդ հոդվածի 2-րդ կետի և ՀՀ Կառավարության 2010թ. մարտի 18-ի թիվ 270- Ն որոշման պահանջները, այն է` չունենալով բժշկական նպատակներով կամ բժշկի նշանակմամբ թմրամիջոցների և հոգեմետ (հոգեներգործուն) նյութերի շրջանառություն իրականացնելու՝ թմրամիջոց ձեռք բերելու և պահելու թույլտվություն, առանց իրացնելու նպատակի՝ քննությամբ դեռևս հստակ չպարզված ժամանակահատվածում և հանգամանքներում, իր անձնական օգտագործման համար, ապօրինի ձեռք է բերել և ապօրինի պահել խոշոր չափերի՝ ընդհանուր՝ 0.12 գրամ քաշով «տետրահիդրականնաբինոլ (ՏՀԿ)» տեսակի թմրամիջոց, որը 2023 թվականի հուլիսի 25-ին հայտնաբերվել և վերցվել է նույն օրը ՀՀ ՆԳՆ ոստիկանության ՔՈԳՎ Երևան քաղաքի վարչության Արաբկիրի բաժնում, կատարված անձնական խուզարկության ժամանակ։
Այսպիսով, Դատարանը գտնում է, որ սույն գործով ձեռք բերված հավաստի ապացույցների համակցությունը բավարար է հիմնավոր կասկածից վեր ապացուցողական չափանիշին համապատասխան հաստատված համարելու մեղադրյալ Ս․Ստեփանյանի կողմից առանց իրացնելու նպատակի խոշոր չափերով թմրամիջոց ձեռք բերելը և պահելն ապացուցված է, այդ արարքը ճիշտ է որակված և համապատասխանում է ՀՀ քրեական օրենսգրքի 396-րդ հոդվածի 2-րդ մասի հատկանիշներին:
Անդրադառնալով մեղադրյալի նկատմամբ նշանակվելիք պատժի հարցին՝ Դատարանն արձանագրում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի մի շարք դրույթներով:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»։
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ։ (․․․)»։
ՀՀ վճռաբեկ դատարանի ձևավորած կայուն նախադեպային իրավունքի համաձայն՝ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և այն կատարող անձը կոնկրետ են: Հետևաբար կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, այն կատարող անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից (ի թիվս այլնի տե՛ս ՀՀ վճռաբեկ դատարանի թիվ ԵՇԴ/0029/01/08, ԱՎԴ2/0059/01/08, ԵԱՔԴ/0078/01/09 ԵԿԴ/0042/01/11 որոշումները)։
Այսպես` Դատարանը մեղադրյալ Ս․Ստեփանյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հանրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Ս․Ստեփանյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, դատարանը, որպես Ս․Ստեփանյանի անձը բնութագրող տվյալ հաշվի է առնում այն, որ բնութագրվում է դրական։ արարքը կատարելու պահին դատվածություն չունի։
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալ Ս․Ստեփանյանի պատասխանատվությունն ու պատիժը մեղմացնող հանգամանք հաշվի է առնում այն, որ նա անկեղծորեն զղջացել է կատարած արարքի համար:
Դատարանը, արձանագրում է, որ մեղադրյալ Ս․Ստեփանյանի պատասխանատվությունն ու պատիժը ծանրացնող հանգամանքներ առկա չեն:
Դատարանը գտնում է, որ կատարած արարքի համար մեղադրյալ Ս․Ստեփանյանը ենթակա է պատժի տուգանքի ձևով՝ 750.000 (յոթ հարյուր հիսուն հազար) ՀՀ դրամի չափով:
Միաժամանակ ՀՀ քրեական օրենսգրքի 79-րդ հոդվածի 4-րդ մասի համաձայն՝ «Անազատության մեջ գտնվող անձի նկատմամբ տուգանքի, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, զինվորական ծառայության մեջ սահմանափակման ձևով հիմնական պատիժ նշանակելիս դատարանը, հաշվի առնելով մինչև դատավճիռ կայացնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը, մեղմացնում է նշանակված պատիժը կամ ազատում է պատիժը կրելուց»:
Սույն գործով մեղադրյալ Ս․Ստեփանյանն անազատության մեջ է գտնվել 1 (մեկ) օրը՝ 2025 թվականի հուլիսի 25-ը, ուստի Ս․Ստեփանյանի նկատմամբ նշանակված պատիժը պետք է մեղմացնել, և նրա նկատմամբ վերջնական պատիժ սահմանել տուգանք՝ 725․000 (յոթ հարյուր քսանհինգ հազար) ՀՀ դրամի չափով։
ՀՀ քրեական օրենսգրքի 74-րդ հոդվածի 11-րդ մասի համաձայն՝ «Պատիժը նշանակվում է սույն հոդվածի կանոններով, եթե դատավճիռ կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը և պատժի կրման սկիզբ է համարվում առաջին դատավճռով նշանակված պատժի կրման սկիզբը»։
Սույն գործի նյութերի ուսումնասիրությունից երևում է, որ Երևան քաղաքի առաջին ատյանի ընդհանուր իրավասության քրեական դատարանի 2025 թվականի փետրվարի 27-ի դատավճռով Սամվել Հրաչյայի Ստեփանյանը մեղավոր է ճանաչվել 2 դրվագ ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ է նշանակվել տուգանք՝ 750․000 (յոթ հարյուր հիսուն հազար) ՀՀ դրամ, որից մնացել է վճարելու 312․000 ՀՀ դրամ։
Հիմք ընդունելով վերոգրյալը՝ Դատարանը փաստում է, որ Սամվել Հրաչյայի Ստեփանյանի նկատմամբ վերջնական պատիժ պետք է սահմանվի ՀՀ քրեական օրենսգրքի 74-րդ հոդվածի 11-րդ մասի կարգով, այն է՝ սույն գործով նրա նկատմամբ նշանակված պատժին պետք է լրիվ գումարել Երևան քաղաքի առաջին ատյանի ընդհանուր իրավասության քրեական դատարանի 2025 թվականի փետրվարի 27-ի դատավճռով նշանակված տուգանքի չվճարված մասը՝ 312․000 (երեք հարյուր տասերկու հազար) ՀՀ դրամը, և վերջնական պատիժ սահմանել տուգանք՝ 1․037․000 (մեկ միլիոն երեսունյոթ հազար) ՀՀ դրամ։
Անդրադառնալով իրեղեն ապացույցների տնօրինման հարցին՝ Դատարանը գտնում է, որ իրեղեն ապացույց ճանաչված և քրեական գործին կցված Սամվել Հրաչյայի Ստեփանյանի անձնական խուզարկությամբ հայտնաբերված Տետրահիդրոկաննաբինոլ» տեսակի թմրամիջոցը պետք է հանձնել թիվ 14189725 քրեական վարույթն իրականացնող մարմնին գործի հետ միասին ընթացքը լուծելու համար՝ դատավճիռն օրինական ուժի մեջ մտնելուց հետո։
Դատարանն արձանագրում է, որ արտավարութային փաստաթուղթ ճանաչված և քրեական գործին կցված փաստաթղթերը պետք է թողնել կցված քրեական գործին՝ դատավճիռն օրինական ուժի մեջ մտնելուց հետո։
Քննարկելով մեղադրյալ Ս․Ստեփանյանի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 342-349-րդ հոդվածներով` Դատարանը

Վ Ճ Ռ Ե Ց

Մեղադրյալ Սամվել Հրաչյայի Ստեփանյանին մեղավոր ճանաչել ՀՀ քրեական օրենսգրքի 396-րդ հոդվածի 2-րդ մասով նախատեսված արարքի կատարման մեջ, և նրա նկատմամբ պատիժ նշանակել տուգանք՝ 750.000 (յոթ հարյուր հիսուն հազար) ՀՀ դրամի չափով։
ՀՀ քրեական օրենսգրքի 79-րդ հոդվածի հիման վրա՝ հաշվակցել մեղադրյալ Սամվել Հրաչյայի Ստեփանյանի անազաության մեջ գտնվելու 1 (մեկ) օրը՝ 2025 թվականի հուլիսի 25-ը, և նրա նկատմամբ պատիժը մեղմացնել և պատիժ սահմանել տուգանք՝ 725․000 (յոթ հարյուր քսանհինգ հազար) ՀՀ դրամի չափով։
ՀՀ քրեական օրենսգրքի 74-րդ հոդվածի 11-րդ մասի հիման վրա՝ սույն դատավճռով նշանակված պատժին՝ 725․000 (յոթ հարյուր քսանհինգ հազար) ՀՀ դրամին լրիվ գումարել Երևան քաղաքի առաջին ատյանի ընդհանուր իրավասության քրեական դատարանի 2025 թվականի փետրվարի 27-ի դատավճռով նշանակված տուգանքի չվճարված մասը՝ 312․000 (երեք հարյուր տասերկու հազար) ՀՀ դրամը և վերջնական պատիժ նշանակել տուգանք՝ 1․037․000 (մեկ միլիոն երեսունյոթ հազար) ՀՀ դրամի չափով:
Մեղադրյալ Սամվել Հրաչյայի Ստեփանյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Իրեղեն ապացույց ճանաչված և քրեական գործին կցված Սամվել Հրաչյայի Ստեփանյանի անձնական խուզարկությամբ հայտնաբերված Տետրահիդրոկաննաբինոլ» տեսակի թմրամիջոցը հանձնել թիվ 14189725 քրեական վարույթն իրականացնող մարմնին՝ դատավճիռն օրինական ուժի մեջ մտնելուց հետո։
Արտավարութային փաստաթղթերը թողնել կցված քրեական գործին դատավճիռն օրինական ուժի մեջ մտնելուց հետո։
Դատավճիռը կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո մեկամսյա ժամկետում:



ԴԱՏԱՎՈՐ՝ Ս.ԳԶՈԳՅԱՆ