ԵԴ1/1961/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«9» Հոկտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
հանրային մեղադրող՝ ՎԱՂԱՐՇԱԿ ՍԱՐԳՍՅԱՆԻ
մեղադրյալ՝ ՆՈՐԱՅՐ ՆԵՐՍԻՍՅԱՆԻ
դռնբաց դատական նիստում քննելով Նորայր Մարտունի Ներսիսյանի (1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 396 հոդվածի 2-րդ մասով.









1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 14122325 քրեական վարույթով Նորայր Մարտունի Ներսիսյանին ՀՀ քրեական օրենսգրքի 396 հոդվածի 2-րդ մասով մեղադրանք է ներկայացվել հետևյալ արարքի համար.
«[Նա] խախտելով «Թմրամիջոցների և հոգեմետ /հոգեներգործող/ նյութերի մասին» 2002թ. դեկտեմբերի 26-ի ՀՀ օրենքի 11-րդ հոդվածի 2-րդ կետի և ՀՀ Կառավարության 2010թ. մարտի 18-ի թիվ 270-Ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ թմրամիջոցների և հոգեմետ /հոգեներգործուն/ նյութերի շրջանառություն իրականացնելու՝ թմրամիջոց ձեռք բերելու և պահելու թույլտվություն, առանց իրացնելու նպատակի՝ քննությամբ դեռևս չպարզված ժամանակահատվածում և հանգամանքներում, իր անձնական օգտագործման համար, ապօրինի ձեռք է բերել և ապօրինի պահել խոշոր չափերի՝ ընդհանուր` 0.33 գրամ քաշով «Մեթամֆետամին» տեսակի թմրամիջոց, որը 2025 թվականի փետրվարի 4-ին Նորայր Մարտունի Ներսիսյանի կողմից Երևան քաղաքի Բաղրամյան պողոտա թիվ 47/10 հասցեում գետնին նետելուց հետո, հայտնաբերվել և վերցվել է նույն օրը կատարված դեպքի վայրի զննության ժամանակ»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 Նորայր Մարտունի Ներսիսյանի «Ձերբակալման վերաբերյալ» 2025 թվականի փետրվարի 4-ի արձանագրության համաձայն՝ «Նորայր Մարտունի Ներսիսյանը ապօրինի թմրամիջոց ձեռք բերելու, պահելու անմիջականորեն ծագած հիմնավոր կասկածի առկայության հիմքով 2025 թվականի փետրվարի 2-ին՝ ժամը 17:30-ին ձերբակալվել է (...)»: (2)
2.2 «Անձնական խուզարկություն կատարելու մասին» 2025 թվականի փետրվարի 4-ի արձանագրության համաձայն՝ «Նորայր Մարտունի Ներսիսյանի վերարկուի ձախ գրպանից հայտնաբերվել է մոխրացած հետքերով թվով երկու կաթոցիչ (...)»: (3)
2.3 «Զննում կատարելու մասին» 2025 թվականի փետրվարի 4-ի արձանագրության համաձայն.
«(...)
Դեպքի վայր է հանդիսանում Երևան քաղաքի Բաղրամյան 47/10 հասցեն, որտեղ մայթեզրին՝ ճանապարհից մոտ 2-3 մետր աջ՝ գետնին հայտնաբերվեց փայլաթիթեղով փաթաթված զանգված, որի մի մասը թափված էր ասֆալտի վրա: Ասֆալտի թափված զանգվածը՝ սպիտակ բյուրեղանման, վրձինի միջոցով հավաքվեց, լցվեց մեկանգամյա օգտագործման բաժակի մեջ: Փայլաթիթեղով փաթեթավորված զանգվածը կրկին լցվեց մեկանգամյա օգտագործման բաժակի մեջ: Հայտնաբերված զանգվածի ընդհանուր քաշը փայլաթիթեղի հետ միասին կազմեց 0,59 գրամ, իսկ առանց փայլաթիթեղի՝ 0,38 գրամ: Հայտնաբերված սպիտակ բյուրեղանման զանգվածը և փայլաթիթեղը դրվեց ՀՀ ՔԿ փաթեթի մեջ և փաթեթավորվեց կնիքվեց ՀՀ ՔԿ փաթեթով»: (4)
2.4 «Զննություն կատարելու մասին» 2025 թվականի փետրվարի 7-ի արձանագրության համաձայն.
«(...)
Զննության նպատակով լազերային սկավառակը դրվեց համակարգչի մեջ, որի մեջ առկա է թվով 1 տեսագրություն «A05 20250204171121 001» անվանումներով: Տեսագրությունները տեսանկարահանում են Երևան քաղաքի Բաղրամյան 47/10 հասցեում գործող «ԳԵՍ» խանութ սրահի արտաքին պատին տեղադրված տեսախցիկը: Զննության նպատակով բացվեց տեսագրությունը, որի ընդհանուր տևողությունը կազմում է 21 րոպե: Տեսագրությունը ձայնային չէ, ուղեկցվում է գունային ֆոնով: Տեսագրության մեջ երևում է խանութի դրսի հատվածը, մայթեզր, Բաղրամյան պողոտայի ճանապարհը, որտեղ կայանված են ավտոմեքենաներ: Վերևի փախ հատվածում առկա է 02-04-2025, 17:11, իսկ ներքևի աջ հատվածում «Camera 05» գրառումը։ Տեսագրության մեջ առկա ժամային գրաֆիկով, ժամը 17:18-ին երևում են թվով 2 անձինք, որոնք առկա ենրթուղային կանգառի մոտից ոտքով քայլելով գալիս են դեպի մայթեզր:
1-ինի հագին առկա է սև գույնի կոշիկ, սև գույնի տաբատ, սև գույնի վերարկու՝ վրայի սև գույնի բաճկոն, գլխին առկա է սև գույնի ամառային գլխարկ, երկար մազերով, ծխախոտ է ծխում, իսկ երկրորդի հագին առկա է սև գույնի կոշիկ, սև գույնի տաբատ, մուգ գույնի վերարկու, սև գույնի բաճկոն, ուսին գցված պայուսակ, դեմքին դրված է ամառային սև ակնոց։ Երևում է թե ինչպես են նրանց այդ պահին մոտենում թվով 2 ոստիկանության ծառայողներ, ձեռքերով բռնում նկարագրված 1-ին անձի մարմնից, որի ժամանակ վերջինս ձախ ձեռքից նետում է ինչ-որ իր, որը ընկնում է գետնին։
Նկարագրված 1-ին անձին ձեռնաշղթա են գցում և տեղափոխում մեքենա: Այդ ամենից հետո ոստիկանության ծառայողները պլաստմասե բաժակի և քարի միջոցով ապահովում են որպեսի նետված իրը չտեղաշարժվի:
(...)»: (5)

2.5 «Զննություն կատարելու մասին» 2025 թվականի փետրվարի 7-ի արձանագրության համաձայն.
«(...)
Տեսագրությունները տեսանկարահանում են Երևան քաղաքի Բաղրամյան 47/10 հասցեում գործող «ԳԵՍ» խանութ սրահի արտաքին պատին տեղադրված տեսախցիկը: Զննության նպատակով բացվեց տեսագրությունը, որի ընդհանուր տևողությունը կազմում է 21 րոպե: Տեսագրությունը նախկինում զննվել է մանրամասն, այդ պատճառով այժմ զննությունը իրականացվում է արագացված կարգով։ Տեսագրության մեջ առկա ժամային գրաֆիկով, ժամը 17:18-ին երևում են թվով 2 անձինք, որոնք առկա ենրթուղային կանգառի մոտից ոտքով քայլելով գալիս են դեպի մայթեզր:
1-ին անձի հագին առկա է սև գույնի կոշիկ, սև գույնի տաբատ, սև գույնի վերարկու՝ վրայի սև գույնի բաճկոն, գլխին առկա է սև գույնի ամառային գլխարկ, երկար մազերով, ծխախոտ է ծխում, իսկ երկրորդի հագին առկա է սև գույնի կոշիկ, սև գույնի տաբատ, մուգ գույնի վերարկու, սև գույնի բաճկոն, ուսին գցված պայուսակ, դեմքին դրված է ամառային սև ակնոց: Երևում է թե ինչպես են նրանց այդ պահին մոտենում թվով 2 ոստիկանության ծառայողներ, ձեռքերով բռնում նկարագրված 1-ին անձի մարմնից, որի ժամանակ վերջինս ձախ ձեռքից նետում է ինչ-որ իր, որը ընկնում է գետնին:
Մասնակից մեղադրյալ Նորայր Ներսիսյանը դիտելով տեսագրությունը հայտնել է, որ տեսագրության մեջ երևացող 1-ին նկարագրված անձը, ում գլխին առկա է գլխարկ, հանդիսանում է ինքը, տեսագրության մեջ նետում է իր մոտ եղած կրիստալ տեսակի թմրանյութը, իսկ 2-րդ անձը հանդիսանում է Հովհաննեսը, ում հետ պետք է գնային գրավատուն:
(...)»: (6)
2.6 Փորձագետի եզրակացության թիվ 560-Ք-25 եզրակացության «ՀԵՏԵՎՈՒԹՅՈՒՆՆԵՐ»-ի համաձայն.
«(...)
Փորձաքննության ներկայացված 0,33 գրամ քաշով սպիտակ գույնի փոշեբյուրեղային զանգվածը հանդիսանում է «Մեթամֆետամին» տեսակի թմրամիջոց:
(...)»: (7)
2.7 Դատաքննության ընթացքում հետազոտվեց նախաքննության մարմնի 2025 թվականի մայիսի 29-ի որոշմամբ իրեղեն ապացույց ճանաչված 0,33 գրամ քաշով «մեթամֆետամին» տեսակի է թմրամիջոցը:

2025 ԹՎԱԿԱՆԻ ՀՈԿՏԵՄԲԵՐԻ 9-ԻՆ ԴԱՏԱՐԱՆԸ ՄԵՂԱԴՐՅԱԼ ՆՈՐԱՅՐ ՄԱՐՏՈՒՆԻ ՆԵՐՍԻՍՅԱՆԻ ՆԿԱՏՄԱՄԲ ԿԱՅԱՑՐԵԼ Է ՄԵՂԱԴՐԱԿԱՆ ՎԵՐԴԻԿՏ։

ԼՐԱՑՈՒՑԻՉ ԴԱՏԱԼՍՈՒՄՆԵՐ

2.8 Դատվածությունների և հետախուզման առկայության Ձև 8 հարցման պատասխանի համաձայն՝ Նորայր Մարտունի Ներսիսյանը նախկինում դատապարտված չի եղել:
2.9 Միասնական էլեկտրոնային տեղեկատվական համակարգի միջոցով կատարված հարցման արդյունքում ՀՀ քաղաքացիական կացության ակտերի գրանցման տվյալների շտեմարանում Նորայր Մարտունի Ներսիսյանի վերաբերյալ տվյալներ առկա չեն:
2.10 ՀՀ պետական եկամուտների կոմիտեի հարկ վճարողների սպասարկման վարչության պետի 2025 թվականի հունիսի 24-ի գրության համաձայն՝ Նորայր Մարտունի Ներսիսյանը հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Նորայր Մարտունի Ներսիսյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ։ (8)
Քննարկման ենթակա հարցերի վերաբերյալ կողմերի դիրքորոշումները.
2.11 Պատժի վերաբերյալ հարցերը քննարկելիս հանրային մեղադրողը Դատարանին խնդրեց Նորայր Մարտունի Ներսիսյանի նկատմամբ որպես պատիժ նշանակել 1 տարի ժամկետով ազատազրկում:
2.12 Մեղադրյալ Նորայր Ներսիսյանը խնդրեց Դատարանին իր նկատմամբ որպես պատիժ նշանակել տուգանք, և դրա վճարման համար սահմանել ժամկետ։ Պատասխանելով նախագահող դատավորի հարցերին՝ մեղադրյալը հայտնեց, որ չունի եկամուտ, սակայն կփորձի որևէ կերպ վճարել տուգանքը: Մեղադրյալը նաև նշեց, որ չի ցանկանում կատարել հանրային աշխատանքներ։
3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանն արձանագրում է, որ Նորայր Մարտունի Ներսիսյանն քննությամբ դեռևս չպարզված ժամանակահատվածում և հանգամանքներում, առանց իրացնելու նպատակի՝ իր անձնական օգտագործման համար, ապօրինի ձեռք է բերել և ապօրինի պահել խոշոր չափերի՝ 0,33 գրամ քաշով «մեթամֆետամին» տեսակի թմրամիջոց:
3.2 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
-Նորայր Ներսիսյանը նախկինում դատապարտված չի եղել և հանցանքն ավարտվելու օրվան նախորդող 12 ամիսների ընթացքում վերջինի ստացած եկամտի վերաբերյալ տվյալներ առկա չեն։
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի հոկտեմբերի 9-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Նորայր Մարտունի Ներսիսյանին վերագրվող արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ դատապարտված մեղադրյալի արարքի նկատմամբ ենթակա է կիրառման ՀՀ քրեական օրենսգրքի 396 հոդվածի 2-րդ մասը։
4.2 Դատարանն արձանագրում է, որ Նորայր Մարտունի Ներսիսյանի պատասխանատվությունն ու պատիժը մեղմացնող և ծանրացնող հանգամանքներ առկա չեն։
4.3 Կատարած հանցանքի համար մեղադրյալ Նորայր Մարտունի Ներսիսյանը ենթակա է պատժի։
4.4 Պատժի տեսակն ու չափը որոշելիս՝ Դատարանը հաշվի է առնում հետևյալը՝
-Նորայր Մարտունի Ներսիսյանի կատարած հանցանքի հանգամանքները, հանրային վտանգավորության աստիճանն ու բնույթը, թմրամիջոցի տեսակն ու չափը, ինչպես նաև այն, որ նրա կատարած հանցանքը դասվում է բնակչության առողջության դեմ միջին ծանրության հանցագործությունների շարքին։
-Նորայր Մարտունի Ներսիսյանը չունի մշտական եկամուտ, ինչպես նաև չի ցանկացել կատարել հանրային աշխատանքներ, հետևաբար նրա նկատմամբ տուգանքի և հանրային աշխատանքների ձևով պատիժ նշանակելու հնարավորությունը բացակայում է:
-Նորայր Մարտունի Ներսիսյանի անձը բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ Նորայր Մարտունի Ներսիսյանի կատարած հանցագործության բնույթին, վտանգավորության աստիճանին, կատարելու հանգամանքներին, ինչպես նաև հանցավորի անձին համաչափ պատիժ է՝ 1 (մեկ) տարի ժամկետով ազատության սահմանափակումը։
4.5 Միևնույն ժամանակ, ՀՀ քրեական օրենսգրքի 79 հոդվածի 3-րդ մասի կիրառմամբ Նորայր Մարտունի Ներսիսյանի պատժի ժամկետին պետք է հաշվակցել վերջինի՝ 2025 թվականի փետրվարի 4-ից 7-ը փաստացի անազատության մեջ գտնվելու 3 (երեք) օրը՝ ձերբակալման 1 օրը հաշվելով ազատության սահմանափակման ձևով նշանակված պատժի 2 օրվա դիմաց, և վերջնական պատիժ թողնել կրելու ազատության սահմանափակում՝ 11 (տասնմեկ) ամիս 24 (քսանչորս) օր ժամկետով։
4.6 Նորայր Մարտունի Ներսիսյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն:
• Պատժի կրման ընթացքում Նորայր Մարտունի Ներսիսյանին պետք է արգելել՝
-առանց իր նկատմամբ վերահսկողություն իրականացնող իրավասու մարմնի համաձայնության փոխել բնակության վայրը,
-ինչպես նաև 23:00-ից մինչև ժամը 07:00-ն ընկած ժամանակահատվածում բացակայել տնից:
• Միևնույն ժամանակ, Դատարանն արձանագրում է, որ կատարած հանցանքի համար Նորայր Մարտունի Ներսիսյանի նկատմամբ լրացուցիչ պատիժ նշանակելու հիմքերն ու անհրաժեշտությունը դեպքում բացակայում են։
4.7 ՀՀ քրեական դատավարության օրենսգրքի 348 հոդվածի 1-ին մասի 11-13-րդ հարցերին անդրադառնալու անհրաժեշտությունը սույն քրեական գործով բացակայում է։
4.8 Դատավճիռն օրինական ուժի մեջ մտնելուց հետո՝ նախաքննության մարմնի 2025 թվականի մայիսի 29-ի որոշմամբ իրեղեն ապացույց ճանաչված «0,33 գրամ քաշով «մեթամֆետամին» տեսակի է թմրամիջոցը» պետք է հանձնել թիվ 14190125 քրեական վարույթն իրականացնող մարմնին՝ դրա տնօրինման հարցը այդ վարույթի շրջանակներում լուծելու համար:
4.9 Նորայր Մարտունի Ներսիսյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.10 Հաշվի առնելով Նորայր Մարտունի Ներսիսյանի վճարունակության վերաբերյալ տվյալների բացակայության վերաբերյալ քրեական գործում առկա տվյալները՝ Դատարանը գտնում է, որ վարութային ծախսերի հատուցման պարտականությունը մեղադրյալի վրա դրվել չի կարող, հետևաբար այդ հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 100, 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Նորայր Մարտունի Ներսիսյանին մեղավոր ճանաչել ՀՀ քրեական օրենսգրքի 396 հոդվածի 2-րդ մասով նախատեսված հանցանքը կատարելու մեջ և նրա նկատմամբ պատիժ նշանակել ազատության սահմանափակում՝ 1 (մեկ) տարի ժամկետով։
Պատժի կրման ընթացքում Նորայր Ներսիսյանին արգելել՝
-առանց իր նկատմամբ վերահսկողություն իրականացնող իրավասու մարմնի համաձայնության փոխել բնակության վայրը:
-ժամը 23:00-ից մինչև ժամը 07:00-ն ընկած ժամանակահատվածում բացակայել տնից:
2. Դատավճիռն օրինական ուժի մեջ մտնելուց հետո նախաքննության մարմնի 2025 թվականի մայիսի 29-ի որոշմամբ իրեղեն ապացույց ճանաչված «0,33 գրամ քաշով «մեթամֆետամին» տեսակի է թմրամիջոցը» հանձնել թիվ 14190125 քրեական վարույթն իրականացնող մարմնին՝ դրա տնօրինման հարցը այդ վարույթի շրջանակներում լուծելու համար:
3. Նորայր Ներսիսյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ

(1)Ծնված՝ 1983 թվականի հոկտեմբերի 22-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, նախկինում չդատապարտված, չամուսնացած, չի աշխատում, հաշվառված է և բնակվում է Երևան քաղաքի Բաշինջաղյան փողոցի թիվ 147 տանը, որպես խափանման միջոց է կիրառված բացակայելու արգելքը:
(2)Տե՛ս քրեական գործ, հատոր 1, թերթ 7։
(3)Տե՛ս քրեական գործ, հատոր 1, թերթ 8։
(4)Տե՛ս քրեական գործ, հատոր 1, թերթեր 14-18:
(5)Տե՛ս քրեական գործ, հատոր 1, թերթեր 45-47:
(6)Տե՛ս քրեական գործ, հատոր 1, թերթեր 59-62:
(7)Տե՛ս քրեական գործ, հատոր 1, թերթ 84:
(8)2.6-2.8 կետերի վերաբերյալ տե՛ս Դատարանում ստեղծված նյութերը: