ԵԴ1/1930/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«01» հուլիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրող՝ Հասմիկ Հարությունյանի,
մեղադրյալ՝ Գոռ Աբրահամյանի,

դռնբաց դատական նիստում քննելով քրեական գործն ըստ մեղադրանքի՝
Գոռ Բագրատի Աբրահամյանի՝
(ծնված՝ 17.07.1997թ. ք. Եղվարդ, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին մանկահասակ երեխա, նախկինում չդատապարտված, հաշվառված և բնակվող՝ ք. Եղվարդ, Աբովյան 49 տուն հասցեում, որպես խափանման միջոց է կիրառվել բացակայելու արգելքը) ՀՀ քրեական օրենսգրքի 344-րդ հոդվածի 1-ին մասով,

ՊԱՐԶԵՑ

1. Քրեական գործի դատավարական նախապատմությունը.
2023 թվականի փետրվարի 02-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության հատկանիշներով նախաձեռնվել է թիվ 60183623 քրեական վարույթը:
2025 թվականի մայիսի 30-ին ՀՀ դատախազության Երևան քաղաքի Կենտրոն և Նորք-Մարաշ վարչական շրջանների դատախազության դատախազ Հ.Հարությունյանի որոշմամբ՝ թիվ 60183623 քրեական վարույթով Գոռ Բագրատի Աբրահամյանի նկատմամբ ՀՀ քրեական օրենսգրքի 344-րդ հոդվածի 1-ին մասով հարուցվել է հանրային քրեական հետապնդում:
2025 թվականի հունիսի 06-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի՝ Գոռ Բագրատի Աբրահամյանի՝ ՀՀ քրեական օրենսգրքի 344-րդ հոդվածի 1-ին մասով, որին շնորհվել է ԵԴ1/1930/01/25 համարը:
Նույն օրը քրեական գործն էլեկտրոնային եղանակով մակագրվել և 2025 թվականի հունիսի 09-ին հանձնվել է Երևան քաղաքի առաջին ատյանի ընդհանուր իրավասության քրեական դատարանի դատավոր Տաթևիկ Մուրադյանին։
2025 թվականի հունիսի 11-ին Դատարանի կողմից որոշում է կայացվել թիվ ԵԴ1/1930/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի հունիսի 25-ին Դատարանը թիվ ԵԴ1/1930/01/25 քրեական գործով կայացրել է մեղադրական վերդիկտ՝ Գոռ Բագրատի Աբրահամյանին մեղավոր ճանաչելով ՀՀ քրեական օրենսգրքի 344-րդ հոդվածի 1-ին մասով նախատեսված արարքի կատարման մեջ:
2. Մեղադրանքի փաստական նկարագրությունը.
Գոռ Բագրատի Աբրահամյանին մեղադրանք է ներկայացվել ՀՀ քրեական օրենսգրքի 344-րդ հոդվածի 1-ին մասով այն բանի համար, որ «նա, տրանսպորտային միջոցներ վարելու իրավունքը կասեցված վիճակում (կասեցման ժամկետը՝ 2022 թ. հոկտեմբերի 11-ից մինչև 2023 թ. ապրիլի 11-ը), 2022 թվականի դեկտեմբերի 03-ին, ժամը՝ 09:40-ին, Երևան քաղաքի Բաղրամյան փողոցում վարել է «Ֆորդ» մակնիշի 31 UL 481 հաշվառման համարանիշի տրանսպորտային միջոցը, որի վերաբերյալ ՀՀ ՆԳՆ ոստիկանության պարեկային ծառայության պարեկի կողմից կազմվել է վարչական իրավախախտման վերաբերյալ թիվ 8180163338 արձանագրությունը։»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Մեղադրյալ Գոռ Բագրատի Աբրահամյանը, օգտվելով իր սահմանադրական իրավունքից, հրաժարվեց ցուցմունք տալ։ Վերջինս հայտարարեց, որ ընդունում է իրեն առաջադրված մեղադրանքը:
(դատական նիստի արձանագրություն)
- Վարչական իրավախախտման վերաբերյալ թիվ 8200320593 արձանագրությունը, համաձայն որի՝ այն կազմվել է 11.10.2022 թվականին Երևան քաղաքի Շենգավիթ համայնքի Գարեգին Նժդեհ հրապարակում, արձանագրությունը կազմվել է կրտսեր պարեկ Արթուր Սողոմոնյանի կողմից, արձանագրությունը կազմվել է Գոռ Բագրատի Աբրահամյանի նկատմամբ, որով արձանագրվել է, որ խախտումը տեղի է ունեցել ք.Երևան, Գարեգին Նժդեհի հրապարակում, 2022 թվականի հոկտեմբերի 11-ին, ժամը 10։57-ին, կատարված իրավախախտումը՝ վարորդը ընթացքի ժամանակ օգտագործել է հեռախոս, այդ իրավախախտման համար նախատեսված տուգանային միավորի և տվյալ տարում վարորդի նկատմամբ կիրառված տուգանային միավորների հանրագումարը կազմում է 9 կամ ավելի միավոր, որպես իրավախախտման ընթացքում ընդունված որոշում նշված է Գոռ Բագրատի Աբրահամյանի նկատմամբ տրանսպորտային միջոցը վարելու իրավունքը կասեցնել 6 ամիս ժամկետով ներքևի հատվածում «արձանագրությանը ծանոթացա, իմ իրավունքների ու պարտականությունների մասին քաղվածքը և իրավախախտման քննարկման վայրի և ժամանակի վերաբերյալ ծանուցումը ստացա» և «որոշման պատճենը և կատարման կարգի մասին քաղվածքը ստացա» մասերում առկա է ստորագրություն։
(գ.թ. 4, դատական նիստի արձանագրություն)
- 2022 թվականի դեկտեմբերի 3-ի վարչական իրավախախտման վերաբերյալ թիվ 8180163338 արձանագրությունը, համաձայն որի՝ այն կազմվել է ժամը 09։48-ին այն բանի համար, որ Գոռ Բագրատի Աբրահամյանը նույն օրը՝ ժամը 09։40-ին, տրանսպորտային միջոցը վարել է տրանսպորտային միջոցը վարելու իրավունքը կասեցված վիճակում։
(գ.թ. 3, դատական նիստի արձանագրություն)
- ՀՀ ոստիկանության Ճանապարհային ոստիկանության ծառայության էլեկտրոնային ռեգիստրում Գոռ Բագրատի Աբրահամյանի տվյալները, համաձայն որի առկա է կասեցման վերաբերյալ տեղեկություն, այն է՝ 11․10․2022 թվականից մինչև 11․04․2023 թվականը։
(գ.թ. 5, դատական նիստի արձանագրություն)
- 2023 թվականի մայիսի 19-ին կազմված զննում կատարելու մասին արձանագրությունը, համաձայն որի՝ զննության են ենթարկվել վերը նշված փաստաթղթերը:
(գ.թ. 46-47, դատական նիստի արձանագրություն)
- Նախաքննության մարմնի կողմից կայացված արտավարութային փաստաթուղթ ճանաչելու մասին որոշումը, համաձայն որի՝ Գոռ Աբրահամյանի վերաբերյալ վարչական իրավախախտման մասին թիվ 8200320593 որոշումը, ՀՀ ոստիկանության ճանապարհային ոստիկանություն ծառայության էլեկտրոնային ռեգիստրից ստացված քաղվածքի պատճենը, 2022 թվականի դեկտեմբերի 03-ի վարչական իրավախախտման վերաբերյալ թիվ 8180163338 արձանագրությունը, վարչական տույժ նշանակելու մասին թիվ 2214330866, 2214456978, 2214497651, 2214628455, 2214892983, 2214923017, 2214943456, 2215070440 և 22151228908 որոշումները ճանաչվել են արտավարութային փաստաթղթերը։
(գ.թ. 74-75, դատական նիստի արձանագրություն)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Գոռ Բագրատի Աբրահամյանը նախկինում դատապարտված չի եղել:
 Միասնական էլեկտրոնային տեղեկատվական համակարգում կատարված հարցման պատասխանի համաձայն՝ ՊԵԿ տվյալների շտեմարանում Գոռ Աբրահամյանի կողմից հանցանքը կատարելուն նախորդող տասներկու ամիսների ընթացքում ստացած եկամուտների վերաբերյալ տվյալները բացակայում են:
 Գոռ Բագրատի Աբրահամյանի երեխայի ծննդյան պետական վկայականի պատճենը, համաձայն որի՝ Գոռ Բագրատի Աբրահամյանի խնամքին է գտնվում 14.08.2024 թվականին ծնված Ալեքս Գոռի Աբրահամյանը:
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Գոռ Բագրատի Աբրահամյանը, տրանսպորտային միջոցներ վարելու իրավունքը կասեցված վիճակում (կասեցման ժամկետը՝ 2022 թ. հոկտեմբերի 11-ից մինչև 2023 թ. ապրիլի 11-ը), 2022 թվականի դեկտեմբերի 03-ին՝ ժամը՝ 09:40-ին, Երևան քաղաքի Բաղրամյան փողոցում վարել է «Ֆորդ» մակնիշի 31 UL 481 հաշվառման համարանիշի տրանսպորտային միջոցը, որի վերաբերյալ ՀՀ ՆԳՆ ոստիկանության պարեկային ծառայության պարեկի կողմից կազմվել է վարչական իրավախախտման վերաբերյալ թիվ 8180163338 արձանագրությունը։
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Գոռ Բագրատի Աբրահամյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Գոռ Բագրատի Աբրահամյանը նախկինում դատապարտված չի եղել, մեղսագրվող հանցանքը ավարտվելու օրվան նախորդող 12 ամիսների ընթացքում վերջինիս ստացած ընդհանուր եկամուտների վերաբերյալ տվյալները բացակայում են, Գոռ Բագրատի Աբրահամյանի խնամքին է գտնվում մեկ մանկահասակ երեխա:
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Գոռ Բագրատի Աբրահամյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Գոռ Բագրատի Աբրահամյանը կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 344-րդ հոդվածի 1-ին մասը:
Դատարանը, հաստատված համարելով հանցագործության և դրա կատարման մեջ Գոռ Բագրատի Աբրահամյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Գոռ Բագրատի Աբրահամյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը, ինչպես նաև խնամքին անչափահաս երեխայի առկայությունը։
Դատարանը միաժամանակ արձանագրում է, որ Գոռ Աբրահամյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Դատարանը, հաշվի առնելով Գոռ Բագրատի Աբրահամյանի կատարած հանցանքի հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 1-ին մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործության կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ ՀՀ քրեական օրենսգրքի 344-րդ հոդվածի 1-ին մասով հիմնական պատիժ պետք է նշանակել տուգանքի ձևով, ընդ որում տուգանքի չափ սահմանելով՝ հանցանքը կատարելու պահին նվազագույն աշխատավարձի հնգապատիկի՝ 340.000 (երեք հարյուր քառասուն հազար) ՀՀ դրամ գումարի չափով։
Դատարանը միաժամանակ գտնում է, որ կատարած հանցանքի համար Գոռ Բագրատի Աբրահամյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Միաժամանակ հաշվի առնելով վերջինիս գույքային դրության վերաբերյալ գործում առկա տվյալները և մեղադրյալի հայտարարությունը՝ Դատարանը գտնում է, որ Գոռ Բագրատի Աբրահամյանի նկատմամբ նշանակվող տուգանքի վճարումը պետք է տարաժամկետել և նրան թույլատրել որպես պատիժ նշանակված ՝ 340.000 (երեք հարյուր քառասուն հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա մյուս հարցերին, արձանագրում է, որ գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական վարույթով առկա չեն նաև վարութային ծախսեր:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ և 352-353-րդ հոդվածներով` Դատարանը

ՎՃՌԵՑ

Գոռ Բագրատի Աբրահամյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել տուգանք՝ նվազագույն աշխատավարձի հնգապատիկի՝ 340.000 (երեք հարյուր քառասուն հազար) ՀՀ դրամի չափով:
Գոռ Բագրատի Աբրահամյանին թույլատրել որպես պատիժ նշանակված՝ 340.000 (երեք հարյուր քառասուն հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Գոռ Բագրատի Աբրահամյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել։
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ