ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
քրեական գործ թիվ ԵԴ1/1934/01/25
Երևան քաղաքի առաջին ատյանի ընդհանուր իրավասության քրեական դատարանը,

ՆԱԽԱԳԱՀՈՒԹՅԱՄԲ՝ ԴԱՏԱՎՈՐ Ա.ԴԱՆԻԵԼՅԱՆԻ,
ՔԱՐՏՈՒՂԱՐՈՒԹՅԱՄԲ՝ Լ․ՄԱԿԱՐՅԱՆԻ,

ՄԱՍՆԱԿՑՈՒԹՅԱՄԲ`
ՀԱՆՐԱՅԻՆ ՄԵՂԱԴՐՈՂ,
ՀՀ ԳԼԽԱՎՈՐ ԴԱՏԱԽԱԶՈՒԹՅԱՆ
ԲՆԱԿՉՈՒԹՅԱՆ ԱՌՈՂՋՈՒԹՅԱՆ ԴԵՄ
ՈՒՂՂՎԱԾ ՀԱՆՑԱԳՈՐԾՈՒԹՅՈՒՆՆԵՐԻ
ԳՈՐԾԵՐՈՎ ՎԱՐՉՈՒԹՅԱՆ
ԱՎԱԳ ԴԱՏԱԽԱԶ Ռ․ԳԵՎՈՐԳՅԱՆԻ,

ՄԵՂԱԴՐՅԱԼ Ռ․ԽԱՉԱՏՐՅԱՆԻ,
ՊԱՇՏՊԱՆ Ս.ՅՈՒԶԲԱՇՅԱՆԻ,

2025 թվականի հոկտեմբերի 27-ին Երևան քաղաքում
դատարանում, դռնբաց դատական նիստում քննելով քրեական գործն ըստ մեղադրանքի
Ռազմիկ Սերյոժայի Խաչատրյանի
(ծնված ․․․ , հայ, ՀՀ քաղաքացի, ութամյա կրթությամբ, ամուսնալուծված, ըստ իր հայտարարության՝ խնամքին հաշմանդամ քույրը, մասնավոր կարգով աշխատում է որպես բանվոր, հաշվառված է և բնակվում է ․․․ )
ՀՀ քրեական օրենսգրքի 46-399-րդ հոդվածի 1-ին մասով, 44-396-րդ հոդվածի 1-ին մասով և 396-րդ հոդվածի 2-րդ մասով,
Պ Ա Ր Զ Ե Ց
Գործի դատավարական ընթացքը.
1. 2024 թվականի օգոստոսի 5-ին հանցանք կատարած լինելու անմիջականորեն ծագած հիմնավոր կասկածով ձերբակալվել է Ռազմիկ Սերյոժայի Խաչատրյանը։
2. 2024 թվականի օգոստոսի 5-ին ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության երրորդ վարչությունում (այսուհետ՝ նաև Նախաքննության մարմին) ՀՀ քրեական օրենսգրքի 393-րդ հոդվածի 1-ին մասով և 399-րդ հոդվածի 1-ին մասով նախաձեռնվել է թիվ 83-0436-24 քրեական վարույթը։
3․ Հսկող դատախազի 2024 թվականի օգոստոսի 6-ի որոշմամբ քննիչի միջնորդության հիման վրա Ռազմիկ Սերյոժայի Խաչատրյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 46-399-րդ հոդվածի 1-ին մասով։
3․1. Նախաքննության մարմնի կողմից նույն օրը մեղադրյալ Ռազմիկ Սերյոժայի Խաչատրյանին ներկայացվել է մեղադրանք։
4․ Երևան քաղաքի առաջին ատյանի ընդհանուր իրավասության քրեական դատարանի 2024 թվականի օգոստոսի 08-ի որոշմամբ մեղադրյալ Ռազմիկ Սերյոժայի Խաչատրյանի նկատմամբ կալանքը որպես խափանման միջոց կիրառելու վերաբերյալ Նախաքննության մարմնի միջնորդությունը մերժվել է՝ հիմնավոր կասկածը ակնհայտ անմիջականորեն ծագած չլինելու հիմքով:
5․ Նախաքննության մարմնի 2024 թվականի օգոստոսի 08-ի որոշմամբ մեղադրյալ Ռազմիկ Սերյոժայի Խաչատրյանի նկատմամբ որպես խափանման միջոց է ընտրվել բացակայելու արգելքը:
6. Նախաքննության մարմինը 2024 թվականի օգոստոսի 09-ին որոշում է կայացրել ազատության մեջ գտնվող մեղադրյալին դատարան ներկայացնելու համար ձերբակալելու մասին:
6.1. Նույն օրը ժամը 23:00-ին Ռազմիկ Սերյոժայի Խաչատրյանը ձերբակալվել է:
7․ Երևան քաղաքի առաջին ատյանի ընդհանուր իրավասության քրեական դատարանի 2024 թվականի օգոստոսի 10-ի որոշմամբ մեղադրյալ Ռազմիկ Սերյոժայի Խաչատրյանի նկատմամբ կալանքը որպես խափանման միջոց կիրառելու վերաբերյալ Նախաքննության մարմնի միջնորդությունը մերժվել է:
8. ՀՀ Վերաքննիչ քրեական դատարանի 2024 թվականի սեպտեմբերի 13-ի որոշմամբ Հսկող դատախազի հատուկ վերանայման բողոքը բավարարվել է մասնակի, Երևան քաղաքի առաջին ատյանի ընդհանուր իրավասության քրեական դատարանի 2024 թվականի օգոստոսի 10-ի որոշումը բեկանվել է, բեկանված մասով կայացվնել դրան փոխարինող դատական ակտ` հաստատված համարելով մեղադրյալ Ռազմիկ Սերյոժայի Խաչատրյանի առնչությունը ՀՀ քրեական օրենսգրքի 46-399-րդ հոդվածի 1-ին մասով իրեն մեղսագրված արարքին, իսկ ՀՀ քրեական դատավարության օրենսգրքի 116-րդ հոդվածի 2-րդ մասով նախատեսված կալանավորման նպատակների առկայության կամ բացակայության հարցը քննության առնելու նպատակով դատական գործն ուղարկվել է նույն դատարան՝
նոր քննության:
9. Երևան քաղաքի առաջին ատյանի ընդհանուր իրավասության քրեական դատարանի 2024 թվականի դեկտեմբերի 17-ի որոշմամբ մեղադրյալ Ռազմիկ Սերյոժայի Խաչատրյանի նկատմամբ կալանքը որպես խափանման միջոց կիրառելու վերաբերյալ Նախաքննության մարմնի միջնորդությունը մերժվել է:
10. Հսկող դատախազի 2025 թվականի մարտի 12-ի որոշմամբ քննիչի միջնորդության հիման վրա Ռազմիկ Սերյոժայի Խաչատրյանի նկատմամբ հարուցված հանրային քրեական հետապնդման ժամկետը կասեցվել է չորս ամիս ժամկետով՝ ՀՀ քրեական դատավարության օրենսգրքի 193-րդ հոդվածի 3-րդ մասի հիմքով:
11. Հսկող դատախազի 2025 թվականի մայիսի 19-ի որոշմամբ քննիչի միջնորդության հիման վրա Ռազմիկ Սերյոժայի Խաչատրյանի նկատմամբ կասեցված հանրային քրեական հետապնդման ժամկետը վերսկսվել է՝ կասեցման հիմքը վերանալու պատճառաբանությամբ:
12. 2025 թվականի մայիսի 22-ին Նախաքննության մարմնում ՀՀ քրեական օրենսգրքի 393-րդ հոդվածի 2-րդ մասի 3-րդ կետով, 396-րդ հոդվածի 1-ին մասով, 396-րդ հոդվածի 2-րդ մասով և 44-396-րդ հոդվածի 1-ին մասով նախաձեռնվել է թիվ 84115225 քրեական վարույթը։
13. Նախաքննության մարմնի 2025 թվականի մայիսի 22-ի որոշմամբ թիվ 84115225 քրեական վարույթը միացվել է թիվ 83-0436-24 քրեական վարույթին՝ նախաքննությունը շարունակելով թիվ 83-0436-24 քրեական վարույթի համարի ներքո:
14. Նախաքննության մարմնի 2025 թվականի մայիսի 23-ի որոշմամբ 192204747 համարի ծանրոցը (տուփը) և դրանում առկա «մարիխուանա» տեսակի թմրամիջոցը, «հաշիշի յուղ» տեսակի թմրամիջոցների պարունակությամբ թվով 3 էլեկտրոնային և «զոլպիդեմ» տեսակի հոգեմետ նյութի պարունակությամբ դեղահատերի սրվակին փոխարինված սրվակը և դրանում առկա դեղահատերին փոխարինված զանգվածների ու սրվակի
պարունակությամբ թվով 2 թափանցիկ փաթեթները ճանաչվել են որպես իրեղեն ապացույց։
15. Նախաքննության մարմնի 2025 թվականի մայիսի 26-ի որոշմամբ 0,28 գրամ քաշով «զոլպիդեմ» տեսակի հոգեմետ նյութի պարունակությամբ թվով 28 դեղահատերը, ընդհանուր 2,16 գրամ քաշով «հաշիշի յուղ» տեսակի թմրամիջոցի թվով երեք հատ ծխամորճերը, ընդհանուր 11,78 գրամ քաշով «մարիխուանա» տեսակի թմրամիջոցը, ինչպես նաև թվով երեք փաթեթներում առկա «բուպրենորֆին» տեսակի թմրամիջոցի պարունակությամբ 0,292 գրամ քաշով թվով մեկ հատ դեղահատը, «մեթադոն» տեսակի թմրամիջոցի պարունակությամբ ընդհանուր 0.882 գրամ քաշով թվով վեց հատ դեղահատերը, «տետրահիդրոկաննաբինոլ /ՏՀԿ/» տեսակի թմրամիջոցի հետքեր կրող թվով վեց հատ ապակյա
ծխամորճը, «տետրահիդրոկաննաբինոլ /ՏՀԿ/» տեսակի թմրամիջոց
պարունակող թվով մեկ հատ «Կանեփ /Canabis խմբի բույս/» տեսակի խոտաբույսը ճանաչվել են որպես իրեղեն ապացույց։
16. Նախաքննության մարմնի 2025 թվականի մայիսի 26-ի որոշմամբ Ռազմիկ Սերյոժայի Խաչատրյանին պատկանող «Samsung Galaxy S10+» մոդելի և Լիանա Դեմիրճյանին
պատկանող «Samsung Galaxy A71» մոդելի բջջային հեռախոսները ճանաչվել են որպես իրեղեն ապացույց։
17. Հսկող դատախազի 2025 թվականի մայիսի 27-ի որոշմամբ քննիչի միջնորդության հիման վրա Ռազմիկ Սերյոժայի Խաչատրյանին 46-399-րդ հոդվածի 1-ին մասով ներկայացված մեղադրանքը փոփոխվել, լրացվել է և Ռազմիկ Սերյոժայի Խաչատրյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 46-399-րդ հոդվածի 1-ին մասով, 44-396-րդ հոդվածի 1-ին մասով և 396-րդ հոդվածի 2- րդ մասով:
18. Նախաքննության մարմնի կողմից նույն օրը մեղադրյալ Ռազմիկ Սերյոժայի Խաչատրյանին ներկայացվել է մեղադրանք։
19. Հսկող դատախազի 2025 թվականի մայիսի 29-ի որոշմամբ քննիչի միջնորդության հիման վրա Ռազմիկ Սերյոժայի Խաչատրյանի նկատմամբ ՀՀ քրեական օրենսգրքի 396-րդ հոդվածի 1-ին մասով և 404-րդ հոդվածի 1-ին մասով հանրային քրեական հետապնդում չի հարուցվել՝ իրեն մեղսագրվող արարքները կատարած չլինելու հիմքով:
20. Նախաքննության մարմնի 2025 թվականի մայիսի 29-ի որոշմամբ թիվ 83-0436-24 84115225 քրեական վարույթից Ռազմիկ Սերյոժայի Խաչատրյանի վերաբերյալ ՀՀ քրեական օրենսգրքի 46-399-րդ հոդվածի 1-ին մասի, 44-396-րդ հոդվածի 1-ին մասի և 396-րդ հոդվածի 2-րդ մասի հատկանիշներով անջատվել է քրեական վարույթ՝ նախաքննությունը շարունակելով թիվ 84115225 քրեական վարույթի համարի ներքո:
21․ 2025 թվականի հունիսի 06-ին թիվ 84115225 քրեական վարույթի նյութերը մեղադրական եզրակացությամբ ստացվել են Երևան քաղաքի առաջին ատյանի ընդհանուր իրավասության քրեական դատարանում (այսուհետ՝ նաև Դատարան):
2025 թվականի հունիսի 11-ին որոշում է կայացվել քրեական գործով վարույթ ստանձնելու և նախնական դատալսումներ նշանակելու մասին։ Նախնական դատալսումներով դատական նիստը նշանակվել է հունիսի 23-ին:
21.1. Հիմնական դատալսումների ընթացքում ի հայտ են եկել այնպիսի փաստեր, որոնց հիման վրա վարույթը ենթակա է եղել փոխանցման ըստ ընդդատության՝ սակայն կողմերի համաձայնությամբ՝ ղեկավարվելով ՀՀ քրեական դատավարության օրենսգրքի 263-րդ հոդվածի 2-րդ մասի պահանջով՝ Դատարանը որոշել է շարունակել է վարույթը:


Մեղադրանքի փաստական նկարագրությունը.
22. Մեղադրյալ Ռազմիկ Սերյոժայի Խաչատրյանին ՀՀ քրեական օրենսգրքի 46-399-րդ հոդվածի 1-ին մասով, 44-396-րդ հոդվածի 1-ին մասով և 396-րդ հոդվածի 2-րդ մասով մեղադրանք է ներկայացվել հետևյալ արարքների․ «(...) նա, խախտելով «Թմրամիջոցների և հոգեմետ (հոգեներգործուն) նյութերի մասին» ՀՀ օրենքի,
«Թմրամիջոցների և հոգեմետ (հոգեներգործուն) նյութերի և դրանց պրեկուրսորների
շրջանառության կանոնները սահմանելու մասին» ՀՀ կառավարության 2010 թվականի
մարտի 18-ի թիվ 270-Ն որոշման պահանջները, օժանդակել է ԱՄՆ-ից Եվրասիական
տնտեսական միության մաքսային սահմանով և ՀՀ պետական սահմանով «Թմրամիջոցների
և հոգեմետ (հոգեներգործուն) նյութերի մանր, զգալի, խոշոր և առանձնապես խոշոր չափերը
(...) սահմանելու մասին» ՀՀ կառավարության 2018 թվականի հունիսի 27-ի N 707-Ն
որոշման N 1 հավելվածով սահմանված, զգալի չափերով «Մարիխուանա» և զգալի չափերով
«Հաշիշի յուղ» տեսակի թմրամիջոցների մաքսանենգությանը և փորձել է առանց իրացնելու
նպատակի ապօրինի ձեռք բերել դրանք:
Այսպես՝
ՀՀ քաղաքացի Ռազմիկ Սերյոժայի Խաչատրյանը, նպատակ ունենալով առանց
իրացնելու նպատակի ապօրինի ձեռք բերել զգալի չափերով՝ 11,83 գրամ «Մարիխուանա» և
զգալի չափերով՝ ընդհանուր 2,31 գրամ «Հաշիշի յուղ» տեսակի թմրամիջոցներ, ԱՄՆ-ից
Եվրասիական տնտեսական միության մաքսային սահմանով և ՀՀ պետական սահմանով
մաքսանենգությամբ՝ մաքսային հսկողությունից թաքցնելու և դրա տեղափոխման համար
սահմանված արգելքը խախտելու եղանակով թմրամիջոց ապօրինի տեղափոխելուն
օժանդակելու դիտավորությամբ, ԱՄՆ-ում բնակվող կնոջ դստեր՝ Քրիստինա Շաքարյանի
հետ ունեցած պայմանավորվածության համաձայն, նախապես խոստացել է առանց
իրացնելու նպատակի ապօրինի ձեռք բերել վերոնշյալ թմրամիջոցները:
Դրանից հետո, ձեռք բերված պայմանավորվածության համաձայն, ԱՄՆ-ում
բնակվող Քրիստինա Շաքարյանը վարույթով չպարզված հանգամանքներում և
ժամանակահատվածում ձեռք բերված զգալի չափերով՝ 11,83 գրամ «Մարիխուանա» և
զգալի չափերով՝ ընդհանուր 2,31 գրամ «Հաշիշի յուղ» տեսակի թմրամիջոցներն այլ իրերի
հետ տեղադրել է ստվարաթղթե արկղի մեջ և, նախապես ստացած լինելով Լիանա
Դեմիրճյանի անձնական տվյալները, նշված ծանրոցը Լաուրա Դեմիրճյանի անունից Լիանա
Դեմիրճյանի անվամբ ՀՀ առաքելու համար ԱՄՆ-ում հանձնել է բեռնափոխադրող «Տրանս
Շիփփինգ» ՍՊ ընկերությանը:
ՀՀ ՊԵԿ ՄԴՊ վարչության աշխատակիցների կողմից մաքսային հսկողության
շրջանակներում Լիանա Դեմիրճյանի անվամբ ապօրինի ՀՀ տեղափոխված ծանրոցում
հայտնաբերվել են զգալի չափերով՝ 11,83 գրամ «Մարիխուանա» և զգալի չափերով
ընդհանուր 2,31 գրամ «Հաշիշի յուղ» տեսակի թմրամիջոցները, որոնք իրականացված
«վերահսկելի մատակարարում և գնում» օպերատիվ-հետախուզական միջոցառման
շրջանակներում փոխարինվել են նմանատիպ այլ զանգվածներով:
Մաքսանենգությամբ՝ մաքսային հսկողությունից թաքցնելու և դրա տեղափոխման
համար սահմանված արգելքը խախտելու եղանակով Լիանա Դեմիրճյանի անվամբ
ապօրինի ՀՀ տեղափոխված վերոնշյալ ծանրոցի ՀՀ-ում գտնավելու մասին տեղեկացվելուց
հետո, Լիանա Դեմիրճյանն այդ մասին հայտնել է Ռազմիկ Խաչատրյանին:
Այնուհետև, 2024 թվականի օգոստոսի 5-ին Ռազմիկ Խաչատրյանը տեղեկանալով,
որ «Մարիխուանա» և «Հաշիշի յուղ» տեսակի թմրամիջոցների պարունակությամբ ծանրոցն
առաքվել է Գյումրի քաղաքի Շահումյան փողոցի 188 Ա շենքի բակ, իսկ Լիանա Դեմիճյանն
անտեղյակ լինելով ծանրոցում վերոնշյալ թմրամիջոցների առկայության մասին, միասին
դուրս են եկել նշված շենքի բակ, որտեղ Ռազմիկ Խաչատրյանը փորձել է ապօրինի ձեռք
բերել վերոնշյալ ծանրոցը, սակայն այդ ժամանակ Լիանա Դեմիրճյանի հետ ձերբակալվել են
ՀՀ ՊԵԿ ՄԴՊ վարչության աշխատակիցների կողմից, իսկ «վերահսկելի մատակարարում և
գնում» օպերատիվ-հետախուզական միջոցառման շրջանակներում վերոնշյալ
թմրամիջոցներին փոխարինված զանգվածներով ծանրոցը հայտնաբերվել է Լիանա
Դեմիրճյանի անձնական խուզարկությամբ:
Բացի այդ, Ռազմիկ Սերյոժայի Խաչատրյանը, խախտելով «Թմրամիջոցների և
հոգեմետ (հոգեներգործուն) նյութերի մասին» ՀՀ օրենքի, «Թմրամիջոցների և հոգեմետ
(հոգեներգործուն) նյութերի և դրանց պրեկուրսորների շրջանառության կանոնները
սահմանելու մասին» ՀՀ կառավարության 2010 թվականի մարտի 18-ի թիվ 270-Ն որոշման
պահանջները, քրեական վարույթով չպարզված հանգամանքներում և ժամանակահատվածում անձնական գործածման համար, առանց իրացնելու նպատակի ապօրինի ձեռք է բերել և իր հաշվառման ու բնակության՝ Շիրակի մարզ, քաղաք Գյումրի, Ղանդիլյան փողոց, 84 շենք, 16 բնակարան հասցեում ապօրինի պահել «Թմրամիջոցների և հոգեմետ (հոգեներգործուն) նյութերի մանր, զգալի, խոշոր և
առանձնապես խոշոր չափերը (...) սահմանելու մասին» ՀՀ կառավարության 2018 թվականի
հունիսի 27-ի N 707-Ն որոշման N 1 հավելվածով սահմանված, խոշոր չափերով՝ 0,008 գրամ
«Բուպրենորֆին» տեսակի թմրամիջոցի պարունակությամբ թվով 1 դեղահատ և զգալի
չափերով՝ ընդհանուր 0,048 գրամ «Մեթադոն» տեսակի թմրամիջոցի պարունակությամբ
թվով 6 դեղահատեր, որոնք հայտնաբերվել են վերոնշյալ հասցեում կատարված
խուզարկության ժամանակ»:

Դատաքննության ընթացքում հետազոտված թույլատրելի ապացույցները.
23. Ցուցմունք տալուց հրաժարվելու հիմքով հրապարակվեց մեղադրյալ Ռազմիկ Սերյոժյայի Խաչատրյանի հարցաքննության 2024 թվականի օգոստոսի 06-ի արձանագրությունը, որի համաձայն՝ իրեն մեղավոր չի ճանաչում: 23 տարի բնակվել է ԱՄՆ-ում, ՀՀ քաղաքացի է, բնակվել է Կալիֆորնիա նահանգի Հոլիվուդ քաղաքում իր կնոջ՝ Լաուրա Կարապետի Շաքարյանի, վերջինիս դստեր՝ Քրիստինա Վահրամի Շաքարյանի (26-30 տարեկան է), որդու՝ Լևոն Վահրամի Շաքարյանի (21 տարեկան է), Քրիստինա Շաքարյանի ամուսնու՝ Գարոլդ Լևցկինի (մոտ 25-30 տարեկան է) հետ միասին: Իր որդին՝ Սպարտակ Ռազմիկի Խաչատրյանը ևս բնակվում է ԱՄՆ-ում ՝մոտ 20 տարի և ավել:
ՀՀ ներմուծված թիվ 192204747 ծանրոցն ուղարկել է Քրիստինա Շաքարյանը, տեղյակ չի եղել դրանում առկա թմրամիջոցների վերաբերյալ: Լաուրայի որդին՝ Լևոն Շաքարյանը, օգտագործում է «մարիխուանա» և «հաշիշի յուղ» տեսակի թմրամիջոցներ ԱՄՆ-ում, հենց ինքն էլ տեղադրել, պահել է քաղցրավենիքի տուփի մեջ նշված՝ ՀՀ առաքված թմրամիջոցները, իսկ Քրիստինան՝ չիմանալով, որ քաղցրավենիքի մեջ թմրամիջոց է տեղադրված, նշված քաղցրավենիքը տեղադրել է ծանրոցում և հանձնել առաքման: Վարույթն իրականացնող մարմնի այն հարցին, որ Ռ.Խաչատրյանը ձերբակալման արձանագրությամն հայտնել է, որ ինքը տեղյակ է եղել ծանրոցում առկա «մարիխուանա»-յի մասին և այն նախատեսված է եղել իր համար, վերջինս հայտնեց, որ հրաժարվում է իր հայտնածներից, քանի որ առանց պաշտպանի ներկայության է հայտնել: Ինքը ԱՄՆ-ում օգատագործում է «մարիխուանա» տեսակի թմրամիջոց: Ինքը ԱՄՆ-ում բնակվող նշված անձանցից թմրամիջոց չի պահանջել և տեղյակ չի եղել, որ ծանրոցի մեջ թմրամիջոց է առկա: Նշված ծանրոցը Լիանան պետք է ստանար և փոխանցեր իր կնոջը՝ Լաուրային: Լաուրան տեղյակ չի եղել թմրամիջոցների վերաբերյալ և չի օգտագործում թմրամիջոցներ: Լիանա Դեմիրճյանը թմրամիջոցներ չի օգտագործում ու թմրամիջոցների անօրինական շրջանառության մեջ ներգրավված չէ:
(տե՛ս դատական նիստի արձանագրություն, հատոր 1 գ․թ․ 113-117)
23.1. Նույն հիմքով հրապարակվեց մեղադրյալ Ռազմիկ Սերյոժյայի Խաչատրյանի հարցաքննության 2025 թվականի մայիսի 23-ի արձանագրությունը, որի համաձայն՝ Լիանա Կարապետի Դեմիրճյանի անվամբ ուղարկված ծանրոցում առկա «զոլպիդեմ» տեսակի դեղորայքը պատկանել է իր կնոջը՝ Լաուրա Դեմիրճյանին: Վերջինս ունեցել է սրտի բաց վիրահատություն և նշված դեղորայքն օգտագործել է բժշկի նշանակմամբ:
Ի պատասխան այն հարցի, որ նախկինում ցուցմունքով հայտնել է, որ Լևոն Շաքարյանն ընտանիքի ադամներից թաքցնելու համար ծանրոցում հայտնաբերված թմրամիջոցները տեղադրել է քաղցրավենիքի տուփերի մեջ, սակայն դրանց հետ հայտնաբերվել են նաև զոլպիդեմ տեսակի դեղորայք, որոնք ըստ իր ցուցմունքի հանդիսանում են Լաուրա Դեմիրճյանինը, ապա ինչպես է նաև նշված դեղորայքը հայտնվել թմրամիջոցների հետ միևնույն փաթեթում՝ նշեց, որ նշվածի վերաբերյալ ինքը տեղեկություն չունի:
Ի պատասխան այն հարցի, որ նախկինում ցուցմունքով հայտնել է թմրամիջոցները քաղցրավենիքի տուփերում հայտնվելու վերաբերյալ հանգամանքներ, նշված պայմաններում ինչպես տեղեկություն չունի վերոնշյալ հարցի կապակցությամբ՝ նշեց, որ նշվածի վերաբերյալ իրեն հայտնել է Լևոն Շաքարյանը և ինքը չի պնդում նշված հանգամանքը, իրեն այդպես է հայտնել Լևոն Շաքարյանը, ինքն իրականում չի տեսել որտեղ և ինչ պայմաններում է տեղադրվել թմրամիջոցները և դեղորայքը: Ի պատասխան այն հարցի, որ իր
բնակության հասցեի խուզարկությամբ հայտնաբերվել է «բուպրենորֆին»
և «մեթադոն» տեսակի թմրամիջոցների պարունակությամբ դեղահատեր, ինչպես նաև թմրամիջոցի հետքերի պարունակությամբ կաթուցիչներ և էլեկրոնային ծխամորճ, ինչպես նաև «ՏՀԿ» տեսակի թմրամիջոցին պատկանող «Կանեփ» խոտաբույս՝ նշեց, որ նշված դեղորայքը վաղուց եղել է բնակարանում, դրանք պատկանել են իր հորը, քանի որ ոտքը կտրած է եղել, ունեցել է ցավեր, ուստի իր կարծիքով նրան է պականել նշված դեղորայքը, քանի որ դրանք հայտնաբերվել են նրա դարակից: Հոր անձնական տվյալներն են՝ Խաչատրյան Սերյոժա Սեդրակի /ծնված՝ 11.11.1945թ.-2007թ./։ Հայտնաբերված սերմերը, կաթուցիչները և խոտաբույսը պատկանել են իրեն, կաթուցիչի մեջ նախկինում առկա «մարիխուանա» տեսակի թմրամիջոցմ օգտագործել է ինքը, որոնք քաղել է ամայի տարածքներից, իսկ էլեկտրոնային ծխամորճը գտել է դատարկ վիճակում: Խոտաբույսը ևս քաղել է ամայի տարածքից:
Ի պատասխան այն հարցի, որ նախկինում ցուցմունքով հայտնել է, որ «մարիխուանա» տեսակի թմրամիջոց է օգատգործել ԱՄՆ-ում, իսկ հիմա հայտնում է, որ օգտագործել է նաև ՀՀ- ում՝ նշեց, որ օգտագործել է նաև ՀՀ-ում և իր ձերբակալման պահին էլ է հայտնել օգատգործման փաստի վերաբերյալ, երևի պատասխանի հետ կապված սխալմունք է տեղի ունեցել:
Ի պատասխան այն հարցի, որ իր բջջային հեռախոսի թվային խուզարկության արդյուքում ի հայտ են եկել համպատասխան բովանդակությամբ հաղորդագրություններ՝ նշեց, որ առաջին հաղորդագրությունները վերաբերել են քաղցրավենիքին, քանի
որ միշտ ուղարկվում է քաղցրավենիք իր ընտանիքի համար, իսկ հաշիշի յուղ տեսակի
թմրամիջոցների լուսանկարները ուղարկել է իր կինը, քանի որ Լևոն Շաքարյանը
օգտագործում է նշված թմրամիջոցներից և ինքն էլ զուտ հետաքրքրության համար ասել է, որ
ուղարկեն նկարները:
Ի պատասխան այն հարցի, որ նախկինում ինքը հայտնել է, որ Լևոն Շաքարյանը թմրամիջոցի պահել է քացրավենիքի տուփի մեջ, ինչպես նաև Լևոն Շաքարյանը ցուցմունքներով հայտնել է, որ հենց վերջինիս կողմից իր ընտանիքի անդամներից թմրամիջոցներ օգտագործելու գաղտնիության հետևանքով է թմրամիջոցը տեղադրվել քաղցրավենիքի տուփի մեջ և ուղարկվել ՀՀ, իսկ հիմա հայտնում է, որ վերջինիս կողմից թմրամիջոց օգատգործելն իր և իր ընտանիքի համար հանրահայտ փաստ է եղել վաղուց՝ նշեց, որ իրենք տեղյակ եղել են, որ Լևոն Շաքարյանը օգատգործում է թմրամիջոցներ, քանի որ նա չափահաս է և կարող է ազատ գնել նշված թմրամիջոցներից:
(տե՛ս դատական նիստի արձանագրություն, հատոր 3 գ․թ․ 92-97)
24. Վկա Լիանա Կարապետի Դեմիրճյանի ցուցմունքը, որի համաձայն՝ Ռազմիկ Խաչատրյանը իր քրոջ ամուսինն է, սակայն նրանց ամուսնությունը պաշտոնապես գրանցված չէ։ Քանի որ նրանք երկար ժամանակ չեն բնակվել Հայաստանի Հանրապետությունում, շփումը եղել է սահմանափակ։ ՀՀ վերադառնալուց հետո ինքը Ռազմիկ Խաչատրյանի հետ շփվել է որպես իր քրոջ ամուսին։
Ռազմիկ Խաչատրյանը շուրջ երկու տարի է գտնվում է ՀՀ-ում։ Այդ ընթացքում նա բնակվել է հայրական տանը՝ մոր և քրոջ հետ։ Բնակարանը գտնվում է Գյումրի քաղաքի Կայարան փողոցում, սակայն բնակարանի համարը հստակ չի հիշում։
Իր որդու հարսանիքի կապակցությամբ ինքը հրավիրել է նաև իր քրոջը՝ Լաուրային։ Վերջինս սկզբում առողջական խնդիրների պատճառով հրաժարվել է հրավերից, սակայն հետագայում համաձայնել է մասնակցել հարսանեկան արարողությանը։ Քանի որ իր բնակարանում ազատ տեղ չկար (գտնվում է երկրորդ հարկում), նրանք ստիպված են եղել նույն շենքի չորրորդ հարկում բնակարան վարձակալել։ Նշված ժամանակահատվածում ընթանում էին հարսանիքի նախապատրաստական աշխատանքները։
Լաուրան իրեն հայտնել է, որ նրա դուստրը՝ Քրիստինան, պետք է հագուստ ուղարկի։ Ինքը, համարելով աննպատակահարմար ծանրոցը վարձակալած բնակարան առաքելը, առաջարկել է այն ուղարկել իր բնակարան։ Միաժամանակ խնդրել է, հնարավորության դեպքում, որդու հարսանիքի սինիի համար ուղարկել տարբերվող շոկոլադե կոնֆետներ։
Ծանրոցը ստանալու վերաբերյալ զանգ ստանալուց հետո ինքը պատրաստվում էր գնալ շուկա, ուստի առաքիչի մեքենայի մոտ ստորագրել է ստացման վերաբերյալ փաստաթուղթը։ Այնուհետև զանգահարել է քրոջը, տեղեկացրել ծանրոցի առաքման մասին և խնդրել, որ Ռազմիկ Խաչատրյանն իջնի և այն բարձրացնի վերև։ Երբ Ռազմիկ Խաչատրյանը իջել է ծանրոցը վերցնելու, նրանց են մոտեցել մաքսային ծառայության աշխատակիցները և հայտնել, որ ծանրոցում առկա են դեղահաբեր, և անհրաժեշտ է ներկայանալ համապատասխան ոստիկանական բաժանմունք։
Ոստիկանությունում իրեն տեղեկացրել են, որ ծանրոցի մեջ առկա դեղերը հանդիսանում են թմրամիջոցներ։ Կարծում է, որ նշված դեղերը նախատեսված են եղել իր քրոջ անձնական օգտագործման համար, քանի որ վերջինս օրական օգտագործում է մեծ քանակությամբ դեղեր (մոտ 16 հաբ)։ Ծանրոցն իր ներկայությամբ չի բացվել և ինքը մինչ օրս չի տեսել դրա պարունակությունը։
Ծանրոցի պարունակությամբ չի հետաքրքրվել՝ միայն տեղեկացված է եղել, որ այնտեղ պետք է լինեն կոնֆետներ։ Կոնֆետների տեսակը կամ արտաքին տեսքը չի հստակեցրել՝ պարզապես խնդրել է ուղարկել տարբերվող շոկոլադե կոնֆետներ։
Իր քույրը բնակվում է ԱՄՆ-ում իր երեխաների՝ Լևոնի և Քրիստինայի, փեսայի և թոռների հետ։ Քանի որ երեխաները ծնվել և մեծացել են այնտեղ, ինքն անձամբ չի տեսել նրանց, և շփումը սահմանափակվել է տեսակապով։ Ինքը տեղեկություն չունի նրանց կողմից թմրամիջոցների շրջանառությամբ զբաղվելու մասին և միայն սույն գործի շրջանակներում է իմացել, որ Լևոնը օգտագործել է թմրամիջոցներ։
Նախկինում ևս մի քանի անգամ ծանրոց են ստացել քրոջից։ Մեկ դեպքում հարսանիքից առաջ ուղարկվել են հագուստներ, իսկ մյուս դեպքերում՝ սննդամթերք («խլոպյա»)։ Երբևէ բաց վիճակում կամ կասկածելի պարունակությամբ ծանրոց չեն ստացել։ Վերջին ծանրոցը ուղարկվել է զարմուհու՝ Քրիստինայի կողմից։ Ինքը չգիտի, թե ինչու այդ ծանրոցը քույրը չի բերել իր հետ Հայաստան վերադառնալիս և հետագայում ուղարկվել է դստեր միջոցով։
Հետագայում ինքը հետաքրքրվել է քրոջից ծանրոցի պարունակությամբ, և վերջինս հայտնել է, որ այնտեղ իր դեղերն են։ Ինքը օգտագործում է ինսուլին և այլ դեղահաբեր՝ ցավը մեղմացնելու նպատակով։ Թմրամիջոցների վերաբերյալ քույրը իրեն ասել է, որ տեղեկություն չունի և դրանք, հնարավոր է, ուղարկել են երեխաները։
Զրուցել է զարմուհու՝ Քրիստինայի հետ, որը հայտնել է, որ թմրամիջոցները ուղարկել է անզգուշությամբ։ Նրա խոսքերով՝ առանց Լևոնի իմացության վերցրել է այդ հաբերը նրա սենյակից, դրել քաղցրավենիքի հետ և ուղարկել՝ չիմանալով, որ դրանք հանդիսանում են Լևոնի անձնական օգտագործման համար նախատեսված թմրամիջոցներ։
Կարծում է, որ Լևոնի ընտանիքի մյուս անդամները տեղյակ չեն եղել Լևոնի կողմից թմրամիջոցներ օգտագործելու մասին, և այդ հանգամանքը բացահայտվել է միայն սույն գործի քննության ընթացքում։
Ռազմիկ Խաչատրյանի բնակության վայրում կատարված խուզարկության ընթացքում հայտնաբերված առարկաների վերաբերյալ տեղեկացել է միայն սույն գործի շրջանակներում։ Քույրը իրեն տեղեկացրել է, որ խուզարկություն է կատարվել, սակայն անձամբ որևէ տեղեկություն թմրամիջոցների առկայության մասին չի ունեցել և այդ մասին իմացել է միայն քննիչից:
(դատական նիստի արձանագրություն, հատոր 1 գ․թ․ 67-70,100-104,հատոր 3 գ.թ.16-18,101-104,135-139)
25. Վկա Սևադա Զորիկի Աղազարյանի ցուցմունքը, որի համաձայն՝ 2019 թվականից աշխատում է Մաքսային վարչությունում: Մաքսային զննման ակտը կազմել է անձամբ, սակայն ծանրոցի պարունակության վերաբերյալ մանրամասներ չի հիշում՝ պայմանավորված իր աշխատանքային պրակտիկայում նմանատիպ բազմաթիվ դեպքերի առկայությամբ։ Միևնույն ժամանակ հիշում է, որ տվյալ դեպքում հայտնաբերվել է հաշիշի յուղ։ Թմրամիջոցների թաքցման եղանակը սովորաբար արձանագրվում է զննման ակտում, սակայն տվյալ կոնկրետ դեպքով չի հիշում այն թաքցված լինելու հանգամանքը:
Ծանրոցներում կասկածելի առարկաների առկայությունը հիմնականում բացահայտվում է ռենտգեն սարքավորման միջոցով իրականացվող զննության արդյունքում։ «Խլոպյա» տեսակի փաթիլների տուփերում թմրամիջոցների տեսանելիությունը կախված է դրանց տեղադրման դիրքից։ Կոնֆետների կամ այլ նմանատիպ տուփերի պարունակությունը, կասկածելի նշանների բացակայության դեպքում, սովորաբար չեն բացում։
(դատական նիստի արձանագրություն, հատոր 3 գ․թ․ 98-100)
26. Վկա Լևոն Կարապետի Շաքարյանի ցուցմունքը, որի համաձայն՝ Ռազմիկ Խաչատրյանը դեռ իր ինը տարեկան հասակից հանդիսանում է իր մոր ընկերը, սակայն նրանց ամուսնությունը պաշտոնապես գրանցված չէ։ Բնակվում է ԱՄՆ Կալիֆորնիա նահանգում՝ մոր, քրոջ, քրոջ ամուսնու և զարմիկի հետ։ Իր մայրը տառապում է 4-քաղցկեղով և ունի տեղաշարժման հետ կապված դժվարություններ։
Անձամբ օգտագործում է թմրամիջոցներ և չի ցանկացել, որ իր ընտանիքի անդամներն իմանան այդ մասին։ Իր ընտանիքի անդամներն այդ հանգամանքի մասին տեղեկացել են միայն սույն գործի շրջանակներում։ Չի կարծում, որ Ռազմիկ Խաչատրյանը տեղեկացված է եղել իր կողմից թմրամիջոցներ օգտագործելու մասին։
Իր ննջասենյակում՝ սեղանի տակ, պահել է փաթիլների («խլոպյա») տուփեր, որոնց մեջ էլ պահել է թմրամիջոցները։ Այդ տուփերից մեկը հայտնվել է Հայաստանում՝ իր քրոջ միջոցով, ով վերցրել է այն իր սենյակից և ուղարկել ծանրոցի հետ։ Ինքը փաթեթները փակել է այնպես, որ որևէ կասկած չառաջանա դրանց նախկինում բացված լինելու վերաբերյալ, և ընտանիքի անդամներից ոչ մեկը չի նկատել դա։
Ինչ վերաբերում է 2024 թվականի ապրիլի 26-ին ուղարկված ծանրոցին՝ ինքը տեղյակ չի եղել դրա կոնկրետ պարունակությունից։ Դատարանում ներկայացված լուսանկարները դիտելուց հետո հայտնեց, որ չի կարող հստակ նույնականացնել առարկաները, քանի որ հաճախ տարբեր իրեր են ուղարկվում, սակայն հաստատել է նմանատիպ հագուստ ուղարկելու հանգամանքը։ Ընտանիքի անդամների՝ իր կողմից թմրամիջոցների օգտագործման վերաբերյալ անտեղյակ լինելու և նախկինում արված լուսանկարների միջև առկա հնարավոր հակասությունների վերաբերյալ նշել է, որ այդ մասին տեղեկություն չունի։
Ի պատասխան Դատարանի հարցադրմանը՝ նշեց, որ օգտագործում է միայն մեկ տեսակի թմրամիջոցներ, նշված փաթիլների տուփում եղել է այդ տեսակի թմրամիջոց։ Ի պատասխան ծխամորճի ձևով լինելու վերաբերյալ հարցին՝ հայտնեց, որ դա ծխամորճ չէ, այլ մարիխուանայի ծաղիկ և մարիխուանայի յուղ է եղել սրաքի մեջ լիցքավորված։ Նա նաև հայտնեց, որ իր մայրը տվյալ տեսակի թմրամիջոց չի օգտագործում, այլ ընդունում է միայն բժշկի նշանակած դեղերը։ 2024 թվականի հունիսի դրությամբ տեղեկություն չունի, որ մայրը օգտագործել է նշված տեսակի նյութ։
Թմրամիջոցները թաքցնելու նպատակը եղել է ընտանիքի անդամներից իր օգտագործումը գաղտնի պահելը՝ ամոթի զգացումից ելնելով։
Իր ընտանիքի անդամները հաճախ են ծանրոցներ ուղարկել Հայաստան, որոնցում սովորաբար եղել են հագուստ, սննդամթերք և խաղալիքներ։ Սննդամթերքի տեսականին տարբեր է եղել, այդ թվում՝ տարբեր տեսակի ամերիկյան փաթիլներ։
Նշված սնունդը չի պահել խոհանոցում, քանի որ այն գնել է իր անձնական օգտագործման համար և պահվել է իր սենյակում։ Իր քույրն առանց իր թույլտվության վերցրել է այդ սնունդը՝ ենթադրելով, որ հետագայում կգնի այդ նույն ուտելիքից և կդնի նույն տեղում: Սովորաբար փաթիլները ուտում են կաթով, սակայն ինքը նախընտրում է դրանք ուտել չոր վիճակում, ինչի պատճառով էլ պահել է իր սենյակում՝ ցանկության դեպքում անմիջապես ուտելու նպատակով։
Տեղեկություն չունի Ռազմիկ Խաչատրյանի կողմից ԱՄՆ-ում թմրամիջոցներ օգտագործելու վերաբերյալ։
(դատական նիստի արձանագրություն,հատոր 3 գ.թ. 22-24)
27. Որպես արտավարութային փաստաթուղթ ապացույց ճանաչված մաքսային զննման (տեսազննման) թիվ ՕՀ/101-2024 ակտը, որի համաձայն՝ 2024 թվականի օգոստոսի 2-ին «Ապավեն Տերմինալ» ՍՊ ընկերության սպը մաքսային հսկողության գոտում մաքսային զննման է ենթարկվել «Տրանս Շիփինգ» ՍՊ ընկերության միջոցով ԱՄՆ-ից Լաուրա Դեմիրճյանի (հեռախոս ․․․) անունից Լիանա Դեմիրճյանի անվամբ ՀՀ ներմուծված թեվ 192204747 համարի միջազգային սուրհանդակային առաքանին, ինչի արդյունքում առաքանիում բացի կոշիկից, քաղցրավենիքից և անձնական օգտագործման այլ իրերից հայտնաբերվեց նաև մեկ սրվակ դեղորայք «ZOLPIDEM TARTRATE 10 MG» գրառմամբ ընդհանուր 30 հաբի պարունակությամբ, ինչպես նաև առկա «CANNABIS VAPE CARTRIDGE SATIVA THC» գրառմամբ երկու փաթեթ, որոնցից յուրաքանչյուրում առկա է մեկական էլեկտրոնային ծխախոտի սրվակ՝ հաշիշի յուղին նմանվող դեղնավուն գույնի հեղուկ պարունակությամբ, «CANNABIS VAPE CARTRIDGE INDICA THC» գրառմամբ մեկ փաթեթ, որում առկա է էլեկտրոնային ծխախոտի մեկ հատ սրվակ՝ հաշիշի յուղին նմանվող դեղնավուն գույնի հեղուկի պարունակությամբ, 20 գրամ համաքաշով «Smoakland black» գրառմամբ մեկ հատ փաթեթ՝ մարիխուանային նմանվող դեղնականաչավուն զանգվածի պարունակությամբ:
(դատական նիստի արձանագրություն, հատոր 1 գ.թ 5-8)
28. Որպես արտավարութային փաստաթուղթ ապացույց ճանաչված մաքսանենգության դեպքի վերաբերյալ 2024 թվականի օգոստոսի 2-ի արձանագրությունը, որի համաձայն՝ 2024 թվականի օգոստոսի 2-ին ժամը 14:00-ի սահմաններում «Ապավեն Տերմինալ» ՍՊ ընկերության մաքսային հսկողության գոտում մաքսային զննման է ենթարկվել «Տրանս Շիփինգ» ՍՊ ընկերության միջոցով ԱՄՆ-ից Լաուրա Դեմիրչյանի (հեռախոս 8189414506) անունից Լիանա Դեմիրճյանի անվամբ ՀՀ ներմուծված թիվ 192204747 համարի միջազգային սուրհանդակային առաքանին, ինչի արդյունքում առաքանիում բացի կոշիկից, քաղցրավենիքից և անձնական օգտագործման այլ իրերից հայտնաբերվեց նաև մեկ սրվակ դեղորայք՝ «ZOLPIDEM TARTRATE 10 MG» գրառմամբ ընդհանուր 30 հաբի պարունակությամբ, ինչպես նաև առկա է «CANNABIS VAPE CARTRIDGE SATIVA THC» գրառմամբ երկու փաթեթ, որոնցից յուրաքանչյուրում առկա է մեկական էլեկտրոնային ծխախոտի սրվակ՝ հաշիշի յուղին նմանվող դեղնավուն գույնի հեղուկ զանգվածի պարունակությամբ, «CANNABIS VAPE CARTRIDGE INDICA THC» գրառմամբ փաթեթ, որում առկա է էլեկտրոնային ծխախոտի մեկ հատ սրվակ հաշիշի յուղին նմանվող դեղնավուն գույնի հեղուկ զանգվածի պարունակությամբ, 20 գրամ համաքաշով, «Smoakland black» գրառմամբ մեկ հատ փաթեթ մարիխուանային նմանվող դեղնականաչավուն զանգվածի պարունակությամբ։ Հայտնաբերված դեղամիջոցը, հեղուկ զանգվածներով սրվակները և դեղնականաչավուն զանգվածը հնարավոր է պարունակում են համապատասխանաբար գոլպիդեմ, հաշիշի լուղ և մարիխուանա տեսակի նյութեր, որոնք ընդգրկված են ՀՀ Կառավարության 2018 թվականի հունիսի 27-ի N 707-Ն որոշման հավելված 1-ում որպես հոգեմետ-հոգեներգործուն նյութ և թմրամիջոցներ: Վերը նշված դեղորայքը, հեղուկ զանգվածներով սրվակները, դեղնականաչավուն զանգվածը փաթեթավորվել է մեկ փաթեթում և կնիքվել RA786052 համարի կնիքով, իսկ թիվ ․․․ համարի միջազգային սուրհանդակային առաքանին չի կնիքվել և տեղափոխվել է ՄԴՊ վարչություն՝ նախատեսվող օպերատիվ հետախուզական միջոցառումների իրականացման նպատակով:
(դատական նիստի արձանագրություն, հատոր 1 գ.թ 9-11)
29. Որպես արտավարութային փաստաթուղթ ապացույց ճանաչված՝ ՀՀ Պետական եկամուտների կոմիտեի կողմից 2024 թվականի օգոստոսի 5-ին տրված կտրոնը, որի համաձայն՝ Լիանա Դեմիրճյանը ստացել է մեկ փակ արկղ (Air,192204747), որի քաշը կազմում է 3,91 կգ, իսկ արժեքը՝ 80 ԱՄՆ դոլար:
(դատական նիստի արձանագրություն, հատոր 1 գ.թ 33)
30. Որպես արտավարութային փաստաթուղթ ապացույց ճանաչված՝ «Տրանսշիփինգ» ՍՊ ընկերության կողմից 2024 թվականի դեկտեմբերի 13-ին տրամադրված հարցման պատասխանը, որի համաձայն՝ իրենց կազմակերպության միջոցով Լաուրա Դեմիրչյանի անունից ՀՀ Լիանա Կարապետի Դեմիրճյանի անվամբ ներմուծվել է «192204747» համարի առաքանին: Առաքանին ՀՀ ուղարկելու և առաքելու համար, ուղարկողն է վճարումը կատարել ԱՄՆ-ում, թե ինչ եղանակով, հայտնի չէ: IP հասցեների վերաբերյալ իրենց մոտ տեղեկատվություն առկա չի եղել, հետևաբար տվյալներ չեն կարող տրամադրել: Իրենց կազմակերպությանը, ուղարկողի տվյալներ ԱՄՆ-ից չի տրամադրում: Իրենց և նրանց կողմից կատարվող հեռախոսազանգերը չեն ձայնագրվում: Քանի որ, նշված առաքանին գտնվել է մաքսային պահեստում և չի ստացվել հասցեատիրոջ կողմից, հետևաբար չկա ստացական: Իրենց կազմակերպությունը ՀՀ-ից, որևէ ուղղությամբ բեռնափոխադրում չի իրականացնում: Ռազմիկ Սերյոժայի Խաչատրյանն իրենց կազմակերպության միջոցով առաքանիներ չի ստացել:
(դատական նիստի արձանագրություն, հատոր 2 գ.թ 66-67)
31. Զննում կատարելու մասին 2025 թվականի մայիսի 23-ի արձանագրությունը, որի համաձայն՝ զննվել է ՀՀ ՊԵԿ ՄԴՊ վարչությունից 2024 թվականի օգոստոսի 05-ին թիվ 15-1/49277-2024 գրությամբ ստացված` Լիանա Կարապետի
Դեմիրճյանի անձնական խուզարկությամբ հայտնաբերված՝ թիվ «77864» կնիքով
կիքված թիվ 192204747 համարի ծանրոցը /տուփը/: Ծանրոցի արտաքին զննությամբ
խախտումներ չհայտնաբերվեցին: Ծանրոցը բացելուց հետո տեսանելի դարձան անձնական
օգտագործման իրեր և առարկաներ, կարմիր գույնի պոլիէթիլենային փաթեթ՝ քաղցրավենիքի պարունակությամբ, բացի այդ տեսանելի դարձան թվով 2 թափանցիկ փաթեթներ, որոնցից մեկում առկա էր բուսական զանգված, իսկ մյուս փաթեթում առկա էին թվով 3
ծխամորճեր, դեղորայքի տուփ և դրանում առկա փոխարինված զանգվածներ: Հայտնաբերվածն ամբողջությամբ համնկնում էր «Վերահսկելի
մատակարարում և գնում» օպերատիվ-հետախուզական միջոցառման շրջանակներում
պատրաստված և 192204747 համարի միջազգային փոստային առաքանիում առկա
«մարիխուանա» տեսակի թմրամիջոցին, «հաշիշի յուղ» տեսակի թմրամիջոցների
պարունակությամբ թվով 3 էլեկտրոնային ծխամորճերին և «զոլպիդեմ» տեսակի հոգեմետ
նյութի պարունակությամբ դեղահատերի փոխարինաված սրվակին և դեղահատերին, որոնք հայտնաբերվել էին ՀՀ ՊԵԿ ՄԴՊ վարչության աշխատակիցների
կողմից՝ Լիանա Կարապետի Դեմիրճյանի նկատմամբ իրականացված անձնական
խուզարկությամբ:
Այնուհետև իրականացվել է «ՀՀ ՓՈՐՁԱԳԻՏԱԿԱՆ ԿԵՆՏՐՈՆ»
ՓԱԹԵԹՆԵՐԻ ԵՎ ԾՐԱՐՆԵՐԻ ՀԱՄԱՐ 25662455» թափանցիկ փաթեթի արտաքին
զննությունը, որի արդյունքում տեսանելի դարձան դեղորայքի սրվակ, սև գույնի
«SMOAKLAND BLACK» գրառումներով թվով մեկ փաթեթ, «SATIVA» և այլ գրառումներով
պոլիէթիլենային փաթեթներ:
(դատական նիստի արձանագրություն, հատոր 3 գ.թ 83-89)
32. «ՀՀ Փորձագիտական կենտրոն» ՊՈԱ կազմակերպության դատանյութագիտական փորձաքննության 2025 թվականի մայիսի 2-ի թիվ 25662405 եզրակացությունը, որի համաձայն՝ «Փորձաքննությանը ներկայացված մեկ հատ, «ZOLPIDEM TARTRATE 10 MG TAB...» գրառումների պիտակով, սպիտակ գույնի կափարիչով, նարնջագույն պոլիմերային տարայի մեջ առկա 30 հատ, արտաքինից գործարանային արտադրության, յուրաքանչյուրը 0,13-ական գրամ քաշով, «10MG» փորագրմամբ, բաց նարնջագույն երանգի, երկուռուցիկ մակերեսով, օվալաձև դեղահատերն (օբյեկտ 1) իրենց բաղադրության մեջ պարունակում են 0,01-ական գրամ քաշով «զոլպիդեմ» տեսակի հոգեմետ (հոգեներգործուն) նյութ, որի ընդհանուր քաշը կազմում է 0,3 գրամ: Փորձաքննությանը ներկայացված «1G SOLIS JUCY RED APPLE CA! SATIVA 90%+ ТНС...», «SOLIS BLUE DREAM CAI SATIVA 90%+ THC» և «1G SOLIS BANABA ICE CA! INDICA 90%+ THC» գրառումներով փաթեթիկներում տեղադրված 3 հատ
«CAl» գրառումներով, թափանցիկ և արծաթագույն ծայրով, գլանաձև էլեկտրոնային
ծխամորճի վերին հատվածների մեջ առկա յուրահատուկ հոտով, դեղնականաչավուն,
սորուն, յուղանման հեղուկները (օբյեկտներ 2, 3, 4) հանդիսանում են ընդհանուր 2,31
գրամ հաստատուն քաշով «հաշիշի յուղ» տեսակի թմրամիջոց: Փորձաքննությանը ներկայացված 1 հատ, «SMOAKLAND BLACK CA....» գրառումներով, սև և արծաթագույն փաթեթի մեջ առկա 13,67 գրամ մաքուր քաշով, յուրահատուկ սուր հոտով, կանաչադարչնավուն երանգի բուսական զանգվածը (օբյեկտ 5)
հանդիսանում է 11,83 գրամ հաստատուն քաշով, տնայնագործական եղանակով պա տրաստված «մարիխուանա» տեսակի թմրամիջոց»:
(դատական նիստի արձանագրություն, հատոր 3 գ.թ 40-47)
33. «ՀՀ Փորձագիտական կենտրոն» ՊՈԱ կազմակերպության դատանյութագիտական, դատահողագիտական և դատակենսաբանական համալիր փորձաքննության 2025 թվականի մայիսի 2-ի թիվ 27832405 եզրակացությունը, որի համաձայն՝ «Փորձաքննությանը ներկայացված «2 ցողուն 4 83-0436-24» ձեռագիր գրառումներով թափանցիկ պոլիմերային փաթեթում (ֆայլ) առկա 2 հատ կանաչավուն երանգի ամբողջական բույսերից մեկը (օբյեկտ 7) հանդիսանում է Կանեփ ցեղի (Cannabis) խոտաբույսերի իգական անհատ, որը գտնվում են վեգետացիոն շրջանի սկզբնական փուլում, ծաղկման սկզբնական ժամանակահատվածում՝ մինչև կողային ցողունների ձևավորվելը, իսկ մյուս կանաչավուն երանգի ամբողջական բույսը (օբյեկտ 8) հնարավոր չէ նույնականացնել, նույնականացման համար կարևոր մորֆոլոգիական հատկանիշները չձևավորած լինելու պատճառով:
Փորձաքննությանը ներկայացված «սերմեր 15 հատ դեղահատ 3 83-0436- 24» ձեռագիր գրառումներով սպիտակ գույնի թղթե փաթեթում թափանցիկ պոլիմերային զիպ փաթեթում տեղադրված սպիտակ գույնի վանդակավոր տետրի թղթի հատվածով փաթեթավորված թվով 13 հատ կանաչամոխրավուն երանգի սերմերը (օբյեկտ 6) հանդիսանում են Կանեփ ցեղի (Cannabis) խոտաբույսերի սերմեր, (ինչպես նաև առկա են Կանեփ ցեղի (Cannabis) խոտաբույսերի կոտրատված սերմնապատյանի հատվածներ):
Փորձաքննությանը ներկայացված «8 հատ դեղահատ 2 83-0436-24» ձեռագիր գրառումներով, սպիտակ գույնի թղթե փաթեթում առկա՝ 1 հատ, «54/375» գրառումներով, 0,392 գրամ քաշով, գազարագույն, կլոր դեղահատն (օբյեկտ 4) իր բաղադրության մեջ պարունակում է 0,008 գրամ քաշով «բուպրենորֆին» տեսակի թմրամիջոց, -6 հատ, «57/71» ներհրված գրառումներով, 0,247-ական գրամ քաշով, սպիտակ գույնի, ուղանկյունանիստի տեսքով դեղահատերն (օբյեկտ 5) իրենց բաղադրության մեջ պարունակում է 0,008-ական գրամ քաշով՝ ընդհանուրը 0,048 գրամ քաշով «մեթադոն» տեսակի թմրամիջոց, 1 հատ, դեղին և կարմիր հատվածներից բաղկացած դեղապատիճի (օբյեկտ 3) նմուշում հետազոտությամբ թմրամիջոց կամ հոգեմետ նյութեր չեն հայտնաբերվել:
Փորձաքննությանը ներկայացված «2 ցողուն 4 83-0436-24» ձեռագիր գրառում ներով թափանցիկ պոլիմերային փաթեթում (ֆայլ) առկա 2 հատ կանաչավուն երանգի ամբողջական բույսերից մեկը (օբյեկտ 7) հանդիսանում է Կանեփ (Canabis խմբի բույս)» տեսակի խոտաբույս, որը իր բաղադրության մեջ պարունակում է «տետրահիդրոկաննաբինոլ (ՏՀԿ)» տեսակի թմրամիջոց և կարող է հանդիսանալ հումք՝ «մարիխուանա», «հաշիշ» և «հաշիշի յուղ» տեսակի թմրամիջոցներ պատրաստելու համար, իսկ մյուս բույսի (օբյեկտ 8) բաղադրության մեջ հետազոտությամբ թմրամիջոց կամ հոգեմետ նյութեր չեն հայտնաբերվել:
Փորձաքննությանը ներկայացված «6 հատ ապակյա կաթուցիչ 1 հատ էլեկտրական գլանակ 1 83-0436-24» ձեռագիր գրառումներով, սպիտակ գույնի թղթե փաթեթում առկա 6 հատ ապակյա կաթուցիչների (օբյեկտ 1) և ծխամորճի վերին հատվածի (օբյեկտ 2) ներքին մակերեսների հետազոտությամբ հայտնաբերվել է «տետրահիդրոկաննաբինոլ (ՏՀԿ)» տեսակի թմրամիջոցի հետքեր:
Փորձաքննությանը ներկայացված «սերմեր 15 հատ դեղահատ 3 83-0436-24»
ձեռագիր գրառումներով սպիտակ գույնի թղթե փաթեթում առկա թափանցիկ պոլիմերային զիպ փաթեթում տեղադրված սպիտակ գույնի վանդակավոր տետրի թղթի
հատվածով փաթեթավորման մեջ առկա թվով 13 հատ կանաչամոխրավուն երանգի
սերմերը (օբյեկտ 6) հանդիսանում են Կանեփ ցեղի (Cannabis) խոտաբույսերի
սերմեր, ներառված չեն «Թմրամիջոցների, հոգեմետ (հոգեներգործուն) նյութերի մանր, զգալի, խոշոր և առանձնապես խոշոր չափերը» ՀՀ կառավարության 2018թ.-ի
հունիսի 27-ի N 707-Ն որոշման հավելված N 1 ցանկում և թմրամիջոց չեն հանդիսանում»:
(դատական նիստի արձանագրություն, հատոր 3 գ.թ 28-35)
34. Թվային խուզարկություն կատարելու մասին 2025 թվականի մարտի 21-ի արձանագրությունը, որի համաձայն՝ ուսումնասիրության է ենթարկվել «Samsung Galaxy A71» մոդելի բջջային հեռախոսը, որի «Viber» հավելվածում հայտնաբերվել է Լիանա Դեմիրճյան օգտատիրոջ և +․․․ /Laoura Demirtchian/ օգտատիրոջ միջև երկխոսություններ»։
Մասնավորապես՝ 2023 թվականի դեկտեմբերի 6-ին առկա է հետևյալ նամակագրությունը.
«Լիանա Դեմիրճյան: Kyr zangeci valodin zangec et gox axpore harcrav sele tramadrutyun barcraccnox
+․․․ /Laoura Demirtchian/: Meraaaaaaa, ok kianks»։
2024 թվականի մայիսի 11-ին առկա է հետևյալ նամակագրությունը.
«Լիանա Դեմիրճյան: Ekaaaaaav pasilken uraaaa
+․․․․ /Laoura Demirtchian/: Batsir?
Լիանա Դեմիրճյան: Baciiink kianks
+․․․․ /Laoura Demirtchian/: Lian Razin zangi tox ga ira tux u brindze tani»։
2024 թվական մարտի 1-ին առկա է հետևյալ նամակագրությունը.
«+․․․․ /Laoura Demirtchian/: Lian ekav pasilken kianks
Լիանա Դեմիրճյան: Kurs Alepon zangec nor aravot kbere»։
(դատական նիստի արձանագրություն,հատոր 3 գ.թ 1-5)
35. Թվային խուզարկություն կատարելու մասին 2025 թվականի մարտի 24-ի արձանագրությունը, որի համաձայն՝ ուսումնասիրության ենթարկվեց «Samsung Galaxy 510+» մոդելի բջջային հեռախոսը, որի «Viber» հավելվածում հայտնաբերվեցին Ռազմիկ Խաչատրյան օգտատիրոջ և +․․․․ /Pypysh/ օգտատիրոջ միջև երկխոսություններ։
Մասնավորապես՝ 2023 թվականի հունիսի 26-ին առկա է հետևյալ նամակագրությունը.
«+․․․․ /Pypysh/: Tune mart ka kuk gnatsin kzangem pasilket urbat ore uxarkelem»
2023 թվականի հունիսի 27-ին առկա է հետևյալ նամակագրությունը.
«Ռազմիկ Խաչատրյան: Miatem ban bdi esem
+․․․․ /Pypysh/: Incha exel hima incha exel
Ռազմիկ Խաչատրյան: Enchi ban bdi exni
+․․․․ /Pypysh/: Asumes ban petka ases asa
Ռազմիկ Խաչատրյան: Kanfeti hamar
+․․․․ /Pypysh/: Chunem:»։
Այնուհետև ուսումնասիրության ենթարկվեց <<Messenger>> հավելվածը, որում
հայտնաբերվեցին Ռազմիկ Խաչատրյան օգտատիրոջ և Laura Demirchyan օգտատիրոջ
միջև երկխոսություններ։
Մասնավորապես՝ 2024 թվականի ապրիլի 26-ին առկա է հետևյալ նամակագրությունը.
«Laura Demirchyan: [Ուղարկում է «հաշիշի յուղ» տեսակի թմրամիջոցների պարունակությամբ թվով 4 տուփերի լուսանկարներ] /արձանագրությանը կցվել են նաև «Google» հավելվածից լուսապատճենած՝ նշված տուփերի ամբողջական տեսքի լուսանկարները/
Ռազմիկ Խաչատրյան: Pypyushssss,tenkui kiank@s»:
(դատական նիստի արձանագրություն, հատոր 3 գ.թ 6-13)
36. Ռազմիկ Սերյոժայի Խաչատրյանի ձերբակալման վերաբերյալ 2024 թվականի օգոստոսի 05-ի արձանագրությունը, որի համաձայն՝ վերջինս նույն օրը ՀՀ ՊԵԿ մաքսանենգության դեմ պայքարի վարչությունից ՀՀ քրեական օրենսգրքի 399-րդ հոդվածով նախատեսված հանցավոր արարք կատարած լինելու անմիջականորեն ծագած հիմնավոր կասկածի առկայության հիմքով ձերբակալվել և ժամը 17:00-ին տեղափոխվել է ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն։ Ձերբակալման կապակցությամբ ձերբակալվածը հայտարարել է, որ իրեն պարզաբանվել է, թե ինչ կասկածանքով է ձերբակալվել, ինչպես նաև պարզաբանավել է իր իրավունքներն ու պարտականությունները: Իրեն մեղավոր չի ճանաչում, ինքը տարիներով բնակվել է ԱՄՆ-ում ու թղթերի հետ կապված խնդիրներից ելնելով շուրջ մեկ տարի է վերադարձել է ՀՀ: ԱՄՆ-ում բնակվելու ընթացքում բաժանվել է կնոջից՝ Անժելա Խաչերյանից և շուրջ 15 տարի է ամուսնացած է ԱՄՆ-ում Լաուրա Դեմիրճյանի հետ: Երբ ինքը եկել է ՀՀ, կինը մնացել է ԱՄՆ-ում: Այս տարի հուլիս ամսին Լաուրան եկել է ՀՀ նրա քրոջ՝ Լիանա Դեմիրճյանի հարսանիքին և այնտեղից գալուց առաջ ուղարկել էր իրեր, որոնք նախատեսված էին իր համար: Քանի որ նա վիրահատված էր և ուներ շաքար և այլ առողջական խնդիրներ ԱՄՆ-ից պետք է ուղարկեին դեղեր: Այնտեղ բնակվում է նրա դուստրը՝ Քրիստինա Շաքարյանը և երբ արդեն Լաուրան ՀՀ-ում էր,աղջիկը ուղարկեց «պասիլկա»՝ էլի Լիանայի անվամբ: Այդ օրը իրեն զանգահարել է Լիանան ու ասել, որ իրենց «պասիլկեն» եկել է, պետք է իջնի ստանալու: Առանց փոխվելու իջել է Լիանայի հետևից բակ, քանի որ գտնվում էր կնոջ կողմից վարձակալած Շահումյան 188Ա շենքի 44 բնակարանում, երբ Լիանան ստացավ առաքանին նա ձերբակալվել է, ինչից հետո ձերբակալվեց նաև ինքը: Ինքը օգտագործում է մարիխուանա, քանի որ առողջական խնդիրներ ունի և այն ծառայում է որպես ցավազրկող և տեղյակ չէ, թե բացի իր կնոջ դեղերից առաքանու մեջ ինչ պետք է լիներ:
(տե՛ս դատական նիստի արձանագրություն, հատոր 1 գ.թ. 23-25)
37. Լիանա Կարապետի Խաչատրյանի ձերբակալման վերաբերյալ 2024 թվականի օգոստոսի 5-ի արձանագրությունը, որի համաձայն՝ վերջինս նույն օրը ՀՀ ՊԵԿ մաքսանենգության դեմ պայքարի վարչությունից ՀՀ քրեական օրենսգրքի 399-րդ հոդվածով նախատեսված հանցավոր արարք կատարած լինելու անմիջականորեն ծագած հիմնավոր կասկածի առկայության հիմքով ձերբակալվել և ժամը 17:00-ին տեղափոխվել է ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն։ Ձերբակալման կապակցությամբ ձերբակալվածը հայտարարել է, որ իրեն պարզաբանվել է, թե ինչ կասկածանքով է ձերբակալվել, ինչպես նաև պարզաբանավել է իր իրավունքներն ու պարտականությունները: Հայտնել է, որ իրեն մեղավոր չի ճանաչում, առաքանին եկել է զուտ իր անվամբ, այն նախատեսված է եղել իր քրոջ՝ Լաուրա Դեմիրճյանի և իր հետ ստացման վայր եկած նրա ամուսնու՝ Ռազմիկ Խաչատրյանի համար: Իմացել է, որ մեջը պետք է լիներ դեղեր իր քրոջ համար, իսկ մնացած իրերը պետք է նախատեսված լինեին՝ իր իմանալով նրա ամուսնու՝ Ռազմիկ Խաչատրյանի համար և պետք է լիներ իրենց համար կոնֆետ: Նրանք բնակվում են իրենց շենքի թիվ 44 բնակարանում, եկել էին ԱՄՆ-ից, քույրը մեկ ամիս առաջ, իսկ ամուսինը՝ մոտ մեկ տարի առաջ: Քույրը պետք է վերադառնար սեպտեմբերի 30-ին: Առաքանին իր անվամբ ԱՄՆ-ից ուղարկել է իր քրոջ աղջիկը՝ Շաքարյան Քրիստինան, սակայն տեղյակ չի եղել դրա միջի ամբողջական պարունականությունից: Նախկինում ստացել է առաքանիներ, որոնց մեջ եղել են իր անձնական օգտագործման իրերը, իսկ վերջին չորս հատը չի բացել, քանի որ քույրը ասել էր, որ նրա անձնական իրերն էին ու պետք է գար ու տար նրան: Այդպես էլ արել է, տեղեկացված չէ, թե ինչ էր դրանց մեջ: Ինչ վերաբերում է այդ օրվա ստանալուն՝ կարող է ասել հետևյալը, տվյալ օրն իրեն զանգահարել են առաքանին առաքող ընկերությունից և ասել են, որ այն Գյումրի քաղաքում իրենց բակում է՝ պետք է իջնի ստանա, ինքը Ռազմիկին ասել է, որ առաքանին եկել է, պետք իջնի վերցնի, հետն եկել է, իրենից մի քանի քայլ հետ, որպեսզի ստանան առաքանին, դա ստանալուց հետո երբ ձերբակալվել է, հայտնել է, որ առաքանին նախատեսված է եղել իր հետ ստացման վայր եկած Ռազմիկի և նրա կնոջ համար, որից հետո ձերբակալվել է նաև Ռազմիկը:
(տե՛ս դատական նիստի արձանագրություն, հատոր 1 գ.թ. 28-31)
38. Բնակարանի խուզարկություն կատարելու մասին 2024 թվականի օգոստոսի 7-ի արձանագրությունը, որի համաձայն՝ կատարվել է խուզարկություն Ռազմիկ Սերյոժայի Խաչատրյանի հաշվառման և բնակության հասցեում՝ Գյումրի քաղաքի Ղանդիլյան փողոցի թիվ 84 շենքի թիվ 16 բնակարանում: Ըստ մասնակից Սվետլանա Խաչատրյանի հայտարարության՝ Ռազմիկ Խաչատրյանի ննջասենյակի մահճակալի կողքին գտնվող պահարանից հայտնաբերվել է վեց հատ ապակյա կաթուցիչ՝ մոխրացված զանգվածների պարունակությամբ, մեկ հատ էլեկտրոնային գլանակ, որի մեջ առկա է յուղի հետքեր, որոնք փաթեթավորվել են մեկ փաթեթում (համար 1): Նույն պահարանից հայտնաբերվել է և վերցվել է վեց հատ ուղղանկյուն դեղահատ, մեկ հատ կլոր դեղահատ, մեկ հատ ժապավենի մեջ գտնվող դեղահատ՝ ընդհանուր ութ հատ դեղահատ, որոնք փաթեթավորվել են մեկ փաթեթում (համար 2): Նույն պահարանից հայտաբերվել է և վերցվել է տասնհինգ հատ սերմի հատիկներ, որոնք փաթեթավորվել են մեկ փաթեթում (համար 3): Նույն սենյակի պահարանի վրայից հայտնաբերվել են և վերցվել մեկանգամյա բաժակի մեջ աճեցված երկու հատ կանեփանման բույսի ցողուններ, որոնք նույնպես փաթեթավորվել են մեկ փաթեթում (համար 4) և վերցվել հետագա պարզաբանման համար: Սվետլանա Խաչատրյանը հայտարարել է, որ դեղահատերը ցավազրկող դեղեր են, ապակյա կաթուցիչները ծխամորճեր են, սերմի հատիկները չգիտի, թե ինչ են, իսկ պատուհանագոգինը՝ ծաղիկներ են:
(տե՛ս դատական նիստի արձանագրություն,հատոր 1 գ.թ. 157-159)
39. Իրեղեն ապացույց ճանաչված առարկաները:
(դատական նիստի արձանագրություն)

Լրացուցիչ դատալսումներում հետազոտված ապացույցները և նյութերը․
40. «ԷԿԵՆԳ» ՓԲ ընկերության փոխգործելիության հարթակի միջոցով արտատպված Դատվածության և հետախուզման առկայության մասին ձև 8 տեղեկանքը, որի համաձայն՝ Ռազմիկ Սերյոժայի Խաչատրյանի դատվածության վերաբերյալ տվյալներ առկա չեն:
(տե՛ս դատական նիստի արձանագրություն)
41․ «ԷԿԵՆԳ» ՓԲ ընկերության փոխգործելիության հարթակի միջոցով 2025 թվականի հոկտեմբերի 21-ին ՀՀ պետական եկամուտների կոմիտեի էլեկտրոնային շտեմարանից արտատպված տեղեկատվությունը, որի համաձայն՝ հաշվետու ժամանակահատվածում Ռազմիկ Սերյոժայի Խաչատրյանի եկամուտների վերաբերյալ տվյալներ առկա չեն:
(տե՛ս դատական նիստի արձանագրություն)
42. «Գյումրու Ն.Ա.Մելիքյանի անվան թիվ 2 պոլիկլինիկա» ՓԲ ընկերության կողմից 2025 թվականի հոկտեմբերի 22-ին տրված մեծահասակի ամբուլատոր բժշկական քարտի մասին քաղվածքը, որի համաձայն՝ Ռազմիկ Սերյոժայի Խաչատրյանի մոտ ախտորոշված են մի շարք հիվանդություններ:
(տե՛ս դատական նիստի արձանագրություն)
43. «Գյումրի Կենտրոն» համատիրության կողմից 2025 թվականի հոկտեմբերի 22-ին տրված տեղեկանքը, որի համաձայն՝ Ռազմիկ Սերյոժայի Խաչատրյանը մոր ՝ Խաչատրյան Սվետլանա Իվանովնայի և քրոջ՝ Խաչատրյան Լյուդմիլա Սերյոժայի հետ բնակվում է ․․․:
(տե՛ս դատական նիստի արձանագրություն)
44. 2015 թվականի մարտի 10-ին տրված Խաչատրյան Սվետլանա Իվանովնայի կենսաթոշակի վկայականը:
(տե՛ս դատական նիստի արձանագրություն)
45. Գյումրի քաղաքի Ղանդիլյան փողոցի թիվ ․․․ շենքի բնակիչների կողմից տրված բնութագիրը, որի համաձայն՝ Ռազմիկ Սերյոժայի Խաչատրյանը որպես հարևան բնութագրվել է հարգանք վայելող, բարոյական վարքագծով անձնավորություն։
(տե՛ս դատական նիստի արձանագրություն)
46. Գյումրի համայնքի ղեկավարի 2013 թվականի նոյեմբերի 21-ի որոշումը, որի համաձայն՝ Սվետլանա Խաչատրյանին թույլատրվել է սահմանել խնամակալություն դատական կարգով անգործունակ ճանաչված դստեր՝ Լյուդմիլա Խաչատրանի նկատմամբ:
(տե՛ս դատական նիստի արձանագրություն)

Դատարանի փաստական վերլուծությունները և հաստատած փաստական հանգամանքները․
47. Հետազոտելով սույն դատավճռի 23-39-րդ կետերում շարադրված ապացույցները՝ Դատարանը գտնում է, որ դրանք վերաբերելի են սույն քրեական գործին:
Սույն դատավճռի 27-39-րդ կետերում շարադրված ապացույցներն իրենց համակցության մեջ գնահատելով՝ Դատարանը գտնում է նաև, որ դրանք բովանդակային տեսանկյունից հակասություններ չեն պարունակում: Հաշվի առնելով դրանցից յուրաքանչյուրի աղբյուրի հատկանիշները, ձևավորման հանգամանքները, ապացուցողական տեղեկությունը ձեռք բերելու միջոցը՝ Դատարանը գտնում է, որ դրանք նաև արժանահավատ են:
Մնացած ապացույցներն անձնային ապացույցներ են, որոնցում առկա են ներքին ու արտաքին հակասություններ։ Այդ հակասությունները Դատարանը պետք է գնահատի ոչ թե մեկուսացված, այլ ապացույցների ամբողջ համակցության մեջ՝ հաշվի առնելով դրանց բնույթը, առաջացման հնարավոր պատճառները, ցուցմունքների տրման ժամանակը, հիշողության թարմության աստիճանը, ցուցմունքների ներքին հետևողականությունը և գործով հետազոտված այլ ապացույցներով դրանց հաստատվելը կամ հերքվելը։
48. Հետազոտված ապացույցների համակցությամբ Դատարանը հաստատված է գնահատում, որ 2024 թվականի օգոստոսի 2-ին «Տրանս Շիփինգ» ՍՊ ընկերության միջոցով ԱՄՆ-ից Լաուրա Դեմիրճյանի անունից Լիանա Դեմիրճյանի անվամբ ՀՀ է առաքվել թիվ 192204747 համարի միջազգային սուրհանդակային առաքանին, որը մաքսային հսկողության գոտում ենթարկվել է զննության և որի մեջ, բացի կոշիկից, քաղցրավենիքից և անձնական օգտագործման այլ իրերից, հայտնաբերվել են «ZOLPIDEM TARTRATE 10 MG» գրառմամբ 30 հաբի պարունակությամբ մեկ սրվակ, «CANNABIS VAPE CARTRIDGE SATIVA THC» և «CANNABIS VAPE CARTRIDGE INDICA THC» գրառումներով երեք փաթեթներում առկա էլեկտրոնային ծխամորճերի սրվակներ՝ հաշիշի յուղին նմանվող հեղուկներով, ինչպես նաև «SMOAKLAND BLACK» գրառմամբ փաթեթ՝ մարիխուանային նմանվող բուսական զանգվածով։ Նշված փաստերը միաժամանակ բխում են մաքսային զննման ակտից, մաքսանենգության դեպքի վերաբերյալ արձանագրությունից և հետագայում կատարված փորձաքննության եզրակացությունից։
49. Փորձագիտական եզրակացությամբ հաստատվել է, որ առաքանիում հայտնաբերված նշված առարկաները փաստացի պարունակել են 0,3 գրամ ընդհանուր քաշով «զոլպիդեմ» տեսակի հոգեմետ նյութ, 2,31 գրամ հաստատուն քաշով «հաշիշի յուղ» տեսակի թմրամիջոց և 11,83 գրամ հաստատուն քաշով «մարիխուանա» տեսակի թմրամիջոց։ Հետևաբար, Դատարանի համար հիմնավոր կասկածից վեր հաստատվում է ոչ միայն ծանրոցում նշված առարկաների առկայությունը, այլև դրանց թմրամիջոց և հոգեմետ նյութ լինելու հանգամանքը, ինչպես նաև այն, որ դրանք ՀՀ են տեղափոխվել հիշյալ միջազգային առաքանու միջոցով։
50. Դատարանը հաստատված է համարում նաև այն, որ թեև թիվ 192204747 առաքանին ձևականորեն ուղարկվել է Լիանա Կարապետի Դեմիրճյանի անվամբ, սակայն այն փաստացի նախատեսված է եղել Լաուրա Դեմիրճյանի և Ռազմիկ Խաչատրյանի համար։
Մասնավորապես վկա Լիանա Դեմիրճյանը հայտնել է, որ իր քույրը՝ Լաուրա Դեմիրճյանը, գտնվել է Հայաստանում, վերջինիս դուստրը՝ Քրիստինա Շաքարյանը, պետք է ծանրոց ուղարկեր, իսկ ինքը, համարելով աննպատակահարմար ծանրոցը վարձակալած բնակարան առաքելը, առաջարկել է այն ուղարկել իր անվամբ։ Լիանա Դեմիրճյանը հայտնել է նաև, որ ծանրոցում պետք է լինեին հագուստներ, քրոջ դեղերը, ինչպես նաև իր խնդրանքով ուղարկված շոկոլադե կոնֆետներ։
Լիանա Դեմիրճյանի ցուցմունքը համադրվում է նաև նրա ձերբակալման արձանագրությամբ արտացոլված հայտարարության հետ, ըստ որի՝ առաքանին եկել է իր անվամբ, սակայն նախատեսված է եղել իր քրոջ՝ Լաուրա Դեմիրճյանի և նրա ամուսնու՝ Ռազմիկ Խաչատրյանի համար, իսկ ինքը տեղեկացված չի եղել դրա ամբողջական պարունակությունից։
Ռազմիկ Խաչատրյանի ձերբակալման արձանագրությամբ ևս հաստատվում է, որ նա ծանրոցը կապել է իր կնոջ՝ Լաուրա Դեմիրճյանի հետ, նշել է, որ այնտեղ պետք է լինեին կնոջ դեղերը, ինչպես նաև այլ իրեր, և Լիանա Դեմիրճյանի զանգից հետո իջել է բակ՝ ծանրոցը ստանալու նպատակով։
Այսպիսով, Դատարանը հաստատված է համարում, որ Լիանա Դեմիրճյանը տվյալ առաքանու ձևական հասցեատերն էր, սակայն դրա իրական շահառուների շրջանակը ներառել է Լաուրա Դեմիրճյանին և Ռազմիկ Խաչատրյանին։ Նշված հանգամանքը էական նշանակություն ունի ծանրոցում հայտնաբերված թմրամիջոցների վերաբերյալ Ռազմիկ Խաչատրյանի տեղեկացվածության և դրանք ձեռք բերելու դիտավորության գնահատման տեսանկյունից։
51. 2024 թվականի օգոստոսի 5-ին, երբ վերահսկելի մատակարարման շրջանակում ծանրոցը առաքվել է Գյումրի քաղաքի Շահումյան փողոցի 188Ա շենքի բակ, Լիանա Դեմիրճյանը տեղեկացրել է Ռազմիկ Խաչատրյանին ծանրոցի ժամանման մասին, որից հետո Ռազմիկ Խաչատրյանը իջել է բակ։ Այս հանգամանքը հաստատվում է Լիանա Դեմիրճյանի ցուցմունքով, Լիանա Դեմիրճյանի և Ռազմիկ Խաչատրյանի ձերբակալման արձանագրություններով և համահունչ է գործով հաստատված իրադարձությունների հաջորդականությանը։
Դատարանը գտնում է, որ Ռազմիկ Խաչատրյանի՝ բակ իջնելու գործողությունը չի կարող գնահատվել մեկուսացված։ Առանձին վերցրած՝ այն կարող է ընկալվել որպես ընտանեկան առաքանին բարձրացնելու կամ փոխանցելու կենցաղային վարքագիծ։ Սակայն գործով առկա մյուս ապացույցների՝ հատկապես նամակագրությունների, ծանրոցի փաստացի նշանակության, առաքանիում հայտնաբերված նյութերի բնույթի հետ համադրված՝ այն ձեռք է բերում մեղադրյալի դիտավորությունը և վարքագծի ուղղվածությունը գնահատելու տեսանկյունից օժանդակ նշանակություն։
52. Լիանա Դեմիրճյանի բջջային հեռախոսի թվային խուզարկությամբ հայտնաբերված նամակագրությունները լրացուցիչ հաստատում են, որ Լաուրա Դեմիրճյանը նախկինում ևս ծանրոցներ է ուղարկել Լիանա Դեմիրճյանի անվամբ, իսկ դրանց ստացման և վերցնելու գործընթացում Ռազմիկ Խաչատրյանն ունեցել է գործնական մասնակցություն։ Մասնավորապես, 2024 թվականի մայիսի 11-ի նամակագրությունից երևում է, որ Լաուրա Դեմիրճյանը գրում է․ «Lian Razin zangi tox ga ira tux u brindze tani», 2024 թվականի մարտի 1-ի հաղորդագրությունից նույնպես երևում է, որ ծանրոցի ժամանման դեպքում դրա վերցնելու հարցում կրկին ներգրավված է եղել Ռազմիկ Խաչատրյանը։
Դատարանը գտնում է, որ նշված հաղորդագրությունները ցույց են տալիս ոչ թե պատահական, մեկանգամյա կապ, այլ կայուն վարքագիծ։ Մասնավորապես՝ Լաուրա Դեմիրճյանի ընտանիքի կողմից Հայաստան ծանրոցներ ուղարկելու պրակտիկան եղել է պարբերական, իսկ Լիանա Դեմիրճյանի անվամբ առաքանիներ ստանալը ձևավորված ընտանեկան հարաբերությունների շրջանակում սովորական վարքագիծ է եղել։ Նշվածը համադրվում է Լիանա Դեմիրճյանի ցուցմունքի հետ այն մասին, որ նախկինում ևս իր անվամբ ծանրոցներ են ստացվել։ Ձևավորված պարբերական վարքագիծ է եղել նաև Լիանա Դեմիրճյանի անունը որպես ծանրոց ստացողի տվյալ օգտագործվելն այն պայմաններում, երբ Ռազմիկ Խաչատրյանն է գործնականում հանդես եկել որպես ծանրոցների փաստացի հասցեատեր։
53. Դատարանը հաշվի է առնում, որ Լիանա Դեմիրճյանի ցուցմունքները հետևողական են այն մասով, որ ինքը տեղեկացված չի եղել ծանրոցում թմրամիջոցների առկայության մասին, իրեն հայտնի է եղել միայն, որ այնտեղ պետք է լինեն հագուստ, կոնֆետներ և, ըստ քրոջ հայտնածի՝ որոշ դեղեր։ Այս ցուցմունքները համահունչ են նաև մեղադրանքի փաստական նկարագրությանն այն մասով, ըստ որի Լիանա Դեմիրճյանը ծանրոցում գտնվող թմրամիջոցների մասին տեղյակ չի եղել, իսկ ծանրոցը ստանալուց հետո դրա ժամանման մասին տեղեկացրել է Ռազմիկ Խաչատրյանին։
Մեղադրյալ Ռազմիկ Խաչատրյանի իրազեկվածության և ծանրոցում հայտնաբերված նյութերի պարունակության հետ նրա կապի հարցի կապակցությամբ մեղադրյալի ցուցմունքները գնահատելիս՝ Դատարանը հաշվի է առնում այն, որ նա տարբեր ժամանակահատվածներում ներկայացրել է միմյանց էականորեն չհամընկնող տվյալներ։ Մասնավորապես՝ ձերբակալման պահին հայտնել է, որ կնոջ համար ԱՄՆ-ից պետք է ուղարկվեին դեղեր, ծանրոցը նախատեսված է եղել իրենց համար, ինքը օգտագործում է մարիխուանա և տեղյակ չէ, թե կնոջ դեղերից բացի ինչ պետք է լիներ ծանրոցում։ Այնուհետև հարցաքննության ընթացքում պնդել է, որ ծանրոցում եղած թմրամիջոցները Լևոն Շաքարյանն է առանց մյուսների իմացության դրել քաղցրավենիքի տուփի մեջ, իսկ Քրիստինան՝ չիմանալով այդ մասին, այն ուղարկել է Հայաստան։ Ավելի ուշ կրկին փոխել է իր դիրքորոշումը՝ նշելով, որ իրականում չի տեսել, թե ինչ պայմաններում են թմրամիջոցներն ու դեղերը տեղադրվել, և որ Լևոնի օգտագործման փաստն իրենց ընտանիքի համար վաղուց հայտնի է եղել։ Այս հակասական տվյալները նվազեցնում են մեղադրյալի ցուցմունքների արժանահավատությունը։
54. Այս համատեքստում կարևորվում է մեղադրյալ Ռազմիկ Խաչատրյանի բջջային հեռախոսի թվային խուզարկությամբ հայտնաբերված նամակագրությունների բովանդակությունը՝ որպես նրա հայտնած տվյալների ստուգման միջոց։ Մասնավորապես, «Messenger» հավելվածում 2024 թվականի ապրիլի 26-ին Laura Demirchyan օգտատիրոջ կողմից նրան ուղարկվել են «հաշիշի յուղ» տեսակի թմրամիջոցի պարունակությամբ տուփերի լուսանկարներ, որին Ռազմիկ Խաչատրյանը պատասխանել է․ «Pypyushssss, tenkui kiank@s»։ Դատարանը գտնում է, որ նշված հաղորդագրության բովանդակությունը, հատկապես այն պայմաններում, երբ հետագայում հենց հաշիշի յուղի պարունակությամբ էլեկտրոնային ծխամորճեր են հայտնաբերվել ԱՄՆ-ից առաքված ծանրոցում, ողջամտորեն համահունչ չէ պատահական հետաքրքրության կամ անտեղյակության վարկածի հետ։ Ընդհակառակը, դա ցույց է տալիս, որ առնվազն նշված տեսակի նյութերի վերաբերյալ Ռազմիկ Խաչատրյանը նախապես տեղեկացված է եղել և ստացել է դրանց տեսողական պատկերները դեռևս մինչև առաքանու ժամանումը։
55. Դատարանը նույն համատեքստում գնահատում է նաև այն նամակագրությունները, որոնցում ծանրոցների ուղարկումը, ժամանումը և ստացումը քննարկվել են Ռազմիկ Խաչատրյանի անմիջական մասնակցությամբ։ Թեև առանձին վերցված այդ հաղորդագրությունները կարող էին բացատրվել սովորական կենցաղային ծանրոցների ստացմամբ, սակայն դրանք, Laura Demirchyan օգտատիրոջ կողմից թմրամիջոցի պարունակությամբ առարկաների լուսանկարների ուղարկման հետ համակցության մեջ ձեռք են բերում այլ բովանդակություն՝ ցույց տալով Ռազմիկ Խաչատրյանի ոչ միայն փաստացի մասնակցությունը ծանրոցների ընդունման գործընթացին, այլև նրա հետաքրքրվածությունն առաքվող որոշակի պարունակության կապակցությամբ։
56. Անդրադառնալով վկա Լևոն Շաքարյանի ցուցմունքների գնահատմանը՝ Դատարանն արձանագրում է, որ նա հայտնել է, որ ԱՄՆ-ում օգտագործում է թմրամիջոցներ, դրանք պահել է իր ննջասենյակում՝ փաթիլների տուփերի մեջ, իսկ իր քույրը՝ Քրիստինա Շաքարյանը, առանց իր իմացության վերցրել է այդ տուփերից մեկը և ուղարկել Հայաստան։ Վկան հայտնել է նաև, որ ընտանիքի անդամները տեղյակ չեն եղել իր կողմից թմրամիջոցներ օգտագործելու հանգամանքի մասին, և ինքը դրանք թաքցրել է ընտանիքից՝ ամոթի զգացումից ելնելով։
Այս կապակցությամբ Դատարանը հաշվի է առնում այն, որ Լևոն Շաքարյանը Ռազմիկ Խաչատրյանի փաստացի կնոջ որդին է, այսինքն՝ գտնվում է մեղադրյալի հետ ընտանեկան սերտ հարաբերությունների մեջ, ընդ որում՝ ԱՄՆ քաղաքացի է, բնակվում է ՀՀ իրավազորության սահմաններից դուրս՝ ԱՄՆ-ում։ Նշված հանգամանքներն ինքնին չեն բացառում նրա ցուցմունքի արժանահավատությունը, սակայն պահանջում են այն գնահատել առավել զգուշությամբ՝ այլ ապացույցների հետ համադրման եղանակով։
Այսպես՝ Դատարանն արձանագրում է, որ վկան փորձել է բացատրել ծանրոցում «մարիխուանա» տեսակի թմրամիջոցի հայտնվելը նրանով, որ այն պահված է եղել իր սենյակում գտնվող փաթիլների տուփում, սակայն չի կարողացել տրամաբանորեն և համոզիչ կերպով բացատրել, թե ինչու և ինչպես նույն առաքանիում, նույն համատեքստում, հայտնվել են նաև «հաշիշի յուղ» տեսակի թմրամիջոցի պարունակությամբ էլեկտրոնային ծխամորճեր, ինչպես նաև «զոլպիդեմ» տեսակի հոգեմետ նյութի պարունակությամբ դեղորայք։
Դատարանը կարևորում է, որ Լևոն Շաքարյանի հայտնած տվյալներն առ այն, որ Քրիստինա Շաքարյանը պատահաբար վերցրել է իր սենյակում եղած սովորական սննդի տուփը՝ չիմանալով դրա մեջ թմրամիջոցների առկայության մասին, համահունչ չէ առաքանու ամբողջական պարունակությանը։ Մասնավորապես՝ հաստատվել է, որ ծանրոցում եղել է ոչ թե մեկ պատահաբար վերցված փաթիլների տուփի մեջ առկա մեկ տեսակի նյութ, այլ տարբեր տեսակի թմրամիջոցներ և հոգեմետ նյութի պարունակությամբ դեղորայք։ Այդ հանգամանքը էապես նվազեցնում է Լևոն Շաքարյանի ցուցմունքի հավաստիությունը։
Հատկանշական է նաև այն, որ վկա Լևոն Շաքարյանի այն պնդումը, որ ընտանիքի անդամները տեղյակ չեն եղել իր կողմից թմրամիջոց օգտագործելու մասին, հակասում է գործում առկա այլ տվյալներին։ Մասնավորապես՝ Ռազմիկ Խաչատրյանը հրապարակված ցուցմունքներում հայտնել է, որ Լևոն Շաքարյանն օգտագործում է «մարիխուանա» և «հաշիշի յուղ» տեսակի թմրամիջոցներ, իսկ հետագայում պարզաբանել է, որ ընտանիքի անդամների համար այդ հանգամանքը հայտնի է եղել։ Հետևաբար, Լևոն Շաքարյանի կողմից իր օգտագործումը ընտանիքից լիովին գաղտնի պահելու պնդումը համահունչ չէ առկա ապացույցների ամբողջությանը։
Դատարանն արձանագրում է նաև, որ վկա Լևոն Շաքարյանի ցուցմունքն ըստ էության ուղղված է Ռազմիկ Խաչատրյանի համար քրեական պատասխանատվությունը բացառող այլընտրանքային վարկածի ձևավորմանը, սակայն այդ վարկածը չի հաստատվում որևէ անկախ և օբյեկտիվ ապացույցով։ Գործով ձեռք չեն բերվել տվյալներ, որոնք կհաստատեին, որ թմրամիջոցներն իրականում պատկանել են Լևոն Շաքարյանին, որ դրանք նրա կողմից են թաքցվել փաթիլների տուփում, կամ որ Քրիստինա Շաքարյանը ծանրոցը կազմելիս իրականում գործել է առանց որևէ տեղեկացվածության։
Այսպիսով՝ Դատարանը Լևոն Շաքարյանի ցուցմունքը արժանահավատ և բավարար չի համարում գործով հաստատված մյուս փաստական տվյալները հերքելու կամ դրանց ապացուցվածության վերաբերյալ ողջամիտ կասկածներ առաջացնելու համար։
57. Դատարանը հաշվի է առնում նաև, որ մաքսային զննման ակտով թմրամիջոցները փաստացի հայտնաբերվել են միջազգային առաքանու ընդհանուր պարունակության մեջ, մինչդեռ վկա Սևադա Աղազարյանը դատական նիստում չի հիշել դրանք թաքցված լինելու կոնկրետ եղանակը և նշել է, որ նման պարագայում թաքցման եղանակը սովորաբար արձանագրվում է ակտում։ Ուստի Դատարանը հաստատված է գնահատում այն, որ առաքանիով ԱՄՆ-ից ՀՀ են տեղափոխվել համապատասխան թմրամիջոցները, սակայն տվյալ ապացույցների համակցությամբ չի վերականգնում դրանց տեղադրման ներհատուկ եղանակի ամբողջական պատկերը այն եղանակով, ինչպես ներկայացվել է պաշտպանական վարկածով՝ մասնավորապես փաթիլների փակված տուփի մեջ։
58. Այսպիսով ՝ Դատարանը գտնում է, որ ապացույցների համակցությունը բավարար է եզրահանգելու, որ Ռազմիկ Խաչատրյանը ծանրոցի՝ արգելված նյութերի պարունակության առնվազն էական մասի վերաբերյալ տեղեկացված է եղել, սպասել է դրա ստացմանը և դրա ժամանման մասին տեղեկացվելուց հետո անմիջապես ձեռնամուխ է եղել այն փաստացի վերցնելու գործընթացում։ Այս հետևությունը բխում է՝ ա) ծանրոցի փաստացի հասցեագրվածության մասին փաստական տվյալներից, բ) Լաուրա Դեմիրճյանի հետ նամակագրություններից, հատկապես հաշիշի յուղի պարունակությամբ ապրանքների լուսանկարների ուղարկումից և դրանց համար արտահայտված երախտագիտությունից, դ) մեղադրյալի հակասական ու փոփոխվող ցուցմունքներից, ինչպես նաև ե) վկա Լևոն Շաքարյանի ցուցմունքի նվազ արժանահավատությունից։ Առանձին վերցված յուրաքանչյուր ապացույց գուցե բավարար չլիներ, սակայն դրանց համակցությունը ձևավորում է միասնական, փոխլրացնող և տրամաբանական ապացուցողական շղթա։
59. Մեղադրյալ Ռազմիկ Խաչատրյանի բնակության վայրից հայտնաբերված թմրամիջոցների կապակցությամբ մեղադրյալին վերագրված փաստական հանգամանքների առնչությամբ Դատարանը հաստատված է գնահատում, որ 2024 թվականի օգոստոսի 7-ին Ռազմիկ Խաչատրյանի հաշվառման և բնակության հասցեում՝ Գյումրի քաղաքի Ղանդիլյան փողոցի թիվ 84 շենքի թիվ 16 բնակարանում, կատարված խուզարկությամբ նրա ննջասենյակի պահարանից և նույն սենյակից հայտնաբերվել են վեց հատ ապակյա կաթուցիչ՝ մոխրացված զանգվածներով, մեկ հատ էլեկտրոնային գլանակ՝ յուղի հետքերով, ութ հատ դեղահատ, տասնհինգ հատ սերմի հատիկներ և մեկանգամյա բաժակի մեջ աճեցված երկու հատ կանեփանման բույսի ցողուններ։
60. Համալիր փորձաքննության եզրակացությամբ հաստատվել է, որ նշված ութ դեղահատերից մեկ հատ «54/375» գրառումներով կլոր դեղահատը պարունակում է 0,008 գրամ «բուպրենորֆին» տեսակի թմրամիջոց, իսկ վեց հատ «57/71» ներհրված գրառումներով սպիտակ դեղահատերը պարունակում են ընդհանուրը 0,048 գրամ «մեթադոն» տեսակի թմրամիջոց։ Նույն եզրակացությամբ արձանագրվել է նաև, որ հայտնաբերված երկու բույսերից մեկը հանդիսանում է Կանեփ ցեղի խոտաբույս՝ «տետրահիդրոկաննաբինոլ (ՏՀԿ)» տեսակի թմրամիջոցի պարունակությամբ, իսկ ապակյա կաթուցիչների և էլեկտրոնային գլանակի ներքին մակերեսների հետազոտությամբ հայտնաբերվել են «ՏՀԿ» հետքեր։
61. Այս դրվագով մեղադրյալ Ռազմիկ Խաչատրյանը հայտնել է, որ հայտնաբերված սերմերը, կաթուցիչները, խոտաբույսը պատկանել են իրեն, իսկ «բուպրենորֆին» և «մեթադոն» պարունակող դեղահատերը պատկանել են իր հորը և գտնվել են վերջինիս դարակում։ Մինչդեռ Դատարանը նկատում է, որ դեղահատերը հայտնաբերվել են այն նույն պահարանում և նույն սենյակում, որտեղ գտնվել են նաև այն առարկաները, որոնց պատկանելությունը մեղադրյալը բացահայտորեն ընդունել է։ Ավելին՝ նրա հոր մահվան մասին ներկայացված տվյալների համաձայն վերջինս մահացել է դեռևս 2007 թվականին, և որևէ օբյեկտիվ տվյալ չի ներկայացվել, որը կհաստատեր, որ շուրջ տասնյոթ տարի անց հիշյալ թմրամիջոցների պարունակությամբ դեղահատերը նույն անփոփոխ վիճակով պահպանվել են այդ բնակարանում՝ առանց մեղադրյալի հետ առնչության։ Ընդ որում՝ հայտնաբերված մյուս առարկաները, այդ թվում՝ ՏՀԿ հետքեր կրող ապակյա կաթուցիչները և էլեկտրոնային գլանակը ցույց են տալիս, որ այդ տարածքը գործնականում գտնվել է մեղադրյալի վերահսկողության ներքո և օգտագործվել է նրա կողմից թմրամիջոցի հետ առնչվող առարկաների պահպանման ու օգտագործման համար։ Այս պայմաններում դեղահատերի՝ նրա հորը պատկանելիության մասին տվյալները Դատարանը գնահատում է որպես պատասխանատվությունից խուսափելուն ուղղված պաշտպանական վարկած։
62. Այսպիսով՝ Դատարանը գտնում է, որ բավարար ապացույցներով հաստատվում է առնվազն վկայակոչված թմրամիջոցների փաստացի ձեռբերման և պահման հանգամանքները Ռազմիկ Խաչատրյանի բնակության վայրում և նրա տիրապետության ոլորտում գտնվող սենյակում։
63. Ամփոփելով վերոգրյալը՝ պատշաճ ապացույցների բավարար համակցությամբ, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ Դատարանը գտնում է, որ «հիմնավոր կասկածից վեր» ապացուցողական չափանիշին համապատասխան ապացուցված է, որ ՝
- Ռազմիկ Սերյոժայի Խաչատրյանը, նպատակ ունենալով առանց իրացնելու նպատակի ապօրինի ձեռք բերել զգալի չափերով՝ 11,83 գրամ «Մարիխուանա» և զգալի չափերով՝ ընդհանուր 2,31 գրամ «Հաշիշի յուղ» տեսակի թմրամիջոցներ, ԱՄՆ-ից Եվրասիական տնտեսական միության մաքսային սահմանով և ՀՀ պետական սահմանով մաքսանենգությամբ՝ մաքսային հսկողությունից թաքցնելու և դրա տեղափոխման համար սահմանված արգելքը խախտելու եղանակով թմրամիջոց ապօրինի տեղափոխելուն օժանդակելու դիտավորությամբ, նախապես խոստացել է առանց իրացնելու նպատակի ապօրինի ձեռք բերել վերոնշյալ թմրամիջոցները:
- ձեռք բերված պայմանավորվածության համաձայն, զգալի չափերով՝ 11,83 գրամ «Մարիխուանա» և զգալի չափերով՝ ընդհանուր 2,31 գրամ «Հաշիշի յուղ» տեսակի թմրամիջոցներն այլ իրերի հետ տեղադրվել են ստվարաթղթե արկղի մեջ և, նախապես ստացված լինելով Լիանա Դեմիրճյանի անձնական տվյալները, նշված ծանրոցը Լաուրա Դեմիրճյանի անունից Լիանա Դեմիրճյանի անվամբ ՀՀ առաքելու համար ԱՄՆ-ում հանձնվել է բեռնափոխադրող «Տրանս Շիփփինգ» ՍՊ ընկերությանը:
- ՀՀ ՊԵԿ ՄԴՊ վարչության աշխատակիցների կողմից մաքսային հսկողության շրջանակներում Լիանա Դեմիրճյանի անվամբ ապօրինի ՀՀ տեղափոխված ծանրոցում հայտնաբերվել են զգալի չափերով՝ 11,83 գրամ «Մարիխուանա» և զգալի չափերով ընդհանուր 2,31 գրամ «Հաշիշի յուղ» տեսակի թմրամիջոցները, որոնք իրականացված «վերահսկելի մատակարարում և գնում» օպերատիվ-հետախուզական միջոցառման շրջանակներում փոխարինվել են նմանատիպ այլ զանգվածներով:
- Լիանա Դեմիրճյանի անվամբ ապօրինի ՀՀ տեղափոխված վերոնշյալ ծանրոցի ՀՀ-ում գտնվելու մասին տեղեկացվելուց հետո, Լիանա Դեմիրճյանն այդ մասին հայտնել է Ռազմիկ Խաչատրյանին: Այնուհետև, 2024 թվականի օգոստոսի 5-ին Ռազմիկ Խաչատրյանը տեղեկանալով, որ «Մարիխուանա» և «Հաշիշի յուղ» տեսակի թմրամիջոցների պարունակությամբ ծանրոցն առաքվել է Գյումրի քաղաքի Շահումյան փողոցի 188 Ա շենքի բակ, իսկ Լիանա Դեմիճյանն անտեղյակ լինելով ծանրոցում վերոնշյալ թմրամիջոցների առկայության մասին, միասին դուրս են եկել նշված շենքի բակ, որտեղ Ռազմիկ Խաչատրյանը փորձել է ապօրինի ձեռք բերել վերոնշյալ ծանրոցը, սակայն այդ ժամանակ Լիանա Դեմիրճյանի հետ ձերբակալվել են ՀՀ ՊԵԿ ՄԴՊ վարչության աշխատակիցների կողմից, իսկ «վերահսկելի մատակարարում և գնում» օպերատիվ-հետախուզական միջոցառման շրջանակներում վերոնշյալ թմրամիջոցներին փոխարինված զանգվածներով ծանրոցը հայտնաբերվել է Լիանա Դեմիրճյանի անձնական խուզարկությամբ:
- Ռազմիկ Սերյոժայի Խաչատրյանը, չպարզված հանգամանքներում և ժամանակահատվածում անձնական գործածման համար, առանց իրացնելու նպատակի ապօրինի ձեռք է բերել և իր հաշվառման ու բնակության՝ Շիրակի մարզ, քաղաք Գյումրի, Ղանդիլյան փողոց, 84 շենք, 16 բնակարան հասցեում ապօրինի պահել խոշոր չափերով՝ 0,008 գրամ «Բուպրենորֆին» տեսակի թմրամիջոցի պարունակությամբ թվով 1 դեղահատ և զգալի չափերով՝ ընդհանուր 0,048 գրամ «Մեթադոն» տեսակի թմրամիջոցի պարունակությամբ թվով 6 դեղահատեր, որոնք հայտնաբերվել են վերոնշյալ հասցեում կատարված խուզարկության ժամանակ։


Պատճառաբանական մաս.
I. Մեղադրյալին վերագրված արարքների իրավական գնահատականը.
64․ ՀՀ Սահմանադրության 66-րդ հոդվածի համաձայն․
«Հանցագործության համար մեղադրվողը համարվում է անմեղ, քանի դեռ նրա մեղքն ապացուցված չէ օրենքով սահմանված կարգով` դատարանի` օրինական ուժի մեջ մտած դատավճռով:»։
ՀՀ քրեական դատավարության օրենսգրքի 22-րդ հոդվածի համաձայն՝
«1. Քրեական վարույթի համար նշանակություն ունեցող ցանկացած հանգամանք պետք է հաստատվի պատշաճ ապացույցների բավարար համակցությամբ:
2. Եզրափակիչ դատավարական ակտը պետք է հիմնվի հետազոտված ապացույցների ազատ և բարեխիղճ գնահատման վրա:
3. Մեղադրական դատավճռի հիմքում դրվող յուրաքանչյուր փաստական հանգամանք պետք է հիմնավորվի ապացույցների այնպիսի ծավալով, որը կբացառի դրա ապացուցվածության վերաբերյալ ցանկացած հիմնավոր կասկած: Դատավճիռ կայացնելիս պետք է հաշվի առնվի անհրաժեշտ և հնարավոր ապացույցների բացակայությունը:
(…)
5. Հանցագործության համար անձի մեղավորության մասին հետևությունը չի կարող հիմնվել ենթադրությունների վրա. այն պետք է հաստատվի փոխկապակցված վերաբերելի, թույլատրելի, հավաստի ապացույցների ամբողջությամբ:
(…)։»:
Նույն օրենսգրքի 342-րդ հոդվածի համաձայն․
«1. Վերդիկտ կայացնելիս դատարանը ներկայացված հաջորդականությամբ լուծում է հետևյալ հարցերը․
1) ապացուցված են արդյոք մեղադրյալին վերագրվող փաստական հանգամանքները (արարքը).
2) ապացուցված է արդյոք այդ արարքի քրեական հակաիրավականությունը.
3) ապացուցված է արդյոք մեղադրյալի կողմից այդ արարքը կատարելը.
4) ապացուցված է արդյոք մեղադրյալի մեղավորությունը տվյալ արարքը կատարելու մեջ:
2. Սույն հոդվածի 1-ին մասում նշված հարցերից որևէ մեկին ժխտական պատասխան տալու դեպքում դատարանը կայացնում է արդարացման վերդիկտ։
3. Սույն հոդվածի 1-ին մասում նշված բոլոր հարցերին հաստատական պատասխան տալու դեպքում դատարանը կայացնում է մեղադրական վերդիկտ, որով սահմանում է նաև, թե ապացուցված արարքի նկատմամբ քրեական օրենսգրքի որ հոդվածը, հոդվածի մասը կամ կետն է ենթակա կիրառման:
4. Մեղադրական վերդիկտը չի կարող հիմնված լինել ենթադրությունների վրա և կայացվում է միայն այն դեպքում, երբ հանցանքը կատարելու մեջ մեղադրյալի մեղավորությունն ապացուցված է դատաքննության ընթացքում: Հանցանքը կատարելու մեջ մեղադրյալի մեղավորությունը կարող է համարվել ապացուցված, եթե դատարանը, ղեկավարվելով անմեղության կանխավարկածով, հիմնվելով պատշաճ ապացուցման արդյունքների վրա, հանգում է մեղադրյալի մեղավորության մասին հետևության:
(…)։»:
64․1․ Եզրափակիչ դատական ակտը պետք է հիմնված լինի ապացույցների ազատ և բարեխիղճ գնահատման վրա, և քրեական վարույթի համար նշանակություն ունեցող, մեղադրական դատավճռի հիմքում դրվող յուրաքանչյուր փաստական հանգամանք պետք է հիմնավորվի ապացույցների այնպիսի բավարար համակցությամբ, որը կբացառի ցանկացած հիմնավոր կասկած տվյալ փաստական հանգամանքի ապացուցվածության վերաբերյալ։ Գործի լուծման համար ապացույցների բավարարությունը որոշելու չափանիշները սերտորեն փոխկապակցված են և փոխադարձաբար պայմանավորում են միմյանց: Գործի լուծման համար բավարար ապացույցներ ասելով` պետք է հասկանալ թույլատրելի, վերաբերելի և արժանահավատ ապացույցների համակցություն, որը, հաղթահարելով անմեղության կանխավարկածը, անաչառ դիտորդի մոտ կձևավորի հիմնավոր կասկածից վեր համոզվածություն անձի մեղավորության վերաբերյալ, ինչպես նաև կհաստատի գործով ապացուցման առարկան կազմող մյուս հանգամանքները և հնարավորություն կտա կայացնել հիմնավորված և պատճառաբանված որոշում:
Ապացույցների բավարարությունը չի կարող որոշվել թվաբանական ցուցանիշով: Ապացույցները բավարար չեն, եթե`
1) գործում բացակայում է որևէ ապացույց գործի ճիշտ լուծման համար նշանակություն ունեցող որևէ հանգամանքի պարզման համար,
2) եղած ապացույցը թույլ չի տալիս պարզել այդ հանգամանքը անհրաժեշտ խորությամբ և լրիվությամբ,
3) այդ հանգամանքի ապացուցվածությունը կասկած է հարուցում:
Այս համատեքստում Դատարանն անհրաժեշտ է համարում ընդգծել, որ մեղադրյալի ցուցմունքի նկատմամբ անվստահությունը դեռևս չի ազատում մեղադրանքի կողմին անձի մեղավորությունը հիմնավոր կասկածից վեր ապացուցողական չափանիշին համապատասխան ապացուցելու բեռից: Ավելին, վերջինի ապացուցվածության վերաբերյալ ողջամիտ կասկածներ առաջանալու տեսանկյունից պարտադիր էլ չէ հավատալ և հիմք ընդունել մեղադրյալի ցուցմունքները: Դատարանը չպետք է պարզապես ընտրություն կատարի այլընտրանքային վարկածների միջև և դա անելով՝ մեղադրյալին մեղավոր ճանաչի, եթե իր համար նախընտրելի է մեղադրանքի վարկածը, քանի որ մեղադրական դատավճռի հիմքում դրվող յուրաքանչյուր փաստական հանգամանք պետք է հիմնավորվի ապացույցների այնպիսի ծավալով, որը կբացառի դրա ապացուցվածության վերաբերյալ ցանկացած հիմնավոր կասկած։ Վերջինը ենթադրում է, որ խոսքը ոչ թե այլընտրանքային վարկածի ապացուցվածությանն է վերաբերում, այլ մեղադրական վարկածի ապացուցվածության վերաբերյալ հիմնավոր կասկածի առկայությանը։
65. ՀՀ քրեական օրենսգրքի 44-րդ հոդվածի համաձայն՝
«1. Հանցափորձ է համարվում դիտավորյալ այն գործողությունը կամ անգործությունը, որն անմիջականորեն ուղղված է հանցանք կատարելուն և պարունակում է սույն օրենսգրքի Հատուկ մասով նախատեսված հանցակազմի հատկանիշներ, սակայն անձի դիտավորության մեջ ընդգրկված հանցագործությունը նրա կամքից անկախ հանգամանքներով չի իրագործվում տվյալ հանցակազմի որևէ հատկանիշի բացակայության հետևանքով:
(…)
5. Հանցափորձը համարվում է ավարտված, եթե անձը կատարում է այն արարքը, որն անհրաժեշտ ու բավարար էր դիտավորության մեջ ընդգրկված հանցագործությունն ավարտին հասցնելու համար, և գիտակցում է, որ հանցագործությունն ավարտին է հասել, կամ հանցագործությունն ավարտելու համար արարքը շարունակելու անհրաժեշտություն չկա:
6. Հանցափորձը համարվում է չավարտված, եթե անձը գիտակցում է, որ հանցագործությունն ավարտին հասցնելու համար անհրաժեշտ է շարունակել սկսած արարքի կատարումը կամ նոր արարք կատարել:»։
Նույն օրենսգրքի 46-րդ հոդվածի 6-րդ մասի համաձայն՝
«Օժանդակող է համարվում այն անձը, որը հանցագործությանը նպաստել է խորհուրդներով, ցուցումներով, տեղեկություններ կամ միջոցներ, գործիքներ տրամադրելով կամ խոչընդոտները վերացնելով, ինչպես նաև այն անձը, որը նախապես խոստացել է պարտակել հանցագործին, հանցագործության միջոցները կամ գործիքները, հանցագործության հետքերը կամ հանցավոր ճանապարհով ձեռք բերված առարկաները, ինչպես նաև այն անձը, որը նախապես խոստացել է ձեռք բերել կամ իրացնել այդպիսի առարկաները:»
ՀՀ քրեական օրենսգրքի 396-րդ հոդվածի համաձայն՝
«1. Առանց իրացնելու նպատակի զգալի չափերով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ կամ պրեկուրսոր ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը կամ առաքելը՝
պատժվում է տուգանքով՝ առավելագույնը տասնապատիկի չափով, կամ հանրային աշխատանքներով՝ առավելագույնը հարյուր ժամ տևողությամբ, կամ ազատության սահմանափակմամբ՝ առավելագույնը մեկ տարի ժամկետով, կամ կարճաժամկետ ազատազրկմամբ՝ առավելագույնը մեկ ամիս ժամկետով, կամ ազատազրկմամբ՝ առավելագույնը մեկ տարի ժամկետով:
2. Սույն հոդվածի 1-ին մասով նախատեսված արարքը, որը կատարվել է խոշոր չափերով՝
պատժվում է տուգանքով տասնապատիկից երեսնապատիկի չափով, կամ հանրային աշխատանքներով՝ հարյուրից երկու հարյուր ժամ տևողությամբ, կամ ազատության սահմանափակմամբ՝ մեկից երեք տարի ժամկետով, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ մեկից երեք տարի ժամկետով»:
ՀՀ քրեական օրենսգրքի 399-րդ հոդվածի համաձայն՝
«Թմրամիջոցի, հոգեմետ (հոգեներգործուն) նյութի, դրանց պատրաստուկի, դրանց համարժեք նյութի (անալոգ) կամ դրանց ածանցյալի կամ դրանց պրեկուրսորի կամ դրանք պատրաստելու համար օգտագործվող և հատուկ հսկողության տակ գտնվող նյութի, սարքավորման կամ գործիքի կամ մշակումն արգելված՝ թմրամիջոց, հոգեմետ (հոգեներգործուն), խիստ ներգործող կամ թունավոր նյութ պարունակող բույսի մաքսանենգությունը՝ Եվրասիական տնտեսական միության մաքսային սահմանով կամ Հայաստանի Հանրապետության պետական սահմանով դրանք ապօրինի տեղափոխելը, որը կատարվել է առանց մաքսային հսկողության կամ դրանից թաքցնելով, կամ դրանց մասին հավաստի տեղեկությունը սահմանված կարգով չհայտարարագրելու կամ ոչ իր անվամբ հայտարարագրելու կամ դրանց տեղափոխման համար սահմանված կանոնը, այդ թվում՝ արգելքը կամ սահմանափակումը խախտելու կամ մաքսային կամ այլ փաստաթուղթը խաբեությամբ օգտագործելու միջոցով`
պատժվում է ազատազրկմամբ՝ երեքից վեց տարի ժամկետով:»։
66. Վերոգրյալի հիման վրա և հաշվի առնելով Դատարանի կողմից՝ սույն դատավճռի 62-րդ կետում հաստատված փաստական հանգամանքները՝ Դատարանը գտնում է, որ «հիմնավոր կասկածից վեր» ապացուցողական չափանիշին համապատասխան ապացուցված է, որ՝ մեղադրյալ Ռազմիկ Խաչատրյանը
- թմրամիջոցները ձեռքբերելու վերաբերյալ նախապես խոստանալու եղանակով օժանդակել է զգալի չափերի թմրամիջոցների մաքսանենգությանը: Դատարանը գտնում է, որ ապացուցված է մեղադրյալ Ռազմիկ Խաչատրյանի մեղավորությունն իրեն մեղսագրված հանցանքում, իսկ նրա արարքը որակված է ճիշտ և համապատասխանում է ՀՀ քրեական օրենսգրքի 46-399-րդ հոդվածի 1-ին մասով նախատեսված հանցագործության հատկանիշներին։
- առանց իրացնելու նպատակի փորձել է ապօրինի ձեռք բերել զգալի չափերով վերը նշված թմրամիջոցները: Դատարանը գտնում է, որ ապացուցված է մեղադրյալ Ռազմիկ Խաչատրյանի մեղավորություն իրեն մեղսագրված հանցանքում, իսկ նրա արարքը որակված է ճիշտ և համապատասխանում է ՀՀ քրեական օրենսգրքի 44-396-րդ հոդվածի 1-ին մասով նախատեսված հանցագործության հատկանիշներին։
- առանց իրացնելու նպատակի ապօրինի ձեռք է բերել և պահել է խոշոր չափերի և զգալի չափերի թմրամիջոցներ: Դատարանը գտնում է, որ ապացուցված է մեղադրյալի մեղավորություն իրեն մեղսագրված հանցանքում, իսկ նրա արարքը որակված է ճիշտ և համապատասխանում է ՀՀ քրեական օրենսգրքի 396-րդ հոդվածի 2-րդ մասով նախատեսված հանցագործության հատկանիշներին։

II. Մեղադրյալի քրեական պատասխանատվության հարցը.
67․ Հաստատված համարելով մեղադրյալ Ռազմիկ Խաչատրյանի մեղավորությունը իրեն մեղսագրված հանցանքների կատարման մեջ՝ Դատարանը գտնում է, որ անհրաժեշտ է անդրադառնալ մեղադրյալի նկատմամբ պատիժ նշանակելու հետ կապված հետևյալ հարցերին.
ա) արդյո՞ք ապացուցված են մեղադրյալի պատասխանատվությունը և պատիժը մեղմացնող կամ ծանրացնող հանգամանքները.
բ) մեղադրյալը ենթակա է արդյո՞ք պատժի իր կատարած հանցանքների համար.
գ) ի՞նչ պատիժ պետք է նշանակվի մեղադրյալի նկատմամբ.
դ) մեղադրյալն արդյո՞ք պետք է կրի իր նկատմամբ նշանակված պատիժը.
68․ Անդրադառնալով «ա» կետով բարձրացված հարցին՝ Դատարանն արձանագրում է, որ մեղադրյալ Ռազմիկ Խաչատրյանի պատասխանատվությունը կամ պատիժը մեղմացնող, ինչպես նաև ծանրացնող հանգամանքներ առկա չեն։
69․Անդրադառնալով «բ» կետով բարձրացված հարցին՝ Դատարանն արձանագրում է, որ սույն քրեական գործով մեղադրյալ Ռազմիկ Խաչատրյանին պատժից ազատելու հիմքեր առկա չեն, հետևաբար՝ նա ենթակա է պատժի իր կատարած հանցանքի համար։
70․Անդրադառնալով «գ» կետով բարձրացված հարցին՝ Դատարանն անհրաժեշտ է համարում նշել հետևյալը.
ՀՀ քրեական օրենսգրքի 7-րդ հոդվածի 1-ին մասի համաձայն՝
«Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:»:
ՀՀ քրեական օրենսգրքի 55-րդ հոդվածի 2-րդ մասի համաձայն՝
«Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»:
ՀՀ քրեական օրենսգրքի 69-րդ հոդվածի համաձայն՝
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ (…):»:
70․1․ Պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են՝
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
Պատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ՝ ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները՝ ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն։
Նշանակվող պատժի արդարացիության հիմնական պահանջներից է այն, որ պատիժը պետք է համապատասխանի հանցագործության հանրային վտանգավորության աստիճանին և բնույթին:
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա:
Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով: Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս: Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն:
Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը:
Արարքի հանրային վտանգավորության բնույթի որոշման հարցում կարևորվում է խախտված քրեաիրավական նորմով պաշտպանվող հասարակական հարաբերության սոցիալական նշանակությունը: Պատիժ նշանակելիս դատարանները պարտավոր են հաշվի առնել տվյալ ժամանակահատվածում քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը:
70.2. Վերը մեջբերված իրավական նորմերում և դիրքորոշումներում սահմանված չափանիշների համատեքստում մեղադրյալ Ռազմիկ Խաչատրյանի նկատմամբ պատժի տեսակը որոշելիս Դատարանը հաշվի է առնում հետևյալը.
- նրա կողմից ՀՀ քրեական օրենսգրքի 396-րդ հոդվածի 2-րդ մասով կատարված հանցագործության բնույթը և հանրության համար վտանգավորության աստիճանը, մասնավորապես այն, որ նրան մեղսագրված արարքը բնակչության առողջության դեմ ուղղված, դիտավորյալ, միջին ծանրության հանցագործություն է, թմրամիջոցները խոշոր չափերով «Բուպրենորֆին», ինչպես նաև զգալի չափերով «Մեթադոն» տեսակի տեսակների են,
- նրա կողմից ՀՀ քրեական օրենսգրքի 46-399-րդ հոդվածի 1-ին մասով կատարված հանցագործության բնույթը և հանրության համար վտանգավորության աստիճանը, մասնավորապես այն, որ նրան մեղսագրված արարքը բնակչության առողջության դեմ ուղղված, դիտավորյալ ծանր հանցագործություն է, թմրամիջոցները զգալի չափերով «Մարիխուանա» և զգալի չափերով «Հաշիշի յուղ» տեսակների են, որոնք վտանգավորության և անձի օրգանիզմի վրա ազդեցության հարաբերականորեն ցածր աստիճան ունեն, օժադակությունը դրսևորվել է նախապես ձեռքբերելը խոստանալու եղանակով, թմրամիջոցները նախատեսված են եղել մեղադրյալի անձնական օգտագործման համար և հանցանքը կատարվել է այդ նպատակով,
- նրա կողմից ՀՀ քրեական օրենսգրքի 44-396-րդ հոդվածի 1-ին մասով կատարված հանցագործության բնույթը և հանրության համար վտանգավորության աստիճանը, մասնավորապես այն, որ նրան մեղսագրված արարքը բնակչության առողջության դեմ ուղղված, դիտավորյալ, ոչ մեծ ծանրության հանցագործություն է, այն փոխկպակացված է ՀՀ քրեական օրենսգրքի 46-399-րդ հոդվածի 1-ին մասով մեղադրյալի կատարած հանցանքի հետ՝ որպես նպատակ և միջոց, թմրամիջոցների վերը նշված տեսակները և վնատգավորության աստիճանները,
- խախտված հասարակական հարաբերության սոցիալական նշանակությունը,
- թմրամիջոցների ապօրինի շրջանառության դեմ պայքարի ոլորտում պետության քրեական քաղաքականության ուղղվածությունը,
- պատասխանատվությունը կամ պատիժը մեղմացնող, ինչպես նաև ծանրացնող հանգամանքների բացակայությունը,
- անձը բնութագրող հանգամանքները, այդ թվում՝ տարիքը, առաջին անգամ հանցանքները կատարած լինելը, դրական բնութագրվելը, վատառողջ լինելը և աշխտորոշումների բնույթը, ընտանեկան դրությունը (տե՛ս դատավճռի 39-րդ, 41-44-րդ կետերը)։
Վերոգրյալներից ելնելով Դատարանը գտնում է, որ տվյալ դեպքում Ռազմիկ Խաչատրյանի նկատմամբ պետք է նշանակել՝
- ՀՀ քրեական օրենսգրքի 396-րդ հոդվածի 2-րդ մասով նախատեսված հանցանքի համար՝ տուգանք նվազագույն աշխատավարձի տասնապատիկի չափով,
- ՀՀ քրեական օրենսգրքի 44-396-րդ հոդվածի 1-ին մասով նախատեսված հանցանքի համար՝ տուգանք նվազագույն աշխատավարձի հնգապատիկի չափով,
- ՀՀ քրեական օրենսգրքի 46-399-րդ հոդվածի 1-ին մասով նախատեսված հանցանքի համար՝ ազատազրկում՝ երեք տարի ժամկետով,
Դատարանը գտնում է, որ նշված պատժատեսակները և դրանց չափերը սույն դեպքում համաչափ են մեղադրյալի անձին և նրա կատարած հանցանքներից յուրաքանչյուրի վտանգավորության աստիճանին, դրանց միջոցով հնարավոր է ապահովել պատժի նպատակների իրացվելիությունը:
70.3․ՀՀ քրեական օրենսգրքի 3-րդ հոդվածի 1-ին մասի համաձայն՝
«Սույն օրենսգրքում օգտագործվում են հետևյալ հասկացությունները.
(...)
6) ամսական եկամուտ` հանցանքն ավարտվելու օրվան նախորդող 12 ամիսների ընթացքում անձի ստացած միջին ամսական եկամտի 35 տոկոսը: Միջին ամսական եկամտի մեջ հաշվարկվում են ստացվող աշխատավարձը և դրան հավասարեցված այլ վճարումները, անձի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտը (շահաբաժինը, տոկոսը, ռոյալթին, վարձակալական վճարը): Ամսական եկամուտը հաշվարկելիս հաշվի չեն առնվում դրանց համար վճարվող հարկերը, տուրքերը կամ այլ վճարներ.
7) նվազագույն աշխատավարձ՝ «Նվազագույն ամսական աշխատավարձի մասին» օրենքով սահմանված նվազագույն ամսական աշխատավարձի չափը. (...)»:
ՀՀ քրեական օրենսգրքի 59-րդ հոդվածի համաձայն՝
«(…)
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
(…)
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
(…)
7. Տուգանքի նշանակման հնարավորությունը և չափը դատարանը որոշում է՝ հաշվի առնելով հանցագործության ծանրությունը, հանցագործությամբ պատճառված վնասի բնույթն ու չափը, հանցագործությամբ ստացված գույքային կամ ոչ գույքային բնույթի օգուտները, դատապարտվողի ու նրա ընտանիքի գույքային դրությունը, ինչպես նաև դատապարտվողի՝ եկամուտ ստանալու հնարավորությունը կամ նրան պատկանող այնպիսի գույքի առկայությունը, որի վրա կարող է բռնագանձում տարածվել:
8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ (…)»:
«Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն՝
«Հայաստանի Հանրապետությունում նվազագույն ամսական աշխատավարձը սահմանել 75000 դրամ:»։
Վերոգրյալի հիման վրա, նկատի ունենալով սույն դատավճռի նախորդ կետում նշված հանգամանքները, հաշվի առնելով, որ հանցանքներին նախորդող 12 ամիսների ընթացքում՝ մեղադրյալ Ռազմիկ Խաչատրյանի՝ եկամուտ ունենալու վերաբերյալ տվյալները բացակայում են (տե՛ս սույն դատավճռի 40-րդ կետը)՝ մեղադրյալի նկատմամբ նշանակված տուգանքի չափը պետք է հաշվարկել հանցանքը կատարելու պահին նվազագույն աշխատավարձի` 75.000 (յոթանասունհինգ հազար) ՀՀ դրամի հաշվարկով, որի դեպքում այն ՀՀ քրեական օրենսգրքի 44-396-րդ հոդվածի 1-ին մասով նախատեսված հանցանքի դեպքում կկազմի 375.000 (երեք հարյուր յոթանասուն հինգ հազար) ՀՀ դրամ, իսկ ՀՀ քրեական օրենսգրքի 396-րդ հոդվածի 2-րդ մասով նախատեսված հանցանքի համար՝ 750.000 (յոթ հարյուր հիսուն հազար) ՀՀ դրամ:
70.4․ Դատարանը գտնում է, որ ՀՀ քրեական օրենսգրքի 79-րդ հոդվածի կիրառմամբ մեղադրյալի նկատմամբ ազատազրկման ձևով նշանակված պատժին անհրաժեշտ է հաշվակցել մեղադրյալ Ռազմիկ Խաչատրյանին անազատության մեջ պահելու 3 (երեք) oրը և ազատզրկաման ձևով նշանակված պատժի ժամկետը սահմանել՝ 2 (երկու) տարի 11 (տասնմեկ) ամիս 27 (քսանյոթ):
70.5․ ՀՀ քրեական օրենսգրքի 74-րդ հոդվածի համաձայն՝
«1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը:
(...)
9. Հանցագործությունների համակցության դեպքում մյուս պատիժները լրիվ կամ մասնակիորեն գումարելու դեպքում նշանակվող վերջնական պատիժը չի կարող գերազանցել սույն օրենսգրքի Ընդհանուր մասով պատժի տվյալ տեսակի համար սահմանված առավելագույն ժամկետը կամ չափը:
(...)»:
Վկայակոչված հոդվածի կիրառմամբ Դատարանն արձանագրում է, որ մեղադրյալ Ռազմիկ Խաչատրյանի նկատմամբ որպես վերջնական պատիժ պետք է նշանակել տուգանք՝ նվազագույն աշխատավարձի տասնհինգապատիկի՝ 1.125.000 (մեկ միլիոն հարյուր քսանհինգ հազար) ՀՀ դրամի չափով, և ազատազրկում՝ 2 (երկու) տարի 11 (տասնմեկ) ամիս 27 (քսանյոթ) օր ժամկետով:
71.Անդրադառնալով «դ» կետով բարձրացված հարցին՝ Դատարանն արձանագրում է հետևյալը․
ՀՀ քրեական օրենսգրքի 84-րդ հոդվածի 1-ին մասի համաձայն․
«Եթե դատարանը հանցանք կատարած անձի նկատմամբ կարճաժամկետ ազատազրկման, կարգապահական գումարտակում պահելու կամ ազատազրկման ձևով պատիժ նշանակելիս հանգում է հետևության, որ պատժի նպատակների իրականացումը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին»:
71․1. Մեղադրյալի նկատմամբ ազատազրկման ձևով նշանակված պատիժը կրելու նպատակահարմարության հարցը որոշելիս Դատարանը հիմք է ընդունում մաքսանենգության եղանակով թմրամիջոցների ապօրինի շրջանառության դեմ պայքարի ոլորտում պետության քրեական քաղաքականության ուղղվածությունը, որը պայմանավորված է այն իրողությամբ, որ թմրամիջոցների ապօրինի շրջանառությունը սպառնում է պետության անվտանգությանն ու կայունությանը, աղետալի վնասներ է հասցնում երկրի տնտեսությանը, ազգի գենոֆոնդին, թմրամիջոցների տարածումը և տարանցումն անմիջական սպառնալիք են ներկայացնում ազգային անվտանգության համար:
Այս համատեքստում մեղադրյալ Ռ․ Խաչատրյանի կատարած արարքների հանրային վտանգավորության բնույթի և աստիճանի (տե՛ս սույն դատավճռի 69.2-րդ կետը) պատշաճ գնահատման պայմաններում, հաշվի առնելով նաև նրա կատարած հանցանքների փոխկապվածությունը՝ Դատարանը գտնում է, որ նրա անձը բնութագրող հանգամանքները (տե՛ս սույն դատավճռի 69․2-րդ կետը) սույն դեպքում բավարար են հանգելու այնպիսի համոզման, որ պատժի նպատակների, հատկապես՝ սոցիալական արդարությունը վերականգնելու և նմանատիպ հանցագործությունները կանխելու նպատակների իրականացումը հնարավոր է և ողջամտորեն ավելի արդյունավետ առանց նրա կողմից ազատազրկման ձևով պատիժը կրելու՝ համապատասխան պարտականությունների սահմանմամբ։
Վելոգրյալների հիման վրա՝ Դատարանը գտնում է, որ սույն դեպքում պատժի նպատակների՝ հատկապես նմանատիպ հանցագործությունները կանխելու նպատակի տեսանկյունից, անհրաժեշտ է սահմանել փորձաշրջան 3 (երեք) տարի ժամկետով և այդ ընթացքում մեղադրյալ Ռազմիկ Խաչատրյանի վրա դնել հետևյալ պարտականությունները.
- առանց դատապարտյալի վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
- մեկ տարվա ընթացքում յուրաքանչյուր երկու ամիսը մեկ անգամ անցնել տոկսիկոքիմիական հետազոտություն:
Դատարանի համոզմամբ համապատասխան պարբերականությամբ տոկսիկոքիմիական հետազոտություններ անցնելու պարտականությունը կարող է ապահովել թմրամիջոցներ օգտագործելու սովորությունից ձեռպահ մնալու, հետևաբար նաև նմանատիպ հանցանքների կանխարգելմանը։
Մեղադրյալի ազատ տեղաշարժման իրավունքի սահմանափակմամբ զուգակցված մյուս պարտականության սահմանումը միտված է մեղադրյալի նկատմամբ փորձաշրջանի ընթացքում իրականացվող վերահսկողության արդյունավետության ապահովմանը։
71.2. Դատարանը, նկատի ունենալով մեղադրյալի ընտանեկան և գույքային դրությունը, մշտական աշխատանք չունենալը՝ հիմնավորված է գնահատում տուգանքի սահմանված գումարն անհապաղ և ամբողջությամբ վճարելու անհնարինության վերաբերյալ մեղադրյալի փաստարկները։ Հետևաբար՝ ղեկավարվելով ՀՀ քրեական օրենսգրքի 59-րդ հոդվածի 8-րդ մասով՝ Դատարանը գտնում է, որ առկա են հիմքեր նրան թույլատրելու այն վճարել մեկ տարվա ժամկետում։

III. Այլ վերաբերելի հարցեր․
72. Նկատի ունենալով, որ սույն քրեական գործով գույքային հայցի, գույքի վրա արգելանք դնելու վերաբերյալ տվյալներ առկա չեն՝ Դատարանն այդ հարցերը համարում է լուծված։
72.1․ Անդրադառնալով վարութային ծախսերի հարցին՝ Դատարանն արձանագրում է, որ քրեական գործով վարութային ծախսերը բաղկացած են փորձաքննությունների արժեքից, որը հանրագումարային կազմում է 756․000 (յոթ հարյուր հիսունվեց հազար) ՀՀ դրամ։ Դատարանը մեղադրյալի նկատմամբ տուգանքի ձևով պատժատեսակի նշանակման և դրա չաձի, մեղադրյալի ընտանեկան և գույքային դրության վերաբերյալ Դատարանին տրամադրված տվյալների հաշվառմամբ գտնում է, որ վարութային ծասխերի հարցը անհրաժեշտ է համարել լուծված։
73. Անդրադառնալով իրեղեն ապացույցների տնօրինման հարցին՝ Դատարանը գտնում է, որ դատավճիռն օրինական ուժի մեջ մտնելուց հետո որոշմամբ իրեղեն ապացույց ճանաչված թմրամիջոցը վերադարձնել անջատված մասով վարույթն իրականացնող մարմին, իսկ բջջային հեռախոսները վերադարձնել դրանց սեփականատերերին:
74. Անդրադառնալով մեղադրյալ Ռազմիկ Խաչատրյանի նկատմամբ կիրառված խափանման միջոցին՝բացակայելու արգելքին՝ Դատարանը գտնում է, որ այն անհրաժեշտ է թողնել անփոփոխ մինչև դատավճռի օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 99-րդ, 100-րդ, 167-րդ, 342-րդ, 347-350-րդ հոդվածներով՝ Դատարանը

Վ Ճ Ռ Ե Ց
1. Մեղադրյալ Ռազմիկ Սերյոժայի Խաչատրյանին մեղավոր ճանաչել ՀՀ քրեական օրենսգրքի 44-396-րդ հոդվածի 1-ին մասով նախատեսված հանցանքում և դատապարտել տուգանքի՝ նվազագույն աշխատավարձի հնգապատիկի՝ 375.000 (երեք հարյուր յոթանասուն հինգ հազար) ՀՀ դրամ գումարի չափով:
2. Մեղադրյալ Ռազմիկ Սերյոժայի Խաչատրյանին մեղավոր ճանաչել ՀՀ քրեական օրենսգրքի 396-րդ հոդվածի 2-րդ մասով նախատեսված հանցանքում և դատապարտել տուգանքի՝ նվազագույն աշխատավարձի տասնապատիկի՝ 750.000 ՀՀ դրամ գումարի չափով:
3. Մեղադրյալ Ռազմիկ Սերյոժայի Խաչատրյանին մեղավոր ճանաչել ՀՀ քրեական օրենսգրքի 46-399-րդ հոդվածի 1-ին մասով նախատեսված հանցանքում և դատապարտել ազատազրկման՝ երեք տարի ժամկետով:
4. ՀՀ քրեական օրենսգրքի 79-րդ հոդվածի կիրառմամբ մեղադրյալ Ռազմիկ Սերյոժայի Խաչատրյանի նկատմամբ ազատազրկման ձևով նշանակված պատժին հաշվակցել նրան անազատության մեջ պահելու 3 (երեք) oրը և ազատզրկաման ձևով նշանակված պատժի ժամկետը սահմանել՝ 2 (երկու) տարի 11 (տասնմեկ) ամիս 27 (քսանյոթ) օր:
5. ՀՀ քրեական օրենսգրքի 74-րդ հոդվածի կիրառմամբ պատիժները լրիվ գումարելով՝ մեղադրյալ Ռազմիկ Սերյոժայի Խաչատրյանի նկատմամբ վերջնական պատիժ սահմանել տուգանք՝ նվազագույն աշխատավարձի տասնհինգապատիկի՝ 1.125.000 (մեկ միլիոն հարյուր քսանհինգ հազար) ՀՀ դրամի չափով և ազատազրկում՝ 2 (երկու) տարի 11 (տասնմեկ) ամիս 27 (քսանյոթ) օր ժամկետով։
6. ՀՀ քրեական օրենսգրքի 84-րդ հոդվածի կիրառմամբ՝ մեղադրյալ Ռազմիկ Սերյոժայի Խաչատրյանի նկատմամբ ազատազրկման ձևով նշանակված պատիժը պայմանականորեն չկիրառել՝ սահմանելով փորձաշրջան 3 (երեք) տարի ժամկետով:
Փորձաշրջանի ընթացքում մեղադրյալ Ռազմիկ Սերյոժայի Խաչատրյանի վրա դնել հետևյալ պարտականությունները.
- առանց դատապարտյալի վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
- առաջին մեկ տարվա ընթացքում յուրաքանչյուր երկու ամիսը մեկ անգամ անցնել տոքսիկոքիմիական հետազոտություն։
7. ՀՀ քրեական օրենսգրքի 59-րդ հոդվածի 8-րդ մասի կիրառմամբ նշանակված տուգանքի վճարման համար սահմանել մեկ տարի ժամկետ։
8. Մեղադրյալ Ռազմիկ Սերյոժայի Խաչատրյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
9. Վարութային ծախսերի հարցը համարել լուծված:
10. Դատավճիռն օրինական ուժի մեջ մտնելուց հետո Նախաքննության մարմնի որոշմամբ իրեղեն ապացույց ճանաչված թմրամիջոցը վերադարձնել անջատված մասով վարույթն իրականացնող մարմին, իսկ բջջային հեռախոսները վերադարձնել դրանց սեփականատերերին՝ օրինական տիրապետողներին:


11. Դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` ստանալու օրվանից հետո՝ մեկամսյա ժամկետում:


ԴԱՏԱՎՈՐ ԱՆԻ ԴԱՆԻԵԼՅԱՆ