ԵԴ1/1923/01/25





Դ Ա Տ Ա Վ Ճ Ի Ռ

ՀԱՅԱՍՏԱՆԻ ՀԱՆՐԱՊԵՏՈւԹՅԱՆ ԱՆՈւՆԻՑ


«24» հունիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)


Նախագահող դատավոր
դատական նիստերի քարտուղար
հանրային մեղադրող
պաշտպան
մեղադրյալ
Էդ.Մկրտչյան
Գ.Հարությունյան
Ռ.Մհերյան
Հ.Մարտիրոսյան
Ա.Գրիգորյան

դռնբաց դատական նիստում, դատաքննության հատուկ կարգով քննելով քրեական գործն ըստ մեղադրանքի Աշոտ Աբելի Գրիգորյանի (ծնված՝ 1971 թվականի ապրիլի 15-ին Երևան քաղաքում, ազգությամբ՝ հայ, ՀՀ և ՌԴ քաղաքացի, բարձրագույն կրթությամբ, աշխատում է «Գայանե» ՍՊ ընկերությունում՝ որպես տնօրեն, նախկինում՝ չդատապարտված, հաշվառված է ՌԴ Մոսկվա քաղաքի Դիմիտրովսկայա պողոտայի 107-րդ շենքի 37-րդ բնակարանում, բնակվում է Երևան քաղաքի Շերամի փողոցի 107-րդ շենքի 39-րդ բնակարանում)՝ ՀՀ քրեական օրենսգրքի 330-րդ հոդվածի 2-րդ մասի 3-րդ կետով,

Պ Ա Ր Զ Ե Ց

Գործի դատավարական նախապատմությունը.
2023 թվականի հունվարի 19-ին ՀՀ քննչական կոմիտեի ՀԿԳ քննության գլխավոր վարչության կիբեռհանցագործությունների և բարձր տեխնոլոգիաների ոլորտում կատարված հանցագործությունների քննության վարչության ՀԿԳ քննիչ Մ.Կարապետյանի կողմից ՀՀ քրեական օրենսգրքի 330-րդ հոդվածի 2-րդ մասի 3-րդ կետով նախատեսված հանցագործության հատկանիշներով նախաձեռնվել է թիվ 69-0009-23 քրեական վարույթը:
2024 թվականի մարտի 11-ին ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության դատախազ Ռ.Մհերյանի որոշմամբ թիվ 69-0009-23 քրեական վարույթով Աշոտ Աբելի Գրիգորյանի նկատմամբ ՀՀ քրեական օրենսգրքի 330-րդ հոդվածի 2-րդ մասի 3-րդ կետով հարուցվել է հանրային քրեական հետապնդում:
2024 թվականի մարտի 15-ին Երևան քաղաքի առաջին ատյանի ընդհանուր իրավասության քրեական դատարանի որոշմամբ թիվ 69-0009-23 քրեական վարույթով մեղադրյալ Աշոտ Աբելի Գրիգորյանի նկատմամբ որպես խափանման միջոց է ընտրվել կալանքը՝ 2 (երկու) ամիս ժամկետով:
2024 թվականի մարտի 25-ին ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության դատախազ Ռ.Մհերյանի որոշմամբ կասեցվել է թիվ 69-0009-23 քրեական վարույթով մեղադրյալ Աշոտ Աբելի Գրիգորյանի նկատմամբ հարուցված հանրային քրեական հետապնդման ժամկետը՝ այլ պատճառներով մեղադրյալի գտնվելու վայրը հայտնի չլինելու հիմքով:
2025 թվականի մայիսի 29-ին ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության ավագ դատախազ Ռ.Մհերյանի որոշմամբ վերսկսվել է թիվ 69-0009-23 քրեական վարույթով Աշոտ Աբելի Գրիգորյանի նկատմամբ հարուցված հանրային քրեական հետապնդման կասեցված ժամկետը:
2025 թվականի մայիսի 30-ին ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության ավագ դատախազ Ռ.Մհերյանի որոշմամբ բավարարվել է թիվ 69-0009-23 քրեական վարույթով մեղադրյալ Աշոտ Աբելի Գրիգորյանի պաշտպան Մարգար Սողոմոնյանի միջնորդությունը և մեղադրյալ Աշոտ Աբելի Գրիգորյանի նկատմամբ որպես խափանման միջոց ընտրված կալանքը փոխվել է և վերջինի նկատմամբ որպես խափանման միջոց է ընտրվել գրավը՝ 2.000.000 (երկու միլիոն) ՀՀ դրամի չափով:
2025 թվականի հունիսի 6-ին Աշոտ Աբելի Գրիգորյանի վերաբերյալ թիվ 69-0009-23 քրեական վարույթը մեղադրական եզրակացությամբ ուղարկվել է Դատարան և քրեական գործին շնորհվել է ԵԴ1/1923/01/25 համարը:
2025 թվականի հունիսի 10-ին Երևան քաղաքի առաջին ատյանի ընդհանուր իրավասության քրեական դատարանի դատավոր Էդ.Մկրտչյանի որոշմամբ ստանձնվել է թիվ ԵԴ1/1923/01/25 քրեական գործի վարույթը և նշանակվել նախնական դատալսումներ։
Համաձայնեցման վարույթ կիրառելու միջնորդությունը.
ՀՀ քրեական դատավարության օրենսգրքի 311-րդ հոդվածով նախատեսված հարցերի քննարկման ընթացքում մեղադրյալ Աշոտ Գրիգորյանը միջնորդեց կիրառել համաձայնեցման վարույթ և հայտնեց, որ միջնորդությունը ներկայացրել է կամավոր, խորհրդակցել է պաշտպանի հետ, գիտակցում է համաձայնեցման վարույթով դատաքննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Հանրային մեղադրող Ռ.Մհերյանը և պաշտպան Հ.Մարտիրոսյանը չառարկեցին համաձայնեցման վարույթով դատաքննություն անցկացնելու միջնորդության դեմ:
Դատարանը, նկատի ունենալով, որ առկա է ՀՀ քրեական դատավարության օրենսգրքի 458-րդ հոդվածի 1-ին մասով նախատեսված հիմքը, ինչպես նաև այն, որ մեղադրյալը համաձայն է իրեն մեղսագրվող արարքին, միջնորդությունը ներկայացրել է կամավոր, գիտակցում է միջնորդության բնույթը, հետևանքները և բացակայում են նույն օրենսգրքի 458-րդ հոդվածի 2-րդ մասով նախատեսված` համաձայնեցման վարույթի կիրառումը բացառող հանգամանքները, և ղեկավարվելով ՀՀ քրեական դատավարության օրենսգրքի 459-րդ հոդվածի 2-րդ մասով, բավարարեց մեղադրյալի միջնորդությունը և կողմերի բանակցությունների համար սահմանեց վերջինների կողմից միջնորդված ժամկետը:
Համաձայնության մասին արձանագրությունը.
Բանակցությունների արդյունքում կողմերը եկել են համաձայնության և կազմվել է համաձայնության մասին արձանագրություն հետևյալ բովանդակությամբ.
«ԱՐՁԱՆԱԳՐՈՒԹՅՈՒՆ
ՀՀ քրեական դատավարության օրենսգրքի 460-րդ հոդվածով սահմանված կարգով համաձայնության գալու վերաբերյալ
Սույն արձանագրությունը կազմվել և մասնակցությամբ՝ ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության ավագ դատախազ Ռոբերտ Մհերյանի, մեղադրյալ Աշոտ Աբելի Գրիգորյանի (ծնված 1971 թվականի ապրիլի 15-ին, ՀՀ-ում, հաշվառված՝ ՌԴ, քաղաք Մոսկվա, Դիմիտրովսկայա պողոտա 107 շենք, բն. 37, ՀՀ-ում բնակվում է՝ քաղաք Երևան, Շերամի փողոց 107 շենք, բն. 39, ՀՀ և ՌԴ քաղաքացի, բարձրագույն կրթությամբ, տիրապետում է հայերեն և ռուսերեն լեզուներին, աշխատում է «Գայանե» ՍՊԸ-ում որպես տնօրեն, դատվածություն չունեցող, ամուսնացած), պաշտպան Հաբեթ Մարտիրոսյանի 2025 թվականի հունիսի 24-ին ստորագրվել է Երևան քաղաքի առաջին ատյանի ընդհանուր իրավասության քրեական դատարանի Աջափնյակ նստավայրում:
Մեղադրյալի նկատմամբ Երևան քաղաքի առաջին ատյանի ընդհանուր իրավասության քրեական դատարանի 2024 թվականի մարտի 15-ի թիվ ԵԴ1/0348/06/24 որոշմամբ որպես խափանման միջոց է ընտրվել կալանավորումը: Վերջինիս նկատմամբ հայտարարվել է հետախուզում: 2025 թվականի մայիսի 29-ին Աշոտ Գրիգորյանը «Զվարթնոց» օդանավակայանով մուտք է գործել ՀՀ և ոստիկանության ծառայողների կողմից ներկայացվել է վարույթն իրականացնող մարմնին: 2025 թվականի մայիսի 30-ին հսկող դատախազի որոշմամբ Աշոտ Գրիգորյանի նկատմամբ ընտրված խափանման միջոց կալանքը փոփոխվել է և որպես խափանման միջոց է ընտրվել գրավը՝ 2.000.000 ՀՀ դրամի չափով: Նույն օրը մեղադրյալն ազատվել է արգելանքից:
Մեղադրյալ Աշոտ Աբելի Գրիգորյանը մեղադրվում է այն հանցավոր արարքը կատարելու համար, որ նա տեղեկատվական, հաղորդակցական տեխնոլոգիաներն օգտագործելով, անձի կամ անձանց խմբի նկատմամբ քաղաքական հայացքներով և սոցիալական բնույթի այլ հանգամանքներով պայմանավորված հնչեցրել է բռնություն գործադրելու հրապարակային կոչեր:
Այսպես.
Աշոտ Գրիգորյանը, տեղեկատվական, հաղորդակցական տեխնոլոգիաներն օգտագործելով՝ «Ֆեյսբուք» հանրամատչելի սոցիալական ցանցի միջոցով՝ «Григорян Ашот» անվամբ օգտատիրոջ անհատական էջով իր «ֆեյսբուքյան ընկերների» և տվյալ անհատական էջ մուտք գործելու հնարավորություն ունեցող այլ օգտատերերի համար տեսանելի և հասանելի եղանակով, 2023 թվականի սեպտեմբերի 21-ին՝ ժամը 16:35-ին, 16:45-ին, 16:56-ին, 18:39-ին, 19:15-ին, ինչպես նաև նույն թվականի սեպտեմբերի 22-ին՝ ժամը 01:04-ին, Ադրբեջանի Հանրապետության կողմից 2023 թվականի սեպտեմբերի 19-ից Արցախի Հանրապետության դեմ սանձազերծված ռազմական գործողությունների, դրան նախորդած Արցախի Հանրապետության և Հայաստանի Հանրապետության միջև առկա սահմանային անցակետի շրջափակման բերմամբ հասարակության մոտ առկա սոցիալ-հոգեբանական առումով խոցելի վիճակի, ինչպես նաև վերը նկարագրածով պայմանավորված՝ առկա իրադրության պայմաններում, քաղաքական հայացքներով և սոցիալական բնույթի այլ հանգամանքներով պայմանավորված հրապարակել է բռնություն գործադրելու հրապարակային կոչեր պարունակող հետևյալ գրառումները. «ՔՊ-ական ու հներից որտեղ տեսնեք բռնեք (հայհոյանք) եթե ՀԱՅ եք», «Հին ու նորերի մերը (հայհոյանք)՝ փռթեք դրանց թուրք մորը (հայհոյանք), բոլա համբերենք !!!», «Մոռթել ներքին թուրքի արունը խմել !», «Չվախենք –(հայհոյանք) սրանց մեր ու մանուկը փռթեք!», «Զինվեք-մոռթեք ներքին թուրքին Մի հապաղեք !», ինչպես նաև ԵԿՄ նախագահ, հասարակական-քաղաքական գործիչ Սասուն Միքայելյանի լուսանկարին կից ներկայացված՝ 2018 թվականին կայացած հանրահավաքի ընթացքում վերջինիս կողմից հնչեցված մտքի վերաբերյալ հետևյալ գրառումը. «Սեվանցի, Հրազդանցի-դու քո պատիվը կվերականգնես եթե սրա տուն ու տեղը վառես !»:
Այսինքն՝ Աշոտ Աբելի Գրիգորյանին մեղսագրվել է ՀՀ քրեական օրենսգրքի 330-րդ հոդվածի 2-րդ մասի 3-րդ կետով նախատեսված հանցավոր արարքի կատարում:
Հիմք ընդունելով ՀՀ քրեական դատավարության օրենսգրքի 460-րդ հոդվածի 4-րդ մասի 9-րդ կետը և ՀՀ քրեական օրենսգրքի 77-րդ հոդվածի 1-ին մասը՝ կողմերը համաձայնվում են մեղադրյալին մեղսագրվող արարքի համար հետևյալ պատժատեսակի և պատժաչափի վերաբերյալ.
ՀՀ քրեական օրենսգրքի 330-րդ հոդվածի 2-րդ մասի 3-րդ կետով նախատեսված արարքը կատարելու համար սահմանել պատիժ՝ տուգանքի ձևով՝ նվազագույն աշխատավարձի քսանապատիկի՝ 1.500.000 ՀՀ դրամի չափով:
ՀՀ քրեական օրենսգրքի 79-րդ հոդվածի 4-րդ մասի հիման վրա, հաշվի առնելով մեղադրյալի՝ նախաքննության ընթացքում փաստացի անազատության մեջ գտնվելու ժամկետը՝ 1 օրը, նրա նկատմամբ նշանակված պատիժը մեղմացնել և վերջնական պատիժ նշանակել տուգանք՝ 1.475.000 ՀՀ դրամի չափով։
Մեղադրյալի նկատմամբ ընտրված խափանման միջոցը՝ 2.000.000 ՀՀ դրամի չափով գրավը, թողնել անփոփոխ՝ մինչև դատավճռի օրինական ուժի մեջ մտնելը, ինչից հետո վերադարձնել գրավատուին։
[ստորագրություն] Ռ.Մհերյան
[ստորագրություն] Ա.Գրիգորյան
[ստորագրություն] Հ.Մարտիրոսյան»:
Դատարանը, ղեկավարվելով ՀՀ քրեական դատավարության օրենսգրքի 461-րդ հոդվածի 1-ին մասով, ընդունեց համաձայնության մասին արձանագրությունը և որոշում կայացրեց լրացուցիչ դատալսումներ անցկացնելու մասին:
Համաձայնեցման վարույթով լրացուցիչ դատալսումները.
Հանրային մեղադրողի կողմից համաձայնության մասին արձանագրության հրապարակումից հետո մեղադրյալ Աշոտ Գրիգորյանը, պատասխանելով նախագահողի հարցերին, հայտնեց, որ իրեն պարզ է կնքված համաձայնության բովանդակությունը, համաձայն է դրան, արտահայտել է իր իրական կամքը, գիտակցում է կնքված համաձայնության հետևանքները, պնդում է կնքված համաձայնությունը, շեշտադրել է, որ այն չի կնքվել բռնության, սպառնալիքի կամ հարկադրանքի այլ միջոցի ազդեցության հետևանքով։
Հրապարակված արձանագրության վերաբերյալ հանրային մեղադրողը և պաշտպանը հայտնեցին, որ պնդում են կնքված համաձայնությունը:

Դատարանի իրավական վերլուծությունները.
Առաջադրված մեղադրանքը մեղադրյալ Աշոտ Գրիգորյանի կողմից ընդունելու և համաձայնեցման վարույթ կիրառելու պայմաններում Դատարանը, գործով ձեռք բերված ապացույցների ընդհանուր կարգով սահմանված հետազոտություն չկատարելով, արձանագրում է, որ Աշոտ Գրիգորյանը կատարել է իրեն մեղսագրված հանցանքը, որը ճիշտ է որակված և համապատասխանում է ՀՀ քրեական օրենսգրքի 330-րդ հոդվածի 2-րդ մասի 3-րդ կետով նախատեսված հանցագործության հատկանիշներին:
Դատարանը, ղեկավարվելով ՀՀ քրեական դատավարության օրենսգրքի 463-րդ հոդվածի 3-րդ մասով, գտնում է, որ մեղադրյալի նկատմամբ նշանակվելիք պատժատեսակի, պատժաչափի, պատիժը կրելու նպատակահարմարության հարցերը պետք է լուծել ըստ համաձայնության մասին արձանագրության։
Անդրադառնալով խափանման միջոցի հարցին՝ Դատարանը գտնում է, որ Աշոտ Գրիգորյանի նկատմամբ ընտրված խափանման միջոց գրավը՝ 2.000.000 (երկու միլիոն) ՀՀ դրամի չափով, պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դատավճիռն օրինական ուժի մեջ մտնելուց հետո գրավի գումարը պետք է վերադարձնել գրավատուին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33-րդ, 347-350-րդ, 364-րդ, 458-464-րդ հոդվածներով` Դատարանը

Վ Ճ Ռ Ե Ց

Աշոտ Աբելի Գրիգորյանին մեղավոր ճանաչել ՀՀ քրեական օրենսգրքի 330-րդ հոդվածի 2-րդ մասի 3-րդ կետով և նրա նկատմամբ պատիժ նշանակել տուգանք՝ նվազագույն աշխատավարձի քսանապատիկի՝ 1.500.000 (մեկ միլիոն հինգ հարյուր հազար) ՀՀ դրամի չափով։
ՀՀ քրեական օրենսգրքի 79-րդ հոդվածի կիրառմամբ նշանակված պատժին հաշվակցել Աշոտ Աբելի Գրիգորյանի՝ սույն քրեական գործով 2025 թվականի մայիսի 29-ից մինչև մայիսի 30-ն անազատության մեջ գտնվելու ժամկետը՝ 1 (մեկ) օրը, և նրա նկատմամբ վերջնական պատիժ նշանակել տուգանք՝ 1.475.000 (մեկ միլիոն չորս հարյուր յոթանասունհինգ հազար) ՀՀ դրամի չափով:
Աշոտ Աբելի Գրիգորյանի նկատմամբ ընտրված խափանման միջոց գրավը՝ 2.000.000 (երկու միլիոն) ՀՀ դրամի չափով, թողնել անփոփոխ՝ մինչև դատավճռի օրինական ուժի մեջ մտնելը, իսկ դատավճիռն օրինական ուժի մեջ մտնելուց հետո գրավի գումարը վերադարձնել գրավատուին:
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերի, կարող է բողոքարկվել ՀՀ վերաքննիչ քրեական դատարան՝ ստանալու պահից մեկամսյա ժամկետում:


ԴԱՏԱՎՈՐ ԷԴ.ՄԿՐՏՉՅԱՆ