ԵԴ1/1937/01/25

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

12 հունիսի 2025թ․ ք.Երևանում

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

նախագահությամբ՝
դատավոր՝ Մ․Արամյանի
քարտուղարությամբ՝ Մ.Գևորգյանի
մասնակցությամբ`
հանրային մեղադրող՝ Գ․Գուրգենյանի
մեղադրյալ՝ Ս․Ալեքսանյանի

դռնբաց դատական նիստում քննեց քրեական գործն ըստ մեղադրանքի` Սուրեն Աղասու Ալեքսանյանի /ծնված 04․12․1988 թվականին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, նախկինում չդատված, հաշվառված՝ Երևան քաղաքի Զաքարիա Քանաքեռցու փողոց 127 շենք բնակարան 12, բնակվող՝ ք․ Երևան, Սիլիկյան 10-րդ փողոց 12/3 տուն հասցեում/։
Սուրեն Աղասու Ալեքսանյանին մեղադրանք է առաջադրվել ՀՀ քրեական օրենսգրքի 344-րդ հոդվածի 1-ին մասով և 344-րդ հոդվածի 1-ին մասով, խափանման միջոց է կիրառվել բացակայելու արգելք:

Դատավճռի նկարագրական մաս.
2023 թվականի փետրվարի 8-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 1-ին մասով նախաձեռնվել է թիվ 60811823 քրեական վարույթը:
2023 թվականի ապրիլի 26-ին ՀՀ Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 1-ին մասով նախաձեռնվել է թիվ 60895323 քրեական վարույթը:
2023 թվականի ապրիլի 30-ին որոշում է կայացվել թիվ 60895323 քրեական վարույթը թիվ 60811823 քրեական վարույթին միացնելու մասին։
2025 թվականի մայիսի 19-ին որոշում է կայացվել Սուրեն Աղասու Ալեքսանյանի նկատմամբ ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 1-ին մասով նախատեսված հանրորեն վտանգավոր արարքներ կատարելու համար հանրային քրեական հետապնդում հարուցելու մասին:
2025 թվականի մայիսի 20-ին Սուրեն Աղասու Ալեքսանյանի նկատմամբ կիրառվել է բացակայելու արգելք խափանման միջոցը:
2025 թվականի հունիսի 06-ին ՀՀ դատախազության Կենտրոն և Նորք-Մարաշ վարչական շրջանների դատախազությունից Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 60811823 նախաքննական համարով քրեական գործն ըստ մեղադրանքի Սուրեն Աղասու Ալեքսանյանի՝ ՀՀ քրեական օրենսգրքի 344-րդ հոդվածի 1-ին մասով /2 դրվագ/։
2025 թվականի հունիսի 06-ին դատավորների միջև գործերի բաշխման էլեկտրոնային մակագրության համակարգի միջոցով թիվ ԵԴ1/1937/01/25 քրեական գործը մակագրվել է ինձ:
Գործը հանձնվել է 2025 թվականի հունիսի 09-ին:
Սուրեն Աղասու Ալեքսանյանը մեղադրվում է քրեական օրենսգրքով նախատեսված, պատժի սպառնալիքով արգելված, մեղավորությամբ կատարված հանրորեն վտանգավոր այն արարքի կատարման համար, որ նա «տրանսպորտային միջոցներ վարելու իրավունքը 2022 թվականի հոկտեմբերի 16-ից մինչև 2023 թվականի ապրիլի 18-ը կասեցված լինելու պայմաններում, 2022 թվականի դեկտեմբերի 21-ին՝ ժամը 00։32-ի սահմաններում, Երևան քաղաքի Մոսկովյան փողոցում վարել է «Օպել» մակնիշի 37 MZ 422 հաշվառման համարանիշի ավտոմեքենան, ինչը հայտաբերվել է ՀՀ ՆԳՆ ոստիկանության պարեկային ծառայության աշխատակիցների կողմից և կազմվել է թիվ 8180167372 վարչական իրավախախտման մասին արձանագրությունը։
Բացի այդ, Սուրեն Ալեքսանյանը տրանսպորտային միջոցներ վարելու իրավունքը 2022 թվականի հոկտեմբերի 16-ից մինչև 2023 թվականի ապրիլի 18-ը կասեցված լինելու պայմաններում, 2023 թվականի մարտի 23-ին ժամը՝ 23։14-ի սահմաններում Երևան քաղաքի Թևոսյան փողոցում վարել է «Օպել» մակնիշի 37 MZ 422 հաշվառման ավտոմեքենան, ինչը հայտնաբերվել է ՀՀ ՆԳՆ ոստիկանության պարեկային ծառայության աշխատակիցների կողմից և կազմվել թիվ 8180248178 վարչական իրավախախտման մասին արձանագրությունը։
Այսինքն՝ Սուրեն Աղասու Ալեքսանյանին մեղսագրվում է հանցավոր արարքների կատարում, որը նախատեսված է ՀՀ քրեական օրենսգրքի 344-րդ հոդվածի 1-ին մասով և 344-րդ հոդվածի 1-ին մասով»։

Դատաքննության ընթացքում հետազոտված թույլատրելի ապացույցներ
Հաշվի առնելով, որ մեղադրյալ Սուրեն Ալեքսանյանը դատաքննության ընթացքում հրաժարվեց ցուցմունք տալուց, Դատարանը որոշեց թույլատրել հրապարակել մեղադրյալի նախաքննության ընթացքում տված ցուցմունքը՝ համաձայն որի «Իրեն լիովին մեղավոր է ճանաչել և օգտվելով իր իրավունքից՝ հրաժարվել է ցուցմունք տալուց»։Վ.Թ. 115-117, 118-119, 125-128:
ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքի համաձայն Սուրեն Ալեքսանյանը դատվածություն չունի։
Որպես արտավարույթային փաստաթուղթ ապացույց ճանաչված, զննված և քրեական վարույթի նյութերին կցված հետևյալ փաստաթղթերը.
Զննում կատարելու մասին արձանագրությունը, համաձայն որի` թիվ 8200326254 արձանագրությունը կազմվել է 16.10.2022թ.-ին` ժամը 18:29-ին: Արձանագրության համաձայն Սուրեն Ալեքսանյանը «Օպել Աստրա» մակնիշի 37 MZ 422 հաշվառման համարանիշի տրանսպորտային միջոցով 16.10.2022թ. ` ժամը 18:27-ին, Երևան քաղաքի Մարշալ Բաղրամյան պողոտայում կատարել է իրավախախտում՝ վարորդը ձեռքի օգտագործմամբ ընթացքի ժամանակ օգտվել է ռադիոկապից, այս իրավախախտման համար նախատեսված տուգանային միավորի և տվյալ տարում վարորդի նկատմամբ կիրառված տուգանային միավորների հանրագումարը կազմում է 9 կամ ավելի միավոր: Կայացված որոշմամբ Սուրեն Ալեքսանյանի՝ վարորդական իրավունքի վկայականը 6 ամիս ժամկետով կասեցվում է:
Արձանագրության ծանոթացման բաժնում՝ Սուրեն Ալեքսանյան Աղասու տվյալների տակ առկա է ստորագրություն:
Վարչական իրավախախտման վերաբերյալ թիվ 8180167372 արձանագրությունը կազմվել է 21.12.2022թ.-ին` ժամը 00:40-ին: Արձանագրության համաձայն Սուրեն Ալեքսանյանը «Օպել Աստրա» մակնիշի 37 MZ 422 հաշվառման համարանիշի տրանսպորտային միջոցը Երևան քաղաքի Մոսկովյան փողոցում վարել է կասեցված վարորդական իրավունքի վկայականով: Դիտողությունների հատվածում Սուրեն Ալեքսանյանը նշել է` տեղյակ չեմ եղել, որ կասեցված է և առկա է ստորագրություն:
Զննության է ենթարկվել ՀՀ ոստիկանության Ճանապարհային ոստիկանության էլեկտրոնային ռեգիստրից կատարված պատճենը` համաձայն որի Սուրեն Աղասու Ալեքսանյանը։
Զննության է ենթարկվել վարչական իրավախախտման վերաբերյալ թիվ 8180248178 արձանագրությունը, որը կազմվել է 23.03.2023թ.-ին` ժամը 23:20-ին: Արձանագրության համաձայն Սուրեն Ալեքսանյանը «Օպել Աստրա» մակնիշի 37 MZ 422 հաշվառման համարանիշի տրանսպորտային միջոցը Թևոսյան փողոցում վարել է կասեցված վարորդական իրավունքի վկայականով։
Իրավախախտում կատարած հատվածում առկա է ստորագրություն:Վ.Թ. 4-5, 21, 98-99:
Որպես արտավարույթային փաստաթուղթ ճանաչված` զննության ենթարկված և Սուրեն Աղասու Ալեքսանյանի նկատմամբ կազմված վարչական իրավախախտման վերաբերյալ թիվ 8200306554 և 8180167372 արձանագրությանները և ՆԳՆ ոստիկանության Ճանապարհային ոստիկանություն ծառայությունից ստացված փաստաթղթերը։Վ.Թ. 4-5, 21, 100-101:
Վերոգրյալ ապացույցների հիման վրա Դատարանը հաստատված է համարում հետևյալ փաստական հանգամանքները, մասնավորապես.
-Սուրեն Աղասու Ալեքսանյանի տրանսպորտային միջոցներ վարելու իրավունքը 2023 թվականի դեկտեմբերի 21-ին եղել է կասեցված,
-Սուրեն Աղասու Ալեքսանյանը 2022 թվականի դեկտեմբերի 21-ին՝ ժամը 00։32-ի սահմաններում, Երևան քաղաքի Մոսկովյան փողոցում վարել է «Օպել» մակնիշի 37 MZ 422 հաշվառման համարանիշի ավտոմեքենան։
-Սուրեն Աղասու Ալեքսանյանը տրանսպորտային միջոցներ վարելու իրավունքը 2023 թվականի ապրիլի 18-ին եղել է կասեցված,
-Սուրեն Աղասու Ալեքսանյանը 2023 թվականի ապրիլի 18-ը կասեցված լինելու պայմաններում, 2022 թվականի դեկտեմբերի 21-ին՝ ժամը 00։32-ի սահմաններում, Երևան քաղաքի Մոսկովյան փողոցում վարել է «Օպել» մակնիշի 37 MZ 422 հաշվառման համարանիշի ավտոմեքենան։
Դատավճռի պատճառաբանական մաս.
ՀՀ քրեական դատավարության օրենսգրքի 97-րդ հոդվածի համաձայն/․․․/ 1. Վարույթի ընթացքում ձեռք բերված ապացույցները, ներառյալ վարույթի մասնավոր մասնակիցների ներկայացրած ապացույցները համարվում են թույլատրելի, քանի դեռ պատշաճ իրավական ընթացակարգով հակառակը չի հաստատվել:
2. Օրենքի էական խախտմամբ ստացված տվյալները, ինչպես նաև դրանց հիման վրա կատարված վարութային գործողությունների արդյունքով ձեռք բերված տվյալները ճանաչվում են անթույլատրելի և չեն կարող օգտագործվել որպես ապացույց/․․․/:
ՀՀ քրեական դատավարության օրենսգրքի 102-րդ հոդվածի համաձայն`
/․․․/1. Քրեական վարույթի ընթացքում ապացուցման ենթակա են՝
1)դեպքը և դրա հանգամանքները (ժամանակը, տեղը, եղանակը և այլն).
2)մեղադրյալի առնչությունը դեպքին.
3)ենթադրյալ հանցագործության՝ քրեական օրենքով նախատեսված հատկանիշները.
4) մեղադրյալի մեղավորությունը ենթադրյալ հանցանքը կատարելու մեջ.
5) քրեական պատասխանատվությունը կամ պատիժը մեղմացնող և ծանրացնող հանգամանքները.
6) մեղադրյալի անձը բնութագրող հանգամանքները.
7) ենթադրյալ հանցագործությամբ պատճառված վնասը.
8)այն հանգամանքները, որոնք թույլ են տալիս անձին ազատել քրեական պատասխանատվությունից կամ պատժից.
9) այն հանգամանքները, որոնցով անձը հիմնավորում է վարույթի ընթացքում իր գույքային պահանջները.
10) այն հանգամանքները, որոնցով վարույթի մասնակիցը կամ այլ անձը հիմնավորում է իր պահանջները/․․․/:
ՀՀ քրեական դատավարության օրենսգրքի 105-րդ հոդվածի համաձայն` /․․․/ 1.Յուրաքանչյուր ապացույց ենթակա է գնահատման՝ վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից:
2. Քննիչը, դատախազը, դատավորը, ղեկավարվելով քրեադատավարական օրենսդրությամբ, ներառյալ ապացուցման չափանիշների մասին վերաբերելի կանոններով, ապացույցները գնահատում են դրանց պատշաճ հետազոտման և վերլուծության վրա հիմնված ներքին համոզմամբ:
3. Ոչ մի տվյալ նախապես հավաստի ապացույցի ուժ չունի: Դատավորը, ինչպես նաև քննիչը և դատախազը չպետք է կանխակալ վերաբերմունք դրսևորեն ապացույցներին, չպետք է դրանց որոշ մասին մյուսների նկատմամբ առավել կամ նվազ նշանակություն տան, քանի դեռ պատշաճ իրավական ընթացակարգի շրջանակներում դրանք չեն գնահատվել/․․․/:
ՀՀ քրեական դատավարության օրենսգրքի 276-րդ հոդվածը սահմանում է, որ
/․․․/ 1. Առաջին ատյանի դատարանում վարույթն իրականացվում է միայն մեղադրյալի նկատմամբ և միայն նրան ներկայացված մեղադրանքով:/․․․/:
Հետազոտված ապացույցների հիման վրա Դատարանը առանձին սենյակում գնահատելով դրանք իրենց համակցության մեջ, համադրելով մեղադրյալին առաջադրված մեղադրանքի ձևակերպման հետ, որ նա «տրանսպորտային միջոցներ վարելու իրավունքը 2022 թվականի հոկտեմբերի 16-ից մինչև 2023 թվականի ապրիլի 18-ը կասեցված լինելու պայմաններում, 2022 թվականի դեկտեմբերի 21-ին՝ ժամը 00։32-ի սահմաններում, Երևան քաղաքի Մոսկովյան փողոցում վարել է «Օպել» մակնիշի 37 MZ 422 հաշվառման համարանիշի ավտոմեքենան, ինչը հայտաբերվել է ՀՀ ՆԳՆ ոստիկանության պարեկային ծառայության աշխատակիցների կողմից և կազմվել է թիվ 8180167372 վարչական իրավախախտման մասին արձանագրությունը։
Բացի այդ, Սուրեն Ալեքսանյանը տրանսպորտային միջոցներ վարելու իրավունքը 2022 թվականի հոկտեմբերի 16-ից մինչև 2023 թվականի ապրիլի 18-ը կասեցված լինելու պայմաններում, 2023 թվականի մարտի 23-ին ժամը՝ 23։14-ի սահմաններում Երևան քաղաքի Թևոսյան փողոցում վարել է «Օպել» մակնիշի 37 MZ 422 հաշվառման ավտոմեքենան, ինչը հայտնաբերվել է ՀՀ ՆԳՆ ոստիկանության պարեկային ծառայության աշխատակիցների կողմից և կազմվել թիվ 8180248178 վարչական իրավախախտման մասին արձանագրությունը», նշված արարքը ՀՀ քրեական օրենսգրքի 344-րդ հոդվածի 1-ին մասով /2 դրվագով/ որակման համատեքստում ՀՀ քրեական դատավարության օրենսգրքի 342-րդ հոդվածի 1-ին մասով նախատեսված հարցերին պատասխանելիս գտել է, որ
ապացուցված են մեղադրյալին վերագրվող փաստական հանգամանքները (արարքը),
ապացուցված է այդ արարքի քրեական հակաիրավականությունը,
ապացուցված է մեղադրյալի կողմից այդ արարքը կատարելը,
ապացուցված է մեղադրյալի մեղավորությունը տվյալ արարքը կատարելու մեջ:
2. Սույն հոդվածի 1-ին մասում նշված հարցերից որևէ մեկին ժխտական պատասխան տալու դեպքում դատարանը կայացնում է արդարացման վերդիկտ։
3. Սույն հոդվածի 1-ին մասում նշված բոլոր հարցերին հաստատական պատասխան տալու դեպքում դատարանը կայացնում է մեղադրական վերդիկտ, որով սահմանում է նաև, թե ապացուցված արարքի նկատմամբ քրեական օրենսգրքի, որ հոդվածը, հոդվածի մասը կամ կետն է ենթակա կիրառման:
Համաձայն ՀՀ քրեական դատավարության օրենսգրքի 348-րդ հոդվածի` դատավճիռ կայացնելիս դատարանը մի շարք այլ հարցերի հետ միասին պետք է լուծի նաև այն հարցը, թե մեղադրյալը պատժի ենթակա է, թե ոչ, պատժի ինչ տեսակ պետք է նշանակվի և պետք է արդյոք նա այն կրի:
Դատարանը դրական պատասխանելով ՀՀ քրեական դատավարության օրենսգրքի 342-րդ հոդվածի 1-ին մասով նախատեսված հարցերին գտնում է, որ կատարած արարքի համար Սուրեն Ալեքսանյանը ենթակա է քրեական պատասխանատվության և պատժի:
ՀՀ քրեական օրենսգրքի 55-րդ հոդվածի համաձայն` /․․․/ Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները/․․․/:
ՀՀ քրեական օրենսգրքի 70-րդ հոդվածի համաձայն՝ «1.Քրեական պատասխանատվությունը կամ պատիժը մեղմացնող հանգամանքներ են՝(…)
4) պատիժ նշանակելու պահին հանցանք կատարած անձի խնամքի տակ անչափահասի կամ հաշմանդամություն ունեցող անձի առկայությունը, բացառությամբ այն դեպքերի, երբ հանցանքը կատարվել է խնամքի տակ գտնվող անձի նկատմամբ, (…)
2. Պատիժ նշանակելիս դատարանը կարող է հաշվի առնել նաև սույն հոդվածի 1-ին մասով չնախատեսված մեղմացնող այլ հանգամանքներ: (…)»։
Դատարանը, որպես մեղադրյալ Սուրեն Ալեքսանյանի պատիժը մեղմացնող հանգամանքներ է դիտարկում այն, որ՝
-առաջադրված մեղադրանքում իրեն մեղավոր է ճանաչել՝ նախաքննության ընթացքում տվել խոստովանական ցուցմունքներ, զղջացել է իր կատարած արարքի համար,
-պատիժ նշանակելու պահին խնամքի տակ անչափահաս երեխաների առկայությունը (հիմք՝ երեխաների ծննդյան վկայական թիվ ХI-МЮ 721488 և թիվ VII-МЮ 785888):
Դատարանը միաժամանակ արձանագրում է, որ Սուրեն Ալեքսանյանի պատասխանատվությունն ու պատիժը ծանրացնող հանգամանքներ առկա չեն:
Սուրեն Ալեքսանյանի անձը բնութագրող հանգամանքներն են, մասնավորապես դատվածություն չունեցող անձ հանդիսանալը(հիմք Ձև8 տեղեկանք):
Մեղադրյալին վերագրվող արարքը ՀՀ քրեական օրենսգրքի 17-րդ հոդվածի համաձայն հանդիսանում է ոչ մեծ ծանրության հանցանք։
ՀՀ քրեական օրենսգրքի 67-րդ հոդվածի 5-րդ կետի համաձայն /․․․/ 5. Առաջին անգամ ոչ մեծ ծանրության հանցագործություն կատարած անձը չի կարող դատապարտվել ազատազրկման /․․․/:
Դատարանը հաշվի առնելով վերոգրյալը՝ Սուրեն Ալեքսանյանի կատարած հանցագործության հանրության համար վտանգավորության աստիճանը և բնույթը, նրա անձը բնութագրող տվյալները, պատասխանատվությունն ու պատիժը մեղմացնող հանգամանքները, ծանրացնող հանգամանքների բացակայությունը, ինչպես ՀՀ քրեական օրենսգրքի ՀՀ քրեական օրենսգրքի 344-րդ հոդվածի 1-ին մասի սանկցիայով նախատեսված պատիժների կիրառելիությունը և բավարարությունը, գտնում է, որ ՀՀ քրեական օրենսգրքի 55-րդ հոդվածով սահմանված պատժի նպատակներին հասնելու համար նրա նկատմամբ ՀՀ քրեական օրենսգրքի 344-րդ հոդվածի 1-ին մասով երկու դրվագ կատարած հանցանքի համար պետք է նշանակել տուգանքի ձևով պատժատեսակ։
ՀՀ քրեական օրենսգրքի 344-րդ հոդվածի 1-ին մասով նախատեսված (1-ին դրվագով) հանցանք կատարելու պահին գործող «Նվազագույն աշխատավարձի մասին» ՀՀ օրենքի 1-րդ հոդվածը նախատեսում է /․․․/ 1. Հայաստանի Հանրապետությունում նվազագույն ամսական աշխատավարձը սահմանել 68.000 դրամ:/․․․/։
Նկատի ունենալով, որ Դատարանին չի ներկայացվել Սուրեն Ալեքսանյանի՝ հանցանքը կատարելուց առաջ մեկ տարվա ընթացքում ստացած, միջին եկամուտի չափը Դատարանը, որպես հաշվարկային միավոր ընդունում է ՀՀ քրեական օրենսգրքի 344-րդ հոդվածի 1-ին մասով (1-ին դրվագով) հանցանք կատարելու օրը «Նվազագույն աշխատավարձի մասին» ՀՀ օրենքի 1-ին հոդվածով նախատեսված չափն և պատիժ նշանակում տուգանք՝ նվազագույն աշխատավարձի հնգապատիկի չափով՝ 340․000 ՀՀ դրամ։
ՀՀ քրեական օրենսգրքի 344-րդ հոդվածի 1-ին մասով նախատեսված (2-րդ դրվագով) հանցանք կատարելու պահին «Նվազագույն աշխատավարձի մասին» ՀՀ օրենքի 1-ին հոդվածը սահմանում է /․․․/ 1. Հայաստանի Հանրապետությունում նվազագույն ամսական աշխատավարձը սահմանել 75.000 դրամ:/․․․/։
Նկատի ունենալով, որ Դատարանին չի ներկայացվել Սուրեն Ալեքսանյանի՝ հանցանքը կատարելուց առաջ մեկ տարվա ընթացքում ստացած, միջին եկամուտի չափը Դատարանը, որպես հաշվարկային միավոր ընդունում է ՀՀ քրեական օրենսգրքի 344-րդ հոդվածի 1-ին մասով նախատեսված (2-րդ դրվագով) հանցանք կատարելու օրը սահմանված նվազագույն աշխատավարձն և պատիժ նշանակում տուգանք՝ նվազագույն աշխատավարձի հնգապատիկի չափով՝ 375․000 ՀՀ դրամի չափով։
ՀՀ քրեական օրենսգրքի 74-րդ հոդվածը սահմանում է /.../1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը/.../:
ՀՀ քրեական օրենսգրքի 74-րդ հոդվածի կիրառմամբ՝ նշանակված պատիժները գումարել ամբողջությամբ և վերջնական պատիժ նշանակել տուգանք 715․000 ՀՀ դրամի չափով։
Բավարարելով մեղադրյալի միջնորդությունը Դատարանը նշանակված տուգանք պատժի վճարումը տարաժամկետում է թույլատրելով տուգանքը վճարել մաս առ մաս՝ մեկ տարվա ընթացքում՝ ըստ Սուրեն Աղասու Ալեքսանյանի և ՀՀ ԱՆ պրոբացիայի ծառայության համապատասխան մարմնի կողմից համատեղ սահմանած վճարման ժամանակացույցի:
Անդրադառնալով խափանման միջոցի հարցին, Դատարանը գտնում է, որ Սուրեն Ալեքսանյանի նկատմամբ ընտրված խափանման միջոցը` բացակայելու արգելքը, պետք է թողնել անփոփոխ, մինչև դատավճռի օրինական ուժի մեջ մտնելը:
Բացի այդ, Դատարանը գտնում է, որ դատավճիռը օրինական ուժի մեջ մտնելուց հետո Սուրեն Ալեքսանյանի վերաբերյալ Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքը պետք է վերացնել:
ՀՀ քրեական դատավարության օրենսգրքի 348-րդ հոդվածի 1-ին մասի համաձայն` դատավճիռ կայացնելիս Դատարանը պարտավոր է անդրադառնալ ի թիվս այլնի նաև իրեղեն ապացույցների, վարույթային ծախսերի, գույքի նկատմամբ կիրառված (կիրառվելիք) արգելադրման, գույքային հայցի հարցերին, սակայն Դատարանը, պարզելով, որ սույն քրեական գործով մեղադրյալի գույքի վրա արգելանք չի կիրառվել, գույքային հայց չի ներկայացվել, սահմանափակվում է այդ փաստերի արձանագրմամբ:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 97-րդ, 102-րդ, 105-րդ, 276-րդ, 348-349-րդ, 352-356-րդ և 364-րդ հոդվածներով` Դատարանը․

Վ Ճ Ռ Ե Ց

Սուրեն Աղասու Ալեքսանյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված (1-ին դրվագով) հանցանք կատարելու մեջ և պատիժ նշանակել տուգանք 340․000 ՀՀ դրամի չափով։
Սուրեն Աղասու Ալեքսանյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված (2-րդ դրվագով) հանցանք կատարելու մեջ և պատիժ նշանակել տուգանք 375․000 ՀՀ դրամի չափով։
ՀՀ քրեական օրենսգրքի 74-րդ հոդվածի կիրառմամբ՝ նշանակված պատիժները գումարել և վերջնական պատիժ նշանակել տուգանք 715․000 ՀՀ դրամի չափով։
Թույլատրել տուգանքը վճարել մաս առ մաս՝ մեկ տարվա ընթացքում՝ ըստ Սուրեն Աղասու Ալեքսանյանի և ՀՀ ԱՆ պրոբացիայի ծառայության համապատասխան մարմնի կողմից համատեղ սահմանած վճարման ժամանակացույցի:
Սուրեն Աղասու Ալեքսանյանի նկատմամբ ընտրված խափանման միջոցը` բացակայելու արգելքը` թողնել անփոփոխ մինչև սույն դատավճռի օրինական ուժի մեջ մտնելը:
Դատավճիռը օրինական ուժի մեջ մտնելուց հետո Սուրեն Աղասու Ալեքսանյանի վերաբերյալ Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքը վերացնել:
Քրեական գործին կցված արտավարութային փաստաթղթերը պահել քրեական գործի հետ միասին՝ դրանց պահելու ամբողջ ժամանակամիջոցում:
Իրեղեն ապացույցների, գույքային հայցի, վարույթային ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան` ստանալու օրվանից մեկամսյա ժամկետում:


ԴԱՏԱՎՈՐ` ՄՈՒՇԵՂ ԱՐԱՄՅԱՆ