ԵԴ1/1933/01/25





ՈՐՈՇՈՒՄ

ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ ՎԱՐՈՒՅԹԸ (ՔՐԵԱԿԱՆ ՎԱՐՈՒՅԹԸ) ԿԱՐՃԵԼՈՒ ՄԱՍԻՆ ՄԻՋՆՈՐԴՈՒԹՅՈՒՆԸ ՔՆՆՈՒԹՅԱՆ ԱՌՆԵԼՈՒ ՎԵՐԱԲԵՐՅԱԼ

13 օգոստոսի 2025թ. ք.Երևան

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ջ.ՀԱՅՐԱՊԵՏՅԱՆԻ
քարտուղարությամբ Ն.ՄԱՐԳԱՐՅԱՆԻ
մասնակցությամբ
հանրային մեղադրող Ա.ՄԿՐՏՉՅԱՆԻ

առանձին սենյակում քննարկելով թիվ ԵԴ1/1933/01/25 քրեական գործով մեղադրյալ Հայկ Արծրունի Ղևոնդյանի դիմումը` իր նկատմամբ քրեական հետապնդումը դադարեցնելու և քրեական գործի վարույթը կարճելու մասին,

Պ Ա Ր Զ Ե Ց

2025 թվականի փետրվարի 12-ին ՀՀ քննչական կոմիտեի զինվորական քննչական գլխավոր վարչության չորրորդ կայազորային քննչական բաժնում նախաձեռնվել է թիվ 90258725 քրեական վարույթը` ՀՀ քրեական օրենսգրքի 461-րդ հոդվածի 1-ին մասով:
2025 թվականի մայիսի 13-ին Հայկ Արծրունի Ղևոնդյանի նկատմամբ ՀՀ քրեական օրենսգրքի 461-րդ հոդվածի 1-ին մասով հարուցվել է հանրային քրեական հետապնդում և վերջինիս մեղադրանք է ներկայացվել այն բանի համար, որ «(…) նա հաշվառված լինելով ՀՀ ՊՆ Զ և ԶՀԾ Երևանի թիվ 3 տարածքային ստորաբաժանումում ենթակա է եղել զորակոչման 2024 թվականի ձմեռային զորակոչին, որի ընթացքում ճանաչվել է սահմանափակումով պիտանի զինվորական ծառայության համար, սակայն հրաժարվել է զինվորական ծառայության զորակոչվելու վերաբերյալ ծանուցագիր ստանալուց և խախտելով «Զինվորական ծառայության և զինծառայողի կարգավիճակի մասին» ՀՀ օրենքի 19-րդ հոդվածի 1-ին մասի պահանջները, մինչև զորակոչի ավարտը չի ներկայացել տարածքային ստորաբաժանում՝ այդպիսով խուսափել է պարտադիր զինվորական ծառայության հայտարարված 2024 թվականի ձմեռային զորակոչից այդ զորակոչից տարկետում ստանալու կամ ծառայությունից ազատվելու օրենսդրությամբ սահմանված հիմքերի բացակայության դեպքում:»
Քննիչի՝ 2025 թվականի մայիսի 16-ին Հայկ Արծրունի Ղևոնդյանի նկատմամբ որպես խափանման միջոց է կիրառվել բացակայելու արգելքը։
Քրեական գործը մեղադրական եզրակացությամբ Երևան քաղաքի առաջին ատյանի ընդհանուր իրավասության քրեական դատարանում ստացվել է 2025 թվականի հունիսի 6-ին: 2025 թվականի հունիսի 9-ի որոշմամբ Երևան քաղաքի առաջին ատյանի ընդհանուր իրավասության քրեական դատարանի դատավոր Ջ.Հայրապետյանը ստանձնել է քրեական գործի վարույթը և նշանակել նախնական դատալսումներ:
2025 թվականի հուլիսի 21-ին Դատարան է մուտքագրվել մեղադրյալ Հայկ Արծրունի Ղևոնդյանի հոր՝ Ա.Ղևոնդյանի, դիմումը, ըստ որի մեղադրյալ Հայկ Արծրունի Ղևոնդյանը զորակոչվել է ՀՀ զինված ուժերում պարտադիր ժամկետային ծառայության։ Հիշյալ դիմումին կից ստացվել է ՀՀ ՊՆ Հանրապետական զինվորական կոմիսարիատի Երևանի N 3 զինվորական կոմիսարիատի կոմիսար, գնդապետ Ա.Վարդերեսյանի կողմից տրված տեղեկանքն, ըստ որի՝ Հ.Ղևոնդյանը 2025 թվականի հունիսի 23-ին զորակոչվել է շարքային կազմի պարտադիր զինվորական ծառայության։
Դատական նիստում հանրային մեղադրող Ա.Մկրտչյանը ներկայացրեց հիշյալ զինվորական կոմիսարիատից ստացված նույնաբովանդակ գրության պատճեն, ինչպես նաև մեղադրյալ Հ.Ղևոնդյանի դիմումն այն մասին, որ վերջինս չի առարկում, որպեսզի իր նկատմամբ հարուցված քրեական հետապնդումը դադարեցվի և քրեական վարույթը կարճվի ցանկացած ոչ արդարացնող հիմքով։ Հանրային մեղադրողը չառարկեց ներկայացված միջնորդության դեմ:
Քննելով ներկայացված միջնորդությունը` Դատարանը գտնում է, որ այն հիմնավոր է և ենթակա է բավարարման հետևյալ պատճառաբանությամբ.
ՀՀ քրեական օրենսգրքի 461-րդ հոդվածի համաձայն`
«1. Պարտադիր զինվորական կամ այլընտրանքային ծառայության հայտարարված զորակոչից խուսափելը՝ այդ զորակոչից տարկետում ստանալու կամ ծառայությունից ազատվելու՝ օրենսդրությամբ սահմանված հիմքերի բացակայության դեպքում՝
պատժվում է ազատազրկմամբ՝ երկուսից հինգ տարի ժամկետով:
(...):
4. Սույն հոդվածի 1-ին կամ 2-րդ մասով նախատեսված հանցանք կատարած անձն ազատվում է քրեական պատասխանատվությունից, եթե կամովին ներկայացել և զորակոչվել է պարտադիր զինվորական կամ այլընտրանքային ծառայության կամ կամավոր ներկայանալով քրեական վարույթ իրականացնող մարմին՝ Հայաստանի Հանրապետության պետական բյուջե է վճարել պարտադիր զինվորական ծառայություն չանցնելու դիմաց օրենքով սահմանված գումարը:»։
Վերոգրյալ նորմերի, ստացված գրության և դիմումների վերլուծության համատեքստում Դատարանն արձանագրում է, որ մեղադրյալ Հ․Ղևոնդյանը կամավոր ներկայացել ու զորակոչվել է պարտադիր զինվորական ծառայության, ինչի հիման վրա Դատարանը գալիս է հետևության, որ վերջինիս նկատմամբ կիրառելի է ՀՀ քրեական օրենսգրքի 461-րդ հոդվածի 4-րդ մասով նախատեսված խրախուսական նորմը: Այլ կերպ, մեղադրյալի կամովին պարտադիր զինվորական ծառայության զորակոչվելու իրադրության պայմաններում վերջինիս նկատմամբ հարուցված քրեական հետապնդումը ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի հիման ենթակա է դադարեցման:
ՀՀ քրեական դատավարության օրենսգրքի 13-րդ հոդվածի համաձայն՝
«1. Քրեական վարույթը ենթակա է կարճման, եթե` (…)
3) մեղադրյալի նկատմամբ դադարեցվել է քրեական հետապնդումը, և սպառվել են վարույթը շարունակելու բոլոր հնարավորությունները. (…)»:
Հետևաբար, Դատարանը գտնում է, որ մեղադրյալ Հայկ Արծրունի Ղևոնդյանի նկատմամբ ՀՀ քրեական օրենսգրքի 461-րդ հոդվածի 1-ին մասով քրեական հետապնդումը ենթակա է դադարեցման, իսկ քրեական գործի վարույթը կարճման` ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի և 13-րդ հոդվածի 1-ին մասի 3-րդ կետի հիման վրա:
Քննարկելով մեղադրյալի նկատմամբ կիրառված խափանման միջոցի հարցը՝ Դատարանը գտնում է, որ որպես խափանման միջոց ընտրված բացակայելու արգելքը պետք է վերացնել:հ
Քննարկելով արտավարութային փաստաթղթերի տնօրինման հարցը՝ Դատարանը գտնում է, որ դատավճիռն օրինական ուժի մեջ մտնելուց հետո, արտավարութային փաստաթուղթ ճանաչված նյութերը պետք է թողնել քրեական գործին կցված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 12-րդ, 13-րդ, 33-րդ, 270-րդ հոդվածներով` Դատարանը.

Ո Ր Ո Շ Ե Ց

Հայկ Արծրունի Ղևոնդյանի նկատմամբ ՀՀ քրեական օրենսգրքի 461-րդ հոդվածի 1-ին մասով քրեական հետապնդումը դադարեցնել և քրեական վարույթը կարճել՝ մեղադրյալի կողմից պարտադիր զինվորական ծառայության կամովին ներկայանալու և զորակոչվելու պատճառաբանությամբ:
Հայկ Արծրունի Ղևոնդյանի նկատմամբ կիրառված խափանման միջոցը՝ բացակայելու արգելքը, վերացնել:
Դատավճիռն օրինական ուժի մեջ մտնելուց հետո արտավարութային փաստաթուղթ ճանաչված նյութերը թողնել կցված քրեական գործին։
Որոշումը կարող է բողոքարկվել ՀՀ վերաքննիչ քրեական դատարան` ստանալու օրվանից մեկամսյա ժամկետում:


ԴԱՏԱՎՈՐ՝ Ջ.ՀԱՅՐԱՊԵՏՅԱՆ