ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

13.02.2026թ. թիվ ԵԴ1/1893/01/25 ք. Երևան
Երևան քաղաքի առաջին ատյանի ընդհանուր իրավասության քրեական դատարանը հետևյալ կազմով՝

Նախագահող դատավոր Կ.Ֆարխոյան
քարտուղարությամբ Մ. Բոզոյանի
մասնակցությամբ հանրային մեղադրող Ռ. Դոխոյանի
մեղադրյալ Ա. Սարգսյանի

Դռնբաց դատական նիստում, դատարանում, քննեց վարույթն ըստ մեղադրանքի՝ Արամ Արթուրի Սարգսյանի, ծնված **** Երևան քաղաքում, ազգությամբ հայ, ՀՀ քաղաքացի, չամուսնացած, բարձրագույն կրթությամբ, չի աշխատում, դատվածություն չունեցող, հաշվառված և բնակվող Երևան քաղաքի, **** հասցեում:
ՀՀ ՔԿ ԵՔՔՎ ճանապարհատրանսպորտային հանցագործությունների քննության բաժնում 31.01.2025 թվականին նախաձեռնվել է թիվ 60149625 քրեական վարույթը ՀՀ քրեական օրենսգրքի 344 հոդվածի 2-րդ մասով: (հատոր 1, վ.թ. 9):
Երևան քաղաքի Շենգավիթ վարչական շրջանի դատախազության դատախազ Ռ. Դոխոյանի 31.03.2025 թվականի որոշմամբ թիվ 60-1496-25 քրեական վարույթով Արամ Արթուրի Սարգսյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում: (հատոր 1, վ.թ. 19-20):
2025 թվականի մարտի 31-ին Արամ Արթուրի Սարգսյանի նկատմամբ որպես խափանման միջոց է ընտրվել բացակայելու արգելքը: (հատոր 1, վ.թ. 22-23):
Սույն քրեական վարույթը մեղադրական եզրակացությամբ Երևան քաղաքի առաջին ատյանի ընդհանուր իրավասության քրեական դատարան է ուղարկվել 03.06.2025 թվականին, որը դատարանում ստացվել է 04․06․2025 թվականին և նույն օրը մակագրվել է դատավոր Կ. Ֆարխոյանին, իսկ 05.06.2025 թվականին հանձնվել է դատավոր Կ. Ֆարխոյանի աշխատակազմին:
2025 թվականի հունիսի 05-ին Երևան քաղաքի առաջին ատյանի ընդհանուր իրավասության քրեական դատարանի դատավոր Կ. Ֆարխոյանը որոշում է կայացրել վարույթը ստանձնելու և նախնական դատալսումներ նշանակելու մասին։
2026 թվականի փետրվարի 13-ին որոշում է կայացվել հիմնական դատալսումներ նշանակելու մասին:
2026 թվականի փետրվարի 13-ին մեղադրյալ Արամ Արթուրի Սարգսյանի նկատմամբ կայացվել է մեղադրական վերդիկտ:
Նախաքննական մարմնի կողմից Արամ Արթուրի Սարգսյանին մեղադրանք է ներկայացվել պատժի սպառնալիքով արգելված, մեղավորությամբ կատարված այն արարքի համար, որ նա տրանսպորտային միջոցներ վարելու իրավունք չունենալով, հարբած՝ ոչ սթափ, վիճակում վարել է տրանսպորտային միջոց։
Այսպես․
Արամ Արթուրի Սարգսյանը, սահմանված կարգով չստանալով տրանսպորտային միջոց վարելու իրավունքի վարորդական վկայական, 2025 թվականի հունվարի 02-ին՝ ժամը 04։50-ին, Երևան քաղաքի Թամանցիների փողոցում, գտնվելով ոչ սթափ վիճակում՝ մեկ լիտր արտաշնչած օդի մեջ մաքուր ալկոհոլի պարունակությունը 0,322 մգ/լ, վարել է «Վազ» մակնիշի *** հաշվառման համարանիշի տրանսպորտային միջոցը, ինչի կապակցությամբ ՀՀ ոստիկանության պարեկային ծառայության պարեկի կողմից նույն օրը կազմվել է վարչական իրավախախտման վերաբերյալ 8180418358 արձանագրությունը։
Հիմնական դատալսումների ընթացքում մեղադրյալ Արամ Արթուրի Սարգսյանը հայտնեց, որ պաշտպան ունենալ չի ցանկանում, որը կապված չէ իր նյութական դրության հետ, ներկայացված մեղադրանքում իրեն մեղավոր է ճանաչում և ցուցմունք տվեց այն մասին, որ 2025 թվականի հունվարի 02-ին՝ ժամը 04։50-ի սահմաններում հոր ինքնազգացողությունը վատացել է, և ինքը շտապել է վերջինիս հասցնել հիվանդանոց, Ընդունում է, որ վարել է տրանսպորտային միջոց՝ չունենալով տրանսպորտային միջոցներ վարելու իրավունք, և գտնվել է ոչ սթափ վիճակում: Ինքը զղջում է կատարածի համար, խնդրում է իր նկատմամբ մեղմ վարվել:
Մեղադրյալ Արամ Արթուրի Սարգսյանին մեղսագրվող հանցավոր արարքը, բացի նրա կողմից տված խոստովանական ցուցմունքից հիմնավորվեց նաև հիմնական դատալսումների ընթացքում հետազոտված թույլատրելի հետևյալ ապացույցներով.
1․ ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվությամբ, համաձայն որի՝ Արամ Արթուրի Սարգսյանը / ծնված՝ **** թվականին, ՀԾՀ՝ 2905000422/ հաշվառված և բնակվում է Երևան քաղաքի *** փողոցի, **** հասցեում։ Նույն տեղեկատվության վարորդական վկայականի տվյալներ բաժնում՝ որպես վաորդական վկայականի համար, նշված է *** համարը, իսկ կարգավիճակի դիմաց նշված է զրկված։ Զրկումներ բաժնում՝ որպես զրկման սկիզբ նշված է 26․08․2022 թվական, իսկ զրկման ավարտ՝ 26․08․2023 թվական։ /հատոր 1, վ.թ. 5/:
2․ Վարչական իրավախախտման արձանագրությամբ, համաձայն որի՝ արձանագրությունը կազմվել է 26․08․2022 թվականին՝ ժամը 07։00-ին՝ ՀՀ ՆԳՆ ոստիկանության պարեկային ծառայության ավագ պարեկ Դավիթ Սիմոնյանի կողմից։ Արձանագրության համաձայն՝ Արամ Արթուրի Սարգսյանը/ ծնված՝ 19․05․2000 թվականին, Հասցե՝ Երևան քաղաքի Վաղարշյան փողոցի, 1-ին շենքի, 1-ին բնակարան/ «BMW 328» մակնիշի *** հաշվառման համարանիշի տրանսպորտային միջոցը 26․08․2022 թվականին՝ ժամը 06։40-ին վարել է Երևան քաղաքի Սուրբ Մեսրոպ Մաշտոց պողոտայում՝ ոչ սթափ վիճակում։ Արձանագրության ներքևի հատվածում առկա է ձեռագիր գրառում «քաղաքացին հրաժարվեց ստորագրել» բովանդակությամբ։ Արձանագրության ներքևի հատվածում առկա է արձանագրություն կազմող անձի կողմից դրված ստորագրություն, իսկ խախտման ծածկագիրն է ՝ 70-2։ /հատոր 1, վ.թ. 6/:
3․ Վարչական իրավախախտման վերաբերյալ գործով թիվ 8180418358 որոշմամբ, համաձայն որի՝ այն կայացվել է 02․01․2025 թվականին։ Որոշման համաձայն՝ ՃԵԱԱՄՕ-ի 24-րդ հոդվածի 5-*րդ մասի «բ» կետի համաձայն՝ Արամ Արթուրի Սարգսյանը տրանսպորտային միջոցը վարել է ոչ սթափ վիճակում։ Նշված գրառման տակ առկա է որոշումն ընդունող անձի ստորագրությունը, իսկ որոշման մեջ նշված՝ «Որոշման պատճենը և կատարման կարգի մասին քաղվածքը ստացա» դաշտի դիմաց առկա է խախտում կատարած անձի ստոագրություն։ /հատոր 1, վ.թ. 3/:
4․ Ալկոհոլի պարունակության ստուգման կտրոնով համաձայն որի՝ ստուգաչափման սարքի համարն է՝ 93000750, զննման համարը՝ 00830, զննման ամսաթիվը՝ 02․01․2025 թվական, զննման ժամը՝ 04։57։53, վերջին ստուգաչափման ամսաթիվը 25․12․2024 թվական, դատարկ թեստ՝ 0․000մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0․322մգ/լ, վարորդի անունն է՝ Արամ, ազգանունը՝ Սարգսյան, տրանսպորտային միջոցի համարանիշը՝ ****, Վ/Վ համարը` AS030806, Պ/Ծ ազգանունը՝ Համբարձումյան, կրծքանշանի համարը՝ 08790, ստորաբաժանում՝ 3գ3վ։ Կտրոնի ներքևի հատվածում առկա է պարեկի ստորագրությունը։ /հատոր 1, վ.թ. 4/:
5․ ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲ ընկերության կողմից տրված թիվ 143251 ստուգաչափման վկայականով, համաձայն որի՝ վկայականը ուժի մեջ է 2024 թվականի դեկտեմբերի 25-ից մինչև 2025 թվականի դեկտեմբերի 25-ը,ստուգաչափման սարքի գործարանային համարն է 93000750, տեսակը՝ jupiter X/RP, չափման տիրույթը՝ 0․000- 2․000մգ/լ ճշտության դասը, կարգը/սխալանքը/ ±10%, արտադրողը՝ Չինաստան, պատկանում է ՀՀ ՆԳՆ Ոստիկանությանը։ Ստուգաչափումը կատարվել է համաձայն MU2835-2008 անվանմամբ ստուգաչափման մեթոդիկայի և նշագրի։ Ստուգաչափող անվան դիմաց առկա է ստորագրություն և նշված է Վ․ Բաբաջանյան, իսկ բաժնի /լաբարատորիայի վարիչ/ անվան դիմաց առկա է ստորագրություն և նշված է Գ․ Մարտիրոսյան։ /հատոր 1, վ.թ. 7/:
-Զննում կատարելու մասին 26.03.2025 թվականի արձանագրությամբ, համաձայն որի՝ զննության օբյեկտ են հանդիսացել քրեական վարույթի նյութերում առկա՝ ՀՀ ՆԳՆ ոստիկանության « Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության, 26․08․2022 թվականին կազմված վարչական իրավախախտման վերաբերյալ արձանագրության, 02․01․2025 թվականին կազմված վարչական իրավախախտման գործով թիվ 8180418358 որոշման, 02․01․2025 թվականին կազմված ալկոհոլի պարունակության ստուգման կտրոնի և ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲ ընկերության կողմից տրված թիվ 143251 ստուգաչափման վկայականի պատճենները։ /հատոր 1, վ.թ. 14/:
-Արտավարութային փաստաթուղթ ճանաչելու մասին 26.03.2025 թվականի որոշմամբ, համաձայն որի՝ թիվ 60-1496-25 քրեական վարույթով Արամ Արթուրի Սարգսյանի նկատմամբ կազմված վարչական իրավախախտման վերաբերյալ թիվ 8200277549 և 8180418358 արձանագրությունները, ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրի, սթափության վիճակի զննման թիվ 00830 կտրոնի, սթափության 93000750 համարի սարքի, ստուգաչափման թիվ 143251 վկայականի պատճենները ճանաչվել են արտավարույթային փաստաթուղթ։ /հատոր 1, վ.թ. 15/:
Դատարանն արձանագրում է, որ հիմնական դատալսումների ընթացքում պատշաճ իրավական ընթացակարգով թույլատրելի բոլոր ապացույցները հանգամանորեն հետազոտվել են՝ դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, դատարանը հաստատված է համարում, որ Արամ Արթուրի Սարգսյանի, տրանսպորտային միջոց վարելու իրավունքից զրկված և գտնվելով ոչ սթափ վիճակում (սթափության զննման կտրոնի համարը՝ 00830) մեկ լիտր արտաշնչած օդի մեջ մաքուր ալկոհոլի պարունակությունը 0,322 մգ/լ (նկատի ունենալով ստուագաչափող թիվ 93000750 ալկոտեստերի սարքի չափման ճշտության հնարավոր 10% սխալանքը), 2025 թվականի հունվարի 02-ին՝ ժամը 04:50-ի սահմաններում, Երևան քաղաքի Թամանցիների փողոցում վարել է «Վազ» մակնիշի 37 EU 414 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկ Համբարձումյանի կողմից նույն օրը՝ ժամը 04:57-ին, կազմվել է վարչական իրավախախտման վերաբերյալ թիվ 8180418358 արձանագրությունը:
Դատարանը հանգում է այն հետևության, որ մեղադրյալ Արամ Արթուրի Սարգսյանը կատարել է իրեն մեղսագրված արարքը, որի համար կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը հաստատված համարելով հանցագործության և դրա կատարման մեջ Արամ Արթուրի Սարգսյանի մեղքի ապացուցված լինելը, գտնում է, որ նա ենթակա է պատժի կատարածի համար:
Որպես Արամ Արթուրի Սարգսյանի պատասխանատվությունը և պատիժը մեղմացնող հանգամանքներ դատարանը հաշվի է առնում, որ մեղադրյալը տվել է խոստովանական ցուցմունքներ, զղջացել է կատարածի համար:
Արամ Արթուրի Սարգսյանի պատասխանատվությունը և պատիժը ծանրացնող հանգամանքներ առկա չեն:
Դատարանը մեղադրյալի նկատմամբ պատիժ նշանակելիս հաշվի է առնում ինչպես նրա կատարած գործողությունների բնույթն ու հանրության համար վտանգավորության աuտիճանը, այնպես էլ նրա անձը բնութագրող տվյալները՝ այն, որ նախկինում դատված չի եղել:
Մեղադրյալի նկատմամբ պատիժ նշանակելիս դատարանը ելնում է այն իրողությունից, որ օրենքի առաջնային պահանջը պատժի արդարացիությունն է, որը որպես քրեական իրավունքի սկզբունք ձևակերպված է ՀՀ քրեական օրենսգրքի 7-րդ հոդվածում. հանցանք կատարած անձի նկատմամբ կիրառվող պատիժը պետք է լինի արդարացի` համապատասխանի հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ ու բավարար լինեն նրան ուղղելու և նոր հանցագործությունները կանխելու համար:
ՀՀ քրեական օրենսգրքի 344-րդ հոդվածի 2-րդ մասի սանկցիան պատիժ է նախատեսում տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ առավելագույնը երկու տարի ժամկետով::
Նույն օրենսգրքի 59-րդ հոդվածի 3-րդ և 5-րդ մասերի համաձայն`
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով:
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո: Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
Դատարանը՝ հիմք ընդունելով մեղադրյալի անձը բնութագրող հանգամանքները, նրա պատասխանատվությունը և պատիժը մեղմացնող հանգամանքների առկայությունն ու ծանրացնող հանգամանքի բացակայությունը, ինչպես նաև հաշվի առնելով այն հանգամանքը, որ մեղադրվող արարքի կատարման ժամանակահատվածում «Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն` ՀՀ նվազագույն ամսական աշխատավարձը 75.000 ՀՀ դրամ է, իսկ Արամ Արթուրի Սարգսյանը չունի աշխատանք և ղեկավարվելով ՀՀ քրեական օրենսգրքի 7-րդ հոդվածի 1-ին, 55-րդ և 69-րդ հոդվածներով, գտնում է, որ Արամ Արթուրի Սարգսյանի նկատմամբ պետք է պատիժ նշանակել ՀՀ քրեական օրենսգրքի 344-րդ հոդվածի 2-րդ մասի սանկցիայով նախատեսված տուգանքի ձևով՝ նվազագույն աշխատավարձի հնգապատիկի՝ 375.000 ՀՀ դրամի չափով: Դատարանը եկել է այդ եզրահանգման, քանի որ այդպիսի պատժատեսակ նշանակելու միջոցով հնարավոր է ապահովել ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակը, այն է՝ վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
ՀՀ քրեական օրենսգրքի 59-րդ հոդվածի 8-րդ մասի համաձայն՝ «8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ (․․․)»
Քննության առնելով դատապարտված մեղադրյալի նկատմամբ ընտրված խափանման միջոցի հարցը՝ դատարանը գտնում է, որ այն պետք է թողնել անփոփոխ մինչև դատավճիռն օրինական ուժի մեջ մտնելը :
Արտավարութային փաստաթղթերը պետք է պահել քրեական վարույթում, դրա պահպանման համար նախատեսված ողջ ժամանակահատվածում:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 9-րդ, 270-րդ, 347-350-րդ հոդվածներով, դատարանը


Վ Ճ Ռ Ե Ց
Արամ Արթուրի Սարգսյանին մեղավոր ճանաչել ՀՀ քրեական օրենսգրքի 344 հոդվածի 2-րդ մասով նախատեսված հանցանքում և նրա նկատմամբ որպես պատիժ նշանակել տուգանք՝ նվազագույն աշխատավարձի հնգապատիկի՝ 375.000 ՀՀ դրամի չափով:
ՀՀ քրեական օրենսգրքի 59-րդ հոդվածի կարգով՝ Արամ Արթուրի Սարգսյանին նկատմամբ նշանակված տուգանքի վճարման համար սահմանել 12-ամսյա ժամկետ՝ թույլատրելով վերջինիս, սույն դատավճիռն օրինական ուժի մեջ մտնելուց հետո՝ յուրաքանչյուր ամիս վճարել 31.250 ՀՀ դրամից ոչ պակաս գումար՝ մինչև սույն դատավճռով նշանակված տուգանքի գումարի լրիվ մարումը։
Արամ Արթուրի Սարգսյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ մինչև դատավճիռն օրինական ուժի մեջ մտնելը:
Արտավարութային փաստաթղթերը պահել քրեական վարույթում, դրա պահպանման համար նախատեսված ողջ ժամանակահատվածում:
Դատավճիռը հատուկ վերանայման կարգով կարող է բողոքարկվել ՀՀ վերաքննիչ քրեական դատարան՝ այն ստանալու օրվանից մեկամսյա ժամկետում :

ԴԱՏԱՎՈՐ՝ Կ.ՖԱՐԽՈՅԱՆ