ԵԴ1/1874/01/25







Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ս.ԳԶՈԳՅԱՆԻ
քարտուղարությամբ Լ.ՉՈԲԱՆՅԱՆԻ
մասնակցությամբ
հանրային մեղադրող Բ․ՂԱԶԻՆՅԱՆԻ
մեղադրյալ Լ․ՀԱԽՎԵՐԴՅԱՆԻ


2025 թվականի հուլիսի 10-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Լևոն Միքայելի Հախվերդյանի՝ ծնված 1991 թվականի հուլիսի 15-ին, ք․Երևան, հայ, ՀՀ քաղաքացի, թերի բարձրագույն կրթությամբ, նախկինում չդատապարտված, ամուսնացած, ըստ իր հայտարարության՝ խնամքին կինը և ծնողները, աշխատում է Թոփ Շին» ՍՊ-ում որպես հիմնադիր տնօրեն, հաշվառված է և բնակվում է ք․Երևան, Մազմանյան փողոց 10/11 տուն հասցեում, մեղադրանք է առաջադրվել 2 դրվագ ՀՀ քրեական օրենսգրքի 344-րդ հոդվածի 1-ին մասով, որպես խափանման միջոց է ընտրվել բացակայելու արգելքը,

ՊԱՐԶԵՑ

1.Գործի դատավարական նախապատմությունը
2023 թվականի հունիսի 13-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 66117823 քրեական վարույթը:
2024 թվականի ապրիլի 20-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60-1530-24 քրեական վարույթը:
2025 թվականի հունվարի 8-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 66100525 քրեական վարույթը:
2025 թվականի մայիսի 16-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 10160525 քրեական վարույթը:
2025 թվականի մայիսի 16-ի որոշմամբ թիվ 60153024 քրեական վարույթը միացվել է թիվ 10160525 քրեական վարույթին, վարույթը շարունակվել թիվ 60153024 համարով։
2025 թվականի մայիսի 19-ի որոշմամբ Լևոն Միքայելի Հախվերդյանի նկատմամբ քրեական հետապնդում է հարուցվել 2 դրվագ ՀՀ քրեական օրենսգրքի 344-րդ հոդվածի 1-ին մասով այն արարքների համար, որ նա, ՀՀ ՆԳՆ ոստիկանության ճանապարհային ոստիկանության ծառայողի կողմից 2023 թվականի մարտի 07-ին կայացված թիվ 8180248302 որոշմամբ ենթարկված լինելով վարչական տույժի՝ տրանսպորտային միջոց վարելու իրավունքը 6 ամիս ժամկետով կասեցնելու ձևով, պատշաճ ծանուցված և տեղեկացված լինելով այդ մասին, 2023 թվականի հունիսի 04-ին ժամը 00.45-ի սահմաններում Երևան քաղաքի Եղվարդի խճուղում վարել է Ֆորդ մակնիշի 15LH115 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության ծառայողի կողմից նույն օրը կազմված վարչական իրավախախտման վերաբերյալ թիվ 8180251647 արձանագրությամբ։
Այսինքն՝ Լևոն Միքայելի Հախվերդյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 344-րդ հոդվածի 1-ին մասով:
Բացի այդ՝ Լևոն Միքայելի Հախվերդյանը ՀՀ ՆԳՆ ոստիկանության ճանապարհային ոստիկանության ծառայողի կողմից 2024 թվականի օգոստոսի 15-ին կայացված թիվ 8180305492 որոշմամբ ենթարկված լինելով վարչական տույժի՝ տրանսպորտային միջոց վարելու իրավունքից 1 տարի ժամկետովզրկելու ձևով, պատշաճ ծանուցված և տեղեկացված լինելով այդ մասին, 2025 թվականի փետրվարի 05-ին ժամը 22.13-ի սահմաններում Երևան քաղաքի Թումանյան փողոցում վարել է Նիսսան մակնիշի 7701077 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության ծառայողի կողմից նույն օրը կազմված վարչական իրավախախտման վերաբերյալ թիվ 8259014030 արձանագրությամբ:
Այսինքն՝ Լևոն Միքայելի Հախվերդյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 344-րդ հոդվածի 1-ին մասով։
2025 թվականի մայիսի 21-ի որոշմամբ Լևոն Միքայելի Հախվերդյանի նկատմամբ խափանման միջոց է ընտրվել բացակայելու արգելքը:
2025 թվականի հունիսի 3-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում, գործին շնորհվել է ԵԴ1/1874/01/25 համարը:
2024 թվականի հունիսի 5-ին Դատարանի դատավոր Ս.Գզոգյանը որոշում է կայացրել վարույթը ստանձնելու և նախնական դատալսումներ նշանակելու մասին։
2025 թվականի հուլիսի 10-ին Դատարանը Լևոն Միքայելի Հախվերդյանի նկատմամբ կայացրել է մեղադրական վերդիկտ։


2.Դատարանում հետազոտված և գնահատված ապացույցներ
Մեղադրյալ Լևոն Միքայելի Հախվերդյանն առաջադրված մեղադրանքում իրեն մեղավոր է ճանաչել, հիմնական դատալսումների ընթացքում, օգտվելով իր իրավունքներից, հրաժարվել է ցուցմունք տալ (տե՛ս դատական նիստի արձանագրությունը):
Մինչդատական վարույթի ընթացքում Լևոն Միքայելի Հախվերդյանը ցուցմունք է տվել այն մասին, որ 2023 թվականի մայիսի 05-ին, երբ իրեն Կոտայքի մարզում կանգնեցրել են և կասեցված վիճակում է վարելու հետ կապված չի հիշում կոնկրետ ինչ են ասել, սակայն Կոտայքի մարզ քննչականում հարուցվել է գործ և հրավիրել են իրեն հարցաքննության և կարճվել է քրեական գործը, տեղյակ չլինելու հիմքով, իսկ ինչ վերաբերվում է 04․06․2023 թվականին տրանսպորտային միջոցը կասեցված վիճակում վարելու հանգամանքին, ապա հայտնել է, որ իրեն միգուցե պարեկային ծառայության աշխատակիցները մատչելի ձևով չեն ասել, իրեն բանավոր ձևով ասել են, սակայն ինքը չի հասկացել, այդ իսկ պատճառով կրկին վարել է 2023 թվականի մայիսի 05-ից հետո: Որից հետո հայտնել է, որ այդ ընթացքում իր բալերը վերականգնվել են, սակայն սեպտեմբերին կրկին սպառվել են բալերը և ինքը զրկվել է վարորդական իրավունքի վկայակնից, և 12․12․2024 թվականին Կոտայքի մարզում վարել է և նշված դեպքի հետ կապված Կոտայքի մարզի քննչականում կրկին հարուցվել է գործ, սակայն տեղյակ չէ վերջնական որոշում կայացվել է, թե ոչ, իսկ ինչ վերաբերվում է 2025 թվականի փետրվարի 05-ին տրանսպորտային միջոց վարելու հանգամանքին, հայտնել է, որ տեղյակ է եղել և վարել է զրկված վիճակում, անհրաժեշտությունից ելնելով: Իսկ ինչ վերաբերվում է, իր հեռախոսահամարին ուղարկված հաղորդագրույթուններին հայտնել է, որ ինքը չի մտնում roadpolice.am էլեկտրոնային կայք և չի տեսել հաղորդագրությունները: Հայտնել է, որ ընդունում է իր կողմից կատարված արարքները, որոնց համար զղջում է։
Լևոն Հախվերդյանը հայտնել է, որ պնդում է նախկինում հայտնած իր ցուցմունքը, առաջադրված մեղադրանքի հետ կապված դիրքորոշում չի ցանկանում հայտնել։ Այլ հարցերի չի ցանկանում պատասխանել (տե´ս դատական նիստի արձանագրություն, քրեական գործ, 63-70-րդ, 116-117-րդ թերթ)։
Հիմնական դատալսումների ընթացքում հետազոտվել են հետևյալ գրավոր ապացույցները.
Փաստաթղթերի զննում կատարելու մասին արձանագրությամբ, համաձայն որի Լևոն Միքայելի Հախվերդյանը, տեղյակ լինելով ՀՀ ՆԳՆ ոստիկանության ճանապարհային ոստիկանության ծառայողի կողմից 2023 թվականի մարտի 07-ին կայացված թիվ 8180248302 որոշմամբ ենթարկված լինելով վարչական տույժի՝ տրանսպորտային միջոց վարելու իրավունքը 6 ամիս ժամկետով կասեցնելու ձևով, պատշաճ ծանուցված և տեղեկացված լինելով այդ մասին, 2023 թվականի հունիսի 04-ին ժամը 00:45-ի սահմաններում, Երևան քաղաքի Եղվարդի խճուղում վարել է Ֆորդ մակնիշի 15LH115 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության ծառայողի կողմից նույն օրը կազմված վարչական իրավախախտման վերաբերյալ թիվ 8180251647 արձանագրությունը:
ՀՀ ՆԳՆ ոստիկանության պարեկային ծառայության Երևան քաղաքի գնդի հրամանատար, ոստիկանության փոխգնդապետ Ա.Խ.Իսախանյանին հասցեագրված զեկուցագրի պատճենը, 04.06.2023 թվականին կազմված վարչական իրավախախտման վերաբերյալ թիվ 8180251647 արձանագրությանը պատճենը, Ճանապարհային ոստիկանության էլեկտրոնային ռեգիստրի քաղվածքի պատճենը, 04.03.2023 թվականին ժամը 04:44-ին կազմված թիվ 8180248302 արձանագրության պատճենը, Ստուգաչափման սարքի կտրոնը, թիվ 084205 ստուգաչափման վկայականի պատճենը, Ճանապարհային ոստիկանության էլեկտրոնային ռեգիստրի քաղվածքի պատճենը, 05.05.2023 թվականին՝ ժամը 02:12-ին կազմված վարչական իրավախախտման վերաբերյալ թիվ 8300572376 արձանագրության պատճենը, 05.05.2023 թվականին՝ ժամը 02:02-ին կազմված վարչական իրավախախտման վերաբերյալ թիվ 8180283627 արձանագրության պատճենը, Լևոն Միքայելի Հախվերդյանի հարթակից օգտվելու և էլեկտրոնային եղանակով ծանուցումների վերաբերյալ տեղեկանքը, Թիվ 8180248302 արձանագրության ծանուցման կտրոնի պատճենը, 12.12.2024 թվականին կազմված վարչական իրավախախտման վերաբերյալ թիվ 8400854771 արձանագրության պատճենը, 12.12.2024 թվականին կազմված վարչական իրավախախտման վերաբերյալ թիվ 8400854718 արձանագրության պատճենը, Թիվ 110905 ստուգաչափման վկայականի պատճենը, 05.02.2025 թվականին ժամը 22:15-ին կազմված վարչական իրավախախտման վերաբերյալ թիվ 8259014030 արձանագրության պատճենը, 30.07.2024 թվականին կազմված թիվ 8180305492 արձանագրության պատճենը, Ստուգաչափման սարքի կտրոնը, Պարտավորագրի պատճենը, Հայ Փոստ ընկերության կողմից տրված կտրոնի պատճենը։


3.Դատարանի իրավական վերլուծությունները
Դատարանը, վերլուծելով մեղադրյալ Լևոն Հախվերդյանին առաջադրված մեղադրանքի հիմքում դրված և հիմնական դատալսումների ընթացքում հետազոտված վերոգրյալ ապացույցները՝ դրանք գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր կասկածները նրա օգտին մեկնաբանելով, հաստատված է համարում, որ Լևոն Միքայելի Հախվերդյանը, ՀՀ ՆԳՆ ոստիկանության ճանապարհային ոստիկանության ծառայողի կողմից 2023 թվականի մարտի 07-ին կայացված թիվ 8180248302 որոշմամբ ենթարկված լինելով վարչական տույժի՝ տրանսպորտային միջոց վարելու իրավունքը 6 ամիս ժամկետով կասեցնելու ձևով, պատշաճ ծանուցված և տեղեկացված լինելով այդ մասին, 2023 թվականի հունիսի 04-ին ժամը 00.45-ի սահմաններում Երևան քաղաքի Եղվարդի խճուղում վարել է Ֆորդ մակնիշի 15LH115 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության ծառայողի կողմից նույն օրը կազմված վարչական իրավախախտման վերաբերյալ թիվ 8180251647 արձանագրությամբ։ Բացի այդ՝ Լևոն Միքայելի Հախվերդյանը ՀՀ ՆԳՆ ոստիկանության ճանապարհային ոստիկանության ծառայողի կողմից 2024 թվականի օգոստոսի 15-ին կայացված թիվ 8180305492 որոշմամբ ենթարկված լինելով վարչական տույժի՝ տրանսպորտային միջոց վարելու իրավունքից 1 տարի ժամկետովզրկելու ձևով, պատշաճ ծանուցված և տեղեկացված լինելով այդ մասին, 2025 թվականի փետրվարի 05-ին՝ ժամը 22.13-ի սահմաններում, Երևան քաղաքի Թումանյան փողոցում վարել է Նիսսան մակնիշի 7701077 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության ծառայողի կողմից նույն օրը կազմված վարչական իրավախախտման վերաբերյալ թիվ 8259014030 արձանագրությամբ:
Այսպիսով, Դատարանը գտնում է, որ սույն գործով ձեռք բերված հավաստի ապացույցների համակցությունը բավարար է հիմնավոր կասկածից վեր ապացուցողական չափանիշին համապատասխան հաստատված համարելու մեղադրյալ Լևոն Հախվերդյանի կողմից երկու անգամ տրանսպորտային միջոց վարելը դրանից զրկված լինելու պայմաններում, այդ արարքներն ապացուցված են, ճիշտ են որակված և համապատասխանում է 2 դրվագ ՀՀ քրեական օրենսգրքի 344-րդ հոդվածի 1-ին մասի հատկանիշներին:
Անդրադառնալով մեղադրյալի նկատմամբ նշանակվելիք պատժի հարցին՝ Դատարանն արձանագրում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի մի շարք դրույթներով:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»։
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ։ (․․․)»։
Պատժի նշանակման հիմնական կանոնները սահմանող իրավական նորմերը (նախկին օրենսգրքի) ՀՀ վճռաբեկ դատարանը վերլուծել և դրանց վերաբերյալ իրավական դիրքորոշումներ է հայտնել թիվ ՎԲ-50/07, ՎԲ-124/07, ՎԲ-142/07, ՎԲ-192/07, ՎԲ-201/07, ԱՎԴ2/0059/01/08, ԵԱՔԴ/0078/01/09 ԵԿԴ/0042/01/11, ինչպես նաև մի շարք այլ գործերով կայացված որոշումներում: Վճռաբեկ դատարանի ձևավորած կայուն նախադեպային իրավունքի համաձայն՝ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և այն կատարող անձը կոնկրետ են: Հետևաբար կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, այն կատարող անձի, պատիժը մեղմացնող և ծանրացնող հանգամանքների վերլուծության հիման վրա։
Այսպես` Դատարանը մեղադրյալ Լ․Հախվերդյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հանրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Լ․Հախվերդյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, Դատարանը, որպես Լ․Հախվերդյանի անձը բնութագրող տվյալ հաշվի է առնում այն, որ նա նախկինում դատապարտված է եղել։
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալ Լ․Հախվերդյանի պատասխանատվությունն ու պատիժը մեղմացնող հանգամանք հաշվի է առնում այն, որ նա իրեն լիովին մեղավոր է ճանաչել և տվել խոստովանական ցուցմունքներ, անկեղծորեն զղջացել է կատարած արարքների համար:
Դատարանը, արձանագրում է, որ մեղադրյալ Լ․Հախվերդյանի պատասխանատվությունն ու պատիժը ծանրացնող հանգամանքներ առկա չեն:
Դատարանը գտնում է, որ կատարած արարքների համար մեղադրյալ Լ․Հախվերդյանը ենթակա է պատժի:
Դատարանը, հաշվի առնելով մեղադրյալ Լ․Հախվերդյանի կատարած արարքների՝ հանրության համար վտանգավորության աստիճանն ու բնույթը, նրա անձը բնութագրող, պատասխանատվությունը և պատիժը մեղմացնող հանգամանքները, գտնում է, որ մեղադրյալ Լ․Հախվերդյանն իր կատարած 2 դրվագ ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության համար ենթակա է պատժի տուգանքի ձևով՝ ՀՀ քրեական օրենսգրքի 344-րդ հոդվածի 1-ին մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով և ՀՀ քրեական օրենսգրքի 344-րդ հոդվածի 1-ին մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածի հիման վրա՝ պատիժների լրիվ գումարելու միջոցով, մեղադրյալ Լ․Հախվերդյանի նկատմամբ վերջնական պատիժ նշանակել տուգանք՝ 750․000 (յոթ հարյուր հիսուն հազար) ՀՀ դրամի չափով:
ՀՀ քրեական օրենսգրքի 59-րդ հոդվածի հիման վրա՝ նրա նկատմամբ նշանակված տուգանքը տարաժամկետել 10 (տաս) ամիս ժամկետով և թույլատրել տուգանքը վճարել մաս առ մաս՝ յուրաքանչյուր ամիս 75․000 (յոթանասուն հինգ հազար) ՀՀ դրամի չափով։
Դատարանն արձանագրում է, որ արտավարութային փաստաթուղթ ճանաչված և քրեական գործին կցված փաստաթղթերը պետք է թողնել կցված քրեական գործին՝ դատավճիռն օրինական ուժի մեջ մտնելուց հետո։
Քննարկելով մեղադրյալ Լ․Հախվերդյանի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 347-350-րդ հոդվածներով` Դատարանը

Վ Ճ Ռ Ե Ց

Լևոն Միքայելի Հախվերդյանին մեղավոր ճանաչել 2 դրվագ ՀՀ քրեական օրենսգրքի 344-րդ հոդվածի 1-ին մասով նախատեսված արարքների կատարման մեջ և նրա նկատմամբ պատիժ նշանակել․
ՀՀ քրեական օրենսգրքի 344-րդ հոդվածի 1-ին մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 344-րդ հոդվածի 1-ին մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածի հիման վրա՝ պատիժների լրիվ գումարելու միջոցով, մեղադրյալ Լևոն Միքայելի Հախվերդյանի նկատմամբ վերջնական պատիժ նշանակել տուգանք՝ 750․000 (յոթ հարյուր հիսուն հազար) ՀՀ դրամի չափով:
ՀՀ քրեական օրենսգրքի 59-րդ հոդվածի հիման վրա՝ նրա նկատմամբ նշանակված տուգանքը տարաժամկետել 10 (տաս) ամիս ժամկետով և թույլատրել տուգանքը վճարել մաս առ մաս՝ յուրաքանչյուր ամիս 75․000 (յոթանասուն հինգ հազար) ՀՀ դրամի չափով։
Լևոն Միքայելի Հախվերդյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
Արտավարութային փաստաթղթերը թողնել կցված քրեական գործին դատավճիռն օրինական ուժի մեջ մտնելուց հետո։
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:


ԴԱՏԱՎՈՐ՝ Ս.ԳԶՈԳՅԱՆ