ԵԴ1/1868/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«02» մարտի 2026թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,
Նազիկ Աթոյանի,
մասնակցությամբ`
հանրային մեղադրողներ Սամինե Պետրոսյանի,
Արա Մանուկյանի,
պաշտպան Լյուդվիգ Ավետիսյանի,
մեղադրյալ Արթուր Ավագյանի,

դռնբաց դատական նիստում, արագացված կարգով քննելով քրեական գործն ըստ մեղադրանքի`
Արթուր Հրանտի Ավագյանի՝
ծնված՝ 10.02.1974թ., ազգությամբ հայ, ՀՀ քաղաքացի, ամուսնացած, խնամքին 16 տարեկան անչափահաս, չի աշխատում, միջնակարգ կրթությամբ, դատված, հաշվառված՝ ք. Երևան, Հանրապետության փողոց, 76-րդ շենք, 24-րդ բնակարան հասցեում, բնակվող՝ ք.Երևան, Մաշտոցի պողոտա, 40Ա շենք, 79-րդ բնակարան հասցեում, որպես խափանման միջոց է կիրառվել բացակայելու արգելքը ՀՀ քրեական օրենսգրքի 344-րդ հոդվածի 1-ին մասով,

ՊԱՐԶԵՑ

1. Քրեական գործի դատավարական նախապատմությունը.
2025 թվականի փետրվարի 07-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 1-ին մասով նախաձեռնվել է թիվ 60161325 քրեական վարույթը:
2025 թվականի մայիսի 23-ին ՀՀ դատախազության Երևան քաղաքի Մալաթիա-Սեբաստիա վարչական շրջանի դատախազության ավագ դատախազ Ս. Պետրոսյանի որոշմամբ՝ թիվ 60161325 քրեական վարույթով Արթուր Հրանտի Ավագյանի նկատմամբ ՀՀ քրեական օրենսգրքի 344-րդ հոդվածի 1-րդ մասով հարուցվել է հանրային քրեական հետապնդում:
2025 թվականի հունիսի 06-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/1868/01/25 քրեական գործն ըստ մեղադրանքի՝ Արթուր Հրանտի Ավագյանի՝ ՀՀ քրեական օրենսգրքի 344-րդ հոդվածի 1-ին մասով:
Նույն օրը քրեական գործը էլեկտրոնային եղանակով մակագրվել և 2025 թվականի հունիսի 04-ին հանձնվել է դատավոր Տաթևիկ Մուրադյանին:
2025 թվականի հունիսի 06-ին Դատարանի կողմից որոշում է կայացվել թիվ ԵԴ1/1868/01/25 քրեական գործի վարույթն ստանձնելու և նախնական դատալսումներ նշանակելու մասին։
2. Մեղադրանքի փաստական նկարագրությունը.
Արթուր Հրանտի Ավագյանին մեղադրանք է ներկայացվել ՀՀ քրեական օրենսգրքի 344-րդ հոդվածի 1-ին մասով` այն բանի համար, որ «նա, թիվ 8180269532 որոշմամբ 2024 թվականի հունվարի 12-ից մինչև 2025 թվականի հունվարի 12-ը զրկված լինելով տրանսպորտային միջոցներ վարելու իրավունքից՝ «B» կարգերի, RB139523 համարի վարորդական վկայականից, 2025 թվականի հունվարի 05-ին՝ ժամը 17:00-ի սահմաններում, Երևան քաղաքի Գասպարյան փողոցում վարել է «Օպել» մակնիշի 37 NV 721 հաշվառման համարանիշի ավտոմենքենան, ինչի կապակցութամբ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180416522 արձանագրությունը։»:
3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում մեղադրյալը և պաշտպանը ներկայացրին արագացված վարույթ կիրառելու մասին միջնորդություն:
Մեղադրյալը հայտնեց, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Հանրային մեղադրող Արա Մանուկյանը չառարկեց արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-րդ հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1-րդ հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Արթուր Հրանտի Ավագյանը դատվածություն ունեցող անձ է:
 Միասնական էլեկտրոնային տեղեկատվական համակարգում կատարված հարցման պատասխանի համաձայն՝ ՀՀ պետական եկամուտների կոմիտեի տվյալների շտեմարանում մեղսագրվող հանցանքն ավարտվելու օրվան նախորդող 12 ամիսների ընթացքում Արթուր Հրանտի Ավագյանի ստացած միջին ամսական եկամուտը կազմում է 157.532 ՀՀ դրամ, որի 35 տոկոսը կազմում է 55.136 ՀՀ դրամ:
 Արթուր Հրանտի Ավագյանի մոր կենսաթոշակի վկայականի պատճենը:
 Արթուր Հրանտի Ավագյանի կնոջ առողջական վիճակի վերաբերյալ փաստաթուղթ, համաձայն որի՝վերջինս համարվում է հաշմանդամություն ունեցող անձ:
 Արթուր Հրանտի Ավագյանի երեխայի ծննդյան վկայականի պատճենը, համաձայն որի՝ վերջինի խնամքին է գտնվում 20.05.2009թ. ծնված Հրանտ Արթուրի Ավագյանը:
4. Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
Արթուր Հրանտի Ավագյանը դատվածություն ունեցող անձ է, խնամքին են մայրը, կինը և անչափահաս երեխան, մեղսագրվող հանցանքն ավարտվելու օրվան նախորդող 12 ամիսների ընթացքում նրա ստացած ամսական եկամտի չափը պակաս է նվազագույն աշխատավարձի չափից:
5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Արթուր Հրանտի Ավագյանին վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, ինչպես նաև գտնում է, որ մեղադրյալ Արթուր Հրանտի Ավագյանի արարքի նկատմամբ պետք է կիրառվի ՀՀ քրեական օրենսգրքի 344-րդ հոդվածի 1-ին մասը:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Արթուր Ավագյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը), խնամքին անչափահասի և հաշմանդամություն ունեցող անձի առկայությունը:
Դատարանը միաժամանակ արձանագրում է, որ Արթուր Ավագյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածի 1-ին մասով նախատեսված հանգամանք պետք է դիտել հանցանքը դատվածություն ունեցող անձի կողմից կատարելը:
Դատարանն արձանագրում է նաև, որ Արթուր Ավագյանի անձը բնութագրող հանգամանք է նույնաբնույթ արարքի կատարման համար դատվածություն ունենալը:
Դատարանը գտնում է, որ կատարած հանցանքի համար մեղադրյալ Արթուր Ավագյանը ենթակա է պատժի։
Դատարանը, հաշվի առնելով Արթուր Ավագյանի կատարած հանցանքի հանգամանքները, պատասխանատվությունը և պատիժը մեղմացնող հանգամանքների առկայությունը, պատասխանատվությունը և պատիժը ծանրացնող հանգամանքի առկայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 1-ին մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործության կատարման համար առավել խիստ պատիժ նշանակելու անհրաժեշտությունը բացակայում է, Դատարանը գտնում է, որ Արթուր Ավագյանի նկատմամբ ՀՀ քրեական օրենսգրքի 344-րդ հոդվածի 1-ին մասով հիմնական պատիժ պետք է նշանակել տուգանք՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով:
Դատարանը միաժամանակ գտնում է, որ ՀՀ քրեական օրենսգրքի 75-րդ հոդվածի կիրառմամբ Արթուր Հրանտի Ավագյանի նկատմամբ սույն դատավճռով նշանակված պատժին՝ 450.000 (չորս հարյուր հիսուն հազար) ՀՀ դրամի չափով տուգանքին պետք է լրիվ գումարել Տավուշի մարզի առաջին ատյանի ընդհանուր իրավասության դատարանի 2024 թվականի հոկտեմբերի 08-ի թիվ ՏԴ/0314/01/24 դատավճռով նշանակված պատիժը՝ 708․185 (յոթ հարյուր ութ հազար հարյուր ութսունհինգ) ՀՀ դրամի չափով տուգանքը, և վերջնական պատիժ նշանակել տուգանք՝ 1.158.185 մեկ միլիոն հարյուր հիսունութ հազար հարյուր ութսունհինգ ՀՀ դրամի չափով:
Միաժամանակ հաշվի առնելով Արթուր Ավագյանի եկամուտների վերաբերյալ գործում առկա տվյալները, Դատարանը գտնում է, որ նրա նկատմամբ նշանակվող տուգանքի վճարումը պետք է տարաժամկետել և նրան թույլատրել տուգանքը վճարել մաս առ մաս՝ 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը միաժամանակ գտնում է, որ կատարած հանցանքի համար Արթուր Ավագյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-14-րդ կետերով նշված հարցերին անդրադառնալու անհրաժեշտությունը սույն քրեական վարույթով բացակայում է։
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ Արթուր Ավագյանի նկատմամբ որպես խափանման միջոց ընտրված բացակայելու արգելքը պետք է թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Արթուր Ավագյանից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4 հոդվածի 3-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 347-350-րդ, 352-353-րդ, 364-րդ, 464.4 և 464.5 հոդվածներով` Դատարանը

ՎՃՌԵՑ

Արթուր Հրանտի Ավագյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարման մեջ, և նրա նկատմամբ պատիժ նշանակել տուգանք՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով:
ՀՀ քրեական օրենսգրքի 75-րդ հոդվածի կիրառմամբ Արթուր Հրանտի Ավագյանի նկատմամբ սույն դատավճռով նշանակված պատժին՝ 450.000 (չորս հարյուր հիսուն հազար) ՀՀ դրամի չափով տուգանքին լրիվ գումարել Տավուշի մարզի առաջին ատյանի ընդհանուր իրավասության դատարանի 2024 թվականի հոկտեմբերի 08-ի թիվ ՏԴ/0314/01/24 դատավճռով նշանակված պատիժը՝ 708․185 (յոթ հարյուր ութ հազար հարյուր ութսունհինգ) ՀՀ դրամի չափով տուգանքը, և վերջնական պատիժ նշանակել տուգանք՝ 1.158.185 մեկ միլիոն հարյուր հիսունութ հազար հարյուր ութսունհինգ ՀՀ դրամի չափով:
Արթուր Հրանտի Ավագյանին թույլատրել որպես վերջնական պատիժ նշանակված 1.158.185 մեկ միլիոն հարյուր հիսունութ հազար հարյուր ութսունհինգ ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Արթուր Հրանտի Ավագյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով նախատեսված հիմքերի, կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ