ԵԴ1/1879/01/25

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ
ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

2025թ․ հոկտեմբերի <<14>> ք․Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

Նախագահող դատավոր Ա.Հովհաննիսյան
դատական նիստերի քարտուղար Մ․Հովհաննիսյան
հանրային մեղադրող Ա.Բադալյան
պաշտպան Մ.Մանգասարյան
տուժող Ա.Հարությունյան

դռնբաց դատական նիստում քննեց քրեական վարույթն ըստ մեղադրանքի՝ Արմեն Բորիսի Եղիազարյանի՝ ծնված 1982 թվականի սեպտեմբերի 27-ին Երևան քաղաքում, ազգությամբ հայ, ՀՀ քաղաքացի, նախկինում չդատապրտված, բարձրագույն կրթությամբ, չի աշխատում, հաշվառված և բնակվող՝ Երևան քաղաքի Մանթաշյան փողոցի 4/6 շենքի 20-րդ բնակարանում: Հանրային քրեական հետապնդում է հարուցվել ՀՀ քրեական օրենսգրքի 195-րդ հոդվածի 2-րդ մասի 6-րդ կետով․ որպես խափանման միջոց է կիրառվել բացակայելու արգելքը:
Վարութային նախապատմությունը․
2024 թվականի օգոստոսի 27-ին Անի Հարությունյանը հանցագործության մասին բանավոր հաղորդում է ներկայացրել ՀՀ ՆԳՆ ոստիկանության ՀՈԳՎ Շենգավիթի բաժին:
2024 թվականի օգոստոսի 27-ի ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնի քննիչ Ն.Մարգարյանի արձանագրությամբ ՀՀ քրեական օրենսգրքի 195-րդ հոդվածի 2-րդ մասի 6-րդ կետի հատկանիշներով նախաձեռնվել է 11170624 քրեական վարույթը:
2024 թվականի օգոստոսի 27-ի ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնի քննիչ Ն.Մարգարյանի որոշմամբ Անի Կամոյի Հարությունյանը տուժող է ճանաչվել:
2025 թվականի ապրիլի 30-ի ՀՀ դատախազության Երևան քաղաքի Շենգավիթ վարչական շրջանի դատախազության դատախազ Ա.Բադալյանի որոշմամբ Արմեն Բորիսի Եղիազարյանի նկատմամբ հանրային քրեական հետապնդում է հարուցվել պատժի սպառնալիքով արգելված, մեղավորությամբ կատարված այն արարքի համար, որ նա 2024 թվականի օգոստոսի 23-ին՝ ժամը 22:00-ի սահմաններում, Երևան քաղաքի Մանթաշյան փողոցի 4/6 շենքի 20-րդ բնակարանում ֆիզիկական ներգործություն է իրականացրել իր կնոջ՝ Անի Կամոյի Հարությունյանի նկատմամբ:
Այսպես՝ Արմեն Եղիազարյանը, 2024 թվականի օգոստոսի 23-ին՝ ժամը 22:00-ի սահմաններում, Երևան քաղաքի Մանթաշյան փողոցի 4/6 շենքի 20 բնակարանում, կենցաղային հարցերի շուրջ առաջացած վիճաբանության ժամանակ ֆիզիկական ներգործություն է իրականացրել իր կնոջ՝ Անի Հարությունյանի նկատմամբ, այն է՝ բռունցքներով դիտավորությամբ հարվածներ է հասցրել վերջինի դեմքին, գլխին և մարմնի տարբեր մասերին՝ պատճառելով ձախ հետականջային, զույգ բազուկների շրջանների արյունազեղումների, ձախ քունք-ստործնոտային հոդի ենթասուր տրավմատիկ բորբոքման ձևով՝ առողջությանը թեթև վնասի հատկանիշներ չպարունակող մարմնական վնասվածքներ:
Այսինքն՝ Արմեն Բորիսի Եղիազարյանի արարքում առկա է ՀՀ քրեական օրենսգրքի 195-րդ հոդվածի 2-րդ մասի 6-րդ կետով նախատեսված հանցանքի կատարումը վկայող փաստեր:
2025 թվականի մայիսի 1-ի ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնի քննիչ Ն.Մարգարյանի որոշմամբ Արմեն Բորիսի Եղիազարյանի նկատմամբ որպես խափանման միջոց է կիրառվել բացակայելու արգելքը:
2025 թվականի մայիսի 27-ի ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնի քննիչ Ն.Մարգարյանի որոշմամբ Ա.Պապիկյանը տուժողի լիազոր ներկայացուցիչ է ճանաչվել:
2025 թվականի հունիսի 3-ին թիվ 11170624 քրեական գործը մեղադրական եզրակացությամբ ուղարկվել է Երևան քաղաքի առաջին ատյանի ընդհանուր իրավասության քրեական դատարան։
Արագացված դատական քննություն.
Նախնական դատալսումների ընթացքում պաշտպան Մ.Մանգասարյանը միջնորդեց դատաքննությունն անցկացնել արագացված վարույթի կարգով՝ նկատի ունենալով, որ սույն վարույթի շրջանակում Արմեն Եղիազարյանն իր մեղքն ընդունել է։
Հանրային մեղադրող Ա.Բադալյանը հրապարակեց մեղադրանքի փաստական հիմքն ու արարքին տրվող իրավական գնահատականը՝ միաժամանակ նշելով, որ չի առարկում արագացված կարգով վարույթի կիրառման դեմ:
Տուժող Անի Հարությունյանը նշեց, որ արագացված վարույթ կիրառելու դեմ առարկություններ չունի:
Մեղադրյալ Արմեն Եղիազարյանը հայտնեց, որ իրեն պարզ է առաջադրված մեղադրանքը, դրա հետ համաձայն է: Պնդում է ներկայացված միջնորդությունը, այն ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով վարույթի անցկացնելու հետևանքները:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-ին հոդվածի 1-ին մասով նախատեսված հիմքը և բացակայում են սույն օրենսգրքի 464.1-ին հոդվածի 2-րդ մասով նախատեսված` արագացված վարույթի կիրառումը բացառող հանգամանքները, որոշում է կայացրել արագացված վարույթ կիրառելու միջնորդությունը բավարարելու մասին։
Հետևաբար, Դատարանը գտնում է, որ Արմեն Բորիսի Եղիազարյանը կատարել է արարք՝ նախատեսված ՀՀ քրեական օրենսգրքի 195-րդ հոդվածի 2-րդ մասի 6-րդ կետով:
Դատարանի իրավական վերլուծությունները.
Դատարանը, ուսումնասիրելով Արմեն Բորիսի Եղիազարյանի պատասխանատվությունը և պատիժը մեղմացնող ու ծանրացնող հանգամանքները, վերասոցիալականացման և իրավահպատակ վարքագծի ձևավորման համար նշանակություն ունեցող տվյալները, եկավ հետևյալ եզրահանգման.
Արմեն Բորիսի Եղիազարյանի անձը դրականորեն բնութագրող հանգամանք է նախկինում արատավորված՝ դատապարտված չլինելը, բարձրագույն կրթություն ունենալը, մշտական բնակության վայրի առկայությունը և համայնքի բնակիչների կողմից դրականորեն բնութագրվելը:
Դատարանը Արմեն Բորիսի Եղիազարյանի քրեական պատասխանատվություն ու պատիժը մեղմացնող հանգամանք է դիտում մեղքն ընդունելը և կատարածի համար զղջալը:
Բացի այդ, Արմեն Բորիսի Եղիազարյանի պատասխանատվությունն ու պատիժը մեղմացնող հանգամանք է նաև խնամքին երկու անչափահաս երեխայի (Էրիկ Արմենի Եղիազարյան, ծնված՝ 2017 թվականի փետրվարի 20-ին և Էլիզա Արմենի Եղիազարյանի, ծնված՝ 2010 թվականի ապրիլի 29-ին) և առողջական խնդիրներ ունեցող մոր առկայությունը:
Միաժամանակ, պետք է արձանագրել, որ Արմեն Բորիսի Եղիազարյանի պատասխանատվությունն ու պատիժը ծանրացնող հանգամանքներ առկա չեն։
Կատարված արարքի համար մեղադրյալ Արմեն Բորիսի Եղիազարյանը ենթակա է քրեական պատասխանատվության և պատժի։
ՀՀ վճռաբեկ դատարանը 2010 թվականի օգոստոսի 27-ի թիվ ՍԴ/0293/01/09 որոշմամբ դիրքորոշում է հայտնել, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձը բնութագրող տվյալները և, քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ է և բավարար է այդ անձին ուղղելու և նրա կողմից նոր հանցանքի կատարումը կանխելու համար: Պատժի տեսակի և չափի որոշման ժամանակ դատարանը պետք է հաշվի առնի կատարված հանցագործության՝ հանրության համար վտանգավորության աստիճանն ու բնույթը, հանցավորի անձը բնութագրող տվյալները, այդ թվում՝ նրա պատասխանատվությունը մեղմացնող և (կամ) ծանրացնող հանգամանքները:
Դատարանը, հաշվի առնելով Արմեն Բորիսի Եղիազարյանի կատարած արարքի բնույթը և հանրային վտանգավորության աստիճանը, մասնավորապես՝ այն, որ վերջինի կատարած հանցանքը հանդիսանում է ոչ մեծ ծանրության հանցագործություն, այդ թվում՝ նրա գործողությունների վտանգավորության աստիճանը, անձը դրականորեն բնութագրող, պատասխանատվությունն ու պատիժը մեղմացնող հանգամանքների առկայությունը, ծանրացնող հանգամանքների բացակայությանը, ինչպես նաև այն, որ մեղադրյալի կատարած արարքի համար քրեական օրենսգրքի համապատասխան հոդվածի սանկցիայով նախատեսված է պատիժ նաև հանրային աշխատանքների ձևով, իսկ ՀՀ քրեական օրենսգրքի 69-րդ հոդվածի 3-րդ մասի կարգավորմամբ՝ ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները, գտնում է՝ Արմեն Բորիսի Եղիազարյանի նկատմամբ ՀՀ քրեական օրենսգրքի 195-րդ հոդվածի 2-րդ մասի 6-րդ կետով պատիժ պետք է նշանակել հանրային աշխատանքներ՝ 130 (հարյուր երեսուն) ժամ տևողությամբ:
Ընդ որում, պատժի տեսակն ընտրելիս Դատարանի կողմից կարևորվում է նաև դատական նիստի ընթացքում մեղադրյալ Արմեն Եղիազարյանի հայտարարությունը, ըստ որի՝ սոցիալական դրությամբ պայմանավորված չի կարող տուգանքի գումար վճարել, հետևաբար՝ համաձայն է, որ իր նկատմամբ նշանակվի հանրային աշխատանքներ պատժատեսակը:
Ընդ որում, Դատարանը պատասխանատվության և պատժի հարցը որոշելիս կարևորում է նաև այն հանգամանքը, որ տուժող Անի Հարությունյանը դատական նիստի ընթացքում հայտարարեց, որ մեղադրյալի դեմ որևէ բողոք ու պահանջ չունի։
Դատարանը, նկատի ունենալով, որ մեղադրյալը ներկայացրել է երկիրը որոշ ժամանակով լքելու վերաբերյալ միջնորդություն, ինչի հիմքով գտնում է, որ Արմեն Բորիսի Եղիազարյանի նկատմամբ կիրառված խափանման միջոց՝ բացակայելու արգելքը, պետք է վերացնել:
ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը արագացված վարույթ կիրառելու դեպքում, համաձայն նույն օրենսգրքի 464.4-րդ հոդվածի 3-րդ մասի՝ դատապարտված մեղադրյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 276-րդ, 342-րդ, 347-349-րդ, 353-րդ, 364-րդ, 464.1-464.5-րդ հոդվածներով՝ Դատարանը


Վ Ճ Ռ Ե Ց

Արմեն Բորիսի Եղիազարյանին մեղավոր ճանաչել ՀՀ քրեական օրենսգրքի 195-րդ հոդվածի 2-րդ մասի 6-րդ կետով և պատիժ նշանակել հանրային աշխատանքներ՝ 130 (հարյուր երեսուն) ժամ տևողությամբ:
Արմեն Բորիսի Եղիազարյանի նկատմամբ որպես խափանման միջոց կիրառված բացակայելու արգելքը վերացնել:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով):

ԴԱՏԱՎՈՐ Ա.ՀՈՎՀԱՆՆԻՍՅԱՆ