Քրեական գործ թիվ ԵԴ1/1842/01/25


ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ
ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«18» հունիսի 2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահությամբ դատավոր՝ Գ.ԱԲԵԼՅԱՆԻ
քարտուղարությամբ՝ Գ․ԳԱԼՍՏՅԱՆԻ
հանրային մեղադրող՝ Ա․ԲԱՂԴԱՍԱՐՅԱՆԻ
մեղադրյալ՝ Ք․ՄՈՀԱՄՄԵԴԻ
պաշտպան՝ Ա․ՀՈՒՆԱՆՅԱՆԻ
թարգմանիչ՝ Մ․ԶԱՔԱՐՅԱՆԻ
դռնբաց դատական նիստում` արագացված վարույթի կարգով, քննեց քրեական գործն ըստ մեղադրանքի`
Քադմ Ռահիմի Մոհամմեդ Մոհամմեդի՝ ծնված՝ 2001 թվականի նոյեմբերի 22-ին՝ Իրաքում, Իրաքի Հանրապետության քաղաքացի, ազգությամբ՝ արաբ, չամուսնացած, մասնագիտությամբ՝ վարսավիր, իր խոսքերից՝ նախկինում չդատապարտված, կրթությունը՝ 5-ամյա, հաշվառման հասցեն՝ Իրաքի Հանրապետություն, Նասռիա քաղաք, Պատհա շրջան, ՀՀ–ում մշտական բնակության վայր չունի, մեղադրանք է ներկայացվել ՀՀ քրեական օրենսգրքի 44-469-րդ հոդվածի 1-ին և ՀՀ քրեական օրենսգրքի 457-րդ հոդվածի 1-ին մասով, որպես խափանման միջոց է կիրառվել ՀՀ-ից բացակայելու արգելքը։



1․ Գործի դատավարական նախապատմությունը.
2025 թվականի ապրիլի 20-ին ՀՀ ԱԱԾ ՍԶ հետախուզական բաժնի ավագ սպա Ա․Իսկանդարյանը զեկուցագիր է ներկայացրել ՀՀ ԱԱԾ ՍԶ ՍՎՋ «Զվարթնոց» ՍՎ բաժնի պետ Ս․Ավագյանին, որի համաձայն՝ «(...) 2025 թվականի ապրիլի 20-ին, Ստամբուլ-Երևան թիվ 550 չվերթով ՀՀ ժամանած ուղևորը սահմանային վերահսկողություն անցնելու ժամանակ ՀՀ ԱԱԾ ՍԶ աշխատակցին է ներկայացրել Քուվեյթի քաղաքացու՝ Համզա Աբդուլհակիմ (ծնված՝ 1999 թվականի նոյեմբերի 18-ին, անձնագիր՝ P05918451) տվյալներով կեղծ անձնագիր, ինչի ստուգմամբ պարզվել է, որ այն պարունակում է ամբողջական կեղծման հատկանիշներ: Վերջինս փորձել է առանց սահմանված փաստաթղթերի և պատշաճ թույլտվության հատել ՀՀ պետական սահմանը, սակայն նրա դիտավորության մեջ ընդգրկված՝ ՀՀ պետական սահմանն ապօրինի հատելու փորձ կատարելու հանցագործությունն իր կամքից անկախ հանգամանքներով չի իրագործվել, քանի որ բռնվել է սահմանապահ ծառայողների կողմից։ (…)»:
2025 թվականի ապրիլի 20-ին ՀՀ ԱԱԾ ՍԶ հետախուզական բաժնի ավագ սպա Ա․Իսկանդարյանն առերևույթ հանցանքի մասին հետևյալ հաղորդումն է ներկայացրել․ «(...) Իրաքի Հանրապետության քաղաքացի՝ Քադմ Ռահիմ Մոհամմեդ Մոհամմեդը (ծնված՝ 2001 թվականի նոյեմբերի 22-ին, անձնագիր՝ B09770983), նպատակ ունենալով ապօրինի, առանց սահմանված փաստաթղթերի և պատշաճ թույլտվության մուտք գործել ՀՀ՝ Ստամբուլ-Երևան չվերթի սահմանային վերահսկողության ժամանակ ՍԶ զինծառայողին է ներկայացրել իր լուսանկարով, սակայն Համզա Աբդուլհակիմ (ծնված՝ 1999 թվականի նոյեմբերի 18-ին, անձնագիր՝ P05918451) անհատականացնող տվյալներով, իրավաբանական նշանակություն ունեցող, իրավունք վերապահող, Քուվեյթի քաղաքացու ամբողջական կեղծ անձնագիր: Այդ կերպ օգտագործելով պետական լիազոր մարմնի կողմից տրված, իրավունք վերապահող, իրավաբանական նշանակություն ունեցող փաստաթուղթը փորձել է մուտք գործել ՀՀ, սակայն նրա դիտավորության մեջ ընդգրկված` ՀՀ պետական սահմանն ապօրինի հատելու փորձ կատարելու հանցագործությունն իր կամքից անկախ հանգամանքներով չի իրագործվել, քանի որ բռնվել է սահմանապահ ծառայողների կողմից։ (…)։»:
2025 թվականի ապրիլի 20-ին ժամը՝ 06։20-ին, Քադմ Ռահիմ Մոհամմեդ Մոհամմեդը՝ հանցանք կատարած լինելու անմիջականորեն ծագած հիմնավոր կասկածի առկայության հիմքով ՀՀ ԱԱԾ ՍԶ ավագ սպա Ն․Լևոնյանի կողմից ձերբակալվել է և նույն օրը ներկայացվել է վարույթն իրականացնող մարմնին։
Հաղորդման առթիվ՝ 2025 թվականի ապրիլի 20-ին, ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երկրորդ վարչությունում ՀՀ քրեական օրենսգրքի 457-րդ հոդվածի 1-ին մասի և ՀՀ քրեական օրենսգրքի 44-469-րդ հոդվածի 1-ին մասի հատկանիշներով նախաձեռնվել է թիվ 58211425 քրեական վարույթը։
2025 թվականի ապրիլի 20-ին ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երրորդ վարչության ՀԿԳ քննիչ Գ․Մարկոսյանը որոշում է կայացրել Քադմ Ռահիմ Մոհամմեդ Մոհամմեդին՝ հանցանք կատարած լինելու անմիջականորեն ծագած հիմնավոր կասկածի առկայության հիմքով, ձերբակալելու վերաբերյալ։
2025 թվականի ապրիլի 21-ին, թիվ 58211425 քրեական վարույթով հսկող դատախազի կողմից կայացվել է Քադմ Ռահիմ Մոհամմեդ Մոհամմեդի նկատմամբ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով հանրային քրեական հետապնդում հարուցելու մասին որոշում։
2025 թվականի ապրիլի 21-ին ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երրորդ վարչության ՀԿԳ քննիչ Գ․Մարկոսյանը միջնորդություն է ներկայացրել Դատարան՝ մեղադրյալ Քադմ Ռահիմ Մոհամմեդ Մոհամմեդի նկատմամբ խափանման միջոց կալանքը կիրառելու վերաբերյալ։
Դատարանի՝ 2025 թվականի ապրիլի 21-ի որոշմամբ մեղադրյալ Քադմ Ռահիմ Մոհամմեդ Մոհամմեդի նկատմամբ որպես խափանման միջոց է կիրառվել կալանքը՝ երկու ամիս ժամկետով՝ մինչև 2025 թվականի հունիսի 20-ը։
2025 թվականի մայիսի 26-ին, ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երրորդ վարչության ՀԿԳ քննիչ Գ․Մարկոսյանը որոշում է կայացրել թիվ 58211425 քրեական վարույթից Քադմ Ռահիմի Մոհամմեդ Մոհամմեդի վերաբերյալ ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով թիվ 58215625 քրեական վարույթն անջատելու մասին։
2025 թվականի մայիսի 30-ին ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչությունից Դատարան է ստացվել թիվ ԵԴ1/1842/01/25 (նախաքննական համարը՝ 58215625) քրեական գործն ըստ մեղադրանքի Քադմ Ռահիմ Մոհամմեդ Մոհամմեդի՝ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով։
Նույն օրը քրեական գործն էլեկտրոնային եղանակով մակագրվել, իսկ 2025 թվականի հունիսի 2-ին հանձնվել է Դատարանի դատավոր Գ․Աբելյանին։
2025 թվականի հունիսի 5-ին Դատարանի դատավոր Գ․Աբելյանի կողմից որոշում է կայացվել թիվ ԵԴ1/1842/01/25 քրեական գործով վարույթը ստանձնելու և նախնական դատալսումներ նշանակելու մասին։
Դատարանի՝ 2025 թվականի հունիսի 18-ի որոշմամբ՝ մեղադրյալ Քադմ Ռահիմ Մոհամմեդ Մոհամմեդի նկատմամբ կիրառված խափանման միջոց կալանքի ժամկետը երկարաձգվել է 3 (երեք) ամիս ժամկետով։

2. Մեղադրանքի փաստական նկարագրությունը.
Քադմ Ռահիմ Մոհամմեդ Մոհամմեդին մեղադրանք է ներկայացվել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով՝ այն բանի համար, որ. «(…) [Ն]ա, հանդիսանալով Իրաքի Հանրապետության քաղաքացի, առանց սահմանված փաստաթղթերի և պատշաճ թույլտվության Հայաստանի Հանրապետության պետական սահմանն ապօրինի հատելու դիտավորությամբ, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, 2025 թվականի ապրիլի 20-ին Ստամբուլ–Երևան թիվ 550 չվերթով ժամանել է Հայաստանի Հանրապետություն «Զվարթնոց օդանավակայան և օդանավակայանում սահմանային վերահսկողության ժամանակ ՀՀ ԱԱԾ ՍԶ աշխատակցներին է ներկայացրել դեռևս չպարզված ժամակահատվածում և հանգամանքներում ձեռք բերված, պետական լիազոր մարմնի կողմից տրվող, իրավաբանական նշանակության փաստ հավաստող, իրավունք վերապահող, իր լուսանկարով, սակայն Համզա Աբդուլհակիմի (ծնված՝ 18․11․1999թ․) անվամբ P05918451 սերիա-համարի Քուվեյթի քաղաքացու ամբողջական կեղծ անձնագիրը, այդ կերպ շրջանառության մեջ դնելով օգտագործել ակնհայտ կեղծ անձնագիրը, սակայն, ՀՀ ԱԱԾ ՍԶ աշխատակիցների կողմից իրականացված ստուգողական աշխատանքների արդյունքում բացահայտվել է ներկայացված փաստաթղթի կեղծված լինելու փաստը և Քադմ Ռահիմ Մոհամմեդ Մոհամմեդի դիտավորության մեջ ընդգրկված հանցանքը չի իրագործվել նրա կամքից անկախ հանգամանքներով:
Այսպիսով, Քադմ Ռահիմ Մոհամմեդ Մոհամմեդին մեղսագրվում է հանցավոր արարքների կատարում, որոնք նախատեսված են ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով: (...)»:

3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում մեղադրյալ Քադմ Ռահիմ Մոհամմեդ Մոհամմեդը ներկայացրեց արագացված վարույթ կիրառելու մասին միջնորդություն՝ հայտնելով, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպան՝ Ա․Հունանյանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Հանրային մեղադրող Ա․Բաղդասարյանը չառարկեց արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-ին հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1-ին հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
- ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանի 2025 թվականի ապրիլի 20-ի Ձև 8 տեղեկանքը , համաձայն որի՝ Քադմ Ռահիմ Մոհամմեդ Մոհամմեդը նախկինում դատապարտված չի եղել,
- 2025 թվականի ապրիլի 20-ի՝ անձի ձերբակալման արձանագրությունը , որի համաձայն՝ նույն օրը, ժամը՝ 06։20-ին, Քադմ Ռահիմ Մոհամմեդ Մոհամմեդը հանցանք կատարած լինելու անմիջականորեն ծագած հիմնավոր կասկածի հիմքով ձերբակալվել է,
- 2025 թվականի ապրիլի 20-ի՝ ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երրորդ վարչության ՀԿԳ քննիչ Գ․Մարկոսյանի որոշումը , որի համաձայն՝ Քադմ Ռահիմ Մոհամմեդ Մոհամմեդը ձերբակալվել է հանցանք կատարած լինելու անմիջականորեն ծագած հիմնավոր կասկածի առկայության հիմքով,
- մեղադրյալ Քադմ Ռահիմ Մոհամմեդ Մոհամմեդի՝ 2025 թվականի ապրիլի 21-ին որպես մեղադրյալ հարցաքննության արձանագրությունը , համաձայն որի՝ վերջինս ընդունել է իրեն առաջադրված մեղադրանքը՝ զղջալով կատարվածի համար,
- Դատարանի՝ 2025 թվականի ապրիլի 21-ի, թիվ ԵԴ1/0755/06/25 որոշումը , որի համաձայն՝ մեղադրյալ Քադմ Ռահիմ Մոհամմեդ Մոհամմեդի նկատմամբ որպես խափանման միջոց է ընտրվել կալանքը՝ 2 (երկու) ամիս ժամկետով։

4.Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում՝ Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
- Քադմ Ռահիմ Մոհամմեդ Մոհամմեդը նախկինում դատապարտված չի եղել,
- Քադմ Ռահիմ Մոհամմեդ Մոհամմեդն ունի 5-ամյա կրթություն,
- Քադմ Ռահիմ Մոհամմեդ Մոհամմեդը մասնագիտությամբ վարսավիրի է,
- Ներկայացված մեղադրանքում Քադմ Ռահիմ Մոհամմեդ Մոհամմեդն իրեն լիովին մեղավոր է ճանաչել և զղջացել կատարածի համար։

5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Քադմ Ռահիմ Մոհամմեդ Մոհամմեդին վերագրվող փաստական հանգամանքները (արարքները), այդ արարքների քրեական հակաիրավականու¬թյունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ, ինչպես նաև գտնում է, որ մեղադրյալի արարքների նկատմամբ պետք է կիրառվի ՀՀ քրեական օրենսգրքի 457-րդ հոդվածի 1-ին մասը և ՀՀ քրեական օրենսգրքի 44-469-րդ հոդվածի 1-ին մասը։
Դատարանի կողմից հաստատված փաստական հանգամանքների հիման վրա՝ Դատարանը գտնում է, որ Քադմ Ռահիմ Մոհամմեդ Մոհամմեդի անձը բնութագրող հանգամանքներ են 5-ամյա կրթություն ունենալը և նախկինում դատապարտված չլինելը։
Դատարանը, ղեկավարվելով ՀՀ քրեական օրենսգրքի (այսուհետ՝ նաև Օրենսգիրք) 70-րդ հոդվածով գտնում է, որ Քադմ Ռահիմ Մոհամմեդ Մոհամմեդի պատասխանատվությունն ու պատիժը մեղմացնող հանգամանք պետք է դիտել՝ ներկայացված մեղադրանքում իրեն լիովին մեղավոր ճանաչելը, կատարած արարքների համար զղջալը ։
Դատարանը միաժամանակ արձանագրում է, որ Քադմ Ռահիմ Մոհամմեդ Մոհամմեդի պատասխանատվությունն ու պատիժը ծանրացնող՝ Օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Դատարանը գտնում է, որ կատարած հանցանքի համար մեղադրյալ Քադմ Ռահիմ Մոհամմեդ Մոհամմեդը ենթակա է պատժի։
Պատիժ նշանակելու հարցի համատեքստում Դատարանը հարկ է համարում արձանագրել հետևյալը՝
Օրենսգրքի 55-րդ հոդվածի համաձայն՝ «1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»։
Օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները»։
Օրենսգրքի 73-րդ հոդվածի 1-ին մասի համաձայն՝
«Չավարտված հանցագործության համար պատիժ նշանակելիս հաշվի են առնվում հանցավորի արարքի բնույթն ու վտանգավորության աստիճանը, հանցավոր մտադրության իրականացման աստիճանը և այն հանգամանքները, որոնց հետևանքով հանցագործությունն ավարտին չի հասցվել: (...)»։
Վճռաբեկ դատարանը մշտապես ընդգծել է, որ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ։ Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են։ Հետևաբար, կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի , հանցավորի անձի, պատիժը մեղմացնող և ծանրացնող հանգամանքների վերլուծության հիման վրա` ելնելով պատժի նպատակների իրացումն ապահովելու անհրաժեշտությունից ։
Մասնավորապես՝ Վճռաբեկ դատարանն ընդգծել է, որ հանցանքի հանրային վտանգավորության բնույթն ու աստիճանը ճիշտ գնահատելու և հանցավորի նկատմամբ համաչափ պատիժ նշանակելու համար անհրաժեշտ է, ի թիվս այլնի, հատուկ ուշադրություն դարձնել հանցավոր վարքագծի դրսևորման եղանակին, հանցանքի կատարման գործիքին և հանցագործության իրադրությանը, պատճառված վնասի բնույթին, արարքի նկատմամբ անձի հոգեբանական վերաբերմունքին, հանցագործության նպատակին և շարժառիթին: Այս առումով Վճռաբեկ դատարանը փաստել է, որ անձի արարքում հանցակազմը որակյալ դարձնող մեկից ավելի հանգամանքների առկայությունը կարող է վկայել ինչպես հանցագործության, այնպես էլ հանցավորի անձի հանրային բարձր վտանգավորության մասին, հետևաբար այն պետք է համաչափ գնահատականի արժանանա դատարանի կողմից և հաշվի առնվի պատիժ նշանակելիս :
Հիմքում ունենալով վերոնշյալը և հաշվի առնելով մեղադրյալ Քադմ Ռահիմ Մոհամմեդ Մոհամմեդի կատարած հանցանքների հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքը, պատասխանատվությունը և պատիժը ծանրացնող հանգամանքների բացակայու¬թյունը, Օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ Օրենսգրքի 457-րդ հոդվածի 1-ին մասի և 469-րդ հոդվածի 1-ին մասի սանկցիաներով որպես հիմնական պատիժ է նախատեսված նաև տուգանքի ձևով և սույն դեպքում առավել խիստ պատիժ նշանակելու հիմքերը բացակայում են, գտնում է, որ Օրենսգրքի 77-րդ հոդվածի վերաբերելի կանոնների կիրառմամբ և Օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար՝ վերջինիս նկատմամբ՝
- Օրենսգրքի 457-րդ հոդվածի 1-ին մասով նախատեսված հանցանքի կատարման համար որպես հիմնական պատիժ պետք է նշանակել տուգանքը՝ հանցանքը կատարելու պահին նվազագույն աշխատավարձի տասնապատիկի՝ 750.000 (յոթ հարյուր հիսուն հազար) ՀՀ դրամի չափով (10x75․000)։
- Օրենսգրքի 44-469-րդ հոդվածի 1-ին մասով նախատեսված հանցանքի կատարման համար, որպես հիմնական պատիժ պետք է նշանակել տուգանքը՝ հանցանքը կատարելու պահին նվազագույն աշխատավարձի քսանաապատիկի՝ 1․500.000 (մեկ միլիոն հինգ հարյուր հազար) ՀՀ դրամի չափով (20x75․000)։
Տուգանքի հաշվարկման կարգի վերաբերյալ Դատարանի նախորդ պարբերություններում նշված հետևությունները պայմանավորված այն հանգամանքով, որ հանցանքն ավարտվելու օրվան նախորդող 12 ամիսների ընթացքում մեղադրյալ Քադմ Ռահիմ Մոհամմեդ Մոհամմեդը չի ունեցել եկամուտ (այդպիսի տվյալներ առկա չեն վարույթի նյութերում), ուստի Դատարանը գտնում է, որ վերջինիս նկատմամբ տուգանք պատժատեսակի չափը հաշվարկելիս որպես ելակետ պետք է ընդունել նրա կողմից հանցանք կատարելու պահին գործող Հայաստանի Հանրապետությունում սահմանված նվազագույն աշխատավարձի չափը, այսինքն՝ 75.000 (յոթանասունհինգ հազար) ՀՀ դրամը։
Դատարանը, հաշվի առնելով, որ մեղադրյալ Քադմ Ռահիմ Մոհամմեդ Մոհամմեդը հանդիսանում է Իրաքի Հանրապետության քաղաքացի, ինչպես նաև այն, որ բացակայում են Օրենսգրքի 62-րդ հոդվածի 6-7-րդ մասով բացառող հանգամանքները և հիմքում ունենալով սույն գործի փաստական տվյալների ամբողջությունը, գտնում է, որ պատժի նպատակների իրականացումը՝ հատկապես համանման հանցանքների կանխումը, հնարավոր է մեղադրյալի նկատմամբ Օրենսգրքի 44-469-րդ հոդվածի 1-ին մասով որպես հիմնական պատիժ նշանակված 1․500.000 (մեկ միլիոն հինգ հարյուր հազար) ՀՀ դրամի չափով տուգանքին լրացուցիչ պատիժ միացնելու եղանակով, այն է՝ օտարերկրյա քաղաքացուն Հայաստանի Հանրապետության տարածքից վտարելու, տվյալ դեպքում՝ մեղադրյալին ՀՀ-ից վտարելով Իրաքի Հանրապետություն՝ 5 (հինգ) տարի ժամկետով։
Դատարանը գտնում է, որ Օրենսգրքի 74-րդ հոդվածով սահմանված կարգով՝ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով նշանակված պատիժները լրիվ գումարելու միջոցով՝ Քադմ Ռահիմ Մոհամմեդ Մոհամմեդի նկատմամբ վերջնական պատիժ պետք է նշանակել տուգանք՝ նվազագույն աշխատավարձի երեսնապատիկի չափով 2.250.000 (երկու միլիոն երկու հարյուր հիսուն հազար) ՀՀ դրամի չափով՝ ՀՀ-ից վերջինիս վտարելով Իրաքի Հանրապետություն՝ 5 (հինգ) տարի ժամկետով։
Օրենսգրքի 79-րդ հոդվածի 4-րդ մասի համաձայն՝ «Անազատության մեջ գտնվող անձի նկատմամբ տուգանքի (...) ձևով հիմնական պատիժ նշանակելիս դատարանը, հաշվի առնելով մինչև դատավճիռ կայացնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը, մեղմացնում է նշանակված պատիժը կամ ազատում է պատիժը կրելուց»:
Ղեկավարվելով Օրենսգրքի 79-րդ հոդվածի 4-րդ մասով և հաշվի առնելով Քադմ Ռահիմ Մոհամմեդ Մոհամմեդի 59 (հիսունինը) օր անազատության մեջ գտնվելու հանգամանքը՝ Դատարանը գտնում է, որ մեղադրյալի նկատմամբ նշանակված պատիժը պետք է մեղմացնել և նշանակված տուգանքի չափից համամասնորեն նվազեցնել 1․475․000 (մեկ միլիոն չորս հարյուր յոթանասունհինգ հազար) ՀՀ դրամը (59x25.000) ՝ վերջնական պատիժ նշանակելով 775․000 (յոթ հարյուր յոթանասունհինգ հազար) ՀՀ դրամի չափով տուգանքը։
Դատարանը գտնում է, որ մեղադրյալ Քադմ Ռահիմ Մոհամմեդ Մոհամմեդը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
Անդրադառնալով խափանման միջոցի հարցին՝ Դատարանն արձանագրում է, որ Քադմ Ռահիմ Մոհամմեդ Մոհամմեդի նկատմամբ կիրառված խափանման միջոց կալանքը պետք է փոխել և Քադմ Ռահիմ Մոհամմեդ Մոհամմեդի նկատմամբ խափանման միջոց պետք է կիրառել բացակայելու արգելքը` մինչև դատավճռի օրինական ուժի մեջ մտնելը, քանի որ մեղադրական դատավճիռ կայացնելու և տուգանքի ձևով պատիժ նշանակելու պայմաններում առկա է ողջամիտ ենթադրություն առ այն, որ մեղադրյալը կարող է դիմել փախուստի և չկատարել իր վրա դրված պարտականությունները, իսկ նման խափանման միջոցի կիրառումը բավարար է մեղադրյալի փախուստը կանխելու և նրա վրա դրված պարտականությունների կատարումն ապահովելու համար։
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-13-րդ կետերով նշված հարցերին անդրադառնալու անհրաժեշտությունը սույն քրեական գործով բացակայում է։
Դատարանն արձանագրում է նաև, որ դատավճիռն օրինական ուժի մեջ մտնելուց հետո՝ իրեղեն ապացույց ճանաչված՝ Քուվեյթի Հանրապետության նմուշի, P05918451 սերիա-համարի անձնագիրը, ինչպես նաև արտավարութային փաստաթղթերը պետք է պահել քրեական գործի նյութերի հետ՝ դրանք պահելու ամբողջ ընթացքում։
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Քադմ Ռահիմ Մոհամմեդ Մոհամմեդից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4-րդ հոդվածի 3-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 99-րդ, 100-րդ, 276-րդ, 347-350-րդ, 464.4-րդ և 464.5-րդ հոդվածներով` Դատարանը

ՎՃՌԵՑ

1. Քադմ Ռահիմի Մոհամմեդ Մոհամմեդին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով նախատեսված հանցանքների կատարման մեջ։
2. ՀՀ քրեական օրենսգրքի 457-րդ հոդվածի 1-ին մասով նախատեսված հանցանքի կատարման համար Քադմ Ռահիմի Մոհամմեդ Մոհամմեդի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի տասնապատիկի՝ 750.000 (յոթ հարյուր հիսուն հազար) ՀՀ դրամի չափով։
3. ՀՀ քրեական օրենսգրքի 44-469-րդ հոդվածի 1-ին մասով նախատեսված հանցանքի կատարման համար Քադմ Ռահիմի Մոհամմեդ Մոհամմեդի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի քսանաապատիկի՝ 1․500.000 (մեկ միլիոն հինգ հարյուր հազար) ՀՀ դրամի չափով՝ ՀՀ-ից վտարելով Իրաքի Հանրապետություն՝ 5 (հինգ) տարի ժամկետով։
4. ՀՀ քրեական օրենսգրքի 74-րդ հոդվածով սահմանված կարգով՝ հանցագործությունների համակցությամբ նշանակված պատիժները լրիվ գումարելու միջոցով՝ ՀՀ քրեական օրենսգրքի 457-րդ հոդվածի 1-ին մասով որպես պատիժ նշանակված՝ 750.000 (յոթ հարյուր հիսուն հազար) ՀՀ դրամ տուգանքը գումարել ՀՀ քրեական օրենսգրքի 44-469-րդ հոդվածի 1-ին մասով որպես պատիժ նշանակված՝ 1․500.000 (մեկ միլիոն հինգ հարյուր հազար) ՀՀ դրամի չափով տուգանքին՝ վերջնական պատիժ նշանակելով տուգանք՝ 2.250.000 (երկու միլիոն երեք հարյուր հիսուն հազար) ՀՀ դրամի չափով՝ ՀՀ-ից Քադմ Ռահիմի Մոհամմեդ Մոհամմեդին վտարելով Իրաքի Հանրապետություն՝ 5 (հինգ) տարի ժամկետով։
5. ՀՀ քրեական օրենսգրքի 79-րդ հոդվածի 4-րդ մասի կիրառմամբ Քադմ Ռահիմի Մոհամմեդ Մոհամմեդի նկատմամբ նշանակված հիմնական պատիժը մեղմացնել՝ նկատի ունենալով վերջինիս կողմից 59 (հիսունինը) օր փաստացի անազատության մեջ գտնվելու ժամանակահատվածը և Քադմ Ռահիմի Մոհամմեդ Մոհամմեդի նկատմամբ որպես հիմնական պատիժ նշանակել տուգանքը 775 000 (յոթ հարյուր յոթանասունհինգ հազար) ՀՀ դրամի չափով։
6. ՀՀ քրեական օրենսգրքի 74-րդ հոդվածի 10-րդ մասի կիրառմամբ` Քադմ Ռահիմի Մոհամմեդ Մոհամմեդի նկատմամբ նշանակված հիմնական պատժին՝ 775 000 (յոթ հարյուր յոթանասունհինգ հազար) ՀՀ դրամ տուգանքին, գումարել Քադմ Ռահիմի Մոհամմեդ Մոհամմեդի նկատմամբ որպես լրացուցիչ պատիժ նշանակված Հայաստանի Հանրապետության տարածքից վտարելը, և վերջինիս նկատմամբ վերջնական պատիժ նշանակել տուգանքը՝ 775 000 (յոթ հարյուր յոթանասունհինգ հազար) ՀՀ դրամի չափով և Հայաստանի Հանրապետության տարածքից վտարելը՝ 5 (հինգ) տարի ժամկետով:
7. Մեղադրյալ Քադմ Ռահիմի Մոհամմեդ Մոհամմեդի նկատմամբ կիրառված խափանման միջոցը՝ կալանքը, վերացնել և վերջինիս նկատմամբ խափանման միջոց կիրառել բացակայելու արգելքը՝ նրան անհապաղ ազատ արձակելով դատական նիստերի դահլիճից։
8. Դատավճիռն օրինական ուժի մեջ մտնելուց հետո վերացնել Քադմ Ռահիմի Մոհամմեդ Մոհամմեդի նկատմամբ կիրառված խափանման միջոցը՝ բացակայելու արգելքը։
9. Դատավճռի օրինական ուժի մեջ մտնելուց հետո՝ իրեղեն ապացույց ճանաչված Քուվեյթի Հանրապետության նմուշի, P05918451 սերիա-համարի անձնագիրը, ինչպես նաև արտավարութային փաստաթղթերը պահել քրեական գործի նյութերի հետ՝ դրանք պահելու ամբողջ ընթացքում։
10. Վարութային ծախսերի հարցը համարել լուծված:
11. Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում, սակայն այն չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով:


ԴԱՏԱՎՈՐ՝ Գ․ԱԲԵԼՅԱՆ