ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«23» ապրիլի 2026թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)
նախագահությամբ՝
դատավոր Տաթևիկ Մուրադյանի,


քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրողներ Էլեն Անանյանի,
Արմեն Երիցյանի,
պաշտպան Անահիտ Սաղաթելյանի,
մեղադրյալ Վարդան Աղաջանյանի,

դռնբաց դատական նիստում քննելով քրեական գործն ըստ մեղադրանքի՝
Վարդան Ոսկանի Աղաջանյանի՝
(ծնված՝ ■, ազգությամբ հայ, ՀՀ քաղաքացի, չամուսնացած, աշխատում է «Կոկա-Կոլա ՀԲՔ Արմենիա» ՓԲԸ-ում՝ որպես հաստոցի օպերատոր, բարձրագույն կրթությամբ, նախկինում չդատված, հաշվառված և բնակվող՝ ■ որպես խափանման միջոց է կիրառվել բացակայելու արգելքը) ՀՀ քրեական օրենսգրքի 396-րդ հոդվածի 1-ին մասով,

ՊԱՐԶԵՑ

1. Քրեական գործի դատավարական նախապատմությունը.
2025 թվականի մարտի 05-ին ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում ՀՀ քրեական օրենսգրքի 396-րդ հոդվածի 1-ին մասով նախատեսված հանցագործության հատկանիշներով նախաձեռնվել է թիվ 14138925 քրեական վարույթը:
2025 թվականի մարտի 07-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Է. Անանյանի որոշմամբ՝ թիվ 14138925 քրեական վարույթով Վարդան Ոսկանի Աղաջանյանի նկատմամբ ՀՀ քրեական օրենսգրքի 396-րդ հոդվածի 1-ին մասով հարուցվել է հանրային քրեական հետապնդում:
Նախաքննության մարմնի՝ 2025 թվականի մայիսի 22-ի որոշմամբ թիվ 14138925 քրեական վարույթից անջատվել է մեղադրյալ Վարդան Ոսկանի Աղաջանյանի վերաբերյալ մասը, և անջատված մասին շնորհվել է թիվ 14186225 քրեական վարույթի համարը:
2025 թվականի մայիսի 30-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/1838/01/25 քրեական գործն ըստ մեղադրանքի՝ Վարդան Ոսկանի Աղաջանյանի՝ ՀՀ քրեական օրենսգրքի 396-րդ հոդվածի 1-ին մասով:
Նույն օրը քրեական գործը էլեկտրոնային եղանակով մակագրվել և 2025 թվականի հունիսի 02-ին հանձնվել է դատավոր Տաթևիկ Մուրադյանին:
2025 թվականի հունիսի 04-ին Դատարանի կողմից որոշում է կայացվել թիվ ԵԴ1/1838/01/25 քրեական գործի վարույթն ստանձնելու և նախնական դատալսումներ նշանակելու մասին։
2026 թվականի մարտի 24-ին Դատարանը թիվ ԵԴ1/1838/01/25 քրեական գործով կայացրել է մեղադրական վերդիկտ՝ Վարդան Ոսկանի Աղաջանյանին մեղավոր ճանաչելով ՀՀ քրեական օրենսգրքի 396-րդ հոդվածի 1-ին մասով նախատեսված արարքի կատարման մեջ:
2. Մեղադրանքի փաստական նկարագրությունը.
Վարդան Ոսկանի Աղաջանյանին մեղադրանք է ներկայացվել ՀՀ քրեական օրենսգրքի 396-րդ հոդվածի 1-ին մասով այն բանի համար, որ «նա առանց իրացնելու նպատակի ապօրինի ձեռք է բերել և ապօրինի պահել զգալի չափերով թմրամիջոց:
Այսպես՝
Վարդան Ոսկանի Աղաջանյանը, խախտելով «Թմրամիջոցների և հոգեմետ /հոգեներգործող/ նյութերի մասին» 2002 թվականի դեկտեմբերի 26-ի ՀՀ օրենքի 11-րդ հոդվածի 2-րդ կետի և ՀՀ կառավարության 2010 թվականի մարտի 18-ի թիվ 270-Ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ թմրամիջոցի շրջանառություն իրականացնելու՝ այն ձեռք բերելու և պահելու թույլտվություն, քննությամբ դեռևս չպարզված հանգամանքներում և ժամանակահատվածում առանց իրացնելու նպատակի ապօրինի ձեռք է բերել և իր մոտ ապօրինի պահել է զգալի չափերի՝ ընդհանուր 0,08 գրամ քաշով «Մեթամֆետամին» տեսակի թմրամիջոց, որը հայտնաբերվել է 2025 թվականի մարտի 5-ին ՀՀ ՆԳՆ ոստիկանության ՔՈԳՎ ԵՔՎ ԹԱՇԴԲ բաժնում կատարված վերջինիս անձնական խուզարկությամբ։»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Դատաքննության ընթացքում մեղադրյալ Վարդան Ոսկանի Աղաջանյանը, օգտվելով իր սահմանադրական իրավունքից, հրաժարվեց ցուցմունք տալ:
(դատական նիստի արձանագրություն)
- Ձերբակալման և անձնական խուզարկություն կատարելու մասին արձանագրությունները, համաձայն որոնց՝ 05.03.2025 թվականին՝ ժամը 15:20-ին, Երևան քաղաքի Ադոնց-Գրիբոյեդով փողոցների խաչմերուկի մոտ ապօրինի թմրանյութ ձեռք բերելու, պահելու և օգտագործելու անմիջականորեն ծագած հիմնավոր կասկածի առկայության հիմքով Վարդան Ոսկանի Աղաջանյանը ձերբակալվել է:
Անձնական խուզարկության արդյունքում Վարդան Ոսկանի Աղաջանյանի մոտից հայտնաբերվել է բյուրեղանման զանգված, կանեփ տեսակի բուսական սերմ, ինչպես նաև այլ իրեր և առարկաներ:
(գ.թ. 9-11, դատական նիստի արձանագրություն)
- Թվային խուզարկություն կատարելու մասին արձանագրությունը, համաձայն որի՝ թվային խուզարկության է ենթարկվել 2025 թվականի մարտի 05-ին Վարդան Ոսկանի Աղաջանյանի անձնական խուզարկությամբ հայտնաբերված և վերցված «Այֆոն» և «Սամսունգ» մոդելի բջջային հեռախոսները: Պարզվել է, որ «Սամսունգ» մոդելի բջջային հեռախոսի մի կողմն ամբողջությամբ էկրանն է, որի վրա առկա են վնասված հատվածներ, էկրանը ճաքճքած է: Բջջային հեռախոսի մյուս կողմը մուգ կապույտ է, հեռախոսի հետնամասի ներքևի կենտրոնական հատվածում առկա են գրառումներ, որոնք մաշվածության պատճառով ընթեռնելի չեն: Այնուհետև համապատասխան ստեղնի միջոցով միացվեց բջջային հեռախոսը և պարզվեց, որ բջջային հեռախոսի էկրանը վնասված լինելու հետևանքով չի աշխատում և բջջային հեռախոսում թվային խուզարկություն կատարելը հնարավոր չէ:
«Այֆոն» մոդելի բջջային հեռախոսի մի կողմն ամբողջությամբ էկրանն է, որի վրա առկա են քերծված և վնասված հատվածներ: Բջջային հեռախոսի մյուս կողմը մոխրագույն է, որի կենտրոնական հատվածում առկա է բջջային հեռախոսի ֆիրմային նշանը, իսկ ներքևի հատվածում գրված է «iPhone» գրառումը: Համապատասխան ստեղնի միջոցով միացվեց բջջային հեռախոսը և պարզվեց, որ բջջային հեռախոսին առկա է ծածկագիր: Վ.Աղաջանյանը հարցաքննության ժամանակ հայտնել է, որ «Այֆոն» մոդելի բջջային հեռախոսի ծածկագիրն է ■: Հավաքելով ■՝ բջջային հեռախոսը բացվեց: Բջջային հեռախոսի կարգավորումներ բաժնի ուսումնասիրությամբ պարզվեց, որ բջջային հեռախոսը «Այֆոն» մոդելի է, որի գործարանային համարներն է՝ 35487309300364: Թվային խուզարկությամբ պարզվեց, որ բջջային հեռախոսում տեղադրված հեռախոսահամարն է՝ ■: «Այֆոն» մոդելի բջջային հեռախոսի SMS հաղորդագրությունների և հեռախոսազանգերի բաժինների ուսումնասիրությամբ քննության համար հետաքրքրություն ներկայացնող տեղեկություններ չպարզվեց: 05.03.2025 թվականին հեռախոսազանգեր են գրանցվել ■ անվանումով գրանցված ■, ■ անվանումով գրանցված ■, ■ անվանումով գրանցված ■, ■ անվանումով գրանցված ■ բաժանորդների հետ, իսկ լուսանկարների պահման համար նախատեսված բաժնում քննության համար հետաքրքրություն ներկայացնող տեղեկություններ չպարզվեց:
Բջջային հեռախոսում առկա են «Instagram», «WhatsApp», «Facebook», «Messenger» և «TikTok» հավելվածներ, որոնցում քննության համար հետաքրքրություն ներկայացնող տեղեկություններ առկա չէին:
Բջջային հեռախոսում առկա է «Telegram» հավելված, որում առկա ■ անվանումներով տելեգրամյան կայքեր, որտեղ առկա են քննության համար հետաքրքրություն ներկայացնող տեղեկություններ, մասնավորապես՝ «GIDRA EREVAN» կայքի վարողի հետ Վ.Աղաջանյանը նամակագրություն է ունեցել, որի ընթացքում Վ.Աղաջանյանը ցանկություն է հայտնել գնելու 0.5 գրամ թմրամիջոց, որի համար էջը վարողի կողմից տրամադրված՝ ■ էլեկտրոնային դրամապանակն է, որին գումար է փոխանցվել /հավանաբար 8344 ՀՀ դրամ/: Այնուհետև կայքը վարողի կողմից ուղարկվել է թմրամիջոցի վայրի վերաբերյալ լուսանկար, որում նշված է թմրամիջոցի գտնվելու վայրը, տեղակայումը:
(գ.թ. 149-157, դատական նիստի արձանագրություն)
- ՀՀ ՆԳՆ ոստիկանության ՔՈԳՎ ԵՔՎ ԹԱՇԴՊ բաժնի ավագ Ք/Ո, ոստիկանության ավագ լեյտենանտ՝ Ռ.Մկրտչյանի կողմից ՀՀ ՆԳՆ ոստիկանության ՔՈԳՎ ԵՔՎ պետ, ոստիկանության գնդապետ Հ.Հարությունյանին ուղղված զեկուցագիրը, համաձայն որի՝ զեկուցագիրն ունի հետևյալ բովանդակությունը.
«Զեկուցում եմ Ձեզ այն մասին, որ 05.03.2025 թ-ին ՀՀ ՆԳՆ ոստիկանության ՔՈԳՎ ԵՔՎ ԹԱՇԴՊ բաժնում օպերատիվ տեղեկություն է ստացվել, որ Վարդան Աղաջանյանը ապօրինի կերպով թմրամիջոց է ձեռք բերում, պահում և օգտագործում: Ձեռնարկված ՕՀ միջոցառումների արդյունքում Վարդան Աղաջանյանը ս/թ մարտի 5-ին Երևան քաղաքի Ադոնց Գրիբայեդով փողոցների խաչմերուկում հայտնվել է մեր տեսադաշտում, մեզ նկատելով՝ փորձում էր դիմել փախուստի, որից հետո ապօրինի թմրամիջոց ձեռք բերելու, պահելու և օգտագործելու անմիջականորեն ծագած հիմնավոր կասկածի առկայության հիմքով նշված վայրից ժամը 15:20-ին վերջինիս ձերբակալվել և տեղափոխվել է ՀՀ ՆԳՆ ոստիկանության ՔՈԳՎ ԵՔՎ: ՀՀ ՆԳՆ ոստիկանության ՔՈԳՎ ԵՔՎ պարզվել է, որ վերջինս հանդիսանում է Վարդան Ոսկանի Աղաջանյանը /ծնվ. ■ բն. ■/: ՀՀ ՆԳՆ ոստիկանության ՔՈԳՎ ԵՔՎ ԹԱՇԴՊ բաժնում Վարդան Ոսկանի Աղաջանյանի անձնական խուզարկությամբ բաճկոնի գրպանից հայտնաբերվել է ծխախոտի տուփ, որի մեջ առկա է եղել զիպ փականով ընդհանուր 0,6 գրամ քաշով սպիտակ բյուրեղանման «Մեթամֆետամին» թմրամիջոցի նմանվող զանգված, բաճկոնի ծոցագրպանից հայտնաբերվել է թվով 7 հատ կանեփ տեսակի բույսի սերմ, իսկ պայուսակից հայտնաբերվել է ծալովի դանակ՝ ընդհանուր 20,5 սմ երկարությամբ, 9 ս/մ շեղբի շեղ երկարությամբ և 2 ս/մ շեղբի լայնությամբ: Զեկուցելով վերոգրյալը խնդրվում է Ձեր կարգադրությունը»:
(գ.թ. 7, դատական նիստի արձանագրություն)
- Դատաքիմիական և դատաբուսաբանական համալիր փորձաքննության թիվ 1036 Ք-25 եզրակացությունը, համաձայն որի՝
1. Փորձաքննությանը ներկայացված պայմանական առաջին փաթեթում առկա 0.08 գրամ քաշով բյուրեղանման զանգվածը հանդիսանում է «Մեթամֆետամին» տեսակի թմրամիջոց,
2. Փորձաքննությանը ներկայացված պայմանական երկրորդ փաթեթում առկա թվով 7 կանեփի բույսերի սերմերը թմրամիջոց չեն հանդիսանում:
(գ.թ. 193-195, դատական նիստի արձանագրություն)
- 2025 թվականի մայիսի 19-ին կազմված զննում կատարելու մասին արձանագրությունը, համաձայն որի՝ զննության է ենթարկվել ՀՀ ՆԳՆ ոստիկանության ՔՈԳՎ ԵՔՎ ԹԱՇԴՊ բաժնի ավագ Ք/Ո, ոստիկանության ավագ լեյտենանտ Ռ.Մկրտչյանի կողմից ՀՀ ՆԳՆ ոստիկանության ՔՈԳՎ ԵՔՎ պետ, ոստիկանության գնդապետ Հ.Հարությունյանին ուղղված զեկուցագիրը:
(գ.թ. 198-199, դատական նիստի արձանագրություն)
- 2025 թվականի մայիսի 19-ին իրեղեն ապացույց ճանաչելու մասին որոշումը, համաձայն որի՝ 0.08 գրամ քաշով բյուրեղանման զանգվածով «Մեթամֆետամին» տեսակի թմրամիջոցը և «Այֆոն» մոդելի բջջային հեռախոսը ճանաչվել են որպես իրեղեն ապացույցներ:
(գ.թ. 196-197, դատական նիստի արձանագրություն)
- 2025 թվականի մայիսի 19-ին արտավարութային փաստաթուղթ ճանաչելու մասին որոշումը, համաձայն որի՝ ՀՀ ՆԳՆ ոստիկանության ՔՈԳՎ ԵՔՎ ԹԱՇԴՊ բաժնի ավագ Ք/Ո, ոստիկանության ավագ լեյտենանտ Ռ.Մկրտչյանի կողմից ՀՀ ՆԳՆ ոստիկանության ՔՈԳՎ ԵՔՎ պետ, ոստիկանության գնդապետ Հ.Հարությունյանին ուղղված զեկուցագիրը ճանաչվել է որպես արտավարութային փաստաթուղթ:
(գ.թ. 200-201, դատական նիստի արձանագրություն)
- ՀՀ քրեական դատավարության օրենսգրքի 334-րդ հոդվածով սահմանված կարգով հետազոտման ենթակա ապացույցների ծավալը լրացնելու արդյունքում վկա Ռուդիկ Մկրտչյանը դատաքննության ընթացքում ցուցմունք տվեց այն մասին, որ մեղադրյալին հիշում է դեմքով: Դեպքի մանրամասները չի հիշում, քանի որ օրական չորսից հինգ նմանատիպ դեպքերի է առնչվում: Ինքը սպասարկում է թմրամիջոցների ապօրինի շրջանառության բաժինը։ Պարզ է, որ մեղադրյալի հետ առնչություն է ունեցել՝ կապված թմրամիջոցների հետ: Հայտնեց, որ չի հիշում, թե որտեղից են ձերբակալել մեղադրյալին: Անձանց ձերբակալելուց հետո տանում են Երևան քաղաքի վարչության ԹԱՇԴՊ բաժին, այնտեղ կազմվում են անհրաժեշտ փաստաթղթերը և ուղարկում քննիչին: Հնարավոր չէ, որ ձերբակալումից հետո ձերբակալվածին չտանեն ԹԱՇԴՊ բաժին:
Հայտնեց, որ Վարդան Աղաջանյանին ձերբակալել են ապօրինի թմրամիջոց պահելու և օգտագործելու անմիջականորեն ծագած հիմնավոր կասկածի հիմքով: Վարդան Աղաջանյանին ձերբակալելու հանգամանքները չի հիշում, սակայն սովորաբար այդ հանգամանքներում անձանց ձերբակալում են, երբ վերջինները անկանոն վարքագիծ են դրսևորում, կամ իրենք նկատում են, որ նրանք ինչ-որ բան են վերցնում:
Հայտնեց, որ անձանց կողմից տարօրինակ վարքագիծ դրսևորելու դեպքում մոտենում են, ճշտում են ինքնությունը և պարզում, թե արդյոք նրանց մոտ առկա են արգելված իրեր: Հայտնեց, որ առանց ընթերակաների մասնակցության անձնական խուզարկություն չեն իրականացնում: Հայտնեց, որ բաժնում անձնական խուզարկությունն իրականացվում է ընթերակաների մասնակցությամբ: Կազմվում է համապատասխան արձանագրություն: Թմրամիջոցի զանգվածը որոշելու համար այն այդ պահին փաթեթով կշռվում է: Եթե թմրամիջոցը կշռված չլիներ, ապա արձանագրության մեջ որևէ թիվ նշված չէր լինի: Հայտնեց, որ բոլոր փաստաթղթերը կազմվել են բաժնում: Չի հիշում կոնկրետ, թե ով է կազմել ձերբակալման մասին արձանագրությունը: Կոնկրետ պատճառ չկա, թե ինչու է զեկուցագրի և անձնական խուզարկության ենթարկելու մասին արձանագրության մեջ առկա որոշակի տարբերություն: Դա կարող է վրիպակի արդյունք լինել: Կոնկրետ չի հիշում, թե Վարդան Աղաջանյանի վարքագծում ինչն է կասկած հարուցել: Վերջինը կարծես փորձել է փախուստի դիմել: Իրենք այդ պահին ոստիկանական համազգեստով չեն եղել: Ուրեմն ստացվում է, որ մեղադրյալն իրենց ճանաչել է: Չի հիշում, թե ինչ կշեռքով են կշռել թմրամիջոցի զանգվածը:
(դատական նիստի արձանագրություն)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Վարդան Ոսկանի Աղաջանյանը նախկինում դատված չի եղել:
 Միասնական էլեկտրոնային տեղեկատվական համակարգում կատարված հարցման պատասխանի համաձայն՝ ՀՀ պետական եկամուտների կոմիտեի տվյալների շտեմարանում մեղսագրվող հանցանքն ավարտվելու օրվան նախորդող 12 ամիսների ընթացքում Վարդան Ոսկանի Աղաջանյանի ստացած միջին ամսական եկամուտը կազմում է 351.929 ՀՀ դրամ, որի 35 տոկոսը կազմում է 123.175 ՀՀ դրամ:

4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Վարդան Ոսկանի Աղաջանյանը, խախտելով «Թմրամիջոցների և հոգեմետ /հոգեներգործող/ նյութերի մասին» 2002 թվականի դեկտեմբերի 26-ի ՀՀ օրենքի 11-րդ հոդվածի 2-րդ կետի և ՀՀ կառավարության 2010 թվականի մարտի 18-ի թիվ 270-Ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ թմրամիջոցի շրջանառություն իրականացնելու՝ այն ձեռք բերելու և պահելու թույլտվություն, քննությամբ դեռևս չպարզված հանգամանքներում և ժամանակահատվածում առանց իրացնելու նպատակի ապօրինի ձեռք է բերել և իր մոտ ապօրինի պահել է զգալի չափերի՝ ընդհանուր 0,08 գրամ քաշով «Մեթամֆետամին» տեսակի թմրամիջոց, որը հայտնաբերվել է 2025 թվականի մարտի 5-ին ՀՀ ՆԳՆ ոստիկանության ՔՈԳՎ ԵՔՎ ԹԱՇԴԲ բաժնում կատարված վերջինիս անձնական խուզարկությամբ:
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Վարդան Ոսկանի Աղաջանյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Վարդան Ոսկանի Աղաջանյանը նախկինում դատապարտված չի եղել, մեղսագրվող հանցանքներն ավարտվելու օրվան նախորդող 12 ամիսների ընթացքում Վարդան Ոսկանի Աղաջանյանի ստացած միջին ամսական եկամուտը կազմում է 351.929 ՀՀ դրամ, որի 35 տոկոսը կազմում է 123.175 ՀՀ դրամ:
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Վարդան Ոսկանի Աղաջանյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Վարդան Ոսկանի Աղաջանյանը կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 396-րդ հոդվածի 1-ին մասը:
Դատարանը, հաստատված համարելով հանցագործությունների և դրանց կատարման մեջ Վարդան Ոսկանի Աղաջանյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
Դատարանը միաժամանակ արձանագրում է, որ Վարդան Աղաջանյանի պատասխանատվությունն ու պատիժը մեղմացնող և ծանրացնող հանգամանքներ առկա չեն:
Որպես Վարդան Աղաջանյանի անձը բնութագրող հանգամանք Դատարանը հաշվի է առնում համասեռ արարքների կատարման համար նախկինում դատված չլինելը։
Դատարանը, հաշվի առնելով Վարդան Ոսկանի Աղաջանյանի կատարած հանցանքի հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքը, պատասխանատվությունը և պատիժը ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 396-րդ հոդվածի 1-ին մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործությունների կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանք՝ անձի ամսական եկամտի վեցապատիկի՝ 739.050 յոթ հարյուր երեսունինը հազար հիսուն ՀՀ դրամի չափով։
ՀՀ քրեական օրենսգրքի 79-րդ հոդվածի 4-րդ մասի կիրառմամբ հիմք ընդունելով մեղադրյալ Վարդան Աղաջանյանի՝ 2025թ. մարտի 05-ից մինչև 2025 թվականի մարտի 07-ն ընկած ժամանակահատվածում անազատության մեջ գտնվելու հանգամանքը՝ Դատարանը գտնում է, որ նրա նկատմամբ նշանակված պատիժը պետք է մեղմացնել և վերջնական պատիժ պետք է նշանակել տուգանք՝ 689.050 վեց հարյուր ութսունինը հազար հիսուն ՀՀ դրամի չափով:
Դատարանը միաժամանակ գտնում է, որ Վարդան Ոսկանի Աղաջանյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Միաժամանակ հաշվի առնելով վերջինիս գույքային դրության վերաբերյալ գործում առկա տվյալները և մեղադրյալի հայտարարությունը՝ Դատարանը գտնում է, որ Վարդան Ոսկանի Աղաջանյանի նկատմամբ նշանակվող տուգանքի վճարումը պետք է տարաժամկետել և նրան թույլատրել որպես վերջնական պատիժ նշանակված՝ 689.050 վեց հարյուր ութսունինը հազար հիսուն ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-13-րդ կետերով նշված հարցերին անդրադառնալու անհրաժեշտությունը սույն քրեական վարույթով բացակայում է:
Անդրադառնալով իրեղեն ապացույցների պահպանման և տնօրինման հարցին՝ Դատարանն արձանագրում է, որ դատավճիռն օրինական ուժի մեջ մտնելուց հետո նախաքննության մարմնի՝ 2025 թվականի մայիսի 19-ի որոշմամբ իրեղեն ապացույց ճանաչված՝ 0.08 գրամ քաշով բյուրեղանման զանգվածով «Մեթամֆետամին» տեսակի թմրամիջոցը պետք է հանձնել ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժին` թիվ 14138925 քրեական վարույթի նյութերին կցելու համար, իսկ «Այֆոն» մոդելի բջջային հեռախոսը պետք է վերադարձնել դրա սեփականատիրոջ տնօրինմանը:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Անդրադառնալով վարութային ծախսերի հարցին՝ Դատարանն արձանագրում է, որ մեղադրյալ Վարդան Ոսկանի Աղաջանյանից հօգուտ Հայաստանի Հանրապետության պետական բյուջեի պետք է գանձել փորձաքննության արժեք կազմող 108.000 հարյուր ութ հազար ՀՀ դրամը՝ որպես վարութային ծախս:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 100-րդ, 167-րդ, 347-350-րդ և 352-353-րդ հոդվածներով` Դատարանը

ՎՃՌԵՑ

Վարդան Ոսկանի Աղաջանյանին մեղավոր ճանաչել ՀՀ քրեական օրենսգրքի 396-րդ հոդվածի 1-ին մասով նախատեսված հանցանքի կատարման մեջ, և նրա նկատմամբ պատիժ նշանակել տուգանք՝ անձի ամսական եկամտի վեցապատիկի՝ 739.050 յոթ հարյուր երեսունինը հազար հիսուն ՀՀ դրամի չափով։
ՀՀ քրեական օրենսգրքի 79-րդ հոդվածի 4-րդ մասի կիրառմամբ Վարդան Ոսկանի Աղաջանյանի նկատմամբ նշանակված պատիժը մեղմացնել և նրա նկատմամբ վերջնական պատիժ նշանակել տուգանք՝ 689.050 վեց հարյուր ութսունինը հազար հիսուն ՀՀ դրամի չափով:
Վարդան Ոսկանի Աղաջանյանին թույլատրել որպես պատիժ նշանակված 689.050 վեց հարյուր ութսունինը հազար հիսուն ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատավճիռն օրինական ուժի մեջ մտնելուց հետո նախաքննության մարմնի՝ 2025 թվականի մայիսի 19-ի որոշմամբ իրեղեն ապացույց ճանաչված՝ 0.08 գրամ քաշով բյուրեղանման զանգվածով «Մեթամֆետամին» տեսակի թմրամիջոցը հանձնել ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժին` թիվ 14138925 քրեական վարույթի նյութերին կցելու համար, իսկ «Այֆոն» մոդելի բջջային հեռախոսը վերադարձնել դրա սեփականատիրոջ տնօրինմանը:
Վարդան Ոսկանի Աղաջանյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել:
Մեղադրյալ Վարդան Ոսկանի Աղաջանյանից հօգուտ Հայաստանի Հանրապետության պետական բյուջեի գանձել փորձաքննության արժեք կազմող 108.000 հարյուր ութ հազար ՀՀ դրամը՝ որպես վարութային ծախս:
Դատավճիռը կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ