ԵԴ1/1830/01/25


Ո Ր Ո Շ Ո Ւ Մ
ՔՐԵԱԿԱՆ ՎԱՐՈՒՅԹ ՍԿՍԵԼԸ ՄԵՐԺԵԼՈՒ ՄԱՍԻՆ

«19» հունիսի 2025թ. քաղ.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև՝ Դատարան)՝ նախագահությամբ դատավոր Հ․Ավագյանի, ուսումնասիրելով Գուրգեն Լալազարի Ղրդիլյանի կողմից ներկայացված թիվ ԵԴ1/1830/01/25 քրեական հայցը,

ՊԱՐԶԵՑ

2025 թվականի մայիսի 30-ին Դատարանում ստացվել է Գուրգեն Լալազարի Ղրդիլյանի կողմից ներկայացված քրեական հայցը, որը նույն օրը մակագրվել է դատավոր Հ․Ավագյանին:
2025 թվականի հունիսի 2-ին Դատարանը որոշում է կայացրել Գուրգեն Լալազարի Ղրդիլյանի կողմից ներկայացված քրեական հայցը վերադարձնելու մասին՝ տրամադրելով տասնօրյա ժամկետ՝ որոշմամբ նշված թերությունները շտկելու և կրկին ներկայացնելու համար։
2025 թվականի հունիսի 18-ին Դատարանում կրկին ստացվել է Գուրգեն Լալազարի Ղրդիլյանի քրեական հայցը։
Ուսումնասիրելով նշված քրեական հայցը և կից ներկայացված նյութերը՝ Դատարանը գտնում է, որ դրա հիման վրա քրեական վարույթ սկսելը պետք է մերժել՝ հետևյալ պատճառաբանություններով․
ՀՀ քրեական դատավարության օրենսգրքի 451-րդ հոդվածի համաձայն՝
«1. Մասնավոր մեղադրանքով վարույթը կարող է նախաձեռնվել այն դեպքում, երբ այն անձը, որը բավարար հիմքեր ունի ենթադրելու, որ Հայաստանի Հանրապետության քրեական օրենսգրքի 15-րդ հոդվածի 1-ին մասով նախատեuված արարքներով իրեն պատճառվել է վնաս, քրեական հայց է ներկայացնում դատարան:
2. Քրեական հայցը կարող է ներկայացնել միայն սույն հոդվածի 1-ին մասով նախատեսված անձը կամ նրա օրինական ներկայացուցիչը:
3. Քրեական հայցը պետք է բովանդակի՝
1) սույն հոդվածի 1-ին մասով նախատեսված անձի անունը, ազգանունը և բնակության կամ հաշվառման վայրը.
2) այն անձի անունը, ազգանունը և բնակության կամ հաշվառման վայրը, որի դեմ ներկայացվել է քրեական հայցը.
3) մեղադրանքի բովանդակությունը, այդ թվում՝ քրեական օրենսգրքի համապատասխան հոդվածը կամ հոդվածի մասը.
4) այն անձանց անունները, ազգանուններն ու բնակության կամ հաշվառման վայրերը, որոնք պետք է կանչվեն դատական նիստին.
5) մեղադրանքը հիմնավորող նյութերը:
4. Սույն հոդվածի 2-րդ մասով նախատեսված անձը քրեական հայցը ներկայացնում է ենթադրյալ հանցանքի կատարման վայրի առաջին ատյանի դատարան:
(․․․)»։
ՀՀ քրեական դատավարության օրենսգրքի 452-րդ հոդվածի համաձայն՝
«1. Քրեական հայցն ստանալուց հետո դատավորը ստուգում է՝ արդյոք պահպանվել են սույն օրենսգրքի 451-րդ հոդվածի 3-րդ մասով սահմանված` քրեական հայցին ներկայացվող պահանջները, արդյոք քրեական հայցում նկարագրված փաստական հանգամանքների կապակցությամբ քրեական հետապնդումը կարող է իրականացվել մասնավոր կարգով, և հնգօրյա ժամկետում կայացնում է հետևյալ որոշումներից մեկը․
1) քրեական վարույթ սկսելու մասին.
2) քրեական հայցը վերադարձնելու մասին.
3) քրեական հայցը և կից նյութերն ըստ ընդդատության ուղարկելու մասին.
4) քրեական վարույթ սկսելը մերժելու մասին:
2. Քրեական հայցը, համապատասխան թերությունները մատնանշելով, առնվազն հինգ օր ժամկետով վերադարձվում է, եթե դրանում առկա են շտկելի թերություններ:
3. Քրեական հայցը և կից նյութերն ուղարկվում են ըստ ընդդատության, եթե պարզվում է, որ ենթադրյալ հանցանքի կատարման վայրը դուրս է տվյալ դատարանի դատական տարածքից:
4. Քրեական վարույթ սկսելը մերժվում է, եթե`
1) ենթադրյալ հանցանք կատարած անձը հայտնի չէ.
2) քրեական հայցում նկարագրված փաստական հանգամանքներն ակնհայտորեն հանցավոր չեն.
3) քրեական հայցում նկարագրված փաստական հանգամանքների կապակցությամբ քրեական հետապնդումը կարող է իրականացվել միայն հանրային կարգով.
4) դատարանի սահմանած ժամկետում քրեական հայցի թերությունները չեն վերացվել, կամ այն վերստին չի ներկայացվել»։
Անդրադառնալով սույն վարույթի փաստական հանգամանքներին՝ Դատարանն արձանագրում է, որ դեռևս 2019 թվականի հոկտեմբերի 2-ին նույն հանգամանքների վերաբերյալ Գուրգեն Լալազարի Ղրդիլյանը հաղորդում է ներկայացրել ՀՀ ոստիկանության Երևան քաղաքի վարչության Կենտրոնականի բաժին, որտեղ նախապատրաստվել են նյութեր։ Նյութերի նախապատրաստմամբ պարզվել է, որ Գուրգեն Ղրդիլյանի եղբայրը՝ Մելիք Ղրդիլյանը դեռևս 2010-2011 թվականներին Երևան քաղաքի Կոնդ 105/2 հասցեի տունը նվիրել է իր քրոջ որդուն՝ Գագիկ Գրիշայի Տիգրանյանին։
Գտնելով, որ ներկայացված հաղորդմամբ հանցագործության հատկանիշներ չեն հայտնաբերվել՝ 2020 թվականի դեկտեմբերի 7-ին ՀՀ ոստիկանության Երևան քաղաքի Կենտրոնականի բաժնի ՀՈԲ տեսուչ Գ․Սարգսյանը Գուրգեն Ղրդիլյանի ստացած դիմումով ձեռնարկված միջոցառումները համարել է բավարար և նախապատրաստված նյութերը կցել քարտուղարության կարգագրին։
2025 թվականի մայիսի 30-ին Գուրգեն Ղրդիլյանը քրեական հայց է ներկայացրել Դատարան՝ խնդրելով չեղյալ համարել Երևան քաղաքի Կոնդ 105/2 հասցեի տան նվիրատվության պայմանագիրը։
Ընդ որում, Դատարանի որոշմամբ արձանագրվել է, որ ներկայացված հայցը չի համապատասխանում ՀՀ քրեական դատավարության օրենսգրքի 451-րդ հոդվածի 3-րդ մասի 2-5-րդ կետերով սահմանված պահանջներին և ժամանակ է տրամադրվել թերությունները շտկելու համար, որոնք այդպես էլ փաստացի չեն շտկվել։
Մասնավորապես, կրկին ներկայացված հայցում այդպես էլ չի շարադրվել մեղադրանքի բովանդակությունը, ինչպես նաև՝ թեև նշվել է, որ Գագիկ Տիգրանյանի արարքում առկա են ՀՀ քրեական օրենսգրքի 255-րդ հոդվածով նախատեսված հատկանիշներ, սակայն չի հստակեցվել, թե նշված հոդվածի հատկապես որ մասով և կետով քրեական հետապնդում պետք է հարուցվի։
Այսպիսով՝ Դատարանն արձանագրում է, որ սահմանված ժամկետում քրեական հայցի թերությունները չեն վերացվել, բացի այդ, քրեական հայցում նկարագրված փաստական հանգամանքների կապակցությամբ քրեական հետապնդումը կարող է իրականացվել միայն հանրային կարգով։
Հետևաբար, ՀՀ քրեական դատավարության օրենսգրքի 452-րդ հոդվածի 4-րդ մասի 3-րդ և 4-րդ կետերի հիմքով՝ Գուրգեն Լալազարի Ղրդիլյանի կողմից ներկայացված հայցի հիման վրա քրեական վարույթ սկսելը ենթակա է մերժման։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33-րդ, 451-452-րդ հոդվածներով՝ Դատարանը

ՈՐՈՇԵՑ

Գուրգեն Լալազարի Ղրդիլյանի կողմից ներկայացված թիվ ԵԴ1/1830/01/25 հայցի հիման վրա քրեական վարույթ սկսելը մերժել։
Որոշումը կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո տասնօրյա ժամկետում։


ԴԱՏԱՎՈՐ Հ.ԱՎԱԳՅԱՆ