ԵԴ1/1782/01/25




ՄԱՍՆԱՎՈՐ ՄԵՂԱԴՐԱՆՔՈՎ
ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«09» փետրվարի 2026թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
տուժող Սասուն Սիմոնյանի,
մեղադրյալ Գուրգեն Խուրշուդյանի,

դռնբաց դատական նիստում մասնավոր մեղադրանքի վարույթի կարգով քննելով տուժող Սասուն Հայկի Սիմոնյանի քրեական հայցն ըստ մեղադրանքի՝
Գուրգեն Գագիկի Խուրշուդյանի՝
(ծնված՝ առկա է անձնական տվյալ, ք. Երևան, ազգությամբ հայ, ՀՀ քաղաքացի, չամուսնացած, ներկայումս չի աշխատում, ըստ իր հայտարարության՝ մինչև անազատության մեջ հայտնվելը զբաղվել է շինարարությամբ, բարձրագույն կրթությամբ, չդատված, ըստ իր հայտարարության հաշվառվման հասցե չունի, մինչև անազատության մեջ հայտնվելը վարձակալական հիմունքներով բնակվել է ք.առկա է անձնական տվյալ, որպես խափանման միջոց է կիրառվել բացակայելու արգելքը) ՀՀ քրեական օրենսգրքի 255-րդ հոդվածի 1-ին մասով,

ՊԱՐԶԵՑ

1. Մասնավոր մեղադրանքով վարույթի դատավարական նախապատմությունը.
2025 թվականի մայիսի 22-ին Երևան քաղաքի առաջին ատյանի ընդհանուր իրավասության քրեական դատարան է ստացվել Սասուն Հայկի Սիմոնյանի (հասցե՝ ք. Երևան, Նոր Նորք, Ա. Միկոյան փողոց, 23 շենք, 34 բնակարան) քրեական հայցն ըստ մեղադրանքի Գուրգեն Գագիկի Խուրշուդյանի (ք.Երևան, Նոր–Նորք, Մոլդովական փողոց, 46 շենք, 4 բնակարան)՝ ՀՀ քրեական օրենսգրքի 255-րդ հոդվածի 1-ին մասով։
Վերոհիշյալ քրեական հայցը համակարգչային մակագրման եղանակով մակագրվել և 2025 թվականի մայիսի 23-ին հանձնվել է դատավոր Տաթևիկ Մուրադյանին:
Դատարանի՝ 2025 թվականի մայիսի 27-ի որոշմամբ թիվ ԵԴ1/1782/01/25 քրեական հայցի հիման վրա սկսվել է քրեական վարույթ և նշանակվել նախնական դատալսումները:
2. Ներկայացված քրեական հայցի և մեղադրանքի բովանդակությունը.
«... ներկայացված փաստվող դեպքին կարող է տրվել ՀՀ քրեական օրենսգրքի 255-րդ հոդվածի 1-ին մասով նախատեսված արարքին համապատասխանելու նախնական իրավական գնահատական:
Այսպես՝
2025 թվականի փետրվարի 18-ին List.am կայքով գտել եմ վարձով բնակարան և պայմաններին ծանոթանալու համար զանգահարել եմ կայքում նշված 098-700-546 հեռախոսահամարին: Նշված հեռախոսահամարի օգտատերը ներկայացել է Գուրգեն անունով և ասել, որ մենք միմյանց ծանոթ ենք եղել դեռևս 44-օրյա պատերազմից և բնակարանն ինձ կտրամադրի 135,000 ՀՀ դրամով: Նույն օրը Գուրգենն ինձ փոխանցել է Մարիաննա Արշակյան անունով 4355053924454251 Ակբա բանկի պլաստիկ քարտի համարը, որպեսզի գումարը փոխանցեմ՝ 115,000 ՀՀ դրամ: 2025 թվականին Գուրգենը Խուրշուդյանը զանգահարել է ինձ, ասել է, որ անհրաժեշտ է մնացած գումարն էլ փոխանցեմ, որպեսզի այդ բնակարանի հիփոթեքային վարկի հետ կապված մարում կատարի և բանալիները փոխանցի ինձ, այդ նպատակով և իմ վստահությունը չարաշահելով ուղարկել է ինձ Կարեն Աղաջանյան անունով Այդի Բանկի պլաստիկ քարտի դիմացի 4318290080596881 համարը և ես փոխանցել եմ 140,000 ՀՀ դրամ գումար: Դրանից հետո հեռախոսազրույցի ժամանակ Գուրգենն ասել է, որ նույն օրը բանալիները կբերի կհանձնի ինձ, սակայն մինչև օրս դա չի արել: Կրկին անգամ վստահությունը չարաշահելով Գուրգենը խնդրել է Կարեն Աղաջանյանի անվան պլաստիկ քարտին փոխանցեմ 20,000 ՀՀ դրամ, որպեսզի նոտարական հարցերը կարգավորի: Կատարվածով ինձ պատճառվել է 275,000 ՀՀ դրամի վնաս: Յուրաքանչյուր անգամ Գուրգեն Խուրշուդյանը տարբեր պատճառաբանություններով չէր կատարում իր խոստումը՝ վարձակալությամբ բնակարանը տրամադրելը։ Ես այդ հարցի կապակցությամբ բազմաթիվ անգամ հեռախոսային կապի մեջ եմ գտնվել նրա հետ, որի ընթացքում պայմանավորվել ենք՝ թե որտեղ հանդիպենք գումարը կամ բնակարանի բանալիները ինձ տալու համար, սակայն յուրաքանչյուր անգամ չէր կատարում խոստումը, իսկ հետագայում նույնիսկ հնարավոր չէր այլևս Գուրգեն Խուրշուդյանի հետ կապ հաստատել։ Հետագայում հետաքրքրվել եմ և պարզել, որ այդ բնակարանում բնակվում են անձիք և այդ բնակարանը վարձակալությամբ չի տրվում այսինքը՝ Գուրգեն Խուրշուդյանը ակնհայտ խաբեության միջոցով չարաշահելով իմ կողմից նրա հանդեպ ունեցած վստահությունն ու հավատը հափշտակել է իմ 275,000 ՀՀ դրամ գումարը։
Նաև հետաքրքրվելով Դատալեքս տեղեկատվական համակարգից տեղեկացել եմ, որ նման փաստական հանգամանքներով Գուրգեն Խուրշուդյանի վերաբերյալ առկա է թիվ ԵԴ1/3969/01/24 քրեական գործը:
Այսպիսով՝ Գուրգեն Խուրշուդյանը խաբեությամբ ինձնից վերցրել ու տիրացել է ինձ պատկանող 275,000 ՀՀ դրամ գումարին, որը հրաժարվում է վերադարձնել:
(…)»։
3. Մասնավոր մեղադրանքով հիմնական դատալսումների ընթացքում հետազոտված թույլատրելի ապացույցները.
- Դատաքննության ընթացքում մեղադրյալ Գուրգեն Խուրշուդյանը ցուցմունք տվեց այն մասին, որ տուժողի ներկայացրած փաստական հանգամանքները ճիշտ են: «Լիստ ԷյԷմ» կայքում ինքն է տեղադրել հայտարարությունը, և Սասունն իրեն է փոխանցել վարձակալական վճարները: Ինքը ցանկացել է խոսել Սասունի հետ և վերադարձնել գումարը, սակայն հնարավորություն չի եղել: Նշեց, որ Սասունն իրենից չի հարցրել իր անձնական տվյալները: Նշեց, որ տեղադրված հայտարարությունը կեղծ է եղել: Դա արել է գումար ստանալու նպատակով, քանի որ այդ ընթացքում պարտքեր է ունեցել: Տուժողի կողմից հրապարակված նամակագրությունների մի կողմն ինքն է հանդիսացել: Ձայնային հաղորդագրությունները ևս ինքն է ուղարկել: Նշեց, որ զորամասում գտնվելու պատմությունը ճիշտ է եղել, սակայն գտնվել է ոչ թե Կապանում, այլ Գորիսում: Իսկ վերադառնալու և ուշացումների վերաբերյալ պատմությունը ճիշտ չի եղել: Նշեց, որ Մարիաննա Արշակյանի հետ գտնվել է ընկերական հարաբերությունների մեջ, և քանի որ ինքն այդ պահին բանկային քարտ չի ունեցել, վերջինիս խնդրել է, որ փոխանցումները կատարվեն նրա քարտին: Կարեն Աղաջանյանը պարզապես իր ծանոթն է, ում նույնպես խնդրել է նույն բանը: Մարիաննային խնդրել է հեռախոսազանգի միջոցով, իսկ Կարենին առերես՝ վերջինիս ընկերոջ միջոցով: Կարենը գտնվում է ՌԴ-ում, քարտը գտնվել է ընկերոջ մոտ: Ընկերոջ անունը Հրանտ է: Մարիաննայի հասցեն չգիտի, միայն գիտի, որ Վայոց ձորի մարզում է բնակվում: Նշեց, որ մեղադրանքն ընդունում է և զղջում է կատարվածի համար:
(դատական նիստի արձանագրություն)
Արտավարութային փաստաթղթեր հանդիսացող՝
- Թիվ 1353 2025 0219 1208 0750 վճարման անդորրագիրը, համաձայն որի՝ 2025 թվականի փետրվարի 19-ին՝ ժամը 12:09:33-ին «Իդրամ» ՍՊԸ-ին պատկանող 1353 վճարային տերմինալի միջոցով «ԱյԴի Բանկ» ՓԲԸ-ում գրանցված 4318290080596881 բանկային քարտի համարին կատարվել է 140.000 ՀՀ դրամի չափով վճարում:
(դատական նիստի արձանագրություն, վարույթի նյութեր)
- Վճարման հանձնարարագրի թիվ 000311 անդորրագիրը, համաձայն որի՝ 2025 թվականի փետրվարի 18-ին՝ ժամը 20:14-ին, Սասուն Հայկի Սիմոնյանը ************4251 քարտի համարին կատարել է 115.000 ՀՀ դրամի չափով վճարում:
(դատական նիստի արձանագրություն, վարույթի նյութեր)
- Վճարման հանձնարարագրի թիվ 000040 անդորրագիրը, համաձայն որի՝ 2025 թվականի փետրվարի 19-ին՝ ժամը 20:45-ին, Սասուն Հայկի Սիմոնյանը ************6881 քարտի համարին կատարել է 20.000 ՀՀ դրամի չափով վճարում:
(դատական նիստի արձանագրություն, վարույթի նյութեր)
- Տուժող Սասուն Սիմոնյանի և մեղադրյալ Գուրգեն Խուրշուդյանի միջև տեղի ունեցած նամակագրությունները պարունակող լազերային կրիչը, որով հաստատվում են տուժողի ներկայացրած փաստական հանգամանքները:
(դատական նիստի արձանագրություն, վարույթի նյութեր)
- «Վիվա Արմենիա» ՓԲԸ-ի կողմից տրված քաղվածքը, որով հաստատվում է տուժող Սասուն Սիմոնյանի և մեղադրյալ Գուրգեն Խուրշուդյանի միջև եղած հեռախոսային կապը:
(դատական նիստի արձանագրություն)
- Հանցագործության մասին բանավոր հաղորդում ընդունելու վերաբերյալ արձանագրության պատճենը, համաձայն որի՝ 2025 թվականի փետրվարի 25-ին Սասուն Հայկի Սիմոնյանը հաղորդում է տվել այն մասին, որ 2025 թվականի փետրվարի 18-ին List.am կայքով գտել է վարձով բնակարան և պայմաններին ծանոթանալու համար զանգահարել է կայքում նշված 098-700-546 հեռախոսահամարին: Նշված հեռախոսահամարի օգտատերը ներկայացել է Գուրգեն անունով և ասել, որ իրենք միմյանց հետ ծանոթ են եղել դեռևս 44-օրյա պատերազմից և բնակարանն իրեն կտրամադրի 135.000 դրամով: Նույն օրը Գուրգենն իրեն փոխանցել է Մարիաննա Արշակյան անունով 4355053924454251 Ակբա բանկի պլաստիկ քարտի համարը, որպեսզի գումարը փոխանցի՝ 115.000 ՀՀ դրամ: 2025 թվականին Գուրգենը զանգահարել է իրեն և իր վստահությունը չարաշահելով ուղարկել իրեն Կարեն Աղաջանյան անունով Այդի բանկի պլաստիկ քարտի դիմացի 4318290080596881 համարը և ինքը փոխանցել է 140.000 ՀՀ դրամ գումար: Դրանից հետո հեռախոսազրույցի ժամանակ Գուրգենն ասել է, որ նույն օրը բանալիները կբերի կհանձնի իրեն, սակայն մինչ օրս դա չի արել: Կրկին անգամ վստահությունը չարաշահելով Գուրգենը խնդրել է Կարեն Աղաջանյանի անվան պլաստիկ քարտին փոխանցի 20.000 ՀՀ դրամ, որպեսզի նոտարական հարցերը կարգավորի: Կատարվածով իրեն պատճառվել է 275.000 ՀՀ դրամի վնաս:
(դատական նիստի արձանագրություն, վարույթի նյութեր)
- ՀՀ ՆԳՆ ոստիկանության ՀՈԳՎ Նոր Նորքի բաժնի ավագ համայնքային ոստիկանի՝ 2025 թվականի փետրվարի 25-ի զեկուցագրի պատճենը, համաձայն որի՝ ս/թ փետրվարի 25-ին՝ ժամը 18:46-ին, Սասուն Հայկի Սիմոնյանը /ծնվ.` 01.01.2000թ., բն. է ք. Երևան, Նոր Նորք, Ա. Միկոյան փող., 232. 34բն./ ՀՀ ՆԳՆ ոստիկանության ՀՈԳՎ Նոր Նորքի բաժնում հաղորդում է ներկայացրել այն մասին, որ ս/թ փետրվարի 18-ին «List.am» կայքով ցանկացել է վարձակալել բնակարան և որպես դեպոզիտ ենթադրյալ տան տեր ոմն Գուրգենին փոխանցել է ընդհանուր 275.000 ՀՀ դրամ գումար, և վերջինս էլ Սասուն Սիմոնյանի վստահությունը չարաշահելու միջոցով տիրացել է նշված գումարին:
Ձեռնարկված միջոցառումների արդյունքում պարզվել է, որ ոմն Գուրգենը հանդիսանում է Գուրգեն Գագիկի Խուրշուդյանը /ծնված՝ 09.09.1992թ., բն. է ք. Երևան, Նոր Նորք, Մոլդովական փող., 46շ., բն. 4/:
Ձեռնարկվում են միջոցառումներ՝ Գ. Խուրշուդյանին հայտնաբերելու ուղղությամբ:
(դատական նիստի արձանագրություն, վարույթի նյութեր)
- ՀՀ քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնի քննիչ Ռ.Մայիլյանի գրությունը, համաձայն որի՝ նկարագրված դեպքի առթիվ քրեական վարույթ չի նախաձեռնվել, քանի որ դրան կարող է տրվել ՀՀ քրեական օրենսգրքի 255-րդ հոդվածի 1-ին մասով նախնական իրավական գնահատական։
(դատական նիստի արձանագրություն, վարույթի նյութեր)
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Գուրգեն Խուրշուդյանը կատարել է իրեն մեղսագրվող ՀՀ քրեական օրենսգրքի 255-րդ հոդվածի 1-ին մասով նախատեսված արարքը, մասնավորապես Գուրգեն Գագիկի Խուրշուդյանը խաբեության կամ վստահությունը չարաշահելու եղանակով Սասուն Հայկի Սիմոնյանից հափշտակել է 275.000 (երկու հարյուր յոթանասունհինգ հազար) ՀՀ դրամ գումար։
Այսպես՝
Սասուն Հայկի Սիմոնյանը 2025 թվականի փետրվարի 18-ին List.am կայքով գտել է վարձով բնակարան և պայմաններին ծանոթանալու համար զանգահարել է կայքում նշված 098-700-546 հեռախոսահամարին: Նշված հեռախոսահամարի օգտատերը ներկայացել է Գուրգեն անունով և ասել, որ նրանք միմյանց ծանոթ են եղել դեռևս 44-օրյա պատերազմից և բնակարանը նրան կտրամադրի 135.000 ՀՀ դրամով: Նույն օրը Գուրգենը Սասուն Սիմոնյանին փոխանցել է Մարիաննա Արշակյան անունով 4355053924454251 Ակբա բանկի պլաստիկ քարտի համարը, որպեսզի գումարը փոխանցի՝ 115.000 ՀՀ դրամի չափով: 2025 թվականին Գուրգենը Խուրշուդյանը զանգահարել է Սասուն Սիմոնյանին, ասել է, որ անհրաժեշտ է մնացած գումարն էլ փոխանցի, որպեսզի այդ բնակարանի հիփոթեքային վարկի հետ կապված մարում կատարի և բանալիները փոխանցի նրան, այդ նպատակով և նրա վստահությունը չարաշահելով ուղարկել է նրան Կարեն Աղաջանյան անունով Այդի Բանկի պլաստիկ քարտի դիմացի 4318290080596881 համարը և նա փոխանցել է 140,000 ՀՀ դրամ գումար: Դրանից հետո հեռախոսազրույցի ժամանակ Գուրգենն ասել է, որ նույն օրը բանալիները կբերի կհանձնի Սասուն Սիմոնյանին, սակայն մինչև օրս դա չի արել: Կրկին անգամ վստահությունը չարաշահելով Գուրգենը խնդրել է Կարեն Աղաջանյանի անվան պլաստիկ քարտին փոխանցի 20,000 ՀՀ դրամ, որպեսզի նոտարական հարցերը կարգավորի: Կատարվածով Սասուն Սիմոնյանին պատճառվել է 275,000 ՀՀ դրամի վնաս: Յուրաքանչյուր անգամ Գուրգեն Խուրշուդյանը տարբեր պատճառաբանություններով չի կատարել իր խոստումը՝ վարձակալությամբ բնակարանը տրամադրելը։ Սասուն Սիմոնյանն այդ հարցի կապակցությամբ բազմաթիվ անգամ հեռախոսային կապի մեջ է գտնվել նրա հետ, որի ընթացքում պայմանավորվել են, թե որտեղ հանդիպեն գումարը կամ բնակարանի բանալիները տալու համար, սակայն յուրաքանչյուր անգամ չի կատարել խոստումը, իսկ հետագայում նույնիսկ հնարավոր չի եղել այլևս Գուրգեն Խուրշուդյանի հետ կապ հաստատել։ Պարզվել է, որ այդ բնակարանում բնակվում են անձիք և այդ բնակարանը վարձակալությամբ չի տրվում։ Այսինքն՝ Գուրգեն Խուրշուդյանը խաբեության միջոցով և չարաշահելով Սասուն Սիմոնյանի կողմից նրա հանդեպ ունեցած վստահությունն ու հավատը հափշտակել է 275.000 ՀՀ դրամ գումարը։
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Գուրգեն Գագիկի Խուրշուդյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. համաձայն դատվածության և հետախուզման առկայության վերաբերյալ ձև 8 տեղեկանքի՝ Գուրգեն Գագիկի Խուրշուդյանը դատվածություն չունի, սակայն ներկայումս մեկ այլ ընթացիկ քրեական վարույթի շրջանակներում վերջինիս մեղսագրվում է նույնասեռ արարքի կատարում:
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Գուրգեն Գագիկի Խուրշուդյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Գուրգեն Գագիկի Խուրշուդյանը կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 255-րդ հոդվածի 1-ին մասը:
Դատարանը, հաստատված համարելով հանցագործության և դրա կատարման մեջ Գուրգեն Գագիկի Խուրշուդյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Գուրգեն Գագիկի Խուրշուդյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը։
Դատարանը միաժամանակ արձանագրում է, որ Գուրգեն Խուրշուդյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Որպես Գուրգեն Խուրշուդյանի անձը բնութագրող հանգամանք Դատարանը հաշվի է առնում դատվածություն չունենալը, սակայն նույնասեռ արարքի կատարման համար մեկ այլ քրեական վարույթի շրջանակներում մեղադրվելու հանգամանքը:
Դատարանը, հաշվի առնելով Գուրգեն Գագիկի Խուրշուդյանի կատարած հանցանքի հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքը, պատասխանատվությունը և պատիժը ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 255-րդ հոդվածի 1-ին մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործությունների կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պետք է պատիժ նշանակել տուգանք՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով:
Անդրադառնալով ՀՀ քրեական դատավարության օրենսգրքի 348-րդ հոդվածի 1-ին մասի 11-րդ կետով սահմանված հարցին՝ Դատարանը գտնում է, որ տուժող Սասուն Հայկի Սիմոնյանի կողմից ներկայացված գույքային հայցը պետք է լրիվ բավարարել, քանի որ գույքային հայցի չափը համապատասխանում է հանցագործությամբ անմիջականորեն պատճառված գույքային վնասի չափին, որն ընդունել է նաև մեղադրյալը:
Այսպես՝ մեղադրյալ Գուրգեն Գագիկի Խուրշուդյանից հօգուտ տուժող Սասուն Հայկի Սիմոնյանի պետք է բռնագանձել 275.000 ՀՀ դրամի չափով գումար՝ որպես հանցագործությամբ պատճառված վնասի հատուցում։
Անդրադառնալով խափանման միջոցի հարցին՝ Դատարանն արձանագրում է, որ Գուրգեն Գագիկի Խուրշուդյանի նկատմամբ ընտրված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, որից հետո պետք է վերացնել։
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա մյուս հարցերին, արձանագրում է, որ գործով իրեղեն ապացույցներ չկան, առկա չէ արգելադրված որևէ գույք, քրեական վարույթով առկա չեն նաև վարութային ծախսեր:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 162-րդ, 348-349-րդ, 352-353-րդ և 457-րդ հոդվածներով` Դատարանը

ՎՃՌԵՑ

Գուրգեն Գագիկի Խուրշուդյանին մեղավոր ճանաչել ՀՀ քրեական օրենսգրքի 255-րդ հոդվածի 1-ին մասով նախատեսված հանցագործության կատարման մեջ, և նրա նկատմամբ պատիժ նշանակել տուգանք՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով:
Տուժող Սասուն Հայկի Սիմոնյանի կողմից ներկայացված գույքային հայցը լրիվ բավարարել:
Մեղադրյալ Գուրգեն Գագիկի Խուրշուդյանից հօգուտ տուժող Սասուն Հայկի Սիմոնյանի բռնագանձել 275.000 (երկու հարյուր յոթանասունհինգ հազար) ՀՀ դրամի չափով գումար՝ որպես հանցագործությամբ անմիջականորեն պատճառված գույքային վնասի հատուցում:
Գուրգեն Գագիկի Խուրշուդյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել։
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ