Քրեական գործ թիվ ԵԴ1/1669/01/25


ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ
ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«31» հուլիսի 2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` նաև Դատարան)՝
նախագահությամբ դատավոր՝ Գ.ԱԲԵԼՅԱՆԻ
քարտուղարությամբ՝ Գ․ԳԱԼՍՏՅԱՆԻ
Ա․ՄԿՐՏՉՅԱՆԻ
հանրային մեղադրող՝ Դ․ՄԱՐԳԱՐՅԱՆԻ
պաշտպան՝ Բ․ԵՂԻԱԶԱՐՅԱՆԻ
մեղադրյալ՝ Ս․ԵՂԻԱԶԱՐՅԱՆԻ
դռնբաց դատական նիստում, քննելով քրեական գործն ըստ մեղադրանքի՝

Սարգիս Գևորգի Եղիազարյանի՝ ծնված՝ 1996 թվականի փետրվարի 5-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, նախկինում չդատապարտված, բնակվող՝ ք. Երևան, Քանաքեռ-Զեյթուն Վահե Վահյան փողոց 10-րդ տուն հասցեում, մեղադրանք է ներկայացվել ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 1-ին մասով և որպես խափանման միջոց է կիրառվել բացակայելու արգելքը։


ՊԱՐԶԵՑ
1.Վարույթի դատավարական նախապատմությունը.
2024 թվականի հունվարի 30-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի ՀԿԳ քննիչ Գ․Գալստյանն առերևույթ հանցանքի մասին հաղորդում է ներկայացրել ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի պետ Գ․Թադևոսյանին, որի համաձայն՝ «(․․․) [Թ]իվ 60528223 քրեական վարույթով իրականացված անաչառ և համակողմանի քննչական վարույթային գործողությունների արդյունքում, մասնավորապես՝ 2023 թվականի դեկտեմբերի 17-ին դեպքի վայրի զննության մասին կազմված ճանապարհատրանսպորտային դեպքի վայրի զննության մասին արձանագրությամբ, վկա Սարգիս Եղիազարյանի ցուցմունքով, ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից Սարգիս Եղիազարյանի վարորդական վկայականի տվյալների վերաբերյալ արտատպված քաղվածքով պարզվել է, որ վկա Սարգիս Եղիազարյանը 2023 թվականի ապրիլի 24-ից զրկված լինելով տրանսպորտային միջոցներ վարելու իրավունքից մեկ տարի ժամկետով, 2023 թվականի դեկտեմբերի 17-ին՝ ժամը 19:40-ի սահմաններում, Երևան քաղաքի Սարալանջ փողոցում վարել է «Մերսեդես-Բենց» մակնիշի 01 SY 001 հաշվառման համարանիշի ավտոմեքենան, որի ընթացքում ավտովթարի է ենթարկվել նույն փողոցում՝ թիվ 7 էլեկտրասյան դիմացի ճանապարհահատվածում, այսինքն՝ Սարգիս Եղիազարյանը կատարել է ՀՀ քրեական օրենսգրքի 344-րդ հոդվածի 1-ին մասով նախատեսված արարքին համապատասխանող առերևույթ հանցանք: (․․․)»:
Հիշյալ հաղորդման առթիվ՝ 2024 թվականի հունվարի 30-ին, ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60-0508-24 քրեական վարույթը:
2023 թվականի հուլիսի 10-ին ՀՀ ՆԳՆ ոստիկանության ՊԾ ԵՔԳ ՎՎԻ բաժանմունքի պետ Ա․Բաբիկյանը զեկուցագիր է ներկայացրել ՀՀ ՆԳՆ ոստիկանության ՊԾ ԵՔԳ հրամանատար Ա․Իսախանյանին, որի համաձայն՝ «(․․․) ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի պարեկ՝ Նվեր Մուրադյանը, Սարգիս Գևորգի Եղիազարյանի (ծնված՝ 1996 թվականի փետրվարի 5-ին, ք.Երևան Վահե Վահյան փողոց, 10 տուն, ՀԾՀ՝ 1502960699) նկատմամբ 2023 թվականի հուլիսի 14-ին՝ ժամը 04:43-ին, կազմել է թիվ 8180258115 արձանագրություն, քանի որ վերջինս 2023 թվականի հուլիսի 14-ին՝ ժամը 04:35-ին, Երևան քաղաքի Ռուբինյանց փողոցում, «ՄԵՐՍԵԴԵՍ-ԲԵՆՑ» մակնիշի 01 SY 001 հաշվառման համարանիշի տրանսպորտային միջոցը վարել է տրանսպորտային միջոցներ վարելու իրավունքից զրկված և ոչ սթափ վիճակում:
(…)
Ներկայացնում եմ թիվ՝ 8180258115 արձանագրությունը, կից նյութերը և ՀՀ ՆԳՆ ոստիկանության ՃՈ էլեկտրոնային ռեգիստրի հաշվառման շտեմարանից Սարգիս Գևորգի Եղիազարյանի RL թիվ 683570 վարորդական իրավունքի վկայականի քաղվածքի պատճենը:
Միաժամանակ տեղեկացնում եմ, որ Սարգիս Գևորգի Եղիազարյանը տրանսպորտային միջոցներ վարելու իրավունքից զրկվել է 2023 թվականի ապրիլի 24-ին, ՊԾ ԵՔԳ 2-րդ գումարտակի 3-րդ վաշտի ծառայողի կողմից թվային եղանակով կայացված թիվ՝ 8300553050 որոշմամբ՝ մեկ տարի ժամկետով: (․․․)»:
Դեպքի առթիվ՝ 2024 թվականի փետրվարի 1-ին, ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 2-րդ մասի հատկանիշներով նախաձեռնվել է թիվ 60-0535-24 քրեական վարույթը
2024 թվականի փետրվարի 1-ին, ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի ՀԿԳ քննիչ Գ․Գալստյանն որոշում է կայացրել թիվ 60-0535-24 քրեական վարույթը թիվ 60-0508-24 քրեական վարույթին միացնելու և նախաքննությունը թիվ 60-0508-24 քրեական վարույթով շարունակելու մասին։
2025 թվականի ապրիլի 22-ին ՀՀ դատախազության Երևան քաղաքի Կենտրոն և Նորք-Մարաշ վարչական շրջանների դատախազության դատախազ Հ․Հարությունյանի որոշմամբ թիվ 60-0508-24 վարույթով Սարգիս Գևորգի Եղիազարյանի նկատմամբ հանրային քրեական հետապնդում է հարուցվել ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 1-ին մասով:
2025 թվականի ապրիլի 23-ին թիվ 60-0508-24 վարույթով մեղադրյալ Սարգիս Գևորգի Եղիազարյանի նկատմամբ որպես խափանման միջոց է կիրառվել բացակայելու արգելքը։
2025 թվականի մայիսի 13-ին ՀՀ դատախազության Երևան քաղաքի Կենտրոն և Նորք-Մարաշ վարչական շրջանների դատախազությունից Դատարան է ստացվել թիվ ԵԴ1/1669/01/25 (նախաքննական համարը՝ 60-0508-24) քրեական գործն ըստ մեղադրանքի Սարգիս Գևորգի Եղիազարյանի՝ ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 2-րդ մասով
Նույն օրը քրեական գործն էլեկտրոնային եղանակով մակագրվել, իսկ 2025 թվականի մայիսի 14-ին հանձնվել է Դատարանի դատավոր Գ․Աբելյանի աշխատակազմին։
2025 թվականի մայիսի 16-ին Դատարանի դատավոր Գ․Աբելյանի կողմից որոշում է կայացվել թիվ ԵԴ1/1669/01/25 քրեական գործով վարույթը ստանձնելու և նախնական դատալսումներ նշանակելու մասին։
Նախնական դատալսումներով դատական նիստը նշանակվել է նույն թվականի մայիսի 29-ին:
Դատարանի՝ 2025 թվականի մայիսի 29-ի որոշմամբ մեղադրյալ Սարգիս Գևորգի Եղիազարյանի նկատմամբ ընտրված խափանման միջոցը՝ բացակայելու արգելքը, թողնվել է անփոփոխ։
Դատարանի նույն թվականի մայիսի 29-ի որոշմամբ՝ նույն օրը, նշանակվել են հիմնական դատալսումներ։
2024 թվականի հունիսի 30-ին կայացվել է մեղադրական վերդիկտ, որով հաստատվել է Սարգիս Գևորգի Եղիազարյանի մեղավորությունը ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքում։



2. Մեղադրանքի փաստական նկարագրությունը.
Սարգիս Գևորգի Եղիազարյանին մեղադրանք է ներկայացվել ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 2-րդ մասով` այն բանի համար, որ․ «(...) [Ն]ա 2023 թվականի հուլիսի 14-ին՝ ժամը 04:35-ի սահմաններում, վարել է ավտոմեքենա՝ զրկված լինելով տրանսպորտային միջոցներ վարելու իրավունքից և միաժամանակ գտնվելով ոչ սթափ վիճակում, իսկ 2023 թվականի դեկտեմբերի 17-ին՝ ժամը 19:40-ի սահմաններում, վարել է ավտոմեքենան՝ զրկված լինելով տրանսպորտային միջոցներ վարելու իրավունքից:
Այսպես.
ՀՀ ոստիկանության պարեկային ծառայության կողմից թիվ 8300553050 վարչական իրավախախտման գործով 2023 թվականի ապրիլի 24-ին կայացված որոշմամբ Սարգիս Գևորգի Եղիազարյանը 1 (մեկ) տարի ժամանակով զրկվել է տրանսպորտային միջոցներ վարելու իրավունքից՝ սկսած 2023 թվականի ապրիլի 24-ից մինչև 2024 թվականի ապրիլի 25-ը, որի մասին տեղում ծանուցվել է և ստորագրությամբ ստացել որոշման պատճենը: Տեղյակ լինելով, որ զրկված է տրանսպորտային միջոցներ վարելու իրավունքից՝ Սարգիս Գևորգի Եղիազարյանը, զրկման ժամկետը դեռ չլրացած, 2023 թվականի հուլիսի 14-ին՝ ժամը 04:35-ի սահմաններում, գտնվելով ոչ սթափ վիճակում (սթափության վիճակի զննման կտրոնի համարը՝ 00896)՝ մեկ լիտր արտաշնչած օդի մեջ մաքուր ալկոհոլի պարունակությունը 0.898 մգ/լ (առնվազն՝ 0.8082 մգ/լ՝ նկատի ունենալով ստուգաչափող թիվ 91100885 ալկոտեստեր սարքի չափման ճշտության հնարավոր 10% սխալանքը), Երևան քաղաքի Ռուբինյանց փողոցում վարել է «Մերսեդես» մակնիշի 01 SY 001 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկ Նվեր Մուրադյանի կողմից նույն օրը՝ ժամը 04:43-ին, կազմվել է վարչական իրավախախտման վերաբերյալ թիվ 8180258115 արձանագրությունը։
Այսինքն՝ Սարգիս Գևորգի Եղիազարյանին մեղսագրվում է պատժի սպառնալիքով արգելված, մեղավորությամբ կատարված արարք՝ նախատեսված ՀՀ քրեական օրենսգրքի 344-րդ հոդվածի 2-րդ մասով։
Բացի այդ, տեղյակ լինելով, որ ՀՀ ոստիկանության պարեկային ծառայության կողմից թիվ 8300553050 վարչական իրավախախտման գործով 2023 թվականի ապրիլի 24-ին կայացված որոշմամբ 1 (մեկ) տարի ժամանակով զրկվել է տրանսպորտային միջոցներ վարելու իրավունքից՝ Սարգիս Գևորգի Եղիազարյանը, զրկման ժամկետը դեռ չլրացած, 2023 թվականի դեկտեմբերի 17-ին՝ ժամը 19:40-ի սահմաններում, Երևան քաղաքի Սարալանջի փողոցում վարել է «Մերսեդես» մակնիշի 01 SY 001 հաշվառման համարանիշի տրանսպորտային միջոցը և ենթարկվել է վթարի։
Այսինքն՝ Սարգիս Գևորգի Եղիազարյանին մեղսագրվում է պատժի սպառնալիքով արգելված, մեղավորությամբ կատարված արարք՝ նախատեսված ՀՀ քրեական օրենսգրքի 344-րդ հոդվածի 1-ին մասով:
Այսպիսով՝ Սարգիս Գևորգի Եղիազարյանին մեղսագրվում են պատժի սպառնալիքով արգելված, մեղավորությամբ կատարված արարքներ՝ նախատեսված ՀՀ քրեական օրենսգրքի 344-րդ հոդվածի 2-րդ մասով և 344-րդ հոդվածի 1-ին մասով: (...)»։



3․Դատաքննության ընթացքում հետազոտված թույլատրելի ապացույցները.
2025 թվականի ապրիլի 15-ի՝ զննում կատարելու մասին արձանագրությունը , որի համաձայն՝
-2023 թվականի դեկտեմբերի 17-ին զննության է ենթարկվել դեպքի վայր հանդիսացող Երևան քաղաքի Սարալանջ փողոցի թվով 7 էլեկտրասյան դիմացի ճանապարհահատվածը, որտեղ վթարվել են Արմեն Սերյոժայի Հովսեփյանի կողմից վարվող «Միցուբիշի» մակնիշի 20 PP 001 հաշվառման համարանիշի և Սարգիս Գևորգի Եղիազարյանի կողմից վարվող «Մերսեդես Բենց» մակնիշի 01 SY 001 հաշվառման համարանիշի ավտոմեքենան։
-2024 թվականի հունվարի 10-ին որպես վկա հարցաքննվել է Արմեն Սերյոժայի Հովսեփյանը, ով ցուցմունք է տվել այն մասին, որ 2023 թվականի դեկտեմբերի 17-ին՝ ժամը 19։50-ի սահմաններում, Երևան քաղաքի Սարալանջ փողոցում վթարվել են իր կողմից վարվող «Միցուբիշի» մակնիշի 20 PP 001 հաշվառման համարանիշի և Սարգիս Գևորգի Եղիազարյանի կողմից վարվող «Մերսեդես Բենց» մակնիշի 01 SY 001 հաշվառման համարանիշի ավտոմեքենան։
-2024 թվականի հունվարի 30-ին որպես վկա հարցաքննվել է Սարգիս Գևորգի Եղիազարյանը, ով ցուցմունք է տվել այն մասին, որ 2023 թվականի դեկտեմբերի 17-ին՝ երեկոյան, Երևան քաղաքի Սարալանջ փողոցում վթարվել են իր կողմից վարվող «Միցուբիշի» մակնիշի 20 PP 001 հաշվառման համարանիշի և Սարգիս Գևորգի Եղիազարյանի կողմից վարվող «Մերսեդես Բենց» մակնիշի 01 SY 001 հաշվառման համարանիշի ավտոմեքենան։ Հայտնել է, որ 2021 թվականին ունեցել է B կարգի վարորդական վկայական, որից զրկվել է 2023 թվականի ապրիլ ամսին, ոչ սթափ վիճակում ավտոմեքենա վարելու համար, մեկ տարի ժամկետով։
-2023 թվականի ապրիլի 24-ին՝ ժամը 04։11-ին, Երևան քաղաքի Տպագրիչների փողոցում ՀՀ ոստիկանության պարեկային ծառայության կրտսեր պարեկ Ազատ Ասատրյանի կողմից կազմվել է վարչական իրավախախտման վերաբերյալ թիվ 8300553050 արձանագրությունը, համաձայն որի՝ Սարգիս Գևորգի Եղիազարյանը (ծնված՝ 1996 թվականի փետրվարի 5-ին) 2023 թվականի ապրիլի 24-ին՝ ժամը 04։10-ին Երևան քաղաքի Տպագրիչների փողոց 13 հասցեում վարել է «Մերսեդես Բենց» մակնիշի 01 SY 001 հաշվառման համարանիշի տրանսպորտային միջոց՝ ոչ սթափ վիճակում (վարորդի մեկ լիտր արտաշնչած օդի մեջ մաքուր ալկոհոլի պարունակությունը գերազանցում է 0․5 միլիգրամը), որի արդյունքում կայացված որոշման համաձայն վերջինս զրկվել է տրանսպորտային միջոց վարելու իրավունքից 1 տարի ժամկետով։ Արձանագրության ներքևի ձախ հատվածում՝ ծանոթացա արձանագրությանը ու ծանուցումն ստացա հատվածում առկա է «ստորագրություն»։
-2023 թվականի հուլիսի 14-ին՝ ժամը 04։43-ին, Երևան քաղաքի Ռուբինյանց փողոցում ՀՀ ոստիկանության պարեկային ծառայության պարեկ Նվեր Մուրադյանի կողմից կազմվել է վարչական իրավախախտման վերաբերյալ թիվ 8180258115 արձանագրությունը, համաձայն որի՝ Սարգիս Գևորգի Եղիազարյանը (ծնված՝ 1996 թվականի փետրվարի 5-ին) 2023 թվականի հուլիսի 14-ին՝ ժամը 04։35-ին Երևան քաղաքի Ռուբինյանց փողոցում վարել է «Մերսեդես Բենց» մակնիշի 01 SY 001 հաշվառման համարանիշի տրանսպորտային միջոց՝ ոչ սթափ վիճակում։ Արձանագրության ներքևի ձախ հատվածում՝ ծանոթացա արձանագրությանը ու ծանուցումն ստացա հատվածում առկա է «ստորագրություն»։
-ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ից կողմից տրված թիվ 093544 ստուգաչափման վկայականի զննությամբ պարզվեց, որ վկայականը ուժի մեջ է 2023 թվականի ապրիլի 15-ից մինչև 2024 թվականի ապրիլի 15-ը, ստուգաչափման սարքի գործարանային համարն է 91100885, տեսակը՝ Jupiter X/RP, չափման տիրույթը՝ 0.000÷0.200մգ/լ ճշտության դասը, կարգը (սխալանքը) 0-0․1±5%, 0․1-0․15 ±5÷10%,,0․15±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Ա.Գուլքանյան, իսկ բաժնի (լաբորատորիայի վարիչ) անվան դիմաց առկա է ստորագրություն և նշված է Գ.Մարտիրոսյան:
-Ալկոհոլի պարունակության ստուգման կտրոնի զննությամբ պարզվեց, որ ստուգաչափման սարքի համարն է՝ 91100984, զննման համարը՝ 00828, զննման ամսաթիվը՝ 2023 թվականի ապրիլի 24, զննման ժամը՝ 04:04:21, վերջին ստուգաչափման ամսաթիվը՝ 2022 թվականի նոյեմբերի 15-ին, դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0.622մգ/լ, վարորդի անունն է՝ Սարգիս, ազգանունը՝ Եղիազարյան տրանսպորտային միջոցի համարանիշը՝ 01 SY 001, Վ/Վ համարը՝ անձնագիր՝ RL683570, Պ/Ծ ազգանունը՝ Դանիոլյան, կրծքանշանի համարը՝ 128215, ստորաբաժանում՝ ՊԾ 2-րդ գումարտակ 3-րդ վաշտ։

2025 թվականի ապրիլի 15-ի՝ արտավարութային փաստաթուղթ ճանաչելու մասին որոշումը , որի համաձայն՝ զննության ենթարկված և Սարգիս Գևորգի Եղիազարյանի նկատմամբ կազմված վարչական իրավախախտման վերաբերյալ թիվ 8300553050, 8180258115 արձանագրությունները, ստուգաչափման վկայականով և ալկոհոլի պարունակության ստուգման թիվ 00828 կտրոնը և ՆԳՆ ոստիկանության Ճանապարհային ոստիկանություն ծառայությունից ստացված փաստաթղթերը ճանաչվել են արտավարութային փաստաթղթեր։

2024 թվականի մարտի 5-ի՝ Կոտայքի մարզի առաջին ատյանի ընդհանուր իրավասության դատարանի թիվ ԿԴ/0645/01/23 քրեական գործով կայացված դատավճիռը, որի համաձայն՝ Սարգիս Գևորգի Եղիազարյանը մեղավոր ճանաչել ՀՀ քրեական օրենսգրքի 344-րդ հոդվածի 1-րդ մասով (2 դրվագով) նախատեսված արարքում և յուրաքանչյուր դրվագով որպես պատիժ նշանակել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամ գումարի չափով։
ՀՀ քրեական օրենսգրքի 74-րդ հոդվածի 1-ին մասի կիրառմամբ՝ հանցագործությունների համակցությամբ, նշանակված պատիժները լրիվ գումարվել է և վերջնական պատիժ է սահմանվել տուգանքը՝ 750.000 (յոթ հարյուր հիսուն հազար) ՀՀ դրամի չափով:
ՀՀ քրեական օրենսգրքի 59-րդ հոդվածի կարգով թույլատրվել է տուգանքի տարաժամկետ վճարումը՝ տուգանքի վճարման համար սահմանվել է 1 տարի ժամկետ՝ սույն դատավճիռը կատարման հանձնելու պահից տուգանքը վճարվելով նույն ժամկետում։
Մեղադրյալ Սարգիս Գևորգի Եղիազարյանը, օգտվելով իր իրավունքից հրաժարվել է ցուցմունք տալ, սակայն, թե՛ բացման խոսքով և, թե՛ եզրափակիչ ելույթով հանդես գալու ժամանակ հայտարարել է, որ ընդունում է ներկայացված մեղադրանքը։

Լրացուցիչ դատալսումների ժամանակ հետազոտվել են նաև ․
-ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանի 2025 թվականի ապրիլի 23-ի Ձև 8 տեղեկանքը, համաձայն որի՝
«(…)
1. ԵՂԻԱԶԱՐՅԱՆ ՍԱՐԳԻՍ ԳԵՎՈՐԳԻ
Ծննդյան ամսաթիվը՝ 05/02/1996
Համարը՝ 09124614
1) Նախաքննության վերաբերյալ տեղեկատվություն
Նախաձեռնող մարմինը՝ ՔԱՆԱՔԵՌ-ԶԵՅԹՈՒՆԻ Ք/Բ,ամս` 04/09/2014 Մեղադրական հոդված` ՀՀ ՔՐ. ՕՐ. (2003Թ.) հ 327 մ 1
ԿԱՐՃՎԱԾ Է ամս՝ 28/08/2015 հիմք՝ 37 Հ. 1 Մ. 1 Կ.
2. ԵՂԻԱԶԱՐՅԱՆ ՍԱՐԳԻՍ ԳԵՎՈՐԳԻ
Ծննդյան ամսաթիվը՝ 05/02/1996, Ծննդավայրը` ԵՐԵՎԱՆ ԱՐԱԲԿԻՐ
Համարը` 49020423
1) Նախաքննության վերաբերյալ տեղեկատվություն
Նախաձեռնող մարմինը` ԿՈՏԱՅՔԻ ՄԱՐԶԻ ՔՆՆՉԱԿԱՆ ԲԱԺԻՆ,ամս` 07/11/2023 Մեղադրական հոդված` ՀՀ ՔՐ. ՕՐ. հ 344 մ 1 (2 դրվագ)
2) Դատապարտման վերաբերյալ տեղեկատվություն Դատապարտող մարմինը` ԿՈՏԱՅՔԻ ՄԱՐԶԻ ԸՆԴՀ. ԻՐԱՎ. ԴԱՏԱՐԱՆ,ամս՝ 05/03/2024 ՀՀ ՔՐ. ՕՐ. h 344 մ 1 (2 դրվագ), հ 74մ1-ի կիրառմամբ
Հիմնական պատիժը՝ ՏՈՒԳԱՆՔ 750.000 դրամ
3) Պատժի կրման վայրի վերաբերյալ տեղեկատվություն չկա
4) Պատժից ազատման վերաբերյալ տեղեկատվություն
03.04.2025Թ. ՏՈՒԳԱՆՔԸ ՓԱՍՏԱՑԻ ԿԱՏԱՐՎԵԼ Է
(…)»։
- 2024 թվականի մարտի 5-ի՝ Կոտայքի մարզի առաջին ատյանի ընդհանուր իրավասության դատարանի թիվ ԿԴ/0645/01/23 քրեական գործով կայացված դատավճիռը։
-մեղադրյալ Սարգիս Գևորգի Եղիազարյանի՝ 2025 թվականի ապրիլի 25-ին որպես մեղադրյալ հարցաքննության արձանագրությունը, համաձայն որի՝ վերջինս ընդունել է իրեն առաջադրված մեղադրանքը` հրաժարվել ցուցմունք տալուց,
- ՀՀ «Սայաթ-Նովա» մշակութային միության նախագահ Թ․Պողոսյանի կողմից մեղադրյալ Սարգիս Գևորգի Եղիազարյանին տրված բնութագիրը, որի համաձայն՝ վերջինս բնութագրվում է դրական,
- Քանաքեռ-Զեյթուն վարչական շրջանի բնակչության կոմունալ տնտեսության և բարեկարգման բաժնի լիազոր ներկայացուցչի կողմից մեղադրյալ Սարգիս Գևորգի Եղիազարյանին տրված բնութագիրը, որի համաձայն՝ վերջինս բնութագրվում է դրական,
- մեղադրյալ Սարգիս Գևորգի Եղիազարյանի թիվ OL00078724 զինվորական գրքույկի պատճենը, որի համաձայն՝ վերջինս անցել է պարտադիր ժամկետային զինվորական ծառայություն և իրականացրել մարտական հերթապահություն։

4․ Դատարանի փաստական վերլուծությունները և հաստատած փաստական հանգամանքները․
Հետազոտելով սույն դատավճռի 3-րդ կետերում շարադրված ապացույցները՝ Դատարանը գտնում է, որ դրանք վերաբերելի են սույն քրեական գործին: Հիշյալ ապացույցներն իրենց համակցության մեջ գնահատելով՝ Դատարանը գտնում է նաև, որ դրանք բովանդակային տեսանկյունից հակասություններ չեն պարունակում: Հաշվի առնելով դրանցից յուրաքանչյուրի աղբյուրի հատկանիշները, ձևավորման հանգամանքները, ապացուցողական տեղեկությունը ձեռք բերելու միջոցը՝ Դատարանը գտնում է, որ դրանք նաև հավաստի են։
Այսպիսով՝ Դատարանը, պատշաճ ապացույցների բավարար համակցությամբ, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ գտնում է, որ ապացուցված է, որ Սարգիս Գևորգի Եղիազարյանը 1 (մեկ) տարի ժամանակով զրկվել է տրանսպորտային միջոցներ վարելու իրավունքից՝ սկսած 2023 թվականի ապրիլի 24-ից մինչև 2024 թվականի ապրիլի 25-ը, որի մասին տեղում ծանուցվել է և ստորագրությամբ ստացել որոշման պատճենը: Տեղյակ լինելով, որ զրկված է տրանսպորտային միջոցներ վարելու իրավունքից՝ Սարգիս Գևորգի Եղիազարյանը, զրկման ժամկետը դեռ չլրացած, 2023 թվականի հուլիսի 14-ին՝ ժամը 04:35-ի սահմաններում, գտնվելով ոչ սթափ վիճակում (սթափության վիճակի զննման կտրոնի համարը՝ 00896)՝ մեկ լիտր արտաշնչած օդի մեջ մաքուր ալկոհոլի պարունակությունը 0.898 մգ/լ (առնվազն՝ 0.8082 մգ/լ՝ նկատի ունենալով ստուգաչափող թիվ 91100885 ալկոտեստեր սարքի չափման ճշտության հնարավոր 10% սխալանքը), Երևան քաղաքի Ռուբինյանց փողոցում վարել է «Մերսեդես» մակնիշի 01 SY 001 հաշվառման համարանիշի տրանսպորտային միջոցը։
Բացի այդ, Սարգիս Գևորգի Եղիազարյանը 2023 թվականի ապրիլի 24-ին կայացված որոշմամբ 1 (մեկ) տարի ժամանակով զրկված լինելով տրանսպորտային միջոցներ վարելու իրավունքից, զրկման ժամկետը դեռ չլրացած, 2023 թվականի դեկտեմբերի 17-ին՝ ժամը 19:40-ի սահմաններում, Երևան քաղաքի Սարալանջի փողոցում վարել է «Մերսեդես» մակնիշի 01 SY 001 հաշվառման համարանիշի տրանսպորտային միջոցը։

5․Պատճառաբանական մաս.
I) Մեղադրյալին վերագրված արարքի իրավական գնահատականը.
ՀՀ քրեական օրենսգրքի 344-րդ հոդվածի 1-ին և 2-րդ մասերի համաձայն՝
«1. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը կամ տրանսպորտային միջոցներ վարելու իրավունք չունեցող անձի կողմից տրանսպորտային միջոց վարելը նույն արարքի համար օրենքով սահմանված պատասխանատվության կիրառումից հետո` մեկ տարվա ընթացքում՝
պատժվում է տուգանքով` առավելագույնը տասնհինգապատիկի չափով, կամ հանրային աշխատանքներով` առավելագույնը հարյուր հիսուն ժամ տևողությամբ, կամ կարճաժամկետ ազատազրկմամբ՝ առավելագույնը մեկ ամիս ժամկետով:
2. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված կամ տրանսպորտային միջոց վարելու իրավունք չունեցող անձի կողմից հարբած (ոչ սթափ) վիճակում տրանսպորտային միջոց վարելը կամ այդ անձի կողմից սթափության վիճակի զննություն անցնելուց հրաժարվելը կամ խուսափելը`
պատժվում է տուգանքով՝ առավելագույնը երեսնապատիկի չափով, կամ հանրային աշխատանքներով՝ հարյուր հիսունից երկու հարյուր հիսուն ժամ տևողությամբ, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:
(…):»։
ՀՀ քրեական օրենսգրքի 27-րդ հոդվածի 3-րդ մասի համաձայն՝
«Ոչ սթափ (հարբած) վիճակ է համարվում Վարչական իրավախախտումների վերաբերյալ Հայաստանի Հանրապետության օրենսգրքով սահմանված ոչ սթափ վիճակը:»:
Վարչական իրավախախտումների վերաբերյալ Հայաստանի Հանրապետության օրենսգրքի 126-րդ հոդվածի 9-րդ կետի համաձայն՝
«Սույն օրենսգրքով նախատեսված դեպքում անձը համարվում է ոչ սթափ վիճակում գտնվող, եթե ստուգմամբ պարզվում է, որ նրա մեկ լիտր արյան մեջ մաքուր ալկոհոլի պարունակությունը 0.2 գրամից կամ մեկ լիտր արտաշնչած օդի մեջ 0.1 միլիգրամից ավելի է, կամ եթե անձի արյան կամ մեզի մեջ առկա է թմրամիջոցի կամ հոգեմետ (հոգեներգործուն) նյութի պարունակություն: Անձը համարվում է ոչ սթափ վիճակում գտնվող նաև այն դեպքում, երբ նրա արյան կամ արտաշնչած օդի մեջ սույն մասում նշված չափով մաքուր ալկոհոլի կամ արյան կամ մեզի մեջ թմրամիջոցի կամ հոգեմետ (հոգեներգործուն) նյութի պարունակությունը ոստիկանության ծառայողի կողմից տրանսպորտային միջոցը կանգնեցնելուց կամ այդ անձին առնչվող ճանապարհատրանսպորտային պատահարից հետո, բայց մինչև նրա սթափության վիճակի զննություն անցկացնելը կամ սթափության վիճակի զննություն անցնելուց նրան ազատելը, այդ անձի կողմից ալկոհոլային խմիչք, թմրամիջոց կամ հոգեմետ (հոգեներգործուն) նյութ օգտագործելու հետևանք է:»:
Վերոգրյալի հիման վրա և հաշվի առնելով Դատարանի կողմից՝ սույն դատավճռի 4-րդ կետում հաստատված փաստական հանգամանքները՝ Դատարանը գտնում է, որ ապացուցված է, որ մեղադրյալ Սարգիս Գևորգի Եղիազարյանը 2023 թվականի հուլիսի 14-ին՝ ժամը 04:35-ի սահմաններում, վարել է ավտոմեքենա՝ զրկված լինելով տրանսպորտային միջոցներ վարելու իրավունքից և միաժամանակ գտնվելով ոչ սթափ վիճակում, իսկ 2023 թվականի դեկտեմբերի 17-ին՝ ժամը 19:40-ի սահմաններում, վարել է ավտոմեքենան՝ զրկված լինելով տրանսպորտային միջոցներ վարելու իրավունքից: Հետևաբար՝ ապացուցված է մեղադրյալ Սարգիս Գևորգի Եղիազարյանի մեղավորությունն իրեն մեղսագրված հանցանքներում, իսկ նրա արարքները համապատասխանում են ՀՀ քրեական օրենսգրքի 344-րդ հոդվածի 1-ին և 2-րդ մասերով նախատեսված հանցագործության հատկանիշներին։

II) Մեղադրյալ Սարգիս Գևորգի Եղիազարյանի քրեական պատասխանատվության հարցը.
Հաստատված համարելով մեղադրյալ Սարգիս Գևորգի Եղիազարյանի մեղավորությունն ՀՀ քրեական օրենսգրքի 344-րդ հոդվածի 1-ին և 2-րդ մասերով նախատեսված հանցանքների կատարման մեջ՝ Դատարանը գտնում է, որ անհրաժեշտ է անդրադառնալ մեղադրյալի նկատմամբ պատիժ նշանակելու հետ կապված հետևյալ հարցերին.
ա) արդյո՞ք ապացուցված են մեղադրյալ Սարգիս Գևորգի Եղիազարյանի պատասխանատվությունը և պատիժը մեղմացնող կամ ծանրացնող հանգամանքները.
բ) մեղադրյալ Սարգիս Գևորգի Եղիազարյանը ենթակա է արդյո՞ք պատժի իր կատարած հանցանքի համար.
գ) ի՞նչ պատիժ պետք է նշանակվի մեղադրյալ Սարգիս Գևորգի Եղիազարյանի նկատմամբ.
դ) մեղադրյալ Սարգիս Գևորգի Եղիազարյանն արդյո՞ք պետք է կրի իր նկատմամբ նշանակված պատիժը.
Անդրադառնալով «ա» կետով բարձրացված հարցին՝ Դատարանն անհրաժեշտ է համարում նշել հետևյալը.
ՀՀ քրեական օրենսգրքի 69-րդ հոդվածի համաձայն՝
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ (…):»:
ՀՀ քրեական օրենսգրքի 70-րդ հոդվածի 2-րդ մասի համաձայն`
«Պատիժ նշանակելիս դատարանը կարող է հաշվի առնել նաև սույն հոդվածի 1-ին մասով չնախատեսված մեղմացնող այլ հանգամանքներ:
(…)»:
Դատարանը որպես մեղադրյալ Սարգիս Գևորգի Եղիազարյանի պատիժը մեղմացնող հանգամանք է դիտարկում այն, որ ներկայացված մեղադրանքում իրեն լիովին մեղավոր է ճանաչել և զղջացել կատարածի համար ։
Դատարանն արձանագրում է, որ մեղադրյալ Սարգիս Գևորգի Եղիազարյանի պատասխանատվությունը կամ պատիժը ծանրացնող հանգամանքներ առկա չեն։
Անդրադառնալով «բ» կետով բարձրացված հարցին՝ Դատարանն արձանագրում է, որ սույն քրեական գործով մեղադրյալ Սարգիս Գևորգի Եղիազարյանին պատժից ազատելու հիմքեր առկա չեն, հետևաբար՝ նա ենթակա է պատժի՝ իր կատարած հանցանքի համար։
Անդրադառնալով «գ» կետով բարձրացված հարցին՝ Դատարանն անհրաժեշտ է համարում նշել հետևյալը.
ՀՀ քրեական օրենսգրքի 7-րդ հոդվածի 1-ին մասի համաձայն՝
«Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:»:
ՀՀ քրեական օրենսգրքի 55-րդ հոդվածի 2-րդ մասի համաձայն՝
«Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»:
Պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են՝
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
Պատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ՝ ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները՝ ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն։
Նշանակվող պատժի արդարացիության հիմնական պահանջներից է այն, որ պատիժը պետք է համապատասխանի հանցագործության հանրային վտանգավորության աստիճանին և բնույթին:
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա:
Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով: Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս: Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն:
Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը:
Արարքի հանրային վտանգավորության բնույթի որոշման հարցում կարևորվում է խախտված քրեաիրավական նորմով պաշտպանվող հասարակական հարաբերության սոցիալական նշանակությունը: Պատիժ նշանակելիս դատարանները պարտավոր են հաշվի առնել տվյալ ժամանակահատվածում քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը:
Վերը մեջբերված իրավական նորմերում և դիրքորոշումներում սահմանված չափանիշների համատեքստում մեղադրյալ Սարգիս Գևորգի Եղիազարյանի նկատմամբ պատժի տեսակը որոշելիս Դատարանը հաշվի է առնում հետևյալը.
- նրա կողմից ՀՀ քրեական օրենսգրքի 344-րդ հոդվածի 1-ին և 2-րդ մասերով կատարված հանցագործությունների բնույթը և հանրության համար վտանգավորության աստիճանը, մասնավորապես այն, որ նրան մեղսագրված արարքները երթևեկության անվտանգության և տրանսպորտի շահագործման սահմանված կարգի դեմ ուղղված, դիտավորյալ, ոչ մեծ ծանրության հանցագործություններ են,
- խախտված հասարակական հարաբերության սոցիալական նշանակությունը,
- պատասխանատվությունը կամ պատիժը մեղմացնող նշված հանգամանքը, ինչպես նաև պատասխանատվությունը կամ պատիժը ծանրացնող հանգամանքների բացակայությունը,
- անձը բնութագրող հանգամանքները, այդ թվում՝ նրա տարիքը, այն, որ ՀՀ քրեական օրենսգրքի 3-րդ հոդվածի 1-ին մասի 2-րդ կետի իմաստով հանդիսանում է առաջին անգամ հանցանք կատարած անձ (արարքները կատարելու պահին նախորդող հանցանքի համար դատվածություն չի ունեցել):
Վերոգրյալի հաշվառմամբ՝ Դատարանը հանգում է այն հետևության, որ տվյալ դեպքում սանկցիայով նախատեսված ամենամեղմ պատժատեսակի՝ տուգանքի միջոցով հնարավոր է ապահովել պատժի նպատակների իրացվելիությունը:
ՀՀ քրեական օրենսգրքի 3-րդ հոդվածի 1-ին մասի համաձայն՝
« Սույն օրենսգրքում օգտագործվում են հետևյալ հասկացությունները․
(…)
6) ամսական եկամուտ` հանցանքն ավարտվելու օրվան նախորդող 12 ամիսների ընթացքում անձի ստացած միջին ամսական եկամտի 35 տոկոսը: Միջին ամսական եկամտի մեջ հաշվարկվում են ստացվող աշխատավարձը և դրան հավասարեցված այլ վճարումները, անձի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտը (շահաբաժինը, տոկոսը, ռոյալթին, վարձակալական վճարը): Ամսական եկամուտը հաշվարկելիս հաշվի չեն առնվում դրանց համար վճարվող հարկերը, տուրքերը կամ այլ վճարներ.
(…)»:
ՀՀ քրեական օրենսգրքի 59-րդ հոդվածի համաձայն՝
«(…)
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
(…)
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
(…)
7. Տուգանքի նշանակման հնարավորությունը և չափը դատարանը որոշում է՝ հաշվի առնելով հանցագործության ծանրությունը, հանցագործությամբ պատճառված վնասի բնույթն ու չափը, հանցագործությամբ ստացված գույքային կամ ոչ գույքային բնույթի օգուտները, դատապարտվողի ու նրա ընտանիքի գույքային դրությունը, ինչպես նաև դատապարտվողի՝ եկամուտ ստանալու հնարավորությունը կամ նրան պատկանող այնպիսի գույքի առկայությունը, որի վրա կարող է բռնագանձում տարածվել:»:
«Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն՝
«Հայաստանի Հանրապետությունում նվազագույն ամսական աշխատավարձը սահմանել 75000 դրամ:»։
Վերոգրյալի հիման վրա, նկատի ունենալով սույն դատավճռի վերը նշված հանգամանքները, անձը բնութագրող տվյալները՝ Դատարանը գտնում է, որ մեղադրյալի նկատմամբ ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 2-րդ մասով որպես պատիժ պետք է նշանակել տուգանք՝ այն սահմանելով նվազագույն աշխատավարձի հնգապատիկի չափով:
Հիմք ընդունելով Օրենսգրքի 59-րդ հոդվածի 5-րդ մասը և հաշվի առնելով, որ մեղսագրվող հանցանքն ավարտվելու օրվան նախորդող 12 ամիսների ընթացքում Սարգիս Գևորգի Եղիազարյանը եկամուտ չի ունեցել (չի հանդիսացել վարձու աշխատող)՝ Դատարանը գտնում է, որ տուգանքի չափը պետք է հաշվարկվի հանցանքները կատարելու պահին` 2023 թվականի հուլիսի 14-ին և նույն թվականի դեկտեմբերի 17-ին, ՀՀ-ում սահմանված նվազագույն աշխատավարձի, այն է՝ 75.000 (յոթանասունհինգ հազար) ՀՀ դրամի չափով։
Դատարանը գտնում է, որ Օրենսգրքի 74-րդ հոդվածով սահմանված կարգով՝ նշանակված պատիժները լրիվ գումարելու միջոցով՝ ՀՀ քրեական օրենսգրքի 344-րդ հոդվածի 2-րդ մասով որպես պատիժ նշանակված՝ 375.000 (երեք հարյուր յոթանասունհինգ հազար) ՀՀ դրամ տուգանքին պետք է գումարել և ՀՀ քրեական օրենսգրքի 344-րդ հոդվածի 1-ին մասնավորես պատիժ նշանակված՝ 375.000 (երեք հարյուր յոթանասունհինգ հազար) ՀՀ դրամ տուգանքը և վերջնական պատիժ նշանակել տուգանք՝ 750․000 (յոթ հարյուր հիսուն) ՀՀ դրամի չափով
Հիմք ընդունելով Օրենսգրքի 59-րդ հոդվածի 8-րդ մասը և հաշվի առնելով, որ մեղադրյալ Սարգիս Գևորգի Եղիազարյանն ի վիճակի չէ անհապաղ և ամբողջությամբ վճարելու 750․000 (յոթ հարյուր հիսուն) ՀՀ դրամի չափով նշանակված տուգանքը՝ Դատարանը գտնում է, որ տուգանքի վճարման ժամկետ պետք է սահմանել (վճարումը տարաժամկետել) 1 (մեկ) տարին։
Անդրադառնալով «դ» կետով բարձրացված հարցին՝ Դատարանը գտնում է, որ մեղադրյալ Սարգիս Գևորգի Եղիազարյանը պետք է կրի իր նկատմամբ նշանակված պատիժը:
Անդրադառնալով ապացույցի տնօրինման հարցին՝ Դատարանն արձանագրում է նաև, որ դատավճիռն օրինական ուժի մեջ մտնելուց հետո, արտավարութային փաստաթղթերը պետք է պահել քրեական գործի նյութերի հետ՝ դրանք պահելու ամբողջ ընթացքում:
Նկատի ունենալով, որ սույն քրեական գույքային հայցի, գույքի վրա արգելանք դնելու, վարույթային ծախսերի վերաբերյալ տվյալներ առկա չեն՝ Դատարանն այդ հարցերին չի անդրադառնում։
Անդրադառնալով մեղադրյալ Սարգիս Գևորգի Եղիազարյանի նկատմամբ կիրառված խափանման միջոցին՝ բացակայելու արգելքին, Դատարանը գտնում է, որ կիրառված խափանման միջոցն ի զորու է եղել ապահովելու մեղադրյալի պատշաճ վարքագիծը, սակայն հաշվի առնելով նոր ի հայտ եկած հանգամանքները, վարույթի եզրափակիչ փուլում գտնվելը և այն, որ մեղադրյալը, աշխատանքային գործունեությամբ պայմանավորված (հանդիսանում է երգիչ և արտերկրում մասնակցում է համերգների), խնդրել է թույլատրել իրեն մեկնել ՀՀ-ից՝ Դատարանը գտնում է, որ նման պայմաններում կիրառված խափանման միջոցը պետք է վերացնել միջև դատավճռի օրինական ուժի մեջ մտնելը, քանի որ առանց դրա կիրառման ևս հնարավոր է ապահովել մեղադրյալի դատավարական պարտականությունների կատարումը։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 342-րդ, 347-350-րդ հոդվածներով՝ Դատարանը

Վ Ճ Ռ Ե Ց

1. Սարգիս Գևորգի Եղիազարյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 1-ին մասով նախատեսված հանցանքների կատարման մեջ:
2. ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարման համար Սարգիս Գևորգի Եղիազարյանի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
3. ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարման համար Սարգիս Գևորգի Եղիազարյանի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
4. ՀՀ քրեական օրենսգրքի 74-րդ հոդվածով սահմանված կարգով՝ հանցագործությունների համակցությամբ նշանակված պատիժները լրիվ գումարելու միջոցով՝ ՀՀ քրեական օրենսգրքի 344-րդ հոդվածի 2-րդ մասով որպես պատիժ նշանակված՝ 375.000 (երեք հարյուր յոթանասունհինգ հազար) ՀՀ դրամ տուգանքին գումարել ՀՀ քրեական օրենսգրքի 344-րդ հոդվածի 1-ին մասով որպես պատիժ նշանակված՝ 375.000 (երեք հարյուր յոթանասունհինգ հազար) ՀՀ դրամ տուգանքը և վերջնական պատիժ նշանակել տուգանք՝ 750․000 (յոթ հարյուր հիսուն հազար) ՀՀ դրամի չափով։
5. ՀՀ քրեական օրենսգրքի 59-րդ հոդվածի 8-րդ մասով սահմանված կարգով՝ տուգանքի վճարման ժամկետ սահմանել (վճարումը տարաժամկետել) 1 (մեկ) տարին։
6. Սարգիս Գևորգի Եղիազարյանի նկատմամբ կիրառված խափանման միջոցը՝ բացակայելու արգելքը, վերացնել:
7. Դատավճիռը օրինական ուժի մեջ մտնելուց հետո՝ արտավարութային փաստաթղթերը պահել քրեական գործի նյութերի հետ՝ դրանք պահելու ամբողջ ընթացքում։
8. Դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` ստանալու օրվանից հետո՝ մեկամսյա ժամկետում:


ԴԱՏԱՎՈՐ՝ Գ․ԱԲԵԼՅԱՆ