ԵԴ1/1643/01/25







Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ս.ԳԶՈԳՅԱՆԻ
քարտուղարությամբ Լ.ՉՈԲԱՆՅԱՆԻ
մասնակցությամբ
հանրային մեղադրող Բ․ՂԱԶԻՆՅԱՆԻ
մեղադրյալ Վ․ՀՈՎՀԱՆՆԻՍՅԱՆԻ

2025 թվականի հուլիսի 23-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Վաղարշակ Վազգենի Հովհաննիսյանի՝ ծնված 1984 թվականի նոյեմբերի 27-ին, Ձորագլուխ գյուղում, հայ, ՀՀ քաղաքացի, միջնակարգ կրթությամբ, ամուսնացած, խնամքին երեք անչափահաս երեխա, նախկինում դատապարտված, զբաղվում է գյուղատնտեսությամբ, հաշվառված և փաստացի բնակվում է Արագածոտնի մարզի Ձորագլուխ գյուղի 4-րդ փողոց, 4-րդ տուն հասցեում, քրեական հետապնդում է հարուցվել ՀՀ քրեական օրենսգրքի 344-րդ հոդվածի 2-րդ մասով, որպես խափանման միջոց է ընտրվել բացակայելու արգելքը,

ՊԱՐԶԵՑ

1.Գործի դատավարական նախապատմությունը
2024 թվականի նոյեմբերի 27-ին ՀՀ քրեական օրենսգրքի 344-րդ հոդվածի 2-րդ մասի հատկանիշներով նախաձեռնվել թիվ 60710424 քրեական վարույթը:
2025 թվականի ապրիլի 22-ի որոշմամբ Վաղարշակ Վազգենի Հովհաննիսյանի նկատմամբ քրեական հետապնդում է հարուցվել ՀՀ քրեական օրենսգրքի 344-րդ հոդվածի 2-րդ մասով այն արարքի համար, որ նա, չունենալով տրանսպորտային միջոց վարելու իրավունք, 2024 թվականի հոկտեմբերի 18-ին ժամը 19.49-ի սահմաններում Երևան քաղաքի Առաքելյան փողոցում հարբած (ոչ սթափ) վիճակում՝ արտաշնչած մեկ լիտր օդի մեջ ալկոհոլի պարունակությունը կազմել է 0.997 մգ/լ, վարել է ԲՄՎ մակնիշի 37VX819 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության ծառայողի կողմից նույն օրը կազմված վարչական իրավախախտման վերաբերյալ թիվ 8180408968 արձանագրությամբ::
2025 թվականի ապրիլի 22-ի մեկ այլ որոշմամբ Վաղարշակ Վազգենի Հովհաննիսյանի նկատմամբ խափանման միջոց է ընտրվել բացակայելու արգելքը:
2025 թվականի մայիսի 12-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում, գործին շնորհվել է ԵԴ1/1643/01/25 համարը:
2025 թվականի մայիսի 14-ին Դատարանի դատավոր Ս.Գզոգյանը որոշում է կայացրել վարույթը ստանձնելու և նախնական դատալսումներ նշանակելու մասին։
2025 թվականի հուլիսի 23-ին Դատարանը Վաղարշակ Վազգենի Հովհաննիսյանի նկատմամբ կայացրել է մեղադրական վերդիկտ։

2.Դատարանում հետազոտված և գնահատված ապացույցներ
Մեղադրյալ Վաղարշակ Վազգենի Հովհաննիսյանն առաջադրված մեղադրանքում իրեն մեղավոր է ճանաչել, հիմնական դատալսումների ընթացքում, օգտվելով իր իրավունքներից, հրաժարվել է ցուցմունք տալ (տե՛ս դատական նիստի արձանագրությունը):
Մինչդատական վարույթի ընթացքում Վաղարշակ Վազգենի Հովհաննիսյանը ցուցմունք է տվել այն մասին, որ իրեն բացատրվել է մեղադրանքի փաստական հանգամանքների և իրավական գնահատականի մասին, առաջադրված մեղադրանքում իրեն մեղավոր է ճանաչել, հայտնել է, որ իրեն բացատրվել է համաձայնեցված տուգանք կիրառելու կարգը, սակայն չի ցանկացել օգտվելով այդ կարգից և խնդրել է քրեական վարույթը ընդհանուր հիմումքներով ուղարկել դատարան, միաժամանակ հայտնել է, որ օգտվելով իր դատավարական իրավունքներից հրաժարվել է ցուցմունք տալ և պատասխանել որևէ հարցի (տե´ս դատական նիստի արձանագրություն, քրեական գործ, 35-37-րդ թերթեր)։
Ցուցմունքները հրապարակելուց հետո Վաղարշակ Վազգենի Հովհաննիսյանը հայտարարել է, որ դրանք համապատասխանում են իրականությանը և պնդում է դրանք (տե՛ս դատական նիստի արձանագրությունը):
Հիմնական դատալսումների ընթացքում հետազոտվել են հետևյալ գրավոր ապացույցները.
Վարչական իրավախախտման վերաբերյալ արձանագրությունը, որի համաձայն՝ Վաղարշակ Վազգենի Հովհաննիսյանը 18.10.2024 թվականին՝ ժամը 19:49-ին, չունենալով տրանսպորտային միջոցներ վարելու իրավունք, ոչ սթափ վիճակում՝ Երևան քաղաքի Առաքելյան 6-րդ փողոցում վարել է «ԲՄՎ» մակնիշի 37 VX 819 հաշվառման համարանիշի տրանսպորտային միջոցը։
Ալկոհոլի պարունակության ստուգման կտրոնը, որ ստուգաչափման սարքի համարն է՝ 91100999, զննման համարն է՝ 02669, զննման ամսաթիվն է՝ 18.10.2024 թվական, զննման ժամն է՝ 20:28:07, վերջին ստուգաչափման ամսաթիվն է՝ 13.08.2024 թվական, դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0.997 մգ/լ, վարորդի անունն է՝ Վաղարշակ, վարորդի ազգանունն է՝ Հովհաննիսյան, Պ/Ծ-ի ազգանունն է Հովհաննիսյան կրծքանշանի համարն է՝ 08615, ստորաբաժանումն է՝ 1-ին գումարտակ, 2-րդ վաշտ:
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ի կողմից տրված թիվ 131485 ստուգաչափման վկայականը, որի համաձայն՝ վկայականն ուժի մեջ է 13.08.2024 թվականից մինչև 13.08.2025 թվականը, ստուգաչափման սարքի գործարանային համարն է 91100999, տեսակը՝ Jupiter X/RP, չափման տիրույթը՝ 0.000-2.000մգ//, ճշտության դասը, կարգը (սխալանքը) + 10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Վ.Բաբաջանյան, իսկ բաժնի (լաբորատորիայի վարիչ) անվան դիմաց առկա է ստորագրություն և նշված է Գ.Մարտիրոսյան:
ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգի ռեգիստրից արտատպված վարորդական իրավունքի վկայական չունենալու վերաբերյալ քաղվածքը, որի համաձայն՝ Վաղարշակ Վազգենի Հովհաննիսյանը վարորդական իրավունքի վկայական չունի:
Վ․Հովհաննիսյանի դատավածության վերաբերյալ տեղեկանքը, որի համաձայն Վ․Հովհաննիսյանը նախկինում դատված չէ (տե´ս դատական նիստի արձանագրություն, քրեական գործ, 14-րդ թերթեր):

3.Դատարանի իրավական վերլուծությունները
Դատարանը, վերլուծելով մեղադրյալ Վաղարշակ Վազգենի Հովհաննիսյանի առաջադրված մեղադրանքի հիմքում դրված և հիմնական դատալսումների ընթացքում հետազոտված վերոգրյալ ապացույցները՝ դրանք գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր կասկածները նրա օգտին մեկնաբանելով, հաստատված է համարում, որ նա չունենալով տրանսպորտային միջոց վարելու իրավունք, 2024 թվականի հոկտեմբերի 18-ին՝ ժամը 19.49-ի սահմաններում, Երևան քաղաքի Առաքելյան փողոցում ոչ սթափ վիճակում՝ ալկոհոլի պարունակությունը 0.997 մգ/լ, վարել է ԲՄՎ մակնիշի 37VX819 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության ծառայողի կողմից նույն օրը կազմված վարչական իրավախախտման վերաբերյալ թիվ 8180408968 արձանագրությամբ:
Այսպիսով, Դատարանը գտնում է, որ սույն գործով ձեռք բերված հավաստի ապացույցների համակցությունը բավարար է հիմնավոր կասկածից վեր ապացուցողական չափանիշին համապատասխան հաստատված համարելու մեղադրյալ Վաղարշակ Հովհաննիսյանի կողմից ոչ սթափ վիճակում տրանսպորտային միջոց վարելը, այն վարելու իրավունք չունեցող անձի կողմից, այդ արարքն ապացուցված է, այն ճիշտ է որակված և համապատասխանում է ՀՀ քրեական օրենսգրքի 344-րդ հոդվածի 2-րդ մասի հատկանիշներին:
Անդրադառնալով մեղադրյալի նկատմամբ նշանակվելիք պատժի հարցին՝ Դատարանն արձանագրում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի մի շարք դրույթներով:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»։
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ։ (․․․)»։
Այսպես` Դատարանը մեղադրյալ Վ․Հովհաննիսյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հանրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Վ․Հովհաննիսյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, Դատարանը, որպես Վ․Հովհաննիսյանի անձը բնութագրող տվյալ հաշվի է առնում այն, որ նակինում դատապարտված չի եղել։
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալ Վ․Հովհաննիսյանի պատասխանատվությունն ու պատիժը մեղմացնող հանգամանք հաշվի է առնում այն, որ նա իրեն լիովին մեղավոր է ճանաչել և տվել խոստովանական ցուցմունքներ, անկեղծորեն զղջացել է կատարած արարքի համար:
Դատարանը, արձանագրում է, որ մեղադրյալ Վ․Հովհաննիսյանի պատասխանատվությունն ու պատիժը ծանրացնող հանգամանքներ առկա չեն:
Դատարանը գտնում է, որ կատարած արարքի համար մեղադրյալ Վ․Հովհաննիսյանը ենթակա է պատժի:
Դատարանը, հաշվի առնելով մեղադրյալ Վ․Հովհաննիսյանի կատարած արարքի՝ հանրության համար վտանգավորության աստիճանն ու բնույթը, նրա անձը բնութագրող, պատասխանատվությունը և պատիժը մեղմացնող հանգամանքները, գտնում է, որ մեղադրյալ Վ․Հովհաննիսյանն իր կատարած ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության համար ենթակա է պատժի տուգանքի ձևով՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 59-րդ հոդվածի հիման վրա՝ նրա նկատմամբ նշանակված տուգանքը տարաժամկետել 10 (տասնմեկ) ամիս ժամկետով և թույլատրել տուգանքը վճարել մաս առ մաս՝ յուրաքանչյուր ամիս 37․500 (երեսունյոթ հազար հինգ հարյուր) ՀՀ դրամի չափով։
Դատարանն արձանագրում է, որ արտավարութային փաստաթուղթ ճանաչված և քրեական գործին կցված փաստաթղթերը պետք է թողնել կցված քրեական գործին՝ դատավճիռն օրինական ուժի մեջ մտնելուց հետո։
Քննարկելով մեղադրյալ Վ․Հովհաննիսյանի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 347-350-րդ հոդվածներով` Դատարանը


Վ Ճ Ռ Ե Ց

Վաղարշակ Վազգենի Հովհաննիսյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված արարքի կատարման մեջ, և նրա նկատմամբ պատիժ նշանակել տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 59-րդ հոդվածի հիման վրա՝ նրա նկատմամբ նշանակված տուգանքը տարաժամկետել 10 (տաս) ամիս ժամկետով և թույլատրել տուգանքը վճարել մաս առ մաս՝ յուրաքանչյուր ամիս 37․500 (երեսունյոթ հազար հինգ հարյուր) ՀՀ դրամի չափով։
Վաղարշակ Վազգենի Հովհաննիսյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
Արտավարութային փաստաթղթերը թողնել կցված քրեական գործին դատավճիռն օրինական ուժի մեջ մտնելուց հետո։
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:


ԴԱՏԱՎՈՐ՝ Ս.ԳԶՈԳՅԱՆ