Գործ N ԵԴ1/1638/01/25




Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈւՆԻՑ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆԸ

ՆԱԽԱԳԱՀՈՂ ԴԱՏԱՎՈՐ` Վ.Լ.ԳՐԻԳՈՐՅԱՆ

2025 թվականի մայիսի 29-ին Երևան քաղաքում` համաձայնությամբ տուգանք նշանակելու վարույթի արդյունքով` քննության առնելով քրեական գործն ըստ մեղադրանքի`
Հենրիխ Գեորգիի Գրիգորյանի /ծնված` 07.12.1977թ., ք.Ստեփանակերը, ազգությամբ հայ, ԼՂՀ քաղաքացի, ամուսնացած, դատվածություն չունեցող, միջնակարգ կրթությամբ, չի աշխատում, բնակվում է Վարդենիս քաղաքի Էդվարդ Պողոսյան փողոց, տուն 24 հասցեում/: Մեղադրվում է ՀՀ քրեական օրենսգրքի 396-րդ հոդվածի 1-ին մասով.

Պ Ա Ր Զ Ե Ց

Գործի դատավարական նախապատմությունը.
2025 թվականի հունվարի 16-ին ՀՀ ՆԳՆ ոստիկանության ՀՈԳՎ Կենտրոնական բաժնի տեսուչ Գ.Ավետիսյանը կազմել է արձանագրություն՝ Հենրիխ Գեորգիի Գրիգորյանին ձերբակալելու վերաբերյալ:
2025 թվականի հունվարի 16-ին ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների քննչական երկրորդ բաժնի քննիչ Տ.Հակոբյանը կազմել է արձանագրություն՝ ՀՀ քրեական օրենսգրքի 393-րդ հոդվածի 1-ին մասի, 396-րդ հոդվածի 1-ին մասի հատկանիշներով թիվ 13104225 քրեական վարույթը նախաձեռնելու մասին:
2025 թվականի հունվարի 16-ին քննիչ Տ.Հակոբյանը որոշում է կայացրել Հենրիխ Գեորգիի Գրիգորյանին ձերբակալելու վերաբերյալ:
2025 թվականի հունվարի 18-ին Երևան քաղաքի Կենտրոն և Նորք-Մարաշ վարչական շրջանների դատախազության դատախազ Հ.Պողոսյանը որոշում է կայացրել թիվ 13104225 քրեական վարույթով Հենրիխ Գեորգիի Գրիգորյանի նկատմամբ ՀՀ քրեական օրենսգրքի 393-րդ հոդվածի 1-ին մասով հանրային քրեական հետապնդում հարուցելու մասին։
2025 թվականի հունվարի 19-ին Երևան քաղաքի առաջին ատյանի ընդհանուր իրավասության քրեական դատարանը որոշում է կայացրել Հենրիխ Գեորգիի Գրիգորյանի նկատմամբ որպես խափանման միջոց «Վարչական հսկողություը» կիրառելու մասին:
2025 թվականի ապրիլի 21-ին քննիչ Տ.Հակոբյան որոշում է կայացրել մեղադրյալ Հենրիխ Գրիգորյանի անձնական խուզարկությամբ հայտնաբերված ընդհանուր 4,09 գրամ հաստատուն քաշով «Մարիխուանա» տեսակի թմրամիջոցը և կանեփի բույսի կանաբինոիդներից՝ տետրահիդրոկաննաբինոլի այրված, մոխրացած հետքեր պարունակությամբ կապույտ գույնի պոլիմերային հատվածով կաթուցիչն իրեղեն ապացույց ճանաչելու մասին:
2025 թվականի ապրիլի 21-ին քննիչ Տ.Հակոբյանը որոշում է կայացրել 06.02.2025թ. «Վիվա Արմենիա» ՓԲ ընկերությունից ստացված 097575956 հեռախոսահամարի վերծանումը պարունակող լազերային սկավառակը որպես արտավարութային փաստաթուղթ ապացույց ճանաչելու մասին:
2025 թվականի ապրիլի 29-ին Երևան քաղաքի Կենտրոն և Նորք-Մարաշ վարչական շրջանների դատախազության դատախազ Հ.Պողոսյանը որոշում է կայացրել թիվ 13104225 քրեական վարույթով Հենրիխ Գեորգիի Գրիգորյանի նկատմամբ հարուցված հանրային քրեական հետապնդումը փոփոխելու, լրացնելու և ՀՀ քրեական օրենսգրքի 396-րդ հոդվածի 1-ին մասով նոր հանրային քրեական հետապնդում հարուցելու մասին այն արարքի կատարման համար, որ նա, առանց իրացնելու նպատակի քննությամբ ինքնությունը չպարզված անձից ապօրինի ձեռք է բերել ընդհանուր զգալի չափերի՝ «Մարիխուանա» տեսակի թմրամիջոց պարունակող թվով 6 փաթեթ, որոնք առանց իրացնելու նպատակի ապօրինի պահել իր մոտ:
Այսպես.
Հենրիխ Գեորգիի Գրիգորյանը, խախտելով «Թմրամիջոցների և հոգեմետ նյութերի մասին» ՀՀ օրենքի 11-րդ հոդվածի 2-րդ կետի պահաաջը, այն է՝ չունենալով բժշկական սպատակներով կամ բժշկի նշանակմամբ թմրամիջոցների և հոգեմետ (հոգեներգործուն) նութերի շրջանառություն իրականացնելու, այսինքն՝ թմրամիջոց պատրաստելու, վերամշակելու, ձեռք բերելու, պահելու, փոխադրելու կամ առաքելու թույլտվություն, քննությամբ ինքնությունը դեռևս չպարզված անձից և հանգամանքներում առանց իրացնելու նպատակի ապօրինի ձեռք է բերել և իր մոտ ապօրինի պահել է թվով 6 հատ կապույտ և սև գույների մեկուսիչ ժապավեններով փաթաթված ընդհանուր զգալի չափերի՝ 4.59 գրամ /0.46 գրամ, 0.48 գրամ, 0.9 գրամ, 0.87 գրամ, 0.88 գրամ և 1 գրամ/ հաստատուն քաշով «Մարիխուանա» տեսակի թմրամիջոց պարունակող փաթեթներ և կանեփ տեսակի բույսի կանաբինոիդներից՝ տետրահիդրոկաննաբինոլի հետքեր պարունակող թվով 1 հատ ապակյա խողովակ, որոնք 2025 թվականի հունվարի 16-ին հայտնաբերվել են ՀՀ ՆԳՆ ոստիկանության Կենտրոնական բաժնում կատարված Հենրիխ Գրիգորյանի անձնական խուզարկությամբ:
2025 թվականի ապրիլի 30-ին քննիչ Տ.Հակոբյանը կազմել է արձանագրություն՝ համաձայնությամբ տուգանք նշանակելու վարույթ նախաձեռնելու վերաբերյալ:
2025 թվականի ապրիլի 30-ին քննիչ Տ.Հակոբյանը որոշում է կայացրել թիվ 13104225 քրեական վարույթից ՀՀ քրեական օրենսգրքի 393 հոդվածի 1-ին մասով կատարված հանրորեն վտանգավոր արարքի մասն անջատելու և անջատված մասին թիվ 13148325 քրեական վարույթի համարը շնորհելու մասին:
2025 թվականի մայիսի 12-ին թիվ 13104225 քրեական վարույթը, հաստատված մեղադրական եզրակացությամբ՝ համաձայնությամբ տուգանք նշանակելու վարույթի կարգով քննելու համար, ստացվել է Երևան քաղաքի առաջին ատյանի ընդհանուր իրավասության քրեական դատարանում, որը ստացել է թիվ ԵԴ1/1638/01/25 դատական համարը:

Համաձայնությամբ տուգանք նշանակելու վարույթ.
Քրեական գործն ստանալուց հետո հավաստիանալով, որ առկա է համաձայնությամբ տուգանք նշանակելու վարույթ կիրառելու հիմքը, և բացակայում են ՀՀ քրեական դատավարության օրենսգրքի 464.7-րդ հոդվածի 2-րդ մասով նախատեսված հանգամանքները, 13.05.2025թ-ին որոշում է կայացվել վարույթն ստանձնելու և համաձայնությամբ տուգանք նշանակելու վարույթ հարուցելու մասին:

Դատարանի իրավական վերլուծությունները.
Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
ՀՀ քրեական դատավարության օրենսգրքի 464.8-րդ հոդվածի հոդվածի համաձայն`
«(...)
4. Դատարանը որոշում է կայացնում համաձայնությամբ տուգանք նշանակելու վարույթը դադարեցնելու և նախնական դատալսումներ նշանակելու մասին, եթե, ծանոթանալով քրեական գործին, հանգում է հետևության, որ՝
1) մեղադրյալին մեղսագրվող արարքն ակնհայտորեն կատարվել է մեղադրյալ չհանդիսացող այլ անձի կողմից կամ նրա մասնակցությամբ.
2) մեղադրյալին մեղսագրվող արարքին տրված իրավական գնահատականն ակնհայտորեն չի համապատասխանում մեղադրանքի փաստական հանգամանքներին.
3) առկա է սույն օրենսգրքի 464.7-րդ հոդվածի 2-րդ մասով նախատեսված հանգամանքներից որևէ մեկը:»:
ՀՀ քրեական դատավարության օրենսգրքի 464.9-րդ հոդվածի հոդվածի համաձայն`
«1. Համաձայնությամբ տուգանք նշանակելու վարույթի արդյունքով դատարանը գրավոր ընթացակարգով կայացնում է մեղադրական դատավճիռ սույն օրենսգրքի 347-350-րդ հոդվածներով սահմանված կարգով` հաշվի առնելով սույն հոդվածով նախատեսված առանձնահատկությունները:
2. Դատավճիռը կայացվում է համաձայնությամբ տուգանք նշանակելու վարույթ կիրառելու մասին որոշումը կայացնելուց հետո՝ հնարավորին չափ սեղմ ժամկետում, սակայն ոչ ուշ, քան 15 օրվա ընթացքում։
3. Համաձայնությամբ տուգանք նշանակելու վարույթի արդյունքով մեղադրական դատավճիռ կայացնելիս դատարանը նշանակում է պատիժ՝ հաշվի առնելով Հայաuտանի Հանրապետության քրեական օրենսգրքի 77-րդ հոդվածի վերաբերելի դրույթները:
4. Սույն օրենսգրքի 167-րդ հոդվածի 1-ին մասով նախատեսված վարութային ծախսերը մեղադրյալից ենթակա չեն բռնագանձման:
5. Դատավճիռը պետք է պարունակի պարզաբանում այն բողոքարկելու՝ սույն օրենսգրքով նախատեսված սահմանափակումների վերաբերյալ։
6. Դատավճիռը կայացնելուց հետո՝ ոչ ուշ, քան հինգ օրվա ընթացքում, ուղարկվում է դատապարտված մեղադրյալին, նրա պաշտպանին, հանրային մեղադրողին:»:
ՀՀ քրեական դատավարության օրենսգրքի 464.10-րդ հոդվածի հոդվածի համաձայն`
«1. Սույն օրենսգրքի 464.9-րդ հոդվածին համապատասխան կայացված դատավճիռը կարող է բողոքարկվել սույն օրենսգրքով սահմանված կարգով, սակայն այն չի կարող բողոքարկվել սույն օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերով:»:
Ծանոթանալով քրեական գործին, Դատարանն արձանագրում է, որ առկա չեն հիմքեր ենթադրելու, որ՝
- մեղադրյալին մեղսագրվող արարքն ակնհայտորեն կատարվել է մեղադրյալ չհանդիսացող այլ անձի կողմից կամ նրա մասնակցությամբ,
- մեղադրյալին մեղսագրվող արարքին տրված իրավական գնահատականն ակնհայտորեն չի համապատասխանում մեղադրանքի փաստական հանգամանքներին.
- առկա է ՀՀ քրեական դատավարության օրենսգրքի 464.7-րդ հոդվածի 2-րդ մասով նախատեսված հանգամանքներից որևէ մեկը:
Հետևաբար Դատարանը գտնում է, որ սույն գործով պետք է կայացվի մեղադրական դատավճիռ:
Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
ՀՀ քրեական օրենսգրքի 59-րդ հոդվածի համաձայն՝
«1. Տուգանքը դրամական տուժանք է, որը նշանակվում է սույն օրենսգրքով նախատեսված դեպքերում և չափերով:
2. Տուգանքը որպես հիմնական պատիժ կարող է նշանակվել սույն օրենսգրքի Հատուկ մասով նախատեսված դեպքերում:
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
(…)
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
(…)»:
ՀՀ քրեական օրենսգրքի 77-րդ հոդվածի համաձայն՝
«(...)
6. Ավարտված կամ չավարտված հանցագործություններով համաձայնությամբ տուգանք նշանակելու վարույթի դեպքում նշանակվում է սույն օրենսգրքի Հատուկ մասի համապատասխան հոդվածի սանկցիայով նախատեսված տուգանքի նվազագույն չափը՝ առանց լրացուցիչ պատիժ և անվտանգության միջոց նշանակելու:
(...)»:
ՀՀ քրեական օրենսգրքի 396-րդ հոդվածի համաձայն`
«1. Առանց իրացնելու նպատակի զգալի չափերով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ կամ պրեկուրսոր ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը կամ առաքելը՝
պատժվում է տուգանքով՝ առավելագույնը տասնապատիկի չափով, կամ հանրային աշխատանքներով՝ առավելագույնը հարյուր ժամ տևողությամբ, կամ ազատության սահմանափակմամբ՝ առավելագույնը մեկ տարի ժամկետով, կամ կարճաժամկետ ազատազրկմամբ՝ առավելագույնը մեկ ամիս ժամկետով, կամ ազատազրկմամբ՝ առավելագույնը մեկ տարի ժամկետով:
(...)»:
Նկատի ունենալով, որ մեղադրյալ Հենրիխ Գեորգիի Գրիգորյանը չի աշխատում, Դատարանը գտնում է, որ տուգանքի չափը պետք է հաշվարկել արարքը կատարելու պահի նվազագույն աշխատավարձի չափով, ինչպես նաև Դատարանը գտնում է, որ վերջինիս նկատմամբ պետք է նշանակվի ՀՀ քրեական օրենսգրքի 396-րդ հոդվածի 1-ին մասի սանկցիայով նախատեսված տուգանքի նվազագույն՝ հնգապատիկի չափով:
ՀՀ քրեական օրենսգրքի 79-րդ հոդվածի համաձայն՝
«(…)
4. Անազատության մեջ գտնվող անձի նկատմամբ տուգանքի, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, զինվորական ծառայության մեջ սահմանափակման ձևով հիմնական պատիժ նշանակելիս դատարանը, հաշվի առնելով մինչև դատավճիռ կայացնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը, մեղմացնում է նշանակված պատիժը կամ ազատում է պատիժը կրելուց:
(…)»:
Անդրադառնալով Հ.Գրիգորյանի նկատմամբ վերջնական պատիժ նշանակելու հարցին, հաշվի առնելով, որ վերջինս սույն գործով երեք օր գտնվել է անազատության մեջ, ուստի Դատարանը գտնում է, որ ՀՀ քրեական օրենսգրքի 59-րդ հոդվածի 11-րդ մասով սահմանված հաշվարկների արդյունքով նշանակված պատժից պետք է նվազեցվի յուրաքանչյուր օրվա համար 25.000-ական ՀՀ դրամ տուգանքը:
Քննարկելով խափանման միջոցի հարցը` Դատարանը գտնում է, որ մեղադրյալ Հենրիխ Գեորգիի Գրիգորյանի նկատմամբ «Վարչական հսկողություն» խափանման միջոցն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը:
Նկատի ունենալով, որ թիվ 13104225 քրեական վարույթից ՀՀ քրեական օրենսգրքի 393-րդ հոդվածի 1-ին մասով անջատվել է նոր քրեական վարույթ, Դատարանը գտնում է, որ դատավճիռն օրինական ուժի մեջ մտնելուց հետո իրեղեն ապացույց ճանաչված՝ Հենրիխ Գրիգորյանի անձնական խուզարկությամբ հայտնաբերված ընդհանուր 4,09 գրամ հաստատուն քաշով «Մարիխուանա» տեսակի թմրամիջոցը և կանեփի բույսի կանաբինոիդներից՝ տետրահիդրոկաննաբինոլի այրված, մոխրացած հետքեր պարունակությամբ կապույտ գույնի պոլիմերային հատվածով կաթուցիչը պետք է վերադարձնել հանրային մեղադրողին՝ թիվ 13148325 քրեական վարույթին կցելու նպատակով:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 347-350-րդ, 464.9-րդ, 464.10-րդ հոդվածներով` Դատարանը

Վ Ճ Ռ Ե Ց

Հենրիխ Գեորգիի Գրիգորյանին մեղավոր ճանաչել ՀՀ քրեական օրենսգրքի 396-րդ հոդվածի 1-ին մասով և դատապարտել տուգանքի` նվազագույն աշխատավարձի հնգապատիկի՝ 375.000 /երեք հարյուր յոթանասունհինգ հազար/ ՀՀ դրամի չափով:
ՀՀ քրեական օրենսգրքի 79-րդ հոդվածի 4-րդ մասի համաձայն՝ Հենրիխ Գեորգիի Գրիգորյանի նկատմամբ տուգանքի ձևով նշանակված պատիժը մեղմացնել և վերջնական պատիժ նշանակել տուգանք՝ 300.000 /երեք հարյուր հազար/ ՀՀ դրամի չափով:
Հենրիխ Գեորգիի Գրիգորյանի նկատմամբ ընտրված խափանման միջոց «Վարչական հսկողությունը» թողնել անփոփոխ մինչև դատավճռի օրինական ուժի մեջ մտնելը:
Իրեղեն ապացույց ճանաչված՝ 4,09 գրամ հաստատուն քաշով «Մարիխուանա» տեսակի թմրամիջոցը և կանեփի բույսի կանաբինոիդներից՝ տետրահիդրոկաննաբինոլի այրված, մոխրացած հետքեր պարունակությամբ կապույտ գույնի պոլիմերային հատվածով կաթուցիչը վերադարձնել հանրային մեղադրողին՝ թիվ 13148325 քրեական վարույթին կցելու նպատակով:
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերի կարող է բողոքարկվել ՀՀ վերաքննիչ քրեական դատարան` ստանալու օրվանից հետո մեկամսյա ժամկետում:

ԴԱՏԱՎՈՐ` Վ.Լ.ԳՐԻԳՈՐՅԱՆ