ԵԴ1/1626/01/25


ՈՐՈՇՈՒՄ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ
ՎԱՐՈՒՅԹԸ ԿԱՐՃԵԼՈՒ ՄԱՍԻՆ

28 հոկտեմբերի 2025 թվական ք.Երևան

ՀՀ Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև՝ Դատարան),
Նախագահությամբ դատավոր Հ.Մանուկյանի,
քարտուղարությամբ Ն.Սարգսյանի,
մասնակցությամբ՝
հանրային մեղադրող՝ Ա.Բեգլարյանի,
մեղադրյալ՝ Լ.Գևորգյանի,
տուժող՝ Ա.Կիրակոսյանի,

դռնբաց դատական նիստում, քննության առնելով մեղադրյալ Լուսինե Սամվելի Գևորգյանի (ծնված՝ 1988 թվականի հունվարի 24-ին, Երևան քաղաքում, ազգությամբ հայ, ՀՀ քաղաքացի, հաշվառված և բնակվող՝ Երևան քաղաքի Մառի փողոցի 2-րդ շենքի 36-րդ բնակարան հասցեում, ամուսնացած է, ունի երկու անչափահաս երեխա, մեղադրվում է ՀՀ քրեական օրենսգրքի 342-րդ հոդվածի 1-ին մասով, որպես խափանման միջոց է ընտրված գրավը) նկատմամբ ՀՀ քրեական օրենսգրքի 342-րդ հոդվածի 1-ին մասով քրեական հետապնդումը դադարեցնելու և քրեական գործի վարույթը կարճելու հարցը,

Պ Ա Ր Զ Ե Ց

2024 թվականի հոկտեմբերի 23-ին նախաձեռնվել է թիվ 60645924 քրեական վարույթը։
2024 թվականի հոկտեմբերի 23-ի որոշմամբ թիվ 60645924 քրեական վարույթով Անահիտ Գրիգորի Կիրակոսյանը ճանաչվել է որպես տուժող։
2024 թվականի դեկտեմբերի 25-ի որոշմամբ թիվ 60645924 քրեական վարույթով որպես արտավարութային փաստաթուղթ են ճանաչվել վարույթի նյութերում առկա լազերային սկավառակը։
2025 թվականի ապրիլի 16-ին միջնորդություն է ներկայացվել հսկող դատախազին՝ թիվ 60645924 քրեական վարույթով Լուսինե Սամվելի Գևորգյանի նկատմամբ ՀՀ քրեական օրենսգրքի 342-րդ հոդվածի 1-ին մասով հանրային քրեական հետապնդում հարուցելու վերաբերյալ։
ՀՀ դատախազության Երևան քաղաքի դատախազության ավագ դատախազ Կարեն Իսրաելյանի 2025 թվականի ապրիլի 16-ի որոշմամբ թիվ 60645924 քրեական վարույթով Լուսինե Սամվելի Գևորգյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 342-րդ հոդվածի 1-ին մասով, այն բանի համար, որ նա «(...) իր վարած ավտոմեքենայով խախտել է ճանապարհային երթևեկության կանոնները և ճանապարհային երթևեկության անվտանգության ապահովմանն ուղղված պահանջը, որի հետևանքով հետիոտն Անահիտ Գրիգորի Կիրակոսյանի առողջությանն անզգուշությամբ պատճառել է ծանր վնաս, որպիսի գործողությունները դրսևորվել են հետևյալում.
Լուսինե Սամվելի Գևորգյանը, «Բիզնես Փարթնր» ՓԲ ընկերությունում որպես վաճառքի մենեջեր, 2024 թվականի հոկտեմբերի 23-ին՝ ժամը 15:15-ի սահմաններում, նշված ընկերությանը պատկանող «NISSAN TIIDA» մակնիշի 701 CT 61 հաշվառման համարանիշի ավտոմեքենան վարել է Երևան քաղաքի Անդրանիկ փողոցով՝ Րաֆֆու փողոցի կողմից դեպի Առնո Բաբաջանյան փողոցի կողմը տանող ուղեմասի 1-ին երթևեկելի ուղեգոտով շուրջ 50 կմ/ժ արագությամբ: Հասնելով Րաֆֆու փողոցի թիվ 39/10 հասցեի դիմացի ճանապարհահատվածին՝ թույլ է տվել ՀՀ ճանապարհային երթևեկության կանոնները և տրանսպորտային միջոցների շահագործումն արգելող անսարքությունների և պայմանների ցանկը հաստատելու մասին ՀՀ կառավարության 2007 թվականի հունիսի 28-ի թիվ 955-Ն որոշման 103-րդ կետի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ մասի պահանջներին հակասող գործողություններ, այն է՝ չի հետևել երթևեկության ուղղությամբ առջևում տիրող ճանապարհատրանսպորտային իրադրությանը և ՃԵԿ-ի 5.19.1 և 5.19.2 «Հետիոտնային անցում» ճանապարհային նշաններով կահավորված հատվածից առաջ ավտոմեքենան կանգնեցրած տեղից երթևեկությունը վերսկսելուց առաջ չի համոզվել, որ դա անվտանգ է և խոչընդոտ չի ստեղծվի տվյալ հետիոտնային անցումով երթևեկելի մասն իր ընթացքի ուղղությամբ աջից դեպի ձախ կողմը ճանապարհը հատող հետիոտն Անահիտ Գրիգորի Կիրակոսյանի համար, հնարավորություն չի տվել վերջինիս ավարտելու երթևեկելի մասի հատումը, տեխնիկական տեսակետից ստեղծել է վթարային իրադրություն, ինչի արդյունքում ավտոմեքենայի առջևի հատվածով վրաերթի է ենթարկել հետիոտն Անահիտ Գրիգորի Կիրակոսյանին՝ դրանով իսկ պայմանավորել տվյալ վրաերթի առաջացումը, ինքն իրեն զրկելով այն կանխելու տեխնիկական հնարավորությունից, որի հետևանքով զույգ դաստակների, ձախ ազդրի վերին երրորդականի քերծվածքների, աջ գագաթ-քունքային շրջանի սալջարդ վերքի, ձախ ծնկահոդի հոդախախտի, ձախ ազդրոսկրի միջային կոճի, ձախ ոլոքի դիստալ մետաէպիֆիզի, ձախ վեգոսկրի, աջից 1,2,3-րդ կողոսկրերի, ձախից 2,3,4,5,6,7-րդ կողոսկրերի կոտրվածքների, որոնք ուղեկցվել են ձախակողմյան մինիմալ պնևմոմեդիաստինումով, գոտկային 4-5-րդ ողերի լայնական ելունների կոտրվածքների, աջ բազկոսկրի, աջ առաջին կողաճառի, ազդրոսկրի միջային վերկոճի, ոլոքի դիստալ մետաէպիֆիզի և վեգոսկրի բազմաթիվ կոտրվածքների ձևով վերջինիս առողջությանն անզգուշությամբ պատճառել է ծանր վնաս: (...)»։
2025 թվականի ապրիլի 17-ի որոշմամբ թիվ 60645924 քրեական վարույթով Լուսինե Սամվելի Գևորգյանի նկատմամբ որպես խափանման միջոց է կիրառվել գրավը՝ 300.000 ՀՀ դրամի չափով։
2025 թվականի ապրիլի 17-ի որոշմամբ թիվ 60645924 քրեական վարույթով որպես իրեղեն ապացույց է ճանաչվել «Նիսան» մակնիշի 701 CT 61 հաշվառման համարանիշի ավտոմեքենան և հանձնվել է Լուսինե Սամվելի Գևորգյանին։
2025 թվականի ապրիլի 30-ին թիվ 60645924 քրեական վարույթով կազմվել է մեղադրական եզրակացությունը, որը ՀՀ դատախազության Երևան քաղաքի դատախազության ավագ դատախազ Կարեն Իսրաելյանի՝ 2025 թվականի մայիսի 7-ի որոշմամբ հաստատվել է։
2025 թվականի մայիսի 8-ին թիվ 60645924 քրեական վարույթը՝ հաստատված մեղադրական եզրակացությամբ, ստացվել է Երևան քաղաքի առաջին ատյանի ընդհանուր իրավասության քրեական դատարան (քրեական գործին շնորհվել է թիվ ԵԴ1/1626/01/25 համարը), մակագրվել նույն դատարանի դատավոր Հ․Մանուկյանին և 2025 թվականի մայիսի 12-ին հանձնվել Դատարանի աշխատակազմին։
2025 թվականի մայիսի 14-ին Դատարանը որոշում է կայացրել ստանձնել թիվ ԵԴ1/1016/01/25 քրեական գործով վարույթը և նշանակել նախնական դատալսումներ:
Դատավարության կողմերի արտահայտած դիրքորոշումները.
2025 թվականի հոկտեմբերի 22-ին ստացվել է տուժող Անահիտ Գրիգորի Կիրակոսյանի դիմումը, համաձայն որի՝
«Սույնով հայտնում եմ, որ ինքնուրույն և ազատ կամարտահայտության վրա հիմնված փոխադարձ համաձայնությամբ հաշտվել եմ Լուսինե Գհորգյանի հետ և խնդրում եմ ԵԴ1/1626/01/25 քրեական գործով դադարեցնել Լուսինե Գհորգյանի նկատմամբ հարուցված հանրային քրեական հետապնդումը ՀՀ քրեական օրենսգրքի 82-րդ հոդվածի հաշտության հիմքով, իսկ քրեական գործի վարույթը կարճել։»
Դատական նիստի ընթացքում տուժողը հայտնեց, որ պնդում է ներկայացված դիմումը։
Մեղադրյալ Լուսինե Սամվելի Գևորգյանը հայտնեց, որ ցանկանում է, որպեսզի տուժողի հետ հաշտվելու հիմքով իր նկատմամբ քրեական հետապնդումը դադարեցվի և գիտակցում է դրա իրավական հետևանքները։
Հանրային մեղադրող Արմեն Բեգլարյանը հայտնեց, որ չի առարկում տուժողի հետ հաշտվելու հիմքով մեղադրյալի նկատմամբ քրեական հետապնդումը դադարեցնելու դեմ։
(Մանրամասն տե՛ս դատական նիստի արձանագրությունը):
Դատարանի իրավական վերլուծությունները և եզրահանգումները.
Լսելով դատավարության կողմերի դիրքորոշումները` Դատարանը գտնում է, որ սույն քրեական գործով պետք է մեղադրյալի նկատմամբ քրեական հետապնդումը դադարեցնել և քրեական գործի վարույթը կարճել հետևյալ պատճառաբանությամբ.
ՀՀ քրեական դատավարության օրենսգրքի 33-րդ հոդվածի համաձայն`
«1. Դատարանը սույն օրենսգրքով սահմանված կարգով իրավասու է՝
1) իրականացնելու վարույթ առաջին ատյանի կարգով.
2) իրականացնելու դատական երաշխիքների վարույթ.
3) իրականացնելու դատական վերանայման վարույթ.
4) վարույթ իրականացնելիս կիրառելու դատավարական սանկցիաներ.
5) վարույթ իրականացնելիս կիրառելու խափանման և անվտանգության միջոցներ, գույքի արգելադրում.
6) դատական ակտը հանձնելու կատարման:
2. Դատարանը սույն օրենսգրքով նախատեսված դեպքերում իրականացնում է այլ լիազորություններ:»
ՀՀ քրեական օրենսգրքի 342-րդ հոդվածի 1-ին մասի համաձայն`
«1. Ավտոմեքենա կամ մեխանիկական այլ տրանսպորտային միջոց վարող անձի կողմից ճանապարհային երթևեկության անվտանգության ապահովմանն ուղղված պահանջ կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոն խախտելը, որը մարդու առողջությանն անզգուշությամբ պատճառել է ծանր կամ միջին ծանրության վնաս՝
պատժվում է տուգանքով՝ տասնապատիկից երեսնապատիկի չափով, կամ հանրային աշխատանքներով՝ հարյուրից երկու հարյուր ժամ տևողությամբ, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` երկուսից հինգ տարի ժամկետով, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ առավելագույնը երեք տարի ժամկետով:
(…)»։
ՀՀ քրեական օրենսգրքի 17-րդ հոդվածի համաձայն`
«1. Հանցանքները դասակարգվում են չորս խմբի` ոչ մեծ ծանրության, միջին ծանրության, ծանր և առանձնապես ծանր:
(…)
3. Միջին ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 5 տարի ժամկետով ազատազրկումը:
(…):»
ՀՀ քրեական օրենսգրքի 82-րդ հոդվածի համաձայն`
«1. Եթե անձն առաջին անգամ է հանցանք կատարել, ապա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նրա ու տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնությունը, բացառությամբ այն դեպքերի, երբ կատարված հանցանքում առկա են ընտանիքում բռնության հատկանիշներ:
2. Եթե անձն առաջին անգամ է հանցանք կատարել, որը ոչ մեծ կամ միջին ծանրության հանցագործությանը հանցակցություն է, ապա նա հաշտության հիմքով ազատվում է քրեական պատասխանատվությունից, եթե առկա է հաշտության վերաբերյալ տուժողի և տվյալ հանցակցի՝ ինքնուրույն և ազատ կամարտահայտության վրա հիմնված փոխադարձ համաձայնությունը:
3. Եթե անչափահաս կամ սահմանափակ մեղսունակ անձն առաջին անգամ է հանցանք կատարել, ապա նա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և առկա է հաշտության վերաբերյալ տուժողի և հանցագործության համար մեղադրվող անձի շահերի պաշտպանության պարտականություն ունեցող անձի՝ ինքնուրույն և ազատ կամարտահայտության վրա հիմնված փոխադարձ համաձայնությունը:
4. Եթե հանցագործությունից տուժողը 14 տարին չլրացած անձ է կամ հոգեկան առողջության խնդիրների կամ մտավոր զարգացման մեջ հետ մնալու հետևանքով լրիվ կամ մասնակիորեն զրկված է իր դեմ ուղղված հանցագործության բնույթն ու հետևանքները գիտակցելու կամ իր վարքագիծը ղեկավարելու հնարավորությունից, ապա նրա դեմ ուղղված հանցանք կատարած անձը չի կարող հաշտության հիմքով ազատվել քրեական պատասխանատվությունից:
5. Նախկինում սույն հոդվածով նախատեսված հիմքով քրեական պատասխանատվությունից ազատված անձը չի կարող նույն հիմքով կրկին ազատվել քրեական պատասխանատվությունից:»
ՀՀ քրեական դատավարության օրենսգրքի 12-րդ հոդվածի համաձայն`
«1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(…)
12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից.
(…)
4. Սույն հոդվածի 1-ին մաuի 11-14-րդ կետերով նախատեսված հանգամանքների առկայությունը քրեական հետապնդումը բացառող չէ, եթե անձն առարկում է դրա դեմ այն հիմքով, որ չի կատարել իրեն մեղսագրվող արարքը: Այu դեպքում քրեական վարույթը շարունակվում է ընդհանուր կարգով, սակայն մեղադրական վերդիկտ կայացնելու դեպքում այդ անձի նկատմամբ պատիժ չի նշանակվում:»
ՀՀ քրեական դատավարության օրենսգրքի 315-րդ հոդվածի համաձայն`
«1. Սույն օրենսգրքի 12-րդ հոդվածի 1-ին մասի 3-14-րդ կետերով նախատեսված որևէ հանգամանքի առկայության դեպքում, երբ դա հնարավոր է առանց ապացույցների հետազոտման, դատարանը որոշում է կայացնում քրեական հետապնդումը դադարեցնելու և վարույթը կարճելու մասին: Եթե քրեական հետապնդումը բացառող հանգամանքը վերաբերում է մեղադրյալներից մեկին, ապա քրեական հետապնդումը դադարեցվում է միայն նրա նկատմամբ՝ առանց վարույթը կարճելու:
2. Քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները: Վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
3. Քրեական հետապնդումը դադարեցնելու և վարույթը կարճելու մասին որոշման պատճենն ուղարկվում է հանրային մեղադրողին և վարույթի մասնավոր մասնակիցներին:»
Վերոգրյալի հաշվառմամբ ուսումնասիրելով սույն քրեական գործի նյութերը (քննարկվող հարցի համատեքստում), ինչպես նաև դատավարության կողմերի հայտնած դիրքորոշումները՝ Դատարանն արձանագրում է, որ մեղադրյալ Լուսինե Սամվելի Գևորգյանին վերագրվում է ՀՀ քրեական օրենսգրքի 342-րդ հոդվածի 1-ին մասով նախատեսված հանցանքի կատարում, որում առկա չեն ընտանիքում բռնության հատկանիշներ։ Միաժամանակ Դատարանն արձանագրում է, որ մեղադրյալ Լուսինե Սամվելի Գևորգյանին սույն քրեական գործով մեղսագրվող՝ ՀՀ քրեական օրենսգրքի 342-րդ հոդվածի 1-ին մասով նախատեսված հանցագործությունը դասվում է միջին ծանրության հանցագործությունների շարքին և տուժող Անահիտ Գրիգորի Կիրակոսյանը դատական նիստով հայտնել է, որ հաշտվել է մեղադրյալ Լուսինե Սամվելի Գևորգյանի հետ։
Միևնույն ժամանակ մեղադրյալ Լուսինե Սամվելի Գևորգյանի դատվածության վերաբերյալ տեղեկանքի ուսումնասիրությունից հետևում է, որ վերջինս չունի դատվածություն, ինչպես նաև նախկինում քրեական պատասխանատվությունից չի ազատվել ՀՀ քրեական օրենսգրքի 82-րդ հոդվածով նախատեսված հիմքով։
Հարկ է նշել նաև, որ մեղադրյալ Լուսինե Սամվելի Գևորգյանը չի առարկել իր նկատմամբ տուժողի հետ հաշտության հիմքով հետապնդումը դադարեցնելու դեմ:
Վերոգրյալի հաշվառմամբ` Դատարանը գտնում է, որ մեղադրյալ Լուսինե Սամվելի Գևորգյանի նկատմամբ ՀՀ քրեական օրենսգրքի 342-րդ հոդվածի 1-ին մասով քրեական հետապնդում չի կարող իրականացվել, քանի որ տուժողը հաշտվել է մեղադրյալի հետ:
Ամբողջականացնելով ասվածը՝ Դատարանը գտնում է, որ հարկ է մեղադրյալ Լուսինե Սամվելի Գևորգյանի նկատմամբ ՀՀ քրեական օրենսգրքի 342-րդ հոդվածի 1-ին մասով քրեական հետապնդումը դադարեցնել` ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի հիմքով (ՀՀ քրեական օրենսգրքի 82-րդ հոդվածի հիմքով), իսկ թիվ ԵԴ1/1626/01/25 քրեական գործի վարույթը կարճել:
ՀՀ քրեական դատավարության օրենսգրքի 315-րդ հոդվածի 2-րդ մասի համաձայն` քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները, վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանը գտնում է, որ հարկ է Լուսինե Սամվելի Գևորգյանի նկատմամբ որպես խափանման միջոց կիրառված 300.000 (երեք հարյուր հազար) ՀՀ դրամի չափով գրավը վերադարձնել այն վճարողին:
Անդրադառնալով իրեղեն ապացույցների տնօրինման հարցին՝ Դատարանը գտնում է, որ հարկ է 2025 թվականի ապրիլի 17-ի որոշմամբ թիվ 60645924 քրեական վարույթով որպես իրեղեն ապացույց ճանաչված՝ «Նիսան» մակնիշի 701 CT 61 հաշվառման համարանիշի ավտոմեքենան թողնել Լուսինե Սամվելի Գևորգյանի տնօրինմանը՝ որոշումն օրինական ուժի մեջ մտնելուց հետո։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետով, 33-րդ, 270-րդ, 315-րդ հոդվածներով` Դատարանը.

Ո Ր Ո Շ Ե Ց

Մեղադրյալ Լուսինե Սամվելի Գևորգյանի նկատմամբ ՀՀ քրեական օրենսգրքի 342-րդ հոդվածի 1-ին մասով քրեական հետապնդումը դադարեցնել` ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի հիմքով (ՀՀ քրեական օրենսգրքի 82-րդ հոդվածի հիմքով)։
Թիվ ԵԴ1/1626/01/25 քրեական գործի վարույթը կարճել:
Լուսինե Սամվելի Գևորգյանի նկատմամբ որպես խափանման միջոց կիրառված 300.000 (երեք հարյուր հազար) ՀՀ դրամի չափով գրավը վերադարձնել այն վճարողին։
2025 թվականի ապրիլի 17-ի որոշմամբ թիվ 60645924 քրեական վարույթով որպես իրեղեն ապացույց ճանաչված՝ «Նիսան» մակնիշի 701 CT 61 հաշվառման համարանիշի ավտոմեքենան թողնել Լուսինե Սամվելի Գևորգյանի տնօրինմանը՝ որոշումն օրինական ուժի մեջ մտնելուց հետո։
Որոշումը կարող է բողոքարկվել ՀՀ քրեական վերաքննիչ դատարան` ստանալու օրվանից հետո մեկամսյա ժամկետում:


ԴԱՏԱՎՈՐ` ՀԱՐՈՒԹՅՈՒՆ ՄԱՆՈՒԿՅԱՆ