ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
քրեական գործ թիվ ԵԴ1/1563/01/25
Երևան քաղաքի առաջին ատյանի ընդհանուր իրավասության քրեական դատարանը՝

ՆԱԽԱԳԱՀՈՒԹՅԱՄԲ`
ԴԱՏԱՎՈՐ Ա.ԴԱՆԻԵԼՅԱՆԻ,

ՔԱՐՏՈՒՂԱՐՈՒԹՅԱՄԲ` Լ.ՄԱԿԱՐՅԱՆԻ,

ՄԱՍՆԱԿՑՈՒԹՅԱՄԲ`
ՀԱՆՐԱՅԻՆ ՄԵՂԱԴՐՈՂ,
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ
ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ
ՇՐՋԱՆՆԵՐԻ ԴԱՏԱԽԱԶՈՒԹՅԱՆ
ԱՎԱԳ ԴԱՏԱԽԱԶ Վ․ՍԱՐԳՍՅԱՆԻ,

ՄԵՂԱԴՐՅԱԼ Է․ԱՍՐՅԱՆԻ,
ՊԱՇՏՊԱՆ Ռ․ՍԻՐԵԿԱՆՅԱՆԻ,

2025 թվականի օգոստոսի 12-ին Երևան քաղաքում,
դատարանում, դռնբաց դատական նիստում քննելով քրեական գործն ըստ մեղադրանքի

Էդմոն Սեյրանի Ասրյանի՝
(ծնված՝ 1996 թվականի սեպտեմբերի 11-ին Երևան քաղաքում, հայ, ՀՀ քաղաքացի, միջնակարգ կրթությամբ, չի աշխատում, չդատված, ամուսնացած, խնամքին երկու անչափահաս երեխա, ըստ իր հայտարարության՝ մասնակցել է 44-օրյա պատերազմին, ունի պարգևատրումներ, վատառողջ է, հաշվառված է ...)
ՀՀ քրեական օրենսգրքի 396-րդ հոդվածի 1-ին մասով,

Պ Ա Ր Զ Ե Ց
Գործի դատավարական ընթացքը.
1. 2025 թվականի մարտի 10-ին Էդմոն Սեյրանի Ասրյանը ձերբակալվել է՝ թմրանյութ ապօրինի պահելու անմիջականորեն ծագած հիմնավոր կասկածի հիմքով։
2․ 2025 թվականի մարտի 10-ին ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննության բաժնում (այսուհետ՝ նաև Նախաքննության մարմին) ՀՀ քրեական օրենսգրքի 393-րդ հոդվածի 2-րդ մասի 3-րդ կետով և 396-րդ հոդվածի 2-րդ մասով նախաձեռնվել է թիվ 14141525 քրեական վարույթը:
3. Նախաքննության մարմնի 2025 թվականի մարտի 13-ի որոշմամբ Էդմոն Սեյրանի Ասրյանը ազատ է արձակվել՝ նրան անազատության մեջ պահելու անհրաժեշտությունը վերանալու հիմքով։
4. Հսկող դատախազի 2025 թվականի մարտի 13-ի որոշմամբ քննիչի միջնորդության հիման վրա Էդմոն Սեյրանի Ասրյանի նկատմամբ ՀՀ քրեական օրենսգրքի 396-րդ հոդվածի 1-ին մասով հարուցվել է հանրային քրեական հետապնդում։
5. Նախաքննության մարմնի 2025 թվականի մարտի 13-ի որոշմամբ մեղադրյալ Էդմոն Սեյրանի Ասրյանի նկատմամբ որպես խափանման միջոց է ընտրվել բացակայելու արգելքը:
5.1. Նախաքննության մարմնի կողմից 2025 թվականի մարտի 13-ին Էդմոն Սերյանի Ասրյանին ներկայացվել է մեղադրանք։
6. Նախաքննության մարմնի 2025 թվականի ապրիլի 25-ի որոշմամբ Էդմոն Ասրյանի անձնական խուզարկությամբ հայտնաբերված «MDMB (N)-022 և MDMB (N)-2201» տեսակի թմրամիջոցը ճանաչվել է իրեղեն պացույց։
7. Նախաքննության մարմնի 2025 թվականի ապրիլի 28-ի որոշմամբ թիվ 14141525 քրեական վարույթից անջատվել է անհայտ անձի կողմից Էդմոն Ասրյանին թմրամիջոց իրացնելու վերաբերյալ թիվ 14171025 վարույթը։
7.1. 2025 թվականի ապրիլի 29-ին Հսկող դատախազի գրավոր համաձայնությամբ Նախաքննության մարմինը նախաձեռնել է համաձայնությամբ տուգանք նշանակելու վարույթ՝ այդ մասին կազմելով արձանագրություն:
8. 2025 թվականի մայիսի 07-ին թիվ 14141525 վարույթի նյութերը մեղադրական եզրակացությամբ ստացվել են Երևան քաղաքի առաջին ատյանի ընդհանուր իրավասության քրեական դատարանում՝ ՀՀ քրեական դատավարության օրենսգրքի 464.8-րդ հոդվածով նախատեսված՝ համաձայնությամբ տուգանք նշանակելու վարույթի կարգով քննելու համար, նույն օրը մակագրվել և 2025 թվականի մայիսի 08-ին փաստացի հանձնվել են Երևան քաղաքի առաջին ատյանի ընդհանուր իրավասության քրեական դատարանի դատավոր Ա․Դանիելյանին:
8.1 2025 թվականի մայիսի 08-ին որոշում է կայացվել քրեական գործով վարույթ ստանձնելու և համաձայնությամբ տուգանք նշանակելու վարույթ հարուցելու մասին: Դատավճռի կայացման օր է նշանակվել 2025 թվականի մայիսի 22-ը:
8.2 2025 թվականի մայիսի 22-ին որոշում է կայացվել քրեական գործով վարույթ ստանձնելու և համաձայնությամբ տուգանք նշանակելու վարույթը դադարեցնելու և նախնական դատալսումներ նշանակելու մասին: Նախնական դատալսումներով դատական նիստը նշանակվել է նույն թվականի հունիսի 12-ին:

Մեղադրանքի փաստական նկարագրությունը.
9. Մեղադրյալ Էդմոն Սեյրանի Ասրյանին ՀՀ քրեական օրենսգրքի 396-րդ հոդվածի 1-ին մասով մեղադրանք է ներկայացվել հետևյալ արարքի համար. « (...) նա, խախտելով «Թմրանյութերի և հոգեմետ (հոգեներգործող) նյութերի մասին» 2002 թվականի դեկտեմբերի 26-ի ՀՀ օրենքի 11-րդ հոդվածի 2-րդ կետի և ՀՀ կառավարության 2010 թվականի մարտի 18-ի թիվ 270-ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ թմրամիջոցների և հոգեմետ (հոգեներգործուն) նյութերի շրջանառություն իրականացնելու՝ թմրամիջոց ձեռք բերելու և պահելու թույլտվություն, առանց իրացնելու նպատակի՝ քննությամբ դեռևս հստակ չպարզված ժամանակահատվածում և հանգամանքներում, իր անձնական օգտագործման համար, ապօրինի ձեռք է բերել և ապօրինի պահել զգալի չափերի՝ ընդհանուր՝ 0․47 գրամ քաշով «MDMB (N)-022 և MDMB (N)-2201» թմրամիջոցներ կրող ծխախոտային խառնուրդ համարվող թմրամիջոց, որը 2025 թվականի մարտի 10-ին հայտնաբերվել և վերցվել է նույն օրը ՀՀ ՆԳՆ ոստիկանության ՔՈԳՎ Երևան քաղաքի վարչության ԹԱՇԴՊ բաժնում, ավագ քրեական ոստիկան Ն․ Գրիգորյանի կողմից կատարված անձնական խուզարկության ժամանակ»:
9․1․ Նախանական դատալսումների փուլում Հանրային մեղադրողը հայտարարեց մեղադրյալին վերագրվող արարքի իրավական գնահատականը փոխելու վերաբերյալ՝ խնդրելով մեղադրյալի արարքի որակումը դիտարկել ՀՀ քրեական օրենսգրքի 396-րդ հոդվածի 2-րդ մասով։

Հիմնական դատալսումների ընթացքում հետազոտված թույլատրելի ապացույցները.
10․ Ձերբակալման վերաբերյալ 2025 թվականի մարտի 10-ի արձանագրությունը, որի համաձայն՝ 2025 թվականի մարտի 10-ին ժամը 12։31-ին, Երևան քաղաքի Ադոնց և Գրիբոյեդով խաչմերուկի մոտից Էդմոն Սեյրանի Ասրյանը ձերաբակալվել է՝ ապօրինի թմրանյութ պահելու և օգտագործելու, ինչպես նաև սառը զենք կրելու անմիջականորեն ծագած հիմնավոր կասկածի հիմքով։
(դատական նիստի արձանագրություն, գ.թ․ 5)
11. Անձնական խուզարկություն կատարելու մասին 2025 թվականի մարտի 10-ի արձանագրությունը, որի համաձայն՝ ձերբակալված Էդմոն Սեյրանի Ասրյանի հագին եղած տաբատի հետևի ձախ գրպանից հայտնաբերվել է թվով մեկ կապույտ գույնի կպչում ժապավենով փաթեթավորված զիպ փականով պոլիէթիլենային տոպրակ՝ մեջը լցված «Շոկո» տեսակի թմրամիջոցի նմանվող յուրահատուկ հոտով շագանակագույն զանգված։
(դատական նիստի արձանագրություն, գ.թ․ 4)
12․ Թվային խուզարկություն կատարելու մասին 2025 թվականի ապրիլի 7-ի արձանագրությունը և դրան կից լուսանկարները, որոնց համաձայն՝ զննության ընթացքում մուտք է գործվել Էդմոն Ասրյանի բջջային հեռախոսի անձնական լուսանկարների և տեսագուրթյունների պահման պահոց, որի ուսումնասիրությամբ անձնական լուսանկարների հետ մեկտող հայտնաբերվել է թվով մեկ կորդինացված թվերով լուսանկար։ Լուսանկարի տեխնիկական բաժնից պարզվել է, որ այն կատարվել է 2025 թվականի մարտի 9-ին՝ ժամը 20։11-ին։ Լուսանկարի վրա առկա է եղել կարմիր գույնի սլաքով ուղեցույց իսկ լուսանկարի ներքևի աջակողմյան հատվածում առկա է եղե «ЩОКО։ Davitashen:1g: KAPUT IZO HOXI TAK» գրառումը։ Արձանագրվել է, որ վերը նկարագրված նկարի աջակողմյան հատվածի «ЩОКО» գրառումը հանդիսանում է թմրանյութի ժարգոնային անվանում, իսկ համաձայն ՀՀ կառավարության 2018 թվականի հունիսի 27-ի թիվ 707-Ն որոշման այն անվանվում է «MDMB (N)-022 և MDMB (N)-2201»։
(դատական նիստի արձանագրություն, գ.թ․ 117-120)
13․ «Հայաստանի Հանրապետության քննչական կոմիտեի փորձաքրեագիտական կենտրոն» ՊՈԱԿ-ի 2025 թվականի մարտի 12-ի թիվ 958Ք-25 եզրակացությունը, որի «Հետևություններ» մասի համաձայն՝ «Փորձաքննությանը ներկայացված 0,47 գրամ հաստատուն քաշով բուսական զանգվածը՝ ծխախոտային խառնուրդն իր վրա կրում է «MDMB (N)-022 և MDMB (N)-2201» կրճատ անվանմամբ թմրամիջոցներ»:
(դատական նիստի արձանագրություն, գ.թ. 32-36)
13․1․ Զննում կատարելու մասին 2025 թվականի փետրվարի 21-ի արձանագրությունը, որի համաձայն՝ զննության են ենթարկվել դատանյութագիտական և բուսաբանական համալիր փորձաքննության փորձագետի թիվ 958Ք-25 եզրակացությամբ ստացված թվով մեկ փաթեթը և դրա պարունակությունը։
(դատական նիստի արձանագրություն, գ.թ. 123-124)
13.2. Իրեղեն ապացույց ճանաչված «MDMB (N)-022 և MDMB (N)-2201» տեսակի թմրամիջոցը:
(դատական նիստի արձանագրություն)
14․ Զննում կատարելու մասին 2025 թվականի ապրիլի 25-ի արձանագրությունը և որպես արտավարութային փաստաթուղթ ապացույց ճանաչված՝ «Վիվա Արմենիա» ՓԲ ընկերության կողմից էլեկտրոնային եղանակով ստացված Էդմոն Ասրյանի կողմից փաստացի շահագործվող 077-366-659 բջջային հեռախոսահամարի փոխանցվող տվյալներ պարունակող «Exel» պահոցի լազերային սկավառակը, որոնց համաձայն՝ լազերային սկավառակի մեջ ներբեռնված «Exel» տեսակի պահոցի տվյալներից երևում է, որ Էդմոն Սեյրանի Ասրյանի կողմից փաստացի շահագործվող 077-366-659 բջջային հեռախոսահամարը 2025 թվականի մարտի 09-ին ժամը 20։27-ին շահագործվել է Երևան քաղաքի Դավթաշեն վարչական շրջանում։
(դատական նիստի արձանագրություն, գ.թ. 108, 136-138)

Լրացուցիչ դատալսումների ընթացքում հետազոտված նյութերը և ապացույցները.
15. «ԷԿԵՆԳ» ՓԲԸ փոխգործելիության հարթակի միջոցով ստացված՝ դատվածության և հետախուզման առկայության հարցում ձև 8-ը, որի համաձայն՝ Էդմոն Սեյրանի Ասրյանի՝ դատվածության ունենալու վերաբերյալ տվյալներ չկան:
(տե՛ս դատական նիստի արձանագրություն)
16․ «ԷԿԵՆԳ» ՓԲԸ փոխգործելիության հարթակի միջոցով ՀՀ պետական եկամուտների կողմիտեի էլեկտրոնային շտեմարանից արտատպված տեղեկատվությունը, որի համաձայն՝ հանցանքին նախորդող 12 ամիսների ընթացքում Էդմոն Սեյրանի Ասրյանի եկամուտի վերաբերյալ տեղեկատվություն առկա չէ:
(դատական նիստի արձանագրություն)
17․ Ամուսնության պետական գրանցման մասին 2021 թվականի նոյեմբերի 25-ի թիվ 888/10015/2021 ակտը, որի համաձայն՝ Էդմոն Սեյրանի Ասրյանը ամուսնացած է:
(տե՛ս դատական նիստի արձանագրությունը)
18. Ծննդի պետական գրանցման մասին թիվ 487545 ակտը, որի համաձայն՝ Դեյվիդ Էդմոնի Ասրյանը ծնվել է 2021 թվականի նոյեմբերի 16-ին, որպես հայր նշված է Էդմոն Սեյրանի Ասրյանը։
(տե՛ս դատական նիստի արձանագրություն)
19. «Ծննդի պետական գրանցման մասին թիվ 952600 գրանցման ակտը, որի համաձայն՝ Լուիզա Էդմոնի Ասրյանը ծնվել է 2025 թվականի հունվարի 17-ին, որպես հայր նշված է Էդմոն Սեյրանի Ասրյանը։
(տե՛ս դատական նիստի արձանագրություն)

Դատարանի փաստական վերլուծությունները և հաստատած փաստական հանգամանքները․
20․ Հետազոտելով սույն դատավճռի 10-14-րդ կետերում շարադրված ապացույցները՝ Դատարանը գտնում է, որ դրանք վերաբերելի են սույն քրեական գործին: Դրանք իրենց համակցության մեջ գնահատելով՝ Դատարանը գտնում է նաև, որ բովանդակային տեսանկյունից հակասություններ չեն պարունակում: Հաշվի առնելով դրանցից յուրաքանչյուրի աղբյուրի հատկանիշները, ձևավորման հանգամանքները, ապացուցողական տեղեկությունը ձեռք բերելու միջոցը՝ Դատարանը գտնում է, որ դրանք նաև հավաստի են:
21. Դատարանը, պատշաճ ապացույցների բավարար համակցությամբ, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ գտնում է, որ «հիմնավոր կասկածից վեր» ապացուցողական չափանիշին համապատասխան ապացուցված է, որ մեղադրյալ Էդմոն Սեյրանի Ասրյանը, չունենալով բժշկական նպատակներով կամ բժշկի նշանակմամբ թմրամիջոցների և հոգեմետ (հոգեներգործուն) նյութերի շրջանառություն իրականացնելու՝ թմրամիջոց ձեռք բերելու և պահելու թույլտվություն, իր անձնական օգտագործման համար(տե՛ս սույն դատավճռի 12-րդ կետը) ձեռք է բերել և պահել ընդհանուր 0․47 գրամ քաշով «MDMB (N)-022 և MDMB (N)-2201» թմրամիջոցներ կրող ծխախոտային խառնուրդ համարվող թմրամիջոց (տե՛ս սույն դատավճռի 13-13.2-րդ կետերը), որը 2025 թվականի մարտի 10-ին հայտնաբերվել և վերցվել է (տե՛ս սույն դատավճռի 10-11-րդ կետերը):

Պատճառաբանական մաս.
I. Մեղադրյալին վերագրված արարքի իրավական գնահատականը.
22. ՀՀ քրեական օրենսգրքի 396-րդ հոդվածի համաձայն՝
«1. Առանց իրացնելու նպատակի զգալի չափերով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ կամ պրեկուրսոր ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը կամ առաքելը՝
(...)
2. Սույն հոդվածի 1-ին մասով նախատեսված արարքը, որը կատարվել է խոշոր չափերով՝
պատժվում է տուգանքով՝ տասնապատիկից երեսնապատիկի չափով, կամ հանրային աշխատանքներով՝ հարյուրից երկու հարյուր ժամ տևողությամբ, կամ ազատության սահմանափակմամբ՝ մեկից երեք տարի ժամկետով, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ մեկից երեք տարի ժամկետով:
(...)»:
«Թմրամիջոցների և հոգեմետ (հոգեներգործուն) նյութերի մանր չափերը, շրջանառությունն արգելված՝ թմրամիջոցներ, հոգեմետ (հոգեներգործուն), խիստ ներգործող կամ թունավոր նյութեր պարունակող բույսերի ցանկը, դրանց մանր, զգալի, խոշոր և առանձնապես խոշոր չափերը, պրեկուրսորների զգալի, խոշոր և առանձնապես խոշոր չափերը. թունավոր նյութերի ցանկը, խիստ ներգործող նյութերի ցանկը և դրանց խոշոր չափերը սահմանելու մասին» ՀՀ կառավարության 2018 թվականի հունիսի 27-ի թիվ 707-Ն որոշման թիվ 1 հավելվածի 994-րդ կետի համաձայն՝ այդ թվում՝ «MDMB (N)-022» և «MDMB (N)-2201» թմրամիջոցներ կրող ծխախոտային խառնուրդ համարվող տեսակի թմրամիջոցի մանր չափը 0.01-0.05 գրամ է:
23. Վերոգրյալի հիման վրա հաշվի առնելով Դատարանի կողմից սույն դատավճռի 21-րդ կետում հաստատված փաստական հանգամանքները՝ Դատարանը գտնում է, որ ապացուցված է, որ մեղադրյալ Էդմոն Սեյրանի Ասրյանն առանց իրացնելու նպատակի ապօրինի ձեռք է բերել և պահել է խոշոր չափերով թմրամիջոց: Դատարանը գտնում է, որ ապացուցված է մեղադրյալ Էդմոն Սեյրանի Ասրյանն մեղավորությունն իրեն մեղսագրված հանցանքում, իսկ նրա արարքը համապատասխանում է ՀՀ քրեական օրենսգրքի 396-րդ հոդվածի 2-րդ մասով նախատեսված հանցագործության հատկանիշներին։
II. Մեղադրյալ Էդմոն Ասրյան քրեական պատասխանատվության հարցը.
24. Հաստատված համարելով մեղադրյալ Էդմոն Ասրյանի մեղավորությունն իրեն մեղսագրված հանցանքի կատարման մեջ՝ Դատարանը գտնում է, որ անհրաժեշտ է անդրադառնալ մեղադրյալի նկատմամբ պատիժ նշանակելու հետ կապված հետևյալ հարցերին.
ա) արդյո՞ք ապացուցված են մեղադրյալի պատասխանատվությունը և պատիժը մեղմացնող կամ ծանրացնող հանգամանքները.
բ) նա ենթակա է արդյո՞ք պատժի իր կատարած հանցանքի համար.
գ) ի՞նչ պատիժ պետք է նշանակվի նրա նկատմամբ.
դ) նա արդյո՞ք պետք է կրի իր նկատմամբ նշանակված պատիժը.
25. Անդրադառնալով «ա» կետով բարձրացված հարցին՝ Դատարանն անհրաժեշտ է համարում նշել հետևյալը.
ՀՀ քրեական օրենսգրքի 70-րդ հոդվածի համաձայն`
«1. Քրեական պատասխանատվությունը կամ պատիժը մեղմացնող հանգամանքներ են՝
(…)
4) պատիժ նշանակելու պահին հանցանք կատարած անձի խնամքի տակ անչափահասի կամ հաշմանդամություն ունեցող անձի առկայությունը, բացառությամբ այն դեպքերի, երբ հանցանքը կատարվել է խնամքի տակ գտնվող անձի նկատմամբ,
(…)
2. Պատիժ նշանակելիս դատարանը կարող է հաշվի առնել նաև սույն հոդվածի 1-ին մասով չնախատեսված մեղմացնող այլ հանգամանքներ:»:
25.1. Դատարանը որպես մեղադրյալ Էդմոն Ասրյանի պատիժը մեղմացնող հանգամանք է դիտարկում այն, որ՝
- պատիժ նշանակելու պահին նրա խնամքին է գտնվում երկու անչափահաս երեխա (տե՛ս սույն դատավճռի 18-19-րդ կետերը),
- ներկայացված մեղադրանքում իրեն մեղավոր է ճանաչել, զղջացել է իր կատարած արարքի համար (տե՛ս, mutatis mutandis, Սերոբ Սարգսյանի գործով Վճռաբեկ դատարանի՝ 2012 թվականի նոյեմբերի 1-ի թիվ ՍԴ/0109/01/12 որոշման 26-րդ կետը)։
25․2․ Դատարանն արձանագրում է, որ մեղադրյալ Էդմոն Ասրյանի պատասխանատվությունը կամ պատիժը ծանրացնող հանգամանքներ առկա չեն։
26․Անդրադառնալով «բ» կետով բարձրացված հարցին՝ Դատարանն արձանագրում է, որ սույն քրեական գործով մեղադրյալ Էդմոն Ասրյանին պատժից ազատելու հիմքեր առկա չեն, հետևաբար՝ նա ենթակա է պատժի իր կատարած հանցանքի համար։
27․ Անդրադառնալով «գ» կետով բարձրացված հարցին՝ Դատարանն անհրաժեշտ է համարում նշել հետևյալը.
ՀՀ քրեական օրենսգրքի 7-րդ հոդվածի 1-ին մասի համաձայն՝
«Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:»:
ՀՀ քրեական օրենսգրքի 55-րդ հոդվածի 2-րդ մասի համաձայն՝
«Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»:
ՀՀ քրեական օրենսգրքի 69-րդ հոդվածի համաձայն՝
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ (…):»:
27․1․ Պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են՝
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
Պատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ՝ ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները՝ ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն։
Նշանակվող պատժի արդարացիության հիմնական պահանջներից է այն, որ պատիժը պետք է համապատասխանի հանցագործության հանրային վտանգավորության աստիճանին և բնույթին:
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա:
Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով: Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս: Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն:
Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը:
Արարքի հանրային վտանգավորության բնույթի որոշման հարցում կարևորվում է խախտված քրեաիրավական նորմով պաշտպանվող հասարակական հարաբերության սոցիալական նշանակությունը: Պատիժ նշանակելիս դատարանները պարտավոր են հաշվի առնել տվյալ ժամանակահատվածում քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը:
27․2․Վերը մեջբերված իրավական նորմերում և դիրքորոշումներում սահմանված չափանիշների համատեքստում մեղադրյալ Էդմոն Ասրյանի նկատմամբ պատժի տեսակը որոշելիս Դատարանը հաշվի է առնում հետևյալը.
- նրա կողմից ՀՀ քրեական օրենսգրքի 396-րդ հոդվածի 2-րդ մասով կատարված հանցագործության բնույթը և հանրության համար վտանգավորության աստիճանը, մասնավորապես այն, որ նրան մեղսագրված արարքը բնակչության առողջության դեմ ուղղված, դիտավորյալ, միջին ծանրության հանցագործություն է, թմրանյութը «MDMB (N)-022 և MDMB (N)-2201» թմրամիջոցներ կրող ծխախոտային խառնուրդ տեսակի թմրամիջոց է, որը վտանգավորության և անձի օրգանիզմի վրա ազդեցության հարաբերականորեն բարձր աստիճան ունի, դրա չափը 0,47 գրամ է, որը մոտ այդ տեսակի համար սահմանված խոշոր չափի նվազագույն սահմանին (0․25 գրամ),
- խախտված հասարակական հարաբերության սոցիալական նշանակությունը,
- թմրամիջոցների ապօրինի շրջանառության դեմ պայքարի ոլորտում պետության քրեական քաղաքականության ուղղվածությունը,
- պատասխանատվությունը կամ պատիժը մեղմացնող, սույն դատավճռի 25.1-րդ կետում նշված հանգամանքները, ինչպես նաև պատասխանատվությունը կամ պատիժը ծանրացնող հանգամանքների բացակայությունը,
- անձը բնուագրող տվյալները, այդ թվում՝ հանցանքն առաջին անգամ կատարելը (տե՛ս սույն դատավճռի 20-22-րդ կետերը), նրա ընտանեկան դրությունը, անչափահաս երեխաների մանկահասակ լինելը (տե՛ս սույն դատավճռի 15-րդ, 17-19-րդ կետերը),
Վերոգրյալի հաշվառմամբ՝ Դատարանը հանգում է այն հետևության, որ տվյալ դեպքում հոդվածի սանկցիայով նախատեսված ամենամեղմ պատժատեսակի՝ տուգանքի միջոցով հնարավոր է ապահովել պատժի նպատակների իրացվելիությունը:
27.3. ՀՀ քրեական օրենսգրքի 3-րդ հոդվածի 1-ին մասի համաձայն՝
« Սույն օրենսգրքում օգտագործվում են հետևյալ հասկացությունները․
(…)
6) ամսական եկամուտ` հանցանքն ավարտվելու օրվան նախորդող 12 ամիսների ընթացքում անձի ստացած միջին ամսական եկամտի 35 տոկոսը: Միջին ամսական եկամտի մեջ հաշվարկվում են ստացվող աշխատավարձը և դրան հավասարեցված այլ վճարումները, անձի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտը (շահաբաժինը, տոկոսը, ռոյալթին, վարձակալական վճարը): Ամսական եկամուտը հաշվարկելիս հաշվի չեն առնվում դրանց համար վճարվող հարկերը, տուրքերը կամ այլ վճարներ.
(…)»:
ՀՀ քրեական օրենսգրքի 59-րդ հոդվածի համաձայն՝
«(…)
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
(…)
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
(…)
7. Տուգանքի նշանակման հնարավորությունը և չափը դատարանը որոշում է՝ հաշվի առնելով հանցագործության ծանրությունը, հանցագործությամբ պատճառված վնասի բնույթն ու չափը, հանցագործությամբ ստացված գույքային կամ ոչ գույքային բնույթի օգուտները, դատապարտվողի ու նրա ընտանիքի գույքային դրությունը, ինչպես նաև դատապարտվողի՝ եկամուտ ստանալու հնարավորությունը կամ նրան պատկանող այնպիսի գույքի առկայությունը, որի վրա կարող է բռնագանձում տարածվել:»:
8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ (…)»:
«Նվազագույն ամսական աշխատավարձի մասին» օրենքի 1-ին հոդվածի համաձայն՝ «Հայաստանի Հանրապետությունում նվազագույն ամսական աշխատավարձը սահմանել 75000 դրամ:»
Վերոգրյալի հիման վրա, նկատի ունենալով սույն դատավճռի 27․2-րդ կետում նշված հանգամանքները, անձը բնութագրող տվյալները՝ Դատարանը գտնում է, որ մեղադրյալի նկատմամբ պետք է նշանակել տուգանք՝ այն սահմանելով նվազագույն աշխատավարձի տասնապատիկի չափով:
Դատարանը գտնում է, որ վերոնշյալ պատժատեսակը և դրա չափը սույն դեպքում համաչափ են մեղադրյալ Է․Ասրյանի անձին և նրա կատարած հանցանքին։
Նկատի ունենալով, որ հանցանքն ավարտվելու օրվան նախորդող 12 ամիսների ընթացքում Էդմոն Ասրյանի կողմից եկամուտ ստանալու վերաբերյալ տվյալներ առկա չեն (տե՛ս սույն դատավճռի 16-րդ կետը)` մեղադրյալ Էդմոն Ասրյանի նկատմամբ նշանակված տուգանքի չափը պետք է հաշվարկել հանցանքը կատարելու պահին նվազագույն աշխատավարձի` 75.000 (յոթանասունհինգ հազար) ՀՀ դրամի հաշվարկով, որի դեպքում այն կկազմի 750.000 (յոթ հարյուր հիսուն հազար) ՀՀ դրամ:
Միևնույն ժամանակ ղեկավարվելով ՀՀ քրեական օրենսգրքի 79-րդ հոդվածով, նկատի ունենալով, որ մեղադրյալ Էդմոն Ասրյանի ձերբակալման արդյունքում երեք օր գտնվել է անազատության մեջ՝ Դատարանը գտնում է, որ Էդմոն Սեյրանի Ասրյանի նկատմամբ նշանակված պատիժն անհրաժեշտ է մեղմացնել և նրա նկատմամբ վերջնական պատիժ սահմանել տուգանք՝ նվազագույն աշխատավարձի իննապատիկի՝ 675.000 (վեց հարյուր յոթանասունհինգ հազար) ՀՀ դրամ գումարի չափով:
28. Անդրադառնալով «դ» կետով բարձրացված հարցին՝ Դատարանը գտնում է, որ մեղադրյալ Էդմոն Ասրյանը պետք է կրի իր նկատմամբ նշանակված պատիժը:
29. Անդրադառնալով իրեղեն ապացույցների տնօրինման հարցին՝ Դատարանը գտնում է, որ դատավճիռն օրինական ուժի մեջ մտնելուց հետո Նախաքննության մարմնի 2025 թվականի ապրիլի 25-ի որոշմամբ որպես իրեղեն ապացույց ճանաչված թմրամիջոցն անհրաժեշտ է վերադարձնել թիվ 14141525 քրեական վարույթն իրականացնող մարմնին։
30. Անդրադառնալով վարույթային ծախսերին՝ Դատարանը գտնում է, որ Էդմոն Ասրյանից հօգուտ Հայաստանի Հանրապետության պետական բյուջեի անհրաժեշտ է գանձել փորձաքննության արժեք կազմող 108.000 (հարյուր ութ հազար) ՀՀ դրամը:
31. Անդրադառնալով մեղադրյալ Էդմոն Ասրյանի նկատմամբ կիրառված խափանման միջոցին՝ բացակայելու արգելքին, Դատարանը գտնում է, որ մինչև սույն դատավճռի օրինական ուժի մեջ մտնելն այն պետք է թողնել անփոփոխ՝ դատական ակտի հնարավոր բողոքարկման դեպքում վերջինիս դատավարական պարտականությունների պատշաճ կատարումն ապահովելու համար:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 100-րդ, 167-րդ, 342-րդ, 347-350-րդ հոդվածներով՝ Դատարանը

Վ Ճ Ռ Ե Ց
1. Մեղադրյալ Էդմոն Սեյրանի Ասրյանին մեղավոր ճանաչել ՀՀ քրեական օրենսգրքի 396-րդ հոդվածի 2-րդ մասով նախատեսված հանցանքում և դատապարտել տուգանքի՝ նվազագույն աշխատավարձի տասնապատիկի՝ 750.000 (յոթ հարյուր հիսուն հազար) ՀՀ դրամ գումարի չափով։
ՀՀ քրեական օրենսգրքի 79-րդ հոդվածի կիրառմամբ՝ Էդմոն Սեյրանի Ասրյանի նկատմամբ նշանակված պատիժը մեղմանցել և վերջնական պատիժ սահմանել տուգանք՝ նվազագույն աշխատավարձի ինապատիկի՝ 675.000 (վեց հարյուր յոթանասունհինգ հազար) ՀՀ դրամ գումարի չափով:
2. Մեղադրյալ Էդմոն Սերյանի Ասրյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
3. Դատավճիռն օրինական ուժի մեջ մտնելուց հետո Նախաքննության մարմնի 2025 թվականի ապրիլի 25-ի որոշմամբ որպես իրեղեն ապացույց ճանաչված «MDMB (N)-022 և MDMB (N)-2201» թմրամիջոցներ կրող ծխախոտային խառնուրդ տեսակի թմրամիջոցը վերադարձնել թիվ 14141525 քրեական վարույթն իրականացնող մարմնին:
4․ Մեղադրյալ Էդմոն Սեյրանի Ասրյանից հօգուտ Հայաստանի Հանրապետության պետական բյուջեի գանձել փորձաքննության արժեք կազմող 108․000 (հարյուր ութ հազար) ՀՀ դրամը՝ որպես դատական ծախս:
5. Դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` ստանալու օրվանից հետո՝ մեկամսյա ժամկետում:

ԴԱՏԱՎՈՐ ԱՆԻ ԴԱՆԻԵԼՅԱՆ