ԵԴ1/1546/01/25
Դ Ա Տ Ա Վ Ճ Ի Ռ

ՀԱՅԱՍՏԱՆԻ ՀԱՆՐԱՊԵՏՈւԹՅԱՆ ԱՆՈւՆԻՑ


«19» մայիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)
նախագահող դատավոր՝ Ռազմիկ Մարիկյան
դատական նիստերի քարտուղար՝ Գոռ Բադալյան

մասնակցությամբ`

հանրային մեղադրող Եսայի Աբովյանի
մեղադրյալ Մարգար Մարգարյանի

դռնբաց դատական նիստում քննելով քրեական վարույթն ըստ մեղադրանքի Մարգար Ֆրիդրիխի Մարգարյանի (ծնված՝ 27.07.1993թ., ՀՀ քաղաքացի, բարձրագույն կրթությամբ, ամուսնացած, չի աշխատում, չդատված, հաշվառված է Երևան քաղաքի Արամի 29 շենքի 8 բնակարան հասցեում, փաստացի բնակվում է Արմավիրի մարզի Հայթաղ գյուղի, Մաշտոցի 34 տուն հասցեում), մեղադրանք է ներկայացվել 2 (երկու) դրվագ ՀՀ քրեական օրենսգրքի 344-րդ հոդվածի 1-ին մասով, որպես խափանման միջոց է կիրառվել բացակայելու արգելքը,
1. Գործի դատավարական նախապատմությունը.
2022 թվականի հոկտեմբերի 7-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախատեսված հանցագործության դեպքով ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում նախաձեռնվել է թիվ 14833722 քրեական վարույթը։
2023 թվականի հունվարի 9-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախատեսված հանցագործության դեպքով ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում նախաձեռնվել է թիվ 60115523 քրեական վարույթը։
2023 թվականի փետրվարի 24-ի որոշմամբ թիվ 60115523 քրեական վարույթը միացվել է թիվ 14833722 քրեական վարույթին, և նախաքննությունը շարունակվել է թիվ 14833722 նախաքննական համարի ներքո:
2025 թվականի ապրիլի 21-ին 2 (երկու) դրվագ ՀՀ քրեական օրենսգրքի 344-րդ հոդվածի 1-ին մասի հատկանիշներով Մարգար Ֆրիդրիխի Մարգարյանի նկատմամբ հարուցվել է հանրային քրեական հետապնդում:
2025 թվականի մայիսի 6-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազությունից մեղադրական եզրակացությամբ Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 14833722 նախաքննական համարով քրեական գործը, որին շնորհվել է թիվ ԵԴ1/1546/01/25 համարը։
2025 թվականի մայիսի 13-ին Երևան քաղաքի առաջին ատյանի ընդհանուր իրավասության քրեական դատարանի դատավոր Ռազմիկ Մարիկյանի կողմից որոշում է կայացվել թիվ ԵԴ1/1546/01/25 քրեական գործով վարույթը ստանձնելու մասին:
2025 թվականի մայիսի 19-ին Դատարանը թիվ ԵԴ1/1546/01/25 քրեական գործով կայացրել է մեղադրական վերդիկտ՝ Մարգար Ֆրիդրիխի Մարգարյանին մեղավոր ճանաչելով 2 (երկու) ՀՀ քրեական օրենսգրքի 344-րդ հոդվածի 1-ին մասով նախատեսված արարքի կատարման մեջ:
2. Մեղադրանքի փաստական նկարագրությունը.
Մարգար Ֆրիդրիխի Մարգարյանին մեղադրանք է ներկայացվել 2 (երկու) դրվագ ՀՀ քրեական օրենսգրքի 344-րդ հոդվածի 1-ին մասով` այն բանի համար, որ «նա 26.01.2022 թվականին կայացված վարչական տույժ նշանակելու մասին թիվ ԱՖ 886367 որոշմամբ 1 տարի ժամկետով՝ 26.01.2022 թվականից մինչև 26.01.2023 թվականը զրկված լինելով տրանսպորտային միջոցներ վարելու իրավունքից և այդ մասին պատշաճ ծանուցված լինելով՝ 2022 թվականի հուլիսի 21-ին, ժամը՝ 23:52-ի սահմաններում, Երևան քաղաքի Դավիթ Անհաղթ փողոցում վարել է «Հյունդայի» մակնիշի 372 AD 61 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180151971 արձանագրությունը:
Վերոգրյալի հաշվառմամբ Մարգար Մարգարյանին վերագրվել է հանցանքի կատարում, որը նախատեսված է ՀՀ քրեական օրենսգրքի 344-րդ հոդվածի 1-ին մասով:
Բացի այդ,
Մարգար Մարգարյանը 26.01.2022 թվականին կայացված վարչական տույժ նշանակելու մասին թիվ ԱՖ 886367 որոշմամբ 1 տարի ժամկետով՝ 26.01.2022 թվականից մինչև 26.01.2023 թվականը զրկված լինելով տրանսպորտային միջոցներ վարելու իրավունքից և այդ մասին պատշաճ ծանուցված լինելով՝ 2022 թվականի նոյեմբերի 04-ին, ժամը՝ 15:29-ի սահմաններում, Երևան քաղաքի Մ.Մելքոնյան փողոցում վարել է «Տոյոտա» մակնիշի 902 CG 61 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180240097 արձանագրությունը:
Վերոգրյալի հաշվառմամբ Մարգար Մարգարյանին վերագրվել է հանցանքի կատարում, որը նախատեսված է ՀՀ քրեական օրենսգրքի 344-րդ հոդվածի 1-ին մասով:»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Մեղադրյալ Մարգար Մարգարյանը, օգտվելով իր դատավարական իրավունքից, հրաժարվել է ցուցմունք տալ:
- 2022 թվականի հոկտեմբերի 3-ի 8180151971 արձանագրության հիման վրա կազմված զեկուցագիրը, որի համաձայն՝ ՀՀ ՈՍ ՊԾ ԵՔԳ ՎՎԻ բաժանմունքի պետ, ոստիկանության մայոր՝ Ա.Բաբիկյանը զեկուցագիր է ներկայացրել ՀՀ ՈՍ ՊԾ ԵՔԳ հրամանատար Ա.Իսախանյանին և ՀՀ ՈՍ ՊԾ պետ Ա․Գ․Ումրշատյանին առ այն, Մարգար Ֆրիդրիխի Մարգարյանը, զրկված լինելով տրանսպորտային միջոցներ վարելու իրավունքից 2022 թվականի հուլիսի 21-ին՝ ժամը 23։57-ին, վարել է «Հյունդայի» մակնիշի 272 AD 61 հաշվառման համարանիշի տրանսպորտային միջոցը, որի վերաբերյալ կայացվել է վարչական իրավախախտման վերաբերյալ թիվ 8180151971 արձանագրությունը:
- Վարչական իրավախախտման վերաբերյալ թիվ 8180151971 արձանագրությունը, որի համաձայն՝ 2022 թվականի հուլիսի 21-ին՝ ժամը 23:57-ին ՀՀ ՊԾ Երևան քաղաքի գնդի 4 գումարտակի 2 վաշտի պարեկ Գևորգ Լեռնիկի Մանուկյանի /02681/ կողմից Մարգար Ֆրիդրիխի Մարգարյանի նկատմամբ կազմվել է վարչական իրավախախտման վերաբերյալ արձանագրություն, ըստ որի վերջինս նույն օրը՝ ժամը 23։52-ին, «Հյունդայի» մակնիշի 272 AD 61 հաշվառման համարանիշի ավտոմեքենան վարել է Երևան քաղաքի Դավիթ Անհաղթ փողոցում, տրանսպորտային միջոցներ վարելու իրավունքից զրկված լինելու պայմաններում, առկա են ստորագրություններ:
- 2022 թվականի նոյեմբերի 25-ի 8180240097 արձանագրության հիման վրա կազմված զեկուցագիրը, որի համաձայն՝ ՀՀ ՈՍ ՊԾ ԵՔԳ ՎՎԻ բաժանմունքի պետ Ա.Բաբիկյանը զեկուցագիր է ներկայացրել ՀՀ ՈՍ ՊԾ ԵՔԳ հրամանատար, ոստիկանության մայոր՝ Ա.Իսախանյանին առ այն,որ Մարգար Ֆրիդրիխի Մարգարյանը, 04․11․2022թ. ժամը՝ 15։29-ին, Երևան քաղաքի Մ․Մելքոնյանի փողոցով «Տոյոտա» մակնիշի 902CG61 հաշվառման համարանիշի տրանսպորտային միջոցը վարել է զրկված վարորդային իրավունքի վկայականով,որի վերաբերյալ կայացվել է վարչական իրավախախտման վերաբերյալ թիվ 8180240097 արձանագրությունը:
- Վարչական իրավախախտման վերաբերյալ թիվ 8180240097 արձանագրությունը, որի համաձայն՝ 2022 թվականի նոյեմբերի 4-ին՝ ժամը 15։35-ին ՀՀ ՊԾ ԵՔԳ 3 գումարտակի 3 վաշտի պարեկ Արթուր Վազգենի Համբարձումյանի /08790/ կողմից Մարգար Ֆրիդրիխի Մարգարյանի նկատմամբ կազմվել է վարչական իրավախախտման վերաբերյալ արձանագրություն, ըստ որի վերջինս նույն օրը՝ ժամը՝ 15։29-ին Երևան քաղաքի Մ․Մելքոնյանի փողոցով «Տոյոտա» մակնիշի 902 CG 61 հաշվառման համարանիշի տրանսպորտային միջոցը վարել է տրանսպորտային միջոցներ վարելու իրավունքից զրկված լինելու պայմաններում, առկա են ստորագրություններ:
- Թիվ ԱՖ 886367 արձանագրությունը, որի համաձայն՝ 26․01․2022 թվականի հունվարի 26-ին՝ ժամը 17:35-ին ՀՀ ՈՍ ՃՈ ՊԾ Երևան քաղաքի գնդի 2 գումարտակի 1 վաշտի կրտսեր-պարեկ Լևոն Խաչիկի Զախարյանի /00544/ կողմից Մարգար Ֆրիդրիխի Մարգարյանի նկատմամբ կազմվել է վարչական իրավախախտման վերաբերյալ արձանագրություն, ըստ որի վերջինս նույն օրը՝ ժամը 15։15-ին, Արմավիրի մարզում, «Նիսսան» մակնիշի 12 ZU 777 հաշվառման համարանիշի ավտոմեքենան վարել է առանց հաշվառման համարանիշների։ Միջոցառման շրջանակներում «Բուժականի» կարգադրությամբ ավտոմեքենան տեղափոխվել է Էջմիածնի ՀՊՏ։ Առկա են ստորագրություններ: Նույն օրը կայացված վարչական իրավախախտման գործով թիվ ԱՖ 886367 որոշմամբ Մարգար Ֆրիդրիխի Մարգարյանը զրկվել է տրանսպորտային միջոցներ վարելու իրավունքից մեկ տարի ժամկետով, որոշման պատճենը և կատարման կարգի մասին քաղվածքը վերջինս ստացել է իր ստորագրությամբ նույն օրը՝ 26.01.2022թ.:
- Ոստիկանության կողմից ստացված գրությունը, որի համաձայն՝ Մարգար Ֆրիդրիխի Մարգարյանը վարորդական իրավունքից զրկվել է ԱՖ 886367 որոշման հիման վրա։
- ՀՀ ՆԳՆ ՃՈ էլեկտրոնային ռեգիստրից ստացված քաղվածքը, որի համաձայն՝ Մարգար Ֆրիդրիխի Մարգարյանի RB079623 սերիա-համարի վարորդական վկայականի կարգավիճակը զրկված է, սկիզբ՝ 26․01․2022 ավարտ՝ 26․01․2023 ժամանակահատվածով:
- Վերոնշյալ փաստաթղթերը զննության ենթարկելու մասին արձանագրությունը:
- Վերոնշյալ փաստաթղթերը արտավարութային փաստաթուղթ ճանաչելու մասին արձանագրությունը:
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, որի համաձայն՝ Մարգար Մարգարյանը դատվածություն չունի:
 ՊԵԿ տվյալների շտեմարանից արտատպված տեղեկանքը, որի համաձայն՝ Մարգար Մարգարյանի եկամուտը դեպքին նախորդող 12 ամիսների ընթացքում բացակայում է:
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Մարգար Ֆրիդրիխ Մարգարյանը, 2022 թվականի հունվարի 26-ին կայացված վարչական տույժ նշանակելու մասին թիվ ԱՖ 886367 որոշմամբ 1 տարի ժամկետով՝ 26.01.2022 թվականից մինչև 26.01.2023 թվականը զրկված լինելով տրանսպորտային միջոցներ վարելու իրավունքից և այդ մասին պատշաճ ծանուցված լինելով, 2022 թվականի հուլիսի 21-ին, ժամը՝ 23:52-ի սահմաններում, Երևան քաղաքի Դավիթ Անհաղթ փողոցում վարել է «Հյունդայի» մակնիշի 372 AD 61 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180151971 արձանագրությունը: Բացի այդ, Մարգար Մարգարյանը, 2022 թվականի հունվարի 26-ին կայացված վարչական տույժ նշանակելու մասին թիվ ԱՖ 886367 որոշմամբ 1 տարի ժամկետով՝ 26.01.2022 թվականից մինչև 26.01.2023 թվականը զրկված լինելով տրանսպորտային միջոցներ վարելու իրավունքից և այդ մասին պատշաճ ծանուցված լինելով, 2022 թվականի նոյեմբերի 4-ին, ժամը՝ 15:29-ի սահմաններում, Երևան քաղաքի Մ.Մելքոնյան փողոցում վարել է «Տոյոտա» մակնիշի 902 CG 61 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180240097 արձանագրությունը:
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Մարգար Մարգարյանին ներկայացված մեղադրանքի (տրանսպորտային միջոցներ վարելու իրավունքից զրկված վիճակում տրանսպորտային միջոց վարելը) ապացուցվածության վերաբերյալ ցանկացած հիմնավոր կասկած։
5. Դատարանի իրավական վերլուծությունները, հետևությունները և որոշումները.
Դատարանի կողմից հաստատված փաստական հանգամանքների և 2025 թվականի մայիսի 19-ին կայացված մեղադրական վերդիկտի հիման վրա Դատարանը գտնում է, որ ապացուցված է մեղադրյալ Մարգար Ֆրիդրիխ Մարգարյանին վերագրվող փաստական հանգամանքները (Մարգար Մարգարյանը, 1 տարի ժամկետով՝ 26.01.2022 թվականից մինչև 26.01.2023 թվականը զրկված լինելով տրանսպորտային միջոցներ վարելու իրավունքից և այդ մասին պատշաճ ծանուցված լինելով, 2022 թվականի հուլիսի 21-ին, ժամը՝ 23:52-ի սահմաններում, Երևան քաղաքի Դավիթ Անհաղթ փողոցում վարել է «Հյունդայի» մակնիշի 372 AD 61 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180151971 արձանագրությունը, ինչպես նաև Մարգար Մարգարյանը, 1 տարի ժամկետով՝ 26.01.2022 թվականից մինչև 26.01.2023 թվականը զրկված լինելով տրանսպորտային միջոցներ վարելու իրավունքից և այդ մասին պատշաճ ծանուցված լինելով, 2022 թվականի նոյեմբերի 4-ին, ժամը՝ 15:29-ի սահմաններում, Երևան քաղաքի Մ.Մելքոնյան փողոցում վարել է «Տոյոտա» մակնիշի 902 CG 61 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180240097 արձանագրությունը), այդ արարքների քրեական հակաիրավականությունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ, ինչպես նաև գտնում է, որ մեղադրյալ Մարգար Մարգարյանի արարքների նկատմամբ պետք է կիրառվի 2 (երկու) դրվագ ՀՀ քրեական օրենսգրքի 344-րդ հոդվածի 1-ին մասը։
Դատարանը որպես մեղադրյալ Մարգար Մարգարյանի անձը բնութագրող և պատասխանատվությունն ու պատիժը մեղմացնող հանգամանքներ է դիտարկում առաջադրված մեղադրանքում իրեն մեղավոր ճանաչելը (տե՛ս Սերոբ Ֆրունզիկի Սարգսյանի վերաբերյալ ՀՀ վճռաբեկ դատարանի 2012 թվականի նոյեմբերի 1-ի թիվ ՍԴ/0109/01/12 որոշումը):
Դատարանն արձանագրում է, որ մեղադրյալ Մարգար Մարգարյանի պատասխանատվությունը և պատիժը ծանրացնող հանգամանքներ առկա չեն:
Որպես մեղադրյալ Մարգար Մարգարյանի անձը բնութագրող տվյալ՝ Դատարանն արձանագրում է նրա դատվածություն չունենալու հանգամանքը:
Դատարանը, դրական պատասխանելով ՀՀ քրեական դատավարության օրենսգրքի 342-րդ հոդվածի 1-ին մասով նախատեսված հարցերին, գտնում է, որ կատարած արարքի համար Մարգար Մարգարյանը ենթակա է քրեական պատասխանատվության և պատժի:
ՀՀ քրեական օրենսգրքի 17-րդ հոդվածի համաձայն՝
(…)
2. Ոչ մեծ ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 2 տարի ժամկետով ազատազրկումը, կամ որոնց համար նախատեսված է ազատությունից զրկելու հետ չկապված պատիժ:
(…)
ՀՀ քրեական օրենսգրքի 53-րդ հոդվածի համաձայն՝
1.Հանցագործությունների համակցություն է համարվում միևնույն անձի կողմից մեկ կամ մեկից ավելի արարքներով սույն օրենսգրքով նախատեսված երկու կամ ավելի հանցանք կատարելը, եթե նա դրանցից ոչ մեկի համար քրեական պատասխանատվության չի ենթարկվել:
(…)
ՀՀ քրեական օրենսգրքի 55-րդ հոդվածի 1-ին մասի համաձայն՝
1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
ՀՀ քրեական օրենսգրքի 69-րդ հոդվածի համաձայն՝
1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե Դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ:
Նույն օրենսգրքի 74-րդ հոդվածի համաձայն՝
1.Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը, իսկ նույն հոդվածի 2-րդ մասի համաձայն՝ եթե հանցագործությունների համակցությունն ընդգրկում է միայն ոչ մեծ ծանրության հանցանքներ, ապա ազատազրկման ձևով վերջնական պատիժը նշանակվում է պատիժները լրիվ կամ մասնակիորեն գումարելու միջոցով:
(…):
ՀՀ քրեական օրենսգրքի 344-րդ հոդվածի համաձայն՝
1.Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը՝
պատժվում է տուգանքով` առավելագույնը տասնապատիկի չափով, կամ հանրային աշխատանքներով` առավելագույնը հարյուր ժամ տևողությամբ, կամ կարճաժամկետ ազատազրկմամբ՝ առավելագույնը մեկ ամիս ժամկետով:
(…):
Դատարանը, հիմք ընդունելով մեղադրյալի կողմից կատարած հանցագործությունների եղանակը, տեղը, ժամանակը, հանցագործության շարժառիթը և նպատակները, դիտավորության տեսակը, պատասխանատվությունը և պատիժը մեղմացնող ու ծանրացնող հանգամանքների առկայությունը և ղեկավարվելով ՀՀ քրեական օրենսգրքի 7-րդ, 55-րդ և 69-րդ հոդվածներով, գտնում է, որ Մարգար Մարգարյանի նկատմամբ երկու դրվագ ՀՀ քրեական օրենսգրքի 344-րդ հոդվածի 1-ին մասով յուրաքանչյուր դրվագի համար պետք է նշանակել հոդվածի սանկցիայով նախատեսված տուգանքի ձևով պատիժ:
ՀՀ քրեական օրենսգրքի 59-րդ հոդվածի համաձայն՝
(…)
3.Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
(…)
ՀՀ քրեական օրենսգրքի 3-րդ հոդվածի համաձայն.
(…)
Ամսական եկամուտ` հանցանքն ավարտվելու օրվան նախորդող 12 ամիսների ընթացքում անձի ստացած միջին ամսական եկամտի 35 տոկոսը: Միջին ամսական եկամտի մեջ հաշվարկվում են ստացվող աշխատավարձը և դրան հավասարեցված այլ վճարումները, (…):
Քրեաիրավական նշված նորմերի վերլուծությունից պարզ է դառնում, որ տուգանքի հաշվարկման հիմքում դրվում է ոչ թե նվազագույն աշխատավարձը, այսինքն՝ պետությունում սահմանված ֆիքսված որևէ գումար, այլ հանցանք կատարած անձի եկամուտը:
Հաշվի առնելով այն, որ քրեական նոր օրենսգրքում տուգանքի հաշվարկման հիմքում դրվում է հանցանք կատարած անձի եկամուտը, օրենսդիրը կարգավորել է նաև այն իրավիճակները, երբ անձը եկամուտ չունի կամ դրա չափը անհնարին է պարզել: Այդ դեպքերում տուգանքի չափը հաշվարկվում է հանցանքը կատարելու պահին նվազագույն ամսական աշխատավարձի չափով:
Հաշվի առնելով, այն հանգամանքը, որ «Էկենգ» ՓԲԸ փոխգործելիության հարթակի միջոցով ստացված տեղեկանքի համաձայն՝ դեպքին նախորդող 12 ամիսների ընթացքում մեղադրյալ Մարգար Մարգարյանի եկամուտը բացակայել է, ուստի վերջինիս նկատմամբ որպես պատիժ նշանակվող տուգանքի չափը պետք է որոշվի ՀՀ-ում սահմանված նվազագույն ամսական աշխատավարձի չափով:
2022 թվականի դեկտեմբերի 7-ին ընդունված՝ «Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն՝ 2023 թվականի հունվարի 1-ին ՀՀ-ում որպես նվազագույն ամսական աշխատավարձ է սահմանվել 75.000 ՀՀ դրամը:
Նման պայմաններում, հաշվի առնելով, որ մեղադրյալ Մարգար Մարգարյանն իրեն մեղսագրվող երկու դրվագ հանցանքները կատարել է 2022 թվականի հուլիսի 21-ին, իսկ երկրորդը՝ 2022 թվականի նոյեմբերի 4-ին՝ Դատարանն արձանագրում է, որ նրա նկատմամբ կիրառելի է 2023 թվականի հունվարի 1-ից առաջ գործող նվազագույն աշխատավարձի չափը (68.000 ՀՀ դրամ):
Դատարանը հիմք ընդունելով մեղադրյալ Մարգար Մարգարյանի անձը բնութագրող տվյալները, պատիժն ու պատասխանատվությունը մեղմացնող հանգամանքի առկայությունը, պատիժն ու պատասխանատվությունը ծանրացնող հանգամանքների բացակայությունը, ինչպես նաև նրա կողմից կատարված հանցանքների բնույթն ու նշանակությունը գտնում է, որ նրա նկատմամբ յուրաքանչյուր դրվագով որպես պատիժ պետք Է նշանակվի տուգանք՝ նվազագույն աշխատավարձի հնգապատիկի՝ 340.000 (երեք հարյուր քառասուն հազար) ՀՀ դրամի չափով:
Դատարանը, նկատի ունենալով, որ Մարգար Մարգարյանը մեկից ավելի արարքներով ՀՀ քրեական օրենսգրքով նախատեսված երկու հանցանքներ է կատարել և դրանցից ոչ մեկի համար քրեական պատասխանատվության չի ենթարկվել, ինչպես նաև ղեկավարվելով ՀՀ քրեական օրենսգրքի 74-րդ հոդվածի 1-ին մասի կանոնով, որի համաձայն՝ հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, գտնում է, որ նրա նկատմամբ վերջնական պատիժ պետք է նշանակել պատիժները լրիվ գումարելու միջոցով:
Դատարանը, հաշվի առնելով մեղադրյալի գույքային դրությունը գտնում է, որ վերջինս ի վիճակի չէ անհապաղ և ամբողջությամբ վճարել տուգանքը:
ՀՀ քրեական օրենսգրքի 59-րդ հոդվածի համաձայն.
(…)
7. Տուգանքի նշանակման հնարավորությունը և չափը դատարանը որոշում է՝ հաշվի առնելով հանցագործության ծանրությունը, հանցագործությամբ պատճառված վնասի բնույթն ու չափը, հանցագործությամբ ստացված գույքային կամ ոչ գույքային բնույթի օգուտները, դատապարտվողի ու նրա ընտանիքի գույքային դրությունը, ինչպես նաև դատապարտվողի՝ եկամուտ ստանալու հնարավորությունը կամ նրան պատկանող այնպիսի գույքի առկայությունը, որի վրա կարող է բռնագանձում տարածվել։
8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ Եթե տուգանքը նշանակելուց հետո դատապարտյալի նյութական վիճակի վատթարացման հետևանքով նա զրկվում է տուգանքը վճարելու հնարավորությունից, ապա դատարանը, հաշվի առնելով դատապարտյալի դիրքորոշումը`
1) երկարաձգում է տուգանքի վճարման սահմանված վերջնաժամկետը` առավելագույնը 1 տարով,
2) նշանակում է հանրային աշխատանքներ` հանրային աշխատանքների 24 ժամը հաշվարկելով հանցանքը կատարելու պահին նվազագույն աշխատավարձի չափով:
(…)
Հետևաբար, Դատարանը գտնում է, որ մեղադրյալին պետք է թույլատրել որպես պատիժ նշանակված 680.000 (վեց հարյուր ութսուն հազար) ՀՀ դրամի չափով տուգանքը վճարել մաս առ մաս 12 (տասներկու) ամսվա ընթացքում՝ նվազագույնը 56.666 (հիսունվեց հազար վեց հարյուր վաթսունվեց) ՀՀ դրամի չափով՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը գտնում է, որ Մարգար Մարգարյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ` մինչև դատավճռի օրինական ուժի մեջ մտնելը, քանի որ մեղադրական դատավճիռ կայացնելու և տուգանքի ձևով պատիժ նշանակելու պայմաններում առկա է ողջամիտ ենթադրություն առ այն, որ մեղադրյալը, օգտագործելով անձը հաստատող փաստաթուղթ, կարող է հեռանալ Հայաստանի Հանրապետությունից՝ այդպիսով դիմելով փախուստի կամ չկատարելով իր վրա դրված պարտականությունները, իսկ բացակայելու արգելքի կիրառումը բավարար է մեղադրյալի փախուստը կանխելու և նրա վրա դրված պարտականությունների կատարումն ապահովելու համար։
Բացի այդ, Դատարանը գտնում է, որ դատավճիռը օրինական ուժի մեջ մտնելուց հետո Մարգար Մարգարյանի վերաբերյալ ՀՀ միգրացիոն ծառայությունում և Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքները պետք է վերացնել:
Անդրադառնալով արտավարութային փաստաթղթերի տնօրինման և պահպանման հարցին՝ Դատարանը գտնում է, որ վարույթն իրականացնող մարմնի՝ 2025 թվականի ապրիլի 14-ի որոշմամբ արտավարութային փաստաթուղթ ճանաչված փաստաթղթերը պետք է պահել գործի հետ այն պահելու ամբողջ ժամանակահատվածում:
Անդրադառնալով վարութային ծախսերի հարցին՝ Դատարանը հարկ է համարում արձանագրել, որ ՀՀ քրեական դատավարության օրենսգրքի 167-րդ հոդվածի 1-ին մասի 1-6-րդ կետերով նախատեսված վարութային ծախսեր չկան, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին` այդ վարութային ծախսերի հատուցման պահանջ Դատարանին չի ներկայացվել։ Հետևաբար՝ Դատարանը գտնում է, որ վարութային ծախսերի հարցը պետք է համարել լուծված։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 30-31-րդ, 99-րդ, 167-րդ, 347-350-րդ, 352-353-րդ, 364-րդ և 481-րդ հոդվածներով` Դատարանը

ՎՃՌԵՑ

Մարգար Ֆրիդրիխի Մարգարյանին մեղավոր ճանաչել 2 (երկու) դրվագ ՀՀ քրեական օրենսգրքի 344-րդ հոդվածի 1-ին մասով նախատեսված արարքների կատարման մեջ, և նրա նկատմամբ պատիժ նշանակել՝
ՀՀ քրեական օրենսգրքի 344-րդ հոդվածի 1-ին մասով՝ տուգանք նվազագույն աշխատավարձի հնգապատիկի՝ 340.000 (երեք հարյուր քառասուն հազար) ՀՀ դրամի չափով:
ՀՀ քրեական օրենսգրքի 344-րդ հոդվածի 1-ին մասով՝ տուգանք նվազագույն աշխատավարձի հնգապատիկի՝ 340.000 (երեք հարյուր քառասուն հազար) ՀՀ դրամի չափով:
ՀՀ քրեական օրենսգրքի 74-րդ հոդվածի 1-ին մասի կիրառմամբ՝ հանցանքների համակցությամբ պատիժները լրիվ գումարելու միջոցով Մարգար Ֆրիդրիխի Մարգարյանի նկատմամբ պատիժ նշանակել տուգանք՝ 680.000 (վեց հարյուր ութսուն հազար) ՀՀ դրամի չափով:
Մարգար Ֆրիդրիխի Մարգարյանին թույլատրել որպես պատիժ նշանակված 680.000 (վեց հարյուր ութսուն հազար) ՀՀ դրամի չափով տուգանքը վճարել մաս առ մաս 12 (տասներկու) ամսվա ընթացքում՝ ամսական նվազագույնը 56.666 (հիսունվեց հազար վեց հարյուր վաթսունվեց) ՀՀ դրամի չափով՝ ըստ նրա և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Մարգար Ֆրիդրիխի Մարգարյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը։
Դատավճիռն օրինական ուժի մեջ մտնելուց հետո Մարգար Ֆրիդրիխի Մարգարյանի նկատմամբ ՀՀ միգրացիոն ծառայությունում և Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքները վերացնել:
Դատավճիռն օրինական ուժի մեջ մտնելուց հետո վարույթն իրականացնող մարմնի՝ 2025 թվականի ապրիլի 14-ի որոշմամբ արտավարութային փաստաթուղթ ճանաչված փաստաթղթերը պահել գործի հետ այն պահելու ամբողջ ժամանակահատվածում:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:


ԴԱՏԱՎՈՐ ՌԱԶՄԻԿ ՄԱՐԻԿՅԱՆ