ԵԴ1/1522/01/25

Ո Ր Ո Շ ՈՒ Մ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

11 հունիսի 2025թ․ ք.Երևանում

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

նախագահությամբ
դատավոր՝ Մ․Արամյանի
քարտուղարությամբ՝ Մ.Գևորգյանի
մասնակցությամբ`
հանրային մեղադրող՝ Ս․Պետրոսյանի
մեղադրյալ՝ Ս․Գրիգորյանի
տուժող՝ Գ․Պետրոսյանի

դռնբաց դատական նիստում քննեց քրեական գործն ըստ մեղադրանքի` Սարգիս Դավթյանի Գրիգորյանի (ծնված՝ 31.01.1982թ., ազգությամբ հայ, ՀՀ քաղաքացի, նախկինում դատված, բնակվող՝ ք.Երևան Ավան 4-րդ փողոց 1-ին փկղ. 43 տուն)

ՊԱՐԶԵՑ

2024 թվականի ապրիլի 22-ին նախաձեռնվել է թիվ 16150424 քրեական վարույթը։
2024 թվականի հունիսի 27-ին քրեական վարույթը հսկող դատախազի կողմից Սարգիս Դավթի Գրիգորյանի նկատմամբ ՀՀ քրեական օրենսգրքի 255-րդ հոդվածի 1-ին մասով հանրային քրեական հետապնդում հարուցելու մասի որոշում է կայացվել:
2024 թվականի հուլիսի 17-ին Սարգիս Դավթի Գրիգորյանի նկատմամբ հայտարարվել է հետախուզում:
2024 թվականի հունիսի 27-ին մեղադրյալ Սարգիս Դավթի Գրիգորյանի նկատմամբ որոշում է կայացվել այլընտրանքային խափանման միջոց բացակայելու արգելք կիրառելու մասին:
2024 թվականի հուլիսի 03-ին որոշում է կայացվել թիվ 16150424 քրեական վարույթով մեղադրյալ Սարգիս Դավթի Գրիգորյանի նկատմամբ հարուցված հանրային քրեական հետապնդման ժամկետը կասեցնելու մասին:
2025 թվականի ապրիլի 22-ին Սարգիս Դավթի Գրիգորյանը հայտնաբերվել է և նրան ներկայացվել է մեղադրանք:
Սարգիս Դավթի Գրիգորյանին մեղադրանք է առաջադրվել հանրորեն վտանգավոր այն արարքի ենթադրյալ կատարման համար, որ նա «2024 թվականի ապրիլի 19-ին' ժամը 20:20-ի սահմաններում, խարդախությամբ հափշտակություն կատարելու դիտավորությամբ Արմավիր մարզի էջմիածին քաղաքում մոտենալով տաքսի ծառայության վարորդ Գառնիկ Բենիկի Պետրոսյանին, խնդրել է 8.000 ՀՀ դրամ գումար վճարելու պայմանով իրեն տեղափոխել Երևան քաղաք և ժամը 21:00-ի սահմաններում հասնելով նախատեսված վայր' Երևան քաղաքի Իսակովի 3/11 հասցե, կայանել է նշված հասցեի մոտակա խանութի մոտ, քողարկելով իր իրական մտադրությունը, զինվորական համազգեստ գնելու պատրվակով վերջինիցս խնդրել է 42.000 ՀՀ դրամ պարտքով գումար' իբրև ընդհանուր ծառայության գումարը ներառյալ, այն է' 50.000 ՀՀ դրամ, խանութից վերադառնալիս հետ վերադարձնելու պայմանով, վստահություն ձեռք բերելու նպատակով հայտնել է իրականությանը չհամապատասխանող կեղծ տեղեկատվություն, թե իբր զինվորական համազգեստը գնում է ՀՀ սահմաններում ծառայություն իրականացնող զինվորի համար, և վերջինիցս առձեռն ստանալով 42.000 ՀՀ դրամ գումարը. դուրս գալով տեսադաշտից հեռացել է' այդ կերպ խարդախությամբ հափշտակելով մանր չափի' 42.000 ՀՀ դրամ գումարը' ունենալով այդ գումարը տնօրինելու իրական հնարավորություն:
Այսինքն՝ Սարգիս Դավթի Գրիգորյանը կատարել է հանցանք, որը նախատեսված է ՀՀ քրեական օրենսգրքի 255-րդ հոդվածի 1-ին մասով»:
2025 թվականի մայիսի 07-ին որոշում է կայացվել թիվ ԵԴ1/1522/01/25 քրեական վարույթը ստանձնելու և նախնական դատալսումներ նշանակելու մասին:
2025 թվականի հունիսի 11-ի դատական նիստում տուժող Գ․Պետրոսյանը հայտարարել է, որ մեղադրյալ Ս․Գրիգորյանի նկատմամբ որևէ բողոք, պահանջ չունի և հաշտվել է նրա հետ:
Մեղադրյալ Ս․Գրիգորյանը հաստատեց հաշտության փաստը, զղջաց իր կատարածի համար և չառարկեց իր նկատմամբ ոչ արդարացնող հիմքով քրեական հետապնդումը դադարեցնելու դեմ:
Հանրային մեղադրող Ս․Պետրոսյանը չառարկեց միջնորդության դեմ։
Դատարանի իրավական վերլուծությունը և պատճառաբանությունը.
Լսելով կողմերի դիրքորոշումները` Դատարանը գտնում է, որ մեղադրյալ Սարգիս Գրիգորյանի նկատմամբ իրականացվող քրեական հետապնդումն ենթակա է դադարեցման տուժողի և մեղադրյալի հաշտության հիմքով՝ հետևյալ պատճառաբանությամբ.
ՀՀ քրեական օրենսգրքի 3-րդ հոդվածի 1-ին մասի 2-րդ կետի համաձայն`
/…/2) առաջին անգամ հանցանք կատարած` անձ, որը նախկինում հանցանք չի կատարել կամ կատարել է, սակայն ազատվել է քրեական պատասխանատվությունից, կամ որի դատվածությունը սույն օրենսգրքով սահմանված կարգով մարվել կամ վերացվել է/…/
ՀՀ քրեական օրենսգրքի 17-րդ հոդվածի համաձայն`
1. Հանցանքները դասակարգվում են չորս խմբի` ոչ մեծ ծանրության, միջին ծանրության, ծանր և առանձնապես ծանր:
/…/2. Ոչ մեծ ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 2 տարի ժամկետով ազատազրկումը, կամ որոնց համար նախատեսված է ազատությունից զրկելու հետ չկապված պատիժ:/.../:
ՀՀ քրեական օրենսգրքի 255-րդ հոդվածի 1-ին մասը սահմանում է/․․․/ 1. Խարդախությունը՝ խաբեության կամ վստահությունը չարաշահելու եղանակով հափշտակությունը՝ պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ ազատության սահմանափակմամբ՝ առավելագույնը երկու տարի ժամկետով, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:/.../։
Դատարանը արձանագրում է, որ մեղադրյալին վերագրվող հանցանքը միջին ծանրության է:
ՀՀ քրեական օրենսգրքի 82-րդ հոդվածի համաձայն`/.../1. Եթե անձն առաջին անգամ է հանցանք կատարել, ապա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նրա ու տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնությունը, բացառությամբ այն դեպքերի, երբ կատարված հանցանքում առկա են ընտանիքում բռնության հատկանիշներ:
2. Եթե անձն առաջին անգամ է հանցանք կատարել, որը ոչ մեծ կամ միջին ծանրության հանցագործությանը հանցակցություն է, ապա նա հաշտության հիմքով ազատվում է քրեական պատասխանատվությունից, եթե առկա է հաշտության վերաբերյալ տուժողի և տվյալ հանցակցի՝ ինքնուրույն և ազատ կամարտահայտության վրա հիմնված փոխադարձ համաձայնությունը/.../:
ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի համաձայն․
1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե` (…)12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից:(…)
ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետի համաձայն․
«Քրեական վարույթը ենթակա է կարճման, եթե`
(…) մեղադրյալի նկատմամբ դադարեցվել է քրեական հետապնդումը, և սպառվել են վարույթը շարունակելու բոլոր հնարավորությունները.»։
ՀՀ քրեական օրենսգրքի 82-րդ հոդվածը սահմանում է իմպերատիվ պահանջ անձին քրեական պատասխանատվությունից ազատելու վերաբերյալ, եթե հանցանք կատարած անձն և տուժողը հաշտվել են միմյանց հետ և միևնույն ժամանակ առկա չէ բացառող որևէ հանգամանք։
Այսպիսով, Դատարանն արձանագրում է, որ սույն գործով առկա են ՀՀ քրեական օրենսգրքի 82-րդ հոդվածի 1-ին մասով նախատեսված՝ տուժողի և հանցանք կատարած անձի հաշտության հիմքով մեղադրյալ Սարգիս Գրիգորյանի նկատմամբ իրականացվող քրեական հետապնդումը դադարեցնելու հիմք, որը դասվում է քրեական հետապնդումը բացառող հանգամանքների շարքին։
Հաշվի առնելով նաև, որ մեղադրյալ Սարգիս Գրիգորյանը հանցանք կատարելու դրությամբ հանդիսացել է դատվածություն չունեցող անձ (հիմք Ձև8 և Ձև9 տեղեկանքներ, 2024 թվականի հոկտեմբերի 28-ին կայացված թիվ ԵԴ1/1737/01/24 դատավճիռ) և չի առարկել ոչ ռեաբիլիտացնող հիմքով իր նկատմամբ քրեական հետապնդումը դադարեցնելու դեմ՝ Դատարանը գտնում է, որ առկա է մեղադրյալի նկատմամբ իրականացվող քրեական հետապնդումը ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետով նախատեսված կարգով դադարեցնելու հիմքը՝/․․․/1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`/․․․/12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից/․․․/։
Սարգիս Գրիգորյանի նկատմամբ քրեական հետապնդումը դադարեցնելու պարագայում արձանագրվում է, որ սպառվել են վարույթը շարունակելու բոլոր հնարավորությունները, հետևաբար առկա է քրեական վարույթը կարճելու՝ ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետով նախատեսված հիմքը՝ /․․․/1. Քրեական վարույթը ենթակա է կարճման, եթե` /․․․/3) մեղադրյալի նկատմամբ դադարեցվել է քրեական հետապնդումը, և սպառվել են վարույթը շարունակելու բոլոր հնարավորությունները/․․./։
Անդրադառնալով խափանման միջոցի հարցին, Դատարանը գտնում է, որ դատական ակտը օրինական ուժի մեջ մտնելուց հետո Սարգիս Գրիգորյանի նկատմամբ որպես խափանման միջոց կիրառված բացակայելու արգելքը պետք է վերացնել։
Դատարանն արձանագրում է, որ սույն քրեական վարույթով գույքային հայցի, վարույթային ծախսեր և գույքի արգելադրում առկա չէ:
Քրեական գործին կցված արտավարութային փաստաթղթերը և իրեղեն ապացույցները անհրաժեշտ է պահել քրեական գործի հետ միասին՝ դրանց պահելու ամբողջ ժամանակամիջոցում:
Ելնելով վերոգրյալից և ղեկավարվելով ՀՀ քրեական օրենսգրքի 82-րդ հոդվածով, ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետով, 13-րդ հոդվածի 1-ին մասի 3-րդ կետով Դատարանը

Ո Ր Ո Շ Ե Ց

Սարգիս Դավթի Գրիգորյանի նկատմամբ ՀՀ քրեական օրենսգրքի 255-րդ հոդվածի 1-ին մասով իրականացվող քրեական հետապնդումը ՀՀ քրեական օրենսգրքի 82-րդ հոդվածի դրույթների ուժով դադարեցնել՝ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետով սահմանված կարգով:
Թիվ ԵԴ1/1522/01/25 քրեական գործը՝ ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետով նախատեսված հիմքով, կարճել։
Սարգիս Դավթի Գրիգորյանի նկատմամբ ընտրված խափանման միջոց՝ բացակայելու արգելքը, սույն որոշումը օրինական ուժի մեջ մտնելուց հետո վերացնել:
Որոշումը կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո մեկամսյա ժամկետում:

ԴԱՏԱՎՈՐ` ՄՈՒՇԵՂ ԱՐԱՄՅԱՆ