ԵԴ1/1505/01/25

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ
ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

2025թ․ օգոստոսի <<14>> ք․Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

Նախագահող դատավոր Ա.Հովհաննիսյան
դատական նիստերի քարտուղար Մ․Հովհաննիսյան
հանրային մեղադրող Դ.Թադևոսյան

դռնբաց դատական նիստում քննեց քրեական վարույթն ըստ մեղադրանքի՝ Սարգիս Ժորայի Հարությունյանի՝ ծնված 1989 թվականի մարտի 12-ին, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երեք անչափահաս երեխա, նախկինում չդատապարտված, բնակվող՝ Երևան քաղաքի Ն.Շենգավիթ 11-րդ փողոցի 37/1 շենքի 6-րդ բնակարանում: Հանրային քրեական հետապնդում է հարուցվել ՀՀ քրեական օրենսգրքի 344-րդ հոդվածի 2-րդ մասով՝ 2 դրվագ․ որպես խափանման միջոց է կիրառվել բացակայելու արգելքը:
Վարութային նախապատմությունը․
2024 թվականի նոյեմբերի 27-ի ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Մ.Աբաջյանի արձանագրությամբ ՀՀ քրեական օրենսգրքի 344-րդ հոդվածի 2-րդ մասի հատկանիշներով նախաձեռնվել է թիվ 60703724 քրեական վարույթը։
2025 թվականի մարտի 10-ի ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Մ.Աբաջյանի արձանագրությամբ ՀՀ քրեական օրենսգրքի 344-րդ հոդվածի 2-րդ մասի հատկանիշներով նախաձեռնվել է թիվ 60212125 քրեական վարույթը։
2025 թվականի մարտի 10-ի ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Մ.Աբաջյանի որոշմամբ թիվ 60212125 քրեական վարույթը միացվել է թիվ 60703724 քրեական վարույթին և նախաքննությունը շարունակվել է 60703724 համարի ներքո:
2025 թվականի մարտի 31-ի ՀՀ դատախազության Երևան քաղաքի Շենգավիթ վարչական շրջանի դատախազության դատախազ Դ.Թադևոսյանի որոշմամբ Սարգիս Ժորայի Հարությունյանի նկատմամբ հանրային քրեական հետապնդում է հարուցվել ՀՀ քրեական օրենսգրքի 344-րդ հոդվածի 2-րդ մասով:
2025 թվականի մարտի 31-ի ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Մ.Աբաջյանի որոշմամբ Սարգիս Ժորայի Հարությունյանի նկատմամբ որպես խափանման միջոց է կիրառվել բացակայելու արգելքը:
2025 թվականի ապրիլի 21-ի ՀՀ դատախազության Երևան քաղաքի Շենգավիթ վարչական շրջանի դատախազության դատախազ Դ.Թադևոսյանի որոշմամբ Սարգիս Ժորայի Հարությունյանի նկատմամբ հարուցված հանրային քրեական հետապնդումը փոփոխվել, լրացվել և նոր հանրային քրեական հետապնդում է հարուցվել ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 2-րդ մասով նախատեսված՝ պատժի սպառնալիքով արգելված այն գործողությունները մեղավորությամբ կատարելու համար, որ նա, չունենալով տրանսպորտային միջոցներ վարելու իրավունք, ոչ սթափ (հարբած) վիճակում 2024 թվականի նոյեմբերի 2-ին և 2025 թվականի փետրվարի 20-ին վարել է տրանսպորտային միջոցներ:
Այսպես. Սարգիս Հարությունյանը, օրենքով սահմանված կարգով՝ վարչական իրավախախտման գործով թիվ ՊԾ 000753 որոշման հիման վրա, 1 տարի ժամկետով՝ 2021 թվականի հուլիսի 19-ից մինչև 2022 թվականի հուլիսի 19-ն ընկած ժամանակահատվածում զրկվելով տրանսպորտային միջոցներ վարելու իրավունքից, ինչի մասին 2021 թվականի հուլիսի 19-ին առձեռն ծանուցված լինելու և զրկման ժամկետը լրանալուց հետո սահմանված կարգով նշված իրավունքը չվերականգնելու պայմաններում, 2024 թվականի նոյեմբերի 2-ին՝ ժամը 04:40-ի սահմաններում, գտնվելով հարբած (ոչ սթափ) վիճակում՝ մեկ լիտր արտաշնչած օդի մեջ 0.576 մգ/լ մաքուր ալկոհոլի պարունակությամբ, Երևան քաղաքի Թամանցիների փողոցում վարել է <<Mercedes Benz>> մակնիշի 37 CW 998 հաշվառման համարանիշի տրանսպորտային միջոցը:
Բացի այդ, Սարգիս Հարությունյանը, օրենքով սահմանված կարգով՝ վարչական իրավախախտման գործով թիվ ՊԾ 000753 որոշման հիման վրա, 1 տարի ժամկետով՝ 2021 թվականի հուլիսի 19-ից մինչև 2022 թվականի հուլիսի 19-ն ընկած ժամանակահատվածում զրկվելով տրանսպորտային միջոցներ վարելու իրավունքից, ինչի մասին 2021 թվականի հուլիսի 19-ին առձեռն ծանուցված լինելու և զրկման ժամկետը լրանալուց հետո սահմանված կարգով նշված իրավունքը չվերականգնելու պայմաններում, 2025 թվականի փետրվարի 20-ին՝ ժամը 00:28-ի սահմաններում, գտնվելով հարբած (ոչ սթափ) վիճակում՝ մեկ լիտր արտաշնչած օդի մեջ 0.462 մգ/լ մաքուր ալկոհոլի պարունակությամբ, Երևան քաղաքի Ա.Բաբաջանյան փողոցում վարել է <<Mazda>> մակնիշի, 37 DK 206 հաշվառման համարանիշի տրանսպորտային միջոցը:
Այսպիսով, Սարգիս Ժորայի Հարությունյանին մեղսագրվում է հանցանքների կատարում՝ նախատեսված ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 2-րդ մասով:
2025 թվականի մայիսի 2-ին թիվ 60703724 քրեական գործը մեղադրական եզրակացությամբ ուղարկվել է Երևան քաղաքի առաջին ատյանի ընդհանուր իրավասության քրեական դատարան։
Ապացույցների հետազոտումը և գնահատումը․
Հիմնական դատալսումների ընթացքում մեղադրյալ Սարգիս Հարությունյանը, օգտվելով իր քրեադատավարական իրավունքից, հրաժարվել է ցուցմունք տալուց:
2025 թվականի մարտի 31-ի մեղադրյալի հարցաքննության մասին արձանագրության համաձայն. <<Հարց - ՀՀ ՆԳՆ ոստիկանության պարեկային ծառայության կողմից նյութեր են ստացվել այն մասին, որ Դուք 2024 թվականի նոյեմբերի 2-ին՝ ժամը 04:40-ին, չունենալով տրանսպորտային միջոցներ վարելու իրավունք, Երևան քաղաքի Թամանցիների փողոցում գտնվելով ալկոհոլային խմիչք օգտագործած՝ ոչ սթափ վիճակում, վարել եք <<Մերսեդես-Բենց>> մակնիշի 37 CW 998 հաշվառման համարանիշի տրանսպորտային միջոցը:
Պատասխան - Առաջադրված մեղադրանքում ինձ մեղավոր եմ ճանաչում, ես եմ չունենալով տրանսպորտային միջոցներ վարելու իրավունքի վկայական՝ ոչ սթափ վիճակում վարել տրանսպորտային միջոց, ինչի համար զղջում եմ>>:
2025 թվականի ապրիլի 21-ի մեղադրյալի հարցաքննության մասին արձանագրության համաձայն. <<Հարց - ՀՀ ՆԳՆ ոստիկանության պարեկային ծառայության կողմից նյութեր են ստացվել այն մասին, որ Դուք 2024 թվականի նոյեմբերի 2-ին՝ ժամը 04:40-ին, չունենալով տրանսպորտային միջոցներ վարելու իրավունք, Երևան քաղաքի Թամանցիների փողոցում գտնվելով ալկոհոլային խմիչք օգտագործած՝ ոչ սթափ վիճակում, վարել եք <<Մերսեդես-Բենց>> մակնիշի 37 CW 998 հաշվառման համարանիշի տրանսպորտային միջոցը, ինչպես նաև 2025 թվականի փետրվարի 20-ին՝ ժամը 02:00-ին, չունենալով տրանսպորտային միջոցներ վարելու իրավունք, Երևան քաղաքի Ա.Բաբաջանյան փողոցում գտնվելով ալկոհոլային խմիչք օգտագործած՝ ոչ սթափ վիճակում, վարել եք <<Մազդա>> մակնիշի 37 DK 206 հաշվառման համարանիշի տրանսպորտային միջոցը։
Պատասխան - Առաջադրված մեղադրանքում ինձ մեղավոր եմ ճանաչում, նշված երկու դեպքերը կատարել եմ ես. թե 2024 թվականի նոյեմբերի 2-ին և թե 2025 թվականի փետրվարի 20-ին չունենալով տրանսպորտային միջոցներ վարելու իրավունքի վկայական ոչ սթափ վիճակում վարել եմ տրանսպորտային միջոց, ինչի համար զղջում եմ>>:
2025 թվականի մարտի 18-ի զննություն կատարելու մասին արձանագրության համաձայն՝ զննությամբ պարզվել է, որ 2024 թվականի նոյեմբերի 2-ին ՀՀ ոստիկանության Պարեկային ծառայության պարեկի հղմից Սարգիս Ժորայի Հարությունյանի վերաբերյալ կազմվել է վարչական իրավախախտման վերաբերյալ թիվ 8180417613 արձանագրությունն այն մասին, որ վերջինը նույն օրը՝ ժամը 04:40-ին, չունենալով տրանսպորտային միջոցներ վարելու իրավունք, Երևան քաղաքի Թամանցիների փողոցում, գտնվելով ալկոհոլային խմիչք օգտագործած՝ ոչ սթափ վիճակում, վարել է <<Մերսեդես-Բենց>> մակնիշի 37 CW 998 հաշվառման համարանիշի տրանսպորտային միջոցը։
2025 թվականի փետրվարի 20-ին ՀՀ ոստիկանության Պարեկային ծառայության պարեկի կողմից Սարգիս Ժորայի Հարությունյանի վերաբերյալ կազմվել է վարչական իրավախախտման վերաբերյալ թիվ 8259036504 արձանագրությունն այն մասին, որ վերջինը նույն օրը՝ ժամը 00:28-ին, չունենալով տրանսպորտային միջոցներ վարելու իրավունք, Երևան քաղաքի Բաբաջանյան փողոցում, գտնվելով ալկոհոլային խմիչք օգտագործած՝ ոչ սթափ վիճակում, վարել է <<Մազդա>> մակնիշի 37 DK 206 հաշվառման համարանիշի տրանսպորտային միջոցը:
2021 թվականի հուլիսի 19-ին ՀՀ ոստիկանության Պարեկային ծառայության պարեկի կողմից Սարգիս Ժորայի Հարությունյանի վերաբերյալ կազմվել է վարչական իրավախախտման վերաբերյալ թիվ ՊԾ000753 արձանագրությունն այն մասին, որ վերջինը 1 տարի ժամկետով զրկվել է տրանսպորտային միջոցներ վարելու իրավունքից: Արձանագրության մեջ ստացա բաժնում առկա է վարորդի ստորագրությունը:
Սարգիս Ժորայի Հարությունյանի սթափության կտրոնի զննությամբ պարզվել է, որ ստուգաչափման սարքի համարը՝ 91101202, զննման համարը՝ 02612, զննման ամսաթիվը՝ 2025 թվականի փետրվարի 20, ստուգումը կատարվել է ավտոմատ, ժամը՝ 04:48:21-ին, ալկոհոլի պարունակությունը՝ 0,462մգ/լ, վարորդի անունը՝ Սարգիս, ազգանունը՝ Հարությունյան, տրանսպորտային միջոցի համարանիշը՝ 37 DK 206, տեսուչի ազգանունը՝ Պեղոսյան, կրծքանշանի համար՝ 06102, առկա են նաև ծանուցվող վարորդի և պարեկային ծառայողի ստորագրությունները:
Սարգիս Ժորայի Հարությունյանի սթափության կտրոնի զննությամբ պարզվել է, որ ստուգաչափման սարքի համարը՝ 91101178, զննման համարը՝ 02391, զննման ամսաթիվը՝ 2024 թվականի նոյեմբերի 2, ստուգումը կատարվել է ավտոմատ, ժամը՝ 04:48:21-ին, ալկոհոլի պարունակությունը՝ 0,576մգ/լ, վարորդի անունը՝ Սարգիս, ազգանունը՝ Հարությունյան, տրանսպորտային միջոցի համարանիշը՝ 37 CW 998, տեսուչի ազգանունը՝ Խառատյան, կրծքանշանի համար՝ 09496, առկա են նաև ծանուցվող վարորդի և պարեկային ծառայողի ստորագրությունները:
Առկա է նաև սթափության 91101178 համարի սարքի, ստուգաչափման թիվ 120884 այականի պատճենը, որի զննությամբ պարզվել է, որ ստուգաչափման թվականն է 2024 թվականի նոյեմբերի 4, այն ուժի մեջ է մինչև 2025 թվականի նոյեմբերի 4: Չափման միջոցի անվանումը և տեսակը՝ ալկոմետր, գործարանային համարը՝ 91101178, տեսակը՝ <<Jupiter X/RP>>, չափման տիրույթը՝ (0.000-2.000մգ/լ), ճշտության կարգը և դասը (սխալանքը) 0:0,1+-5%, 0,1-0,15+-8% > 0,15+-10%, արտադրողը՝ Չինաստան, պատկանում է ՀՀ ՆԳՆ ոստիկանությանը:
Առկա է նաև սթափության 91101202 համարի սարքի, ստուգաչափման թիվ 145714 վկայականի պատճենը, որի զննությամբ պարզվել է, որ ստուգաչափման թվականն է 2024 թվականի հունվարի 27, այն ուժի մեջ է մինչև 2026 թվականի հունվարի 27: Չափման միջոցի անվանումը և տեսակը՝ ալկոմետր, գործարանային համարը՝ 91101202, տեսակը՝ <<Jupiter X/RP>>, չափման տիրույթը՝ (0.000-2.000մգ/), ճշտության կարգը և դասը (սխալանքը) 0:0,1+-5%, 0,1-0,15-8% > 0,15-10%, արտադրողը՝ Չինաստան, պատկանում է ՀՀ ՆԳՆ ոստիկանությանը:
ՀՀ ոստիկանության <<Ճանապարհային ոստիկանություն>> ծառայության էլեկտրոնային ռեգիստրի զննությամբ պարզվել է, որ Սարգիս Ժորայի Հարությունյանի տրանսպորտային միջոցներ վարելու իրավունքի վկայականը գտնվում է զրկված կարգավիճակում: Զրկման սկիզբ նշված է՝ 2021 թվականի հուլիսի 19, ավարտ՝ 2022 թվականի հուլիսի 19:
Զննությամբ քննությանը հետաքրքրություն ներկայացնող այլ տվյալներ չեն հայտնաբերվել։
2025 թվականի մարտի 18-ի արտավարութային փաստաթուղթ ճանաչելու մասին որոշման համաձայն՝ Սարգիս Ժորայի Հարությունյանի նկատմամբ կազմված վարչական իրավախախտման վերաբերյալ թիվ 8180417613, 8259036504 և ՊԾ 000753 արձանագրությունները, սթափության վիճակի զննման թիվ 02612 և 02391 կտրոնները, սթափության 91101178 համարի սարքի, ստուգաչափման թիվ 120884 վկայականի և սթափության 91101202 համարի սարքի, ստուգաչափման թիվ 145714 վկայականի պատճենի, ինչպես նաև ՀՀ ոստիկանության <<Ճանապարհային ոստիկանություն>> ծառայության կտրոնային ռեգիստրի պատճեները արտավարութային փաստաթուղթ են ճանաչվել և կցվել սույն քրեական վարույթին:
ՀՀ ՆԳՆ ոստիկանության ինֆորմացիոն կենտրոնի պահանջագրի համաձայն՝ Սարգիս Ժորայի Հարությունյանը նախկինում արատավորված՝ դատապարտված չի եղել:
Դատարանի իրավական վերլուծությունները.
ՀՀ վճռաբեկ դատարանը 2013 թվականի մայիսի 8-ի թիվ ԵԿԴ/0168/01/12 որոշմամբ դիրքորոշում է հայտնել, որ ապացույցների գնահատումը կատարվում է ներքին համոզման հիման վրա: Ներքին համոզմունքը, որպես ապացույցների գնահատման արդյունք, բնութագրվում է օբյեկտիվ և սուբյեկտիվ գործոնների անխզելի կապով. այն, մի կողմից, պետք է բխի հետազոտվող ապացույցների բավարար համակցությունից և հիմնվի դրանց վրա, իսկ մյուս կողմից, անկողմնակալ դիտորդի մոտ պետք է առաջացնի այն վստահությունը, որ ապացույցները հետազոտվել են արդարության բոլոր պահանջների պահպանմամբ:
Հանցանք կատարելու մեջ անձի մեղավորությունը հաստատելիս ապացույցների բավարարությունը որոշելու հարցին ՀՀ վճռաբեկ դատարանն անդրադարձել է Արարատ Ավագյանի և Վահան Սահակյանի վերաբերյալ գործով 2014 թվականի հոկտեմբերի 31-ի թիվ ԵԿԴ/0252/01/13 որոշմամբ: Մասնավորապես` իրացնելով օրենքի միատեսակ կիրառությունն ապահովելու իր սահմանադրական գործառույթը` Վճռաբեկ դատարանը հիշատակված դատական ակտում նախադեպային նշանակության իրավական դիրքորոշումներ է արտահայտել առ այն, որ գործի լուծման համար բավարար ապացույցներ ասելով` պետք է հասկանալ թույլատրելի, վերաբերելի և արժանահավատ ապացույցների համակցություն, որը, հաղթահարելով անմեղության կանխավարկածը, անաչառ դիտորդի մոտ կձևավորի հիմնավոր կասկածից վեր համոզվածություն անձի մեղավորության վերաբերյալ, ինչպես նաև կհաստատի գործով ապացուցման առարկան կազմող մյուս հանգամանքները և հնարավորություն կտա կայացնել հիմնավորված և պատճառաբանված որոշում: Ապացույցների բավարարությունը չի կարող որոշվել թվաբանական ցուցանիշով: Ակնհայտ է, որ ապացույցները բավարար չեն, եթե`
1) գործում բացակայում է որևէ ապացույց գործի ճիշտ լուծման համար նշանակություն ունեցող որևէ հանգամանքի պարզման համար,
2) եղած ապացույցը թույլ չի տալիս պարզել այդ հանգամանքն անհրաժեշտ խորությամբ և լրիվությամբ,
3) այդ հանգամանքի ապացուցվածությունը կասկած է հարուցում (...):
Արդյունքում՝ Վճռաբեկ դատարանն արձանագրել է, որ քրեական դատավարությունում մեղքի հարցը լուծելիս որպես ապացույցների բավարարության շեմ պետք է գործի <<հիմնավոր կասկածից վեր>> ապացուցողական չափանիշը: Ընդ որում` <<հիմնավոր կասկածից վեր>> ապացուցողական չափանիշ ասելով պետք է հասկանալ փաստական տվյալների (ապացույցների) այնպիսի համակցություն, որը բացառում է հակառակի ողջամիտ հավանականությունը: Վերոգրյալը չի նշանակում, որ հանցանք գործելու մեջ անձի մեղավորությունն ընդհանրապես չի կարող առաջացնել որևէ կասկած, սակայն այդպիսի կասկածի հավանականության դեպքում դրա աստիճանը պետք է լինի աննշան (խիստ ցածր): Այլ խոսքով` մեղադրանքը կազմող յուրաքանչյուր փաստական հանգամանք պետք է հիմնավորվի ապացույցների այնպիսի ծավալով, որը կբացառի դրա ապացուցվածության վերաբերյալ ցանկացած ողջամիտ կասկած (...):
Անդրադառնալով մեղադրյալ Սարգիս Հարությունյանի արարքում ՀՀ քրեական օրենսգրքի 344-րդ հոդվածի 2-րդ մասով՝ 2 դրվագ նախատեսված հանցանքների առկայության կամ բացակայության հարցին՝ Դատարանը գտնում է, որ դրանք հիմնավոր կասկածից վեր ապացուցողական չափանիշով հաստատվում են սույն քրեական գործի շրջանակներում ձեռք բերված ապացույցներով, այլ կերպ ասած՝ ապացուցված է Սարգիս Ժորայի Հարությունյանի մեղավորությունը ՀՀ քրեական օրենսգրքի 344-րդ հոդվածի 2-րդ մասով՝ 2 դրվագ, նախատեսված հանցավոր արարքների կատարման մեջ:
Ընդ որում, Դատարանի համար առանցքային նշանակություն ունի նաև այն, որ սույն քրեական գործի շրջանակներում մեղադրյալ Սարգիս Հարությունյանն ամբողջովին ընդունում է մեղքը և զղջում է կատարվածի համար:
Դատարանը, ուսումնասիրելով Սարգիս Ժորայի Հարությունյանի պատասխանատվությունը և պատիժը մեղմացնող ու ծանրացնող հանգամանքները, վերասոցիալականացման և իրավահպատակ վարքագծի ձևավորման համար նշանակություն ունեցող տվյալները, եկավ հետևյալ եզրահանգման.
Սարգիս Ժորայի Հարությունյանի անձը դրականորեն բնութագրող հանգամանք է նախկինում արատավորված՝ դատապարտված չլինելը:
Դատարանն Սարգիս Ժորայի Հարությունյանի քրեական պատասխանատվություն ու պատիժը մեղմացնող հանգամանք է դիտում մեղքն ընդունելը և կատարածի համար զղջալը:
Բացի այդ, որպես Սարգիս Ժորայի Հարությունյանի պատասխանատվություն ու պատիժը մեղմացնող հանգամանք է նաև խնամքին երեք անչափահաս երեխայի (Սէմ Սարգիսի Հարությունյան, ծնված՝ 2020 թվականի ապրիլի 22-ին, վկայական՝ ԲԱ245623, Անրի Սարգիսի Հարությունյան, ծնված՝ 2021 թվականի հոկտեմբերի 1-ին, վկայական՝ ԲԱ468621, Անաիս Սարգիսի Հարությունյան, ծնված՝ 2024 թվականի նոյեմբերի 1-ին, վկայական՝ ԲԱ928139) առկայությունը:
Ընդ որում, սույն մեղմացնող հանգամանքները վերագրվում են մեղսագրվող երկու դրվագներին:
Միաժամանակ, պետք է արձանագրել, որ Սարգիս Ժորայի Հարությունյանի պատասխանատվությունն ու պատիժը ծանրացնող հանգամանքներ առկա չեն։
Կատարված արարքների համար դատապարտված մեղադրյալ Սարգիս Ժորայի Հարությունյանը ենթակա է քրեական պատասխանատվության և պատժի։
ՀՀ վճռաբեկ դատարանը 2010 թվականի օգոստոսի 27-ի թիվ ՍԴ/0293/01/09 որոշմամբ դիրքորոշում է հայտնել, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձը բնութագրող տվյալները և, քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ է և բավարար է այդ անձին ուղղելու և նրա կողմից նոր հանցանքի կատարումը կանխելու համար: Պատժի տեսակի և չափի որոշման ժամանակ դատարանը պետք է հաշվի առնի կատարված հանցագործության՝ հանրության համար վտանգավորության աստիճանն ու բնույթը, հանցավորի անձը բնութագրող տվյալները, այդ թվում՝ նրա պատասխանատվությունը մեղմացնող և (կամ) ծանրացնող հանգամանքները:
Դատարանը, հաշվի առնելով Սարգիս Ժորայի Հարությունյանի կատարած արարքների բնույթը և հանրային վտանգավորության աստիճանը, մասնավորապես՝ այն, որ վերջինի կատարած հանցանքները հանդիսանում են ոչ մեծ ծանրության հանցագործություններ, այդ թվում՝ նրա գործողությունների վտանգավորության աստիճանը, անձը բնութագրող, պատասխանատվությունն ու պատիժը մեղմացնող հանգամանքների առկայությունը, ինչպես նաև ծանրացնող հանգամանքների բացակայությունը և այն, որ մեղադրյալի կատարած արարքների համար քրեական օրենսգրքի համապատասխան հոդվածի սանկցիայով նախատեսված է պատիժ նաև տուգանքի ձևով, իսկ ՀՀ քրեական օրենսգրքի 69-րդ հոդվածի 3-րդ մասի կարգավորմամբ՝ ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները, գտնում է՝ Սարգիս Ժորայի Հարությունյանի նկատմամբ ՀՀ քրեական օրենսգրքի 344-րդ հոդվածի 2-րդ մասով (առաջին դրվագով) պատիժ պետք է նշանակել տուգանք՝ հանցանքը կատարելու պահին նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով, իսկ երկրորդ դրվագով՝ կրկին տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածի 1-ին մասի կիրառմամբ՝ նշանակված պատիժները մասնակի գումարելու միջոցով Սարգիս Ժորայի Հարությունյանի նկատմամբ վերջնական պատիժ պետք է նշանակել տուգանք՝ 750.000 (յոթ հարյուր հիսուն հազար) ՀՀ դրամի չափով:
Դատական նիստի ընթացքում մեղադրյալը խնդրել է նշանակվելիք տուգանք պատժատեսակը տարաժամկետել և թույլատրել մաս առ մաս վճարել, քանի որ ֆինանսական դրությամբ պայմանավորված չի կարող միանվագ վճարում կատարել:
ՀՀ քրեական օրենսգրքի 59-րդ հոդվածի 8-րդ մասի համաձայն՝ եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում: Եթե տուգանքը նշանակելուց հետո դատապարտյալի նյութական վիճակի վատթարացման հետևանքով նա զրկվում է տուգանքը վճարելու հնարավորությունից, ապա դատարանը, հաշվի առնելով դատապարտյալի դիրքորոշումը`
1) երկարաձգում է տուգանքի վճարման սահմանված վերջնաժամկետը` առավելագույնը 1 տարով,
2) նշանակում է հանրային աշխատանքներ` հանրային աշխատանքների 24 ժամը հաշվարկելով հանցանքը կատարելու պահին նվազագույն աշխատավարձի չափով:
ՀՀ քրեակատարողական օրենսգրքի 26-րդ հոդվածի 2-րդ մասի համաձայն՝ պրոբացիայի ծառայություն ներկայանալու դեպքում դատապարտյալը վերցվում է հաշվառման, լրացվում է հաշվառման քարտ, նրան ստորագրությամբ անհապաղ պարզաբանվում են տուգանքի կատարման կարգն ու պայմանները, իր իրավունքները և պարտականությունները, ինչպես նաև դրանց չկատարման դեպքում օրենսդրությամբ սահմանված պատասխանատվությունը։ Այն դեպքում, երբ դատարանը թույլատրել է տուգանքը մաս առ մաս վճարել, կամ տուգանքի վճարման համար սահմանվել է մինչև մեկ տարի ժամկետ, ապա կազմվում է նաև վերահսկողության պլան:
Այսպիսով՝ Դատարանը, հաշվի առնելով Սարգիս Ժորայի Հարությունյանի սոցիալական դրությունը, գտնում է, որ նշանակված 750.000 ՀՀ դրամը վճարելու համար Սարգիս Ժորայի Հարությունյանին պետք է տրամադրել 2 (երկու) ամիս ժամկետ:
Անդրադառնալով դատապարտված մեղադրյալի նկատմամբ կիրառված խափանման միջոցի հարցին՝ Դատարանը գտնում է, որ Սարգիս Հարությունյանի նկատմամբ կիրառված բացակայելու արգելքը, պետք է թողնել անփոփոխ մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 167-րդ հոդվածի 1-ին մաuի 1-ին, 2-րդ և 4-7-րդ կետերով նախատեսված վարութային ծախսերը մեղադրյալ Սարգիս Հարությունյանից ենթակա չեն հատուցման, քանի որ նմանատիպ վարութային ծախսեր առկա չեն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 276-րդ, 342-րդ, 347-349-րդ, 353-րդ, 364-րդ հոդվածներով` Դատարան





Վ Ճ Ռ Ե Ց

Սարգիս Ժորայի Հարությունյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 2-րդ մասով:
ՀՀ քրեական օրենսգրքի 344-րդ հոդվածի 2-րդ մասով պատիժ նշանակել տուգանք՝ հանցանքը կատարելու պահին նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով:
ՀՀ քրեական օրենսգրքի 344-րդ հոդվածի 2-րդ մասով պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածի 1-ին մասի կիրառմամբ՝ նշանակված պատիժները մասնակի գումարելու միջոցով Սարգիս Ժորայի Հարությունյանի նկատմամբ պատիժ նշանակել տուգանք՝ 750.000 (յոթ հարյուր հիսուն հազար) ՀՀ դրամի չափով:
Դատավճիռն օրինական ուժի մեջ մտնելուց հետո՝ նշանակված 750.000 ՀՀ դրամը վճարելու համար Սարգիս Ժորայի Հարությունյանին տրամադրել 2 (երկու) ամիս ժամկետ:
Սարգիս Ժորայի Հարությունյանի նկատմամբ կիրառված խափանման միջոց՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից մեկամսյա ժամկետում:


ԴԱՏԱՎՈՐ Ա.ՀՈՎՀԱՆՆԻՍՅԱՆ