ԵԴ1/1513/01/25






Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«14» հոկտեմբերի 2025 թվական քաղաք Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

ՆԱԽԱԳԱՀՈՒԹՅԱՄԲ՝
ԴԱՏԱՎՈՐ ՎԱՀԵ ՋԻՎԱՆՅԱՆԻ
ՔԱՐՏՈՒՂԱՐՈՒԹՅԱՄԲ՝ ԳՈՀԱՐ ԽԱՉԱՏՐՅԱՆԻ
ՄԱՍՆԱԿՑՈՒԹՅԱՄԲ՝
ՀԱՆՐԱՅԻՆ ՄԵՂԱԴՐՈՂ ՀՐԱՉՅԱ ԱՍԱՏՐՅԱՆԻ
ՊԱՇՏՊԱՆ ՍԻՐԱՆՈՒՇ ՀԱՐՈՒԹՅՈՒՆՅԱՆԻ
ՄԵՂԱԴՐՅԱԼ ՏԻԳՐԱՆ ՄԵԼԻՔՍԵԹՅԱՆԻ

«Աջափնյակ-1» նստավայրում, դռնբաց դատական նիստում, դատաքննության հատուկ կարգով՝ համաձայնեցման վարույթով, քննեց քրեական գործն ըստ մեղադրանքի Տիգրան Վոլոդյայի Մելիքսեթյանի՝ ՀՀ քրեական օրենսգրքի 512-րդ հոդվածի 1-ին մասով (ծնված՝ 1968 թվականի նոյեմբերի 20-ին՝ Երևան քաղաքում, ազգությամբ հայ, ՀՀ քաղաքացի, ամուսնացած, դատված, միջնակարգ կրթությամբ, չի աշխատում, հաշվառման հասցե՝ քաղաք Երևան, Քանաքեռ 9րդ փողոց, 40-րդ տուն)։

1. Նկարագրական մաս.
2024 թվականի մայիսի 15-ին ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական երկրորդ բաժնում ՀՀ քրեական օրենսգրքի 512-րդ հոդվածի 1-ին մասով նախաձեռնվել է թիվ 13-0600-24 քրեական վարույթը։
2025 թվականի փետրվարի 24-ին Տիգրան Վոլոդյայի Մելիքսեթյանի նկատմամբ ՀՀ քրեական օրենսգրքի 512-րդ հոդվածի 1-ին մասով հարուցվել է հանրային քրեական հետապնդում։
2025 թվականի մայիսի 2-ին քրեական գործը մեղադրական եզրակացությամբ մուտքագրվել է Երևան քաղաքի առաջին ատյանի ընդհանուր իրավասության քրեական դատարանում։
2025 թվականի մայիսի 5-ին քրեական գործը հանձնվել է դատավոր Վ․Ջիվանյանին, որով 2025 թվականի մայիսի 8-ին ստանձնվել է վարույթ և նշանակվել նախնական դատալսումներ։
2025 թվականի հուլիսի 8-ին Տիգրան Վոլոդյայի Մելիքսեթյանի նկատմամբ որպես այլընտրանքային խափանման միջոց է կիրառվել բացակայելու արգելքը։
2025 թվականի հոկտեմբերի 8-ին կիրառվել է համաձայնեցման վարույթ և իրականացվել են լրացուցիչ դատալսումներ։

1.1. Մեղադրանքի փաստական նկարագրություն.
Տիգրան Վոլոդյայի Մելիքսեթյանի նկատմամբ հանրային քրեական հետապնդում է հարուցվել այն արարքի համար, որ նա, հանդիսանալով ՀՀ ԱՆ «Դատապարտյալների հիվանդանոց» քրեակատարողական հիմնարկում պատիժ կրող անձ, ուղղակի դիտավորությամբ, խախտելով արդարադատության նախարարության քրեակատարողական հիմնարկների ներքին կանոնակարգը հաստատելու մասին ՀՀ կառավարության 2023 թվականի ապրիլի 13-ի թիվ 543-Ն որոշմամբ սահմանված 74-րդ կետի 1-ին ենթակետի պահանջները 2024 թվականի մայիսի 13-ին՝ ժամը 16:20-ի սահմաններում, ՀՀ ԱՆ «Դատապարտյալների հիվանդանոց» քրեակատարողական հիմնարկում իր կնոջից՝ Հերիքնազ Ալեքսանի Աղայանից, աննկատ վերցնելու եղանակով ձեռք է բերել և իր մոտ պահել նշված որոշման 122-րդ կետի 9-րդ ենթակետով արգելված կյանքի կամ առողջության համար վտանգ ներկայացնող մեկ հատ գազարագույն բռնակով, 95մմ շեղբի երկարությամբ, սրածայր, առողջությանը վնաս պատճառելու համար նախատեսված կտրող-ծակող դանակ: Նշված դանակը հայտնաբերվել է 2024 թվականի մայիսի 13-ին՝ դատապարտյալ Տիգրան Մելիքսեթյանի երկարատև տեսակցությունից անմիջապես հետո կատարված անձնական խուզարկությամբ վերջինիս պայուսակի մեջ առկա էլեկտրական սալիկի միջից:

1.2. Համաձայնեցման վարույթ.
Նախնական դատալսումների ժամանակ մեղադրյալ Տիգրան Վոլոդյայի Մելիքսեթյանը միջնորդել է դատական քննությունն անցկացնել համաձայնեցման վարույթի հատուկ կարգով և հայտնել, որ ներկայացված մեղադրանքն իրեն ամբողջությամբ պարզ է և հասկանալի, համաձայն է մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպան Սիրանուշ Հարությունյանի հետ, գիտակցում է համաձայնեցման հատուկ կարգով դատաքննություն անցկացնելու բնույթը և հետևանքները։
Դատարանը, քննարկելով միջնորդությունը և գտնելով, որ առկա է ՀՀ քրեական դատավարության օրենսգրքի 458-րդ հոդվածի 1-ին մասով նախատեսված հիմքը և բացակայում են նույն օրենսգրքի 458-րդ հոդվածի 2-րդ մասով նախատեսված՝ համաձայնեցման վարույթի կիրառումը բացառող հանգամանքները, որոշում է կայացրել բավարարել միջնորդությունը և կողմերի բանակցությունների համար ժամկետ սահմանել։
Դատարանը ստացել է հանրային մեղադրող Հրաչյա Ասատրյանի, մեղադրյալ Տիգրան Մելիքսեթյանի, պաշտպան Սիրանուշ Հարությունյանի միջև կայացած համաձայնության գալու վերաբերյալ 2025 թվականի հոկտեմբերի 8-ի արձանագրությունը հետևյալ բովանդակությամբ.
Սույն արձանագրությունը կազմվել է Երևան քաղաքում 2025 թվականի հոկտեմբերի 8-ին Երևան քաղաքում,
մասնակցությամբ՝
մեղադրող Հրաչյա Ասատրյանի՝ Կենտրոն և Նորք-Մարաշ վարչական շրջանների դատախազության ավագ դատախազ,
ամբաստանյալ՝ Տիգրան Վոլոդյայի Մելիքսեթյանի ծնված՝ 20.11.1968թ., ք.Երևան, ազգությամբ հայ, ՀՀ քաղաքացի, նախկինում դատապարտված, ամուսնացած, տիրապետում է հայերեն գրավոր և բանավոր լեզվին:
պաշտպան՝ Սիրանուշ Հարությունյան
Խափանման միջոցը և դրա կիրառման ժամկետը՝
Տիգրան Վոլոդյայի Մելիքսեթյանի նկատմամբ որպես խափանման միջոց է ընտրվել բացակայելու արգելքը, որը պետք է պահպանվի մինչև դատավճռի վերջնական օրինական ուժի մեջ մտնելը:
Ներկայացված մեղադրանքի փաստական նկարագրությունը և արարքի իրավական գնահատականը՝
Տիգրան Վոլոդյայի Մելիքսեթյանին մեղադրանք է առաջդրվել այն հանրորեն վտանգավոր արարքի կատարման համար, որ նա հանդիսանալով ՀՀ ԱՆ «Դատապարտյալների հիվանդանոց» քրեակատարողական հիմնարկում պատիժ կրող անձ, ուղղակի դիտավորությամբ, խախտելով «ՀՀ արդարադատության նախարարության քրեակատարողական հիմնարկի ներքին կանոնակարգը հաստատելու մասին» ՀՀ կառավարության 2023 թվականի ապրիլի 13-ի թիվ 543-Ն որոշմամբ սահմանված 74-րդ կետի 1-ին ենթակետի պահանջները 2024 թվականի մայիսի 13-ին՝ ժամը 16:20-ի սահմաններում, ՀՀ ԱՆ «Դատապարտյալների հիվանդանոց» քրեակատարողական հիմնարկում իր կնոջից՝ Հերիքնազ Ալեքսանի Աղայանից, աննկատ վերցնելու եղանակով ձեռք է բերել և իր մոտ պահել նշված որոշման 122-րդ կետի 9-րդ ենթակետով արգելաված կյանքի կամ առողջության համար վտանգ ներկայացնող մեկ հատ գազարագույն բնռակով, 95մմ շեղբի երկարությամբ, սրածայր, առողջությանը վնաս պատճառելու համար նախատեսված կտրող-ծակող դանակ:
Նշված դանակը հայտնաբերվել է 2024 թվականի մայիսի 13-ին՝ դատապարտյալ Տիգրան Մելիքսեթյանի երկարատև տեսակցությունից անմիջապես հետո կատարված անձնական խուզարկությամբ՝ վերջինիս պայուսակի մեջ առկա էլեկտրական սալիկի միջից:
Այսինքն՝ Տիգրան Մելիքսեթյանը կատարել է ՀՀ քրեական օրենսգրքի 512-րդ հոդվածի 1-ին մասով նախատեսված արարք:
Դավիթ Տիգրան Մելիքսեթյանը ներկայացված մեղադրանքում իրեն մեղավոր է ճանաչել լիովին:
Քրեական վարույթով առկա չէ պատճառված վնաս:
Մեղադրյալ Տիգրան Մելիքսեթյանի և վերջինիս պաշտպանի հետ ձեռք է բերվել հետևյալ համաձայնությունը՝ մեղադրյալ Տիգրան Մելիքսեթյանին մեղավոր ճանաչել ՀՀ քրեական օրենսգրքի 512-րդ հոդվածի 1-ին մասով նախատեսված հանցավոր արարքի կատարման համար և Տիգրան Մելիքսեթյանի նկատմամբ ՀՀ քրեական օրենսգրքի 512-րդ հոդվածի 1-ին մասով պատիժ նշանակել ազատազրկում՝ 2 տարի ժամկետով, որը ՀՀ քրեական օրենսգրքի 84-րդ հոդվածով սահմանված կարգով պայմանականորեն չկիրառել, սահմանելով 5 տարի փորձաշրջան, միաժամանակ ՀՀ քրեական օրենսգրքի 84-րդ հոդվածի 5-րդ մասի 2-րդ և 3-րդ կետերով սահմանել պարտականություն՝ առանց դատապարտյալի վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը, բնակության վայրը փոխելու դեպքում դատապարտյալի վարքագծի նկատմամբ վերահսկողություն իրականացնող իրավասու մարմնին սեղմ ժամկետում հայտնել իր նոր բնակության վայրի հասցեն։»։
Դատարանը, ընդունելով վերը նշված համաձայնության արձանագրությունը, ղեկավարվելով ՀՀ քրեական դատավարության օրենսգրքի 461-րդ հոդվածի 1-ին մասով, որոշում է կայացրել լրացուցիչ դատալսումներ անցկացնելու մասին։
Հանրային մեղադրողի կողմից արձանագրությունը հրապարակվելուց հետո կողմերը պնդել են կնքված համաձայնությունը:

2. Պատճառաբանական մաս.
Քննարկելով Տիգրան Վոլոդյայի Մելիքսեթյանին առաջադրված մեղադրանքն ապացուցված լինելու և պատիժ նշանակելու հարցերը՝ Դատարանն արձանագրում է, որ ՀՀ քրեական դատավարության օրենսգրքի 463-րդ հոդվածի 3-րդ մասի համաձայն՝ մեղադրական դատավճռով դատարանը նշանակում է համաձայնության մասին արձանագրությամբ համաձայնեցված պատիժը (պատժատեսակն ու պատժաչափը), սահմանում է բռնագրավման ենթակա գույքը և դրա չափը, հետևաբար Դատարանը, հիմք ընդունելով համաձայնության մասին արձանագրությունը, գտնում է, որ մեղադրյալ Տիգրան Վոլոդյայի Մելիքսեթյանին պետք է մեղավոր ճանաչել ՀՀ քրեական օրենսգրքի 512-րդ հոդվածի 1-ին մասով նախատեսված հանցագործության կատարման մեջ և պատիժ նշանակել՝ ըստ համաձայնության արձանագրության։
Անդրադառնալով խափանման միջոցի հարցին Դատարանը կարծում է, որ մեղադրյալ Տիգրան Վոլոդյայի Մելիքսեթյանի նկատմամբ կիրառված այլընտրանքային խափանման միջոց բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը։
Անդրադառնալով իրեղեն ապացույցների տնօրինման հարցին, Դատարանը գտնում է, որ իրեղեն ապացույց ճանաչված դանակը, դատավճիռն օրինական ուժի մեջ մտնելուց հետո, պետք է ոչնչացնել։
ՀՀ քրեական դատավարության օրենսգրքի 463-րդ հոդվածի 5-րդ մասի համաձայն՝ վարութային ծախսերը մեղադրյալից ենթակա չեն բռնագանձման, ուստի այդ հարցին Դատարանը չի անդրադառնում։
Գործով գույքային հայց չի ներկայացվել։
Սույն դատական ակտը կայացնելիս Դատարանը ղեկավարվում է ՀՀ քրեական դատավարության օրենսգրքի 30-րդ, 33-րդ, 347-350-րդ, 458-464-րդ հոդվածներով։

3. Եզրափակիչ մաս.
Ելնելով վերոգրյալից` Դատարանը

ՎՃՌԵՑ

Տիգրան Վոլոդյայի Մելիքսեթյանին մեղավոր ճանաչել ՀՀ քրեական օրենսգրքի 512-րդ հոդվածի 1-ին մասով նախատեսված հանցագործության կատարման մեջ և նրա նկատմամբ նշանակել պատիժ՝ ազատազրկում՝ 2 (երկու) տարի ժամկետով:
ՀՀ քրեական օրենսգրքի 84-րդ հոդվածի 1-ին մասի կիրառմամբ Տիգրան Վոլոդյայի Մելիքսեթյանի նկատմամբ ազատազրկման ձևով նշանակված պատիժը պայմանականորեն չկիրառել՝ սահմանելով փորձաշրջան 5 (հինգ) տարի ժամկետով։
Մեղադրյալ Տիգրան Վոլոդյայի Մելիքսեթյանի վարքագծի նկատմամբ վերահսկողությունը դնել ՀՀ ԱՆ պրոբացիայի ծառայության համապատասխան ստորաբաժանման վրա։
Փորձաշրջանի ընթացքում մեղադրյալ Տիգրան Վոլոդյայի Մելիքսեթյանին պարտավորեցնել՝
- առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
- բնակության վայրը փոխելու դեպքում հայտնել իր վարքագծի նկատմամբ վերահսկողություն իրականացնող իրավասու մարմնին սեղմ ժամկետում իր նոր բնակության վայրի հասցեն։
Փորձաշրջանի սկիզբը հաշվել սույն դատավճռով մեղադրյալին ՀՀ ԱՆ պրոբացիայի ծառայության համապատասխան ստորաբաժանումում հաշվառման վերցնելու պահից։
Տիգրան Վոլոդյայի Մելիքսեթյանի նկատմամբ կիրառված խափանման միջոց բացակայելու արգելքը թողնել անփոփոխ՝ մինչև դատավճռի օրինական ուժի մեջ մտնելը։
Իրեղեն ապացույց ճանաչված դանակը, դատավճիռն օրինական ուժի մեջ մտնելուց հետո, ոչնչացնել։
Դատական ակտն ուժի մեջ մտնելուց հետո քրեական գործով մյուս ապացույցները թողնել քրեական գործի նյութերում։
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան` այն ստանալու օրվանից հետո` մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերով):



ԴԱՏԱՎՈՐ ՎԱՀԵ ՋԻՎԱՆՅԱՆ