ԵԴ1/1497/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«26» Դեկտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
հանրային մեղադրող՝ ԳԵՎՈՐԳ ԽԱՉԱՏՐՅԱՆԻ
մեղադրյալ՝ ԱՐԹՈՒՐ ԳԵՎՈՐԳՅԱՆԻ
դռնբաց դատական նիստում քննելով Արթուր Արսենի Գևորգյանի (1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 396 հոդվածի 1-ին մասով.









1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 15129124 քրեական վարույթով Արթուր Արսենի Գևորգյանին ՀՀ քրեական օրենսգրքի 396 հոդվածի 1-ին մասով մեղադրանք է ներկայացվել հետևյալ արարքի համար.
«[Նա] խախտելով «Թմրամիջոցների և հոգեմետ նյութերի մասին» ՀՀ օրենքի 11-րդ հոդվածի 2-րդ կետի պահանջը, այն է՝ չունենալով բժշկական նպատակներով կամ բժշկի նշանակմամբ թմրամիջոցների և հոգեմետ (հոգեներգործուն) նյութերի շրջանառություն իրականացնելու, այսինքն՝ թմրամիջոց պատրաստելու, վերամշակելու, ձեռք բերելու, պահելու, փոխադրելու կամ առաքելու թույլտվություն քննությամբ դեռևս չպարզված ժամանակահատվածում և հանգամանքներում ինքնությունը դեռևս չպարզված անձից իր անձնական օգտագործման համար ձեռք է բերել և իր մոտ ապօրինի պահել է զգալի չափերի 0.13 գրամ հաստատուն քաշով «Հերոին» տեսակի թմրանյութ, ապա երբ 2024թ. օգոստոսի 2-ին՝ ժամը 00:20-ի սահմաններում, Երևան քաղաքի Վարդանանց 15/2 հասցեի մոտ պարեկային ոստիկանության աշխատակիցների կողմից վարչական արձանագրություն կազմելու ժամանակ իրեն պատկանող ծխախոտի տուփի մեջից գետնին է գցել հիշյալ թմրամիջոցը, որն էլ հայտնաբերվել է նույն օրը կատարված դեպքի վայրի զննությամբ»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 «Դեպքի վայրի զննություն կատարելու մասին» 2024 թվականի օգոստոսի 2-ի արձանագրության համաձայն.
«(...)
Դեպքի վայրը հանդիսանում է Երևան քաղաքի Վարդանանց 15/2 հասցեի դիմացի հատվածը: Դեպի Ալեք Մանուկյան փողոցի կողմ՝ մեքենայի երթևեկելի հատվածի 1-ին գիծ: Մասնակիցը մատնացույց արեց փողոցում մեքենայի երթևեկելի հատվածում գետնի վրա առկա պոլիէթիլենային տոպրակի փոքր կտորի մեջ դեղնավուն զանգվածով և հայտարարեց, որ ս.թ. օգոստոսի 2-ին՝ ժամը 00:20-ի սահմաններում, Երևան քաղաքի Վարդանանց 15/2 հասցեի դիմաց ծառայություն իրականացնելու ժամանակ նկատել է «Մերսեդես» մակնիշի 04 SH 040 հերթական համարանիշի մեքենան, դյուրակիր համակարգչով ստուգելու ժամանակ մեքենան խնդիր ցույց տվեց, ինչից հետո կանգնեցրել եմ մեքենան ստուգելու համար: Վարորդը ներկայացրեց իր փաստաթղթերը: Կազմվել է ՃՈ իրավախախտան ակտը: Այդ ժամանակ վարորդի կողքի ուղևորը թողել և հեռացել է: Այդ ժամանակ վարորդին հարցրել եմ իր մոտ ունի արգելված իր, իսկ վարորդը այդ պահին մեքենայից վերցրել է ծխախոտի տուփ, այնտեղից ինչ-որ պոլիէթիլենային տոպրակով զանգված է նետել գետնին:
Ես նրան հարցրեցի, թե ինչ գցեց նա, սակայն վերջինս հայտնեց, որ ինքը ոչինչ չի գցել գետնին: Դեպքի վայրի զննության ժամանակ վերցվեց գետնից պոլիէթիլենային տոպրակի միջի զանգվածը: Այն կշռվեց: Դրա քաշը կազմում է 0,27 գրամ: Դեպքի վայրի զննությամբ դեպքի վայրում դեպքի վայրին ուղղված տեսանկարահանող սարքեր չեն հայտնաբերվել և չեն վերցվել: Դեպքի վայրի զննության ժամանակ այլ բան չի հայտնաբերվել»: (2)
2.2 «Զննում կատարելու մասին» 2025 թվականի մարտի 26-ի արձանագրության համաձայն.
«(...)
Ներկայացված լազերային սկավառակը տեղադրվեց աշխատանքային համակարգչում և պարզվեց, որ դրանում առկա է թվով 2 տեսագրություն՝
1. «export-wdfix»
2. «export-klzv0»
Բացվեց 1-ին տեսագրությունը և պարզվեց, որ այն 10 րոպե 49 վայրկյան տևողությամբ է, գունավոր, տեսագրությանն սկսվում է պարեկի վերաբերյալ ամրակցված լինելու մասին տեղեկատվությամն, համաձայն որի՝ այն կցված է Աղասի Կորյունի Գրիգորյանին, տեսագրում է 2024 թվականի օգոստոսի 1-ից ժամը 23:54:45-ից մինչ օգոստոսի 2-ը ժամը 00:05:24: Տեսագրությամբ երևում է, որ պարեկները կանգնացնում են սև գույնի, սույն վարույթով՝ Մերսեդես մակնիշի 04 SA 040 հաշվառման համարանիշի ավտոմեքենան, որին առաջին մոտենում է մյուս պարեկը, ապա ում ամրակցված է սույն տեսախցիկը: Խոսակցություն է տեղի ունենում իրավախախտման վերաբերյալ, որից հետո վարորդին՝ սույն վարույթով Արթուր Գևորգյանին պարեկ Աղասի Գրիգորյանը ասում է մի հատ կիջնեք մեքենայից, Ա.Գևորգյանը դուրս է գալիս, ասում է բան չկա ցավտ տանեմ, նայի: Աղասի Գրիգորյանը ասում է բեռնախցիկը բացեք, Ա.Գևորգյանը այն բացում է ու ասում, որ ոչ մի արգելված բան չկա, մենք էլ արգելված բան չենք անում: Սկսվում է վարչական իրավախախտման վերաբերյալ արձանագրության կազմում, որի ընթացքում Աղասի Գրիգորյանը մոտենում է նշված Մերսեդեսի վարորդի կողքի նստատեղին նստած արական սեռի ներկայացուցչին և ասում, որ խնդրեմ դուրս կգաք մեքենայից, ով դուրս է գալիս մեքենայից, նրան Աղասի Գրիգորյանը հարցնում է, թե որևէ կտրող-ծակող, զենք զինամթերք, իսկ այդ անձը ասում է, չէ, ու այդ պահին Աղասի Գրիգորյանը ցույց է տալիս նրա գոտկատեղի հատված ու ասում բա ինչա, այդ անձը գոտկատեղից ենթադրաբար դանակ է հանում ու ասում է՝ էսի ..ու հնարավոր լսելի չի նրա խոսքը, իսկ պարեկ Աղասի Գրիգորյանը ասում է այս պահից Դուք ձերբակալված եք: Նշված անձը նստում է պարեկային մեքենան, իսկ պարեկ Ա.Գրիգորյանը մոտենում է մյուս պարեկին և Ա.Գևորգյանին և վերջինիս ասում բաց նայեմ, ով էլ բացում է մեքենայի աջակողմյան դուռը ու միասին նայում են, ապա մոտենում են Մերսեդեսի վարորդի դռանը, այն բացում է Ա.Գևորգյանը, նրան ասում է էն սիգարետները դուրս բեր, Ա.Գևորգյանը վերցնում է դրանք ու տեսագրության 00:03:30-ին պարեկ Ա.Գրիգորյանը ասում է թափիր, Ա.Գևորգյանը ասում է՝ մեռնեմ քեզ ես ոչ մի բան չեմ թափե, Ա.Գրիգորյանը գոռում է Գևոր արի ստե, իսկ Ա.Գևորգյանին ասում է ձեռովտ վեկալ, դիր մեջը, իմ ձեռից չես պրծնի, Ա.Գևորգյանը ասում է, բայց էսի ինչա, կարամ իմ փաստաբանին զանգեմ հարցնեմ կարելիա, թե չէ: Ա.Գրիգորյանը ասում է, կամեռան կա, նկարվումա, քո քծածը չես վեկալում, Ա. Գևորգյանը ասում է զանգեմ իմ փաստաբանին գա, պարեկը ասում է ձեռնաշղթա ու այն կիրառում են ու ասում, որ թմրանյութ պահելու և օգտագործելու կասկածանքով մոտեցնում ենք Կենտրոնականի բաժին: Մյուս անձից այլ տեղեկություններ առկա չեն:
Բացվեց 2-րդ տեսագրությունը և պարզվեց, որ այն 10 րոպե 44 վայրկյան տևողությամբ է, գունավոր, տեսագրությանն սկսվում է պարեկի վերաբերյալ ամրակցված լինելու մասին տեղեկատվությամն, համաձայն որի՝ այն կցված է Գևորգ Լեռնիկի Մանուկյանին, տեսագրում է 2024 թվականի օգոստոսի 1-ից ժամը 23:54:52-ից մինչ օգոստոսի 2-ը ժամը 00 00:05:27: Տեսագրությամբ երևում է, որ պարեկները կանգնացնում են սև գույնի, սույն վարույթով՝ Մերսեդես մակնիշի 04 SA 040 հաշվառման համարանիշի ավտոմեքենան, որին առաջին մոտենում է Գևորգ Մանուկյանը, ներկայանում, մնացածը նախորդ տեսագրությամբ նշվեց, իսկ 00:00:01-ին նշված անհայտ անձին մոտենալիս երևում է դանականման իր այդ անձի ձեռքին, ով նստում է պարեկային մեքենան, երբ պարեկ Ա.Գրիգորյանը գոռում է արի Գևորգ, վերջինս պարեկային մեքենայի դուռը աջակողմյան հատվածում կիսաբաց որևէ գործողություն է կատարում և արագ մոտենում մերսեդեսի ձախակողմյան հատված, որտեղ Մերսեդեսի վարորդի դռան ներքևի հատվածում գետնին երևում է ընկած իր: Զննությամբ հետաքրքրություն ներկայացնող այլ տվյալներ ներկայումս չպարզվեցին»:
Դատաքննության ընթացքում հրապարակվել է արտավարութային փաստաթուղթ ճանաչված, դատավճռի 2.3 կետում նշված տեսագրությունը, որի բովանդակությունը համընկնում է այն զննելու մասին արձանագրությանը: (3)
2.3 Փորձագետի եզրակացության թիվ 1162 Ք-24 եզրակացության «ՀԵՏԵՎՈՒԹՅՈՒՆՆԵՐ»-ի համաձայն.
«Փորձաքննության ներկայացված 0,13 գրամ քաշով շոշափելիս չոր, բաց շագանակագույն զանգվածը հանդիսանում է «Հերոին» տեսակի թմրամիջոց»: (4)
2.4 Դատաքննության ընթացքում հետազոտվեց նախաքննության մարմնի 2025 թվականի ապրիլի 28-ի որոշմամբ իրեղեն ապացույց ճանաչված «Հերոին» տեսակի թմրամիջոցը:
2.5 Դատաքննության ընթացքում վկա Աղասի Կորյունի Գրիգորյանն, ըստ էության, ցուցմունք տվեց այն մասին, որ 2005 թվականից աշխատում է ոստիկանության համակարգում և 2021 թվականից՝ պարեկային ծառայությունում։ Շուրջ մեկ տարի առաջ՝ հստակ օրը չի հիշում, ինքն իր գործընկերոջ՝ Գևորգ Մանուկյանի հետ միասին ծառայություն իրականացնելիս են եղել, որի ընթացքում իրենք կանգնեցրել են մեղադրյալին՝ արձանագրություն կազմելու նպատակով, քանի որ իրենց մոտ առկա տվյալներով վարորդի մոտ բացակայել է տրանսպորտային միջոց վարելու իրավունքը: Ինքը մեքենային է մոտեցել, որքանով հիշում է «Մերսեդես» մակնիշի սև գույնի մեքենա է եղել, այդ ժամանակ վարորդը դուրս է եկել մեքենայից, իսկ մեքենայի դուռը մնացել է բաց վիճակում, ինչով պայմանավորված ինքը մեքենայի մեջ՝ նստատեղերի մեջտեղի հատվածում, նկատել է «Սիգարոն» տեսակի ծխախոտի երկու տուփ, որոնք իր խնդրանքով վարորդը հանել է մեքենայից: Մինչ այդ ինքը նաև հարցրել է վարորդին արդյոք նրա մոտ կան արգելված իրեր, և վարորդ այդ հարցից շփոթվել է:
Մի տուփի մեջ ինչ-որ ցանկ է դրված եղել, որի մեջ անուն ազգանուններ են գրված եղել, իսկ մյուս տուփը բացելիս դրա միջից փաթեթավորված դեղնականաչավուն զանգված է ընկել: Վարորդը հայտարարել է, որ փաթեթն իրեն չի պատկանում: Այդ ժամանակ ինքը կատարվածի մասին զեկուցել է վերադասության կարգով, ինչից հետո իրենք վարորդին ձերբակալել ու տեղափոխել են Մարաշի բաժանմունք։ Իրենց կողմից ձեռնարկել են դեպքի վայրի պահպանությանն ուղղված համապատասխան միջոցառումներ:
2.6 Դատաքննության ընթացքում վկա Գևորգ Լեռնիկի Մանուկյանն, ըստ էության, ցուցմունք տվեց այն մասին, որ 2024 թվականից մինչ օրս ծառայում է ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 2-րդ վաշտում։ 2024 թվականի ամռանը՝ հստակ օրն ու ամիսը չի հիշել, ինքն իր գործընկերոջ հետ ծառայության է եղել, որի ընթացքում իրենք կանգնեցրել են «Մերսեդես» մակնիշի մեքենա: Իր գործընկերը՝ Աղասին, մոտեցել է վարորդին, իսկ ինքը ուղևորին և նրանց զննության են ենթարկել: Ուղևորի մոտ ինքը որևէ բան չի հայտնաբերել, իսկ զննությունից հետո ուղևորը փախուստի է դիմել: Աղասին իրեն կանչել է և ինքը մոտեցել է նրան ու տեսել է, որ նրանց մոտ՝ գետնին ընկած տոպրակով փաթաթված ինչ-որ զանգված է եղել: Դրանից հետո իրենք վարորդին՝ մեղադրյալ Արթուրին, տեղափոխել են ոստիկանության բաժին:

2025 ԹՎԱԿԱՆԻ ԴԵԿՏԵՄԲԵՐԻ 10-ԻՆ ԴԱՏԱՐԱՆԸ ՄԵՂԱԴՐՅԱԼ ԱՐԹՈՒՐ ԱՐՍԵՆԻ ԳԵՎՈՐԳՅԱՆԻ ՆԿԱՏՄԱՄԲ ԿԱՅԱՑՐԵԼ Է ՄԵՂԱԴՐԱԿԱՆ ՎԵՐԴԻԿՏ։
ԼՐԱՑՈՒՑԻՉ ԴԱՏԱԼՍՈՒՄՆԵՐ

2.7 Դատվածությունների և հետախուզման առկայության Ձև 8 հարցման պատասխանի, ինչպես նաև «DataLex.am» դատական տեղեկատվական համակարգում առկա տվյալների համաձայն՝
-Արթուր Արսենի Գևորգյանը մեղադրվում է ՀՀ քրեական օրենսգրքի 44-254 հոդվածի 2-րդ մասի 1-ին կետով, 44-254 հոդվածի 2-րդ մասի 3-րդ կետով և 44-254 հոդվածի 2-րդ մասի 4-րդ կետով նախատեսված ենթադրյալ հանցանքները կատարելու մեջ, սակայն քրեական գործը դատարան ուղարկված լինելու կամ դատապարտման վերաբերյալ տվյալներ առկա չեն,
-Շենգավիթի քննչական բաժնում ՀՀ քրեական օրենսգրքի 254 հոդվածի 3-րդ մասի 4-րդ կետի հատկանիշներով նախաձեռնվել է թիվ 13107224 քրեական վարույթը, քրեական գործն այժմ գտնվում է դատարանի վարույթում (ԵԴ1/2619/01/24),
-2021 թվականի ապրիլի 1-ին Կենտրոն և Նորք-Մարաշ վարչական շրջանների քննչական բաժնում 2003 թվականի ապրիլի 18-ին ընդունված ՀՀ քրեական օրենսգրքի 34-177 հոդվածի 2-րդ մասի 3-րդ կետի հատկանիշներով նախաձեռնվել է թիվ 13863421 քրեական վարույթը, առկա է «Ուղարկվել է դատարան» նշումը, սակայն դատապարտման կամ պատժի կրման վերաբերյալ տվյալներ առկա չեն,
-Թիվ ԵԴ1/0561/01/23 քրեական գործով «Քրեական հետապնդումը դադարեցնելու և վարույթը կարճելու հարցը քննության առնելու մասին» Երևան քաղաքի առաջին ատյանի ընդհանուր իրավասության քրեական դատարանի 2025 թվականի հուլիսի 18-ի որոշման համաձայն՝ Արթուր Արսենի Գևորգյանի նկատմամբ ՀՀ քրեական օրենսգրքի 254 հոդվածի 2-րդ մասի 2-րդ կետով հարուցված հանրային քրեական հետապնդումը ՀՀ քրեական oրենuգրքի 82 հոդվածի 1-ին մասի հիմքով դադարեցվել է, և քրեական գործով վարույթը կարճվել է:
2.8 ՀՀ պետական եկամուտների կոմիտեի հարկ վճարողների սպասարկման վարչության պետի 2025 թվականի մայիսի 7-ի գրության համաձայն՝ Արթուր Արսենի Գևորգյանը հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Արթուր Արսենի Գևորգյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ։
2.9 Սիլվա Դավիթի Համբարձումյանը Դատարանին հասցեագրված դիմումով հայտնել է, որ Արթուր Գևորգյանը հանդիսանում է իր ամուսինը և դստեր՝ Մարիա Արթուրի Համբարձումյանի հայրը: Դիմումին կից Դատարանին են ներկայացվել Սիլվա Համբարձումյանի անձը հաստատող փաստաթղթի և Մարիա Արթուրի Համբարձումյանի ծննդյան վկայականի պատճենները:
Ծննդի մասին թիվ ԲԱ980044 պետական վկայականի պատճենի համաձայն՝ 2025 թվականի մարտի 27-ին ծնված Մարիա Արթուրի Համբարձումյանի հայրն է Արթուր Համբարձումյանը (Գևորգյան): (5)



Պատժի վերաբերյալ կողմերի դիրքորոշումները.
Հանրային մեղադրողը Դատարանին խնդրեց Արթուր Արսենի Գևորգյանի նկատմամբ որպես պատիժ նշանակել 20 օր ժամկետով կարճաժամկետ ազատազրկում:
Մեղադրյալ Արթուր Գևորգյանն, ըստ էության, խնդրեց Դատարանին իր նկատմամբ մեղմ վարվել և հրաժարվեց հանրային աշխատանքներ կատարելուց։
3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանն արձանագրում է, որ Արթուր Արսենի Գևորգյանը քննությամբ չպարզված ժամանակահատվածում և հանգամանքներում ինքնությունը չպարզված անձից իր անձնական օգտագործման համար ձեռք է բերել և իր մոտ ապօրինի պահել է զգալի չափերի 0.13 գրամ հաստատուն քաշով «Հերոին» տեսակի թմրամիջոց, որը հայտնաբերվել է 2024 թվականի օգոստոսի 2-ին՝ ժամը 00:20-ի սահմաններում, Երևան քաղաքի Վարդանանց 15/2 հասցեի մոտ պարեկային ոստիկանության աշխատակիցների կողմից վարչական արձանագրություն կազմելու ժամանակ։ Արթուր Արսենի Գևորգյանն իրեն պատկանող ծխախոտի տուփի մեջից գետնին է գցել հիշյալ թմրամիջոցը:
3.2 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
-Արթուր Արսենի Գևորգյանի նախկինում դատապարտված չի եղել, խնամքին է մեկ անչափահաս երեխա, հանցանքն ավարտվելու օրվան նախորդող 12 ամիսների ընթացքում եկամուտ չի ստացել։
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի դեկտեմբերի 10-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Արթուր Արսենի Գևորգյանին վերագրվող արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ դատապարտված մեղադրյալի արարքի նկատմամբ ենթակա է կիրառման ՀՀ քրեական օրենսգրքի 396 հոդվածի 1-ին մասը։
4.2 Հաստատված փաստական հանգամանքների հիման վրա Դատարանն արձանագրում է, որ Արթուր Արսենի Գևորգյանի պատասխանատվությունն ու պատիժը մեղմացնող՝ ՀՀ քրեական օրենսգրքի 70 հոդվածով նախատեսված հանգամանք է պատիժ նշանակելու պահին մեղադրյալի խնամքի տակ անչափահաս երեխայի առկայությունը:
4.3 Դատարանն արձանագրում է, որ Արթուր Արսենի Գևորգյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն։
4.4 Կատարած հանցանքի համար մեղադրյալ Արթուր Արսենի Գևորգյանը ենթակա է պատժի։
4.5 Պատժի տեսակն ու չափը որոշելիս՝ Դատարանը հաշվի է առնում հետևյալը՝
-Արթուր Արսենի Գևորգյանի կատարած հանցանքի բնույթն ու վտանգավորության աստիճանը, թմրամիջոցի տեսակը, դրանով պայմանավորված նաև խախտված հասարակական հարաբերության բնույթն ու կարևորությունը՝ այն, որ նրան մեղսագրվում է թմրամիջոցների, հոգեմետ (հոգեներգործուն) նյութերի, դրանց պատրաստուկների, պրեկուրսորների, խիստ ներգործող կամ թունավոր նյութերի օրինական շրջանառության դեմ ուղղված բարձր վտանգավորություն ներկայացնող հանցագործություններից մեկը՝ առանց իրացնելու նպատակի թմրամիջոցների ապօրինի շրջանառությունը,
-Արթուր Արսենի Գևորգյանի հոգեբանական վերաբերմունքն իր արարքի նկատմամբ, մասնավորապես այն, որ մեղադրյալը գործել է ուղղակի դիտավորությամբ,
-Արթուր Արսենի Գևորգյանի անձը բնութագրող տվյալները, պատասխանատվությունը և պատիժը մեղմացնող հանգամանքը, ինչպես նաև ծանրացնող հանգամանքների բացակայությունն ու ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ Արթուր Արսենի Գևորգյանի կատարած հանցագործության բնույթին, վտանգավորության աստիճանին, կատարելու հանգամանքներին, ինչպես նաև հանցավորի անձին համաչափ պատիժ է՝ 9 (ինը) ամիս ժամկետով ազատության սահմանափակումը։
4.6 Արթուր Արսենի Գևորգյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն:
Պատժի կրման ընթացքում Արթուր Արսենի Գևորգյանին պետք է արգելել՝
-առանց իր նկատմամբ վերահսկողություն իրականացնող իրավասու մարմնի համաձայնության փոխել բնակության վայրը,
-ինչպես նաև 23:00-ից մինչև ժամը 07:00-ն ընկած ժամանակահատվածում բացակայել տնից:
4.7 Միևնույն ժամանակ, Դատարանն արձանագրում է, որ կատարած հանցանքի համար Արթուր Արսենի Գևորգյանի նկատմամբ լրացուցիչ պատիժ նշանակելու հիմքերն ու անհրաժեշտությունը դեպքում բացակայում են։
4.8 ՀՀ քրեական դատավարության օրենսգրքի 348 հոդվածի 1-ին մասի 11-13-րդ հարցերին անդրադառնալու անհրաժեշտությունը սույն քրեական գործով բացակայում է։
4.9 Դատավճիռն օրինական ուժի մեջ մտնելուց հետո՝ նախաքննության մարմնի 2025 թվականի ապրիլի 28-ի որոշմամբ իրեղեն ապացույց ճանաչված և դատաքիմիական փորձաքննության իրականացումից հետո «0,1 գրամ քաշով «հերոին» տեսակի թմրամիջոցը» պետք է հանձնել թիվ 15147325 քրեական վարույթն իրականացնող մարմնին՝ դրա տնօրինման հարցը այդ վարույթի շրջանակներում լուծելու համար:
4.10 Արթուր Արսենի Գևորգյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.11 Հաշվի առնելով Արթուր Արսենի Գևորգյանի վճարունակության վերաբերյալ տվյալների բացակայությունը՝ Դատարանը գտնում է, որ վարութային ծախսերի հատուցման պարտականությունը մեղադրյալի վրա դրվել չի կարող, հետևաբար այդ հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 100, 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Արթուր Արսենի Գևորգյանին մեղավոր ճանաչել ՀՀ քրեական օրենսգրքի 396 հոդվածի 1-ին մասով նախատեսված հանցանքը կատարելու մեջ, և նրա նկատմամբ պատիժ նշանակել ազատության սահմանափակում՝ 9 (ինը) ամիս ժամկետով։
Պատժի կրման ընթացքում Արթուր Գևորգյանին արգելել՝
-առանց իր նկատմամբ վերահսկողություն իրականացնող իրավասու մարմնի համաձայնության փոխել բնակության վայրը:
-ժամը 23:00-ից մինչև ժամը 07:00-ն ընկած ժամանակահատվածում բացակայել տնից:
2. Դատավճիռն օրինական ուժի մեջ մտնելուց հետո նախաքննության մարմնի 2025 թվականի ապրիլի 28-ի որոշմամբ իրեղեն ապացույց ճանաչված և դատաքիմիական փորձաքննության իրականացումից հետո «0,1 գրամ քաշով «հերոին» տեսակի թմրամիջոցը» հանձնել թիվ 15147325 քրեական վարույթն իրականացնող մարմնին՝ դրա տնօրինման հարցը այդ վարույթի շրջանակներում լուծելու համար:
3. Արթուր Գևորգյանի նկատմամբ կիրառված խափանման միջոցը՝ ՀՀ-ից բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
4. Վարութային ծախսերի հարցը համարել լուծված։
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ

(1)Ծնված՝ 1999 թվականի օգոստոսի 10-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, նախկինում չդատապարտված, խնամքին մեկ անչափահաս երեխա, չի աշխատում, հաշվառված է և բնակվում է Երևան քաղաքի Մանթաշյան փողոցի 4/7 շենքի թիվ 10 բնակարանում, որպես խափանման միջոց է կիրառված ՀՀ-ից բացակայելու արգելքը:
(2)Տե՛ս քրեական գործ, հատոր 1, թերթեր 31-41։
(3)Տե՛ս քրեական գործ, հատոր 1, թերթեր 118-120:
(4)Տե՛ս քրեական գործ, հատոր 1, թերթեր 107-110:
(5)2.7-2.9 կետերի վերաբերյալ տե՛ս Դատարանում ստեղծված և Դատարանին ներկայացված նյութերը: