ԵԴ1/1469/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«04» նոյեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ`
հանրային մեղադրող՝ Բագրատ Ղազինյանի,
մեղադրյալ՝ Նարեկ Հակոբյանի,

դռնբաց դատական նիստում քննելով քրեական գործն ըստ մեղադրանքի`
Նարեկ Արմանի Հակոբյանի՝
ծնված՝ 01.05.2000թ., ազգությամբ հայ, ՀՀ քաղաքացի, չամուսնացած, բարձրագույն կրթությամբ, չի աշխատում, դատվածություն չունեցող, հաշվառված և բնակվող՝ ք. Երևան, Կիևյան փողոց, 5-րդ շենք, 18-րդ բնակարան հասցեում, որպես խափանման միջոց է ընտրվել բացակայելու արգելքը ՀՀ քրեական օրենսգրքի 344-րդ հոդվածի 1-ին մասով,

ՊԱՐԶԵՑ

1. Քրեական գործի դատավարական նախապատմությունը.
2025թ․ մարտի 19-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60228625 քրեական վարույթը:
2025 թվականի ապրիլի 08-ին ՀՀ դատախազության Երևան քաղաքի Աջափնյակ և Դավթաշեն վարչական շրջանների դատախազության դատախազ Բ.Ղազինյանի որոշմամբ՝ թիվ 60228625 քրեական վարույթով Նարեկ Արմանի Հակոբյանի նկատմամբ ՀՀ քրեական օրենսգրքի 344-րդ հոդվածի 1-ին մասով հարուցվել է հանրային քրեական հետապնդում:
2025 թվականի ապրիլի 28-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/1469/01/25 քրեական գործն ըստ մեղադրանքի՝ Նարեկ Արմանի Հակոբյանի՝ ՀՀ քրեական օրենսգրքի 344-րդ հոդվածի 1-ին մասով:
Նույն օրը քրեական գործը էլեկտրոնային եղանակով մակագրվել և 2025 թվականի ապրիլի 29-ին հանձնվել է դատավոր Տաթևիկ Մուրադյանին:
2025 թվականի մայիսի 02-ին Դատարանի կողմից որոշում է կայացվել թիվ ԵԴ1/1469/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի նոյեմբերի 04-ին Դատարանը թիվ ԵԴ1/1469/01/25 քրեական գործով կայացրել է արդարացման վերդիկտ՝ ճանաչելով և հռչակելով Նարեկ Արմանի Հակոբյանի անմեղությունը ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման մեջ՝ այն փաստական հանգամանքներով, որոնք դրվել են մեղադրանքի հիմքում:
Նարեկ Արմանի Հակոբյանի նկատմամբ ընտրված խափանման միջոցը՝ բացակայելու արգելքը, վերացվել է։
2. Մեղադրանքի փաստական նկարագրությունը.
Նարեկ Արմանի Հակոբյանին մեղադրանք է ներկայացվել ՀՀ քրեական օրենսգրքի 344-րդ հոդվածի 1-ին մասով` այն բանի համար, որ «նա, զրկված լինելով տրանսպորտային միջոցներ վարելու իրավունքից վարել է տրանսպորտային միջոց:
Այսպես.
Նարեկ Արմանի Հակոբյանը ՀՀ ՆԳՆ ոստիկանության պարեկային ծառայության ծառայողի կողմից 2024 թվականի մայիսի 21-ին կայացված թիվ 8180409506 որոշմամբ ենթարկված լինելով վարչական տույժի՝ տրանսպորտային միջոց վարելու իրավունքից 1 տարի ժամկետով զրկելու ձևով, պատշաճ ծանուցված և տեղեկացված լինելով այդ մասին, 2025 թվականի մարտի 09-ին ժամը 11.50-ի սահմաններում Երևան քաղաքի Սասնա Ծռեր փողոցում վարել է Մերսեդես մակնիշի 01 SP 101 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության ծառայողի կողմից նույն օրը կազմված վարչական իրավախախտման վերաբերյալ թիվ 8259010553 որոշմամբ։»:
3. Դատաքննության ընթացքում հետազոտված թույլատրելի ապացույցները.
- Մեղադրյալ Նարեկ Հակոբյանը, օգտվելով իր սահմանադրական իրավունքից, հրաժարվեց ցուցմունք տալ։
դատական նիստի արձանագրություն
- 2024 թվականի մայիսի 21-ին՝ ժամը 00:30-ին, Երևան Հալաբյան փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի պարեկ Նարեկ Զոհրաբյանի /կրծքանշան թիվ 03144/ կողմից կազմված վարչական իրավախախտման վերաբերյալ թիվ 8180409506 արձանագրությունը, համաձայն որի՝ Նարեկ Արմանի Հակոբյանը (ծնված՝ 01.05.2000թ.) ժամը 00:20-ի սահմաններում Երևան քաղաքի Հալաբյան փողոցում վարել է Մերսեդես մակնիշի 03 TG 033 հաշվառման համարանիշի տրանսպորտային միջոցը՝ ոչ սթափ վիճակում:
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա չէ ստորագրություն:
Արձանագրությանը ծանոթացա, իմ իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է «քաղաքացին հրաժարվում է ծանոթանալուց» ձեռագիր գրառումը և ստորագրություն:
Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված՝ 70․2 թիվը։
Թիվ 8180409506 վարչական գործով 2024 թվականի մայիսի 21-ին որոշում է կայացվել և Նարեկ Արմանի Հակոբյանը զրկվել է վարորդական իրավունքից 1/մեկ տարի ժամկետով։ Հիշյալ որոշման «որոշման պատճենը և կատարման կարգի մասին քաղվածքն ստացա» հատվածում առկա է «հրաժարվել է որոշման պատճենը ստանալուց» ձեռագիր գրառումը և ստորագրություն։
(գ.թ. 6, դատական նիստի արձանագրություն)
- Ալկոհոլի պարունակության ստուգման կտրոնի պատճենը, համաձայն որի՝ ստուգաչափման սարքի համարն է՝ 91100878, զննման համարը՝ 01499, զննման ամսաթիվը՝ 21.05.2024թ., զննման ժամը՝ 00:26:29, վերջին ստուգաչափման ամսաթիվը՝ 05.04.2024թ., դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0․611 մգ/լ, վարորդի անունն է՝ Նարեկ, ազգանունը՝ Հակոբյան, տրանսպորտային միջոցի համարանիշը՝ 03 TG 033, վարորդական վկայականի սերիա համարը RB375651, Պ/Ծ ազգանունը՝ Ղազարյան, կրծքանշանի համարը՝ 01992:
(գ.թ. 7, դատական նիստի արձանագրություն)
- ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ից կողմից տրված թիվ 120894 ստուգաչափման վկայականի պատճենը, համաձայն որի՝ վկայականը ուժի մեջ է 2024 թվականի ապրիլի 05-ից մինչև 2025 թվականի ապրիլի 05-ը, ստուգաչափման սարքի գործարանային համարն է 91100878, տեսակը՝ Jupiter X/RP, չափման տիրույթը՝ 0.000÷2.000մգ/լ ճշտության դասը, կարգը /սխալանքը/ ±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Վ.Բաբաջանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան:
(գ.թ. 8, դատական նիստի արձանագրություն)
- 2025 թվականի մարտի 09-ին՝ ժամը 12:10-ին, Երևան քաղաքի Սասնա Ծռեր փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի կրտսեր պարեկ Թագուհի Կիրակոսյանի /կրծքանշան թիվ 11248/ կողմից կազմված վարչական իրավախախտման վերաբերյալ թիվ 8259010553 արձանագրությունը, համաձայն որի՝ Նարեկ Արմանի Հակոբյանը տրանսպորտային միջոցներ վարելու իրավունքից զրկված վիճակում՝ ժամը 11:50-ի սահմաններում Երևան քաղաքի Սասնա Ծռեր փողոցում վարել է Մերսեդես մակնիշի 01 SP 101 հաշվառման համարանիշի տրանսպորտային միջոցը։
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է «Հրաժարվեց որևէ բացատրություն տալուց» ձեռագիր գրառումը և ստորագրություն:
Արձանագրությանը ծանոթացա, իմ իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա չէ ստորագրություն:
Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված՝ 201․1 թիվը։
(գ.թ. 4, դատական նիստի արձանագրություն)
- ՀՀ ՆԳՆ ոստիկանության Ճանապարհային ոստիկանություն ծառայության էլեկտրոնային ռեգիստրում առկա տեղեկատվությունը, համաձայն որի՝ Նարեկ Արմանի Հակոբյանի տրանսպորտային միջոց վարելու իրավունքը (RB375651 սերիա համարի վարորդական վկայական) սույն քրեական վարույթը նախաձեռնելուց առաջ ունեցել է զրկված կարգավիճակ՝ սկիզբը 21.05.2024 թվականից, ավարտը՝ 21.05.2025 թվականը:
(գ.թ. 5, դատական նիստի արձանագրություն)
- ՀՀ ՆԳՆ ոստիկանության անձնագրային և վիզաների վարչության բնակչության պետական ռեգիստրի համակարգից ստացված քաղաքացու անձնագրի վերաբերյալ տեղեկանքը, համաձայն որի՝ Նարեկ Արմանի Հակոբյանը՝ ծնված՝ 01.05.2000թ., անձնագիր՝ AT0598709, ՀԾ համարանիշն է՝ 1105000639, հաշվառված է Երևան, Արաբկիր, Կիևյան փողոց, 5 շենք, 18 բնակարան հասցեում:
(գ.թ. 13, դատական նիստի արձանագրություն)
- Վերը նշված փաստաթղթերը զննելու մասին 07.04.2024թ. կազմված արձանագրությունը։
(դատական նիստի արձանագրություն, գ.թ. 15-17)
- Նարեկ Արմանի Հակոբյանի նկատմամբ կազմված վարչական իրավախախտման վերաբերյալ թիվ 8259010553 և 8180409506 արձանագրությունների, սթափության վիճակի զննության թիվ 01499 կտրոնի, ստուգաչափման թիվ 120894 վկայականի, ՀՀ ՆԳՆ ոստիկանության անձնագրային և վիզաների վարչության բնակչության պետական ռեգիստրի համակարգից ստացված քաղաքացու անձնագրի վերաբերյալ տեղեկատվության և ՀՀ ոստիկանության Ճանապարհային ոստիկանություն ծառայության էլեկտրոնային ռեգիստրից ստացված տեղեկատվության պատճենները արտավարութային փաստաթուղթ ճանաչելու մասին՝ 2025 թվականի ապրիլի 07-ի որոշումը։
(դատական նիստի արձանագրություն, գ.թ. 18-19)
Պաշտպանական կողմի ներկայացրած և հետազոտված ապացույցները․
- Դատարանի որոշմամբ արտավարութային փաստաթուղթ ճանաչված՝ ՀՀ վարչական դատարանի 2025 թվականի հունիսի 25-ի թիվ ՎԴ/15909/05/24 վճիռը, համաձայն որի՝ Նարեկ Արմանի Հակոբյանի հայցը բավարարվել է, և ՀՀ ՆԳՆ ոստիկանության պարեկային ծառայության 21.05.2024 թվականի թիվ 8180409506 որոշումը և 27.06.2024 թվականի գրությունը ճանաչվել են անվավեր:
Հիշյալ վճիռը 29.07.2025թ. մտել է օրինական ուժի մեջ:
(դատական նիստի արձանագրություն)
4. Դատարանի փաստական վերլուծությունները և հաստատված կամ հերքված փաստական հանգամանքները.
Մեղադրյալին ՀՀ քրեական օրենսգրքի 344-րդ հոդվածի 1-ին մասով վերագրված արարքի իրավական գնահատականը.
ՀՀ քրեական օրենսգրքի 344-րդ հոդվածի 1-ին մասի համաձայն.
«1. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը կամ տրանսպորտային միջոցներ վարելու իրավունք չունեցող անձի կողմից տրանսպորտային միջոց վարելը նույն արարքի համար օրենքով սահմանված պատասխանատվության կիրառումից հետո` մեկ տարվա ընթացքում՝ (...)
3. Սույն օրենսգրքի իմաստով՝ անձը համարվում է տրանսպորտային միջոցներ վարելու իրավունքից զրկված, եթե նա օրենքով սահմանված կարգով զրկվել է տրանսպորտային միջոցներ վարելու իրավունքից, և զրկման ժամկետը չի լրացել:
4. Սույն օրենսգրքի իմաստով՝ անձի՝ տրանսպորտային միջոցներ վարելու իրավունքը համարվում է կասեցված, եթե նրա` տրանսպորտային միջոցներ վարելու իրավունքն օրենքով սահմանված կարգով կասեցվել է, և կասեցման ժամկետը չի լրացել:
(...):»։
Դատարանը, հիմք ընդունելով թիվ ԵԴ1/0372/01/24 գործով ՀՀ վճռաբեկ դատարանի արտահայտած իրավական դիրքորոշումները, արձանագրում է, որ մեջբերված նորմը ՀՀ քրեական օրենսգրքում ամրագրված է երթևեկության անվտանգության և տրանսպորտի շահագործման սահմանված կարգի դեմ ուղղված հանցագործությունների շարքում։ Հանցագործության հիմնական անմիջական օբյեկտը երթևեկության անվտանգության և տրանսպորտի շահագործման սահմանված կարգն ապահովող հասարակական հարաբերություններն են։ Վերոնշյալ արարքն ամրագրված է ձևական հանցակազմով, իսկ հանցագործության օբյեկտիվ կողմը դրսևորվում է տրանսպորտային միջոցներ վարելու իրավունքից զրկված կամ վարելու իրավունքը կասեցված լինելու պայմաններում տրանսպորտային միջոց վարելով։
Այլ կերպ, ՀՀ քրեական օրենսգրքի 344-րդ հոդվածի 1-ին մասի գործողության նախապայմանը և այդ հոդվածով անձին քրեական պատասխանատվության ենթարկելու հիմքը նրա վարչական պատասխանատվության ենթարկված լինելն է՝ տրանսպորտային միջոցներ վարելու իրավունքից զրկվելը կամ վարելու իրավունքը կասեցվելը։ Ընդ որում, ՀՀ քրեական օրենսգրքի 344-րդ հոդվածի համակարգային վերլուծությունը ցույց է տալիս, որ վարելու իրավունքից զրկելը կամ այդ իրավունքը կասեցնելը պետք է լինի օրենքով սահմանված կարգով, այն է՝ իրավաչափ վարչական ակտի հիման վրա։ Հակառակ պարագայում, եթե վարչական ակտը կայացվել է օրենքով սահմանված կարգի խախտմամբ և վարչական կամ դատական կարգով անվավեր է ճանաչվել, ապա քննարկվող հանցագործության օբյեկտիվ կողմը բացակայում է, քանզի վերանում է քրեական պատասխանատվության ենթարկվելու պարտադիր նախապայմանը՝ օրենքով սահմանված կարգով վարչական պատասխանատվության ենթարկված լինելը։
Հանցագործության սուբյեկտը հատուկ է, քանի որ բացի ընդհանուր սուբյեկտի հատկանիշներից, անձը պետք է օժտված լինի նաև լրացուցիչ հատկանիշներով, այն է՝ լինի տրանսպորտային միջոցներ վարելու իրավունքից օրենքով սահմանված կարգով զրկված կամ վարելու իրավունքը կասեցված, մեղսունակ ֆիզիկական անձ։
Սուբյեկտիվ կողմից հանցագործությունը դրսևորվում է միայն ուղղակի դիտավորությամբ, մասնավորապես՝ անձը գիտակցում է, որ տրանսպորտային միջոցներ վարելու իրավունքից զրկված կամ իրավունքը կասեցված լինելու պայմաններում վարում է տրանսպորտային միջոց։
Ընդհանրացնելով վերոշարադրյալը՝ Դատարանն արձանագրում է, որ ՀՀ քրեական օրենսգրքի 344-րդ հոդվածի 1-ին մասով նախատեսված հանցակազմի օբյեկտիվ կողմի առկայությունը հաստատված համարելու համար անհրաժեշտ է, որ անձի՝ տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված լինելու հանգամանքը հաստատված լինի իրավաչափ վարչական ակտով:
Սույն քրեական վարույթի նյութերի ուսումնասիրությունից երևում է, որ.
- Նարեկ Արմանի Հակոբյանին մեղադրանք է առաջադրվել այն արարքի համար, որ նա, զրկված լինելով տրանսպորտային միջոցներ վարելու իրավունքից, վարել է տրանսպորտային միջոց:
- ՀՀ վարչական դատարանը 2025 թվականի հունիսի 25-ին թիվ ՎԴ/15909/05/24 վճռով Նարեկ Արմանի Հակոբյանի հայցը բավարարել է, և ՀՀ ՆԳՆ ոստիկանության պարեկային ծառայության 21.05.2024 թվականի թիվ 8180409506 որոշումը և 27.06.2024 թվականի գրությունը ճանաչել է անվավեր:
Հիշյալ վճիռը 29.07.2025թ. մտել է օրինական ուժի մեջ:
Այսպիսով՝ Դատարանը, ստուգելով և գնահատելով քրեական գործի դատական քննությամբ հետազոտված ապացույցները՝ արձանագրում է, որ անձի դատապարտման հիմքում չի կարող դրվել ոչ իրավաչափ՝ օրենքի խախտմամբ ընդունված և անձի իրավունքները խախտող վարչական ակտի պայմանները չկատարելու հանգամանքը՝ անկախ նրանից, որ կոնկրետ գործողությունը կատարելու պահի դրությամբ նշված վարչական ակտի ոչ օրինական լինելու հանգամանքը դեռևս հաստատված չի եղել։ Վարչական ակտի անվավերության պայմաններում հնարավոր չէ հաստատված համարել, որ տրանսպորտային միջոց վարելիս մեղադրյալը հանդիսացել է տրանսպորտային միջոց վարելու իրավունքից օրենքով սահմանված կարգով զրկված անձ, այսինքն՝ տվյալ դեպքում բացակայել է ՀՀ քրեական օրենսգրքի 344-րդ հոդվածի 1-ին մասով նախատեսված հանցակազմի օբյեկտիվ կողմը։ Տվյալ դեպքում հնարավոր չէ հիմնավոր հետևության հանգել նաև հանցագործության սուբյեկտի առկայության հարցում, քանի որ օրենքով սահմանված կարգով տրանսպորտային միջոց վարելու իրավունքից զրկված լինելու կամ այդ իրավունքը կասեցված լինելու ուժով է անձը ձեռք բերում տվյալ հանցագործության սուբյեկտին ներհատուկ հատկանիշները։
5. Դատարանի իրավական վերլուծությունները, հետևությունները և որոշումները.
ՀՀ քրեական դատավարության օրենսգրքի 12-րդ հոդվածի 1-ին մասի 1-ին կետի համաձայն՝ «Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե անձը չի կատարել իրեն մեղսագրվող արարքը»։
ՀՀ քրեական դատավարության օրենսգրքի 347-րդ հոդվածի 6-րդ մասի համաձայն՝ «Արդարացման դատավճիռը կայացվում է արդարացման վերդիկտի հիման վրա: Արդարացման դատավճիռը ճանաչում և հռչակում է հանցանքի կատարման մեջ մեղադրյալի անմեղությունն այն փաստական հանգամանքներով, որոնք դրվել են մեղադրանքի հիմքում»:
Հիմք ընդունելով վերոգրյալ հիմնավորումները՝ Դատարանը գտնում է, որ անհրաժեշտ է ճանաչել և հռչակել Նարեկ Արմանի Հակոբյանի անմեղությունը ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարման մեջ՝ մեղսագրվող արարքը նրա կողմից կատարված չլինելու պատճառաբանությամբ։
Հայաստանի Հանրապետության քրեական դատավարության օրենսգրքի 348-րդ հոդվածի 1-ին մասի համաձայն` դատավճիռ կայացնելիս դատարանը, inter alia, պարտավոր է անդրադառնալ այն հարցին, թե ինչ միջոցներ պետք է ձեռնարկվեն արդարացված մեղադրյալի ռեաբիլիտացիայի համար, ինչպես նաև գույքային հայցի, գույքի բռնագրավման և արգելադրման, ապացույցների տնօրինման, խափանման միջոցի և վարութային ծախսերի հարցերին:
Բռնագրավման ենթակա գույքի, ինչպես նաև արգելադրման ենթակա գույքի վերաբերյալ տվյալներ գործում առկա չեն, սույն գործով առկա չեն նաև իրեղեն ապացույցներ։
Մեղադրյալ Նարեկ Հակոբյանը լրացուցիչ դատալսումների ժամանակ՝ ռեաբիլիտացիայի հարցի քննարկման ընթացքում, որևէ պահանջ չի ներկայացրել:
Անդրադառնալով խափանման միջոցի հարցին՝ Դատարանն արձանագրում է, որ մեղադրյալ Նարեկ Հակոբյանի նկատմամբ կիրառված խափանման միջոց բացակայելու արգելքն արդեն իսկ Դատարանի կողմից վերացվել է։
Անդրադառնալով վարութային ծախսերի հարցին՝ Դատարանն արձանագրում է, որ այդպիսիք չկան, բացի այդ՝ մեղադրյալի արդարացման պայմաններում դրանք չեն կարող դրվել նրա վրա։
Վերոգրյալի հիման վրա և ղեկավարվելով Հայաստանի Հանրապետության քրեական դատավարության օրենսգրքի 347-350-րդ, 352-353-րդ, 364-րդ հոդվածներով, Դատարանը.

ՎՃՌԵՑ

Ճանաչել և հռչակել Նարեկ Արմանի Հակոբյանի անմեղությունը ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարման մեջ՝ մեղսագրվող արարքը նրա կողմից կատարված չլինելու պատճառաբանությամբ։
Վարութային ծախսերի հարցը համարել լուծված։
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում։




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ