ԵԴ/1462/01/25







Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ս.ԳԶՈԳՅԱՆԻ
քարտուղարությամբ Լ.ՉՈԲԱՆՅԱՆԻ
մասնակցությամբ
հանրային մեղադրող Հ․ՀԱՐՈՒԹՅՈՒՆՅԱՆԻ
մեղադրյալ Գ․ՀԱԿՈԲՅԱՆԻ

2025 թվականի հունիսի 3-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Գոռ Տիգրանի Հակոբյանի՝ ծնված 2004 թվականի հոկտեմբերի 28-ին, Եղվարդ քաղաքում, հայ, ՀՀ քաղաքացի, թերի բարձրագույն կրթությամբ, չամուսնացած, չի աշխատում, նախկինում չդատապարտված, հաշվառված է Կոտայքի մարզ, Նաիրի համայնք, քաղաք Եղվարդ, Սայաթ-Նովայի փողոց, 36 տուն և փաստացի բնակվում է Կոտայքի մարզ, Նաիրի համայնք, քաղաք Եղվարդ, Աբովյան փողոց, 43 տուն հասցեում, մեղադրանք է առաջադրվել ՀՀ քրեական օրենսգրքի 344-րդ հոդվածի 2-րդ մասով, որպես խափանման միջոց է ընտրվել բացակայելու արգելքը,

ՊԱՐԶԵՑ

1.Գործի դատավարական նախապատմությունը
2022 թվականի հոկտեմբերի 20-ին ՀՀ քրեական օրենսգրքի 344-րդ հոդվածի 2-րդ մասի հատկանիշներով նախաձեռնվել թիվ 60825322 քրեական վարույթը:
2025 թվականի մարտի 21-ի որոշմամբ Գոռ Տիգրանի Հակոբյանի նկատմամբ քրեական հետապնդում է հարուցվել ՀՀ քրեական օրենսգրքի 344-րդ հոդվածի 2-րդ մասով այն արարքի համար, որ նա, չունենալով տրանսպորտային միջոց վարելու իրավունք և միաժամանակ գտնվելով ոչ սթափ վիճակում (սթափության վիճակի զննման կտրոնի համարը՝ 01688՝ մեկ լիտր արտաշնչած օդի մեջ մաքուր ալկոհոլի պարունակությունը 0.219 մգ/լ), 2022 թվականի սեպտեմբերի 10-ին՝ ժամը 02:15-ի սահմաններում, Երևան քաղաքի Բաղրամյան պողոտայում վարել է «Նիսսան» մակնիշի 33 QQ 404 հաշվառման համարանիշի տրանսպորտային միջոցը, որի վերաբերյալ ՀՀ ՆԳՆ ոստիկանության պարեկային ծառայության պարեկի կողմից կազմվել է վարչական իրավախախտման վերաբերյալ թիվ 8180160791 արձանագրությունը:
2025 թվականի մարտի 24-ի որոշմամբ Գոռ Տիգրանի Հակոբյանի նկատմամբ խափանման միջոց է ընտրվել բացակայելու արգելքը:
2025 թվականի ապրիլի 28-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում, գործին շնորհվել է ԵԴ1/1462/01/25 համարը:
2025 թվականի ապրիլի 30-ին Դատարանի դատավոր Ս.Գզոգյանը որոշում է կայացրել վարույթը ստանձնելու և նախնական դատալսումներ նշանակելու մասին։
2025 թվականի մայիսի 13-ին Դատարանը Գոռ Տիգրանի Հակոբյանի նկատմամբ կայացրել է մեղադրական վերդիկտ։

2.Դատարանում հետազոտված և գնահատված ապացույցներ
Մեղադրյալ Գոռ Տիգրանի Հակոբյանն առաջադրված մեղադրանքում իրեն մեղավոր է ճանաչել, հիմնական դատալսումների ընթացքում, օգտվելով իր իրավունքներից, հրաժարվել է ցուցմունք տալ (տե՛ս դատական նիստի արձանագրությունը):
Մինչդատական վարույթի ընթացքում Գոռ Տիգրանի Հակոբյանը ցուցմունք է տվել այն մասին, որ օգտվելով իր իրավունքից հրաժարվում է ցուցմունք տալ և պատասխանել առաջադրված հարցերին (տե´ս դատական նիստի արձանագրություն, քրեական գործ, 55-58-րդ թերթ)։
Հիմնական դատալսումների ընթացքում հետազոտվել են հետևյալ գրավոր ապացույցները.
ՀՀ ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտի կրտսեր պարեկ Ռոբերտ Ղազարյանի կողմից 10.09.2022 թվականին կազմված վարչական իրավախախտման վերաբերյալ թիվ 8180160791 արձանագրությունը, որի համաձայն՝ 2022 թվականի սեպտեմբերի 10-ին՝ ժամը 02:15-ին, Գոռ Տիգրանի Հակոբյանը, չունենալով տվյալ կարգի տրանսպորտային միջոցներ վարելու իրավունք, Երևան քաղաքի Բաղրամյան պողոտայում, հարբած (ոչ սթափ) վիճակում վարել է «Նիսսան» մակնիշի 33 QQ 404 հաշվառման համարանիշի ավտոմեքենան, ինչպիսի փաստը հայտնաբերվել է կազմվել է Երևան քաղաքի Թաիրով 14 հասցեում ՀՀ ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտի կրտսեր պարեկ Ռոբերտ Ղազարյանի կողմից։ (տե´ս դատական նիստի արձանագրություն, քրեական գործ, 4-րդ թերթ)։
ՀՀ ճանապարհային ոստիկանության էլեկտրոնային ռեգիստրից ստացված քաղվածքը, որի համաձայն՝ Գոռ Տիգրանի Հակոբյանը տրանսպորտային միջոցներ վարելու վարորդական իրավունքի վկայական չի ունեցել (տե´ս դատական նիստի արձանագրություն, քրեական գործ, 5-րդ թերթ):
Ալկոհոլի պարունակության ստուգման թիվ 91100849 կտրոնը, որի համաձայն՝ զննումը կատարվել է 10.09.2022 թվականին՝ ժամը 02:20:49-ին, զննման համարը՝ 01688, ալկոհոլի պարունակությունը եղել է 0,219 մգ/լ, վարորդի անուն-ազգանունը՝ Գոռ Հակոբբյան, տրանսպորտային միջոցի համարանիշը՝ 33 QQ 404, ՃՈ տեսուչի ազգանունը՝ Ղազարյան, կրծքանշանի համարը՝ 06144։ Ալկոհոլի պարունակության ստուգման թիվ 91100849 կտրոնի վրա առկա են նաև ստորագրություններ: (տե´ս դատական նիստի արձանագրություն, քրեական գործ, 6-րդ թերթ)։
Ստուգաչափման թիվ 067383 վկայականի պատճենը, որի համաձայն՝ ստուգաչափման՝ թվականը 29032022 թվական, այն ուժի մեջ է մինչև 29032023 թվականը: Չափման միջոցի անվանումը և տեսակը՝ ալկոտեստեր, գործարանային համարը՝ 91100849, տեսակը՝ «Jupiter X/RP», չափման տիրույթը 0.000-1.200 մգ/լ: (տե´ս դատական նիստի արձանագրություն, քրեական գործ, 7-րդ թերթ)։
Գ․Հակոբյանի դատավածության վերաբերյալ տեղեկանքը, որի համաձայն Գ․Հակոբյանի վերաբերյալ տեղեկություններ առկա չեն (տե´ս դատական նիստի արձանագրություն, քրեական գործ, 28-րդ թերթ):
ՀՀ Կոտայքի մարզի Նաիրի համայնքի ղեկավար Ն․Սարգսյանի կողմից տրված բնութագրի, որ համաձայն Գ․Հակոբյանը բնութագրվում է դրականորեն, վայելում է շրջապատի հարգանքը (տե´ս դատական նիստի արձանագրություն):
Մեսրոպ Մաշտոցի անվան համալսարանի ռեկտոր Հ․Սարգսյանի կողմից տրված բնութագրի, որ համաձայն Գ․Հակոբյանը համալսարանում վայելում է պրոֆեսորադասախոսական համակազմի և ուսանողների սերն ու հարգանքը (տե´ս դատական նիստի արձանագրություն):

3.Դատարանի իրավական վերլուծությունները
Դատարանը, վերլուծելով մեղադրյալ Գ․Հակոբյանին առաջադրված մեղադրանքի հիմքում դրված և դատաքննության ընթացքում հետազոտված վերոգրյալ ապացույցները՝ դրանք գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր կասկածները նրա օգտին մեկնաբանելով, հաստատված է համարում, որ Գոռ Հակոբյանը, չունենալով տրանսպորտային միջոց վարելու իրավունք և միաժամանակ գտնվելով ոչ սթափ վիճակում (սթափության վիճակի զննման կտրոնի համարը՝ 01688՝ մեկ լիտր արտաշնչած օդի մեջ մաքուր ալկոհոլի պարունակությունը 0.219 մգ/լ), 2022 թվականի սեպտեմբերի 10-ին՝ ժամը 02:15-ի սահմաններում, Երևան քաղաքի Բաղրամյան պողոտայում վարել է «Նիսսան» մակնիշի 33 QQ 404 հաշվառման համարանիշի տրանսպորտային միջոցը, որի վերաբերյալ ՀՀ ՆԳՆ ոստիկանության պարեկային ծառայության պարեկի կողմից կազմվել է վարչական իրավախախտման վերաբերյալ թիվ 8180160791 արձանագրությունը:
Այսպիսով, Դատարանը գտնում է, որ սույն գործով ձեռք բերված հավաստի ապացույցների համակցությունը բավարար է հիմնավոր կասկածից վեր ապացուցողական չափանիշին համապատասխան հաստատված համարելու մեղադրյալ Գ․Հակոբյանի կողմից ոչ սթափ վիճակում տրանսպորտային միջոց վարելը տրանսպորտային միջոց վարելու իրավունք չունենալու պայմաններում, այդ արարքն ապացուցված է, ճիշտ է որակված և համապատասխանում է ՀՀ քրեական օրենսգրքի 344-րդ հոդվածի 2-րդ մասի հատկանիշներին:
Անդրադառնալով մեղադրյալի նկատմամբ նշանակվելիք պատժի հարցին՝ Դատարանն արձանագրում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի մի շարք դրույթներով:
Այսպես` Դատարանը մեղադրյալ Գ․Հակոբյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հանրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Գ․Հակոբյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, դատարանը, որպես Գ․Հակոբյանի անձը բնութագրող տվյալ հաշվի է առնում այն, որ նակինում դատապարտված չի եղել, բնութագրվում է դրական։
Դատարանը որպես մեղադրյալ Գ․Հակոբյանի պատասխանատվությունն ու պատիժը մեղմացնող հանգամանք հաշվի է առնում այն, որ իրեն լիովին մեղավոր է ճանաչել, անկեղծորեն զղջացել է կատարած արարքի համար։
Դատարանը, արձանագրում է, որ մեղադրյալ Գ․Հակոբյանի պատասխանատվությունն ու պատիժը ծանրացնող հանգամանքներ առկա չեն:
Դատարանը գտնում է, որ կատարած արարքի համար մեղադրյալ Գ․Հակոբյանի ենթակա է պատժի:
Դատարանը, հաշվի առնելով վերոնշյալ` մեղադրյալ Գ․Հակոբյանի արարքի հանրության համար վտանգավորության աստիճանն ու բնույթը, նրա անձը բնութագրող հանգամանքները, պատասխանատվությունն ու պատիժը մեղմացնող հանգամանքը, գտնում է, որ մեղադրյալ Գ․Հակոբյանն իր կատարած` ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության համար ենթակա է պատժի դաստիարակչական բնույթի հարկադրանքի ձևով, ինչն անհրաժեշտ և բավարար է պատժի նպատակների իրագործումն ապահովելու համար։
Անդրադառնալով Լ․Ասմարյանին քրեական պատասխանատվության ենթարկելու հարցին՝ Դատարանն արձանագրում է հետևյալը․
ՀՀ քրեական օրենսգրքի 104-րդ հոդվածի համաձայն՝ «1. Եթե անչափահասը կամ 21 տարին չլրացած անձն առաջին անգամ է մեղադրվում ոչ մեծ կամ միջին ծանրության հանցանք կատարելու մեջ, ապա ազատվում է քրեական պատասխանատվությունից, եթե դատարանը հիմնավորում է, որ պատժի նպատակների իրականացումը հնարավոր է դաստիարակչական բնույթի հարկադրանքի միջոց կիրառելով:
2. Անչափահասի կամ 21 տարին չլրացած անձի նկատմամբ դատարանը կարող է նշանակել դաստիարակչական բնույթի հարկադրանքի հետևյալ միջոցները.
1) տեղական ինքնակառավարման կամ դատապարտյալի վարքագծի նկատմամբ վերահսկողություն իրականացնող իրավասու մարմնի հսկողությանը հանձնելը` առավելագույնը 1 տարի ժամկետով,
2) պատճառած վնասը հարթելու պարտականություն դնելը՝ առավելագույնը 6 ամիս ժամկետում,
3) ժամանցի ազատությունը սահմանափակելը և վարքագծի նկատմամբ հատուկ պահանջներ սահմանելը` առավելագույնը 1 տարի ժամկետով,
4) ուսման անցնելը, ուսումը շարունակելը, 18-ից մինչև 21 տարեկանում հանցանք կատարած անձի՝ տեղական ինքնակառավարման մարմնի միջնորդությամբ աշխատանքի անցնելը,
5) հատուկ կրթական, մարզական, մշակութային կամ հանրային ծրագրին կամ միջոցառմանը կամ վերականգնողական հաստատությունում վերականգնողական ծրագրին մասնակցելը»:
Դատարանը, հաշվի առնելով վերոնշյալ` մեղադրյալ Գ․Հակոբյանի արարքի հանրության համար վտանգավորության աստիճանն ու բնույթը, նրա անձը բնութագրող հանգամանքները, այն որ վերջինիս արարքը կատարելու պահին եղել է անչափահաս, առաջին անգամ կատարել է ոչ մեծ ծանրության արարք, պատասխանատվությունն ու պատիժը մեղմացնող հանգամանքներ, ինչպես նաև ծանրացնող հանգամանքների բացակայությունը, գտնում է, որ մեղադրյալ Գ․Հակոբյանին իր կատարած` ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության համար պետք է ազատել քրեական պատասխանատվությունից և նրա նկատմամբ նշանակել դաստիարակչական բնույթի հարկադրանքի միջոց՝ իրավասու մարմնի հսկողությանը հանձնելը` 6 (վեց) ամիս ժամկետով։
Մեղադրյալի նկատմամբ հսկողությունը պետք է դնել ՀՀ ԱՆ պրոբացիայի ծառայության տարածքային մարմնի վրա։
Դատարանն արձանագրում է, որ արտավարութային փաստաթուղթ ճանաչված և քրեական գործին կցված փաստաթղթերը պետք է թողնել կցված քրեական գործին՝ դատավճիռն օրինական ուժի մեջ մտնելուց հետո։
Քննարկելով մեղադրյալ Գ․Հակոբյանի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 342-349-րդ հոդվածներով` Դատարանը

Վ Ճ Ռ Ե Ց

Մեղադրյալ Գոռ Տիգրանի Հակոբյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված արարքի կատարման մեջ, և նրա նկատմամբ նշանակել դաստիարակչական բնույթի հարկադրանքի միջոց՝ 6 (վեց) ամիս ժամկետով։
Մեղադրյալի նկատմամբ հսկողությունը դնել ՀՀ ԱՆ պրոբացիայի ծառայության տարածքային մարմնի վրա՝ ըստ բնակության վայրի։
Արտավարույթային փաստաթուղթ ճանաչված և քրեական գործին կցված փաստաթղթերը թողնել քրեական գործին կցված դատավճիռն օրինական ուժի մեջ մտնելուց հետո։
Մեղադրյալ Գոռ Տիգրանի Հակոբյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան՝ հրապարակվելու օրվանից՝ մեկամսյա ժամկետում:


ԴԱՏԱՎՈՐ՝ Ս.ԳԶՈԳՅԱՆ