ԵԴ1/1468/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«15» Հուլիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ԿԱՐԵՆ ԻՍՐԱԵԼՅԱՆԻ
մեղադրյալ՝ ՌՈԲԵՐՏ ԳՐԻԳՈՐՅԱՆԻ
պաշտպան՝ ԳԱԳԻԿ ԱՍԱՏՐՅԱՆԻ
դռնբաց դատական նիստում արագացված վարույթի կարգով քննելով քրեական գործն ըստ մեղադրանքի՝ Ռոբերտ Արամի Գրիգորյանի (1) ՀՀ քրեական օրենսգրքի 342 հոդվածի 2-րդ մասով.






1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 60093724 քրեական վարույթով Ռոբերտ Արամի Գրիգորյանին ՀՀ քրեական օրենսգրքի 342 հոդվածի 2-րդ մասով մեղադրանք է ներկայացվել հետևյալ արարքի համար.
«[Ն]ա, իր վարած ավտոմեքենայով խախտել է ճանապարհային երթևեկության կանոնները և ճանապարհային երթևեկության անվտանգության ապահովմանն ուղղված պահանջը, որի հետևանքով անզգուշությամբ առաջացրել է ազգությամբ պարսիկ Ամիր Նաջաֆիի Ֆիրուզի մահը, որպիսի գործողությունները դրսևորվել են հետևյալում.
Ռոբերտ Արամի Գրիգորյանը 2024 թվականի մարտի 12-ին՝ ժամը 21:00-ի սահմաններում, իրեն վստահված «VAZ» մակնիշի 37 BF 378 հաշվառման համարանիշի ավտոմեքենան վարել է Երևան քաղաքի Խանջյան փողոցով՝ Սայաթ Նովա պողոտայի կողմից դեպի Ագաթանգեղոս փողոցի ուղղությամբ երրորդ երթևեկելի գոտով շուրջ 50 կմ/ժ արագությամբ, մոտակա միացված լույսերով և հասնելով Երևան քաղաքի Խանջյան փողոցի թիվ 31 հասցեի դիմացի ճանապարհահատվածին, թույլ է տվել «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ մասի, ինչպես նաև ՀՀ ճանապարհային երթևեկության կանոնները և տրանսպորտային միջոցների շահագործումն արգելող անսարքությունների և պայմանների ցանկը հաստատելու մասին ՀՀ կառավարության 2007 թվականի հունիսի 28-ի թիվ 955-Ն որոշման 67-րդ կետի պահանջներին հակասող գործողություններ, այն է՝ 29 մետր հեռավորությունից իր վարած տրանսպորտային միջոցը կանգնեցնելու իրական հնարավորություն ունենալու պայմաններում, 72,3 մետր հեռավորությունից ի վիճակի է եղել հայտնաբերել իր երթևեկության համար առաջացած վտանգը, մասնավորապես՝ իր երթևեկության նկատմամբ աջից դեպի ձախ ճանապարհը հատող հետիոտն ազգությամբ պարսիկ Ամիր Նաջաֆիի Ֆիրուզին, սակայն 3-4 վայրկյան ուշադրությունը շեղելով երթևեկության նկատմամբ, ժամանակին միջոցներ չի ձեռնարկել իր վարած ավտոմեքենայի ընթացքը դանդաղեցնելու, ընդհուպ մինչև այն կանգնեցնելու այն հաշվով, որպիսի թույլ տա վերջինիս անվտանգ ազատել ճանապարհի իր ընթացագոտին, որի արդյունքում երթևեկելի ճանապարհի իր ուղեմասի երրորդ ուղեգոտում ավտոմեքենայի առջևի ձախակողմյան մասով վրաերթի է ենթարկել հետիոտն Ամիր Նաջաֆիի Ֆիրուզին՝ դրանով իսկ պայմանավորել տվյալ վրաերթի առաջացումը՝ ինքն իրեն զրկելով այն կանխելու տեխնիկական հնարավորությունից, որի հետևանքով գլխուղեղի դիֆուզ վնասվածքային ախտահարմամբ՝ պայմանավորված գանգուղեղային բաց, բութ վնասվածք պատճառելով անզգուշությամբ առաջացրել է ազգությամբ պարսիկ Ամիր Նաջաֆիի Ֆիրուզի մահը»։


2. ԱՐԱԳԱՑՎԱԾ ՎԱՐՈՒՅԹԸ.
2.1 Նախնական դատալսումների ընթացքում մեղադրյալ Ռոբերտ Արամի Գրիգորյանը ներկայացրեց արագացված վարույթ կիրառելու միջնորդություն՝ հայտնելով, որ ներկայացված մեղադրանքն իրեն պարզ է, համաձայն է մեղադրանքի հետ, պնդում է արագացված վարույթ կիրառելու մասին միջնորդությունը, այն ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ և գիտակցում է արագացված վարույթ կիրառելու հետևանքները:
2.2 Հանրային մեղադրող Կարեն Իսրաելյանը չառարկեց արագացված վարույթ կիրառելու դեմ:
2.3 Դատարանը, համոզվելով, որ առկա է ՀՀ քրեական դատավարության օրենսգրքի 464.1 հոդվածի 1-ին մասով նախատեսված հիմքը և բացակայում են նույն հոդվածի 2-րդ մասով նախատեսված՝ արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց քրեական գործով լրացուցիչ դատալսումներ անցկացնելու մասին։
3. ԼՐԱՑՈՒՑԻՉ ԴԱՏԱԼՍՈՒՄՆԵՐԻ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ ԵՎ ՔՆՆԱՐԿՄԱՆ ԵՆԹԱԿԱ ՀԱՐՑԵՐԻ ՎԵՐԱԲԵՐՅԱԼ ԿՈՂՄԵՐԻ ԲԱՑԱՏՐՈՒԹՅՈՒՆՆԵՐԸ.
3.1 Ամուսնության թիվ ԲԱ890366 վկայականի պատճենի համաձայն՝ Ռոբերտ Արամի Գրիգորյանը և Մերի Կորյունի Հակոբյանն ամուսնացած են:
3.2 Զինվորական թիվ 065450 գրքույկի համաձայն՝ Ռոբերտ Արամի Գրիգորյանը 2020 թվականի սեպտեմբերի 27-ից մինչև 2020 թվականի նոյեմբերի 10-ը N զորամասի կազմում մասնակցել է մարտական գործողություններին ջոկի հրամանատար-ավագ հրաձիգի պաշտոնում:
3.3 Դատվածությունների և հետախուզման առկայության Ձև 8 հարցման պատասխանի համաձայն՝ Ռոբերտ Արամի Գրիգորյանը նախկինում դատապարտված չի եղել: (2)
3.4 Պատժի վերաբերյալ հարցերը քննարկելիս հանրային մեղադրող Կարեն Իսրաելյանը Դատարանին խնդրեց Ռոբերտ Արամի Գրիգորյանի նկատմամբ որպես պատիժ նշանակել ազատազրկում՝ 2 տարի ժամկետով, և այն պայմանականորեն չկիրառել՝ զրկելով նրան նաև տրանսպորտային միջոցներ վարելու իրավունքից՝ 2 տարի ժամկետով:
3.5 Պատժի վերաբերյալ հարցերը քննարկելիս պաշտպան Գագիկ Ասատրյանը խնդրեց ազատազրկման ձևով պատիժը պայմանականորեն չկիրառել և մեղադրյալի նկատմամբ սահմանել փորձաշրջան՝ չզրկելով Ռոբերտ Գրիգորյանին տրանսպորտային միջոցներ վարելու իրավունքից:
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐԸ ԵՎ ՈՐՈՇՈՒՄՆԵՐԸ.
4.1 Արագացված վարույթ կիրառելու պայմաններում Դատարանն ապացուցված է համարում մեղադրյալ Ռոբերտ Արամի Գրիգորյանին վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ մեղադրյալի կողմից կատարած արարքի նկատմամբ ենթակա է կիրառման ՀՀ քրեական օրենսգրքի 342 հոդվածի 2-րդ մասը։
4.2 Հաստատված փաստական հանգամանքների հիման վրա Դատարանն արձանագրում է, որ Ռոբերտ Արամի Գրիգորյանի պատասխանատվությունն ու պատիժը մեղմացնող՝ ՀՀ քրեական օրենսգրքի 70 հոդվածով նախատեսված հանգամանք է ներկայացված մեղադրանքում իրեն լիովին մեղավոր ճանաչելը և կատարածի համար զղջալը, քանի որ մեղքն ընդունելը, կատարածի համար զղջալը, որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը։
Դատարանն արձանագրում է, որ Ռոբերտ Արամի Գրիգորյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.3 Կատարած հանցանքի համար մեղադրյալ Ռոբերտ Արամի Գրիգորյանը ենթակա է պատժի։
4.4 Պատժի տեսակն ու չափը որոշելիս Դատարանը, հաշվի է առնում հետևյալը՝
-Ռոբերտ Արամի Գրիգորյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է անզգուշությամբ կատարված միջին ծանրության հանցագործությունների շարքին։
-Ռոբերտ Արամի Գրիգորյանի անձը բնութագրող տվյալները, պատասխանատվությունը և պատիժը մեղմացնող հանգամանքները, ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Ռոբերտ Արամի Գրիգորյանի կողմից կատարված հանցագործության բնույթին, վտանգավորության աստիճանին, դրանք կատարելու հանգամանքներին, ինչպես նաև հանցավորի անձին համաչափ պատիժ պետք է նշանակել՝
-հիմնական պատիժ՝ 2 (երկու) տարի ժամկետով ազատազրկումը,
-լրացուցիչ պատիժ՝ 2 (երկու) տարի ժամկետով տրանսպորտային միջոցներ վարելու իրավունքից զրկելը:
4.5 Մեղադրյալ Ռոբերտ Արամի Գրիգորյանի կողմից իր նկատմամբ նշանակված հիմնական պատիժը կրելու հարցը որոշելիս Դատարանը հաշվի է առնում հետևյալ հանգամանքները՝
-Ռոբերտ Արամի Գրիգորյանը 25 տարեկան է, նախկինում արատավորված կամ դատապարտված չի եղել:
-Լիովին ընդունել է իրեն մեղսագրված հանցանքը և զղջացել կատարածի համար, մասնակցել է ադրբեջանի հանրապետության կողմից Արցախի Հանրապետության դեմ սանձազերծած 44-օրյա պատերազմին:
Դատարանը գտնում է Ռոբերտ Արամի Գրիգորյանի կողմից մեղքն ընդունելու պարագայում քրեական պատժի նպատակների իրացումը, այդ թվում՝ պատժի ենթարկված անձին ուղղելու հավանականությունը, զգալիորեն բարձրանում է, ինչը վկայում է այն մասին, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներին հնարավոր է հասնել նաև առանց Ռոբերտ Գրիգորյանի կողմից ազատազրկման ձևով նշանակված պատիժը փաստացի կրելու:
• Այսպիսով՝ Դատարանը գտնում է, որ Ռոբերտ Արամի Գրիգորյանի նկատմամբ նշանակված հիմնական պատիժը՝ 2 (երկու) տարի ժամկետով ազատազրկումը, ՀՀ քրեական օրենսգրքի 84 հոդվածի կիրառմամբ պետք է պայմանականորեն չկիրառել՝ սահմանելով 2 (երկու) տարի ժամկետով փորձաշրջան։
• Փորձաշրջանի ընթացքում Ռոբերտ Գրիգորյանի նկատմամբ պետք է նշանակել հետևյալ պարտականությունները.
-առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
-բնակության վայրը փոխելու դեպքում իր վարքագծի նկատմամբ վերահսկողություն իրականացնող իրավասու մարմնին սեղմ ժամկետում հայտնել նոր բնակության վայրի հասցեն:
4.6 Դատարանն արձանագրում է, որ ՀՀ քրեական դատավարության օրենսգրքի 348 հոդվածի 1-ին մասի 11-րդ կետով նշված հարցին անդրադառնալու անհրաժեշտությունը բացակայում է, քանի որ մահացած տուժողի փոխարեն որևէ անձ Ռոբերտ Արամի Գրիգորյանի դեմ որևէ պահանջ չի ներկայացրել։
4.7 ՀՀ քրեական դատավարության օրենսգրքի 348 հոդվածի 1-ին մասի 12-րդ և 13-րդ հարցերին անդրադառնալու անհրաժեշտությունը սույն քրեական գործով ևս բացակայում է։
4.8 Դատավճիռն օրինական ուժի մեջ մտնելուց հետո նախաքննության մարմնի 2024 թվականի ապրիլի 5-ի և ապրիլի 16-ի որոշումներով համապատասխանաբար իրեղեն ապացույցներ ճանաչված՝
-«Վազ 21213» մակնիշի 37 BF 378 հաշվառման համարանիշի ավտոմեքենան պետք է վերադարձնել դրա սեփականատիրոջը (կամ օրինական տիրապետողին):
-Դեպքի պահին տուժող Ամիր Նաջաֆիի Ֆիրուզի հագին եղած հագուստները պետք է ոչնչացնել:
4.9 Ռոբերտ Արամի Գրիգորյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար:
4.10 Վարութային ծախսերի հարցը պետք է համարել լուծված, քանի որ ՀՀ քրեական դատավարության օրենսգրքի 464.4 հոդվածի 3-րդ մասի համաձայն՝ արագացված վարույթ կիրառելու դեպքում ՀՀ քրեական դատավարության օրենսգրքի 167 հոդվածի 1-ին մաuով նախատեսված վարութային ծախսերը մեղադրյալից ենթակա չեն բռնագանձման:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 100, 276, 347, 348, 349, 464.4 և 464.5 հոդվածներով՝ Դատարանը

Վ Ճ Ռ Ե Ց

1. Ռոբերտ Արամի Գրիգորյանին մեղավոր ճանաչել ՀՀ քրեական օրենսգրքի 342 հոդվածի 2-րդ մասով նախատեսված հանցանքը կատարելու մեջ, և նրա նկատմամբ որպես հիմնական պատիժ նշանակել ազատազրկում՝ 2 (երկու) տարի ժամկետով։
2. Ռոբերտ Գրիգորյանի նկատմամբ նշանակված հիմնական պատիժը պայմանականորեն չկիրառել՝ սահմանելով փորձաշրջան՝ 2 (երկու) տարի ժամկետով։
Փորձաշրջանի ընթացքում Ռոբերտ Գրիգորյանի նկատմամբ նշանակել հետևյալ պարտականությունները՝
-առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
-բնակության վայրը փոխելու դեպքում իր վարքագծի նկատմամբ վերահսկողություն իրականացնող իրավասու մարմնին սեղմ ժամկետում հայտնել նոր բնակության վայրի հասցեն։
3. Որպես լրացուցիչ պատիժ Ռոբերտ Արամի Գրիգորյանին 2 (երկու) տարի ժամկետով զրկել տրանսպորտային միջոցներ վարելու իրավունքից։
4. Ռոբերտ Գրիգորյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
5. Դատավճիռն օրինական ուժի մեջ մտնելուց հետո՝ նախաքննության մարմնի 2024 թվականի ապրիլի 5-ի և ապրիլի 16-ի որոշումներով համապատասխանաբար իրեղեն ապացույցներ ճանաչված՝
-«Վազ 21213» մակնիշի 37 BF 378 հաշվառման համարանիշի ավտոմեքենան վերադարձնել դրա սեփականատիրոջը (կամ օրինական տիրապետողին):
-Դեպքի պահին տուժող Ամիր Նաջաֆիի Ֆիրուզի հագին եղած հագուստները ոչնչացնել։
6. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում, սակայն չի կարող բողոքարկվել ՀՀ քրեական դատավարության օրենսգրքի 373 հոդվածով և 375 հոդվածի 1-3-րդ մասերով նախատեսված հիմքերով:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ

(1)Ծնված՝ 2000 թվականի նոյեմբերի 22-ին Շիրակի մարզի Անի գյուղում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, նախկինում չդատապարտված, ըստ իր խոսքերի՝ աշխատում է «Յանդեքս» տաքսի ծառայությունում որպես վարորդ, և միջին ամսական եկամուտը կազմում է 300.000 ՀՀ դրամ, հաշվառված է Երևան քաղաքի Նորաշեն թաղամասի 4 շենքի թիվ 49 բնակարանում, բնակվում է Երևան քաղաքի Ավան 5 փողոցի թիվ 16 տանը, որպես խափանման միջոց է կիրառված բացակայելու արգելքը:
(2)3.1-3.3 կետերի վերաբերյալ տե՛ս, Դատարանում ստեղծված և Դատարանին ներկայացված նյութերը: