ԵԴ1/1443/01/25

Ո Ր Ո Շ Ո Ի Մ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՀԱՐՑԸ ՔՆՆՈՒԹՅԱՆ ԱՌՆԵԼՈՒ ՄԱՍԻՆ
«16» դեկտեմբերի 2025թ. ք.Երևան


Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)

Նախագահությամբ՝ դատավոր Ռ.ՍՄԲԱՏՅԱՆԻ
քարտուղարությամբ Հ.ԱՂՈՅԱՆԻ
մասնակցությամբ՝
հանրային մեղադրող Հ.ԱՎԵՏՅԱՆԻ
մեղադրյալ
պաշտպան
տուժող
տուժողի լիազոր ներկայացուցիչ Բ.ՄԻՐԶՈՅԱՆԻ
Է.ԲԵԳԼԱՐՅԱՆԻ
Գ.ԽԱՆՈՒՄՅԱՆԻ
Լ.ԶԵՅՆԱԼՅԱՆԻ

դռնբաց դատական նիստում նախնական դատալսումների ընթացքում քննարկման առարկա դարձնելով մեղադրյալ Բենո Արայիկի Միրզոյանի /ծնված՝ 17.09.1994թ. ԼՂՀ Ստեփանակերտ քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, չի աշխատում, չդատված, հաշվառված՝ ք.Երևան, Դավիթ Մալյան փողոց 22 շենք, բն.35 հասցեում, փաստացի բնակվող՝ ք.Երևան, Լվովյան փողոց 25 շենք, բն.126 հասցեում/ նկատմամբ քրեական հետապնդումը դադարեցնելու և գործի վարույթը կարճելու հարցը,
Պ Ա Ր Զ Ե Ց
Գործի դատավարական նախապատմությունը.
2022 թվականի դեկտեմբերի 27-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի ՀԿԳ քննիչ Ա.Համոզյանը ՀՀ քրեական օրենգրքի 342-րդ հոդվածի 1-ին մասի հատկանիշներով նախաձեռնվել է թիվ 60905122 քրեական վարույթը:
2022 թվականի դեկտեմբերի 28-ին որոշում է կայացվել Գոհար Էռնեստի Խանումյանին որպես տուժող ճանաչելու մասին:
2025 թվականի ապրիլի 07-ին որոշում է կայացվել Տոյոտա մակնիշի 11 PP 220 հաշվառման համարանիշի ավտոմեքենան ճանաչվել է որպես իրեղեն ապացույց և հանձնվել սեփականատեր Բենո Միրզոյանի պահպանությանը:
2025 թվականի ապրիլի 09-ին ՀՀ դատախազության Երևան քաղաքի դատախազության դատախազ Հ.Ավետյանը որոշում է կայացրել Բենո Արայիկի Միրզոյանի նկատմամբ ՀՀ քրեական օրենսգրքի 342-րդ հոդվածի 1-ին մասով հանրային քրեական հետապնդում հարուցելու մասին:
2025 թվականի ապրիլի 09-ին Բենո Միրզոյանի նկատմմաբ որպես խափանման միջոց է կիրառվել բացակայելու արգելքը:
2025 թվականի ապրիլի 16-ին կազմվել է մեղադրական եզրակացությունը:
2025 թվականի ապրիլի 23-ին դատախազ Հ.Ավետյանը որոշում է կայացրել մեղադրական եզրակացությունը հաստատելու մասին:
2025 թվականի ապրիլի 23-ին Դատարան է ստացվել քրեական վարույթն ըստ մեղադրանքի Բենո Միրզոյանի ՀՀ քրեական օրենսգրքի 342-րդ հոդվածի 1-ին մասով, որին շնորհվել է թիվ ԵԴ1/1443/01/25 համարը:
Նույն օրը քրեական գործը մակագրվել և հաջորդ օրը հանձնվել է դատավոր Ռ.Սմբատյանին:
2025 թվականի ապրիլի 28-ին որոշում է կայացվել քրեական գործի վարույթը ստանձնելու և նախնական դատալասումներ նշանակելու մասին:

Քրեական հետապնդումը դադարեցնելու և գործի վարույթը կարճելու հարցի քննության համար էական նշանակություն ունեցող փաստական հանգամանքները.
Բենո Արայիկի Միրզոյանին մեղադրանք է առաջադրվել ՀՀ քրեական օրենսգրքի 342-րդ հոդվածի 1-ին մասով, «ՀՀ քրեական օրենսգրքով նախատեսված, պատժի սպառնալիքով արգելված այն արարքի կատարման համար, որ նա 2022 թվականի դեկտեմբերի 27-ին՝ ժամը 17:30-ի սահմաններում, Երևան քաղաքի Սայաթ-Նովա Տերյան փողոցների խաչմերուկում իր ուղեմասով երթևեկող տրանսպորտային միջոցների հոսքը կարգավորող լուսացույցի կանաչ ազդանշանը միանալուց հետո վերսկսելով Երևան քաղաքի Տերյան փողոցի՝ Թումանյան փողոցի կողմից Սայաթ-Նովա պողոտա տանող ուղեմասի 1-ին երթևեկելի գոտիում՝ իր ուղեմասի «Կանգ-գիծ» գծանշումից 2,4 մետր հեռավորությամբ՝ իր ուղեմասով երթևեկող տրանսպորտային միջոցների հոսքը կարգավորող լուսացույցի կարմիր ազդանշանի պայմաններում անշարժ վիճակի բերված «Տոյոտա» մակնիշի 11 pp 220 հաշվառման համարանիշի ավտոմեքենայի երթևեկությունը, թույլ է տվել «Ճանապարհային երթևեկության մասին կոնվենցիա»-ի 7-րդ հոդվածի 1-ին մասի, ինչպես նաև «Ճանապարհային երթևեկության անվտանգության մասին» ՀՀ օրենքի 23-րդ հոդվածի 3-րդ մասի և ՀՀ ճանապարհային երթևեկության կանոնները և տրանսպորտային միջոցների շահագործումն արգելող անսարքությունների և պայմանների ցանկը հաստատելու մասին ՀՀ կառավարության 2007 թվականի հունիսի 28-ի թիվ 955-Ն որոշման 36-րդ կետի պահանջներին հակասող գործողություններ, այն է՝ իր վարած ավտոմեքենայի ընթացքի ուղղությամբ՝ ձախից դեպի աջ կողմը երթևեկելի մասը՝ Տերյան փողոցը արդեն իսկ հատող հետիոտն Գոհար Էռնեստի Խանումյանի առկայության տվյալ պայմաններում, սկսելով երթևեկությունը՝ հնարավորություն չտալով վերջինիս ավարտելու ընտրված ուղղությամբ երթևեկելի մասի հատումը, ստեղծել է վթարային իրադրություն երթևեկության մասնակիցների, այդ թվում՝ հետիոտն Գոհար Էռնեստի Խանումյանի համար, որի արդյունքում իր վարած ավտոմեքենայի առջևի կենտրոնական հատվածով վրաերթի է ենթարկել նրան, ինչի հետևանքով վերջինիս առողջությանն անզգուշությամբ պատճառել է ծանր վնաս՝ զույգ ոլոքների դրսային և միջային կոճերի փակ, ներհոդային, բազմաբեկոր, տեղաշարժված կոտրվածքների ձևով, դրանով իսկ պայմանավորել է տվյալ վրաերթի առաջացումը՝ ինքն իրեն զրկելով այն կանխելու տեխնիկական հնարավորությունից::
Բենո Արայիկի Միրզոյանի վերաբերյալ ՀՀ ոստիկանության ինֆորմացիոն կենտրոնում (2025 թվականի դեկտեմբերի 16-ի տեղեկանքում) առկա չեն տվյալներ այն մասին, որ այլ քրեական վարույթներով նա նախկինում տուժողի հետ հաշտության հիմքով ազատվել է քրեական պատասխանատվությունից և վերջինս քրեական պատասխանատվության է կանչվել միայն սույն քրեական վարույթով: Ըստ տեղեկանքում առկա տվյալների և ըստ ՀՀ քրեական օրենսգրքի 93-րդ հոդվածի տրամաբանության՝ Բենո Արայիկի Միրզոյանը հանդիսանում է դատվածություն չունեցող անձ:

Դատական նիստում արտահայտված դիրքորոշումները.
2025 թվականի դեկտեմբերի 16-ին մեղադրյալ Բ.Միրզոյանը դատական նիստի ընթացքում հայտնեց, որ իր և տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնություն, ուստի խնդրեց նշված հիմքով իր նկատմամբ հարուցված քրեական հետապնդումը դադարեցնել: Մեղադրյալը նշեց նաև, որ գիտակցում է վերոհիշյալ հիմքով քրեական հետապնդման դադարեցման բնույթը և հետևանքը:
Պաշտպան Է.Բեգլարյանը խնդրեց բավարարել Բենո Միրզոյանի միջնորդությությունը և վերջինիս նկատմամբ դադաևեցնել քրեական հետապնդումը, իսկ քրեական վարույթը կարճել:
Տուժող Գոհար Խանումյանը հայտնեց, որ հաշտվել է Բենո Միրզոյանի հետ, նշեց նաև, որ մեղադրայլը ամբողջապես հատուցել է իրեն պատճառված վնասը:
Տուժողի լիազոր ներկայացուցիչ Լ.Զեյնալյանը առարկություն չներկայացրեց տուժողի հետ հաշտության հիմքով Բ.Միրզոյանի նկատմամբ քրեական հետապնդումը դադարեցնելու դեմ:
Հանրային մեղադրող Հ.Ավետյանը չառարկեց տուժողի հետ հաշտության հիմքով Բ.Միրզոյանի նկատմամբ քրեական հետապնդումը դադարեցնելու դեմ:

Դատարանի պատճառաբանություններն ու եզրահանգումը.
ՀՀ քրեական օրենսգրքի 17-րդ հոդվածի համաձայն՝
«1. Հանցանքները դասակարգվում են չորս խմբի` ոչ մեծ ծանրության, միջին ծանրության, ծանր և առանձնապես ծանր:
2. Ոչ մեծ ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 2 տարի ժամկետով ազատազրկումը, կամ որոնց համար նախատեսված է ազատությունից զրկելու հետ չկապված պատիժ:
3. Միջին ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 5 տարի ժամկետով ազատազրկումը:
(...)»:
ՀՀ քրեական օրենսգրքի 82-րդ հոդվածի համաձայն՝
«1. Եթե անձն առաջին անգամ է հանցանք կատարել, ապա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նրա ու տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնությունը, բացառությամբ այն դեպքերի, երբ կատարված հանցանքում առկա են ընտանիքում բռնության հատկանիշներ:
(...)
5. Նախկինում սույն հոդվածով նախատեսված հիմքով քրեական պատասխանատվությունից ազատված անձը չի կարող նույն հիմքով կրկին ազատվել քրեական պատասխանատվությունից»:
ՀՀ քրեական օրենսգրքի 342-րդ հոդվածի 1-ին մասի համաձայն՝
«1. Ավտոմեքենա կամ մեխանիկական այլ տրանսպորտային միջոց վարող անձի կողմից ճանապարհային երթևեկության անվտանգության ապահովմանն ուղղված պահանջ կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոն խախտելը, որը մարդու առողջությանն անզգուշությամբ պատճառել է ծանր կամ միջին ծանրության վնաս՝
պատժվում է տուգանքով՝ տասնապատիկից երեսնապատիկի չափով, կամ հանրային աշխատանքներով՝ հարյուրից երկու հարյուր ժամ տևողությամբ, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` երկուսից հինգ տարի ժամկետով, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ առավելագույնը երեք տարի ժամկետով:»:
ՀՀ քրեական դատավարության օրենսգրքի 12-րդ հոդվածի համաձայն՝
«1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(...)
12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից.
(...)
4. Սույն հոդվածի 1-ին մաuի 11-14-րդ կետերով նախատեսված հանգամանքների առկայությունը քրեական հետապնդումը բացառող չէ, եթե անձն առարկում է դրա դեմ այն հիմքով, որ չի կատարել իրեն մեղսագրվող արարքը: Այu դեպքում քրեական վարույթը շարունակվում է ընդհանուր կարգով, սակայն մեղադրական վերդիկտ կայացնելու դեպքում այդ անձի նկատմամբ պատիժ չի նշանակվում»:
ՀՀ քրեական դատավարության օրենսգրքի 13-րդ հոդվածի համաձայն՝
«1. Քրեական վարույթը ենթակա է կարճման, եթե`
(...)
3) մեղադրյալի նկատմամբ դադարեցվել է քրեական հետապնդումը, և սպառվել են վարույթը շարունակելու բոլոր հնարավորությունները.
(...)»:
ՀՀ քրեական դատավարության օրենսգրքի 315-րդ հոդվածի համաձայն՝
«1. Սույն օրենսգրքի 12-րդ հոդվածի 1-ին մասի 3-14-րդ կետերով նախատեսված որևէ հանգամանքի առկայության դեպքում, երբ դա հնարավոր է առանց ապացույցների հետազոտման, դատարանը որոշում է կայացնում քրեական հետապնդումը դադարեցնելու և վարույթը կարճելու մասին: Եթե քրեական հետապնդումը բացառող հանգամանքը վերաբերում է մեղադրյալներից մեկին, ապա քրեական հետապնդումը դադարեցվում է միայն նրա նկատմամբ՝ առանց վարույթը կարճելու:
2. Քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները: Վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
3. Քրեական հետապնդումը դադարեցնելու և վարույթը կարճելու մասին որոշման պատճենն ուղարկվում է հանրային մեղադրողին և վարույթի մասնավոր մասնակիցներին»:
Շարադրված իրավադրույթների լույսի ներքո վերլուծելով վերը արձանագրված փաստական տվյալները՝ Դատարանը փաստում է, որ մեղադրյալի և տուժողի միջև առկա է հաշտության վերաբերյալ ինքնուրույն ու ազատ կամարտահայտության վրա հիմնված փոխադարձ համաձայնություն: Դատարանն արձանագրում է նաև, որ մեղադրյալ Բենո Միրզոյանին մեղսագրվում է միջին ծանրության հանցանքի կատարում, իսկ վերջինիս վերաբերյալ ՀՀ ոստիկանության ինֆորմացիոն կենտրոնում (2025 թվականի դեկտեմբերի 16-ի տեղեկանքում) առկա չեն տվյալներ այն մասին, որ այլ քրեական վարույթներով նա նախկինում տուժողի հետ հաշտության հիմքով ազատվել է քրեական պատասխանատվությունից: Բացի այդ՝ ըստ տեղեկանքում առկա տվյալների՝ Բենո Միրզոյանը հանդիսանում է դատվածություն չունեցող անձ:
Հիմք ընդունելով վերոգրյալը՝ Դատարանը գտնում է, որ մեղադրյալի և տուժողի միջև առկա հաշտության վերաբերյալ փոխադարձ համաձայնությունը՝ տվյալ դեպքում, այլևս բացառում է մեղադրյալի նկատմամբ քրեական հետապնդումը, որպիսի պայմաններում՝ այն ենթակա է դադարեցման:
Անդրադառնալով տուժող Գոհար Խանումյանի լիազոր ներկայացուցիչ Լուսինե Զեյնալյանի կողմից ներկայացված գույքային հարցին և հիմք ըննդունելով այն հանգամանքը, որ տուժողը դատական նիստի ընթացքում հրաժարվել է իր կողմից ներկայացված գույքային հայցից, ապա Դատարանը ղեկավարվելով ՀՀ քրեական դատավարության օրենսգրքի 161-րդ հոդվածի 2-րդ մասով, գտնում է, որ գույքային հայցի վարույթը պետք է կարճել:
Վարութային ծախսերի հարցը համարել լուծված։
Անդրադառնալով խափանման միջոցի հարցին, Դատարանը գտնում է, որ մեղադրյալ Բենո Միրզոյանի նկատմամբ ընտրված խափանման միջոցը` բացակայելու արգելքը, պետք է թողնել անփոփոխ` մինչև որոշման օրինական ուժի մեջ մտնելը:
Միաժամանակ Դատարանը գտնում է, որ թիվ ԵԴ1/1443/01/25 (նախաքննական համար՝ 60905122) քրեական վարույթը պետք է կարճել՝ մեղադրյալի նկատմամբ քրեական հետապնդումը դադարեցվելու և վարույթը շարունակելու բոլոր հնարավորությունները սպառվելու հիմքով։
Անդրադառնալով իրեղեն ապացույցների տնօրինման և պահպանման հարցին՝ Դատարանը գտնում է, որ Տոյոտա մակնիշի 11 PP 220 հաշվառման համարանիշի ավտոմեքենան պետք է թողնել Բենո Միրզոյանի տնօրինությանը:
Ելնելով վերոգրյալից և ղեկավարվելով ՀՀ քրեական օրենսգրքի 82-րդ, ՀՀ քրեական դատավարության օրենսգրքի 12-րդ, 13-րդ և 315-րդ հոդվածներով. Դատարանը.


Ո Ր Ո Շ Ե Ց

Բենո Արայիկի Միրզոյանի նկատմամբ ՀՀ քրեական օրենսգրքի 342-րդ հոդվածի 1-ին մասով հարուցված քրեական հետապնդումը դադարեցնել՝ տուժող Գոհար Էռնեստի Խանումյանի հետ մեղադրյալի հաշտության հիմքով:
Տուժող Գոհար Խանումյանի լիազոր ներկայացուցիչ Լուսինե Զեյնալյանի կողմից ներկայացված գույքային հարցի մասով վարույթը կարճել:
Բենո Արայիկի Միրզոյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ` մինչև որոշման օրինական ուժի մեջ մտնելը:
Թիվ ԵԴ1/1443/01/25 (նախաքննական համար՝ 60905122) քրեական վարույթը կարճել՝ մեղադրյալի նկատմամբ քրեական հետապնդումը դադարեցվելու և վարույթը շարունակելու բոլոր հնարավորությունները սպառվելու հիմքով։
Վարույթում առկա ապացույցների տնօրինման հարցը լուծել ըստ ՀՀ քրեական դատավարության օրենսգրքով և սույն դատավճռի պատճառաբանական մասով սահմանված կարգի:
Որոշումը կարող է բողոքարկվել ՀՀ վերաքննիչ քրեական դատարան՝ ստանալու պահից մեկամսյա ժամկետում:




ԴԱՏԱՎՈՐ՝ Ռ. ՍՄԲԱՏՅԱՆ