ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

17.10.2025թ. թիվ ԵԴ1/1426/01/25 ք. Երևան
Երևան քաղաքի առաջին ատյանի ընդհանուր իրավասության քրեական դատարանը հետևյալ կազմով՝

Նախագահող դատավոր Կ.Ֆարխոյան
քարտուղարությամբ Մ. Բոզոյանի
մասնակցությամբ հանրային մեղադրող Դ. Բադալյանի
մեղադրյալ Ա. Գրիգորյանի

Դռնբաց դատական նիստում, դատարանում, քննեց վարույթն ըստ մեղադրանքի՝ Արսեն Գևորգի Գրիգորյանի, ծնված 26.01.1996 թվականին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին մեկ երեխա, աշխատում է « Էնի Ռոզ» ՍՊԸ-ում որպես առաքիչ, դատվածություն չունեցող, հաշվառված և բնակվող Երևան քաղաքի Արտաշատի խճուղի 101/3 տուն հասցեում:
ՀՀ ՔԿ ԵՔՔՎ ճանապարհատրանսպորտային հանցագործությունների քննության բաժնում 21.03.2024 թվականին նախաձեռնվել է թիվ 60106224 քրեական վարույթը ՀՀ քրեական օրենսգրքի 344 հոդվածի 1-րդ մասով: (հատոր 1, վ.թ. 6-7):
2024 թվականի օգոստոսի 09-ին ստացվել է ՀՀ ՔԿ ԵՔՔՎ Երևան քաղաքի Ավան և Նոր Նորք վարչական շրջանների քննչական բաժին։
Երևան քաղաքի Ավան և Նոր Նորք վարչական շրջանների դատախազության ավագ դատախազ Ա. Մեժլումյանի 15.04.2025 թվականի որոշմամբ թիվ 60-1062-24 քրեական վարույթով Արսեն Գևորգի Գրիգորյանի նկատմամբ ՀՀ քրեական օրենսգրքի 344-րդ հոդվածի 1-րդ մասով հարուցվել է հանրային քրեական հետապնդում: (հատոր 1, վ.թ. 25-26):
2025 թվականի ապրիլի 16-ին Արսեն Գևորգի Գրիգորյանի նկատմամբ որպես խափանման միջոց է ընտրվել բացակայելու արգելքը: (հատոր 1, վ.թ. 35-36):
Սույն քրեական վարույթը մեղադրական եզրակացությամբ Երևան քաղաքի առաջին ատյանի ընդհանուր իրավասության քրեական դատարան է ուղարկվել 18.04.2025 թվականին, որը դատարանում ստացվել է 21․04․2025 թվականին և նույն օրը մակագրվել է դատավոր Կ. Ֆարխոյանին, իսկ 22.04.2025 թվականին հանձնվել է դատավոր Կ. Ֆարխոյանի աշխատակազմին:
2025 թվականի ապրիլի 22-ին Երևան քաղաքի առաջին ատյանի ընդհանուր իրավասության քրեական դատարանի դատավոր Կ. Ֆարխոյանը որոշում է կայացրել վարույթը ստանձնելու և նախնական դատալսումներ նշանակելու մասին։
2025 թվականի հոկտեմբերի 17-ին որոշում է կայացվել հիմնական դատալսումներ նշանակելու մասին:
2025 թվականի հոկտեմբերի 17-ին մեղադրյալ Արսեն Գևորգի Գրիգորյանի նկատմամբ կայացվել է մեղադրական վերդիկտ:
Նախաքննական մարմնի կողմից Արսեն Գևորգի Գրիգորյանին մեղադրանք է ներկայացվել պատժի սպառնալիքով արգելված այն արարքի կատարման համար, որ նա զրկված լինելով տրանսպորտային միջոցներ վարելու իրավունքից 2023 թվականի հունիսի 15-ին՝ ժամը 00։15-ի սահմաններում, Երևան քաղաքի Միասնիկյան փողոցում վարել է «Ֆորդ» մակնիշի 008 CC 61 հաշվառման համարանիշի տրանսպորտային միջոցը, ինչի վերաբերյալ կազմվել է վարչական իրավախախտման վերաբերյալ թիվ 8180255396 արձանագրությունը։
Հիմնական դատալսումների ընթացքում մեղադրյալ Արսեն Գևորգի Գրիգորյանը հայտնեց, որ պաշտպան ունենալ չի ցանկանում, որը կապված չէ իր նյութական դրության հետ, ներկայացված մեղադրանքում իրեն լիովին մեղավոր է ճանաչում և ցուցմունք տվեց այն մասին, որ պատշաճ ծանուցված է եղել տրանսպորտային միջոց վարելու իրավունքից զրկված լինելու մասին: Կոնկրետ օրը և ժամը չի հիշում՝ ՀՀ ոստիկանության պարեկային ծառայության աշխատակիցը կանգնեցրել է ավտոմեքենան փաստաթղթերը ստուգելու համար, ինքը ոստիկանության պարեկային ծառայության աշխատակցին հայտնել է, որ իրեն զրկել են տրանսպորտային միջոցներ վարելու իրավունքից, որի մասին պատշաճ ծանուցված է եղել։ Դրանից հետո ոստիկանության աշխատակիցը կազմել է համապատասխան արձանագրությունը, որը ստորագրվել է իր կողմից։
Մեղադրյալ Արսեն Գևորգի Գրիգորյանին մեղսագրվող հանցավոր արարքը, բացի նրա կողմից տված խոստովանական ցուցմունքից հիմնավորվեց նաև հիմնական դատալսումների ընթացքում հետազոտված թույլատրելի ապացույցներով.
-ՀՀ ոստիկանության պարեկային ծառայության 2023 թվականի հունիսի 15-ին կազմված թիվ 8180255396 վարչական իրավախախտման վերաբերյալ գործով արձանագրության զննությամբ, համաձայն որի ՀՀ ոստիկանության պարեկային ծառայության ԵՔՎ ՊԾ 2-րդ գումարտակի 2-րդ վաշտի կրտսեր պարեկ, Վահե Վահագի Մեսրոպյանը (08378) 2023 թվականի հունիսի 15-ին, ժամը՝ 00։20-ին կազմել է արձանագրություն այն մասին, որ քաղաքացի Արսեն Գևորգի Գրիգորյանը (ծնված 26․01․1990 թվական, բնակվող՝ քաղաք Երևան, Արտաշատի խճուղի 101/3 տուն հասցեում) տրանսպորտային միջոցներ վարելու իրավունքից զրկված լինելով ժամը՝ 00։15-ին Երևան քաղաքի Միասնիկյան պողոտայում վարել է «Ֆորդ» մակնիշի 008 CC 61 հաշվառման համարանիշի տրանսպորտային միջոցը։ Վարչական իրավախախտում կատարած անձի բացատրությունը, դիտողությունը, ստորագրությունը բաժնում առկա է ստորագրություն։ Խախտման ծածկագիրն է՝ 201․1։
Ճանապարհային ոստիկանության էլեկտրոնային ռեգիստրի տվյալների զննությամբ պարզվեց, որ վարորդական վկայականի տվյալներ բաժնում առկա է B (05-04-2014), C (05-04-2014) վարորդական վկայականի կարգերը։ Կարգավիճակը՝ զրկված, թողարկված՝ 09-11-2021թ․։ Զրկումներ՝ սկիզբը՝ 04-06-2023թ․, ավարտ 04-06-2024 թ․։
ՀՀ ոստիկանության պարեկային ծառայության 2023 թվականի հունիսի 4-ին կազմված վարչական իրավախախտման վերաբերյալ թիվ 8180254266 արձանագրության և որոշման զննությամբ պարզվեց, որ 2023 թվականի հունիսի 04-ին ՀՀ ոստիկանության պարեկային ծառայության 3-րդ գումարտակի 2-րդ վաշտի կրտսեր պարեկ Ալբերտ Հովհաննեսի Ալեքսանյանը (10719) 2023 թվականի հունիսի 04-ին, ժամը՝ 10։15-ին կազմել է արձանագրություն այն մասին, որ քաղաքացի Արսեն Գևորգի Գրիգորյանը (ծնված 26․01․1990 թվական, բնակվող՝ քաղաք Երևան, Արտաշատի խճուղի 101/3 տուն հասցեում) խախտել է «Ճանապարհային երթևեկության անվտանգության ապահովման մասին» ՀՀ օրենքի 18-րդ հոդվածի 1-ին մասի «ը» ենթակետը՝ Երևան քաղաքի Տերյան փողոցում ժամը 09։22-ին «Ֆորդ» մակնիշի 008 CC 61 հաշվառման համարանիշների տրանսպորտային միջոցը վարել է առանց հաշվառման համարանիշների, որը նախատեսված է ՀՀ ՎԻՎ օր-ի 123*5-րդ հոդվածի 4-րդ մասով։ Արձանագրությանը ծանոթացա, իմ իրավունքների ու պարտականությունների մասին քաղվածը և խախտման քննարկման վայրի ու ժամկետի վերաբերյալ ծանուցումն ստացա բաժնում առկա է քաղաքացու ստորագրությունը։ Խախտման ծածկագիրը 15․1։ Վերոնշյալ որոշմամբ Արսեն Գրիգորյանի տրանսպորտային միջոցներ վարելու իրավունքը ՎԻՎ ՀՀ օրենսգրքի 123*5-րդ հոդվածի 4-րդ մասի համաձայն զրկել մեկ տարի ժամկետով։ Որոշման պատճենը և կատարման մասին քաղվածքը ստացա բաժնում առկա է ստորագրություն։ / հատոր 1, վ.թ. 3,4,5,15-16 /։
-Արտավարութային փաստաթուղթ ճանաչելու մասին 14.04.2025 թվականի որոշմամբ, համաձայն որի՝ թիվ 60-1062-24 քրեական վարույթով Արսեն Գևորգի Գրիգորյանի վերաբերյալ՝ ՀՀ ՆԳՆ ոստիկանության Պարեկային ծառայության 2023 թվականի հունիսի 15-ին կազմված թիվ 8180255396 վարչական իրավախախտման վերաբերյալ գործով արձանագրությունը, ճանապարհային ոստիկանության էլեկտրոնային ռեգիստրի տվյալները և թիվ 8180254266 վարչական իրավախախտման վերաբերյալ արձանագրությունը և որոշումը ճանաչվել են որպես արտավարութային փաստաթուղթ։ /հատոր 1, վ.թ. 17/:
Դատարանն արձանագրում է, որ հիմնական դատալսումների ընթացքում պատշաճ իրավական ընթացակարգով թույլատրելի բոլոր ապացույցները հանգամանորեն հետազոտվել են՝ դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, դատարանը հաստատված է համարում, որ Արսեն Գևորգի Գրիգորյանը զրկված լինելով տրանսպորտային միջոցներ վարելու իրավունքից, 2023 թվականի հունիսի 15-ին՝ ժամը 00։15-ի սահմաններում, Երևան քաղաքի Միասնիկյան փողոցում վարել է «Ֆորդ» մակնիշի 008 CC 61հաշվառման համարանիշի տրանսպորտային միջոցը, ինչի վերաբերյալ կազմվել է վարչական իրավախախտման վերաբերյալ թիվ 8180255396 արձանագրությունը
Դատարանը հանգում է այն հետևության, որ մեղադրյալ Արսեն Գևորգի Գրիգորյանը կատարել է իրեն մեղսագրված արարքը, որի համար կիրառելի է ՀՀ քրեական օրենսգրքի 344-րդ հոդվածի 1-ին մասը:
Դատարանը հաստատված համարելով հանցագործության և դրա կատարման մեջ Արսեն Գևորգի Գրիգորյանի մեղքի ապացուցված լինելը, գտնում է, որ նա ենթակա է պատժի կատարածի համար:
Որպես Արսեն Գևորգի Գրիգորյանի պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ մեղադրյալը տվել է խոստովանական ցուցմունքներ, զղջացել է կատարածի համար, և նրա խնամքին է գտնվում մեկ անչափահաս երեխա:
Արսեն Գևորգի Գրիգորյանի պատասխանատվությունը և պատիժը ծանրացնող հանգամանքներ առկա չեն:
Դատարանը մեղադրյալի նկատմամբ պատիժ նշանակելիս հաշվի է առնում ինչպես նրա կատարած գործողությունների բնույթն ու հանրության համար վտանգավորության աuտիճանը, այնպես էլ նրա անձը բնութագրող տվյալները։
Մեղադրյալի նկատմամբ պատիժ նշանակելիս դատարանը ելնում է այն իրողությունից, որ օրենքի առաջնային պահանջը պատժի արդարացիությունն է, որը որպես քրեական իրավունքի սկզբունք ձևակերպված է ՀՀ քրեական օրենսգրքի 7-րդ հոդվածում. հանցանք կատարած անձի նկատմամբ կիրառվող պատիժը պետք է լինի արդարացի` համապատասխանի հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ ու բավարար լինեն նրան ուղղելու և նոր հանցագործությունները կանխելու համար:
ՀՀ քրեական օրենսգրքի 344-րդ հոդվածի 1-ին մասի սանկցիան պատիժ է նախատեսում տուգանքով՝ առավելագույնը տասնհինգապատիկի չափով, կամ հանրային աշխատանքներով` առավելագույնը հարյուր հիսուն ժամ տևողությամբ, կամ կարճաժամկետ ազատազրկմամբ՝ առավելագույնը մեկ ամիս ժամկետով:
Նույն օրենսգրքի 59-րդ հոդվածի 3-րդ և 5-րդ մասերի համաձայն`
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով:
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո: Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
Դատարանը՝ հիմք ընդունելով մեղադրյալի անձը բնութագրող հանգամանքները, նրա պատասխանատվությունը և պատիժը մեղմացնող հանգամանքների առկայությունն ու ծանրացնող հանգամանքի բացակայությունը, ինչպես նաև հաշվի առնելով այն հանգամանքը, որ մեղադրվող արարքի կատարման ժամանակահատվածում «Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն` ՀՀ նվազագույն ամսական աշխատավարձը 75.000 ՀՀ դրամ է, և ղեկավարվելով ՀՀ քրեական օրենսգրքի 7-րդ հոդվածի 1-ին, 55-րդ և 69-րդ հոդվածներով, գտնում է, որ Արսեն Գևորգի Գրիգորյանի նկատմամբ պետք է պատիժ նշանակել ՀՀ քրեական օրենսգրքի 344-րդ հոդվածի 1-ին մասի սանկցիայով նախատեսված տուգանքի ձևով՝ նվազագույն աշխատավարձի հնգապատիկի՝ 375.000 ՀՀ դրամի չափով: Դատարանը եկել է այդ եզրահանգման, քանի որ այդպիսի պատժատեսակ նշանակելու միջոցով հնարավոր է ապահովել ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակը, այն է՝ վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
ՀՀ քրեական օրենսգրքի 59-րդ հոդվածի 8-րդ մասի համաձայն՝ «8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ (․․․)»
Քննության առնելով դատապարտված մեղադրյալի նկատմամբ ընտրված խափանման միջոցի հարցը՝ դատարանը գտնում է, որ այն պետք է թողնել անփոփոխ մինչև դատավճիռն օրինական ուժի մեջ մտնելը :
Արտավարութային փաստաթուղթ ճանաչված՝ ՀՀ ոստիկանության պարեկային ծառայության 2023 թվականի հունիսի 15-ին կազմված թիվ 8180255396 վարչական իրավախախտման վերաբերյալ գործով արձանագրությունը, ճանապարհային ոստիկանության էլեկտրոնային ռեգիստրի տվյալները և թիվ 8180254266 վարչական իրավախախտման վերաբերյալ արձանագրությունը և որոշումը պետք է պահել քրեական վարույթում, դրա պահպանման համար նախատեսված ողջ ժամանակահատվածում:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 9-րդ, 270-րդ, 347-350-րդ հոդվածներով, դատարանը


Վ Ճ Ռ Ե Ց
Արսեն Գևորգի Գրիգորյանին մեղավոր ճանաչել ՀՀ քրեական օրենսգրքի 344 հոդվածի 1-ին մասով նախատեսված հանցանքում և նրա նկատմամբ որպես պատիժ նշանակել տուգանք՝ նվազագույն աշխատավարձի հնգապատիկի՝ 375.000 ՀՀ դրամի չափով:
ՀՀ քրեական օրենսգրքի 59-րդ հոդվածի կարգով՝ Արսեն Գևորգի Գրիգորյանին նկատմամբ նշանակված տուգանքի վճարման համար սահմանել 10-ամսյա ժամկետ՝ թույլատրելով Արսեն Գևորգի Գրիգորյանին, սույն դատավճիռն օրինական ուժի մեջ մտնելուց հետո՝ յուրաքանչյուր ամիս վճարել 37.500 ՀՀ դրամից ոչ պակաս գումար՝ մինչև սույն դատավճռով նշանակված տուգանքի գումարի լրիվ մարումը։
Արսեն Գևորգի Գրիգորյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ մինչև դատավճիռն օրինական ուժի մեջ մտնելը:
Արտավարութային փաստաթուղթ ճանաչված՝ ՀՀ ոստիկանության պարեկային ծառայության 2023 թվականի հունիսի 15-ին կազմված թիվ 8180255396 վարչական իրավախախտման վերաբերյալ գործով արձանագրությունը, ճանապարհային ոստիկանության էլեկտրոնային ռեգիստրի տվյալները և թիվ 8180254266 վարչական իրավախախտման վերաբերյալ արձանագրությունը և որոշումը պահել քրեական վարույթում, դրա պահպանման համար նախատեսված ողջ ժամանակահատվածում:
Դատավճիռը հատուկ վերանայման կարգով կարող է բողոքարկվել ՀՀ վերաքննիչ քրեական դատարան՝ այն ստանալու օրվանից մեկամսյա ժամկետում :

ԴԱՏԱՎՈՐ՝ Կ.ՖԱՐԽՈՅԱՆ