ԵԴ1/1417/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
2025 թվականի մայիսի 06-ին քաղաք Երևան

Երևան քաղաքի առաջին ատյանի ընդհանուր իրավասության քրեական դատարանը /այսուհետ նաև` Դատարան/` հետևյալ կազմով
Նախագահությամբ դատավոր՝ Վ.Մելիքյանի
Քարտուղարությամբ՝ Մ.Ներսիսյանի
Մասնակցությամբ.
Հանրային մեղադրող՝ Ն.Մհերյանի
Պաշտպան՝ Վ.Հովսեփյանի
Մեղադրյալ՝ Գ.Գրիգորյանի

դռնբաց դատական նիստում արագացված վարույթի կիրառմամբ, քննության առնելով քրեական գործն ըստ մեղադրանքի Գուրգեն Էդուարդի Գրիգորյանի (ծնված՝ 26.09.1978թ., Երևան քաղաքում, ազգությամբ հայ, ՀՀ քաղաքացի, ամուսնացած, չդատված, փաստացի բնակվում է ք.Երևան, Վարդանանց 101 տուն հասցեում) ՀՀ քրեական օրենսգրքի 344-րդ հոդվածի 1-ին մասով երկու դրվագով,
1.Գործի դատավարական նախապատմությունը.
30.01.2023 թվականին ՀՀ ՔԿ ԵՔՔՎ ՃՏՀ քննության բաժնում ՀՀ քրեական օրենսգրքի 344-րդ հոդվածի 1-ին մասով նախաձեռնվել է թիվ 90199223 քրեական վարույթը /հատոր 1-ին, գ.թ. 7/:
04.01.2025 թվականին Երևան քաղաքի Կենտրոն և Նորք-Մարաշ վարչական շրջանների դատախազության դատախազ Ն.Մհերյանի որոշմամբ Գուրգեն Էդուարդի Գրիգոյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 344-րդ հոդվածի 1-ին մասով /հատոր 1-ին, գ.թ. 156-157/:
Նախաքննական մարմնի որոշմամբ մեղադրյալ Գուրգեն Էդուարդի Գրիգոյանի նկատմամբ խափանման միջոց է ընտրվել բացակայելու արգելքը /հատոր 1-ին, գ.թ. 160-161/:
Թիվ ԵԴ1/1417/01/25 (60166223 նախաքննական համար) քրեական գործն ըստ մեղադրանքի՝ Գուրգեն Գրիգորյանի ՀՀ քրեական օրենսգրքի 344-րդ հոդվածի 1-ին մասով երկու դրվագով 17.04.2025 թվականի գրությամբ ուղարկվել է Երևան քաղաքի առաջին ատյանի ընդհանուր իրավասության քրեական դատարան, մուտքագրվել է 2025 թվականի ապրիլի 21-ին և նույն օրը համակարգչային ծրագրի միջոցով իրականացվող գործերի բաշխմամբ մակագրվել է դատավորին:
Դատարանի 23.04.2025 թվականի որոշմամբ քրեական գործը վարույթ է ստանձնվել և նախնական դատալսումներ է նշանակվել:
Գուրգեն Էդուարդի Գրիգորյանի նկատմամբ ՀՀ քրեական օրենսգրքի 344-րդ հոդվածի 1-ին մասով երկու դրվագով քրեական հետապնդում է հարուցվել այն բանի համար, որ նա տրանսպորտային միջոց վարելու իրավունքը վեց ամիս ժամկետով կասեցված լինելու պայմաններում վարել է տրանսպորտային միջոց:
Այսպես.
Գուրգեն Էդուարդի Գրիգորյանը ՀՀ ոստիկանության «Ճանապարհային ոստիկանության» ծառայության կողմից կայացված թիվ 2215145632, 2215200254, 2215215007, 2215243974 և 2215259819 որոշումներով վեց ամիս ժամկետով տրանսպորտային միջոցներ վարելու իրավունքը կասեցված լինելու պայմաններում, պատշաճ տեղեկացված լինելով այդ մասին, նշված ժամկետը չլրացած՝ 2022 թվականի դեկտեմբերի 19-ին՝ ժամը 17:30-ին Երևան քաղաքի Վարդանանց փողոցում վարել է «Ֆորդ» մակնիշի 60 AG 008 հաշվառման համարանիշի տրանսպորտային միջոցը, ինչի վերաբերյալ ՀՀ ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի աշխատակիցների կողմից նույն օրը ժամը 17:40-ին կազմվել է վարչական իրավախախտման վերաբերյալ թիվ 8180167366 արձանագրությունը:
Բացի այդ, Գուրգեն Էդուարդի Գրիգորյանը ՀՀ ոստիկանության «Ճանապարհային ոստիկանության» ծառայության կողմից կայացված թիվ 2215145632, 2215200254, 2215215007, 2215243974 և 2215259819 որոշումներով վեց ամիս ժամկետով տրանսպորտային միջոցներ վարելու իրավունքը կասեցված լինելու պայմաններում, պատշաճ տեղեկացված լինելով այդ մասին, նշված ժամկետը չլրացած՝ 2023 թվականի հունվարի 10-ին՝ ժամը 18:35-ին Երևան քաղաքի Խորենացու փողոցում վարել է «Ֆորդ» մակնիշի 60 AG 008 հաշվառման համարանիշի տրանսպորտային միջոցը, ինչի վերաբերյալ ՀՀ ոստիկանության պարեկային ծառայության Երևան քաղաքի գնդի 4-րդ գումարտակի 2-րդ վաշտի աշխատակիցների կողմից նույն օրը ժամը 18:40-ին կազմվել է վարչական իրավախախտման վերաբերյալ թիվ 8180242746 արձանագրությունը:
Արագացված վարույթ.
Նախնական դատալսումների փուլում մեղադրյալ Գուրգեն Էդուարդի Գրիգորյանը միջնորդել է արագացված վարույթ կիրառելու մասին, հայտնելով, որ միջնորդությունը ներկայացրել է կամավոր, խորհրդակցել է պաշտպանի հետ, գիտակցում է արագացված վարույթի կիրառման հետևանքները, առաջադրված մեղադրանքն իրեն պարզ է, համաձայն է մեղադրանքի հետ, իրեն լիովին մեղավոր է ճանաչում առաջադրված մեղադրանքում:
Պաշտպան Վ.Հովսեփյանը հայտնեց, որ մեղադրյալը խորհրդակցել է իր հետ:
Հանրային մեղադրողը չառարկեց արագացված վարույթի կիրառման դեմ:
Դատարանը, համոզվելով, որ առկա են ՀՀ քրեական դատավարության օրենսգրքի 464.1-րդ հոդվածի 1-ին մասով նախատեսված հիմքը և բացակայում են նույն հոդվածի 2-րդ մասով նախատեսված՝ արագացված վարույթի կիրառումը բացառող հանգամանքները, ինչպես նաև մեղադրյալը համաձայն է իրեն մեղսագրվող արարքին, միջնորդությունը ներկայացրել է կամավոր և գիտակցում է իր միջնորդության բնույթը և հետևանքները, որոշում է կայացրել արագացված վարույթ կիրառելու մասին և անցել է լրացուցիչ դասալսումների փուլ:
Դատարանի իրավական վերլուծությունները.
Դատարանը հիմք ընդունելով մեղադրանքն ամբողջ ծավալով մեղադրյալ Գուրգեն Էդուարդի Գրիգորյանի կողմից կամովին ու գիտակցաբար ընդունելու և դրա հետ համաձայն լինելու փաստերը, հանգում է հետևության, որ նա մեղավորությամբ կատարել է իրեն ՀՀ քրեական օրենսգրքի 344-րդ հոդվածի 1-ին մասով երկու դրվագով մեղսագրվող արարքները, դրանք կատարելու համար ենթակա է քրեական պատասխանատվության և պատժի:
Ուսումնասիրելով և գնահատելով գործով ձեռք բերված և հետազոտված ապացույցները վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, Դատարանն ապացուցված է համարում մեղադրյալ Գուրգեն Էդուարդի Գրիգորյանի կողմից հանցավոր արարքներ կատարելը:
Արարքները, որոնց կատարման մեջ մեղադրվում է վերջինս, համապատասխանում ՀՀ քրեական օրենսգրքի 344-րդ հոդվածի 1-ին մասի հատկանիշներին և ճիշտ է որակված:
Ապացուցված է նաև մեղադրյալ Գուրգեն Էդուարդի Գրիգորյանի կողմից նշված արարքները կատարելը և մեղավորությունը տվյալ հանցանքները կատարելու մեջ:
Մեղադրյալ Գուրգեն Էդուարդի Գրիգորյանի նկատմամբ պատիժ նշանակելիս դատարանը հաշվի է առնում ինչպես կատարած հանցագործության բնույթն ու հասարակական վտանգավորության աստիճանը, այնպես էլ նրա անձը:
Դատարանը մեղադրյալ Գուրգեն Էդուարդի Գրիգորյանի անձը բնութագրող և պատասխանատվությունն ու պատիժը մեղմացնող հանգամանքներ է արձանագրում, մեղքն ընդունելը, անկեղծորեն զղջալը և նախկինում դատապարտված չլինելը:
Դատարանը մեղադրյալ Գուրգեն Էդուարդի Գրիգորյանի պատասխանատվությունն ու պատիժը ծանրացնող հանգամանք չի արձանագրում:
Դատարանը, նպատակ ունենալով վերականգնելու սոցիալական արդարությունը, ուղղելու պատժի ենթարկված անձին, ինչպես նաև կանխելու հանցագործությունները և հաշվի առնելով Գուրգեն Էդուարդի Գրիգորյանի անձը, նրան բնութագրող դրական տվյալները, նրա պատասխանատվությունն ու պատիժը մեղմացնող հանգամանքների առկայությունը և ծանրացնող հանգամանքների բացակայությունը, հանգում է հետևության, որ մեղադրյալ Գուրգեն Էդուարդի Գրիգորյանն իր կատարած հանցագործությունների համար ենթակա է պատժի` նվազ խիստ տեսակի նշանակմամբ, քանի որ դրանք կարող են ապահովել պատժի նպատակները:
Միաժամանակ Դատարանը հաշվի առնելով, որ բացակայում է մեղադրյալի կողմից հանցանք կատարելու օրվան նախորդող մեկ տարվա ընթացքում եկամուտները, գտնում է, որ մեղադրյալի նկատմամբ նշանակվելիք տուգանքի ձևով պատժի չափը պետք է սահմանել վերջինիս կողմից հանցանք կատարելու պահին ՀՀ-ում գործող նվազագույն աշխատավարձի չափը, որը մի դեպքում 68.000 ՀՀ դրամ է, իսկ մյուս դեպքում 75.000 ՀՀ դրամ:
Քննության առնելով մեղադրյալ Գուրգեն Էդուարդի Գրիգորյանի նկատմամբ կիրառված խափանման միջոցի հարցը, Դատարանը գտնում է, որ Գուրգեն Էդուարդի Գրիգորյանի նկատմամբ կիրառված բացակայելու արգելք խափանման միջոցը պետք է թողնել անփոփոխ՝ մինչև դատավճռի օրինական ուժի մեջ մտնելը:
Արտավարույթային փաստաթղթերը պետք է թողնել կցված քրեական գործին դրա պահպանության ողջ ժամանակահատվածում:
Քրեական գործով գույքային հայց և դատական ծախսեր առկա չեն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 345-350-րդ, 464.4-րդ և 464.5-րդ հոդվածներով` Դատարանը

Վ Ճ Ռ Ե Ց

Մեղադրյալ Գուրգեն Էդուարդի Գրիգորյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով՝ երկու դրվագով:
ՀՀ քրեական օրենսգրքի 344-րդ հոդվածի 1-ին մասով /1-ին դրվագով/ դատապարտել տուգանքի նվազագույն աշխատավարձի /68.000 ՀՀ դրամ/ հնգապատիկի՝ 340.000 ՀՀ դրամի չափով:
ՀՀ քրեական օրենսգրքի 344-րդ հոդվածի 1-ին մասով /2-րդ դրվագով/ դատապարտել տուգանքի նվազագույն աշխատավարձի /75.000 ՀՀ դրամ/ հնգապատիկի՝ 375.000 ՀՀ դրամի չափով:
ՀՀ քրեական օրենսգրքի 74-րդ հոդվածի կանոններով ՀՀ քրեական օրենսգրքի 344-րդ հոդվածի 1-ին մասով /1-ին դրվագով/ նշանակված 340.000 ՀՀ դրամի չափով տուգանքին լրիվ գումարել ՀՀ քրեական օրենսգրքի 344-րդ հոդվածի 1-ին մասով /2-րդ դրվագով/ նշանակված պատիժը՝ 375.000 ՀՀ դրամի չափով տուգանքը և վերջնական պատիժ նշանակել տուգանք՝ 715.000 ՀՀ դրամի չափով:
Մեղադրյալ Գուրգեն Էդուարդի Գրիգորյանի նկատմամբ կիրառված բացակայելու արգելք խափանման միջոցը թողնել անփոփոխ՝ մինչև դատավճռի օրինական ուժի մեջ մտնելը:
Արտավարութային փաստաթղթերը թողնել կցված քրեական գործին՝ դրա պահպանության ողջ ժամանակահատվածում:
Դատավճիռը կարող է բողոքարկվել ՀՀ վերաքննիչ քրեական դատարան դատավճիռը ստանալու օրվանից հետո՝ մեկամսյա ժամկետում, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով նախատեսված հիմքերով:

ԴԱՏԱՎՈՐ Վ.ՄԵԼԻՔՅԱՆ